ՊՆ

Հայաստանի Հանրապետության պաշտպանության նախարարությունը գործադիր իշխանության հանրապետական մարմին է, որն իրականացնում է պաշտպանության բնագավառում Հայաստանի Հանրապետության կառավարության քաղաքականությունը: Պաշտոնապես հիմնադրվել է 1992թ. հունվարի 28-ին։

ՀՀ պաշտպանության նախարարը Սուրեն Պապիկյանն է։ Տեղակալներն են Արման Սարգսյանը և Կարեն Բրուտյանը։

Շուշան Ստեփանյանը նշանակվել է ՀՀ ՊՆ մամուլի քարտուղար

Շուշան Ստեփանյանը նշանակվել է ՀՀ ՊՆ մամուլի քարտուղար

ՀՀ պաշտպանության նախարար Դավիթ Տոնոյանի հրամանով Շուշան Ստեփանյանը նշանակվել է ՀՀ ՊՆ մամուլի քարտուղար: Այս մասին տեղեկացրին ՀՀ պաշտպանության նախարարության տեղեկատվության և հասարակայնության հետ կապերի վարչությունից։ «Շուշան Շահենի Ստեփանյան Զինվորական կոչումը՝ մայոր Ծնվել է 08.08. 1988թ., ԱՀ  ք. Հադրութում 1995-2005թթ. սովորել և գերազանցությամբ ավարտել է ք. Հադրութի Մ.Մանվելյանի անվան միջնակարգ դպրոցը 2005-2009 թթ. սովորել է ԵՊՀ ժուռնալիստիկայի ֆակուլտետում, որն ավարտել է գերազանց առաջադիմությամբ 2007-2009 թթ. աշխատել է «Հետք» էլեկտրոնային պարբերականում` որպես հետաքննող լրագրող 2009թ. ընդունվել է պայմանագրային զինվորական ծառայության՝ որպես ՀՀ ՊՆ «Հայ զինվոր» թերթի ռազմաքաղաքական տեղեկատվության և զինծառայողների գաղափարախոսական բաժանմունքի թղթակից 2013 թ. նույն թերթի խմբագրության մշակույթի և հասարակայնության կապերի բաժանմունքի թղթակից 2015-2016 թթ. նույն թերթի խմբագրության զորքերի առօրյա գործունեության լուսաբանման բաժնի խմբագիր 2017 թ. նույն թերթի խմբագրության զորքերի առօրյա գործունեության լուսաբանման բաժնի պետ 2018 թ. «Զինուժ Մեդիա» պետական հիմնարկի մամուլի բաժնի թղթակից 2019 թ-ից ծառայում է ՀՀ զինված ուժերում 2009 թ. թիմի կազմում ճանաչվել է European Journalism Centre-ի կողմից կազմակերպված հետաքննական լրագրության ուսումնական մրցույթի հաղթող և վերապատրաստվել Նիդերլանդներում 2014թ վերապատրաստվել է ԳԴՀ ԶՈւ Ինֆորմացիայի և կոմունիկացիայի ակադեմիայում Պարգևատրվել է «ՀՀ ԶՈւ 20 տարի» , «Ծ.Հ.Ս. Իսակով», «Անբասիր ծառայության համար» 1-ին աստիճանի, «Մարշալ Բաղրամյան» մեդալներով, պատվոգրերով: Հայրը` Շահեն Ստեփանյանը, ղարաբաղյան պատերազմի ակտիվ մասնակից է,  հետմահու պարգևատրվել է Արցախի Հանրապետության «Մարտական խաչ» 2-րդ աստիճանի շքանշանով»,- ասվում է հաղորդագրության մեջ։
18:19 - 12 մարտի, 2020
ՊՆ պարզաբանումը գնումների վերաբերյալ

