Արդարադատության նախարարություն

Տիգրան Դադունցը նշանակվել է արդարադատության նախարարի տեղակալ

Տիգրան Դադունցը նշանակվել է արդարադատության նախարարի տեղակալ։ Համապատասխան որոշումը ստորագրել է ՀՀ վարչապետ Նիկոլ Փաշինյանը: Դադունցը զբաղեցնում էր ՀՀ արդարադատության նախարարության «Օրենսդրության զարգացման կենտրոն» հիմնադրամի տնօրենի պաշտոնը։

Այսօր 10:27

Ներսես Զեյնալյանը նշանակվել է ՀՀ արդարադատության նախարարի խորհրդական

ՀՀ արդարադատության նախարար Սրբուհի Գալյանի հրամանով՝ Ներսես Զեյնալյանը նշանակվել է նախարարի խորհրդական։ Այդ մասին հայտնում են ՀՀ արդարադատության նախարարությունից: «Ներսես Զեյնալյանն իր աշխատանքային փորձառությունն սկսել է արդարադատության նախարարությունում, որից հետո աշխատանքը շարունակել է Պետական եկամուտների կոմիտեում։ Զբաղվում է նաև գիտական գործունեությամբ, այժմ դասախոսում է Հայաստանում ֆրանսիական համալսարանի իրավաբանական ֆակուլտետում»,- նշված է հաղորդագրության մեջ։ Կենսագրական տվյալներն այստեղ՝ https://www.moj.am/staff/view/staff/79:

11:43 - 20 նոյեմբերի, 2024

Արդարադատության նախարար Սրբուհի Գալյանը ԵՄ դեսպանի հետ քննարկել է ՀՀ-ԵՄ համագործակցության օրակարգային հարցեր

Արդարադատության նախարար Սրբուհի Գալյանն այսօր ընդունել է Հայաստանում Եվրոպական միության պատվիրակության ղեկավար, արտակարգ և լիազոր դեսպան Վասիլիս Մարագոսին: Այս մասին հաղորդում է նախարարության մամուլի ծառայությունը։ «Հանդիպման ընթացքում քննարկվել են ՀՀ-ԵՄ համագործակցության մի շարք օրակարգային հարցեր: Մասնավորապես՝ կողմերը դրական են գնահատել Համապարփակ և ընդլայնված գործընկերության համաձայնագրի (CEPA) շրջանակներում իրականացվող բարեփոխումները, որոնք վերաբերում են դատական համակարգին, կոռուպցիայի դեմ պայքարին և մարդու իրավունքների պաշտպանության ոլորտում իրականացվող ծրագրերին: Արդարադատության նախարարը շեշտել է հանրության լայն շրջանակներում դատական համակարգի հանդեպ հեղինակության բարձրացման կարևորությունը՝ ընդգծելով կանխատեսելի արդարադատության հիմքերի ստեղծումը: ԵՄ դեսպանը կարևորել է այս ուղղությամբ տարվող ԵՄ-Հայաստան երկխոսության հանձնառությունը: Զրուցակիցներն անդրադարձել են նաև ՀՀ-ԵՄ վիզաների ազատականացման գործընթացին: Կողմերն արձանագրել են ԵՄ բյուջետային աջակցության ծրագրերի դերն ու փուլային շարունակականությունը։ Հանդիպման ավարտին կողմերը վերահաստատել են երկկողմ համագործակցությունը խորացնելու և ընդլայնելու պատրաստակամությունը»,- ասված է հաղորդագրությունում:

15:03 - 19 նոյեմբերի, 2024

Նորայր Շողիկյանը նշանակվել է Արդարադատության նախարարի խորհրդական

ՀՀ արդարադատության նախարար Սրբուհի Գալյանի հրամանով՝ Նորայր Շողիկյանը նշանակվել է նախարարի խորհրդական՝ ազատվելով նախարարի մամուլի քարտուղարի պաշտոնից: Այս մասին հաղորդում է նախարարության մամուլի ծառայությունը։ Արդարադատության նախարարի մամուլի քարտուղարի պաշտոնը Շողիկյանը զբաղեցնում էր այս տարվա փետրվարի 26-ից։ Կենսագրական տվյալներն՝ այստեղ։

11:06 - 19 նոյեմբերի, 2024

ՀՀ կառավարությունն առաջնորդվում է ՍԴ որոշումների հարգման սկզբունքով. Սրբուհի Գալյանը մասնակցել է Միջազգային բարձրաստիճան համաժողովին

