ՀԷՑ - infocom.am

«Կանխարգելիչ լծակներ պետությանը՝ ՀՀ էներգետիկայի ոլորտում». ինչ է նախատեսում ՀԷՑ-ի «ազգայնացման» նախագիծը

ՀՀ ազգային ժողովը առաջին ընթերցմամբ քննարկում է «Հանրային ծառայությունները կարգավորող մարմնի մասին» և «Էներգետիկայի մասին» օրենքներում լրացումներ և փոփոխություն կատարելու մասին օրենքների նախագծերի փաթեթը կամ, ինչպես կառավարող ուժն է պնդում, «ՀԷՑ-ը ազգայնացնելու նախագիծը»: Փաթեթի հեղինակը ԱԺ «Քաղաքացիական պայմանագիր» խմբակցությունն է: Այն ներկայացրեց ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը: Նրա խոսքով նախագծով առաջարկվում է կանխարգելիչ միջոցառումներ իրականացնելու լիազորություն տալ հանրային իշխանության մարմիններին՝ ժամանակին միջամտելու կարգավորող գործունեությանը, «երբ դեռ վտանգը միայն հավանական է կամ սկիզբ առնող է, որ պաշտպանեն հասարակության շահերը առանց սպասելու որպես կանոն նեգատիվ հետևանքների առաջացմանը»։ «Էներգետիկ անվտանգության տեսանկյունից սա նշանակում է երաշխավորել, որ էլեկտրաէներգիայի մատակարարումը չի խոչընդոտվի նույնիսկ այն դեպքերում, երբ լիցնեզավորված կազմակերպություններից որևէ մեկում լուրջ խախտումներ են արձանագրվում»,- ասաց Վարդանյանը: Կանխարգելիչ միջոցառումները ուղղված են շտկելու իրավիճակը, վերացնելու հավանական խախտումները և դրանց առաջացման ռիսկերը և ապահովելու անխափան ծառայությունների մատուցումը սպառողներին: «Փոփոխություններն անհրաժեշտ են, որ ՀՀ էներգետիկայի ոլորտում հանրային իշխանության մարմինները ստանան արդյունավետ կանխարգելիչ լծակներ էական հանրային շահերը պաշտպանելու համար»,- նշեց զեկուցողը: 2025թ. հունիսի 18-ին՝ գործարար Սամվել Կարապետյանի՝ Հայ առաքելական եկեղեցուն աջակցություն հայտնելուց հետո, ՀՀ վարչապետ Նիկոլ Փաշինյանը հայտարարեց. «Կարծում եմ՝ հասունացել է պահը, երբ Հայաստանի էլեկտրական ցանցեր ՓԲԸ–ն պետք է ազգայնացվի (պետականացվի): Դա տեղի կունենա արագ և իմ հանձնարականն է ՀԷՑ-ի բոլոր աշխատակիցներին՝ բարեխղճորեն կատարել իրենց աշխատանքային պարտականությունները։ Ազգայնացումից (պետականացումից) հետո բարեխղճությունը հաշվի կառնվի»: Նույն օրը ավելի ուշ լրագրողների հետ զրույցում Փաշինյանն ասաց, որ ՀՀ ազգային ժողովում կա ՀԷՑ-ը ազգայնացնելու նախագիծ. «Մեկ ամիս առաջ եմ հանձնարարություն տվել Կառավարության համապատասխան մարմիններին, որ կա՛մ ՀԷՑ-ը պետք է ժողովրդին հասցրած վնասը վերականգնի, կա՛մ ազգայնացվի»: ՀՀ փոխվարչապետ Մհեր Գրիգորյանը Factor.am-ի հետ զրույցում նշել էր, որ ՀԷՑ-ի շուրջ ցանկացած որոշում կլինի օրենքի շրջանակում: ՀԷՑ տնօրեն Դավիթ Ղազինյանն էլ հունիսի 25-ին ասել էր, որ ՀԷՑ-ը կառավարությունից ազգայնացման մասին որևէ գրություն չի ստացել: Նա պնդել էր նաև, որ ո՛չ իշխանությունների, ո՛չ ՀԾԿՀ-ի կողմից որևէիցե ձևով անցած տարիների ընթացքում անգամ ակնարկ չի եղել, որ ընկերությունում այնպիսի վիճակ է, որ կարող է բերել լիզենցիայից զրկելուն:

