Վայոց ձորի մարզ

Վայոց ձորը մարզի կարգավիճակ ունեցող վարչատարածքային միավոր է Հայաստանի կենտրոնական մասում։ Սահմանակից է հյուսիսում Գեղարքունիքի, հյուսիս-արեւելքում՝ Արարատի, հարավում՝ Սյունիքի մարզերին, արեւելքում՝ Արցախի Հանրապետության Շահումյանի շրջանին, արեւմուտքում՝ Նախիջեւանի Ինքնավար Հանրապետությանը:

Մարզկենտրոնը` քաղաք Եղեգնաձորն է։ Բնակչության թիվն ըստ Վայոց ձորի մարզի բնակչության ռեգիստրի` (01.01.2019 թվականի դրությամբ) 60663 է։Բնակավայրերի թիվը` 55, որից քաղաքային` 3, գյուղական` 52։

Համայնքների խոշորացում․ վարչական ապարատի օպտիմալացումից սպասումներն ու փաստացի իրավիճակը

Համայնքերի խոշորացումից տնտեսական ի՞նչ օգուտներ էր ակնկալում կառավարությունը 2012 թվականին, երբ Հայաստանում դեռ չէր մեկնարկել համայնքների խոշորացման գործընթացը, կառավարության մշակած «Համայնքների խոշորացման և միջհամայնքային միավորումների ձևավորման հայեցակարգում» խոսվում էր այն մասին, որ համայնքների խոշորացումը պետք է տնտեսապես հիմնավորված լինի։ «Համայնքների միացման արդյունքում նոր ստեղծված համայնքի աշխատակազմի թվաքանակը զգալիորեն ավելի քիչ կլինի, քան այդ համայնքի կազմի մեջ միավորված նախկին համայնքների աշխատակազմերի հանրագումարային թվաքանակը: Այդպիսով զգալիորեն կկրճատվեն ապարատի պահպանման ծախսերը: Դրա արդյունքում կավելանան բնակչությանը ծառայություններ մատուցելուն ուղղված ֆինանսական հնարավոր միջոցների չափերը»,- նշվում էր հայեցակարգում: 2013թ․ նախկին տարածքային կառավարման նախարարության մշակած «Համայնքների խոշորացումը` որպես Հայաստանի վարչատարածքային բաժանման օպտիմալացման միջոց» աշխատանքային տեղեկանքում որպես համայնքների խոշորացման տնտեսական օգուտ նշվում էր համայնքների վարչական ապարատի օպտիմալացումը։ Տեղեկանքում երկու խոշորացվելիք համայնքի օրինակով բացատրվում էր, թե ինչ սկզբունքով են ձևավորվելու խոշորացված համայնքների համայնքապետարանների աշխատակազմերը, և ըստ այդմ՝ ինչ ֆինանսական օգուտներ են լինելու համայնքների համար։ Սկզբունքը, ըստ տեղեկանքի, հետևյալն էր․ երբ համայնքները միավորվում էին որևէ փնջում, համայնքային կենտրոնում համայնքապետարանի աշխատակազմը մեծանում էր, սակայն կրճատվում էին արդեն նախկին համայնքների, խոշորացումից հետո՝ բնակավայրերի աշխատակազմերը, և դրանց կրճատումից խնայված դրամական միջոցները նոր խոշորացված համայնքը կարող էլ ուղղել համայնքային այլ կարիքներ հոգալու համար։ Այսպես, օրինակներից մեկը Կոտայքի մարզի Գառնի համայնքն էր։ Գառնին և ևս հինգ համայնքներ հիպոթետիկ պետք է միավորվեին փնջային սցենարով (խոշորացման սցենարների և Հայաստանում համայնքների խոշորացման գործընթացի վերաբերյալ առավել մանրամասն՝ այստեղ)։ Այս համայնքների համայնքապետարանների աշխատակազմերի ընդհանուր թիվը 2012-ի դրությամբ կազմել է 62, որից 20-ը եղել է համայնքային կենտրոն Գառնիում։ Այստեղ հաստիքների թիվն ավելանալու էր 6-ով (այդ թվում՝ 5 բնակավայրերի 1-ական վարչական ներկայացուցիչները), և ստացվելու էր, որ նախկին համայնքների համայնքապետարանների ընդհանուր 62 աշխատատեղի փոխարեն խոշորացված համայնքի համայնքապետարանն ունենալու էր 26 աշխատատեղ։ Համաձայն նախահաշվի՝ Գառնի խոշորացված համայնքի՝ ընդհանուր բնույթի հանրային ծառայությունների գծով տարեկան ծախսերը (այսինքն՝ համայնքապետարանի աշխատակազմի պահպանմանն ուղղված ծախսերը), կազմելու էին 54,545.5 հազ. դրամ։ 2012 թվականի դրությամբ բոլոր համայնքների հանրային ծառայությունների գծով բյուջետային ընդհանուր ծախսերը կազմել են 94,668.6 հազ. դրամ: Ստացվում էր, որ հանրային ծառայությունների գծով բյուջետային ընդհանուր ծախսերը նվազելու էին նախկին համայնքների աշխատակազմերի կրճատման հաշվին։ «Կատարված հաշվարկի արդյունքում Գառնի խոշորացված համայնքի՝ ընդհանուր բնույթի հանրային ծառայությունների գծով բյուջետային ընդհանուր օգուտները կազմում են 45,123.1 հազ. դրամ, որը համարվում է համայնքների խոշորացման արդյունքում առաջացած ազատ գումար։ Նոր ձևավորվող համայնքի ՏԻՄ-երը դա կարող են ուղղել ինչպես հանրային ծառայությունների այլ տեսակների մատուցման ծավալների ընդլայնմանը և որակի բարձրացմանը, այնպես էլ համայնքի կազմում ընդգրկված բնակավայրերի սոցիալ-տնտեսական ենթակառուցվածքների զարգացմանը և կապիտալ ներդրումների կատարմանը»,- նշվում էր տեղեկանքում։ Մենք փորձել ենք Վայոց ձորի և Տավուշի մարզերի խոշորացված համայնքների օրինակով հասկանալ, թե խոշորացման նախորդ տարում համայնքային բյուջեների որ մասն են կազմել ընդհանուր բնույթի հանրային ծառայությունների գծով ծախսերը, և արդյոք խոշորացումից հետո՝ 2019-ի դրությամբ, այդ ծախսերը կրճատվել են։ Չենք ուսումնասիրել միայն Տավուշի մարզի Իջևան համայնքը, քանի որ այն խոշորացվել է այս տարի՝ ի տարբերություն Վայոց ձորի և Տավուշի մարզերի մյուս համայնքների, որոնք խոշորացվել են 2015-ից 2017 թվականների ընթացքում։ Օրինակում նշվող Գառնի խոշորացված համայնքն այս պահի դրությամբ ձևավորված չէ, դրա համար այն հնարավոր չէր ուսումնասիրել։ Համայքապետարանների աշխատակազմերի պահպանմանն ուղղվող ծախսերը Տավուշում՝ մինչև խոշորացումը և խոշորացումից հետո Տավուշի մարզի Դիլիջան համայնքը խոշորացվել է 2015-ին։ Նախքան խոշորացումը՝ 2014 թվականին, Դիլիջան խոշորացված համայնքի կազմում եղած նախկին 7 համայնքների տարեկան ընդհանուր բյուջետային ծախսերը կազմել են ավելի քան 563 մլն դրամ, իսկ ընդհանուր բնույթի հանրային ծառայությունների գծով տարեկան ծախսերը՝ մոտ 186 մլն դրամ։ Այսինքն՝ ընդհանուր բնույթի հանրային ծառայությունների գծով ծախսերը կազմել են ընդհանուր բյուջետային ծախսերի 33%-ը։ Որպեսզի այս տվյալները համեմատենք Դիլիջան խոշորացված համայնքի 2019-ի բյուջեի տվյալների հետ, պետք է հասկանանք, թե 2014-ի բյուջետային ծախսերը 2019-ի չափանիշներով որքան կկազմեին՝ հաշվի առնելով այդ տարիների գնաճը։ Այսպես, եթե ընդհանուր բնույթի հանրային ծառայությունների գծով տարեկան ծախսերը 2014-ին կազմել են մոտ 186 մլն դրամ, 2019-ին կկազմեին ավելի քան 199 մլն դրամ։ Արդեն 2019-ին Դիլիջան