ՀՀ առողջապահության նախարարություն

«Վերջին տասնամյակներում 80 հազար աղջիկ չի ծնվել». նախարարի հայտարարությունը չափազանցված է ու սխալ |fip.am|

13:51 - 18 նոյեմբերի, 2024

Քննարկվել են համահայկական բժշկական կոնգրեսի առջև դրված խնդիրները

Ուրախ էի ընդունել Հայկական բժշկական միջազգային կոմիտեի (AMIC) գործադիր խորհրդի անդամ, Սան Ռաֆայել սրտաբանական բաժանմունքի կլինիկական ղեկավար, AMADEA բարեգործական հիմնադրամի նախագահ Լիլիան Գրիգորյանին։ Քննարկեցինք Հայկական բժշկական միջազգային կոմիտեի (AMIC) նախաձեռնությամբ 2025 թվականի հուլիսի 3-5-ը Մադրիդում կայանալիք 14-րդ համահայկական բժշկական կոնգրեսի (AMWC2025) առջև դրված խնդիրները: Այդ մասին ասված է ՀՀ առողջապահության նախարար Անահիտ Ավանեսյանի Ֆեյսբուքի էջում: «Կոնգրեսի առանցքում Հայաստանի և սփյուռքահայ բժիշկների համագործակցությունն է, բժշկագիտությանը, Հայաստանում առողջապահության ոլորտի հետագա զարգացմանն ուղղված ռազմավարական ծրագրերը և ներդրումները: Առողջապահության նախարարությունը ակտիվ մասնակցություն է ունենալու AMWC2025-ի աշխատանքներին, իսկ կոնգրեսը կնշանավորվի Իսպանիայի Թագավորության առողջապահության նախարարության և ՀՀ առողջապահության նախարարության միջև համագործակցության պայմանագրի կնքմամբ»,- նշված է գրառման մեջ:

22:26 - 08 նոյեմբերի, 2024

Անահիտ Ավանեսյանը և Գևորգ Պապոյանը մասնակցել են «Բժշկական զբոսաշրջության զարգացումը Հայաստանում» թեմայով քննարկմանը

«Մասնագիտական այն պոտենցիալն ու ձեռքբերումները, որ ունի Հայաստանը բժշկության ոլորտում, պետք է որպես մտավոր կապիտալ արտահանվի բժշկական զբոսաշրջության տեսքով։ Այս ոլորտում դեռ հեռու ենք ցանկալի արդյունքներից, բայց վստահաբար ունենք դրա մեծ ներուժը, և ժամանակն է առաջ շարժվելու»,- նշել է առողջապահության նախարար Անահիտ Ավանեսյանը «Բժշկական զբոսաշրջության զարգացումը Հայաստանում» թեմայով քննարկմանը։ Այս մասին հայտնում են ՀՀ առողջապահության նախարարությունից։ Բաց քննարկումը կազմակերպել է ՀՀ առողջապահության նախարարությունը` Էկոնոմիկայի նախարարության հետ գործակցության արդյունքում։ Քննարկմանը ներկա էին Էկոնոմիկայի նախարար Գևորգ Պապոյանը, Զբոսաշրջության կոմիտեի ղեկավար Լուսինե Գևորգյանը, ԱԺ պատգամավոր Խաչատուր Սուքիասյանը, բժշկական կենտրոնների ղեկավարներ, բժշկական տուրիզմի ոլորտում առավել մեծ փորձ ունեցող կլինիկաների ներկայացուցիչներ, զբոսաշրջության ոլորտի պատասխանատուներ։ Նախարար Ավանեսյանն անդրադարձել է այն հիմնական ուղղություններին, որոնք այժմ բարեփոխման փուլում են` բուժկենտրոնների հիմնորոգում, վերազինում, էլեկտրոնային առողջապահության զարգացում, լիցենզավորման, որակի ստանդարտների և վերահսկողության խստացում։ «Բժշկական տուրիզմ ունենալը ցանկացած երկրի համար մեծ հեղինակություն է և զբոսաշրջային ոլորտի զարգացմանը նպաստող` շատ ավելի եկամտաբեր ուղղություն։ Տուրիզմի զարգացման մեր ռազմավարության մեջ մենք մեծ տեղ ենք հատկացրել առողջապահական տուրիզմին», - նշել է էկոնոմիկայի նախարար Գևորգ Պապոյանը` հայտնելով պատրաստակամություն առողջապահության նախարարության հետ կոնկրետ ենթածրագրերով համագործակցելու։ Նա անդրադարձել է նաև բժշկական սարքավորումների ձեռքբերման պետական լիզինգային ծրագրին։ «Յոլյան» արյունաբանության և ուռուցքաբանության ազգային կենտրոնի մեծ ձեռքբերումների արդյունքում` արյունաբանական և ուռուցքաբանական հիվանդությունները հաղթահարելու համար Հայաստան են գալիս ոչ միայն հայազգիներ, այլև` քաղաքացիներ աֆրիկական երկրներից, Անգլիայից։ Ակնաբուժական, ստոմատոլոգիական, էսթետիկ բժշկությունն այն հիմնական ուղղություներն են, որոնց բուժծառայություններից օգտվելու համար առավել հաճախ են մարդիկ գալիս մեր երկիր։ Որո՞նք են այն հիմնախնդիրները, որ խոչընդոտում են մեր երկրում այս ոլորտի զարգացմանը, ի՞նչ կարող է անել պետությունը Հայաստանը հենց բժշկական զբոսաշրջության առումով աշխարհին ճանաչելի դարձնելու համար. քննարկմանն այս հարցերի շուրջ իրենց առաջարկներն են արել մասնակիցները։

