Նիդերլանդներ

Փոխվարչապետ Տիգրան Ավինյանն ընդունել է Նիդերլանդների դեսպանին

ՀՀ փոխվարչապետ Տիգրան Ավինյանը փետրվարի 3-ին ընդունել է ՀՀ-ում Նիդերլանդների Թագավորության դեսպան Նիկոլաս Սխերմերսին: Ինչպես տեղեկացրին Տիգրան Ավինյանի գրասենյակից, ողջունելով հյուրին՝ փոխվարչապետը կարևորել է Երևանում Նիդերլանդների դեսպանության բացումը և բարձր գնահատել դեսպան Սխերմերսի անձնական ներդրումը երկկողմ հարաբերությունների զարգացման գործում: Շնորհակալություն հայտնելով ընդունելության համար՝ դեսպան Սխերմերսը շեշտել է իր պատրաստակամությունը՝ ջանք չխնայելու հայ-նիդերլանդական հարաբերությունների ամրապնդման և խորացման ուղղությամբ: Կողմերը քննարկել են Արցախի հիմնահարցն ու Արցախի դեմ ադրբեջանական ագրեսիայի արդյունքում ձևավորված իրավիճակը՝ մանրամասն անդրադառնալով ռազմագերիների վերադարձի խնդրին: Փոխվարչապետը ներկայացրել է գերիների փոխանակման գործընթացի ներկայիս փուլը՝ հարցը համարելով Հայաստանի կառավարության առաջնահերթությունը: Նա շնորհակալություն է հայտնել Նիդերլանդների խորհրդարանին՝ Արցախի հարցում ցուցաբերած դիրքորոշման, ինչպես նաև Արցախի բնակչությանը մարդասիրական աջակցություն ցուցաբերելու մասին բանաձևի ընդունման համար: Հանդիպման օրակարգում են եղել նաև հայ-նիդերլանդական տնտեսական համագործակցության և Հայաստանի տնտեսական բարեփոխումների հարցերը: Փոխվարչապետը ներկայացրել է ՀՀ կառավարության ձեռնարկած միջոցառումները տնտեսական կյանքի վերականգնման ուղղությամբ: Տիգրան Ավինյանը խոսել է տնտեսական դիվանագիտությունը զարգացնելու Հայաստանի մտադրության մասին, որը պետք է կենտրոնանա օտարերկրյա ներդրումների ներգրավման, բարձր տեխնոլոգիական արդյունաբերության զարգացման, նորարարությունների ու գիտության ոլորտում համագործակցության վրա: Այս համատեքստում կարևորվել է հայ-նիդերլանդական առևտրատնտեսական հարաբերությունների զարգացումը գյուղատնտեսության, տեղեկատվական տեխնոլոգիաների, ֆինանսների և այլ ոլորտներում: Կողմերը միաժամանակ բարձր են գնահատել միջազգային ֆինանսական հաստատություններում, այդ թվում՝ Վերակառուցման և զարգացման եվրոպական բանկի շրջանակներում երկու երկրների արդյունավետ համագործակցությունը:

18:40 - 03 փետրվարի, 2021

Հակահամաճարակային սահմանափակումների դեմ բողոքի ցույցեր, անկարգություններ Նիդերլանդներում |azatutyun.am|

azatutyun.am: Նիդերլանդներում ոստիկանությունը ջրցան մեքենաներ է օգտագործել ՝ դադարեցնելու համար անկարգություններն ու ցույցերը ընդդեմ կառավարության՝ կորոնավիրուսի տարածման դեմ պայքարի միջոցների: Բողոքի ցույցերը ցրելուց հետո խանութներ են կողոպտվել, Ամստերդամում ցուցարարներն աղբամաններ են այրել: Հարյուրավոր մարդիկ մասնակցել են իշխանությունների կողմից արգելված ցույցերին: Նրանցից շատերն առանց դիմակի էին և չէին պահպանում սոցիալական հեռավորություն: Առնվազն 30 մարդ է բերման ենթարկվել: Երկրի ամբողջ տարածքում ավելի քան 3,5 հազար մարդ տուգանվել է պարետային ժամը խախտելու համար: Դեկտեմբերի կեսերից Նիդերլանդներում գործող սահմանափակումները խստագույններից են Եվրոպայում:

12:09 - 25 հունվարի, 2021

Արա Այվազյանը և Ստեֆ Բլոկը կարևորել են ԼՂ խաղաղ գործընթացի վերականգնումը ԵԱՀԿ ՄԽ համանախագահության շրջանակում

Հունվարի 21-ին ՀՀ ԱԳ նախարար Արա Այվազյանը տեսազրույց է ունեցել Նիդերլանդների Թագավորության ԱԳ նախարար Ստեֆ Բլոկի հետ։ Զրուցակիցները քննարկել են երկկողմ և բազմակողմ օրակարգի հարցերի լայն շրջանակ, ընդգծել պատրաստակամությունը քայլեր ձեռնարկելու փոխադարձ հետաքրքրություն ներկայացնող ոլորտներում համագործակցության առավել ընդլայնման և խորացման ուղղությամբ: Նախարար Այվազյանը շնորհակալություն է հայտնել իր գործընկերոջը նոր տիպի կորոնավիրուսի պայքարի շրջանակներում հայ ժողովրդին ցուցաբերված աջակցության և համերաշխության համար: Հայաստանի և Նիդերլանդների ԱԳ նախարարները հանգամանալից անդրադարձել են Լեռնային Ղարաբաղի հակամարտության գոտում հետպատերազմյան իրադրությանը։ Նախարար Այվազյանը ներկայացրել է Արցախի դեմ ադրբեջանական ագրեսիայի հետևանքով ստեղծված հումանիտար ճգնաժամի հասցեագրման ուղղությամբ ձեռնարկվող քայլերը: Արտաքին քաղաքական գերատեսչությունների ղեկավարները համակարծիք էին հումանիտար հարցերում միջազգային կազմակերպությունների տեղում անխափան ներգրավվածության անհրաժեշտության շուրջ: Նախարար Այվազյանը որպես ներկա փուլի առաջնահերթություն առանձնացրել է հումանիտար հարցեր՝ առանձնահատուկ ընդգծելով ռազմագերիների և պատանդի կարգավիճակում հայտնված քաղաքացիական անձանց անվտանգ հայրենադարձման խնդրի լուծումը։ Նախարարներ Այվազյանը և Բլոկը կարևորել են ԼՂ խաղաղ գործընթացի վերականգնումը ԵԱՀԿ Մինսկի խմբի համանախագահության շրջանակներում: Հայաստանի և Նիդերլանդների ԱԳ նախարարները մտքեր են փոխանակել նաև տարածաշրջանային անվտանգության և կայունության հարցերի շուրջ:

20:08 - 21 հունվարի, 2021

Հակոբ Արշակյանը Նիդերլանդների դեսպանին ներկայացրել է հայկական տեխնոլոգական ոլորտի վերջին տարիների ձեռքբերումները

11:13 - 14 հունվարի, 2021

Նիդեռլանդների խորհրդարանի պատգամավորներին հանձնվեցին Հայաստանի Ազգային ժողովի պարգևները

Հունվարի 12-ին դեսպան Տիգրան Բալայանը` Հայաստանի Ազգային ժողովի Պատվո մեդալներ է հանձնել Նիդեռլանդների խորհրդարանի պատգամավորներ, Նիդեռլանդներ-Հայաստան բարեկամության շրջանակի անդամներ Պիտեր Օմզիխտին, Ջոել Ֆորդևինդին, Մարթայն ֆան Հելֆերթին և Սադեթ Կարաբուլութին։ Այս մասին հայտնում է Նիդեռլանդներում ՀՀ դեսպանությունը: ՀՀ Ազգային ժողովի բարձր պարգևները նիդեռլանդացի պատգամավորների երկկողմ հարաբերությունների զարգացման նպատակով նրանց նշանակալի ջանքերի, ինչպես նաև միջազգային ասպարեզում Արցախի դեմ ադրբեջանական-թուրքական ագրեսիայի դատապարտման գործում ունեցած ավանդի համար է։ Հանձնելով պարգևները՝ դեսպան շեշտել է, որ ՀՀ ԱԺ պատվո մեդալները Հայաստանի երախտիքի արտահայտություն են տարիներ ի վեր երկու բարեկամ երկրների միջև համագործակցության խորացման, դրանք նոր մակարդակի բարձրացնելու ուղղությամբ կատարած հսկայական աշխատանքի, նաև մարդու իրավունքների պաշտպանության, ռազմական հանցագործությունների պատասխանատուներին պատժելու, ադրբեջանա-թուրքական վերջին ագրեսիայի դատապարտման գործում պատգամավորների անխոնջ ջանքերի համար։ Նիդեռլանդների խորհրդարանի անդամները շնորհակալություն են հայտնել գնահատանքի համար՝ ընդգծեցելով, որ իրենց գործունեությունն ուղղված է համամարդկային արժեքների պահպանմանը և բռնապետական ռեժիմների անպատժելիության բացառմանը։Պատգամավորները կարևորել են Նիդեռլանդների խորհրդարանի կողմից ադրբեջանա-թուրքական ագրեսիայի հետ կապված բանաձևերի դրույթների իրականացումը՝ նոր պատերազմի կանխարգելման առումով։ Պատգամավորների հետ զրույցի ընթացքում անդրադարձ է եղել զինադադարի հաստատումից հետո ստեղծված իրավիճակին, Ադրբեջանի կողմից զինադադարի հայտարարության դրույթների կոպտագույն խախտումներին և դրա հետևանքներին։