Արդարադատության նախարար Սրբուհի Գալյանը ելույթով է հանդես եկել «Սահմանադրական դատարանների որոշումների նկատմամբ հարգանքը» խորագրով միջազգային բարձրաստիճան համաժողովում: Նախարարն ընդգծել է, որ Սահմանադրական դատարանի որոշումները չհարգելն ու չկատարելը պետության իրավական հիմքերը խարխլելուն ուղղված ճանապարհ են, որն ընդունելի չէ Հայաստանի կառավարության համար: Սրբուհի Գալյանը նշել է՝ գործադիր իշխանությունն առաջնորդվում է Սահմանադրական դատարանի որոշումների հարգման սկզբունքով և այդ քաղաքականությունն անշեղելի է: Այս մասին տեղեկացնում են ՀՀ արդարադատության նախարարությունից: Եզրափակելով ելույթը՝ նախարարն արձանագրել է, որ Սահմանադրական դատարանի դերի կարևորությունը հատկապես ընդգծվում է 2018 թ. «Թավշյա հեղափոխություն»-ից հետո Հայաստանում իրավական պետության կայացմանը նպաստող լայնածավալ բարեփոխումների իրականացման համատեքստում: Համաժողովի շրջանակում կազմակերպված պանելային քննարկմանը Սրբուհի Գալյանը պատասխանել է նաև ներկաների հարցերին: «Սահմանադրական դատարանների որոշումների նկատմամբ հարգանքը» խորագրով միջազգային բարձրաստիճան համաժողովը կազմակերպվել է Վենետիկի հանձնաժողովի, Եվրոպայի խորհրդի «Աջակցություն սահմանադրական արդարադատության զարգացմանը Հայաստանում՝ եվրոպական չափանիշներին համապատասխան» ծրագրի և Հայաստանի Հանրապետության Սահմանադրական դատարանի հետ համատեղ: Համաժողովին ներկա են եղել ՀՀ սահմանադրական դատարանի նախագահ Արման Դիլանյանը, Վենետիկի հանձնաժողովի նախագահի տեղակալ, Նիդերլանդների Թագավորության Գերագույն դատարանի դատավոր Մարտին Քայերը, Հայաստանում հավատարմագրված դեսպաններ, միջազգային կազմակերպությունների ներկայացուցիչներ, դատավորներ և այլ պաշտոնյաներ:

20:02 - 14 նոյեմբերի, 2024

Քննչական մարմինների ղեկավարների և նրանց տեղակալների համար կսահմանվի կարգապահական պատասխանատվության ենթարկելու առանձնահատուկ մեխանիզմ

Քննչական կոմիտեում և Հակակոռուպցիոն կոմիտեում ծառայողներին կարգապահական պատասխանատվության ենթարկելու վերաբերյալ կանոնները սահմանված են «Քննչական կոմիտեի մասին» և «Հակակոռուպցիոն կոմիտեի մասին» օրենքներով: Այս մասին հայտնում են ՀՀ ԱԺ մամուլի ծառայությունից։ Վերոնշյալ օրենքներով, սակայն, նշված մարմինների ղեկավարներին և տեղակալներին կարգապահական պատասխանատվության ենթարկելու կառուցակարգերի մասով հատուկ կարգավորումներ սահմանված չեն: Արդյունքում՝ վերջիններիս նկատմամբ տարածելի են դառնում կարգապահական պատասխանատվության ենթարկելու վերաբերյալ ընդհանուր կարգավորումները, ինչը որոշ դեպքերում կարող է հանգեցնել ընթացակարգային անհստակությունների: Խնդրի լուծման նպատակով Կառավարությունն առաջարկում է քննչական մարմինների ղեկավարների և նրանց տեղակալների համար սահմանել կարգապահական պատասխանատվության ենթարկելու առանձնահատուկ մեխանիզմ: Այս մասին ասել է ՀՀ արդարադատության նախարարի տեղակալի պաշտոնակատար Արմենուհի Հարությունյանը նոյեմբերի 11-ին հրավիրված ԱԺ պետական-իրավական հարցերի մշտական հանձնաժողովի արտահերթ նիստի ժամանակ՝ ներկայացնելով ««Կոռուպցիայի կանխարգելման հանձնաժողովի մասին» օրենքում լրացումներ կատարելու մասին» և կից ներկայացված օրենքների նախագծերի փաթեթը: Հարակից զեկուցող Լիլիթ Մինասյանը, ներկայացնելով առաջարկվող կարգավորման նպատակը, նշել է, որ առաջարկվում է Հակակոռուպցիոն կոմիտեի և Քննչական կոմիտեի ղեկավարների ու տեղակալների կարգապահական վարույթներն իրականացնել Կոռուպցիայի կանխարգելման հանձնաժողովում: Պատգամավորը լիահույս է, որ Կոռուպցիայի կանխարգելման հանձնաժողովն ունի այդ կարողությունները ու կկարողանա իրականացնել արդար քննություն: Հարակից զեկուցողն առաջարկել է հանձնաժողովին դրական եզրակացություն տալ օրենսդրական փաթեթին, սակայն մեկ դիտարկմամբ, որպեսզի դատախազին ու նրա տեղակալներինը եւս ներառվի փաթեթում՝ մեկ միասնական մոտեցումը պահելու նպատակով: Հանձնաժողովը դրական եզրակացության է արժանացրել օրենսդրական փաթեթը: Երկրորդ ընթերցմամբ քննարկել և դրական եզրակացություն է տրվել նաև Կառավարության հեղինակած «Քրեական վարույթներով իրավական օգնության մասին» օրենքի նախագծին:

14:50 - 11 նոյեմբերի, 2024

Ընտրությունների օրը ռազմական կամ արտակարգ դրություն պիտի չլինի. ԸՕ-ի շուրջ վերջնական կոնսենսուս չկա |azatutyun.am|

azatutyun.am: Համապետական ընտրություններից մեկուկես տարի առաջ կառավարության նախաձեռնած ընտրական օրենսգրքի փոփոփոխությունների փաթեթը ընդդիմադիրներն ու քաղհասարակության ներկայացուցիչները միանշանակ չեն ընդունում:Թեև նախագիծն առաջին ընթերցմամբ արդեն ընդունվել է, բայց քննադատություններն ու մտահոգությունները չեն դադարում, մասնավորապես ռազմական կամ արտակարգ դրության պայմաններում ընտրությունների արդյունքներն անվավեր ճանաչելու հարցը այսօր նաև այդ օրակարգով հրավիրված խորհրդարանական լսումների առանցքում էր: «Չե՞ք կարծում, որ սա որևէ կառավարության կողմից կարող է բերել մի հնարավորության, երբ արտակարգ կամ ռազմական դրության հայտարարման միջոցով, որը, ըստ էության, կառավարության բացառիկ լիազորությունն է առանց շատ կոնկրետ սահմանափակումների, ընդ որում եթե նույնիսկ գանք Ազգային ժողով և չեղարկենք այդ ռազմական կամ արտակարգ դրությունը, միևնույն է՝ այն այդ պահից արդեն գործում է, նման իրավիճակն անմիջապես բերում է ընտրությունների արդյունքի զրոյացման», - ասաց «Լուսավոր Հայաստան» կուսակցության անդամ Դավիթ Խաժակյանը։Արդարադատության փոխնախարար Արմենուհի Հարությունյանը պարզաբանեց՝ որոշ ձևակերպումներ փոխել են, ընդ որում նաև ընդդիմադիրների հետ համագործակցելով։ Նոր տարբերակը պատրաստվում են ներկայացնել կառավարությանը: Առաջին ընթերցմամբ ընդունված կարգավորմամբ՝ ռազմական կամ արտակարգ դրություն հայտարարվելու պահից ընտրական գործընթացն իրավունքի ուժով համարվում է կասեցված, հետագայում արդեն կազմակերպվում է նոր քվեարկություն: Հարությունյանը մանրամասնեց առաջարկվող փոփոխությունները. -«Կատարվելու է փոփոխություն, որի արդյունքում նախատեսվում է, որ եթե ռազմական կամ արտակարգ դրությունը հայտարարվել է մինչև քվեարկության օրը՝ ժամը 20։00-ն, ապա ընտրական գործընթացը կասեցվելու է, համապատասխան դրույթներից հետո վերսկսվելու է, և եթե դրությունները հայտարարվում են 20։00-ից հետո, այսինքն՝ մինչև ընտրությունների նախնական արդյունքների ամփոփումը և արձանագրությունների կազմումը, ապա քվեարկության արդյունքների ամփոփումը շարունակվում է այն տեղամասերում, որոնցում հնարավոր է իրականացնել ամփոփում, որից հետո գործընթացը կրկին կասեցվում է»։ «Կատարվող փոփոխության նպատակն այն է, որ ապահովվի ավարտված քվեարկության արդյունքները, չզրոյացվեն», - հավելեց Արմենուհի Հարությունյանը։«Մենք առաջարկում ենք, որ ընտրության օրը՝ 00։00-ից մինչև 20։00-ն արգելվի ռազմական կամ արտակարգ դրության հայտարարումը։ Սա չի զրկում կառավարությանը ձեռնարկելու դրա իրական հիմքով պայմանավորված երկրի պաշտպանությանն ուղղված միջոցառումներ ձեռնարկելուց», - ասաց ընդդիմադիր «Հայաստան» խմբակցությունից Արծվիկ Մինասյանը։

