Հունաստան

Դեսպան Մկրտչյանը և Հունաստանի մշակույթի նախարարը քննարկել են Հայաստանում և տարածաշրջանում մշակութային գործընթացները

Նոյեմբերի 18-ին Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպել է Հունաստանի մշակույթի նախարար Լինա Մենդոնիի հետ։ Այդ մասին ասված է Հունաստանում Հայաստանի դեսպանության Ֆեյսբուքի էջում։ «Դեսպան Մկրտչյանը կարևորեց մշակութային դիվանագիտության նշանակությունը ՀՀ-Հունաստան երկկողմ հարաբերություններում: Քննարկվեցին մշակույթի ոլորտում համագործակցության նոր հնարավորությունները, երկկողմ ոլորտային իրավական դաշտն ընդլայնելու հնարավորությունները և համատեղ մի շարք նախաձեռնություններ։ Տիկին Մենդոնին շնորհակալություն հայտնեց ՀՀ դեսպանին այցելության համար և նշեց, որ պայմանագրերը կարևոր հիմք են երկկողմ համագործակցությունը խթանելու համար և այդ առումով առաջիկայում նոր քայլեր կձեռնարկվեն։ Համարելով Հայաստանը բարեկամ երկիր՝ հույն պաշտոնյան կարևորեց նմանատիպ շփումների հաճախակիությունը և շարունակական կապի մեջ լինելու կարևորությունը՝ փոխադարձ միջոցառումների մասնակցության, ինչպես նաև կազմակերպման միջոցով։ Անդրադարձ եղավ առաջիկայում փոխադարձ այցերի միջոցով մշակութային բնագավառում համագործակցությանն ընթացք տալուն։ Կողմերը քննարկեցին նաև Հայաստանում և տարածաշրջանում մշակութային գործընթացները։ Նախարար Մենդոնին ընդգծեց մշակույթի կարևոր դերակատարությունը ինչպես Հունաստանի արտաքին, այնպես էլ ներքին քաղաքականության համատեքստում»,- նշված է գրառման մեջ:

21:23 - 18 նոյեմբերի, 2024

Հայաստանի ԶՈՒ-ն Հունաստանում մասնակցում է «Օլիմպիական համագործակցություն-24» զորավարժություններին |armenpress.am|

armenpress.am: Հայաստանի զինված ուժերը Հունաստանում մասնակցում են «Օլիմպիական համագործակցություն-24» զորավարժություններին։ Զորավարժությունները մեկնարկել են նոյեմբերի 9-ին և կշարունակվեն մինչև նոյեմբերի 22-ը։ Զորավարժություններին մասնակցում են նաև Հունաստանի, Ալբանիայի, Ավստրիայի, Բուլղարիայի, Ֆրանսիայի, Վրաստանի, Հորդանանի և Կիպրոսի զինված ուժերը։ Զորավարժություններին X-ի իր միկրոբլոգում անդրադարձել է ՀՀ-ում Ֆրանսիայի դեսպան Օլիվիե Դըկոտինյին։ «Ֆրանսիայի և Հայաստանի բանակները Հունաստանում կազմակերպված «Օլիմպիական համագործակցություն-24» զորավարժություններին մասնակցում են 7 այլ ազգերի ուժերի հետ միասին»,- գրել է դեսպանը։

11:07 - 18 նոյեմբերի, 2024

Հունաստանում ՀՀ դեսպանը և Հունաստանի ազգային պաշտպանության գլխավոր շտաբի պետը բարձր են գնահատել երկկողմ ռազմական փոխհամագործակցությունը

Հունաստանում ՀՀ արտակարգ և լիազոր դեսպան Տիգրան Մկրտչյանը հանդիպել է Հունաստանի ազգային պաշտպանության գլխավոր շտաբի պետ, գեներալ Դիմիտրիոս Խուպիսի հետ։ Այս մասին հայտնում են Հունաստանում ՀՀ դեսպանությունից։ Հանդիպման ընթացքում կողմերը բարձր են գնահատել երկկողմ ռազմական փոխհամագործակցության առկա մակարդակը, ինչպես նաև քննարկել հետագա զարգացման հեռանկարները։ Հանդիպմանը քննարկվել են նաև Արևելյան Միջերկրական ծովի և Մերձավոր Արևելքի տարածաշրջաններում իրավիճակը։ ՀՀ դեսպանը գեներալ Դ․ Խուպիսին է ներկայացրել նաև Հայաստանի Հանրապետության և Ադրբեջանի միջև հարաբերությունների կարգավորման գործընթացի առկա իրավիճակը և Հայաստանի Հանրապետության կողմից այդ ուղղությամբ իրականացվող քայլերը։

21:56 - 16 նոյեմբերի, 2024

Թուրքիայի և Հունաստանի ԱԳ նախարարները Արևելյան Միջերկրականի և Կիպրոսի խնդիրներն են քննարկել |factor.am|

factor.am: Թուրքիայի արտաքին գործերի նախարար Հաքան Ֆիդանը հայտարարել է, որ Անկարան և Աթենքը պետք է միասին աշխատեն՝ լուծելու իրենց խնդիրները, որոնք, նրա խոսքով, չեն սահմանափակվում արևելյան Միջերկրականի ծովային սահմանների և իրավասության շուրջ տարաձայնություններով, գրում է Daily Sabah-ը։ Աթենքում իր հույն գործընկեր Յորղոս Գերապետրիտիսի հետ համատեղ ասուլիսում Ֆիդանն ասել է, որ երկու երկրները ջանքեր են գործադրում միմյանց ավելի լավ հասկանալու կարևորագույն հարցերի շուրջ, նաև ընդգծել «իրատեսորեն» գործելու և Էգեյան ծովում իրենց խնդիրները «ճիշտ ախտորոշելու» անհրաժեշտությունը։ «Մենք կարող ենք նպաստել մեր ժողովրդի փոխադարձ բարեկեցությանը win-win՝ շահեկան քաղաքականությամբ, հատկապես այս դժվարին ժամանակաշրջանում»,- ասել է Ֆիդանը՝ նկատի ունենալով Ուկրաինայում և Պաղեստինում շարունակվող հակամարտությունները։ «Թուրքիան հավատարիմ է մնում իր դիրքորոշմանը, որ փոխանակումը պետք է արդար լինի Արևելյան Միջերկրական ծովում»,- հավելել է թուրք պաշտոնյան։ Ֆիդանը կրկնել է Անկարայի տեսակետը, որ Կիպրոսի շուրջ վեճը լուծելու դաշնային մոդելն այլևս կենսունակ չէ՝ կոչ անելով լուծել երկու պետությունների տարբերակը։

21:14 - 08 նոյեմբերի, 2024

Նիկոլ Փաշինյանը հանդիպել է Հունաստանի վարչապետ Կիրիակոս Միցոտակիսի հետ

ՀՀ վարչապետ Նիկոլ Փաշինյանը ՄԱԿ-ի Գլխավոր վեհաժողովի 79-րդ նստաշրջանի շրջանակում հանդիպում է ունեցել Հունաստանի վարչապետ Կիրիակոս Միցոտակիսի հետ։ Այդ մասին ֆեյսբուքյան էջում տեղեկացրել է Նիկոլ Փաշինյանը՝ կից տեսանյութ հրապարակելով։

22:35 - 25 սեպտեմբերի, 2024

Հունաստանի ԱԳ նախարարությունը պատմական է համարել ՀՀ վերաբերյալ ԵՄ-ի որոշումը |1lurer.am|

1lurer.am: Հունաստանի արտգործնախարարությունը ողջունել է ԵՄ-ի որոշումը՝ Հայաստանին աջակցելու հարցում: «Հունաստանը ողջունում է ԵՄ-ի պատմական որոշումը՝ Հայաստանին օգնություն տրամադրել Խաղաղության եվրոպական հիմնադրամից և Հայաստանի հետ երկխոսություն սկսել վիզային ռեժիմի ազատականացման վերաբերյալ: ԵՄ-Հայաստան գործընկերության ամրապնդումը նպաստում է ժողովրդավարությանը, խաղաղությանն ու տարածաշրջանային կայունությանը»,- նշված է նախարարության X-ի էջում:

17:05 - 24 հուլիսի, 2024

Հունաստանում ՀՀ դեսպանն ու Սալոնիկի քաղաքապետը քննարկում են ունեցել

Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպել է Սալոնիկի քաղաքապետ Ստելիոս Անգելուդիսին։ Ինչպես տեղեկանում ենք Հունաստանում Հայաստանի դեսպանության տարածած հաղորդագրությունից, հանդիպման սկզբում դեսպանը շնորհավորել է քաղաքապետին տեղական ինքնակառավարման մարմինների ընտրություններում հաղթանակի կապակցությամբ և մաղթել նրան հաջողություն։ Ստելիոս Անգելուդիսն իր հերթին նշել է, որ լավ տեղյակ է հայոց պատմությանը և բարձր է գնահատում Սալոնիկի հայ համայնքի դերը քաղաքի կյանքում: Նա պատրաստակամություն է հայտնել հնարավորությունների սահմաններում բոլոր ուղղություններով նպաստել հայ-հունական հարաբերությունների զարգացմանը։ Զրուցակիցներն անդրադարձել են քույր քաղաքներ Սալոնիկի և Գյումրու միջև բազմոլորտ համագործակցությունը խթանելուն ուղղված մի շարք ծրագրերի և այդ նպատակով փոխադարձ այցեր կազմակերպելու նպատակահարմարությանը: Կողմերը քննարկել են նաև Հայաստանի և Հունաստանի տեղական ինքնակառավարման մարմինների ներկայացուցիչների միջև համաժողով կազմակերպելու հնարավորությունը։

16:49 - 17 հուլիսի, 2024

Երևանը պատրաստակամ է գործակցության տարբեր ծրագրեր իրականացնել Աթենքի հետ. Ավինյանն ընդունել է Հունաստանի դեսպանին

Երևանի քաղաքապետ Տիգրան Ավինյանն ընդունել է ՀՀ-ում Հունաստանի Հանրապետության արտակարգ և լիազոր դեսպան Խրիստոս Սոֆիանոպուլոսին: Այս մասին տեղեկացնում են Երևանի քաղաքապետարանից: Դեռևս 1993թ. Երևանի և Աթենքի միջև կնքվել է գործակցության և բարեկամության համաձայնագիր. կողմերը փաստել են, որ փաստաթուղթը թարմացման անհրաժեշտություն ունի: Ողջունելով հյուրին՝ քաղաքապետ Ավինյանն առանձնակի կարևորել է գործընկերային հարաբերությունների հաստատումն Աթենքի հետ և ընդգծել, որ Երևանը բաց և պատրաստակամ է գործակցության տարբեր ծրագրեր իրականացնել Հունաստանի մայրաքաղաքի հետ: Որպես գործակցության կարևոր ուղղություն՝ Երևանի քաղաքապետը հատկանշել է համատեղ մշակութային ծրագրերի իրականացումը՝ նշելով, որ Երևանը վերջին տարիներին ոլորտային աննախադեպ նախաձեռնություններով է հանդես գալիս և ունի մեծ փորձ: Շնորհակալություն հայտնելով գործակցության պատրաստակամության համար՝ դեսպան Խրիստոս Սոֆիանոպուլոսը նշել է, որ իր լիազորությունների շրջանակում կանի հնարավորը՝ երկու մայրաքաղաքների միջև հարաբերությունների հաստատման ու գործնական ծրագրերի իրականացման համար:

09:31 - 11 հուլիսի, 2024

Հայաստանի և Հունաստանի ԱԳ նախարարները քննարկել են տարածաշրջանային հարցեր

ՀՀ ԱԳ նախարար Արարատ Միրզոյանը հեռախոսազրույց է ունեցել Հունաստանի Հանրապետության ԱԳ նախարար Յորղոս Գերապետրիտիսի հետ: Այս մասին տեղեկացնում են ՀՀ ԱԳՆ-ից: Զրուցակիցները քննակել են երկկողմ օրակարգի և ԵՄ հետ գործընկերության խորացման հարցեր: Անդրադարձ է կատարվել տարածաշրջանային հարցերի:

18:22 - 21 հունիսի, 2024

Թուրքիան և Հունաստանն անլուծելի խնդիրներ չունեն․ Էրդողան |tert.am|

tert.am: Անկարան ու Աթենքն անլուծելի խնդիրներ չունեն, նրանք վիճելի հարցերը լուծում են բաց երկխոսության միջոցով։ Այս մասին Թուրքիայի նախագահ Թայիփ Էրդողանը հայտարարել է աշխատանքային այցով Անկարայում գտնվող Հունաստանի վարչապետ Կիրիակոս Միցոտակիսի հետ մամուլի ասուլիսում։ Փոխանցում է ՏԱՍՍ-ը։ «Մենք անլուծելի խնդիրներ չունենք, ինչպես ավելի վաղ ասացի, հարցերի լուծումը գործընթաց է, և դրականի հետ կապված մեր հույսերը գնալով աճում են։ Մենք ձգտում ենք դրական մթնոլորտի և ակնկալում ենք բոլոր հարցերը լուծել ազնիվ և բաց երկխոսության միջոցով»,- ասել է Էրդողանը։