21:18 - 12 հունվարի, 2021

Նիդեռլանդներից Հայաստան է ուղևորվում մեծաքանակ դպրոցական գույք |1lurer.am|

1lurer.am: Նիդեռլանդներից Հայաստան է ուղևորվում մեծաքանակ և բարձրորակ դպրոցական գույք՝ 1700 սեղան, 1700-ից ավել աթոռ, ուսուցչական 75 սեղան և 75 աթոռ, մոտ 20 հատ օֆիսային սեղաններ, 200-ից ավել համակարգիչ, 1700 երկաթյա աշակերտական պահարաններ (lockers), մոտ 60 գրատախտակ, 30 հատ գրքի պահարաններ և այն ամենը, ինչ կա 1700 աշակերտ ունեցող դպրոցում։ Կոնտեյներները դեռ բարձվում են։ Վերջնական քանակությունները կարող են փոփոխվել՝ վերահաշվարկից հետո: Գույքը նվիրաբերվել է Նիդեռլանդների Ամսթելվեյն քաղաքի ավագանու անդամ մեր հայրենակից Տավրոս Ասլանյանին Hermann Wesselink քոլեջի կողմից (դպրոցի շենքը պետք է ապամոնտաժվի, և ողջ գույքը հոլանդացիները սիրով նվիրաբերում են հայաստանյան գյուղական դպրոցներին)։«Մենք նախատեսնում ենք, որ ընդամենը մեկ նիդեռլանդական դպրոցից նվիրատվություն ստացված դպրոցական գույքն ամբողջովին կկահավորի ավելի քան 15 մարզային դպրոց (դպրոցների ցուցակները դեռ հաստատման փուլում են):Կարևոր ենք համարում նշել, որ ակնկալում ենք ԿԳՍՄ նախարարության, Սփյուռքի գրասենյակի, իսկ ամենակրևորը՝ մաքսատան համագործակցությունը՝ այս բարեգործական պիտանի և կարևոր գույքն օր առաջ մեր հայ երեխաներին հասցնելու նպատակով»,- գրված է հայտարարությունում։

09:43 - 12 հունվարի, 2021

Կորոնավիրուսի նոր մուտացիայի պատճառով 20-ից ավելի երկրներ սահմանափակել են ավիահաղորդակցությունը |hetq.am|

hetq.am: Մեծ Բրիտանիայում, Դանիայում, Հարավաֆրիկյան Հանրապետությունում և Նիդերլանդներում կորոնավիրուսի նոր մուտացիայի հայտնաբերման պատճառով, որը տարածվում է շատ ավելի արագ, աշխարհի ավելի քան 20 երկրներ սահմանափակել են ավիահաղորդակցությունը։ Ինչպես հայտնում է BBC News-ը, թռիչքները դեպի Մեծ Բրիտանիա դադարեցրել են Ավստրիան, Արգենտինան, Բելգիան, Բուլղարիան, Գերմանիան, Իսրայելը, Իրանը, Իռլանդիան, Իտալիան, Կանադան, Կոլումբիան, Քուվեյթը, Լատվիան, Լիտվան, Մարոկկոն, Նիդերլանդները, Ռումինիան, Թուրքիան, Խորվաթիան, Ֆինլանդիան, Ֆրանսիան, Չիլին, Չեխիան, Շվեյցարիան, Էստոնիան, Շվեդիան։ Ինչպես նշել է ԱՀԿ-ն, կորոնավիրուսի նոր մուտացիան շատ արագ է տարածվում, սակայն չի համարվում ավելի վտանգավոր։ Բացի այդ, ներկայումս չկա հիմք՝ պնդելու, որ պատվաստանյութը նույն ազդեցությունը չի ունենա մուտացիայի վրա։

