ՆԱՏՕ

Հյուսիսատլանտյան դաշինքի կազմակերպությունը Հյուսիսատլանտյան պայմանագիրը ստորագրած անդամ-երկրների ստեղծած ռազմաքաղաքական կազմակերպությունն է, որը նպատակ է հետապնդում հավաքական անվտանգության և պաշտպանություն պարտականությունների իրականացումը։ Հիմնադրվել է 1949 թ․ ապրիլի 4-ին։ Հաճախ անվանում են ՆԱՏՕ՝ անգլերեն բառերի հապավումից։

ՆԱՏՕ-ին անդամակցում են 29 երկիր, որոնցից 27-ը եվրոպական են, երկուսը՝ հյուսիս-ամերիկյան: Հյուսիսատլանտյան դաշինքի որոշում կայացնող գլխավոր մարմինը Հյուսիսատլանտյան դաշինքի խորհուրդն է, իսկ միջազգային բարձրագույն պաշտոնյան՝ ՆԱՏՕ-ի գլխավոր քարտուղարը։

ՀՀ ԶՈՒ ԳՇ պետը և ՆԱՏՕ-ի պաշտպանական քոլեջի պետը քննարկել են ռազմական կրթության բնագավառում համագործակցության հեռանկարները

Դեկտեմբերի 10-11-ը Հայաստան են այցելել ՆԱՏՕ-ի պաշտպանական քոլեջի 145-րդ ավագ դասընթացի ուսանողները` կրթօջախի պետ, գեներալ-լեյտենանտ Մաքս Արթուր Նիլսենի գլխավորությամբ։ Պաշտպանական քոլեջի պետին ընդունել է ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը։ Քննարկվել են ռազմական կրթության բնագավառում համագործակցության հնարավորությունները և հեռանկարները։ ՊՆ վարչական համալիրում ՀՀ ՊՆ, ԱԳՆ և ԱԽ գրասենյակի ներկայացուցիչները ավագ դասընթացի ուսանողներին ներկայացրել են Հայաստանի պաշտպանության ու անվտանգության ոլորտների վերաբերյալ բանախոսություններ։ Դեկտեմբերի 11-ին պաշտպանական քոլեջի պետ Մաքս Արթուր Նիլսենը հյուրընկալվել է ՀՀ ՊՆ պաշտպանական ազգային հետազոտական համալսարանում, որտեղ ներկայացվել են կրթօջախի գործունեությունն ու իրականացվող ծրագրերը։ Հանդիպման արդյունքներով նախանշվել են նաև ռազմակրթական երկու հաստատությունների միջև համագործակցության հեռանկարները։

19:39 - 11 դեկտեմբերի, 2024

Ոչ մի ՆԱՏՕ «մեր շեմին». Լավրովը նշել է Ուկրաինայում խաղաղության պայմանները |news.am|