17:40 - 08 նոյեմբերի, 2024

Ընտրական օրենսգրքի բարեփոխումները ներառում են նոր երաշխիքներ հենաշարժողական դժվարություններ ունեցող անձանց համար |armenpress.am|

12:36 - 08 նոյեմբերի, 2024

Կիսում եմ իշխող քաղաքական ուժի դիրքորոշումը՝ կապված իրական Հայաստանի հետ. Սրբուհի Գալյան

Ես ամբողջովին կիսում եմ իշխող քաղաքական ուժի դիրքորոշումը՝ կապված իրական Հայաստանի հետ։ Այս մասին լրագրողների հետ զրույցում հայտարարեց Սրբուհի Գալյանը։ Արդարադատության նորանշանակ նախարար Սրբուհի Գալյանը դեռ չի հասցրել ծանոթանալ «Խաղաղության պայմանագրի» տեքստին։ «Սա իմ աշխատանքային երրորդ օրն է, չեմ հասցրել։ Բայց ստանձնել եմ պատասխանատվություն՝ ապահովելու ողջ իրավական գործընթացը։ Ես ամբողջովին կիսում եմ իշխող քաղաքական ուժի դիրքորոշումը՝ իրական Հայաստանի հետ կապված, և հանձն եմ առել ապահովելու դրա իրավական ողջ գործընթացը»,-լրագրողների հետ զրույցում ասաց նախարարը։ Ի պատասխան դիտարկմանը, որ եթե կիսում է Փաշինյանի վարած քաղաքականությունը, ապա կո՞ղմ է, որ Արցախը ճանաչվի Ադրբեջանի մաս, Գալյանը նշեց. «Ես խոսում եմ խաղաղության օրակարգի մասին։ Պարոն վարչապետը շատ պարզ, հասկանալի մեկնաբանություններ է տվել իր հարցազրույցներում և այդ գաղափարներն, այո՛, ամբողջությամբ կիսում եմ։ Մեր պետությունը բավականին բարդ ճանապարհով է անցել և մեզանից որևէ մեկը 5, 6 տարի առաջ, գուցե, չկարողանար կանխատեսել այն խնդիրը, որի մեջ մենք հայտնվելու ենք այս օրերին։ Այսօրվա պայմաններում ես հավատում եմ իրական Հայաստանի գաղափարին և կարծում եմ, որ բոլորս՝ այդ թվում ես, ամեն ինչ պետ է անենք, որպեսզի կարողանանք ապահովել խաղաղ և անվտանգային միջավայր մեր երկրում»։

14:29 - 07 նոյեմբերի, 2024

ՀՀ-ում քաղբանտարկյալներ չկան. բոլոր գործերը հարուցվել են որպես հանցավոր արարքների հակազդեցություն. Գալյան |news.am|

news.am: Արարադատության նորանշանակ նախարար Սրբուհի Գալյանը համարում է, որ ՀՀ-ում քաղբանտարկյալներ չկան: «Բոլոր քրեական գործերը, որոնք հարուցվել են, հարուցվել են կոնկրետ հնարավոր հանցավոր արարքներին որպես հակազդեցություն»,- կառավարության նիստից հետո լրագրողների հետ զրույցում ասաց նա: Հարցին՝ ձեզ չի՞ կաշկանդի, եթե քրեական գործերով անցնեն ՔՊ անդամներ, նրանց մտերիմները, Գալյանը պատասխանեց. «Այդ հարցը ինձ կարող էիք տալ, երբ ես իրավապահ համակարգում աշխատելիս լինեի: Հիմա, կարծում եմ՝ չեմ առնչվելու նմանատիպ իրավիճակների հետ: Անդրադառնալով Արդարադատության պաշտոնում առաջադրվելուն, Սրբուհի Գալյանը հայտարարեց՝ իր համար սպասելի չէր, որ «Քաղաքացիական պայմանագիր» կուսակցությունն իրեն կառաջադրի Արդարադատության նախարարի պաշտոնում։ «Ես զբաղեցնում էի այլ պաշտոն, բայց առաջարկը ստանալուց հետո մտածել եմ, ու տվել եմ իմ գիտակցված համաձայնությունը։ Նախկինում այդ բեռը ստանձնած եղել եմ, երբ հեղափոխությունից հետո զբաղեցրել եմ ՀՀ արդարադատության փոխնախարարի պաշտոնը և այդ պատասխանատվության գիտակցումը պայմանավորել է իմ համաձայնությունը»,-ասաց նա։ Հարցին՝ մտավախություն չունի՞, որ մի օր էլ ՔՊ-ական պատգամավորներն իր դեմ ստորագրահավաք կսկսեն և կստիպեն հրաժարական տալ, նախարարը պատասխանեց. «Իմ կարծիքով՝ գործադիրում աշխատող մարդու գործը պետք է լինի գործ անելը և մտահոգություններ ունենալը, կարծում եմ՝ տեղին չէ: Արդարադատության նախարարի հիմնական անելիքը քաղաքական մակարդակում արդարության հարցի ճիշտ հասցեագրումն է, երկրորդը նոր արդարադատության համակարգի կայուն ու միասնական չափանիշների վրա հիմնված զարգացումը։ Կփորձենք վեր հանել խնդիրները, հասկանալու, թե որտեղ է արդարության պակասի զգացումը ձևավորվում մեր քաղաքացիների մոտ»։

13:08 - 07 նոյեմբերի, 2024

Սրբուհի Գալյանը նշանակվեց ՀՀ արդարադատության նախարար

Սրբուհի Գալյանը նշանակվեց ՀՀ արդարադատության նախարար: Համապատասխան հրամանագիրը ստորագրել է ՀՀ նախագահը ՀՀ վարչապետի առաջարկությամբ: Նշենք, որ Սրբուհի Գալյանը զբաղեցնում էր Գլխավոր դատախազի տեղակալի պաշտոնը։ Նա համակարգում էր ապօրինի ծագում ունեցող գույքի բռնագանձմանն ուղղված գործառույթների ոլորտը։ Գրիգոր Մինասյանը արդարադատության նախարարի պաշտոնից հրաժարական է տվել հոկտեմբերի 1-ին: Չնայած ՔՊ կուսակցականների հայտարարություններին, որ նախարարը պետք է քաղաքական թիմից լինի, մեկ ամիս շարունակ կուսակցության վարչությունը չի կարողացել ընտրել նախարարի թեկնածուի: Առաջադրված են եղել պատգամավորներ Արփի Դավոյանի, Արմեն Խաչատրյանի, ըստ մամուլի՝ նաև այլ պատգամավորիներ թեկնածություններ:

11:39 - 05 նոյեմբերի, 2024

Հակակոռուպցիոն ռազմավարությամբ իրականացվող բարեփոխումները ներկայացվել են ՏՀԶԿ պատվիրակությանը