17:24 - 02 նոյեմբերի, 2024

2025-ին առողջապահության նախարարության ծախսերը կնվազեն 3,5 տոկոսով, կապիտալ ծախսերը կավելանան 1,8 տոկոսով |1lurer.am|

1lurer.am: Առողջապահության նախարարության բյուջեն 2025 թվականին կլինի 162 մլրդ 996 մլն դրամ, որը 5,3 մլրդ դրամով պակաս է 2024 թվականի բյուջեով նախատեսված գումարից: Այդ մասին Ազգային ժողովում ՀՀ առողջապահության նախարարության բյուջեի նախագծի քննարկման ժամանակ ասաց ՀՀ ֆինանսների նախարար Վահե Հովհաննիսյանը: Ըստ այդմ՝ ընթացիկ ծախսերով կլինի 3,5 տոկոսի նվազում, իսկ կապիտալ ծախսերի գծով՝ 1,8 տոկոսի, այսինքն՝ 216 մլն դրամի ավելացում: «2024 թվականի բյուջեով նախատեսված էր գումար առողջության համապարփակ ապահովագրության ներդրման դեպքում հատկացման համար: Այսինքն՝ այս գումարը պետք է ծախսվեր առողջապահության համապարփակ ապահովագրության ներդրման դեպքում, և եթե այս գումարը հաշվի չառնենք, ապա 2025 թվականի բյուջեն 2024-ի նկատմամբ ավելացել է 12,7 մլրդ դրամով»,- ասաց Վահե Հովհաննիսյանը: Առողջության համապարփակ ապահովագրության ներդրման համար նախատեսված էր 18 մլրդ դրամ: Քանի որ համակարգը չի ներդրվել, գումարը չի ծախսվել, բայց գումարը, ըստ նախարարի, բաշխվել է տարբեր ուղղություններով: «Եթե 2024 թվականին նախատեսված առողջության համապարփակ ապահովագրության գումարը հաշվի չենք առնում, ապա 2025 թվականի բյուջեն աճում է 8,5 տոկոսով կամ 12,7 մլրդ դրամով, որը բաշխվում է ըստ տարբեր ուղղությունների»,- պարզաբանեց նախարարը:

14:00 - 01 նոյեմբերի, 2024

Ինչ անել, եթե ախտորոշվել է հեպատիտ Ց. որ ծառայություններն են տրամադրվում անվճար

ՀՀ առողջապահության նախարարությունից տեղեկացնում են, որ եթե Ձեզ մոտ հեպատիտ Ց-ի հակամարմինները արագ թեստի արդյունքում դրական են, հաջորդիվ պետք է կատարվի ՊՇՌ հետազոտություն։ «ՀՀ բոլոր քաղաքացիները, որոնք ունեն հեպատիտ Ց-ի դրական հակամարմիններ, կարող են դիմել ԱՆ Ինֆեկցիոն հիվանդությունների ազգային կենտրոն անվճար ՊՇՌ հետազոտության համար, որով հաստատվում կամ ժխտվում է հեպատիտ Ց-ի ախտորոշումը։ ՊՇՌ հետազոտությունը կատարվում է ԱՆՎՃԱՐ։ Հետազոտությունները կազմակերպելուց հետո սկսվում է քաղաքացու հակավիրուսային բուժումը, եթե չկան հակացուցումներ։ Որոշվում է՝ ինչ տևողությամբ պետք է բուժումն անցկացվի՝ 3 կամ 6 ամիս։ Բուժման համար դեղերը տրվում են ԱՆՎՃԱՐ: 2024թ. ՀՀ-ում հաշվառված վիրուսային հեպատիտ Ց հիվանդությամբ պացիենտներին, այդ թվում` ՀՀ քրեակատարողական հիմնարկներում գտնվող և զուգակցված վարակներ (ՁԻԱՀ/ ՄԻԱՎ, տուբերկուլոզ) ունեցող պացիենտներին, անխափան տրամադրվում են հակավիրուսային նորագույն սերնդի դեղեր: Ընդհանուր առմամբ` 2021-2024թթ. 9 ամսվա ընթացքում բուժում է ստացել 3010 պացիենտ, որոնցից 95%-ը` շուրջ 2860-ը, լիովին բուժվել են»,- ասված է հաղորդագրության մեջ:

12:59 - 01 նոյեմբերի, 2024

2024-ին Հայաստանում կարմրուկի 556 դեպք է գրանցվել

ԱՆ հիվանդությունների վերահսկման և կանխարգելման ազգային կենտրոնը ներկայացրել է կարմրուկով պայմանավորված իրավիճակը Հայաստանում: 2024-ին հաստատվել է կարմրուկով վարակման 556 դեպք, որոնցից 335-ը՝ երեխա, 221-ը՝ մեծահասակ:

12:32 - 01 նոյեմբերի, 2024

ՀՀ-ում շրջանառվում են ռինովիրուսի, բոկավիրուսի, կորոնավիրուսի հարուցիչներ. ինչ անել բարդություններից խուսափելու համար

Հոկտեմբերի առաջին շաբաթից սկսվել է գրիպի և սուր շնչառական վարակների սեզոնը։ ԱՆ հիվանդությունների վերահսկման և կանխարգելման ազգային կենտրոնն իրականացնում է մշտադիտարկում այս հիվանդություններով պայմանավորված իրավիճակի զարգացման միտումներին հետամուտ լինելու նպատակով։ Ըստ այդմ` սուր շնչառական վարակներով պայմանավորված իրավիճակն օրինաչափ և համահունչ է ներկայիս սեզոնին։ Այսպես՝ 2024 թվականի հոկտեմբերի երրորդ շաբաթվա ընթացքում արձանագրված սուր շնչառական վարակների հիվանդացության ցուցանիշները նախորդ՝ հոկտեմբերի երկրորդ շաբաթվա համեմատ աճել են, սակայն նախորդ տարվա միևնույն ժամանակահատվածի համեմատ ցածր են։ Հարկ է նշել, որ այսօր համեմատաբար բարձր ցուցանիշներ գրանցվում են մինչև 4 տարեկան երեխաների շրջանում, որը կազմում է ընդհանուր դեպքերի 71%-ը։ Ներկա դրությամբ` ՀՀ-ում գրիպի վիրուսի հարուցիչներ չեն շրջանառում: Շրջանառում են այլ շնչառական վարակների՝ ռինովիրուսի, բոկավիրուսի, կորոնավիրուսային հիվանդության (SARS-Cov-2) հարուցիչներ։ Սուր շնչառական վարակներով և գրիպով չհիվանդանալու, ինչպես նաև բարդություններից խուսափելու համար` պատվաստվե՛ք գրիպի դեմ՝ դիմելով առողջության առաջնային պահպանման կազմակերպություն. խուսափե´ք գրիպանման երևույթներով հիվանդների հետ շփումից. եթե հիվանդ եք, մնացե´ք տանը, հրավիրե՛ք տեղամասային մանկաբույժին, թերապևտին կամ ընտանեկան բժշկին և մի´ զբաղվեք ինքնաբուժմամբ. մի´ օգտագործեք հակաբիոտիկներ, քանի որ դրանք ցուցված չեն գրիպի բուժման համար. հագնվե´ք եղանակին համահունչ պահպանե´ք հազի և փռշտալու վարվելակարգը. օգտագործե´ք հնարավորինս շատ հեղուկներ. հաճախակի օդափոխե´ք փակ տարածքները. հետևե´ք անձնական հիգիենային:

12:11 - 25 հոկտեմբերի, 2024

Եվս 1 թանկարժեք դեղ անվճար կհատկացվի բուժառուներին

Առողջապահության նախարարությունը «Հայաստան-Արցախ» հիմնադրամի կողմից մարդասիրական օգնություն է ստացել ԱՄՆ-ի Ամգեն ԻՆԿ. դեղագործական ընկերության արտադրության Ռիաբինի (ռիտուքսիմաբ) 100 մգ/10մլ թանկարժեք դեղը: Այս մասին տեղեկացնում են ՀՀ առողջապահության նախարարությունից: B-բջջային ոչ հոջկինյան լիմֆոմաների ստանդարտ բուժման կարևորագույն այս դեղը կիրառվում է ինչպես առաջնակի ախտորոշված ոչ հոջկինյան ագրեսիվ և ինդոլենտ ընթացքով լիմֆոմաների բուժման դեպքում, այնպես էլ հիվանդության ռեցիդիվի և ռեզիստենտ ընթացքի ժամանակ։ Ռիտուքսիմաբ ակտիվ նյութ պարունակող դեղերի կիրառումը ստանդարտ քիմիաթերապիայի ժամանակ ամբողջ աշխարհում համարվում է B-բջջային ոչ հոջկինյան լիմֆոմաների բուժման ոսկե ստանդարտ և հանդիսանում է բուժման կարևորագույն բաղադրիչ։ Բուժման արդյունքում բարելավվում է այս բուժառուների ընդհանուր ապրելիությունը` 50-70%-ից դարձնելով մինչև 90%։ Հայաստանում տարեկան ախտորոշվում է շուրջ 180 առաջնակի ոչ հոջկինյան B-լիմֆոմա։ Ժամանակակից գործելակարգերով նրանց բուժումը կազմակերպելու համար այս օժանդակությամբ կթեթևանա բուժառուների ֆինանսական բեռը` ապահովելով առավել արդյունավետ բուժում: Բացի լիմֆոմաներից, դեղը կիրառվում է նաև բարորակ արյունաբանական հիվանդությունների դեպքում՝ իմուն թրոմբոցիտոպենիա և հեմոլիտիկ անեմիա, որպես երկրորդ գծի թերապիա։ Դեղը բուժառուներին տրամադրվելու է բժշկական ցուցումներով` անվճար:

15:06 - 18 հոկտեմբերի, 2024

Եթե «Արթկոսմեդ»-ում տեսչական մարմինը հայտնաբերի խախտումներ, կդիտարկվի լիցենզիան կասեցնելու կամ դադարեցնելու հարցը. Ավանեսյան |tert.am|

tert.am: «Արթկոսմեդ» էսթետիկ վիրաբուժության կենտրոնում եթե տեսչական մարմինը հայտնաբերի խախտումներ, ապա կդիտարկվի լիցենզիան դադարեցնելու հարցը։ Այս մասին կառավարության նիստից հետո լրագրողների հետ զրույցում ասաց առողջապահության նախարար Անահիտ Ավանեսյան: Հարցին՝ պետք է պարտադիր քաղաքացի մահանա՞, որ լծակների դիմեք, նախարարությունը հետևո՞ւմ է, որ ինչ-որ բժիշկներ են հայտնվում, բացում են ինչ-որ սենյակներ ու անցկացնում բարդ վիրահատություններ, նա արձագանքեց. «Կխնդրեմ որակումների մեջ մի քիչ ավելի փաստային հանգամանքներ դնել: Տեսեք, կազմակերպությունն ունի լիցիենզիա, լիցենզիայի պայմաներին հետևելու հանգամանքը պետք է տեսչական մարմինները պարզեն և եթե հայտնվեն խախտումներ, կդիտարկվի լիցենզիան կասեցնելու կամ դադարեցնելու հարցը»: Ինչ վերաբերում է նրան, որ նախորդ տարի ևս այդ կլինիկայում մարդ մահացավ, քրեական գործ կամ հենց ստուգումներ չեղան, որ նմանատաիպ դեպքի կրկնությունը բացառվեր, Ավանեսյանը նշեց, որ քրեական գործի հետ կապված հարցն իրեն չպետք է ուղղվել, բայց պետք է հասկանալ նաև պատճառահետևանքային կապերը: «Ես նորից եմ կրկնում՝ մենք հետևողական ենք լինելու, որ պարզվեն ամբողջ հանգամանքները, ինչն է հանդիսացել մահվան պատճառը, արդյոք տեղի է ունեցել բժշկական սխալ և ինչպիսին, դրանից հետևությունները շատ խիստ են արվելու»,- նշեց նա: Հիշեցնենք, որ վերոնշյալ կենտրոնում պլաստիկ վիրահատության հետևանքով մահացել էր 56-ամյա Զաբել Կարապետյանը։ Վերջինիս ամուսինը մեղադրում է բժշկին, քանի որ, ինչպես պարզվել է, բժիշկը միաժամանակ կնոջ մարմնի հինգ հատվածներում վիրահատություն է սկսել։ Վիրահատությունը կատարած պլաստիկ վիրաբույժ և կենտրոնի ղեկավար Արթուր Սարգսյանը հայտարարությամբ հանդես է եկել՝ կնոջ մահը կապելով սրտի կաթվածի հետ։ Նույն կենտրոնում մահվան ևս մեկ դեպք էր գրանցվել նախորդ տարվա հոկտեմբերի 20-ին։