news.am: Ռուսաստանի արտգործնախարար Սերգեյ Լավրովը ամերիկացի լրագրող Թակեր Կառլսոնին տված հարցազրույցում ասել է, որ Ուկրաինայի հակամարտությունը կարող է լուծվել միայն այն դեպքում, եթե Կիևը հրաժարվի ՆԱՏՕ-ին միանալուց, երկրում արևմտյան ռազմակայանների փակման և օտարերկրյա զինվորականների մասնակցությամբ զորավարժությունների չեղարկման դեպքում, հայտնում է ՏԱՍՍ-ը։«Ոչ մի ՆԱՏՕ։ Ոչ մի ռազմաբազա, ուկրաինական հողի վրա զորավարժություններ օտարերկրյա զորքերի մասնակցությամբ»,- ասել է Լավրովը՝ նշելով, որ այժմ ստիպված պետք է ընդունել նոր իրողություններ, որոնցից գլխավորը Դոնեցկի և Լուգանսկի հանրապետությունների, Խերսոնի և Զապորոժիեի շրջանների ընդգրկումն է Ռուսաստանի կազմ։Ինչպես ընդգծել է ՌԴ ԱԳՆ ղեկավարը, Ռուսաստանը չի պատրաստվում համակերպվել այն փաստի հետ, որ ուկրաինական օրենսդրությունն արգելում է ռուսաց լեզուն և մշակույթը, ռուսական լրատվամիջոցները և ուկրաինական ուղղափառ եկեղեցին։ «Սա ՄԱԿ-ի կանոնադրությամբ Ուկրաինայի ստանձնած պարտավորությունների խախտում է։ Սրա հետ կապված ինչ-որ բան պետք է անել»,- կարծում է նա։ Լավրովը նշել է, որ ռուսաֆոբ «օրենսդրական հարձակման» սկսվելուց ի վեր՝ 2017 թվականին, Արևմուտքը լռում է։ՌԴ ԱԳՆ ղեկավարի խոսքով՝ Ռուսաստանի դիրքորոշումը հստակ է՝ «իր շեմին» ոչ մի ՆԱՏՕ չպետք է լինի։ Նա նաև հիշեցրել է ռուսների իրավունքների վերականգնումը։ Լավրովն ընդգծել է, որ ՌԴ նախագահ Վլադիմիր Պուտինը խոսել է հատուկ ռազմական գործողության նպատակի մասին։ «Սա արդարացի է և լիովին համապատասխանում է ՄԱԿ-ի կանոնադրությանը: Առաջին հերթին՝ լեզվական և կրոնական իրավունքները, ազգային փոքրամասնությունների իրավունքները։ Սա լիովին համապատասխանում է ԵԱՀԿ սկզբունքներին»,- նշել է նախարարը։

12:17 - 06 դեկտեմբերի, 2024

Ռյուտեն ԵՄ-ին կոչ է անում քննադատելու փոխարեն խոսել Թրամփի հետ․ Politico |hetq.am|

hetq.am: ՆԱՏՕ-ի գլխավոր քարտուղար Մարկ Ռյուտեն ԵՄ երկրների պաշտպանության նախարարներին կոչ է արել երկխոսություն սկսել ԱՄՆ նորընտիր նախագահ Դոնալդ Թրամփի հետ, այլ ոչ թե քննարկել ու քննադատել նրան: Այդ մասին հայտնել է Politico պարբերականը՝ հղում անելով անանուն դիվանագետներին։ Նրանց տվյալներով՝ Ռյուտեն, որը նոյեմբերին Թրամփի հետ հանդիպել էր Ֆլորիդայի վերջինիս կեցավայրում, վերջերս կայացած հանդիպումներից մեկի ժամանակ եվրոպացի նախարարներին հայտարարել է, որ «Թրամփի մասին քննարկելու ու քննադատելու փոխարեն նրանք պետք է խոսեն նրա հետ»։ Թրամփը բազմիցս դժգոհություն է հայտնել ՆԱՏՕ-ի գործունեությունից։ Նոյեմբերյան ընտրություններում հաղթելու դեպքում նա սպառնում էր, որ ԱՄՆ-ն դուրս կգա Հյուսիսատլանտյան դաշինքից, եթե եվրոպացի գործընկերները ֆինանսական մեծ պատասխանատվություն չվերցնեն սեփական անվտանգության համար։ Հանրապետական նախագահի երդմնակալության արարողությունը կկայանա 2025 թվականի հունվարի 20-ին։

13:26 - 04 դեկտեմբերի, 2024

Կիպրոսի վարչապետը հաստատել է, որ երկիրը մտադիր է անդամակցել ՆԱՏՕ-ին |armenpress.am|