Այսօր 13:52

Անգամ ակնարկ չի եղել, որ ընկերությունում այնպիսի վիճակ է, որ կարող է բերել լիզենցիայից զրկելուն․ ՀԷՑ տնօրենի պաշտոնակատար |azatutyun.am|

azatutyun.am: «Հայաստանի էլեկտրական ցանցեր» ընկերության գլխավոր տնօրենի պաշտոնակատար Դավիթ Ղազինյանը պնդում է, ոչ իշխանությունների, ոչ ՀԾԿՀ-ի կողմից որևէիցե ձևով անցած տարիների ընթացքում անգամ ակնարկ չի եղել, որ ընկերությունում այնպիսի վիճակ է, որ կարող է բերել լիզենցիայից զրկելուն: «Այն մարմինը, որը պետության կողմից լիազորված է համակարգելու հանրային ծառայությունների ոլորտը, երբևէ որևէ ձևով չի գնահատել ՀԷՑ-ի աշխատանքն «այնքան վատ, որը կարող է հանգեցնել այսպիսի» զարգացումների», - այսօր ասուլիսի ժամանակ ասաց Ղազինյանը: Նա նշեց, որ իշխանությունները այս ընթացքում ևս, երբ սկսել են խոսել ընկերության պետականացման մասին, չեն փորձել գալ ՀԷՑ, քննարկեն խնդիրները, եթե դրանք կան: «Իմ անձնական կարծիքով՝ նախ վախենում են, որ այդ քննարկումների արդյունքում իրենք սխալ դուրս կգան, այստեղ պետականացնելու խնդիրն ընդհանրապես… խելագարության կանխավարկածի խնդիր կա: <> Չնայած, որ մեր դեմ պայքար է տարվում ոչ օրինաչափ, առանց կանոնների մարտի ձևաչափով, մենք պատրաստվում ենք բոլոր իրավական ճանապարհներով պայքարել այս գործընթացի դեմ, եթե անգամ ներպետական հնարավորությունները սահմանափակ են մեզ համար, արդեն միջազգային կազմակերպությունների մեր գործընկերների հետ միասին», - ասաց նա: Վարչապետ Նիկոլ Փաշինյանը ՀԷՑ-ը պետականացնելու մասին հայտարարեց, երբ «Տաշիր» ընկերության սեփականատեր Սամվել Կարապետյանը Հայ առաքելական եկեղեցուն առաջակցելուց խոսեց՝ շեշտելով, որ եկեղեցու նկատմամբ հարձակումները կանխելու գործում հնարավոր է «ինքն էլ իր ձևերով մասնակցի»։ Հենց այս հայտարարությունից հետո Կարապետյանը հայտնվեց կալանքի տակ, իսկ իշխող ուժը հաշված օրերի ընթացքում շրջանառության մեջ դրեց մի օրենսդրական նախաձեռնություն, որով մտադիր են վերցնել բաշխիչ ցանցերի կառավարումը, հետո նաև այն պետականացնելու են:

12:11 - 30 հունիսի, 2025

«Հոմպլեքս» մոլի, ինչպես նաև այսօրվա հոսանքազրկումները ՀԷՑ-ի իրավասության դաշտից դուրս են. հայտարարություն

Հունիսի 25-ին «Հոմպլեքս» մոլի պաշտոնական բացման ընթացքում գրանցված էլեկտրամատակարարման ընդհատումը ՀԷՑ-ի էլեկտրատնտեսության սպասարկման տիրույթից դուրս էր: Այս մասին հայտարարություն է տարածել ՀԷՑ-ը։ Հայտարարությունում, մասնավորապես, ասվում է. «Հոմպլեքս»-ը սնուցումն ապահովվում է երկու ուղղություններից, որոնցից ոչ մեկը «Հայաստանի էլեկտրական ցանցեր» ընկերությանը չի պատկանում. մեկը պատկանում է «Կարիտաս» ընկերությանը, մյուսը՝ ՀՀ Պետական եկամուտների կոմիտեին: Չնայած նրան, որ Ընկերությունը վթարի վերացման որևէ պարտավորություն չուներ, հաշվի առնելով խնդրի կարևորությունը՝ վթարի ընթացքում Ընկերությունը գործի է դրել նորոգող 4 բրիգադների, որոնք վերացրել են վթարը: Այսօր՝ ժամը 13:54-ին Մայր Աթոռ Սուրբ Էջմիածնում տեղի ունեցող իրադարձությունների ժամանակ ևս հոսանքազրկում է տեղի ունեցել, որի հետևանքով հոսանքազրկվել է Երևանի մոտ 40 տոկոսը, ինչպես նաև Աշտարակ քաղաքի մի հատված: Հոսանքազրկման պատճառ է հանդիսացել «Բարձրավոլտ էլեկտրական ցանցեր» ընկերությանը պատկանող «Շահումյան – 2» 220 կՎ ենթակայանում գրանցված վթարը: Այս դեպքը նույնպես դուրս է ՀԷՑ-ի պատասխանատվության դաշտից:

17:53 - 27 հունիսի, 2025

Գևորգ Պապոյանն անդրադարձել է ՀԷՑ-ի պետականացման գործընթացին |1lurer.am|

1lurer.am: Էկոնոմիկայի նախարար Գևորգ Պապոյանն անդրադարձել է ՀԷՑ-ի պետականացման գործընթացին՝ տեղեկացնելով, որ կառավարող խմբակցությունը օրենքի նախագծի փոփոխությունն արդեն շրջանառության մեջ է դրել, և առաջիկա օրերին ԱԺ արտահերթ նիստում մանրամասն կքննարկվի: Գևորգ Պապոյանը գործընթացը չի համարել մասնավոր բիզնեսին տիրանալու փորձ, նա անթույլատրելի է համարել, երբ էլեկտրաէներգիայի անջատումների պատճառով խաթարվում է գործարանների աշխատանքը: «Կառավարման մեջ, քանի որ մենք արդեն խնդիրներ ենք արձանագրում, երբ խոշոր գործարարը մեծ ներդրում էր արել, և իմ իմանալով՝ մի քանի 100 հազար դոլարի միջոցառում էր կազմակերպել .....էդ մարդը կորցրեց էդ գումարը, որովհետև էլեկտրաէներգիայի անջատում տեղի ունեցավ, երբ պիտի բացումը տեղի ունենար: Մեկ ուրիշ դեպք երեկ գործարարից եմ ստացել, որը նոր տեխնոլոգիաներ է գնել, և այդ նոր տեխնոլոգիաները պարբերաբար ՀԷՑ-ի անջատումների հետևանքով փչացել են: Ոչ մի ճապոնացի չի պատկերացնում, որ օրը հինգ անգամ կարող է լույսը անջատվել»,- ասել է Պապոյանը՝ հավելելով, որ գործարար միջավայրն ասում է, որ միլիարդավոր ներդրումներ էն արել, որոնք առոչինչ են դառնում: Ավելի վաղ վարչապետը նշել էր, որ էներգետիկայի ոլորտում կան խնդիրներ, այդ թվում՝ էլեկտրաէներգիայի մատակարարման որակի հետ կապված, տեղեկացրել, որ երեկ մասնակցել է հիպերմարկետի բացման արարողությանը, որի ժամանակ էլեկտրաէներգիայի անջատում է եղել: Դա, ըստ վարչապետի, կարող է լինել երկու պատճառով՝ սաբոտաժ կամ համակարգի տեխնիկական խնդիր: «Երկու դեպքում էլ նրանք բոլոր գծերն անցել են, և այն, ինչ ասել եմ, առաջիկայում պետք է անցնեք դրա իրագործման փուլին: Իհարկե, պրոցեսը չի լինի մեկփուլանի, բայց ակնհայտ է, որ պետությունը պետք է շատ արագ վերցնի ՀԷՑ ՓԲԸ-ի կառավարումը և հետագա գործընթացները՝ պետականացման և ընկերության կառավարման արդյունավետության ուղղությամբ, պետք է արագ և արդյունավետ իրականացնենք»,- ասաց նա: Վարչապետի խոսքերով՝ Կառավարության գործընկերների հետ համատեղ օրենքի նախագիծ է մշակվել, և նախատեսվում է, որ առաջիկայում ԱԺ արտահերթ նիստով կկատարվեն համապատասխան փոփոխությունները: Հիշեցնենք՝ վարչապետը խորհրդարանում լրագրողների հետ զրույցում հայտարարել էր, թե Կառավարության անդամներին տվել էր հանձնարարական, որ ՀԷՑ-ի կողմից ժողովրդին հասցված վնասը պետք է վերականգնվի: «ՀԷՑ-ն իր գործունեության արդյունքում Հայաստանում գրեթե էներգետիկ ճգնաժամ է ստեղծել: Հիմա նաև վերլուծությունը հիմք է տալիս մտածելու (առնվազն թույլ չի տալիս հրաժարվել այդ մտքից), որ այդ ամեն ինչը արվել է և արվում է Հայաստանում ներքին հանրային դժգոհություն գեներացնելու համար: Բայց ես տվել էի հանձնարարական, որ 1 ամսվա ընթացքում կա՛մ պետք է ժողովրդին հասցված վնասը վերականգնելու հստակ մեխանիզմներ ներդրվեն, կա՛մ ՀԷՑ-ը պետք է ազգայնացվի, այսինքն՝ պետականացվի»,- ասել էր Փաշինյանը: Ինչ վերաբերում է ՀԷՑ-ի ազգայնացմանը, ապա, ըստ Փաշինյանի, այս հարցով ամենաարագ և արդյունավետ գործելու տեղը Ազգային ժողովն է, և որ այժմ մասնագետներն ու «Քաղաքացիական պայմանագիր» խմբակցությունը քննարկում են ՀԷՑ-ն ազգայնացնելու մասին օրենքի նախագիծն ԱԺ բերելու հարցը:

13:35 - 26 հունիսի, 2025

Պետությունը կստանձնի «Հայաստանի էլեկտրական ցանցեր» ՓԲԸ-ի կառավարումը. վարչապետ |armenpress.am|

armenpress.am: Հայաստանի կառավարությունը սկսում է «Հայաստանի էլեկտրական ցանցեր» ՓԲԸ-ի (ՀԷՑ) կառավարումը ստանձնելու գործընթաց։ Այս մասին հայտարարեց ՀՀ վարչապետ Նիկոլ Փաշինյանը կառավարության նիստի ընթացքում։ «Ակնհայտ է, որ պետությունը պետք է շատ արագ վերցնի «Հայաստանի էլեկտրական ցանցեր» ՓԲԸ-ի կառավարումը և հետագա գործընթացների իրականացումը՝ պետականացման և ընկերության կառավարման արդյունավետության ուղղությամբ։ Պետք է սա արագ և արդյունավետ իրականացնենք»,– նշեց Փաշինյանը։ Վարչապետն այս համատեքստում անդրադարձել է նաև հունիսի 25-ին տեղի ունեցած միջադեպին, երբ «Հոմպլեքս Մոլ»-ի բացման արարողության ժամանակ տեղի էր ունեցել հոսանքազրկում։ «Մարդիկ 70 միլիոն դոլարի ներդրում են արել և չեն կարողանում նորմալ բացման արարողություն անել։ Այստեղ երկու տարբերակ կա՝ կամ հատուկ սաբոտաժ է, կամ համակարգը տեխնիկապես ի վիճակի չէ։ Երկու դեպքում էլ իրենք բոլոր գծերն անցել են»,- ընդգծեց Փաշինյանը։ Վարչապետը նշեց, որ այս հարցը քննարկվել է քաղաքական մակարդակով՝ ՀՀ «Քաղաքացիական պայմանագիր» կուսակցության վարչության և ԱԺ խմբակցության շրջանակում։ Կառավարությունն արդեն իսկ նախապատրաստել է համապատասխան օրենսդրական նախաձեռնությունները։ Նա նշեց, որ նախատեսվում է, որ առաջին անհրաժեշտ քայլը կլինի պետական կառավարման ստանձնումը, որից հետո կքննարկվեն հնարավոր սցենարները՝ ընկերության լիարժեք պետականացման, կառավարման բարեփոխումների և արդյունավետության բարձրացման ուղղությամբ։ Փաշինյանը շեշտեց, որ կառավարության ռազմավարական նպատակն է ապագայում ապահովել նաև ՀԷՑ-ի բաժնետոմսերի ազատ բաժանորդագրության հնարավորություն, որպեսզի Հայաստանի քաղաքացիները կարողանան դառնալ ընկերության համասեփականատերեր։ «Մենք պետք է ապահովենք այնպիսի երաշխիքներ, որ Հայաստանի քաղաքացիները հնարավորություն ունենան իրենց խնայողություններով բաժնետոմսեր ձեռք բերել։ Նման ռազմավարական նպատակ ունենք նաև Զանգեզուրի պղնձամոլիբդենային կոմբինատի պարագայում»,-նշեց վարչապետը։