խոշորացված համայնքի տարեկան ընդհանուր բյուջետային ծախսերը կազմել են մոտ 907 մլն դրամ, իսկ ընդհանուր բնույթի հանրային ծառայությունների գծով ծախսերը՝ ավելի քան 188 մլն դրամ, այսինքն՝ ընդհանուր բյուջետային ծախսերի 21%-ը։ Եթե համեմատենք 2014-ի և 2019-ի տվյալները, կտեսնենք, որ ընդհանուր բնույթի հանրային ծառայությունների գծով ծախսերը Դիլիջան խոշորացված համայնքում ավելի քան 11 միլիոն դրամով քիչ են, քան 2014-ին համայնքի կազմում ընդգրկված նախկին համայնքների ծախսերը միասին վերցրած։ Ինչ վերաբերում է համայնքապետարանների աշխատակազմերին, ապա եթե 2014-ին Դիլիջան խոշորացված համայնքի կազմում ընգրկված բոլոր նախկին համայնքները միասին ունեցել են 94 դրույք, ապա 2019-ին Դիլիջանի համայնքապետարանում եղել է 54 դրույք (աշխատատեղերը ներկայացված են ոչ թե աշխատակիցների թվաքանակով, այլ դրույքաչափերով)։ Այս տվյալների վերլուծությունից կարելի է ենթադրել, որ Դիլիջան խոշորացված համայնքի ձևավորման արդյունքում իրոք համայնքապետարանների աշխատակազմերի կրճատումից խնայվել են դրամական միջոցներ, և համայնքի ընդհանուր բյուջետային ծախսերում նվազել են համայնքապետարանի աշխատակազմին ուղղվող դրամական միջոցները։ Գրաֆիկ 1-ում ներկայացված են Տավուշի մարզի համայնքներում աշխատակազմերի պահպանմանն ուղղվող ծախսերի փոփոխությունները խոշորացումից առաջ և հետո։ Տավուշի մարզի ևս երկու համայնքում գործել է այս սկզբունքը․ Նոյեմբերյանի կազմում ընդգրկված նախկին 9 համայնքների համայնքապետարաններում խոշորացման նախորդ տարում միասին վերցրած եղել է 97 դրույք, իսկ Նոյեմբերյան խոշորացված համայնքի համայնքապետարանում անցած տարի եղել է 60 դրույք։ Ընդհանուր բնույթի հանրային ծառայությունների գծով տարեկան ծախսերը նվազել են մոտ 39 մլն դրամով։ Աշխատակազմերին ուղղվող ծախսերը 2019-ին կազմել են ընդհանուր բյուջեի 30%-ը՝ 2016-ի 40%-ի փոխարեն։ Բերդի կազմում ընդգրկված նախկին 17 համայնքների համայնքապետարաններում խոշորացման նախորդ տարում միասին վերցրած եղել է 196,6 դրույք, իսկ Բերդ խոշորացված համայնքի համայնքապետարանում 2019-ին եղել է 95 դրույք։ Ընդհանուր բնույթի հանրային ծառայությունների գծով տարեկան ծախսերը նվազել են մոտ 15 մլն դրամով։ Եթե բոլոր համայնքներում միասին վերցրած աշխատակազմերին ուղղվող գումարները նախկինում կազմել են ընդհանուր բյուջեի 42%-ը, ապա Բերդի ընդհանուր բյուջեում 2019-ին այդ ծախսերը կազմել են 28%: Գրաֆիկ 2-ում ներկայացված են Տավուշի մարզի համայնքների ընդհանուր բյուջեներում աշխատակազմերի պահպանմանն ուղղվող ծախսերի մասնաբաժինների փոփոխությունները խոշորացումից առաջ և հետո։ Կողբ խոշորացված համայնքում, որտեղ միավորված է 2 համայնք, 2019-ի դրությամբ 2015-ի համեմատ աճել են աշխատակազմերի պահպանման ծախսերը, սակայն ընդհանուր բյուջետային ծախսերը ևս աճել են։ Ընդհանուր ծախսերն ավելացել են մոտ 32 մլն դրամով, աշխատակազմերի պահպանման ծախսերը՝ մոտ 6 մլն դրամով։ Կողբ խոշորացված համայնքի համայնքապետարանում 2019-ին եղել է 21,5 դրույք, իսկ մինչև խոշորացումը նախկին համայնքները միասին ունեցել են 22 դրույք։ Ընդհանուր բյուջեում համայնքապետարանի աշխատակազմին ուղղվող ծախսերի մասնաբաժինը, սակայն, նվազել է՝ դառնալով 35%՝ 39%-ի փոխարեն։ Հետաքրքիր է, որ Այրում համայնքում (ստեղծվել է 8 համայնքների միավորմամբ) ընդհանուր բյուջետային ծախսերը մոտ 26 մլն դրամով պակասել են, սակայն համայնքապետարանի աշխատակազմին ուղղվող ծախսերն ավելացել են ավելի քան 15 մլն դրամով։ 2016-ին նախկին համայնքապետարաններում միասին վերցրած եղել է 75 դրույք, 2019-ին Այրումի համայնքապետարանում դրույքները կրճատվել են՝ դառնալով 46։ Այրում խոշորացված համայնքի դեպքում ավելացել է նաև ընդհանուր բյուջեում աշխատակազմին ուղղվող դրամական միջոցների մասնաբաժինը՝ 43%-ի փոխարեն դառնալով 53%: Գրաֆիկ 3-ում ներկայացված են Տավուշի մարզի համայնքներում համայնքապետարանների աշխատատեղերի դրույքների փոփոխությունները խոշորացումից առաջ և հետո։ Համայքապետարանների աշխատակազմերի պահպանմանն ուղղվող ծախսերը Վայոց ձորում՝ մինչև խոշորացումը և խոշորացումից հետո Վայոց ձորի Ջերմուկ խոշորացված համայնքը ձևավորվել է 4 համայնքների միավորմամբ։ Մինչև խոշորացումը նախկին համայնքների համայնքապետարանները միասին ունեցել են 48,7 դրույք, իսկ Ջերմուկ խոշորացված համայնքը 2019-ին ունեցել է 42 դրույք։ Աշխատակազմերի պահպանմանն ուղղված ծախսերն աճել են ավելի քան 5 մլն դրամով։ Մոտ 212 մլն դրամով ավելացել է նաև համայնքի ընդհանուր բյուջեն։ Ընդհանուր բյուջեում աշխատակազմին ուղղվող գումարների մասնաբաժինը նվազել է՝ 35%-ից դառնալով 24%։ Վայքում (ստեղծվել է 5 համայնքների միավորմամբ) ընդհանուր բնույթի հանրային ծառայությունների գծով ծախսերն ավելացել են մոտ 12 մլն դրամով։ Համայնքապետարանների դրույքների ընդհանուր թիվը նախքան խոշորացումը եղել է 42,5, իսկ 2019-ին կրճատվել է՝ դառնալով 39։ Բյուջետային ընդհանուր ծախսերը ևս աճել են ավելի քան 33 մլն դրամով, իսկ աշխատակազմին ուղղվող դրամական միջոցների մասնաբաժինն ընդհանուր բյուջեում նվազել է՝ 51%-ից դառնալով 49%: Գրաֆիկ 4-ում ներկայացված են Վայոց ձորի մարզի համայնքներում աշխատակազմերի պահպանմանն ուղղվող ծախսերի փոփոխությունները խոշորացումից առաջ և հետո։ Արենիում (ստեղծվել է 9 համայնքների միավորմամբ) ևս համայնքապետարանի աշխատակազմի պահպանմանն ուղղված ծախսերն աճել են ավելի քան 58 մլն դրամով։ Մոտ 152 մլն դրամով ավելացել են նաև ընդհանուր բյուջետային ծախսերը։ Համայնքապետարանի դրույքները խոշորացման նախորդ տարում կազմել են 95, իսկ 2019-ին՝ 60,5։ Ընդհանուր բյուջետային ծախսերում աշխատակազմերի պահպանմանն ուղղված ծախսերի մասնաբաժինը նվազել է․ եթե 2015-ին այդ ծախսերը կազմել են ընդհանուր բյուջետային ծախսերի 62%-ը, ապա 2019-ին կազմել են 54%-ը: Զառիթափում (ձևավորվել է 9 համայնքների միավորմամբ) համայնքապետարանի հաստիքների թվաքանակն՝ ըստ դրույքների գրեթե չի փոխվել (70,1-ից դարձել է 70 ), սակայն աշխատակազմերին ուղղվող ծախսերը կրճատվել են ավելի քան 99 մլն դրամով։ Հետաքրքիր