armenpress.am: Կիպրոսի Հանրապետության նախագահ Նիկոս Խրիստոդուլիդիսը հաստատել է ՆԱՏՕ-ի անդամ դառնալու՝ իր երկրի մտադրությունը։ Այս մասին հաղորդում է Deutsche Welle-ի ռուսական ծառայությունը։ Նոյեմբերի 28-ին նա լրագրողներին ասել է, որ Նիկոսիան Վաշինգտոնի հետ բանակցություններ է վարում դաշինքին անդամակցելու ուղիների շուրջ։ Խրիստոդուլիդիսի խոսքով՝ այն փաստը, որ Կիպրոսի Հանրապետությունը չի կարող ՆԱՏՕ-ի անդամ պետություն դառնալ Թուրքիայի առարկությունների պատճառով, երկրի բանակին զրկում է ինչպես արդիականացման, այնպես էլ ռազմական տեխնիկայի ձեռքբերման բազմաթիվ հնարավորություններից։ Խրիստոդուլիդիսը նշել է, որ Կիպրոսն ԱՄՆ-ի հետ քննարկում է Հյուսիսատլանտյան դաշինքին հանրապետության անդամակցության երեք առաջարկվող մակարդակներ։ Նիկոս Խրիստոդուլիդիսը նշել է, որ Կիպրոսի զսպող կարողությունների ամրապնդումն առաջնահերթ նշանակություն ունի. երկիրը հնարավորություններ է փնտրում ինչպես ՆԱՏՕ-ի և ԱՄՆ-ի, այնպես էլ ԵՄ-ի պաշտպանական ծրագրերի միջոցով, որոնց կղզին մասնակցում է։ Խրիստոդուլիդիսը Կիպրոսի հիմնական առավելությունը համարել է կղզու աշխարհագրական դիրքը «առանձնահատուկ աշխարհառազմավարական նշանակություն ունեցող տարածքում»: Նա նաև հաստատել է, որ կղզու ռազմածովային և ռազմաօդային բազաների արդիականացման որոշումներն արդեն ընդունվել են, և որ Կիպրոսը ԵՄ-ի հետ քննարկումներ է անցկացնում ռազմածովային, իսկ ԱՄՆ-ի հետ՝ ռազմաօդային օբյեկտների շուրջ։ ՆԱՏՕ-ին անդամակցելու հնարավոր հայտի ժամկետների մասին հարցին նախագահը պատասխանել է. «Որքան քիչ խոսենք այդ մասին, այնքան ավելի մոտ կլինենք մեր նպատակին»: Կիպրոսի անդամակցությունը ՆԱՏՕ-ին կարող է կարևոր նախադեպ դառնալ: Ըստ դաշինքի կանոնների՝ չլուծված տարածքային խնդիրներ ունեցող պետությունը չի կարող ընդգրկվել դրա կազմում։ Կիպրոսի Հանրապետությունը վերահսկում է համանուն կղզու շուրջ 60%-ը, որի մնացած տարածքին տիրում է չճանաչված Հյուսիսային Կիպրոսի Թուրքական Հանրապետությունը։

12:59 - 29 նոյեմբերի, 2024

ՆԱՏՕ-ի նորանշանակ գլխավոր քարտուղարն առաջին անգամ Թուրքիայում է․ նրան ընդունել է Էրդողանը |factor.am|

factor.am: ՆԱՏՕ-ի գլխավոր քարտուղար Մարկ Ռյուտեն պաշտոնը ստանձնելուց հետո առաջին անգամ Թուրքիա է այցելել։ Անկարայում նրան ընդունել է նախագահ Ռեջեփ Թայիփ Էրդողանը, հաորդում է TRT Haber-ը։ Հաղորդվում է, որ Էրդողանի և Ռյուտեի հանդիպման ժամանակ ակնկալվում է քննարկել ռուս-ուկրաինական պատերազմի ներկա իրավիճակը։ Հանդիպման շրջանակում օրակարգում կլինի նաև Թուրքիայի միջնորդական դերը ռուս-ուկրաինական պատերազմում, ինչպես նաև ՆԱՏՕ-ի դաշնակիցների միջև պաշտպանական գնումների խոչընդոտների վերացումը: Բացի այդ, առաջնային թեմաներից են լինելու ահաբեկչության դեմ պայքարի քայլերը և Թուրքիայի ակնկալիքները։ Ավելի մանրամասն՝ սկզբնաղբյուրում։