ՊՆ պարզաբանումը գնումների վերաբերյալ

Ի պատասխան մի շարք լրատվամիջոցների կողմից ստացված հարցումների՝ ՀՀ պաշտպանության նախարարությունը հայտնում է. ՀՀ պետական վերահսկողական ծառայության պաշտոնական www.supervision.am կայքէջում հրապարակված հաղորդագրության համաձայն՝ վերջինս ուսումնասիրություն է իրականացրել ՀՀ պաշտպանության նախարարությունում՝ 2019 թվականի կարիքների համար դիզելային վառելանյութի ձեռքբերման գնման գործընթացի օրինականության և արդյունավետության նկատմամբ: Ուսումնասիրության արդյունքում կազմված տեղեկանքն ուղարկվել է ՀՀ դատախազություն՝ արձանագրված խախտումներին քրեաիրավական գնահատական տալու նպատակով: Նշվածի կապակցությամբ ՀՀ պաշտպանության նախարարությունը հարկ է համարում տեղեկացնել, որ յուրաքանչյուր բյուջետային տարվա ընթացքում ՀՀ ՊՆ-ն իրականացնում է շուրջ 1000-1100 գնման գործընթաց, որոնցից յուրաքանչյուրը միջինում պարունակում է 8-10 չափաբաժին: Ընդ որում, օրական կտրվածքով միաժամանակ ընթացող և տարբեր փուլերում գտնվող գնման ընթացակարգերը տատանվում են 50-200-ի շրջանակում, իսկ նշված ընթացակարգերի արդյունքում արդեն իսկ կնքված պայմանագրերի կատարման հետ կապված գործընթացները պատկառելի ծավալ են կազմում: Գնման ընթացակարգերի կազմակերպման և պայմանագրերի կատարման նշված ծավալի մեջ, բնականաբար,  կարող են արձանագրվել ինչպես բողոքներ, այնպես էլ թերացումներ և մատակարարումների հետ կապված խնդիրներ: Այդ հանգամանքով պայմանավորված՝ ՊՆ գնումները մշտապես գտնվում են ստուգումներ իրականացնող և իրավապահ տարբեր մարմինների ուշադրության կենտրոնում։ Այս առումով, օրինաչափ է, որ ՊՆ գնումների գործընթացի շրջանակում պարբերաբար նախաձեռնվում են ինչպես քրեական, այնպես էլ դատական գործընթացներ: Հարկ ենք համարում նշել, որ վերոհիշյալ թերացումների մասով չի բացառվում ՊՆ համակարգի պատասխանատուների բարեվարքության հետ կապված խնդիրների առկայությունը։ Այդուհանդերձ, հավաստիացնում ենք, որ ՀՀ ՊՆ-ն մշտապես և հետևողականորեն իրականացնում է լրջագույն միջոցառումներ՝ ուղղված հատկապես գնումների գործընթացում ներգրավված աշխատակիցների բարեվարքության բարձրացմանն ու ամրապնդմանը:
17:38 - 11 մարտի, 2020
Ուսումնասիրվել է ՊՆ դիզելային վառելանյութի ձեռքբերման գործընթացը

Ուսումնասիրվել է ՊՆ դիզելային վառելանյութի ձեռքբերման գործընթացը

ՀՀ պետական վերահսկողական ծառայությունն ուսումնասիրություն է իրականացրել ՀՀ պաշտպանության նախարարությունում՝ 2019 թվականի կարիքների համար դիզելային վառելանյութի ձեռքբերման գնման գործընթացի օրինականության և արդյունավետության նկատմամբ: Տվյալ դեպքում ուսումնասիրվել է ՀՀ պաշտպանության նախարարության կողմից «Գազօիլ» ՍՊ ընկերությունից դիզելային վառելանյութի ձեռքբերման գործընթացը, որի ընթացքում արձանագրվել են գնման գործընթացին վերաբերող խախտումներ, մասնավորապես գնման առարկայի պլանավորման, գնման ձևի ընտրության, մատակարարման, մատակարարված դիզելային վառելանյութի տեխնիկական բնութագրին համապատասխանության և այլ հանգամանքների հետ կապված։ Ուսումնասիրության արդյունքում կազմված տեղեկանքն ուղարկվել է ՀՀ դատախազություն՝ արձանագրված խախտումներին քրեաիրավական գնահատական տալու նպատակով։
11:15 - 11 մարտի, 2020
ՀՀ ՊՆ ռազմական ոստիկանությունում անցկացվել է ղեկավար կազմի խորհրդակցություն

