Արմեն Գրիգորյան

Արմեն Գրիգորյանը ՀՀ Անվտանգության խորհրդի գործող քարտուղարն է։

Ծնվել է 1983 թ․ դեկտեմբերի 25-ին, Արցախի Մարտունի քաղաքում։

2001թ․ ընդունվել ԵՊՀ միջազգային հարաբերությունների ֆակուլտետ։ Ուսումնառության ընթացքում զորակոչվել է ԼՂՀ Պաշտպանության բանակ։ 2009 թ․ ընդունվել է Հայաստանի ամերիկյան համալսարանի Քաղաքագիտության եւ միջազգային հարաբերությունների ֆակուլտետի մագիստրատուրա։

2012 թ․ մարտից մինչեւ 2013 թվականի սեպտեմբերը աշխատել է «Քաունթերփարթ Ինթերնեյշնլ Ինկ.»-ի հայաստանյան ներկայացուցչությունում։ 2015 թ․ ապրիլից 2018 թ․ մայիսն աշխատել է «Թրանսփարենսի Ինթերնեյշնլ հակակոռուպցիոն կենտրոն»-ում՝ որպես ընտրական ծրագրերի համակարգող։ 2013թ․ եղել է ՀՀ նախագահի թեկնածու Անդրիաս Ղուկասյանի նախընտրական շտաբի պետ: 2015թ․ սահմանադրական փոփոխությունների հանրաքվեի ժամանակահատվածում եւ 2017 թ․ ապրիլին ՀՀ ԱԺ ընտրությունների ընթացքում համակարգել է «Քաղաքացի դիտորդ» դիտորդական առաքելությունը։ 2017թ․ կատարել է փորձագիտական աշխատանքներ Եվրոպայի խորհրդում։ 2018-ին եղել է «Մերժիր Սերժին» նախաձեռնության անդամ։ Շարժման մյուս առաջնորդների հետ միասին նախ առեւանգվել էր, ապա ձերբակալվել. Սերժ Սարգսյանի հրաժարականից հետո ազատ է արձակվել։ «Քաղաքացիական պայմանագիր» կուսակցության անդամ է։

2021թ․ հուլիսի 14-ին ՀՀ վարչապետի հրամանով նշանակվել է ՀՀ արտաքին գործերի նախարարի տեղակալ, նույն թվականի օգոստոսի 19-ին ազատվել է պաշտոնից և վերանշանակվել ՀՀ անվտանգության խորհրդի քարտուղար։

ԱԽ քարտուղարը Հայաստանի դիմակայունության բարձրացման կարևոր պայման է համարում դիվերսիֆիկացիան և ժողովրդավարությունը |armenpress.am|