23:09 - 21 դեկտեմբերի, 2020

Նիդերլանդների խորհրդարանը բանաձև է ընդունել Արցախի կարգավիճակի որոշման անհրաժեշտության մասին |armenpress.am|

armenpress.am: Նիդերլանդների խորհրդարանը միաձայն բանաձև է ընդունել Արցախի բնակչության մշտական անվտանգության ապահովման և կարգավիճակի որոշման անհրաժեշտության մասին: Այս մասին տեղեկանում ենք Նիդերլանդների խորհրդարանի կայքէջից: Նիդերլանդների խորհրդարանի պատգմավորներ Վան դեր Գրաֆի, Ֆորդևինդի, Օմցիխտի և Բիսխոպի համատեղ մշակված բանաձևում նշված է. «Լեռնային Ղարաբաղի հակամարտության վերջնական կարգավորման, տեղի բնակչության համար ամուր անվտանգության ապահովման եւ կարգավիճակ որոշելու գործընթացի նախաձեռնման հրատապ անհրաժեշտություն կա: Այդ նպատակով կոչ ենք անում կառավարությանը ջանքեր գործադրել ԵԱՀԿ Մինսկի խմբի շրջանակներում»:

19:03 - 09 դեկտեմբերի, 2020

Նիդեռլանդները պահանջում է արգելել «Գորշ գայլեր» շարժումը ողջ ԵՄ-ի տարածքում |armenpress.am|

armenpress.am: Ֆրանսիայից և Գերմանիայից հետո Նիդեռլանդներում ևս իշխող և ընդդիմադիր կուսակցությունները պահանջում են արգելել «Գորշ գայլեր» անվամբ հայտնի գաղափարապաշտական օջախների գործունեությունը Եվրոպական միության ողջ տարածքում, ինչպես նաև պահանջում են պատժամիջոցներ կիրառել կազմակերպության դեմ։ Ինչպես հաղորդում է GazeteDuvar լրատվական կայքը, պատրաստված միջնորդության մեջ պաշտպանվում է այն թեզը, որ «Գորշ գայլեր» շարժումը «պատճառ է դարձել բնակչության խմբերի միմյանց դեմ դուրս գալուն»: Իշխող և ընդդիմադիր կուսակցությունների համատեղ առաջարկով խորհրդարանի օրակարգ եկած և առաջին հավանությունը ստացած միջնորդությունը կրկին քվեարկության կդրվի կառավարության կողմից քննարկվելուց հետո: Նիդեռլանդներում կոալիցիոն կառավարության երեք կուսակցությունների և ընդդիմադիր Սոցիալիստական կուսակցության (SP) կողմից համատեղ ներկայացված միջնորդությունն ընդունվել է 150 անդամ ունեցող Ներկայացուցիչների պալատում՝ 147 պատգամավորների քվեարկությամբ: Իշխող և ընդդիմադիր չորս կուսակցությունների համատեղ պատրաստած միջնորդության մեջ նշվել է, որ «Գորշ գայլեր» հայտնի գաղափարապաշտական օջախները, որոնք տարիներ շարունակ գործում են Նիդեռլանդներում, ծայրահեղ աջակողմյան և ազգայնական շարժում են: Միջնորդության մեջ նաև պնդում են, որ «Գորշ գայլերը» լուրջ լարվածություն են առաջացրել Նիդեռլանդների հասարակության մեջ և պատճառ են հանդիսացել բնակչության խմբերի միմյանց դեմ դուրս գալուն: Ուստի պահանջվել է պարզել, թե արդյոք հնարավոր է արգելել գաղափարապաշտական օջախների գործունեությունը և արդյոք հնարավոր է նրանց ընդգրկել եվրոպական պատժամիջոցների ցուցակում: Ըստ տեղական Omroep Gelderland ալիքի՝ Նիդեռլանդների Արնհեմ նահանգում Դենկ կուսակցության (DENK) ղեկավար Մուստաֆա Ուստան խորհրդարանի որոշումը մեկնաբանել է իբրև «զզվելի նախընտրական քարոզ», և ասելով, թե ինքն ապրում է «հակաթուրքական զգացմունքների ոսկե դարաշրջանում», առաջ է քաշել այն տեսակետը, թե պաշտոնապես գոյություն չունեցող կազմակերպության արգելմամբ շարունակվում է «թուրքոֆոբիկ վհուկների որսը»։