13:28 - 17 հոկտեմբերի, 2024

Կորոնավիրուսային հիվանդության դեպքերն աճել են. ԱՆ

Սուր շնչառական վարակներն աշխարհում ամենատարածված հիվանդությունների խումբն են, որոնց հարուցիչները հիմնականում վիրուսներն են` գրիպը, ռեսպիրատոր սինցիտյալ վիրուսը, ադենովիրուսը, բոկավիրուսը, և այլ վիրուսային հարուցիչներ։ Դրանք կարող են ընթանալ ծանր և առաջացնել բարդություններ՝ թոքաբորբ, բրոնխիտ, ականջաբորբ և այլն։ Բարդությունների զարգացման առավել խոցելի խումբ են երեխաները՝ հատկապես կյանքի առաջին տարիների ընթացքում, տարեցները և քրոնիկ հիվանդություններ ունեցող անձինք: Այս տարվա 41-րդ շաբաթվա ընթացքում ՀՀ-ում արձանագրվել է սուր շնչառական վարակներով պայմանավորված միջին ակտիվություն, հիվանդացությունը նախորդ շաբաթվա համեմատ աճել է՝ 1.2 անգամ, ինչը համահունչ է սեզոնի նշված ժամանակահատվածին, իսկ նախորդ շաբաթվա միևնույն ժամանակահատվածի համեմատ` ցածր է 1.1 անգամ։ Դեպքերի 71%-ը կազմել են 0-18 տարեկանները։Դետքային համաճարակաբանական դիտարկման շրջանակներում նմուշների լաբորատոր հետազոտությունների արդյունքում գրիպի վիրուսներ չեն հայտնաբերվել։ Այլ շնչառական վարակներից հայտնաբերվել են ռինովիրուսի և կորոնավիրուսային հիվանդության SARS-Cov-2 հարուցիչներ։Վերջին 7 օրվա ընթացքում արձանագրված կորոնավիրուսային հիվանդության դեպքերը նախորդ նույն ժամանակահատվածի համեմատ աճել են 22.5%-ով, իսկ 14 օրվա ընթացքում արձանագրված դեպքերը նախորդ նույն ժամանակահատվածի համեմատ նվազել է 31%-ով:Սուր շնչառական վարակներով, չհիվանդանալու, ինչպես նաև բարդություններից խուսափելու նպատակով՝Առողջապահության նախարարությունը ԿՐԿԻՆ հիշեցնում և հորդորում է. պատվաստվե՛ք սեզոնային գրիպի դեմ՝ դիմելով առաջնային առողջության պահպանման կազմակերպություն, խուսափե՛ք սուր շնչառական վարակներին բնորոշ ախտանշաններով հիվանդների հետ շփումից, եթե հիվանդ եք, մնացե՛ք տանը, հատկապես՝ սուր շնչառական վարակներին բնորոշ աշտանշաններով երեխաներին մի՛ թույլատրեք հաճախել դպրոց և մանկապարտեզ՝ ապահովելով բժշկի կողմից խորհրդատվությունը և բուժումը, եթե հիվանդ եք, հրավիրեք տեղամասային մանկաբույժին, թերապևտին կամ ընտանեկան բժշկին և մի՛ զբաղվեք ինքնաբուժմամբ, մի՛ օգտագործեք հակաբիոտիկներ, քանի որ դրանք ցուցված չեն գրիպի և սուր շնչառական վարակների բուժման համար, հագնվե՛ք եղանակին համահունչ, պահպանե՛ք հազի և փռշտալու վարվելակարգը, օգտագործե՛ք հնարավորինս շատ հեղուկներ, հաճախակի օդափոխե՛ք փակ տարածքները, հետևե՛ք անձնական հիգիենային։

