ՀՀ առողջապահության նախարարություն

Գործադիր իշխանության հանրապետական մարմին է, որը մշակում եւ իրականացնում է առողջապահության բնագավառում ՀՀ կառավարության քաղաքականությունը։ Նախարարության ենթակայության տակ են գտնվում Առողջապահության ազգային ինստիտուտը, Դեղերի եւ բժշկական տեխնոլոգիաների փորձագիտական կենտրոնը, Հանրապետական գիտաբժշկական գրադարանը, Ստացիոնար բուժօգնություն իրականացնող կազմակերպությունները, Առաջնային բուժօգնություն իրականացնող կազմակերպությունները, այլ կազմակերպություններ։

ՀՀ առողջապահության նախարարն է Անահիտ Ավանեսյան, տեղակալներն են՝ Լենա Նանուշյանը, Գեւորգ Սիմոնյանը, Արտյոմ Սմբատյանը։

«Բնակչության բժշկական օգնության և սպասարկման մասին» օրենքում փոփոխություններ են կատարվել․ ԱՆ

Այսօր Ազգային ժողովում 2-րդ ընթերցմամբ ընդունվել է «Բնակչության բժշկական օգնության և սպասարկման մասին» Հայաստանի Հանրապետության օրենքում փոփոխություն կատարելու մասին» օրենքը` հարակից օրենքներով: Հաշվի առնելով կատարված լայնածավալ փոփոխություններն ու լրացումները` այն շարադրվել է նոր խմբագրությամբ: Այս մասին տեղեկացնում է առողջապահության նախարարությունը։ Նշենք, որ սույն օրենքը բժշկական օգնության և սպասարկման իրավական հարաբերությունները կարգավորող մայր օրենքն է: Այսպիսով` 1) սահմանվել են անձնական տվյալների, մասնավորապես բժշկական գաղտնիքի մշակման, փոխանցման համար իրավական կարգավորումներ, ներառյալ պատասխանատվություն նախատեսող դրույթներ ապահովելու, քաղաքացիների անձնական կյանքը հարգելու, մասնավոր կյանքի անձեռնմխելիության և անձնական տվյալների գաղտնիության պահպանման սահմանադրական իրավունքները, 2) ամրագրվել են պացիենտների իրավունքների և պարտականությունների ավելի հստակ շրջանակ` ապահովելով նաև նրանց իրավունքների առավել արդյունավետ իրացումը, 3) սահմանվել են իրավական հիմքեր և կարգավորումներ էլեկտրոնային առողջապահության համակարգի ներդրման և կիրառման համար, 4) օրենսդրորեն կանոնակարգվել են լայնածավալ արտակարգ իրավիճակների կա'մ ռազմական, կա'մ ահաբեկչական գործողությունների դեպքում տուժած անձանց բժշկական օգնության և սպասարկման կազմակերպման առանձնահատկությունները, 5) ճշգրտվել է բժշկական փորձաքննությունների ցանկը, լրացվել օրենսդրական բացերը, սահմանվել պարտադիր դատաբժշկական փորձաքննությունների դեպքերը և ձևերը, 6) օրենսդրորեն կարգավորվել են բժշկական արտադրատեսակների շրջանառության հետ կապված հարաբերությունները, ստեղծվել բժշկական արտադրատեսակների գրանցման, ներմուծման և շրջանառության ոլորտում լիարժեք օրենսդրություն և արդիական ինստիտուցիոնալ կառուցակարգեր, 7) բարելավվել են բուժաշխատող-պացիենտ, բուժաշխատող-բուժաշխատող հարաբերությունները` դրանց կանոնակարգումն իրականացնելով օրենսդրությամբ սահմանված էթիկայի կանոնների կիրարկմամբ, սահմանվել է մասնագիտական գործունեության էթիկայի կանոնների խախտումներ քննող էթիկայի հանձնաժողով, 8) սահմանվել են բժշկական օգնության և սպասարկման տեսակները, հեռաբժշկությունը, լիազորող նորմեր են ամրագրվել դրա իրականացման կարգը սահմանելու համար, 9) սահմանվել են լաբորատոր գործունեության վերաբերյալ դրույթը, համընդհանուր լաբորատոր ցանցի համակարգը, բաղադրիչները, ցանցում ընդգրկված յուրաքանչյուր մակարդակի լաբորատորիաների գործառույթները, որակի կառավարման համակարգի պահանջը և հիմնական հասկացությունները:

18:13 - 06 մայիսի, 2020

Արա Մինասյանի հայցն ընդդեմ Առողջապահության նախարարության և ԲԿ-ի մերժվել է |azatutyun.am|

