16:55 - 03 ապրիլի, 2020
Հայաստանը ռուսական ընկերության հետ որևէ բանակցություն չի վարում՝ կորոնավիրուսի դեմ փորձարկվող «Տրիազավիրին» դեղամիջոցը ներկրելու հարցով |aysor.am|
aysor.am: Այս պահի դրությամբ Հայաստանում որևէ պետական մարմին ռուսական «Մեդսինթեզ» ընկերության հետ բանակցություն չի վարում՝ կորոնավիրուսի դեմ փորձարկման փուլում գտնվող «Տրիազավիրին» դեղամիջոցի խմբաքանակ ներկրելու հարցով:
ԱՆ մամուլի խոսնակ Ալինա Նիկողոսյանը տեղեկացրեց, որ տվյալ դեղորայքը ՌԴ-ից Հայաստան ներկրելու շուրջ նախարարությունը որևէ բանակցություն չի վարում:
Նա խորհուրդ տվեց տեղեկությունը ճշտել պարետատնից, գուցե, այնտեղ որևէ ինֆորմացիա ունենան:
Պարետատան մամուլի հետ կապերի պատասխանատու Մանե Գևորգյանը տեղեկացրեց, որ պարետատունը ևս նման բանակցություններ չի վարում ռուսական կողմի հետ:
«Այս պահի դրությամբ մեր կողմից որևէ բան չկա այս մասով: Սպասում եմ, որ ԱԳՆ-ն ինչ-որ մի բան կասի», - նշեց նա:
Մամուլում շրջանառվող տեղեկությունների համաձայն՝ «Մեդսինթեզ» ընկերության տնօրենների խորհրդի նախագահ Ալեքսանդր Պետրովը հայտարարել էր՝ դեղամիջոցը Հայաստանին մատակարարելու վերաբերյալ ներկայումս բանակցություններ են ընթանում:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)