19:05 - 25 նոյեմբերի, 2024

ԱԺ պատվիրակությունը մասնակցում է ՆԱՏՕ-ի ԽՎ աշնանային նստաշրջանին

ՀՀ ԱԺ ՆԱՏՕ-ի խորհրդարանական վեհաժողովի պատվիրակությունը Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի ղեկավարությամբ 2024 թ. նոյեմբերի 22-25-ը մասնակցում է ՆԱՏՕ-ի ԽՎ աշնանային նստաշրջանի աշխատանքներին: Այս մասին տեղեկանում ենք ՀՀ ԱԺ պաշտպանության և անվտանգության հարցերի մշտական հանձնաժողովից։ Ա. Քոչարյանը, պատվիրակության անդամներ Վահագն Ալեքսանյանը և Արուսյակ Ջուլհակյանը կմասնակցեն Ժողովրդավարության և անվտանգության հարցերի, Պաշտպանության և անվտանգության հարցերի, Տնտեսական եվ անվտանգության հարցերի, Քաղաքական հարցերի, Գիտության և տեխնոլոգիաների հարցերի հանձնաժողովների, ինչպես նաև՝ լիագումար նիստի աշխատանքներին: Պատվիրակության հետ ՆԱՏՕ-ի ԽՎ աշնանային նստաշրջանի և հանձնաժողովների աշխատանքներին մասնակցում են նաև կազմակերպությունում ՀՀ առաքելության ղեկավար Արման Իսրայելյանը և Կանադայում ՀՀ արտակարգ և լիազոր դեսպան Ն.Գ. Անահիտ Հարությունյանը:

20:58 - 23 նոյեմբերի, 2024

Ռյուտեն ու Թրամփը բանակցություններ են անցկացրել |armenpress.am|

armenpress.am: ՆԱՏՕ-ի գլխավոր քարտուղար Մարկ Ռյուտեն Ֆլորիդայում հանդիպել է ԱՄՆ նորընտիր նախագահ Դոնալդ Թրամփին: Այս մասին հայտնում է Reuters–ը՝ հղում անելով ՆԱՏՕ–ի մամուլի խոսնակ Ֆարահ Դախլալլահին: «Նրանք քննարկել են դաշինքի առջև ծառացած գլոբալ անվտանգային հարցերի շրջանակը», - ասել է նա:

13:57 - 23 նոյեմբերի, 2024

Մոսկվայի կողմից նոր սպառազինության կիրառման ֆոնին Կիևը դաշնակիցների աջակցությունն է ակնկալում |azatutyun.am|

azatutyun.am: Ռուսաստանի կողմից առանց միջուկային մարտագլխիկի բալիստիկ հրթիռներով հարվածից հետո Կիևը Ուկրաինա - ՆԱՏՕ խորհրդի նիստ է հրավիրել, որը տեղի կունենա նոյեմբերի 26-ին։ Այս մասին հայտարարել է Ուկրաինայի արտգործնախարար Անդրեյ Սիբիգան։ «Եվ անխոս, շեշտը դրվելու է մեր պաշտպանունակության ամրապնդման, մեր օդային վահանի ամրապնդման վրա», - շեշտել է Սիբիգան։ Ուկրաինացի պաշտոնյան հավելել է, որ նման սպառազինության կիրառումը «ռուսական ագրեսիայի լուրջ էսկալացիա է, խաղաղ բնակչության համար ռիսկերի ավելացում և, իհարկե, նաև լուրջ մարտահրավեր համընդհանուր անդրատլանտյան անվտանգությանը»:

20:12 - 22 նոյեմբերի, 2024

Հայաստան է ժամանել ՆԱՏՕ-ի՝ Եվրոպայում դաշնակցային ուժերի գերագույն հրամանատարության շտաբի պետի տեղակալ, փոխծովակալ Գունշտեյն Բրուասդալը