armenpress.am: Հայաստանի Հանրապետության անվտանգության խորհրդի քարտուղար Արմեն Գրիգորյանի դիտարկմամբ՝ տնտեսության, անվտանգության դիվերսիֆիկացիան շատ կարևոր գործոն է Հայաստանի դիմակայունության բարձրացման տեսանկյունից։ Այս առումով ՀՀ ԱԽ քարտուղարը կարևորում է նաև ժողովրդավարությունը՝ նշելով, որ վերջին շրջանում Հայաստանի դեմ ծառացած սպառնալիքներին երկիրը դիմակայել է հենց ժողովրդավարության շնորհիվ։ Այս մասին ԱԽ քարտուղարը նշել է «ՀՀ-Արևելյան գործընկերություն-ԵՄ․ մարտահրավերներն ու հնարավորությունները» խորագրով պանելային քննարկմանն ունեցած ելույթի շրջանակներում։ «Ես այն կարծիքին եմ, որ Արևելյան գործընկերությունը հաջողված է, և այն դրական բազմաթիվ արդյունքներ ունի։ 15 տարի առաջ, երբ Արևելյան գործընկերությունը ստեղծվում էր, հետխորհրդային երկրներն ավելի շատ իրար նման էին, բայց 15 տարիների ընթացքում մեծ փոփոխություններ են կրել, և երևի հիմնական պահանջն այն է, որ անհատական մոտեցում լինի բոլոր այս անդամ-երկրներին»,- նշել է Գրիգորյանն՝ ընդգծելով, որ այդ գործընկերությունը, միանշանակ, հաջողված է։ Խոսելով դիմակայունության մասին՝ Արմեն Գրիգորյանն այդ տեսանկյունից կարևորել է Արևելյան գործընկերությունը և շեշտել, որ այն օգնում է Հայաստանին։ «Գիտեք, որ Հայաստանը վերջին տարիներին ինտենսիվ աշխատում է իր դիմակայունությունը բարձրացնելու վրա, և դիմակայունության կոնտեքստում մենք շատ ենք կարևորում դիվերսիֆիկացիան։ Հաճախ, երբ մենք ասում ենք դիմակայունություն, կարծում եմ՝ առաջին միտքը, որ գալիս է, երևի հենց դիվերսիֆիկացիան է կամ զանազանեցումը, որը Հայաստանի համար շատ կարևոր է՝ տնտեսության, անվտանգության մեջ»,- նշել է Գրիգորյանը՝ հավելելով, որ սա կարևոր ուղղություն է, որտեղ Հայաստանն աշխատում է։ Գրիգորյանը կարծիք է հայտնել, որ Արևելյան գործընկերությունն այդ հարցում իր ներդրումն է ունեցել, և ԵՄ-ի կողմից Հայաստանում իրականացվող բարեփոխումներին աջակցելն ունի հենց այդ նպատակը։ ՀՀ անվտանգության խորհրդի քարտուղարը դիմակայունության տեսանկյունից կարևորել է նաև ժողովրդավարությունը․ «Մենք խորը համոզմունք ունենք, որ ժողովրդավարությունը միանշանակ բարձրացնում է Հայաստանի դիմակայունությունը և ժողովրդավարությունն այն հիմնական գործիքներից մեկն է, որով Հայաստանը կարողանում է դիմակայել իր սպառնալիքներին»,- ասել է Գրիգորյանը։ Ըստ Գրիգորյանի՝ ժողովրդավարությունը շատ կարևոր է նաև ներքին անվտանգության, տնտեսության, կոռուպցիայի դեմ պայքարի տեսանկյունից։ «Տնտեսության բարեփոխումները և տնտեսական արդյունքները բերում են ավելի շատ ռեսուրսների և դրանց ներդրմանը անվտանգության ոլորտում․ դա կլինի զենքի ձեռքբերում, թե նոր տեխնոլոգիաների ու կարողությունների»,- ասել է ԱԽ քարտուղարը՝ անվտանգության տեսանկյունից կարևորելով նաև ԵՄ-ի և կառույցի անդամ պետությունների հետ գործընկերության ամրապնդումը։ Նրա դիտարկմամբ՝ որքան Հայաստանը շատ գործընկերներ ունենա և որքան շատ գործընկերներ աջակցեն Հայաստանի բարեփոխումներին, ամրապնդելով տնտեսական համագործակցությունը, Հայաստանն այնքան ավելի դիմակայուն կլինի։ «Միանշանակ է, որ Արևելյան գործընկերությունն օգնել է նաև, որ Հայաստանն ամրապնդի գործընկերությունն ինչպես Բրյուսելի, այնպես էլ ԵՄ անդամ երկրների հետ։ Այստեղ ևս կարող ենք արձանագրել մի շարք հաջողություններ», - ասել է Արմեն Գրիգորյանը։ Նա համոզմունք է հայտնել, որ խաղաղությունը տարածաշրջանում ամրապնդում է Հայաստանի դիմակայունությունը և նոր հնարավորություններ է տալիս երկրին։ «Մենք շարունակելու ենք աշխատել խաղաղության օրակարգի շուրջ»,- ընդգծել է Գրիգորյանը՝ հավելելով, որ գործընկերությունը, դիմակայունությունը, խաղաղությունը և ժողովրդավարությունը միմյանց փոխկապակցված գործոններ են։ Արմեն Գրիգորյանը անդրադարձել է նաև «Համապարփակ պաշտպանության և անվտանգության» համակարգին՝ նշելով, որ այդ հայեցակարգին Հայաստանը հանգել է՝ հաշվի առնելով վերոնշյալ բոլոր ուղղություններով կատարած աշխատանքի շնորհիվ։

13:00 - 03 հուլիսի, 2024