12:26 - 26 հունիսի, 2025

Էլեկտրաէներգիայի անջատումներ՝ Երևանի ու մարզերի մի շարք հասցեներում

10:08 - 26 հունիսի, 2025

ՀԷՑ-ը կառավարությունից ազգայնացման մասին որևէ գրություն չի ստացել. փոխտնօրեն |civilnet.am|

civilnet.am: ՀԷՑ-ը կառավարությունից ազգայնացման մասին որևէ գրություն չի ստացել. ասել է ՀԷՑ-ի գլխավոր տնօրենի տեղակալ Դավիթ Ղազինյանը Ֆակտոր ՀԸ-ի երեքշաբթի հրապարակած զրույցում։ Նա նշել է, որ ՀԷՑ-ը 7000 աշխատակից ունի, և նրանց մեծ մասը բացասական է նայում ընկերության շուրջ տեղի ունեցողին։ Ղազինյանի խոսքով՝ «Տաշիր Գրուպի» կողմից Ինտեր ՌԱՕ ընկերությունից 2015-ին ՀԷՑ-ը ձեռք բերելուց հետո տասը տարի պրոցեսները կառավարվում են շատ ճիշտ […]։ Եթե մեր ամբողջ ազգաբնակչությունը և բոլորը իմանային, թե ինչ վիճակում ենք ընդունել ՀԷՑ-ը, բնականաբար դինամիկան շատ լավ կզգային։ Երևի մենք ենք սխալ եղել, որ չենք թմբկահարել, որ ընկերությունում խայտառակ վատ վիճակ է (եղել)»։ Նա նշել է, որ եթե անգամ օրենսդրությունը թույլ է տալիս որևէ ընկերություն ազգայնացնել, դրա համար հիքմեր են պետք. «ՀԷՑ-ին մեղադրում են ինչ-որ բանում, որտեղ պետականացման հիմք կա»։ Ղազինյանն ասել է, որ էլեկտրաէներգիայի մատակարարման խափանումները, որոնք լինում են քամիների կամ շոգի պատճառով, իրենք շատ արագ վերացնում են, և դա չի կարող լինել հիմք։ «Վերջին հաշվով, պետականացումից առաջ կամ ինչ-որ մի գործողությունից առաջ այլ գործողություններ են հետևում։ Այնպես չէ, որ եթե մի բան վատ եղավ, վե՛րջ, ձեռքից վերցնում ենք։ Վերջը պետությո՞ւն ենք, թե՞ չէ։ Մյուս բոլոր ներդրողները ի՞նչ են մտածելու»,- ասել է ընկերության պաշտոնյան։ Երեքշաբթի փոխվարչապետ Մհեր Գրիգորյանը Ֆակտոր ՀԸ-ի հետ մեկ այլ զրույցում ասել է, որ հատուկ օրենք է լինելու, որով ՀԷՑ-ը պետականացվելու է։ «Ես կարծում եմ, որ ցանկացած գործողություն, որը վերաբերելի կլինի Հայաստանի էլեկտրական ցանցերին, կիրականացվի օրենքով սահմանված կարգով»,- ասել էր Գրիգորյանը՝ հավելելով, որ Էներգետիկայի մասին օրենքով սահմանված են և՛ դեպքերը, և՛ գործողությունները, որոնք այս կամ այն դեպքում կառավարությունը կամ պետությունը կարող է իրականացնել։ «Այսինքն, հատուկ օրենք է լինելու, որով ՀԷՑ-ը պետականացվելու է։ Ես ձեզ վստահեցնում եմ, որ հնարավոր գործողությունները որոշակի դեպքերում այսօր արդեն իսկ օրենքով նկարագրված են»,- ասել էր փոխվարչապետը:

10:12 - 25 հունիսի, 2025

Էլեկտրաէներգիայի անջատումներ՝ Երևանի ու մարզերի մի շարք հասցեներում

09:20 - 25 հունիսի, 2025

ՀԷՑ-ի շուրջ ցանկացած որոշում կլինի օրենքի շրջանակում. փոխվարչապետ |civilnet.am|

civilnet.am: Ցանկացած գործողություն, որը կվերաբերվի Հայաստանի էլեկտրական ցանցերին, կիրականացվի օրենքով սահմանված կարգով: Այս մասին Factor TV-ի հետ զրույցում ասել է փոխվարչապետ Մհեր Գրիգորյանը՝ անդրադառնալով ՀԷՑ-ի պետականացման վերաբերյալ վարչապետի հայտարարություններին: «Էներգետիկայի մասին օրենքով սահմանված են և դեպքերը, և գործողությունները, որոնք այս կամ այն հանգամանքների դեպքում կառավարությունը կամ պետությունը կարող է իրականացնել», – ասել է Գրիգորյանը։ Նա վստահեցրել է, որ Հայաստանի Սահմանադրությունն ու օրենքները հստակ նկարագրում են այն դեպքերը, երբ պետությունը կարող է միջամտել այս ոլորտում։ «Մեր գործողությունները՝ լինի դա կառավարության, թե որևէ այլ պետական մարմնի, լինելու են օրենքով և Սահմանադրությամբ սահմանված շրջանակներում։ Եթե ուզում եք ծանոթանալ հնարավոր սցենարներին, առաջարկում եմ թերթել էներգետիկայի մասին օրենքը։ Այնտեղ կան բոլոր անհրաժեշտ դրույթները», – հավելել է նա։ Փոխվարչապետը չի ցանկացել հավելյալ մեկնաբանություն տալ՝ հաշվի առնելով հարցի զգայուն բնույթը։ «Այնուամենայնիվ մենք խոսում ենք կրիտիկական ենթակառուցվածքի մասին, որը կարգավորվում է հստակ օրենսդրությամբ», – ամփոփել է Մհեր Գրիգորյանը։ Վարչապետ Նիկոլ Փաշինյանն այսօր հայտարարել է, որ «Հայաստանի էլեկտրական ցանցեր» ՓԲԸ պետականացման պլանը պատրաստ է և շատ շուտով գործընթացը գործնական փուլ կմտնի։ ՀԷՑ-ն ազգայնացնելու մտադրության մասին Փաշինյանն առաջին անգամ հայտնեց այն բանից հետո, երբ հունիսի 17-ին ռուսաստանաբնակ գործարար Սամվել Կարապետյանը մի հարցազրույցում իր աջակցությունը հայտնեց Հայ առաքելական եկեղեցուն և Ամենայն Հայոց կաթողիկոսին, որին Փաշինյանը փորձում է գահընկեց անել։ Իրավապահները նախ խուզարկեցին Կարապետյանի երևանյան առանձնատունը, նրա բերման ենթարկեցին, ապա դատարանը նրան կալանավորեց երկու ամսով։ Փաշինյանը հայտարարեց Կարապետյանին պատկանող Հայաստանի էլեկտրական ցանցեր (ՀԷՑ) ընկերությունը ազգայնացնելու իր մտադրության մասին։

20:27 - 24 հունիսի, 2025

«Հայաստանի էլեկտրական ցանցեր»-ի պետականացման պլանը պատրաստ է. Նիկոլ Փաշինյան

«Հայաստանի էլեկտրական ցանցեր» ՓԲԸ-ի պետականացման պլանը պատրաստ է։ Շատ շուտով կմտնենք գործնական փուլ։ Այս մասին տեղեկացրել է ՀՀ վարչապետ Նիկոլ Փաշինյանը՝ «Ֆեյսբուք» սոցիալական ցանցի իր էջում կատարած գրառման միջոցով: «Պրոցեսները տեղի կունենան Հայաստանի Հանրապետության օրենսդրությանը համապատասխան»,- նշված է գրառման մեջ: Ավելի վաղ ՀՀ վարչապետը մեկ այլ գրառմամբ կարծիք էր հայտնել, որ հասունացել է «Հայաստանի էլեկտրական ցանցեր» ՓԲԸ-ն պետականացնելու պահը:

12:18 - 24 հունիսի, 2025

Էլեկտրաէներգիայի անջատումներ՝ Երևանի ու մարզերի մի շարք հասցեներում

09:36 - 24 հունիսի, 2025

Էլեկտրաէներգիայի անջատումներ՝ Երևանի ու մարզերի մի շարք հասցեներում

08:36 - 20 հունիսի, 2025

ՀԷՑ-ի աշխատողներին ցույցի բերողներն ազատվելու են աշխատանքից, իրավապահների հետ համագործակցողները կխրախուսվեն, հետո լաց ու կոծ չլինի. Փաշինյան |tert.am|

tert.am: Եթե ՀԷՑ-ի աշխատողներին ստիպողաբար բերում են Սամվել Կարապետյանին աջակցելու, իրավապահ մարմինները կզբաղվեն դրանով: Այս մասին Կառավարություն-ԱԺ հարցուպատասխանի ժամանակ հայտարարեց վարչապետ Նիկոլ Փաշինյանը: Նա շեշտեց՝ շատ արագ ՀԷՑ-ը լինելու է պետական սեփականություն, և ՀԷՑ-ի այն աշխատողները, որոնք հիմա մարդկանց ստիպողաբար ցույցի են բերում, բոլորն ազատվելու են աշխատանքից: «Հետո ծնկաչոք գալու են մեր դռների դեմը կանգնեն, բայց ոչ մեկին ներում չի լինելու: Իսկ այն աշխատողները, որոնք կհրաժարվեն և կահազանգեն, կհամագործակցեն իրավապահ մարմինների հետ և կոնկրետ ցուցմունքներ կտան, չեն ազատվի: Մենք բավարար լծակներ ունենք նրանց պաշտպանելու համար: Ստիպողաբար ցույցի բերողները կդատվեն, իսկ համագործակցողները կխրախուսվեն: Հավաքին մասնակցելուց հրաժարվողների հետ ոչինչ տեղի չի ունենա, մենք նրանց կկարողանանք պաշտպանել և պետականացումից հետո նրանք կշարունակեն աշխատել»,- ասաց Փաշինյանը: Նրա խոսքով՝ ՀԷՑ-ը մեր պետական ռազմավարական կրիտիկական ենթակառուցվածքն է, և Կառավարությունը չի կարող չխառնվել: «Մարդկանց փութաջանորեն ցույցի բերողները չգիտեմ հետո կկարողանա՞ն «Տաշիր պիցցայում» աշխատեն, թե ոչ, վստահ չեմ, որ կկարողանան «Տաշիր պիցցայում» որևէ բան աշխատեն: Կոնկրետ ասում եմ՝ պատժվելու են, հետո լաց, կոծ, տենց բաներ չլինեն, չենք ընդունելու»,- հայտարարեց նա:

18:42 - 18 հունիսի, 2025

ՀԾԿՀ-ն տուգանել է ՀԷՑ-ին արձանագրված խախտումների համար

2025 թվականի հունիսի 18-ին կայացած նիստում Հանրային ծառայությունները կարգավորող հանձնաժողովը 10 միլիոն դրամ գումարի չափով տուգանել է «Հայաստանի էլեկտրական ցանցեր» ընկերությանը՝ արձանագրված տեխնիկական և առևտրային խախտումների համար։ Այս մասին տեղեկացնում է ՀԾԿՀ-ն: «Հանձնաժողովը 2025 թվականի փետրվարի 3-14-ը իրականացրել է կարճաժամկետ մոնիթորինգ ընկերության երեք մասնաճյուղերում՝ ուսումնասիրելով սպառողներին առաքված և հաշվիչներով գրանցված էլեկտրաէներգիայի քանակն ու որակը։ Մոնիթորինգի արդյունքում արձանագրվել են մի շարք թերություններ՝ կապված հաշվիչների և դրանց արկղերի տեխնիկական վիճակի, հաշվառման ճշգրտության և սպառողների իրավունքների խախտման հետ։ Մասնավորապես՝ 2025 թվականի հունվարի 22-ի դրությամբ ինդուկցիոն (մեխանիկական, ոչ էլեկտրոնային) եռաֆազ առևտրային բոլոր հաշվիչները պետք է փոխարինված լինեին էլեկտրոնային (ավտոմատ գրանցմամբ) հաշվիչներով, որոնք ապահովում են նաև էլեկտրաէներգիայի ռեակտիվ բաղադրիչի հաշվառումը ( ԷԲՑ կանոնների 241-րդ կետ)։ Հաշվիչները 30 րոպեանոց միջակայքում պետք է գրանցեն լարման մակարդակը և հզորության գործակիցը (cos.), (ԷԲՑ կանոնների 247-րդ կետի 1-ին ենթակետ): Էլեկտրաէներգիայի նախորդող ամսվա ծախսը պետք է գրանցվի էլեկտրոնային հաշվիչի լուսատախտակի վրա արտածվող ցուցմունքով ավտոմատացված ռեժիմում (պետք է բացառվի տեսուչի կողմից ամսվա սկզբի և վերջի ցուցմունքների տարբերությամբ ծախսի հաշվարկումը), (ԷՄԱ կանոնների 75-րդ կետ): Ընկերությունը ներկայացրել է իր պարզաբանումները՝ չհերքելով արձանագրված խախտումները։ Արդյունքում՝ Հանձնաժողովը տուգանել է ընկերությանը՝ 10 միլիոն դրամ գումարի չափով, որը պետք է փոխանցվի պետական բյուջե մեկամսյա ժամկետում։ Բացի այդ, Հանձնաժողովը պարտավորեցրել է ընկերությանը մինչև 2025 թվականի դեկտեմբերի 31-ը իր սպասարկման ամբողջ տարածքում վերացնել նմանատիպ բոլոր խախտումները, համապատասխան դեպքերում վճարել տույժ՝ սպառողների իրավունքների խախտման համար և մեկամսյա ժամկետում Հանձնաժողովին ներկայացնել տեղեկատվություն»,- ասված է հաղորդագրության մեջ։