Նոյեմբերի 5-6-ը աշխատանքային այցով Հայաստան է ժամանել ՆԱՏՕ-ի՝ Եվրոպայում դաշնակցային ուժերի գերագույն հրամանատարության շտաբի պետի տեղակալ, փոխծովակալ Գունշտեյն Բրուասդալի (Նորվեգիա) գլխավորած պատվիրակությունը: Այս մասին տեղեկացնում են ՀՀ ՊՆ-ից: Այցի ընթացքում պատվիրակությունը հանդիպումներ է ունեցել ՀՀ ԶՈՒ ԳՇ պետի տեղակալ, գեներալ-մայոր Արթուր Երոյանի ու ՊՆ պաշտպանական քաղաքականության և միջազգային համագործակցության վարչության պետ Լևոն Այվազյանի հետ: Հանդիպումների ընթացքում քննարկվել են Հայաստան-ՆԱՏՕ համագործակցության ընթացքին և հեռանկարներին առնչվող հարցեր: ՆԱՏՕ-ական կողմին ներկայացվել է Հայաստանում իրականացվող պաշտպանական բարեփոխումների ընթացքը: Հայաստան այցի շրջանակում փոխծովակալ Բրուասդալի գլխավորած պատվիրակությունն այցելել է ՊՆ Վազգեն Սարգսյանի անվան ռազմական ակադեմիա և խաղաղապահ ուժերի բրիգադ:

19:01 - 07 նոյեմբերի, 2024

ՆԱՏՕ-ի գլխավոր քարտուղարը շնորհավորել է Թրամփին հաղթանակի կապակցությամբ |1lurer.am|

1lurer.am: ՆԱՏՕ-ի գլխավոր քարտուղար Մարկ Ռյուտեն շնորհավորել է Դոնալդ Թրամփին ԱՄՆ նախագահի ընտրությունում տարած հաղթանակի առթիվ և պատրաստակամություն հայտնել աշխատել նրա հետ։ Այդ մասին նա հայտարարել է X-ի իր էջում: «Ես հենց նոր շնորհավորեցի Դոնալդ Թրամփին՝ Միացյալ Նահանգների նախագահի պաշտոնում ընտրվելու կապակցությամբ։ Նրա ղեկավարությունը կրկին առանցքային նշանակություն կունենա մեր դաշինքն ամուր պահելու հարցում։ Ես անհամբեր սպասում եմ Թրամփի հետ նորից աշխատելու հնարավորությանը՝ ՆԱՏՕ-ի միջոցով, հզորության միջոցով խաղաղությունն առաջ տանելու համար»,- գրել է նա։

21:01 - 06 նոյեմբերի, 2024

Անհամբեր սպասում եմ կրկին միասին աշխատելուն․ ՆԱՏՕ-ի գլխավոր քարտուղարը շնորհավորել է Թրամփին |factor.am|

factor.am: ՆԱՏՕ-ի գլխավոր քարտուղար Մարկ Ռյուտեն շնորհավորել է Դոնալդ Թրամփին ԱՄՆ նախագահական ընտրություններում հաղթանակի կապակցությամբ։ «Շնորհավորել եմ Դոնալդ Թրամփին Միացյալ Նահանգների նախագահ ընտրվելու կապակցությամբ։ Նրա ղեկավարությունը կրկին առանցքային կլինի մեր դաշինքն ամուր պահելու համար: Ես անհամբեր սպասում եմ կրկին նրա հետ աշխատելուն ՝ ՆԱՏՕ-ի միջոցով խաղաղություն հաստատելու համար»,-X-ում գրել է Ռյուտեն։ Չնայած դեռևս պաշտոնապես չի հայտարարվել է ԱՄՆ նախագահական ընտրություններում Դոնալդ Թրամփի հաղթանակի մասին՝ նրան արդեն շնորհավորել են Հունգարիայի վարչապետ Վիկտոր Օրբանը, Ֆրանսիայի նախագահ Էմանուել Մակրոնը, Լիտվայի նախագահ Գիտանաս Նաուսեդան, Լատվիայի նախագահ Էդգարս Ռինկևիչը, Ուկրաինայի նախագահ Վլադիմիր Զելենսկին, Իսրայելի վարչապետ Բենիամին Նեթանյահուն, Սերբիայի նախագահ Ալեքսանդր Վուչիչը, Ավստրիայի կանցլեր Կարլ Նեհամերը, Սալվադորի նախագահ Նայիբ Բուկելեն, Իտալիայի փոխվարչապետ Մատեո Սալվինին, Վրաստանի վարչապետ Իրակլի Կոբախիձեն և այլք։