ՀՀ ՊՆ ռազմական ոստիկանությունում անցկացվել է ղեկավար կազմի խորհրդակցություն

Մարտի 9-ին ՀՀ պաշտպանության նախարարի տեղակալ Գաբրիել Բալայանը ՊՆ ռազմական ոստիկանությունում մասնակցել է ՌՈ կենտրոնական ապարատի և ենթակա ստորաբաժանումների ղեկավար կազմի խորհրդակցությանը։ Խորհրդակցության ընթացքում ամփոփվել են զինված ուժերի զորամասերում վերջին շաբաթներին իրականացված օպերատիվ և կանխարգելիչ միջոցառումների արդյունքները։ Նշվել է, որ ժամկետային զինծառայողների մոտ հայտնաբերվել են մեծ քանակությամբ օպերացիոն համակարգերով բջջային հեռախոսներ /սմարթֆոններ/, որոնք վերադարձվում են զինծառայողների ծնողներին։ Գործընթացը շարունակվում է, և ռազմական ոստիկանությունն ակտիվ գործողություններ է իրականացնում զորամասերում արգելված միջոցների հայտնաբերման ուղղությամբ։ Պաշտպանության նախարարի տեղակալ Գաբրիել Բալայանը ևս մեկ անգամ ընդգծել է զինված ուժերում քրեական ենթամշակույթի և արատավոր երևույթների բացառման ուղղությամբ արդյունավետ պայքարի անհրաժեշտությունը, հանձնարարականներ տվել ռազմական ոստիկանության տարբեր օղակների ղեկավարներին։
16:05 - 09 մարտի, 2020
Արցախի զորամասերից մեկում նոր ճաշարան է բացվել՝ սննդի ապահովման նոր համակարգով

Արցախի զորամասերից մեկում նոր ճաշարան է բացվել՝ սննդի ապահովման նոր համակարգով

ՊԲ-ում շարունակվում է անձնակազմին սննդով ապահովելու նոր տարբերակի ներդրման գործընթացը: Նման հերթական ճաշարանի բացման արարողությանը մասնակցել և մատուցվող կերակրատեսակներին ծանոթացել է ԱՀ ՊՆ, ՊԲ հրամանատար, գեներալ-մայոր Ջալալ Հարությունյանը: Ինչպես պարենային ապահովման նոր տարբերակին անցած մյուս բոլոր զորամասերում, այստեղ ևս անձնակազմի արձագանքը միանշանակ դրական է: Միավորման հրամանատար, գնդապետ Կարեն Շաքարյանի համոզմամբ՝ քաղաքացիական կազմակերպության կողմից սննդի ապահովման գործընթացի իրականացումը հրամկազմի համար խնայում է ոչ միայն հսկայական մարդկային և նյութական միջոցներ, այլև ապահովում է հավելյալ ազատ ժամանակ, որը հնարավորություն է ընձեռում մարտական պատրաստության ու պատրաստականության համալիր գործընթացներին հատկացնել շատ ավելի մեծ ուշադրություն: Ի դեպ, միավորման ենթակա մյուս զորամասերում ևս ընթացքի մեջ են պարենային ապահովման նոր տարբերակի անցման աշխատանքները, որոնք ավարտին կհասնեն սահմանված ժամկետներում: Նոր ճաշարանի սպասարկող անձնակազմի գերակշիռ մասը գեղեցիկ սեռի ներկայացուցիչներ են: Քանի որ ճաշարանի բացումը համընկել է կանանց միջազգային տոն օրվա հետ, վերջիններս նվերներ ու շնորհավորանքներ են ստացել հրամանատարության և մատակարար ընկերության ղեկավարության կողմից:
12:45 - 09 մարտի, 2020
Արծրուն Հովհաննիսյանը դադարեցնում է ՀՀ ՊՆ մամուլի քարտուղարի պարտականությունների կատարումը