է, որ Զառիթափում ավելի քան 85 մլն դրամով կրճատվել են նաև համայնքի ընդհանուր բյուջետային ծախսերը։ Այստեղ նվազել է նաև համայնքապետարանի աշխատակազմի պահպանմանն ուղղված ծախսերի մասնաբաժինը՝ 62%-ից դառնալով 45%: Գրաֆիկ 5-ում ներկայացված են Վայոց ձորի մարզի համայնքների ընդհանուր բյուջեներում աշխատակազմերի պահպանմանն ուղղվող ծախսերի մասնաբաժինների փոփոխությունները խոշորացումից առաջ և հետո։ Գլաձորում (ստեղծվել է 3 համայնքի միավորմամբ) խոշորցումից առաջ բոլոր համայնքապետարանների դրույքները միասին կազմել են 51, իսկ 2019-ին Գլաձորի համայնքապետարանում եղել է 26 դրույք։ 2019-ին համայնապետարանի աշխատակազմի պահպանմանն ուղղված ծախսերը կրճատվել են մոտ 27 մլն դրամով, և եթե 2016-ին այդ ծախսերը բոլոր համայնքներում միասին վերցրած կազմել են համայնքների ընդհանուր բյուջեների 56%-ը, ապա 2019-ին կազմել են Գլաձորի բյուջեի 28%-ը։ Եղեգիսում (ստեղծվել է 12 համայնքի միավորմամբ) աշխատակազմերի պահպանմանն ուղղվող ծախսերը նվազել են մոտ 32 մլն դրամով, աշխատատեղերի դրույքները 85-ից դարձել են 63,7, իսկ ընդհանուր բյուջետային ծախսերում աշխատակազմին ուղղվող ծախսերը կազմել են 47%՝ 2016-ի 75%-ի փոխարեն։ Գրաֆիկ 6-ում ներկայացված են Վայոց ձորի մարզի համայնքներում համայնքապետարանների աշխատատեղերի դրույքների փոփոխությունները խոշորացումից առաջ և հետո։ Վարչական ապարատի օպտիմալացումը խոշորացված համայնքների համար տնտեսական օգուտներ ունեցե՞լ է Այսպիսով, մեր ուսումնասիրած 11 համայնքանքներից 6-ում աշխատակազմերի պահպանմանն ուղղված ծախսերը 2019-ի դրությամբ բացարձակ թվերով նվազել են։ Այս 6 համայնքներում ավելացել են նաև ընդհանուր բյուջետային ծախսերը, ինչը նշանակում է, որ ընդհանուր ծախսերում աշխատակազմերի պահպանմանն ուղղված ծախսերի մասնաբաժիններն էականորեն նվազել են։ Իսկ Վայոց ձորի մարզի Զառիթափ համայնքում, չնայած նվազել են նաև ընդհանուր բյուջետային ծախսերը, այդ ծախսերում աշխատակազմերի պահպանմանն ուղղված ծախսերի մասնաբաժինը ևս նվազել է։ Մնացած 5 համայնքներից 4-ում, խոշորացումից առաջվա տվյալների հետ համեմատած, 2019-ին ավելացել են աշխատակազմերի պահպանման ծախսերը։ Չնայած այս հանգամանքին, ավելացել են նաև այս համայնքների ընդհանուր բյուջետային ծախսերը, և դրա հաշվին ընդհանուր ծախսերում աշխատակազմերի պահպանմանն ուղղված ծախսերի մասնաբաժինները նվազել են։ Վերը նշված բոլոր 10 համայնքներում խոշորացումից հետո կրճատվել են համայնքապետարանների աշխատակազմերի դրույքները։ Ի տարբերություն այս 10 համայնքների՝ Տավուշի մարզի Այրում համայնքում նվազել են ընդհանուր բյուջետային ծախսերը, իսկ աշխատակազմերի պահպանմանն ուղղված ծախսերն, ընդհակառակը, ավելացել են, ըստ այդմ՝ ավելացել է նաև ընդհանուր ծախսերում աշխատակազմերի պահպանմանն ուղղվող ծախսերի մասնաբաժինը։ Ինչ վերաբերում է համայնքապետարանի աշխատակազմերի դրույքներին, դրանք նվազել են։ Փաստորեն, եթե համայնքների մի մասում խոշորացումից հետո բացարձակ թվերով նվազել են համայնքապետարանների աշխատակազմերի պահպանման ծախսերը, մյուս մասում, չնայած բացարձակ թվով աճին, նվազել են այդ ծախսերի մասնաբաժինները ընդհանուր բյուջեում` բացառությամբ Այրում համայնքի, որտեղ այս սկզբունքը չի գործել, և խոշորացումից հետո նախկին համայնքապետարանների աշխատակազմերի կրճատման արդյունքում 2019-ի դրությամբ դրամական միջոցներ չեն խնայվել։ Հեղինակներ՝ Աննա Սահակյան, Կատյա ՄամյանԽորհրդատու՝ Հրանտ Միքայելյան

