Ֆրանսիա

Փարիզում մեկնարկել է Օլիմպիական խաղերի բացման արարողությունը

Փարիզում մեկնարկել է ամառային Օլիմպիական խաղերի բացման արարողությունը։ Մարզիկների շքերթը տեղի կունենա Սեն գետի վրա։ Առաջին անգամ Խաղերի բացումը անցկացվում է ոչ թե ստադիոնում, այլ Սեն գետում՝ նավակների վրա։ 206 երկրների մարզիկները նավերով անցնում են գետի վրայով։ Հայաստանի դրոշակակիրներն են բռնցքամարտիկ Դավիթ Չալոյանը և լողորդ Վարսենիկ Մանուչարյանը։ Միջոցառմանը մասնակցում է 10,5 հազար մարզիկ։

22:05 - 26 հուլիսի, 2024

Օլիմպիական խաղերին համընթաց Փարիզում բացվեց «Հայաստանի տունը» |armenpress.am|

armenpress.am: Ֆրանսիայի մայրաքաղաք Փարիզում` Հայկական բարեգործական ընդհանուր միությանը պատկանող տանը (118 Rue, Courcelles 75017, Paris հասցեում) բացվեց «Հայաստանի տունը»: Ինչպես հաղորդում է «Արմենպրես»-ի թղթակիցն օլիմպիական Փարիզից, «Հայաստանի տան» բացմանը ներկա էին ՀՀ նախագահ Վահագն Խաչատուրյանը, ՀՀ վարչապետի աշխատակազմի ղեկավար Արայիկ Հարությունյանը, ՀՀ ԿԳՄՍ նախարարի տեղակալ Կարեն Գիլոյանը, Ֆրանսիայում ՀՀ դեսպան Հասմիկ Տոլմաջյանը և Հայաստանի օլիմպիական հավաքականի մի շարք անդամներ և պատվիրակության ղեկավար կազմը: «Բոլորիս ակնկալիքն ու ցանկությունը մեկն է` տեսնել Հայաստանի դրոշը բարձրացած, ուրախ ժպիտներով, հաղթանակած տեսնել ձեզ: Մենք եկել ենք նաև այդ ակնկալիքով: ՀՀ գործող իշխանությունն առանձնահատուկ ուշադրություն է դարձնում ֆիզիկական դաստիարակությանը: Սա միայն խոսքեր չեն: Վարչապետն իր օրինակով ցույց է տալիս, որ սպորտն ու առողջ ապրելակերպը բոլորիս անհրաժեշտ է »,-ասաց ՀՀ նախագահ Վահագն Խաչատուրյանը: ՀՀ վարչապետի աշխատակազմի ղեկավար Արայիկ Հարությունյանը, հաջողություն մաղթելով Հայաստանի օլիմպիական հավաքականի ներկայացուցիչներին, ասաց. «Հույս ունեմ, որ մինչև ամսի 11-ը, մենք բազմաթիվ հնարավորություններ ենք ունենալու այս տանը պատվելու մեր մարզիկներին: Ուզում եմ հույս հայտնել, որ ամսի 11-ից հետո մենք կխոստանանք 4 նոր դպրոց բացելու մեր օլիմպիականների պատվին: Վերջին տարիներին պետությունը շատ մեծ հանձնառություն է վերցրել առավելագույնս սատարելու մեր մարզիկներին»: ՀՀ ԿԳՄՍ նախարարի տեղակալ Կարեն Գիլոյանը «Հայաստանի տունը» համարում է հայկականության կենտրոն Փարիզում այս օրերին, երբ ամբողջ սպորտային աշխարհը կենտրոնացած է Ֆրանսիայի մայրաքաղաքում: «Հայաստանի տանը» կհանդիպեն մարդիկ, ովքեր կուզենան հայանալ, ավելի շատ հայ դառնալ, հայություն շնչել: Նրանք կգան այստեղ, որտեղ կհետևեն նաև մեր մարզիկների ելույթներին: Օլիմպիական խաղերի ժամանակ շատ երկրներ այսպիսի նախագծեր իրականացնում են: Մեր նպատակը երկրպագու-մարզիկ, մարզիկ-լրագրողներ կապն ամրացնելն է»,-ասաց Գիլոյանը: «Հայաստանի տան» դեմքը ֆուտբոլի աշխարհի առաջնության չեմպիոն Յուրի Զորկաեֆն է: Հայաստանը Փարիզի 33-րդ ամառային Օլիմպիական խաղերին կունենա 15 մասնակից` հրաձիգ Էլմիրա Կարապետյանը, մարմնամարզիկներ Արթուր Դավթյանը (հենացատկ), Վահագն Դավթյանը (օղակներ), ըմբիշներ Սլավիկ Գալստյանը (հունահռոմեական ոճ, 67 կգ), Մալխաս Ամոյանը (հունահռոմեական ոճ, 77 կգ), Արթուր Ալեքսանյանը (հունահռոմեական ոճ, 97 կգ), Արսեն Հարությունյանը (ազատ ոճ, 57 կգ), Վազգեն Թևանյանը (ազատ ոճ, 65 կգ), ծանրորդներ Անդրանիկ Կարապետյանը (89 կգ), Գարիկ Կարապետյանը (102 կգ), Վարազդատ Լալայանը (+102 կգ), բռնցքամարտիկ Դավիթ Չալոյանը (+92 կգ), լողորդներ Արթուր Բարսեղյանը և Վարսենիկ Մանուչարյանը, աթլետ Երվանդ Մկրտչյանը:

21:09 - 25 հուլիսի, 2024

Նախագահ Վահագն Խաչատուրյանն աշխատանքային այցով մեկնել է Ֆրանսիա

Հանրապետության նախագահ Վահագն Խաչատուրյանը հուլիսի 25-ին ֆրանսիական կողմի հրավերով աշխատանքային այցով մեկնել է Ֆրանսիա՝ մասնակցելու Փարիզում կայանալիք Օլիմպիական խաղերի պաշտոնական բացման արարողությանը: Ֆրանսիայի մայրաքաղաք Փարիզում հուլիսի 26-ից մեկնարկել են ամառային 33-րդ Օլիմպիական խաղերը: Հայաստանի հավաքականի կազմում 15 մարզիկ է ընդգրկված։

18:32 - 25 հուլիսի, 2024

Ֆրանսիան և ԱՄՆ-ը կհյուրընկալեն ձմեռային օլիմպիական խաղերը 2030 և 2034 թվականներին |1lurer.am|

1lurer.am: Միջազգային օլիմպիական կոմիտեն (ՄՕԿ) հաստատել է 2030 և 2034 թվականների ձմեռային օլիմպիական և պարալիմպիկ խաղերի անցկացման վայրերը՝ Ֆրանսիայում և ԱՄՆ-ում։ Որոշումն ընդունվել է չորեքշաբթի՝ հուլիսի 24-ին, Փարիզում կայացած ՄՕԿ-ի նստաշրջանում քվեարկությունից հետո: Ակնկալվում է, որ Ֆրանսիայում ձմեռային մարզաձևերի մրցումներ կանցկացվեն ֆրանսիական Ալպերի տարբեր վայրերում, իսկ սառույցի մրցումները՝ Նիսում Լազուրե ափին։ ԱՄՆ-ում 2034 թվականի օլիմպիական խաղերի անցկացման վայրը պետք է լինի Սոլթ Լեյք Սիթին, որտեղ 2002 թվականին արդեն անցկացվել են ձմեռային խաղեր։ ՄՕԿ-ի պահանջների համաձայն՝ Ֆրանսիայի կառավարությունը դեռ պետք է երաշխիքներ տրամադրի օլիմպիական խաղերի համար, ինչպես նաև համաձայնագիր ալպյան երեք շրջանի՝ Էվիանի, Ռոն-Ալպերի և Պրովանս-Ալպերի իշխանությունների հետ մրցույթի կազմակերպման վերաբերյալ։ Ֆրանսիայի նախագահ Էմանուել Մակրոնը, որը նույնպես մասնակցել է ՄՕԿ-ի նիստին, խոստացել է, որ բոլոր պարտավորությունները կկատարվեն։ Ֆրանսիան չորրորդ անգամ է ընդունելու ձմեռային օլիմպիական խաղերը։ Նախորդներն անցկացվել են 1924 թվականին՝ Շամոնիում, 1968-ին՝ Գրենոբլում և 1992 թվականին՝ Ալբերվիլում։ Ֆրանսիան այժմ ավարտում է 2024 թվականի ամառային օլիմպիական խաղերի վերջին նախապատրաստական աշխատանքները։ Փարիզում խաղերի բացման արարողությունը տեղի կունենա հուլիսի 26-ին։