Արծրուն Հովհաննիսյանը դադարեցնում է ՀՀ ՊՆ մամուլի քարտուղարի պարտականությունների կատարումը

Արծրուն Հովհաննիսյանը ֆեյսբուքյան իր էջում գրում է․ «Հարգելի գործընկերներ ես այսօրվանից դադարեցնում եմ ՀՀ պաշտպանության նախարարի մամուլի քարտուղարի պարտականությունների կատարումը: Շնորհակալ եմ բոլորին համատեղ ծառայության համար։Առաջին հերթին շնորհակալ եմ իմ բոլոր ղեկավարներին:Շնորհակալ եմ ՀՀ ԶՈՒ-երի յուրաքաչյուր զինվորին և սպային, որ լիազորված եմ եղել և պատիվ եմ ունեցել հանրությանը ներկայացնել նրանց շահերը: Շնորհակալ եմ բոլոր լրատվամիջոցներին համատեղ աշխատելու համար:Ծառայության 23 տարիների ընթացքում երազել եմ զբաղվել ռազմական կրթությամբ: Ուրախ եմ, որ իմ ծառայությունը Հայաստանի Հանրապետության ԶՈւ-երում շարունակելու եմ հենց ռազմական կրթության ոլորտում:Ծառայում եմ Հայաստանի Հանրապետությանը»:  
16:24 - 06 մարտի, 2020
Փոխգնդապետին ծեծի ենթարկելու գործով մեղադրյալ Զավեն Գրիգորյանը գրավի դիմաց ազատ արձակվեց |armtimes.com|

Փոխգնդապետին ծեծի ենթարկելու գործով մեղադրյալ Զավեն Գրիգորյանը գրավի դիմաց ազատ արձակվեց |armtimes.com|