19:53 - 22 օգոստոսի, 2020

Վայոց ձորի մարզպետարանում 4 տարի շարունակ ներկայացուցչական ծառայությունները ձեռք են բերվում խնդրահարույց ընթացակարգերով

Պետական գնումների համակարգում մեկ անձից իրականացվող գնումների հիմնավորվածությունը շարունակում է լինել խնդրահարույց։ Պետական գնումների վերաբերյալ Infocom-ի իրականացրած հարցազրույցների շարքում ոլորտի փորձագետները եւս խոսել են «մեկ անձ» գնման ընթացակարգի թերությունների մասին։ Թեմայի շրջանակներում ուսումնասիրել ենք 2017-2020 թվականներին Վայոց ձորի մարզպետարանի՝ ներկայացուցչական ծառայությունների ձեռքբերման գործընթացը, որը եւս առնչվում է մեկ անձից գնման ընթացակարգին։ Վայոց ձորի մարզպետարանը նշյալ ժամանակահատվածում պայմանագիր է կնքել Արման Սարգսյան Ա/Ձ-ի հետ․ վերջինս պարտավորվել է ներկայացուցչական ծառայություններ մատուցել: Արդյոք պահպանվե՞լ է գնման գործընթացի թափանցիկությունը 2017-2019 թվականներին Արման Սարգսյան Ա/Ձ-ի՝ արդեն իսկ մատուցած ծառայությունների մասով PPCM գնումների էլեկտրոնային համակարգի պայմանագրեր դաշտում առկա չէ որեւէ հրապարակում՝ հանձման-ընդունման ապրանքագրերի եւ ապրանքների մատակարարման հարկային հաշիվների վերաբերյալ: Բացակա փաստաթղթերի պատճառով գնման ընթացակարգը թափանցիկ չէ՝ տեսնելու՝ արդյոք պայմանագրի շրջանակում ձեռք բերվող ծառայությունները (ապրանքները) պատշաճ կերպով կատարվա՞ծ են, թե՞ ոչ: 2017-2020 թվականներին կնքված պայմանագրերում ծառայությունը մատուցող Ա/Ձ-ի հասցեն նշված է ք․ Եղեգնաձոր, Կամոյի 2/11, սակայն 2018-2019 թվականների հանձնման ընդունման ակտերում ընկերության հասցեն այլ է՝ ք․ Գլաձոր 29Փ 9: Նշենք, որ, ըստ ՊԵԿ կայքի, ընկերությունը հիմնադրվել է 2001 թվականին, գործունեության տեսակն է՝ «Այլ մանրածախ առեւտուր՝ ոչ մասնագիտացված խանութներում»։ Ընթացակարգային թերություններ եւ «Գնումների մասին» ՀՀ օրենքին անհամապատասխանություններ Ինչպես արդեն նշել էինք՝ 2017-2019 թվականներին մատակարարված ապրանքների հանձնման ընդունման ակտերը տեղադրված չէին գնումների համակարգում։ Նշվածները ստացանք հարցման միջոցով՝ այս տարվա օգոստոսի 3-ին։ Քանի որ, ըստ ՀՀ կառավարության թիվ 526-Ն որոշման 23-րդ կետի 4-րդ ենթակետի 10-րդ տողի, ներկայացվող ընթացակարգի պայմանագրերով նախատեսված ապրանքների ձեռքբերումը պետք է իրականացվեր պատվիրակությունների ընդունման, արտասահմանյան այցելությունների կազմակերպման նպատակով, հարցման միջոցով տեղեկացանք, թե Վայոց ձորի մարզպետարանը 2017-2019 թվականներին եւ 2020 թվականի առաջին ամիսներին որքան հանրապետական եւ օտարերկրյա