20:30 - 20 նոյեմբերի, 2020

Նիդերլանդների խորհրդարանը հավանություն է տվել Ալիևի, նրա տիկնոջ, նաև Թուրքիայի դեմ պատժամիջոցներ սահմանելուն |azatutyun.am|

azatutyun.am: Նիդերլանդների խորհրդարանը հավանություն է տվել Ադրբեջանի բարձրաստիճան պաշտոնյաների և Թուրքիայի դեմ պատժամիջոցներ սահմանելու մասին առաջարկին։ Այս մասին ֆեյսբուքյան իր էջում տեղեկացրել է թագավորությունում ՀՀ դեսպան Տիգրան Բալայանը։ Գրառման համաձայն` խոսքը ինչպես Ադրբեջանի նախագահ Իլհամ Ալիևի, այնպես էլ նրա կնոջ՝ երկրի փոխնախագահ Մեհրիբան Ալիևայի դեմ անհատական պատժամիջոցների մասին է՝ պայմանավորված «Լեռնային Ղարաբաղի դեմ Ադրբեջանի բռնություններով և պատերազմական հանցագործություններով»։ Հոլանդացի պատգամավորների որոշումը կտարածվի նաև ղարաբաղյան պատերազմում Ադրբեջանին ռազմական աջակցություն ցուցաբերած Թուրքիայի վրա՝ այդ երկրին սպառազինության մատակարարման էմբարգոյի տեսքով:

20:48 - 17 նոյեմբերի, 2020

Նիդերլանդների «Արմենիա ֆոնդս»-ը հավաքագրել է 412.387 եվրո. գումարը կուղղվի Արցախին |armenpress.am|

armenpress.am: Նիդերլանդներ-Բելգիայի համատեղ մեծ դրամահավաքի շրջանակում, որը կայացել է նոյեմբերի 8-ին, հավաքագրել է 412.387 եվրո: Դրամահավաքն անցկացվել է «Միասին օգնենք Հայրենիքին, միասին օգնենք ինքներս մեզ» խորագրով: «Արմենիա ֆոնդս»-ը տեղեկացնում է, որ մինչ եթերը «Հայաստան» համահայկական հիմնադրամի Նիդերլանդների մասնաճյուղի՝ «Արմենիա ֆոնդս»-ի երիտասարդ կամավորները Նիդերլանդների և Բելգիայի գործարարների աջակցությամբ հեռախոսազանգերով արդեն հավաքել էին 208.800 եվրո։ Երեք ու կես ժամ տևողությամբ առցանց դրամահավաքի արդյունքում՝ Արցախի համար հումանիտար օգնություն տրամադրելու նպատակով, Նիդերլանդների «Արմենիա ֆոնդս»-ը հավաքագրել է ընդհանուր 412,387 եվրո հանգանակություն։ Միջոցառման շրջանակներում իրենց տեսաուղերձներն են հղել Նիդերլանդներում և Բելգիայում ՀՀ արտակարգ և լիազոր դեսպանները, եկեղեցական կառույցների ներկայացուցիչներ։ Երեկոյին մասնակցել են հոլանդացի քաղաքական գործիչներ, նիդերլանդահայ և բելգիահայ կազմակերպություններ, հայկական դպրոցներ, շնորհալի երաժիշտներ և արտիստներ: «Հայաստան» համահայկական հիմնադրամի Նիդերլանդների ներկայացուցչությունն շնորհակալություն է հայտնում երեկոյի բոլոր բարերարներին՝ թե՛ անհատներին և թե՛ գործարարներին:

10:50 - 09 նոյեմբերի, 2020

Արման Թաթոյանը Հայաստանում Նիդերլանդների դեսպանին է ներկայացրել Ադրբեջանի կողմից Արցախի ու Հայաստանի խաղաղ բնակչությանը պատճառված վնասները

ՀՀ մարդու իրավունքների պաշտպան Արման Թաթոյանն այսօր ընդունել է Հայաստանում Նիդերլանդների Թագավորության արտակարգ և լիազոր դեսպան Նիկո Սխերմերսին: Հանդիպման ընթացքում Պաշտպանը ներկայացրել է փաստեր խաղաղ բնակիչների նկատմամբ Ադրբեջանի զինված ուժերի վայրագությունների ու դաժանությունների, այդ թվում՝ խաղաղ բնակիչների նկատմամբ արգելված կասետային ու քիմիական էլեմենտներ պարունակող զինատեսակների կիրառության, քաղաքացիական ենթակառուցվածքների զանգվածային ավերածությունների վերաբերյալ։ Արման Թաթոյանը ընդգծվել է, որ ադրբեջանական հարձակումներն Արցախի ու Հայաստանի բնակչության նկատմամբ շարունակվում են ուղեկցվել էթնիկ հայերի նկատմամբ մեծ ծավալի ատելության խոսքով, ինչպես նաև այն հանգամանքը, որ մի շարք երկրներում հայատյացության հիմքով ակցիաներ են իրականացվում էթնիկ հայերի դեմ: «Խաղաղ բնակչությանը թիրախավորելն ու նրանց նկատմամբ արգելված զինատեսակներ կիրառելը, վարձկան ահաբեկիչների ներգրավումը, հայատյացությունն ու ադրբեջանական զինված ուժերի վայրագություններն ու անմարդկային վերաբերմունքը վկայում են, որ խնդիր է դրված Արցախում իրականացնել էթնիկ զտում ահաբեկչական մեթոդներով»,- նշել է Մարդու իրավունքների պաշտպանը: Պաշտպանը դեսպանին տեղեկացրել է, որ Հայաստանի բնակչության շրջանում կա 3 սպանված և 4 վիրավոր, ինչպես նաև առկա են վնասված տներ։ Ըստ Արցախի մարդու իրավունքների պաշտպանի տվյալների՝ Արցախում կա առնվազն 46 սպանված և ավելի քան 144 վիրավոր: Հանդիպման մասնակիցները ընդգծել են մարդու իրավունքների պաշտպանության ոլորտում համագործակցության կարևորությունը և ձեռք են բերել համագործակցության նոր պայմանավորվածություններ:

12:46 - 05 նոյեմբերի, 2020

Արցախի ՄԻՊ-ը մասնակցել է Նիդերլանդների խորհրդարանական հանձնաժողովի հատուկ նիստին

Նոյեմբերի 4-ին տեղի է ունեցել Նիդերլանդների խորհրդարանի արտաքին հարաբերությունների հանձնաժողովի հատուկ նիստը՝ նվիրված ադրբեջանա-թուրքական ագրեսիային, որի գլխավոր հյուրն է եղել Արցախի Հանրապետության մարդու իրավունքների պաշտպան Արտակ Բեգլարյանը: Այս մասին հայտնեցին Արցախի Հանրապետության մարդու իրավունքների պաշտպանի աշխատակազմից: «Նիստը առցանց եղանակով էր, որը վարում էր հանձնաժողովի փոխնախագահ՝ Քրիստոնեական Միություն կուսակցության արտաքին քաղաքական հարցերով խոսնակ՝ Ջոել Ֆորդևինդը: Ներկա էին պատգամավորներ, տարբեր կուսակցությունների ներկայացուցիչներ, նաև խորհրդարանի աշխատակազմի անդամներ: Նիստը բացեց հայկական կազմակերպությունների ֆեդերացիայի քարտուղար Ինգե Դրոստը, ով ներկայացրեց ագրեսիայի հետևանքները և շեշտադրեց Թուրքիային ու Ադրբեջանին անմիջապես կանգնեցնելու և պատժամիջոցներ կիրառելու անհրաժեշտությունը»,- ասված է հաղորդագրության մեջ: Այնուհետև հիմնական զեկույցով հանդես է եկել Արցախի Մարդու իրավունքների պաշտպան Արտակ Բեգլարյանը, որը ուշադրություն է հրավիրել խորացող հումանիտար աղետի, մարդկության դեմ ու պատերազմական հանցագործությունների վրա: Մարդու իրավունքների պաշտպանն ընդգծել է, որ միջազգային հանրությունը պարտականություն ունի գործնական միջոցներով սանձելու թուրք-ադրբեջանական ագրեսիան, որը հանգեցրել է լրջագույն մարդասիրական աղետի Արցախում: Ավելին, միջազգային հանրության պարտավորությունների մեջ է մտնում երաշխավորելու մարդու իրավունքների պաշտպանությունը աշխարհի բոլոր անկյուններում, ներառյալ՝ Արցախում՝ անկախ միջազգային կարգավիճակից: Ադրբեջանի և Թուրքիայի ագրեսիայի պատճառների և հետևանքների մասին ելույթ է ունեցել Նիդերլանդներում Հայաստանի Հանրապետության դեսպան Տիգրան Բալայանը: Նիստի մասնակիցները համակարծիք են եղել ռազմական գործողությունների շուտափույթ դադարեցման և պատերազմական հանցագործությունների հեղինակներին պատասխանատվության ենթարկելու անհրաժեշտության հարցում։

21:17 - 04 նոյեմբերի, 2020

Ֆրանկոֆոն դեսպանների հանդիպման ընթացքում Նիդերլանդներում Հայաստանի դեսպանն անդրադարձել է Արցախի դեմ ագրեսիային

Հաագայում կայացել է Ֆրանկոֆոն դեսպանների հանդիպումը VVD կուսակցության արտաքին քաղաքական հարցերով խոսնակի հետ։ Այս մասին հայտնում է Նիդերլանդներում ՀՀ դեսպանությունը։ Նոյեմբերի 4-ին, տեղի ունեցավ Հաագայում Ֆրանկոֆոն դեսպանների խմբի առցանց հանդիպումը, որի գլխավոր հյուրն էր Նիդերլանդների վարչապետի գլխավորած VVD կուսակցության անդամ` արտաքին քաղաքական հարցերով կուսակցության խոսնակ, խորհրդարանի պատգամավոր՝ Սվեն Կոպմանսը: Հաագայում Ֆրանկոֆոն դեսպանների խմբի նախագահ` Նիդերլանդներում Հայաստանի դեսպան՝ Տիգրան Բալայանի ղեկավարությամբ կայացած հանդիպմանը, Սվեն Կոպմանսը ներկայացրեց՝ հաջորդ տարի ակնկալվող ընտրություններից առաջ իր կուսակցության տեսլականը՝ արտաքին քաղաքականության, Եվրոպական, մերձավորարևելյան զարգացումների, Նիդերլանդներ- ԱմերիկայիՄիացյալ Նահանգներ, Նիդերլանդներ – Չինաստան, ինչպես նաև մի շարք այլ տարածաշրջանների վերաբերյալ: Դեսպան Բալայանի նախաձեռնությամբ նաև անդրադարձ կատարվեց ունեցավ Թուրքիայի, Ադրբեջանի և ահաբեկիչների ներգրավմամբ Արցախի դեմ ագրեսիային, որի կապակցությամբ հանդիպման բազմաթիվ մասնակիցներ նշեցին Թուրքիայի գործողություններն անընդունելի են և անհրաժեշտ են հստակ գործողություններ՝ սաստելու բոլոր սահմանները հատած Թուրքիայի ղեկավարի սադրանքները:

16:59 - 04 նոյեմբերի, 2020

Պիտեր Օմզիխտը առաջարկել է հետաքննել Ադրբեջանի կողմից ֆոսֆորային զինամթերքի կիրառման տեղեկությունը |armenpress.am|

armenpress.am: Նիդերլանդների Քրիստոնեա-դեմոկրատական կուսակցության փոխնախագահ, խորհրդարանի պատգամավոր Պիտեր Օմզիխտը Լեռնային Ղարաբաղում Ադրբեջանի գործողությունների համար այդ երկրի նկատմամբ պատժամիջոցներ կիրառելու հնարավորության վերաբերյալ հարցադրմամբ դիմել է Նիդերլանդների արտաքին գործերի նախարար Ստեֆ Բլեկին: Պատգամավորն ընդգծել է, որ Թուրքիան Սիրիայից ջիհադիստների է տեղափոխում ԼՂ հակամարտության գոտի, կիրառում է ֆոսֆոր պարունակող զինատեսակներ: «Այսպիսով, ես կցանկանայի հարցնել՝ արդյո՞ք կառավարությունը ցանկանում է պատժամիջոցներ կիրառել Ադրբեջանի նկատմամբ՝ բռնությունները և մարդու իրավունքների ոտնահարումները չդադարեցնելու դեպքում: Առաջարկում եմ Քիմիական զենքի արգելման կազմակերպությանը՝ պաշտոնական հետաքննություն սկսել ֆոսֆորի օգտագործման վերաբերյալ, ինչը միջազգայնորեն, իսկապես, արգելված է»,- ասել է նա: Պատգամավորը ՄԱԿ-ին հորդորել է ԼՂՀ օդային տարածքը հայտարարել ոչ թռիչքային գոտի և Լեռնային Ղարաբաղի քաղաքացիական ազգաբնակչությանը տրամադրել մարդասիրական օգնություն: Նա հավելել է, որ ըստ Genocide Watch-ի Գրեգորի Ստանտոնի՝ Լեռնային Ղարաբաղի պարտության պարագայում ակնկալվում է ցեղասպանություն: «Արդյո՞ք կառավարությունը մտադիր է պաշտոնապես դիմել ՄԱԿ-ին` ցեղասպանության հետաքննություն սկսելու համար: Չնայած, ըստ մեր տեղեկությունների, ցեղասպանություն որպես այդպիսին տակավին չկա, սակայն, սպառնալիքն առկա է: Իրավիճակը պարզապես չափազանց լուրջ է»,- եզրափակել է Օմզիխտը:

00:41 - 04 նոյեմբերի, 2020

Նիդերլանդների արտգործնախարարն անդրադարձել է Թուրքիայի կողմից Ադրբեջանում ահաբեկիչների տեղակայմանը |armenpress.am|

armenpress.am: Նիդերլանդների Թագավորության արտաքին գործերի նախարար Ստեֆ Բլոկը նշել է, որ իրենց հայտնի են տեղեկություններ Լեռնային Ղարաբաղի դեմ կռվելու համար Թուրքիայի կողմից Ադրբեջանում ահաբեկիչների տեղակայման վերաբերյալ, սակայն դժվար է ասել, թե որքանով է Թուրքիան ուղիղ ներգրավված ռազմական գործողություններին: Այս մասին Բլոկը նշել է խորհրդարանի պատգամավորների հարցերի ի պատասխան: «Նիդեռլանդները շատ հավանական է համարում Թուրքիայի ռազմական մասնակցությունը ղարաբաղյան հակամարտությանը: Դեռևս դժվար է որոշել այդ մասնակցության ճշգրիտ բնույթը: Բացի այդ, կառավարությանն այժմ հայտնի է, որ Թուրքիան իսկապես մասնակցում է ադրբեջանական կողմում սիրիացի ահաբեկիչների տեղակայմանը: Ընդհանուր առմամբ հայտնի է, որ Ադրբեջանն ու Թուրքիան սերտ կապեր ունեն, այդ թվում՝ ռազմական համագործակցություն։ Այս համագործակցությունը ներառում է վերջին տարիներին համատեղ զորավարժությունները և ռազմական տեխնիկայի մատակարարումը»,- ասել է նա: ԱԳ նախարարը նշել է, որ արտաքին միջամտությունը հանգեցնում է հակամարտության սրմանը։ «Հոկտեմբերի 1-ին Նիդերլանդների նախաձեռնությամբ տեղի է ունեցել Եվրոպական խորհրդի նիստը, որում ես դեմ եմ արտահայտվել արտաքին ցանկացած միջամտությանը և կոչ արել ապաէսկալացիայի, կրակի դադարեցման և բանակցությունների սեղանի շուրջ վերադառնալու»,- նշել է Բլոկը:

21:47 - 02 նոյեմբերի, 2020