Արդարադատության նախարարի տեղակալ Կարեն Կարապետյանը հանդիպում է ունեցել Տնտեսական համագործակցության և զարգացման կազմակերպության (ՏՀԶԿ) Եվրասիայի բաժնի ղեկավար Ուիլյամ Թոմփսոնի և Արևելյան Եվրոպայի և Հարավային Կովկասի բաժնի ղեկավար Դանիել Քվադբեկի հետ: Այդ մասին հայտնում են ՀՀ արդարադատության նախարարությունից: Նախարարի տեղակալը կարևորել է ՏՀԶԿ-ի դերը ՀՀ-ում հակակոռուպցիոն բարեփոխումների և միջազգային հակակոռուպցիոն պարտավորությունների օրակարգում՝ ընդգծելով ՏՀԶԿ հակակոռուպցիոն ցանցի շրջանակներում ՏՀԶԿ և Արդարադատության նախարարության սերտ համագործակցության կարևորությունը: Կարեն Կարապետյանը ներկայացրել է հակակոռուպցիոն ռազմավարությամբ իրականացվող մեծածավալ հակակոռուպցիոն բարեփոխումների ընթացքը, ինչպես նաև ՏՀԶԿ շրջանակներում Արդարադատության նախարարության համակարգման ներքո գտնվող ուղղությունները: ՏՀԶԿ ներկայացուցիչները ներկայացրել են մարդակենտրոն արդարադատության մատչելիության և արդարադատության համակարգերի ընդլայնման վերաբերյալ ՏՀԶԿ հայեցակարգը, ինչպես նաև ապօրինի ծագում ունեցող գույքի բռնագանձման վարույթների արդյունքում բռնագանձված գույքի կառավարման կառուցակարգերը: Կողմերը հաստատել են, որ օրենքի գերակայությունը և արդարադատության մատչելիությունը կարևոր դեր են խաղում վստահության վերականգնման, ժողովրդավարական արժեքների նկատմամբ հարգանքի ապահովման և համապարփակ վերականգնմանն աջակցելու գործում: Պայմանավորվածություն է ձեռք բերվել դիտարկելու նշյալ երկու ուղղություններով աշխատանքների ընդլայնման հետագա նպատակահարմարությունը:

18:09 - 31 հոկտեմբերի, 2024

ՄԻՊ-ն անդրադարձավ քրեակատարողական հիմնարկների շենքային վատ պայմաններին |armenpress.am|

armenpress.am: Հայաստանը գտնվում է քրեակատարողական հիմնարկների՝ շենքային վատ պայմաններ ունեցող պետությունների թվում: Այս մասին ասաց Մարդու իրավունքների պաշտպան Անահիտ Մանասյանն ԱԺ մշտական հանձնաժողովների համատեղ նիստում 2025 թվականի պետական բյուջեի մասին օրենքի նախագծի նախնական քննարկումներում: «Քրեակատարողական հիմնարկների շենքային պայմանների առումով մենք գտնվում ենք շատ վատ պայմաններ ունեցող պետությունների թվում։ Մենք պետք է կատարելագործենք քրեակատարողական հաստատությունների շենքային պայմանները»,-ասաց ՄԻՊ-ը՝ հավելելով, որ նույնը կարելի է ասել նաև հոգեբուժական և մի շարք այլ կազմակերպությունների հետ կապված: Անդրադառնալով քրեակատարողական հիմնարկներում վատ վերաբերմունքի և խոշտանգումների հետ կապված խնդիրներին՝ ՄԻՊ-ն ասաց. «Իհարկե, նման դեպքեր հանդիպում են Հայաստանում: Բայց, ի տարբերություն շատ պետությունների, մենք ծայրահեղ բարձր թվեր ունեցող պետությունների թվին չենք դասվում այս առումով: Թեպետ, նույնիսկ եղածների դեմ մենք պետք է կարողանանք պատշաճ պայքար մղել»: Մանասյանը հիշեցրեց, որ ՄԻՊ-ի 2023 թվականի զեկույցում առաջին անգամ նաև նկարներ են տեղադրել այդ հաստատություններից՝ թե՛ շենքային պայմանների ոչ բավարար լինելու, թե՛ մատչելիության հետ կապված խնդիրներ ունենալու առումով: «Կարծում եմ՝ սա պետության կողմից առաջնահերթ հասցեավորման կարիք ունեցող հարցերից է: Այս առումով ուզում եմ հատուկ շեշտադրել նաև ջրի, կենսական նշանակության այլ ծառայությունների ու մի շարք հարցերի հետ կապված խնդիրները: Մենք, օրինակ, բազմաթիվ բողոքներ ենք ստացել ջրի որակի հետ կապված: Ուսումնասիրություն ենք իրականացրել, կարծում եմ՝ այստեղ կա խնդիր, որը պետք է հասցեավորել»,-ասաց ՄԻՊ-ը՝ հավելելով, որ ոլորտն ունի շատ լուրջ հասցեավորման և կատարելագործման անհրաժեշտություն: Այնուամենայնիվ, Մանասյանը նշեց նաև, որ ժամանակի ընթացքում տարբեր խնդիրներ լուծումներ ստացել են: Օրինակ՝ նա մատնանշեց «Աբովյան» քրեակատարողական հիմնարկում վերջին բարեփոխումները:

16:52 - 29 հոկտեմբերի, 2024

Բրյուսելում կայացել է ՀՀ-ԵՄ Առևտրի հարցերով գործընկերության կոմիտեի վեցերորդ նիստը

«Օրենսդրության զարգացման կենտրոն» հիմնադրամի տնօրենի տեղակալ Դավիթ Ղարիբյանը Բրյուսելում մասնակցել է Հայաստանի Հանրապետություն-Եվրոպական միություն Առևտրի հարցերով գործընկերության կոմիտեի վեցերորդ նիստին՝ ներկայացնելով վեճերի լուծմանն առնչվող դրույթների վերաբերյալ հայկական կողմի դիրքորոշումը։ ՀՀ արդարադատության նախարարության փոխանցմամբ՝ Եվրոպական միության կողմից նիստը նախագահել է Եվրոպական հանձնաժողովի Առևտրի հարցերով գլխավոր տնօրինության Եվրոպայի և Արևելյան հարևանության հարցերով պատասխանատու Մարկո Դյուերկոպը, իսկ հայկական կողմից՝ ՀՀ էկոնոմիկայի նախարարի տեղակալ Նարեկ Հովակիմյանը: Նիստի ընթացքում կողմերը քննարկել են ՀՀ-ԵՄ Համապարփակ և ընդլայնված գործընկերության համաձայնագրի Առևտուր և առևտրին առնչվող համագործակցության շրջանակներում իրականացվող միջոցառումները և համապատասխան ճանապարհային քարտեզները։ Այնուհետև նիստի ընթացքում «Վեճերի լուծում» օրակարգային կետի ներքո ստորագրվել է կոմիտեի որոշումը, և ընդունվել են համապատասխան հավելվածները` Վարքագծի կանոններ (Code of conduct), Հաշտարարության մեխանիզմ (Mediation mechanism), Ընթացակարգային կանոններ (Rules of Procedure) փաստաթղթերը։

12:10 - 28 հոկտեմբերի, 2024

Իշխող ուժը փորձում է գտնել լավագույն լուծումները. Կոնջորյանը՝ արդարադատության նախարարի պաշտոնը թափուր մնալու հարցի մասին |1lurer.am|

1lurer.am: Նորմալ քննարկումներ են, կարծում եմ, որ դա շատ բնական է, և իշխող ուժը մշտապես տարբեր քննարկումների միջոցով փորձում է գտնել լավագույն լուծումները։ Ես դա շատ բնական գործընթաց եմ համարում: Այս մասին խորհրդարանում լրագրողների հետ զրույցում ասաց ՔՊ խմբակցության ղեկավար Հայկ Կոնջորյանը՝ պատասխանելով հարցին, թե արդյոք արդարադատության նախարարի պաշտոնի ընտրության հարցում ՔՊ վարչությունում կոնսենսուս չկա: Լրագրողներից մեկի դիտարկմանը, թե շուրջ մեկ ամիս է, ինչ ՀՀ արդարադատության նախարարի պաշտոնը թափուր է, ինչքա՞ն կարող են քննարկումները շարունակվել, Կոնջորյանը պատասխանեց՝ ՔՊ վարչությունը իր լիազորությունների շրջանակներում քննարկումներ է ծավալում։ «Ես վարչության անդամ չեմ, վարչության նիստերին մասնակցում եմ որպես կառավարող խմբակցության ղեկավար։ Բայց կարող եմ ասել, որ ինքս, մասնակցելով այդ նիստերին, շատ բարձր եմ գնահատում այս գործընթացը, որովհետև շատ առողջ քննարկումներ են, թեկնածուները գալիս են, ներկայացնում են իրենց ծրագրերը, վարչության անդամները հարցեր են տալիս»,- ասաց Կոնջորյանը։ Հարցին՝ ի՞նչը չի բավարարում վերջիններիս, Կոնջորյանը նշեց՝ ինքը լիազորված չէ հանդես գալ վարչության անունից: «Կարող եմ իմ գոհունակությունը հայտնել պրոցեսի վերաբերյալ, ինչը և արեցի»,- նշեց ԱԺ «Քաղաքացիական պայմանագիր» խմբակցության ղեկավարը: «Մենք պետք է առաջնորդվենք լավագույն թեկնածուն գտնելու առաջնահերթությամբ, որովհետև մեր ոլորտի և պետական շահը թելադրում է, որպեսզի կարողանանք լավագույն լուծումը գտնել: Թե կոնկրետ ինչ թեկնածու կլինի, և ինչ լուծումներ կլինեն, դրա վերաբերյալ, վստահ եմ, վարչության առաջիկա նիստից հետո անպայման կտեղեկանաք»,- ասաց Կոնջորյանը։ Լրագրողներից մեկի դիտարկմանը՝ արդյոք դա չի՞ վկայում այն մասին, որ ՔՊ-ն ունի կադրային լուրջ խնդիրներ, Կոնջորյանը չհամաձայնեց: «Ո՛չ, ես հակառակ տրամաբանությամբ կգամ, որովհետև բարձր չափանիշներ են դրվում՝ հաշվի առնելով ոլորտի կարևորությունը և առաջնորդվելով այդ բարձր չափանիշներով՝ դժվար է երբեմն գալ եզրահանգման, ինչը շատ նորմալ գործընթաց եմ գնահատում: Լիահույս եմ, որ առաջիկայում ունենալու ենք նշանակում»,- ընդգծեց Կոնջորյանը:

15:56 - 23 հոկտեմբերի, 2024

Պետք է վերանայենք, ներկայացնենք թեկնածուներ, որոնք այս պահին ՔՊ անդամ չեն. Ալեն Սիմոնյանն՝ արդարադատության ՔՊ-ական նախարար նշանակելու մասին |tert.am|

tert.am: Այն թեկնածուները, որոնք ներկայացվում են արդարադատության նախարարի պաշտոնի համար, նրանց 80 տոկոսն ասում են, որ գոհ են այն պաշտոնից, որ հիմա զբաղեցնում են և ուզում են մնալ իրենց տեղերում: Այս մասին լրագրողների հետ զրույցում ասաց ԱԺ նախագահ Ալեն Սիմոնյանն՝ անդրադառնալով հարցին, թե ինչո՞ւ չի հաջողվում նախարար ընտրել: «Մարդուն տանում, մի տեղ նշանակում ես, ինքը 1 ամիս կամ մեկ տարի աշխատում է, հետո դու իրեն պոկում ես, բերում այլ տեղ: Մենք սխալ բան ենք արել, քննարկում ենք բոլոր թեկնածուներին՝ անկախ նրանից այդ մարդն իր համաձայնությունը տվե՞լ է, թե չի տվել: Մենք, այնուամենայնիվ, հնարավորություն ենք ընձեռում ելույթ ունենալ, որպեսզի ավելի բաց լինի»,- ասաց նա: Սիմոնյանը հստակեցրեց՝ թեկնածուները ոչ թե չեն ցանկանում լինել նախարար, որովհետև իրենք լուրջ մասնագետներ են իրենց ոլորտներում, իրենք էլ ցանկանում են ծանրակշիռ մարդկանց առաջադրել: Նա վստահություն հայտնեց, որ մոտ ապագայում իրենք արդեն կունենան թեկնածու և որ նոր անուններ կան, բայց չի կարող ասել: Հարցին՝ գործո՞ւմ է այն սկզբունքը, որ պետք է պարտադիր լինի կուսակցության անդամ արդարադատության նախարարը, Սիմոնյանն արձագանքեց. «Մենք դա արդեն պետք է վերանայենք, ներկայացնենք թեկնածուներ, որոնք այս պահին ՔՊ անդամ չեն, նմանատիպ տարբեր փորձեր ունենք»: Հարցին էլ՝ եթե իրենց մեջ չեն գտնում թեկնածուի, կադրերի պակա՞ս կա, Սիմոնյանը պատասխանեց. «Մարդկանց ռեսուրսների խնդիր կա բոլոր բնագավառներում, մասնավորապես, եթե մենք խոսում ենք այնպիսի պատասխանատու ոլորտի մասին ինչպիսին է արդարադատությունը: Այստեղ մենք բազմաթիվ խնդիրներ ունենք, նաև հայ-ադրբեջանական խաղաղության պայմանագրի տեսանկյունից ենք նայում. պետք է մասնագետ լինի, որ այդ պայմանագրի հետ առնչություն ունենա»:

12:55 - 23 հոկտեմբերի, 2024