armtimes.com: Վայոց ձորում ՀՀ ՊՆ փոխգնդապետ Արա Մխիթարյանին նախորդ տարվա սեպտեմբերին ծեծի ենթարկելու գործով կալանավորված Զավեն Գրիգորյանը գրավի դիմաց ազատ արձակվեց: Այս մասին ասաց Գրիգորյանի պաշտպան Լեւոն Սահակյանը: Վերջինիս խոսքով՝ քննիչը միջնորդություն էր ներկայացրել կալանքի ժամկետը երկարաձգելու վերաբերյալ, եւ առաջին ատյանի դատարանը՝ դատավոր Արտակ Թադեւոսյանի նախագահությամբ, բավարարել էր այն՝ մերժելով իրենց գրավի միջնորդությունը: Դատարանի այդ որոշումն էլ իրենք բողոքարկել էին Վերաքննիչ դատարան, որն էլ, դատավոր Արմեն Դանիելյանի նախագահությամբ, գրավի մասով դատական ակտն այսօր բեկանեց՝ մասնակի բավարարելով պաշտպանական կողմի բողոքը: Սահակյանը նշեց՝ որպես գրավի չափ միջնորդել էին 501.000 կամ ավելի դրամ, սակայն դատարանն իր հայեցողությամբ սահմանեց 1 միլիոն 500 հազար դրամ: Դատարանի որոշումը պաշտպանը դեռ չի ստացել եւ դրա հիմքերին ծանոթ չէ. «Մենք հուսով էինք, որ հիմնավոր կասկածի մասով կբավարարվի, բայց բավարարվեց գոնե գրավի մասով, մնացածն արդեն օրերի խնդիր է. այժմ ակնկալում ենք, որ մոտ օրերս Զավեն Գրիգորյանի քրեական հետապնդումն ընդհանրապես կդադարեցվի, եւ սուտ մատնության հատկանիշներով առնվազն երեք հոգու դեմ քրեական գործ կհարուցվի»: Ճշտող հարցին՝ խոսքն ականատես վկաների մասի՞ն է, ովքեր նրա դեմ ցուցմունք են տվել, պաշտպանը պատասխանեց. «Նկատի ունեմ այն անձնավորությանը, որ հարցաքննվել է որպես վկա, բայց ականատես չի եղել եւ կեղծ տեղեկություններ է հայտնել՝ ասելով, որ ականատես է եղել, եւ նաեւ Արա Մխիթարյանի երկու չակերտավոր ընկերներին, ովքեր սուտ մատնություն են կատարել»: Թե կոնկրետ ում նկատի ունի, պաշտպանն այս պահին չցանկացավ մանրամասնել, միայն ասաց. «Խոստացել էի, որ եթե Զավեն Գրիգորյանի իրավունքների խախտումները չվերացվեն, կսկսեմ նախաքննական գաղտնիք հրապարակել, բայց ինչպես տեսնում եք, դրա կարիքը էլ չկա»: Հարցին՝ պատրաստվում է հետապնդումը դադարեցնելու միջնորդությամբ հանդես գալ, Լեւոն Սահակյանը պատասխանեց. «Ես նախկինում ներկայացրել եմ նման միջնորդություն, եւ այն մերժվել է, այժմ մի քանի օր կսպասեմ. եթե վարույթն իրականացնող մարմինը սեփական նախատեսությամբ նման քայլերի չդիմեց, ապա անպայման նորից կներկայացնեմ»: Հարցին, թե ընդհանուր առմամբ նախաքննությունն այժմ ինչ փուլում է, Սահակյանը պատասխանեց. «Քրեական հետապնդումը պետք է դադարեցվի, որից հետո, ըստ Վճռաբեկ դատարանի որոշման, սուտ մատնության համար գործ հարուցվի, եւ շուտով արդեն նախաքննության ավարտ հայտարարվի, քանի որ, ըստ իս, լրացուցիչ քննչական գործողությունների կարիք այլեւս չկա»: Շարունակությունը՝ armtimes.com-ում
14:48 - 06 մարտի, 2020
ՀՔԱ Վանաձորի գրասենյակի իրավական աջակցությամբ մի խումբ զինծառայողներ վերականգնել են իրենց իրավունքները |hcav.am|

ՀՔԱ Վանաձորի գրասենյակի իրավական աջակցությամբ մի խումբ զինծառայողներ վերականգնել են իրենց իրավունքները |hcav.am|