11:19 - 15 հոկտեմբերի, 2024

Նոր մանրամասներ՝ Իջևան-Դիլիջան-Երևան միկրոավտոբուսի վթարից տուժածների առողջական վիճակի մասին |factor.am|

factor.am: Իջևան-Դիլիջան-Երևան երթուղին սպասարկող միկրոավտոբուսի վթարի հետևանքով 4 տուժածի վիճակը կայուն ծանր է, մեկինը՝ միջին ծանրության, իսկ մյուսինը՝ ծանր անկայուն: Անչափահասի առողջական վիճակն էլ գնահատվում է բավարար։ Այս մասին Factor.am-ին տեղեկացրին ՀՀ առողջապահության նախարարությունից։ Հիշեցնենք, որ երեկ Իջևան-Դիլիջան-Երևան երթուղին սպասարկող միկրոավտոբուսի վթարի հետևանքով կա 7 տուժած և 2 զոհ, նրանցից 1-ը մահացել է դեպքի վայրում, մյուսը՝ հիվանդանոցում։

13:17 - 10 հոկտեմբերի, 2024

Պլաստիկ վիրահատությունից հետո մահվան երկրորդ դեպքը մեկ տարում |azatutyun.am|

azatutyun.am: Կատարելության ձգտող կանայք մահանում են վիրահատարաններում։ 56-ամյա կինն այդպես էլ գիտակցության չի եկել պլաստիկ վիրահատությունից հետո։ Նրան օրեր առաջ «Արթկոսմեդ» էսթետիկ վիրաբուժության կենտրոնում հենց տնօրենը՝ Արթուր Սարգսյանն է վիրահատել, հետո կնոջը ծայրահեղ ծանր վիճակում տեղափոխել են «Աստղիկ» բժշկական կենտրոն։ Կինը մահացել է երեկ։ «Ազատություն»-ը բժշկին երեկ կենտրոնում հանդիպեց, նա չցանկացավ խոսել, վստահ էր, որ պացիենտը կապրի, հարազատները չեն բողոքի։ Քրեական գործ արդեն կա։ «Իրականացվում է այս պահին նախաքննություն ակտիվ, բժշկական հաստատությունից պահանջվել են համապատասխան փաստաթղթերը, և մնացած ընթացքը կապահովվի, իհարկե կնշանակվի նաև համապատասխան փորձաքննություն», - «Ազատությանը» ասաց Քննչական կոմիտեի խոսնակ Գոռ Աբրահամյանը: Նույն կենտրոնում նույն բժշկի վիրահատությունից հետո մեկ տարի առաջ մահացել է նաև 32-ամյա Ալվարդ Վարդանյանը։ Քրեական գործ այդ ժամանակ էլ հարուցվեց: «Խոսքը վերաբերում է առերևույթ բժշկական սխալ թույլ տալուն, որի հետևանքով մարդ է մահացել. եթե պարզ ներկայացնեմ, սա է էությունը այդ հանցակազմի: Եվ իրականացվում է նախաքննություն», - ասաց Աբրահամյանը: Քննչական կոմիտեի խոսնակի տեղեկացմամբ՝ մեղադրյալ դեռ չկա, քանի որ փորձաքննությունը պիտի տա հարցի պատասխանը՝ արդյոք մահը վրա է հասել բժշկական սխալի հետևանքով, իսկ փորձաքննությունը մեկ տարի անց էլ դեռ չի ավարտվել։ Մեկ տարում երկու դեպք, իսկ այդ կենտրոնը դեռ աշխուժորեն հաճախորդների է ընդունում, որ երազում են լիպոսակցիայով ճարպեր հանել մարմնի կլոր հատվածներից, բլեֆարոպլաստիկայով աչքերի տակի պարկերը հեռացնել, բրախիոպլաստիկայով թևերի կախված մաշկը չեզոքացնել, մամոպլաստիկայով կրծքերը մեծացնել կամ հակառակը՝ փոքրացնել, և բազմաթիվ այլ վիրաբուժական միջամտություններ, որ կատարում է դոկտոր Արթուր Սարգսյանը՝ ընդ որում ակտիվ լուսաբանելով վիրահատարանի անցուդարձը։ Նա նաև հարցազրույցներ է տալիս վիրահատության ընթացքում: «Կյանքում ամենակարևոր բաներից մեկը, որ ստացել եմ որպես խորհուրդ, դա չշտապելն է աշխատանքի մեջ, կարևոր ու ճիշտ բաներից, բայց երբեմն ես շտապում եմ, ես շտապում եմ, ինձ շատ եմ գցում ռիսկային պրոցեսների մեջ», - հարցազրույցներից մեկի ժամանակ ասում է Սարգսյանը: Քաղաքի կենտրոնում տեղադրված վահանակում էլ Սարգսյանը մատների կոմբինացիայով ասում է՝ «Ամեն ինչ լավ է»: Ինչո՞ւ «Արթկոսմեդ»-ը չի հայտնվել առողջապահական այս ծառայությունը լիցենզավորող գերատեսչության՝ Առողջապահության նախարարության ուշադրության ներքո, որովհետև վերահսկող մարմինն Առողջապահական ու աշխատանքի տեսչական մարմինն է, պատասխանում են նախարարությունից։ Տեսչական մարմին «Ազատություն»-ը հարցում է ուղարկել, բայց պատասխանն արդեն ենթադրում է՝ իրենք ստուգում են միայն այն, ինչ գործունեության լիցենզիայում է գրված։ Բուժօգնության որակի մասին այդտեղ ոչինչ գրված չէ։ «Մարդիկ գնում իրենց արտաքին տեսքը ավելի կատարյալ դարձնելու համար. կոպերն են, չգիտեմ, ձգում, դեմքը, մաշկը, որովայնի ճարպը հանում են, հեռացնում են՝ էսպիսի բաներ են անում, որպեսզի ավելի գեղեցիկ լինեն, ավելի հասարակության, իրենց կողմից ինքնագնահատականի բարձրացում լինի, բայց ստացվում է, որ մեռնեն, և լինում են և բազմաթիվ դեպքեր, որոնք բողոքում են, և ո՞ւր պետք է բողոքեն, եթե այսպես է իրավական կարգավորումները՝ դատարան: Իսկ մենք շատ լավ հասկանում ենք, որ դատարան մտնելը դա մի ոդիսական է», - «Ազատության» հետ զրույցում ասաց առողջապահության փորձագետ Ծաղիկ Վարդանյանը: Շարունակությունը՝ սկզբնաղբյուր կայքում