13:14 - 06 նոյեմբերի, 2024

ԱՄՆ-ն ռմբակոծիչներ կուղարկի Եվրոպա՝ համատեղ գործողություններ իրականացնելու նպատակով |tert.am|

tert.am: ԱՄՆ-ն առաջիկա օրերին ռազմավարական ռմբակոծիչներ կտեղակայի Եվրոպայում՝ ՆԱՏՕ-ի գործընկերների հետ համատեղ գործողություններ իրականացնելու համար։ Այդ մասին հայտնել են ԱՄՆ ռազմաօդային ուժերի եվրոպական հրամանատարությունից։ «Ակնկալվում է, որ ռմբակոծիչների աշխատանքային խմբի տեղակայումը Եվրոպայում կսկսվի մոտ օրերս»,-ասված է հրամանատարության հաղորդագրության մեջ։ Ռազմաօդային ուժերի ռմբակոծիչները Միացյալ Նահանգներից կտեղափոխվեն եվրոպական հրամանատարության պատասխանատվության տակ։ Մի քանի շաբաթ շարունակ ամերիկյան ռմբակոծիչների անձնակազմերը կմարզվեն և գործողություններ կանցկացնեն դաշնակիցների և ՆԱՏՕ-ի գործընկերների հետ։

17:20 - 02 նոյեմբերի, 2024

ՆԱՏՕ-ի յոթ երկրներ դեմ են Ուկրաինայի անհապաղ անդամակցությանը դաշինքին. POLITICO |armenpress.am|

armenpress.am: ՆԱՏՕ-ի մի շարք երկրներ, այդ թվում՝ ԱՄՆ-ն և Գերմանիան, պատրաստ չեն տեղի տալու Ուկրաինայի նախագահ Վոլոդիմիր Զելենսկիի պահանջներին և անհապաղ հրավիրելու նրան դաշինք՝ Ռուսաստանի հետ ուղղակի հակամարտության մեջ մտնելու մտավախությունների պատճառով։ Այդ մասին հաղորդում է POLITICO-ի եվրոպական հրատարակությունը՝ վկայակոչելով ԱՄՆ-ի և ՆԱՏՕ-ի չորս պաշտոնյաների ու դիվանագետների։ Ըստ աղբյուրների տեղեկատվության՝ Գերմանիան և ԱՄՆ-ն առաջին երկրների թվում են, որոնք ձգձգում են Կիևին դաշինք հրավիրելու հարցը։ «Այնպիսի երկրներ, ինչպիսիք են Բելգիան, Սլովենիան և Իսպանիան, թաքնվում են ԱՄՆ-ի և Գերմանիայի թիկունքում: Նրանք տատանվում են այդ հարցում (խմբ.՝ ՆԱՏՕ-ին Ուկրաինայի անդամակցության)», - մեջբերում է POLITICO-ն դաշինքի պաշտոնյայի խոսքը, որի անունը չի նշվում։ Ուկրաինայի անդամակցությանը դեմ են նաև Հունգարիան և Սլովակիան։ Հրատարակության մեկ այլ զրուցակցի խոսքով՝ դաշինքի երկրները միայն վերացականորեն են հավանություն տալիս Ուկրաինայի անդամակցությանը և կսկսեն ակտիվորեն դիմադրել դրան, հենց դա սկսի իրականություն դառնալ։ Լրատվամիջոցի գնահատումներով՝ դաշինքի առանցքային անդամները ձգձգում են Կիևի հրավերը, քանի որ «անհանգստացած են, որ կներքաշվեն Ռուսաստանի դեմ պատերազմի մեջ»։ POLITICO-ի աղբյուրի համաձայն՝ ԱՄՆ նախագահ Ջո Բայդենի վարչակազմում կարծում են, որ ԵՄ երկրների մեծ մասը չի աջակցի մոտ ապագայում ՆԱՏՕ-ին Ուկրաինայի անդամակցությանը։ ԱՄՆ վարչակազմում բազմիցս ասել են, որ ՆԱՏՕ-ին Կիևի անդամակցությունը տեղի կունենա միայն Ռուսաստանի հետ պատերազմի ավարտից հետո, սակայն հստակ ժամկետներ չեն նշվել։ Ընդ որում, ըստ պարբերականի զրուցակցի՝ Կիևի հնարավոր հրավերն ապագայում «կկապվի Ուկրաինայում կոռուպցիայի դեմ պայքարի պարտադիր բարեփոխումների հետ»: Իր «հաղթանակի ծրագրում», որը Զելենսկին վերջերս ներկայացրել էր ԵՄ երկրներին, իսկ մինչ այդ՝ ԱՄՆ ղեկավարությանը, նա խնդրում է անմիջապես հրավիրել Ուկրաինային ՆԱՏՕ, սակայն միևնույն ժամանակ ընդունելով, որ դա հնարավոր կլինի միայն Ռուսաստանի հետ պատերազմի ավարտից հետո։