hcav.am: 2019 թվականի նոյեմբերի 6-ին ՀՔԱ Վանաձորի գրասենյակ էին դիմել մի խումբ զինծառայողներ՝ իրավական աջակցություն ստանալու նպատակով: Նրանք  գրասենյակին հայտնել են, որ 2017 թվականի նոյեմբերի 2-ից ՀՀ ՊՆ N զորամասը վերակազմավորվել է ՀՀ ՊՆ N բանակային կորպուսի N նյութապահովման վաշտի: Սկսած այդ ժամանակահատվածից՝ զինծառայողներն սկսել են մասամբ վճարվել գործուղման ծախսերի դիմաց:  Իրավիճակն ավելի է վատթարացել, քանի որ 2019-ի ապրիլից մինչև նոյեմբեր նրանք, ընդհանրապես, չեն ստացել փոխհատուցումները: Զինծառայողների տեղեկություններով՝ ամսական իրենց  տրամադրվում է 101.000-117.000 դրամ, որից բացի՝ նրանք պետք է ստանային նաև գործուղման ծախսերի փոխհատուցում: Չստանալով այն՝ զինծառայողները ստիպված են եղել նշված գումարի շրջանակում հոգալ  իրենց գործուղման ծախսերը:   Նրանցից մեկն, օրինակ, պատմել է, որ  ՀՀ ՊՆ-ը իրեն չի վճարել շուրջ 55.000 դրամ, նույնքան էլ մեկ այլ վարորդի: Ամենաշատ չվճարված գործուղման փոխահատուցման չափը կազմել է 292.000 դրամ: Ըստ զինծառայողների՝ ղեկավարությունն այս  իրավիճակը պատճառաբանել է ֆինանսական եռամսյակային փոխանցումների ուշացումներով: Ընդհանուր առմամբ՝ ՀՀ ՊՆ պարտավորությունները՝ զինծառայողների նկատմամբ տատանվում էր  33.000-292.000 դրամի միջակայքում:  ՀՔԱ Վանաձորի գրասենյակն սկսել է զբաղվել զինծառայողների ոտնահարված իրավունքների վերականգնման գործով և գրություն ուղարկել ՀՀ պաշտպանության նախարար Դավիթ Տոնոյանին: Ի դեպ, նույն խնդրով զինծառայողները նույն ժամանակահատվածում գրություն են ուղարկել նաև ՀՀ վարչապետ Նիկոլ Փաշինյանին:  Վկայակոչելով ՀՀ ՊՆ 2013 թ. օգոստոսի 20-ի թիվ 915 հրամանը, որով սահմանված է ՀՀ ՊՆ զինծառայողների՝ ՀՀ-ում, ԼՂ-ում և օտարերկրյա տարածքներում գործուղումների կազմակերպման և իրականացման կարգը, ՀՔԱՎ-ը պաշտպանության նախարարից  պահանջել էր պաշտոնական պարզաբանում՝ ստեղծված իրավիճակի մասին, ձեռնարկել անհրաժեշտ միջոցներ՝ զինծառայողների խախտված իրավունքները վերականգնելու ուղղությամբ։ ՀՀ ՊՆ-ի՝ ՀՔԱՎ-ին ուղղված պատասխան գրությամբ պաշտպանական գերատեսչության ղեկավարը  վստահեցրել է, որ վերոնշյալ զորամասի վերաբերյալ իր հանձնարարությամբ ուսումնասիրվել են փաստաթղթեր՝ 2017-ի նոյեմբերից մինչև 2019-ի նոյեմբերն ընկած  ժամանակահատվածի համար՝ պարզելու խնդրին առնչվող հանգամանքները: Արդյունքում՝  զինծառայող-վարորդների բոլոր գործուղումների ծախսերը ամբողջությամբ փոխհատուցվել են։
13:27 - 06 մարտի, 2020
ՀՀ ԶՈՒ զինծառայողները կանխել են դիվերսիոն ներթափանցման փորձ

ՀՀ ԶՈՒ զինծառայողները կանխել են դիվերսիոն ներթափանցման փորձ

Մարտի 6-ին, առավոտյան ժամը 05.30-ի սահմաններում, ՀՀ հյուսիս-արևելյան ուղղությամբ տեղակայված մարտական դիրքերից մեկի ուղղությամբ ադրբեջանական զինծառայողները ձեռնարկել են դիվերսիոն ներթափանցման փորձ: Դիրքապահ անձնակազմի գրագետ գործողությունների շնորհիվ հակառակորդը, կորուստներ տալով, հետ է շպրտվել իր ելման դիրք, թողնելով զինամթերք և ականորսիչ սարք: Հայկական կողմը կորուստներ չունի, գործողությունների արդյունքում թեթև վիրավորում է ստացել մեկ զինծառայող, դեպքի մանրամասները ճշտվում են: Գործողությունների վերլուծությունը ցույց է տալիս, որ տվյալ դիվերսիոն ներթափանցման համար, որն իրականացվել է համապատասխան պատրաստություն անցած անձնակազմի կողմից, հակառակորդն իրականացրել է նախապատրաստական լուրջ աշխատանքներ: Հատկանշական է, որ ականադաշտերում անցումներ բացելու համար օգտագործվել է գերմանական արտադրության ականորսիչ:          
10:38 - 06 մարտի, 2020
ՀՀ ԶՈՒ-ում սպասվում են լայնամասշտաբ զորավարժություններ |Հայաստանի Հանրապետություն օրաթերթ|