21:54 - 24 հուլիսի, 2024

«Ֆրանսիան փորձում է խոչընդոտել խաղաղության գործընթացը»․ Հաջիզադեն արձագանքել է Մակրոնի հայտարարություններին

Ցավոք, Ֆրանսիայի նախագահ Էմանուել Մակրոնի՝ Հայաստանին զինելը արդարացնող և Ադրբեջանի նկատմամբ կողմնակալ վերաբերմունք արտահայտող հայտարարությունները ևս մեկ վառ օրինակ են, որ Ֆրանսիան փորձում է լարվածություն ստեղծել տարածաշրջանում և խոչընդոտել խաղաղության գործընթացը։ Այս մասին հայտարարել է Ադրբեջանի ԱԳ նախարարության խոսնակ Այխան Հաջիզադեն։ Հիշեցնենք, որ հուլիսի 19-ին Բլենհայմյան պալատում ընթացող Եվրոպական քաղաքական համայնքի 4-րդ գագաթնաժողովի շրջանակում հանդիպում են ունեցել ՀՀ վարչապետ Նիկոլ Փաշինյանը և Ֆրանսիայի նախագահ Էմանուել Մակրոնը։ Վերջինս, անդրադառնալով Հայաստանին սպառազինության վաճառքին, հայտարարել է, որ միանգամայն նորմալ է, որ դաշնակիցներն իրար զինում են՝ ինքնիշխան տարածքը պաշտպանելու համար․ «Եթե նայեք վերջին տասնամյակին, ապա Ադրբեջանը շատ ավելի է զինվել, քան Հայաստանը։ Եվ եթե հիշողությունս չի դավաճանում, Ադրբեջանն էր, որ 2020-ին սարսափելի պատերազմ սկսեց»։ Հենց այս հայտարարությունը մեկնաբանելով՝ Ադրբեջանի ԱԳՆ խոսնակը ասել է․ «Ֆրանսիական կողմին հիշեցնում ենք, որ միջազգային իրավունքի շրջանակում մեր երկրի լեգիտիմ իրավունքն էր Ադրբեջանի սուվերեն տարածքներում Հայաստանի 30-ամյա օկուպացիային վերջ դնելու և տարածքային ամբողջականությունը վերականգնելու համար մեր նախաձեռնած պատերազմը։ Ադրբեջանի ցանկացած ջանք ուղղված է և ուղղվելու է արդար նպատակին, այդ թվում նաև՝ ռազմական պոտենցյալը մեծացնելուն ուղղված ջանքերը։ Սակայն նույնը չենք կարող ասել զավթիչ Հայաստանի մասին»։ Ըստ Հաջիզադեի՝ այն, որ Ֆրանսիան Հայաստանին որպես խաղաղասեր երկիր է ներկայացնում, ցույց է տալիս, թե որքան «անարդար» է եղել այդ երկրի վարած քաղաքականությունը և՛ միջնորդության շրջանակում, և՛ 44-օրյա պատերազմի ընթացքում։ «Եվս մեկ անգամ հայտարարում ենք, որ Ֆրանսիայի կողմից խաղաղությանը չնպաստող և տարածաշրջանում կայունությանը խանգարող ջանքերը ոչ մի արդյունքի չեն հասնելու»,- հայտարարել է Հաջիզադեն։