19:24 - 13 մայիսի, 2024

Հունաստանի վարչապետը հիասթափված է բյուզանդական տաճարը մզկիթի վերածելու Անկարայի որոշումից |shantnews.am|

shantnews.am: Հունաստանի վարչապետ Կիրիակոս Միցոտակիսը Milliyet թերթին տված հարցազրույցում ասել է, որ հիասթափված է բյուզանդական տաճարը՝ Խորայի վանքը, մզկիթի վերածելու թուրքական իշխանությունների որոշումից (Կարիե, Ստամբուլում), որը, նրա կարծիքով, հակասում է փոխըմբռնումն ամրապնդելու համատեղ ջանքերին։ Միցոտակիսը մայիսի 13-ին կայցելի Անկարա՝ ի պատասխան Թուրքիայի նախագահի՝ 2023 թվականի դեկտեմբերին Աթենք կատարած այցի։ Ավելի վաղ Հունաստանի վարչապետը հայտարարել էր, որ պատմական բյուզանդական տաճարն ու վանքը մզկիթի վերածելը վիրավորանք է, և նա այդ հարցը կբարձրացնի երկուշաբթի օրը Անկարայում Թուրքիայի նախագահ Ռեջեփ Թայիփ Էրդողանի հետ հանդիպմանը։ «Ես շատ հիասթափված եմ բյուզանդական վանքը մզկիթի վերածելու թուրքական իշխանությունների վերջին որոշումից և Սուրբ Սոֆիայի վերաբերյալ նախորդ որոշումից (Ստամբուլի աշխարհահռչակ մզկիթը, մինչև Բյուզանդական կայսրության անկումը, քրիստոնյաների ամենամեծ տաճարն էր-խմբ): Այս որոշումները հակասում են փոխըմբռնման ամրապնդմանն ուղղված համատեղ ջանքերին»,- ասել է Միցոտակիսը Milliyet թերթին տված հարցազրույցում։ Շարունակությունը` սկզբնաղբյուր կայքում։

13:55 - 12 մայիսի, 2024

Անկարան կարծում է, որ Թուրքիան և Հունաստանը պետք է ինքնուրույն լուծեն իրենց խնդիրները |shantnews.am|

shantnews.am: Թուրքիան և Հունաստանը պետք է երկկողմ ձևաչափով լուծեն առկա խնդիրները՝ առանց երրորդ երկրների վերահսկողության և միջամտության, և մայիսի 13-ին Հունաստանի վարչապետ Կիրիակոս Միցոտակիսի այցը Թուրքիա կարևոր է այս տեսանկյունից։ Այս մասին հայտարարել է Թուրքիայի նախագահի աշխատակազմի հաղորդակցության բաժնի ղեկավար Ֆահրեթթին Ալթունը։ «2020 թվականից ի վեր մենք ապրել ենք տարբեր ճգնաժամեր՝ համաճարակ, տնտեսական, պարենային, լոգիստիկ, էներգակիրների մատակարարման ճգնաժամեր, աղետներ, ինչպես նաև այն հարձակումները, որոնք Իսրայելը անխոհեմ կերպով շարունակում է Գազայի հատվածում։ Համաշխարհային խաղաղությունն ու կայունությունը չափազանց փխրուն են, և մենք չենք ապրում միջազգային համակարգում, որն ընդունակ է պահպանել խաղաղությունն ու կայունությունը։ Մենք ապրում ենք մի ժամանակաշրջանում, երբ տարածաշրջանային խաղացողները պետք է լուծեն իրենց խնդիրները փոխադարձության և ազգային շահերի հիման վրա՝ առանց երրորդ երկրների առաջնորդության, խնամակալության կամ ճնշման։ Այդ իսկ պատճառով Թուրքիայի և Հունաստանի միջև համագործակցության նախաձեռնությունները շատ ավելի նշանակալից և արժեքավոր են այսօր»,- ասել է Ալթունը՝ ելույթ ունենալով Ստամբուլում թուրք-հունական ԶԼՄ-ների ակադեմիայի ֆորումում: Նա հիշեցրել է, որ 2021 թվականից Անկարան և Աթենքը իրականացնում են «դրական օրակարգային նախաձեռնություն», որն ուղղված է հարաբերությունների կարգավորմանն ու ամրապնդմանը։

19:06 - 11 մայիսի, 2024

ՏԿԵ նախարարն ու Հունաստանի դեսպանը քննարկել են տրանսպորտային, ավիացիոն ոլորտին վերաբերող հարցեր