11:51 - 10 հոկտեմբերի, 2024

Առողջապահության նախարարի որոշմամբ՝ Բերդի բժշկական կենտրոնին է տրվել թվային ռենտգեն սարք

Տավուշի մարզում առողջապահության նախարար Անահիտ Ավանեսյանն այցելել է Բերդի բժշկական կենտրոն։ Այս մասին հայտնում են ՀՀ ԱՆ-ից։ Տնօրեն Արմեն Մարդանյանի ուղեկցությամբ նախարարը շրջել է բուժկենտրոնում, զրուցել բուժանձնակազմի հետ։ Կարևորելով մարզային բուժհաստատությունների վերազինման, մեր քաղաքացիների համար բուժծառայության ֆիզիկական հասանելիության խնդիրը` առողջապահության նախարարի որոշմամբ Բերդի ԲԿ-ին է տրվել թվային ռենտգեն սարք։ Այն կսպասարկի Բերդ քաղաքի և հարակից բնակավայրերի 25 հազար բնակչությանը։

21:42 - 07 հոկտեմբերի, 2024

Հայաստանը շարունակում է Կապիկի ծաղիկի համար մնալ ցածր ռիսկայնության գոտի

Տեղի է ունեցել ԷՄփոքս (Կապիկի ծաղիկ) հիվանդության տարածումը կանխարգելող միջգերատեսչական աշխատանքային խմբի առաջին նիստը։ Այս մասին հայտնում են Առողջապահության նախարարությունից։ Աշխարհում այս պահին տիրող վիճակագրությունը ներկայացնելուց հետո, նիստի մասնակիցներն անցել են մեր երկրում այս հիվանդության կանխարգելմանն ուղղված միջոցառումների քննարկմանը: Աշխատանքային խումբը ղեկավարող առողջապահության նախարարի առաջին տեղակալ Լենա Նանուշյանն ընդգծել է, որ մեր երկիրը շարունակում է Կապիկի ծաղիկի համար մնալ ցածր ռիսկայնության գոտի։ Այնուհանդերձ, առողջապահության ոլորտի պատասխանատուները իրականացրել են հակազդման և պատրաստվածության բարձրացման մի շարք միջոցառումներ, այդ թվում ձեռք է բերել ախտորոշիչ թեստեր, իսկ բուժաշխատողներն իրազեկված են այս հիվանդության ախտանշանների ու բուժման մեթոդների մասին: Քննարկվող հարցերից է եղել սահմանային անցակետերում երկիր մտնող ԷՄփոքս-ով հիվանդ քաղաքացիների հայտնաբերման համար վերահսկողության կիրառումը, որի անհրաժեշտությունն այս պահին դեռևս չկա։ Միչգերատեսչական աշխատանքային խմբի հանդիպումները շարունակական են լինելու:

21:13 - 04 հոկտեմբերի, 2024

Հանրապետությունում առկա է սեզոնային գրիպի դեմ քառավալենտ պատվաստանյութ. ԱՆ

Սեզոնին ընդառաջ գրիպով չհիվանդանալու և դրա բարդություններից խուսափելու համար շատ կարևոր է պատվաստվելը՝ տեղեկացնում են ՀՀ առողջապահության նախարարությունից: «Հանրապետությունում առկա է սեզոնային գրիպի դեմ քառավալենտ պատվաստանյութ: Գրիպի դեմ պատվաստվելու համար կարող եք դիմել առողջության առաջնային պահպանման օղակ: Պատվաստումներն ավելի հասանելի դարձնելու նպատակով Երևանում գործում են նաև շարժական պատվաստումային կետեր յուրաքանչյուր աշխատանքային օր` ժամը 10:00-ից մինչև 16:00-ը։ Պատվաստումները կատարվում են կամավորության սկզբունքով, պետական պատվերի շրջանակներում` • անկախ հաշվառումից • քաղաքացիությունից: Առաջնահերթություն է տրվում ռիսկի խմբերում գտնվող անձանց, որոնց մոտ հիվանդությունը կարող է ընթանալ ծանր կամ բարդություններ առաջացնել` հղիներ. 6 ամսականից մինչև 5 տարեկան երեխաներ. 65 տարեկանից բարձր անձինք. շաքարային դիաբետ, շնչառության օրգանների, սրտանոթային համակարգի, լյարդի, երիկամների քրոնիկ հիվանդություններ ունեցող անձինք. բուժաշխատողներ. փակ կազմակերպություններում գտնվող անձինք և սպասարկող անձնակազմ, զորակոչի ենթակա անձինք: Սեզոնային գրիպի դեմ պատվաստումները հասանելի են բնակչության մյուս խմբերի համար ևս: Ի դեպ, գրիպի պատվաստումները կարող են կիրառվել այլ պատվաստումների հետ համատեղ կամ ցանկացած ընդմիջումով»,- ասված է հաղորդագրության մեջ:

15:17 - 04 հոկտեմբերի, 2024

«Մվասի» դեղով անվճար բուժման ծրագիրն ընդլայնվել է

Ընդլայնվել է մարդասիրական օգնությամբ ստացված «Մվասի» (բևացիզումաբ) դեղով բուժման ծրագիրը: Այս մասին տեղեկացնում են ՀՀ առողջապահության նախարարությունից: Քաղցկեղ ունեցող պացիենտներին այսուհետև նշված դեղը, ըստ բժշկական ցուցումների, անվճար կտրամադրվի նաև այն բժշկական կենտրոններում, որտեղ վերջիններս հաշվառված են և բուժում են ստանում` անկախ սոցիալական կամ հատուկ խմբերի ցանկում ընդգրկվածությունից: Քիմիաթերապիայի ռեժիմի և «Մվասի (բևացիզումաբ) լուծույթ ներերակային 25մգ/մլ 16մլ» և «Մվասի (բևացիզումաբ) լուծույթ ներերակային 25մգ/մլ 4մլ» դեղերի նշանակումը կատարվում է բուժող բժշկի կողմից: Պացիենտներին ծրագրում ընդգրկելու և համապատասխան բուժումը կազմակերպելու համար անհրաժեշտ է առաջնորդվել նախարարի հրամանով` սահմանված կարգով:

18:36 - 27 սեպտեմբերի, 2024