պատվիրակություններ է ընդունել։ Ստորեւ ներկայացնում ենք ուսումնասիրվող տարիներին կնքված պայմանագրերում նշված եւ փաստացի մատակարարված ապրանքների, ինչպես նաեւ այդ տարիներին հյուրընկալված պատվիրակությունների քանակները։ 2017 թվականի փետրվարի 23-ին կնքվել է ՎՁՄ ԲԸԱՀԾՁԲ-04/17 ծածկագրով պայմանագիր, որի կատարման մասին փաստող հանձման-ընդունման արձանագրությունը ներկայացվել եւ իրականացվել է 2017 թվականի հոկտեմբերի 17-ին: Նախ նշենք, որ հանձնման-ընդունման ակտը չի համապատասխանում պայմանագրում կցված ակտի օրինակելի ձեւին․ նշված չէ ապրանքների մատակարարման ժամանակացույցը։ Արձանագրության մեջ նշվում է, որ 30.01.2017թ․-10.10.2017թ․ կատարել է պայմանագրով սահմանված ապրանքների մատակարարումը, այսինքն՝ նշված 30.01.2017թ․ իրականացված մատակարարումը եղել է պայմանագիր կնքելուց առաջ: Փաստաթղթից պարզ է դառնում նաեւ, որ պայմանագրի շրջանակում կատարվել է փուլային մատակարարում, սակայն ամեն անգամ չի կատարվել պատշաճ հանձնում եւ ընդունում՝ վաճառողի ու պատվիրատուի միջեւ, ներկայացվել է ընդամենը 1 հանձնման-ընդունման ակտ, ըստ որի՝ մատակարարվել են պայմանագրով նախատեսված բոլոր ապրանքները։ 2018 թվականի մարտի 1-ին կնքվել է ՎՁՄ ՄԱԾՁԲ-08/18 ծածկագրով պայմանագիր, համաձայն որի՝ մատակարարը պետք է մատուցի 300․000 ՀՀ դրամի ներկայացուցչական ծառայություններ: Ի տարբերություն 2017 թվականի՝ պայմանագրի շրջանակում ընդունվել են 3 հանձման-ընդունման արձանագրություններ, որոնք համապատասխանում են պայմանագրին կից օրինակելի ձեւին: Սակայն, վերոնշյալ աղյուսակից կարող ենք նկատել, որ պայմանագրով նախատեսված ապրանքներից որոշների դեպքում քանակները խախտվել են, իսկ որոշներն ընդհանրապես չեն մատակարարվել։ Պայմանագրում նշված է, որ ապրանքները պետք է մատակարարվեին կարիք առաջանալուց հետո 2 աշխատանքային օրվա ընթացքում։ Այսինքն՝ որոշ ապրանքների չմատակարարումը եղել է այն պատճառով, որ դրանց կարիքը չի եղել։ Հետեւաբար, պլանավորումն ի սկզբանե տեղի չի ունեցել իրական կարիքների գնահատմամբ։ 2019 թվականի փետրվարի 1-ին կնքվել է ՎՁՄ-ՄԱԾՁԲ-02/19 ծածկագրով պայմանագիր, համաձայն որի՝ մատակարարը պետք է մատուցի 300․000 ՀՀ դրամի ներկայացուցչական ծառայություններ: Զարմանալի է, որ այս պայմանագրով եւս նախատեսել են ձեռք բերել այն նույն ապրանքները, որոնք նախատեսվել էին նախորդ 2 տարիներին։ Հաշվի չի առնվել այն փաստը, որ 2018 թվականին որոշ ապրանքների կարիք չի եղել, դրանք չեն մատակարարվել։ Նույն պատկերը եղել է նաեւ 2019 թվականին։ Պայմանագրի շրջանակում ընդունվել է հանձման-ընդունման 3 արձանագրություն: Փաստացի մատակարարված ապրանքների քանակները չեն համապատասխանում պայմանագրով սահմանվածին։ Երկրորդ գրաֆիկից պարզ է դառնում, որ թե՛ հանրապետական, թե՛ արտերկրի պատվիրակությունների ընդունելության քանակները տարբեր են եղել, սակայն բոլոր տարիներին նույն քանակությամբ ապրանքներ են պլանավորել գնել, որը եւս վկայում է գնման պլանավորման արդյունավետության պակասը։ Արդեն այս տարի