15:01 - 18 հունիսի, 2025

ԱԺ-ում արդեն կա ՀԷՑ-ն ազգայնացնելու մասին օրենքի նախագիծ. Նիկոլ Փաշինյան |shantnews.am|

shantnews.am: ՀՀ վարչապետ Նիկոլ Փաշինյանը խորհրդարանում լրագրողների հետ ճեպազրույցում հայտարարել է, որ 1 ամիս առաջ 1 ամիս ժամկետով Կառավարության անդամներին տրվել է հանձնարարական ՀԷՑ-ի կողմից բնակիչներին տված վնասները փոխհատուցելու մասին. «ՀԷՑ-ն իր գործունեության արդյունքում Հայաստանում գրեթե էներգետիկ ճգնաժամ է ստեղծել»,- ասել է նա։ Վարչապետը նշել է, որ իր հանձնարարականի վերջնաժամկետը հունիսի 21-ին է. «Բայց ես տվել էի հանձնարարական, որ 1 ամսվա ընթացքում կա՛մ պետք է հստակ ժողովրդին հասցված վնասը վերականգնելու մեխանիզմներ ներդրվեն, կա՛մ ՀԷՑ-ը պետք է ազգայնացվի, այսինքն՝ պետականացվի: Իմ հանձնարարականի օրը լրանում է հունիսի 21-ին, և ես այս ակտիվացումը ուղիղ կապում եմ իմ այդ հանձնարարականի, այդ որոշման հետ, որովհետև Կառավարության անդամները սկսել էին աշխատել, ՀԷՑ-ին հստակ ուղերձներ տվել էին, որ հստակ հաշվարկում ենք՝ ժողովրդին ինչ վնաս եք հասցրել, ոչ միայն ժողովրդին, այլև պետական և մասնավոր կազմակերպություններին, որովհետև որ գյուղ գնում եմ, որ համայնք գնում եմ, մարդիկ համատարած իմ առաջ ուղիղ հարց են դնում, ասում են՝ հոսանքն անջատվել է, մի հատ լվացքի մեքենա ունեինք, վառվել է, մի հատ սառնարան էինք առել, վառվել է, հեռուստացույց ունեինք, վառվել է: Ո՞վ է պատասխանը տալու»,- ասել է Փաշինյանը՝ հիշելով, որ Լոռու մարզ իր այցի ժամանակ որտեղ մտել է, լույսերն անջատվել են: Ինչ վերաբերում է ՀԷՑ-ի ազգայնացմանը, ապա, ըստ Փաշինյանի, այս հարցով ամենաարագ և արդյունավետ գործելու տեղն Ազգային ժողովն է, և որ այժմ մասնագետներն ու «Քաղաքացիական պայմանագիր» խմբակցությունը քննարկում են ՀԷՑ-ն ազգայնացնելու մասին օրենքի նախագիծն ԱԺ բերելու հարցը:

13:41 - 18 հունիսի, 2025

Էլեկտրաէներգիայի անջատումներ՝ Երևանի ու մարզերի մի շարք հասցեներում

08:46 - 18 հունիսի, 2025