14:22 - 24 հոկտեմբերի, 2024

ՆԱՏՕ-ի գլխավոր քարտուղար. Հյուսիսային Կորեայի զորքերը Ուկրաինա ուղարկելը կհանգեցնի էսկալացիայի |news.am|

news.am: Եթե Հյուսիսային Կորեան զորքեր ուղարկի Ուկրաինա՝ կռվելու Ռուսաստանի կողմից, դա զգալիորեն կսրի հակամարտությունը, հայտարարել է ՆԱՏՕ-ի գլխավոր քարտուղար Մարկ Ռյուտեն, փոխանցում է Reuters-ը։ Ռյուտեն ասել է, որ ինքը քննարկումներ է անցկացրել Հարավային Կորեայի նախագահ Յուն Սեոկ Յոլի հետ Սեուլի հետ դաշինքի սերտ գործընկերության վերաբերյալ՝ կենտրոնանալով պաշտպանական և արդյունաբերական համագործակցության և Եվրոատլանտյան և Հնդկ-Խաղաղօվկիանոսյան տարածաշրջանների փոխկապակցված անվտանգության վրա: Հիշեցնենք, որ գլխավոր հետախուզական վարչության տվյալներով՝ մոտ 11 հազար հյուսիսկորեացի հետևակայիններ պատրաստում են Ռուսաստանի արևելքում՝ Ուկրաինայի դեմ պատերազմի ուղարկելու նպատակով։ Նրանք պատերազմի մեջ կմտնեն արդեն նոյեմբերին:

10:30 - 23 հոկտեմբերի, 2024

ԳՇ պետի տեղակալ Արթուր Երոյանը հոկտեմբերի 13-17-ը մասնակցել է ՆԱՏՕ-ի Օպերատիվ կարողությունների հայեցակարգի տարեկան համաժողովին

ՀՀ ԶՈՒ ԳՇ պետի տեղակալ, գեներալ-մայոր Արթուր Երոյանի գլխավորած պատվիրակությունը հոկտեմբերի 13-17-ը Մարոկկոյի Կասաբլանկա քաղաքում մասնակցել է ՆԱՏՕ-ի Օպերատիվ կարողությունների հայեցակարգի (ՕԿՀ) տարեկան համաժողովին։ Այս մասին հայտնում են ՀՀ պաշտպանության նախարարությունից։ ՕԿՀ գործընթացի շրջանակում ՆԱՏՕ-ի գործընկեր երկրների ստորաբաժանումներն անցնում միջազգային առաքելությունների շրջանակում ՆԱՏՕ-ի ուժերի հետ փոխգործակցելիության մակարդակի գնահատում: Այցի ընթացքում գեներալ-մայոր Երոյանը հանդիպել է մի շարք գործընկերների, այդ թվում՝ Եվրոպայում դաշնակցային ուժերի գերագույն հրամանատարության շտաբի պետի տեղակալ, փոխծովակալ Գունշտեյն Բրուասդալին (Նորվեգիա) ևՆԱՏՕ-ի ԵԴՈՒԳՀ գործընկերության դիրեկտորատի ռազմական համագործակցության ծառայության ղեկավար-շտաբի պետի տեղակալ, բրիգադի գեներալ Մարտին Ռեմեսին (Սլովակիա)։ Քննարկվել են համագործակցությանը, այդ թվում՝ փոխգործակցելիության գնահատման հաջորդ շրջափուլին վերաբերող հարցեր: Հայկական պատվիրակությանն են հանձնվել հայկական ստորաբաժանումների նախորդ շրջափուլի գնահատման արդյունքում փոխգործակցելիությունը հաստատող հավաստագրերը։