10:25 - 19 հուլիսի, 2024

Մակրոնն ընդունել է վարչապետ Աթալի հրաժարականը |tert.am|

tert.am: Ֆրանսիայի նախագահ Էմանուել Մակրոնն ընդունել է վարչապետ Գաբրիել Ատալի հրաժարականը։ Այս մասին հայտնում է France-Presse գործակալությունը։ Ավելի վաղ հայտնի էր դարձել, որ խորհրդարանական ընտրությունների արդյունքների հրապարակումից հետո Աթալի կառավարությունը հրաժարական է ներկայացրել։ Նշվում է, որ կառավարությունը դեռևս կշարունակի աշխատանքը նախկին կազմով, մինչև նոր կառավարության նշանակումը։

20:52 - 16 հուլիսի, 2024

Սուրեն Պապիկյանը X-ի իր էջում շնորհավորանք է հղել Ֆրանսիայի Ազգային տոնի կապակցությամբ

ՀՀ պաշտպանության նախարար Սուրեն Պապիկյանը X-ի իր էջում շնորհավորանք է հղել Ֆրանսիայի Ազգային տոնի կապակցությամբ․«Շնորհավորում եմ Հայաստանի և հայ ժողովրդի բարեկամ Ֆրանսիային՝ ժողովրդին և իշխանություններին, իմ գործընկեր Սեբաստիեն Լըկորնյուին, Ազգային տոնի կապակցությամբ՝ հղելով խաղաղության և բարգավաճման մաղթանքներ։Վստահ եմ, որ Հայաստան-Ֆրանսիա երկարամյա բարեկամությունը և համագործակցությունը, այդ թվում՝ պաշտպանության բնագավառում, շարունակական կլինեն», - նշված է գրառման մեջ։

16:51 - 14 հուլիսի, 2024

Մխիթար Հայրապետյանը մասնակցել է Ֆրանսիայի ազգային տոնի առթիվ Հայաստանում կազմակերպած միջոցառմանը․ ԲՏԱ նախարարություն

ՀՀ բարձր տեխնոլոգիական արդյունաբերության նախարար Մխիթար Հայրապետյանը մասնակցել է Ֆրանսիայի ազգային տոնի առթիվ Հայաստանում Ֆրանսիայի դեսպանության կազմակերպած հանդիսավոր միջոցառմանը: Այս մասին տեղեկանում ենք ՀՀ Բարձր տեխնոլոգիական արդյունաբերության նախարարության մամուլի ծառայությունից։ Նախարարը շնորհավորել է Հայաստանում Ֆրանսիայի արտակարգ և լիազոր դեսպան Օլիվիե Դըկոտինյիին և ի դեմս նրա՝ Ֆրանսիայի բարեկամ ժողովրդին, մաղթել հաջողություն ու ամենայն բարիք:

16:45 - 14 հուլիսի, 2024

Վստահ եմ, որ մեր առանձնաշնորհյալ հարաբերությունները կշարունակեն խորանալ գալիք տարիներին. Միրզոյանը Ֆրանսիայի ազգային տոնի առթիվ շնորհավորել է Սեժուրնեին |armenpress.am|

armenpress.am: ՀՀ ԱԳ նախարար Արարատ Միրզոյանը X-ի իր էջում Ֆրանսիայի ազգային տոնի առթիվ շնորհավորել է Ֆրանսիայի Եվրոպայի և արտաքին գործերի նախարար Ստեֆան Սեժուրնեին։ ՀՀ ԱԳ նախարարը նշել է. «Ջերմ շնորհավորանքներս Ֆրանսիայի ազգային տոնի կապակցությամբ: Վստահ եմ, որ մեր առանձնաշնորհյալ հարաբերությունները, որոնք հիմնված են ընդհանուր արժեքների և պատմական բարեկամության վրա, ինչպես նաև ամրապնդվել են գործնական քայլերով, կշարունակեն խորանալ գալիք տարիներին»։

13:46 - 14 հուլիսի, 2024