Վայոց ձորի մարզպետարանը ներկայացուցչական ծառայությունների ձեռքբերման պայմանագիր է կնքում դարձյալ նույն ընկերության՝ Արման Սարգսյան Ա/Ձ-ի հետ՝ գրեթե նույն քանակությամբ ապրանքներ նախատեսելով, որոնցից շատերի կարիքը 2018-2019թթ․ չէր եղել եւ դրանք չէին մատակարարվել։ Պայմանագիրը ՝ ստորեւ։ Բացի վերոնշյալները՝ հարցման միջոցով փորձել էինք հասկանալ՝ արդյոք մարզպետարանը այլ ընկերությունների հարցումներ ուղարկե՞լ է՝ գնային առաջարկների ստացման եւ շուկայի ուսումնասիրության նպատակով։ Վայոց ձորի մարզպետարանից ստացած պատասխանից պարզ դարձավ, որ մարզպետարանը ՎՁՄ-ՄԱԾՁԲ-09/20, ՎՁՄ-ՄԱԾՁԲ-02/19, ՎՁՄ ՄԱԾՁԲ-08/18, ՎՁՄԲԸԱՀԾՁԲ-04/17 ծածկագրերով պայմանագրերը կնքել է՝ հիմք ընդունելով «Գնումների մասին» ՀՀ օրենքի 23-րդ հոդվածի 1-ին մասի 4-րդ կետը, համաձայն որի՝ պայմանագիրը կնքվել է մեկ անձից եւ այլ ընկերությունների գնային առաջարկ ստանալու վերաբերյալ հարցում չի ուղարկվել: Իրենց հիմնավորմամբ, այո, մարզպետարանը կարող էր այլ ընկերություններին գնահարցում չուղարկել։ Սակայն հարկ է նշել, որ կնքված պայմանագրի մասին հայտարարություններում որպես գնման ընթացակարգի հիմնավորում ներկայացվել է «Գնումների մասին» ՀՀ օրենքի 23-րդ հոդվածի 1-ին մասի 1-րդ կետը, այն է՝ գնման ենթակա ապրանքը, աշխատանքը կամ ծառայությունը հնարավոր է ձեռք բերել միայն մեկ անձից, որը պայմանավորված է նրա հեղինակային եւ հարակից իրավունքներով, հատուկ կամ բացառիկ իրավունքի առկայությամբ, եւ նոր միայն իրենց նշած՝ ՀՀ կառավարության 04․05․2017թ․ թիվ 526-Ն որոշման 23-րդ կետի 4-րդ ենթակետի 10-րդ տողի համաձայն, այն է՝ պատվիրակությունների ընդունման, արտասահմանյան այցելությունների կազմակերպման նպատակով ապրանքների, աշխատանքների եւ ծառայությունների ձեռքբերում՝ բացառությամբ օդային փոխադրումների գործակալներից ավիատոմսերի ձեռքբերման: Այսինքն, ըստ գնումների էլեկտրոնային համակարգում տեղադրված հայտարարության, միայն հարցման պատասխանում նշված կետը չէ, որ դրվել է ընթացակարգի հիմքում, այլ նաեւ հեղինակային եւ հարակից, հատուկ կամ բացառիկ իրավունքի առկայությունը։ Ստացվում է, որ տվյալ Ա/Ձ-ն պետք է ներկայացներ փաստաթուղթ, որն ապացուցում է պայմանագրում տեղ գտած ապրանքների մասով նշված իրավունքներից որեւէ մեկի առկայությունը։ Ակնհայտ է, որ մատակարարված ապրանքատեսակների գծով (կոնֆետ, սեւ թեյ, սուրճ, եւն) չէր կարող լինել որեւէ հեղինակային եւ հարակից, հատուկ կամ բացառիկ իրավունքի առկայություն։ Հետեւաբար, կամ մեզ ուղարկված պատասխանում, կամ կնքված պայմանագրի մասին հայտարարություններում մարզպետարանը սխալ է նշել գնման ընթացակարգի հիմնավորումը։ Այսպիսով, կարող ենք փաստել, որ շուրջ 4 տարի է՝ Վայոց ձորի մարզպետարանում ներկայացուցչական ծառայությունները ձեռք են բերվում ընթացակարգային խախտումներով, իսկ դրանց վերաբերյալ փաստաթղթերը օնլայն հարթակում հասանելի չեն, հետեւաբար չի պահպանվում նաեւ պետական գնումների թափանցիկության սկզբունքը։ Արփի Ավետիսյան

17:16 - 15 օգոստոսի, 2020