ՀՀ ԶՈՒ-ում սպասվում են լայնամասշտաբ զորավարժություններ |Հայաստանի Հանրապետություն օրաթերթ|

armenpress.am։ «Առաջիկայում սպասվում են լայնամասշտաբ զորավարժություններ, որոնց ժամանակ, միգուցե, ուսումնական կիրառությամբ կտեսնենք նոր «ՍՈՒ-30ՍՄ» մակնիշի գերժամանակակից բազմաֆունկցիոնալ կործանիչ օդուժի հզորությունը: Այս մասին ասել է  ՀՀ պաշտպանության նախարարի մամուլի խոսնակ, ռազմական փորձագետ Արծրուն Հովհաննիսյանը: «Մեծ զորավարժությունների ժամանակ, երբ հրաձգությունը մարտական է լինում, կիրառվում է նաեւ ծանր տեխնիկա, այդ թվում` հրթիռներ: Նմանատիպ զորավարժությունների ժամանակ, միգուցե, կիրառվեն նաեւ «ՍՈՒ-30ՍՄ» կործանիչ ինքնաթիռները: Ի դեպ, ես խոսում եմ կոնկրետ մարտական զորավարժության մասին, որը «Շանթ»-ի հետ կապ չունի: «Շանթ»-ը մարտական հրաձգությամբ լայնամասշտաբություն չունի, այն ռամավարական, հրամանատարաշտաբային զորավարժություն է»,- մանրամասնեց Ա. Հովհաննիսյանը: «ՍՈՒ-30ՍՄ» մակնիշի կործանիչների առաջին խմբաքանակը Հայաստան հասավ նախորդ տարվա դեկտեմբերին: Ձեռքբերումը, ինչպես նշել էր ՀՀ վարչապետ Նիկոլ Փաշինյանը, շրջադարձային նշանակություն ունի Հայաստանի Հանրապետության անվտանգության եւ ժողովրդի ապահովման հարցում»:                     Նյութն ամբողջությամբ կարդացեք թերթում։
08:54 - 06 մարտի, 2020
Զինված ուժերում իրականացվում են կորոնավիրուսի տարածումը կանխարգելող միջոցառումներ

Զինված ուժերում իրականացվում են կորոնավիրուսի տարածումը կանխարգելող միջոցառումներ

Անձնակազմի շրջանում նոր կորոնավիրուսային վարակի ներթափանցման կանխարգելման նպատակով ՀՀ զինված ուժերում իրականացվում են մի շարք ժամանակավոր միջոցառումներ. Ռազմաբժշկական հաստատություններում խստացվել է անցագրային ռեժիմը, մուտքը թույլատրվում է միայն հսկիչ անցագրային կետերում ջերմաչափում կատարելուց հետո՝ բժշկական պաշտպանիչ դիմակներով: Ռազմաբժշկական հաստատություններում դադարեցվել են պլանային հետազոտման և բժշկական օգնության կարիք ունեցող զինծառայողների ընտանիքների անդամների, երկարամյա ծառայության և հաշմանդամության զինվորական կենսաթոշակ ստացող նախկին զինծառայողների, ինչպես նաև մարտական գործողությունների մասնակիցների և այլ շահառուների բժշկական օգնության ու սպասարկման կազմակերպումը, իսկ պետության կողմից երաշխավորված անվճար և արտոնյալ պայմաններով բժշկական օգնության ու սպասարկման ուղեգրերի տրամադրումն իրականացվում է հսկիչ-անցագրային կետերից՝ բացառելով վերջիններիս մուտքը ստորաբաժանումների տարածք: Շարքային կազմի պարտադիր զինծառայողներին տրամադրվում է արձակուրդ միայն «Զինվորական ծառայության և զինծառայողի կարգավիճակի» մասին ՀՀ օրեն­քի 28-րդ հոդվածի 6-րդ մասի 2-րդ և 3-րդ կետերով նախատեսված հիմքերի առկայու­թյան դեպքում: 
14:19 - 05 մարտի, 2020