ՀՀ տարածքային կառավարման և ենթակառուցվածքների նախարար Գնել Սանոսյանն ընդունել է ՀՀ-ում Հունաստանի Հանրապետության արտակարգ և լիազոր դեսպան Խրիստոս Սոֆիանոպուլոսին։ Այս մասին տեղեկացնում են ՏԿԵ նախարարությունից: Նախարարը ողջունել է դեսպանին և բարձր է գնահատել Հայաստան-Հունաստան բարեկամական հարաբերությունները։ Հանդիպման ժամանակ քննարկվել են տրանսպորտային, ավիացիոն ոլորտին վերաբերող, ինչպես նաև վերականգնվող էներգետիկայի և էներգախնայողության ոլորտներում համագործակցության ակտիվացման վերաբերյալ հարցեր։ Նախարար Սանոսյանը կարևորել է նաև միջտարածաշրջանային համագործակցության աշխարհագրության ընդլայնումը։ Քննարկվել են նաև Հայաստանի և Հունաստանի միջև առաջիկայում սպասվող միջկառավարական հանձնաժողովի նիստի օրակարգին վերաբերող մի շարք հարցեր։

11:37 - 02 մայիսի, 2024

Ընդգծում ենք հայ-ադրբեջանական սահմանին էսկալացիայից խուսափելու կարևորությունը. Հունաստանի ԱԳՆ |1lurer.am|

1lurer.am: Հունաստանի ԱԳՆ-ն կարևորել է Հարավային Կովկասի տարածաշրջանում խաղաղության, կայունության և բարգավաճման անհրաժեշտությունը և ողջունել ապրիլի 19-ին հայկական և ադրբեջանական կողմերի միջև պետական սահմանների սահմանազատման և անվտանգության հանձնաժողովի 8-րդ նիստի ընթացքում ձեռք բերված պայմանավորվածությունը։ Նշելով, որ երկու հանրապետությունները համաձայնել են, որ սահմանի սահմանազատման գործընթացը հիմնված լինի Ալմա Աթայի 1991 թ. հռչակագրի վրա, Հունաստանի ԱԳՆ-ն ընդգծել է. «Մենք խրախուսում ենք երկու կողմերին շարունակել համաձայնեցված քայլերի իրականացումը և ընդգծում ենք հայ-ադրբեջանական սահմանին էսկալացիայից խուսափելու կարևորությունը»,- գրված է Հունաստանի ԱԳՆ-ի X-ի միկրոբլոգում։

21:10 - 01 մայիսի, 2024

Այսօր մեր մտքերը Հունաստանի և ողջ աշխարհի հայերի հետ են․ Նիկոս Դենդիաս |armenpress.am|

armenpress.am: Հունաստանի ազգային պաշտպանության նախարար Նիկոս Դենդիասն, անդրադառնալով Հայոց ցեղասպանության 109-րդ տարելիցին, նշել է, որ պատմական ճշմարտության ճանաչումն անհրաժեշտ է մարդկության դեմ հանցագործությունների կրկնությունից խուսափելու համար։ Այս մասին հույն նախարարը գրառում է կատարել X-ի իր միկրոբլոգում։ «Այսօր մեր մտքերը Հունաստանի և ողջ աշխարհի հայերի հետ են՝ հարգելով Հայոց ցեղասպանության զոհերի հիշատակը»,- գրել է նախարարը։

19:14 - 24 ապրիլի, 2024

Հայոց ցեղասպանության զոհերը երբեք չպետք է մոռացվեն․ Հունաստանի նախագահ |armenpress.am|

armenpress.am: Հունաստանի նախագահ Կատերինա Սաքելարոպուլուն հայտարարություն է տարածել Հայոց ցեղասպանության 109-րդ տարելիցի կապակցությամբ։ «Օսմանյան Կայսրության վերջին շրջանում 1․5 միլիոն հայերի պլանավորված բնաջնջումից անցել է 109 տարի։ Սա ցեղասպանություն է, որը գրեթե բնաջնջեց հնագույն ժողովրդին, Կովկասի հարավային հատվածում ծաղկող քրիստոնեական միջուկը։ Այսպիսի ողբերգական իրադարձությունների ճանաչումը, ինչպես նաև մարդկության նկատմամբ բռնության ու ատելության դեմ մշտական զգոնությունը անհրաժեշտ պայման են այսպիսի հանցագործությունների չկրկնվելու և ազգերի ու ժողովուրդների խաղաղ գոյակցության համար։ Հայոց ցեղասպանության զոհերը երբեք չպետք է մոռացվեն»,- ասված է Հունաստանի նախագահի հայտարարության մեջ։

14:38 - 24 ապրիլի, 2024