14:28 - 19 հոկտեմբերի, 2024

ՆԱՏՕ-ին անդամակցության այլընտրանքը միջուկային զենք ունենալն է․ Զելենսկի |azatutyun.am|

azatutyun.am: ՆԱՏՕ-ին Ուկրաինայի անդամակցության միակ այլընտրանքը կարող է լինել միջուկային զենք ունենալն, այլապես անհնար կլինի ապահովել Ուկրաինայի անվտանգությունը, երեկ Բրյուսելում, մամուլի ասուլիսի ժամանակ, հայտարարել է Ուկրաինայի նախագահ Վլադիմիր Զելենսկին՝ մանրամասներ ներկայացնելով ԱՄՆ նախագահի հանրապետական թեկնածու, նախկին նախագահ Դոնալդ Թրամփի հետ հանդիպումից։ Զելենսկին Բրյուսելում էր՝ ԵՄ առաջնորդներին ներկայացնելու հինգ կետից բաղկացած «հաղթանակի ծրագիրը»։ «Ո՞րն է ելքը․ կա՛մ Ուկրաինան կունենա միջուկային զենք, և դա մեզ համար կլինի պաշտպանություն, կա՛մ մենք պետք է ինչ-որ դաշինք ունենանք։ Բացի ՆԱՏՕ-ից, այսօր ես այլ արդյունավետ դաշինք չգիտեմ», - պարզաբանել է Զելենսկին Թրամփին։ Ուկրաինայի նախագահն ասել է, որ Կիևն ընտրում է ՆԱՏՕ-ն, քանի որ միության անդամ երկրները չեն պատերազմում։ Թրամփը, ըստ Զելենսկու, այդ փաստն «արդար» է համարել։ Հիշեցնելով, որ 1994 թվականի «Բուդապեշտի հուշագրի» համաձայն Կիևը հրաժարվել է միջուկային զենքից՝ Զելենսկին նկատել է՝ փաստաթուղթը ստորագրած ԱՄՆ-ը, Մեծ Բրիտանիան և Ռուսաստանը, սակայն, չեն կատարել իրենց պարտավորությունները Ուկրաինան տարածքային ամբողջականության երաշխիքների հետ կապված։ 2014 թվականին, Ռուսաստանի կողմից Ղրիմի բռնակցումից հետո, Կիևը Մոսկվային մեղադրեց այս հուշագիրը խախտելու համար։ Ռուսական իշխանությունները, իրենց հերթին, որպես 2022 թվականի փետրվարին Ուկրաինայի վրա հարձակման հիմնավորում նշում են Ուկրաինայի ենթադրյալ միջուկային հավակնությունները, թեև Կիևը չի հայտարարել միջուկային զենք կրկին ձեռք բերելու իր մտադրության մասին։ Զելենսկին Թրամփի, ինչպես նաև ԱՄՆ նախագահի դեմոկրատական թեկնածու Քամալա Հարիսի հետ հանդիպել է սեպտեմբերին ԱՄՆ կատարած այցի ժամանակ։ Թրամփը թեև հանդիպումից մանրամասներ չի ներկայացրել, սակայն վերահաստատել է՝ նախագահ ընտրվելու դեպքում կձգտի օր առաջ վերջ դնել Ռուսաստանի և Ուկրաինայի միջև պատերազմին:

09:49 - 18 հոկտեմբերի, 2024