azatutyun.am: Երևանի ընդհանուր իրավասության դատարանը երեկ մերժել է «Սուրբ Գրիգոր Լուսավորիչ» բժշկական կենտրոնի (ԲԿ) նախկին տնօրեն Արա Մինասյանի հայցն ընդդեմ Առողջապահության նախարարության և ընդդեմ ԲԿ-ի` իրեն աշխատանքից ազատելու հարցով: Այս մասին տեղեկանում ենք «Դատալեքս» տեղեկատվական պաշտոնական կայքէջից: Մինասյանը պահանջում էր անհիմն ճանաչել իրեն աշխատանքից ազատելու հրամանն ու վերականգնել նախկին աշխատանքում։ Ըստ դատական ակտի` ԲԿ-ի և Արա Մինասյանի միջև կնքված պայմանագրով սահմանվել է, որ ընկերությունն իրավունք ունի ցանկացած ժամանակ, առանց պայմանագրով նախատեսված հիմքերի, իրավասու մարմնի որոշմամբ լուծելու պայմանագիրը, որի մասին Մինասյանը տեղյակ է եղել, և քննարկվող իրավիճակը ամբողջությամբ կարգավորվում է «Բաժնետիրական ընկերությունների մասին» ՀՀ օրենքով, այսինքն՝ ընկերության ժողովին ուղղակի իրավունք է վերապահված ցանկացած ժամանակ լուծել տնօրենի հետ կնքված պայմանագրերը, հետևաբար` «Սուրբ Գրիգոր Լուսավորիչ» բժշկական կենտրոն ՓԲ ընկերության ժողովը լուծել է տնօրենի հետ կնքված պայմանագիրը` իրացնելով իրեն վերապահված իրավունքը: 2018 թվականի հուլիսին Արա Մինասյանն ազատվել էր աշխատանքից: Նա դատի էր տվել առողջապահության նախարար Արսեն Թորոսյանին: Մինասյանի փաստաբանը դատարանում պնդել է, որ նախարար Թորոսյանն իր ֆեյսբուքյան էջի ուղիղ եթերում Մինասյանի հասցեին զրպարտիչ հայտարարություններ է արել: Արա Մինասյանը նաև մեղադրվում է առանձնապես խոշոր չափերով խարդախության և մի խումբ անձանց հետ փաստաթղթեր կեղծելու համար: Նա հետախուզման մեջ է:

17:50 - 06 մայիսի, 2020

ԱՀԿ փորձագետները պատրաստ են աջակցել Հայաստանին COVID19-ի դեմ պայքարում |armenpress.am|

armenpress.am: Առողջապահության համաշխարհային կազմակերպության մասնագետները պատրաստ են աջակցել Հայաստանին COVID19-ի դեմ պայքարում: Այս մասին Առողջապահության համաշխարհային կազմակերպության գլխավոր տնօրեն Թեդրոս Ադհանոմ Հեբրեյեսուսը գրառում է կատարել «Թվիթեր»-ի իր միկրոբլոգում ՀՀ վարչապետ Նիկոլ Փաշինյանի հետ հեռախոսազրույցից հետո: Thank you for a very good call @NikolPashinyan, Prime Minister #Armenia, and for your leadership in the national #COVID19 response. We discussed the situation in & @WHO's recommendations on easing the lockdown measures. Our experts stand ready to support in fighting COVID19 385 12:27 PM - May 6, 2020 «Շնորհակալություն ՀՀ վարչապետ Նիկոլ Փաշինյանին շատ լավ հեռախոսազրուցի և COVID19-ի արձագանքման հարցում ազգային մակարդակով առաջնորդության համար: Մենք քննարկել ենք իրավիճակը Հայաստանում և Առողջապահության համաշխարհային կազմակերպության խորհրդատվությունները սահմանափակումների ռեժիմի թուլացման հարցում: Մեր փորձագետները պատրաստ են աջակցել Հայաստանին COVID19-ի դեպ պայքարում»,-եզրափակել է կազմակերպության գլխավոր տնօրենը:

17:42 - 06 մայիսի, 2020

Առողջապահության նախարարությունում կազմակերպվել է առցանց հանդիպում միջազգային գործընկերների հետ

Առողջապահության նախարարությունը նախաձեռնել է պատմության մեջ աննախադեպ եռօրյա առցանց (վիրտուալ) առաքելություն Հայաստան, որին մասնակից են դարձել Միավորված ազգերի կազմակերպությունը, Առողջապահության համաշխարհային կազմակերպությունը և Գերմանիայի «Ռոբերտ Կոխ» ինստիտուտը: «Ռոբերտ Կոխ» հեղինակավոր ինստիտուտի հետ կապը հաստատվել է ՀՀ Նախագահի նախաձեռնությամբ: Կայացել է առաջին քննարկումը, որն անցկացրել է առողջապահության նախարարի տեղակալ Լենա Նանուշյանը, առողջապահության նախարարության և համակարգի մասնագետների մասնակցությամբ: Լենա Նանուշյանը ներկայացրել է առողջապահության նախարարության աշխատանքը COVID-19-ի դեմ պայքարում: Միջազգային գործընկերները ներկայացրել են իրենց աշխատանքը, միաժամանակ բարձր գնահատելով Հայաստանի աշխատանքն ու փորձը համավարակի տարածման դեմ պայքարում: Առցանց առաքելության ընթացքում անդրադարձ է կատարվել համավարակի դեմ տարբեր երկրներում պայքարի վարման փորձին ու հիմնական առանձնահատկություններին, ձևավորվել են կողմերին հետաքրքրող հարցերի պատասխանները: Միջազգային առաքելությունը առաջարկներ է ներկայացրել Հայաստանին, որը կօգնի երկրին ամրապնդել ձեռք բերված հաջողությունները և հետագա աշխատանքի շուրջ որոշումներ կայացնել: Փորձի փոխանակումը և խորհրդակցությունները կշարունակվեն նաև կողմերի միջև հաջորդ երկու քննարկումների ընթացքում:

16:26 - 06 մայիսի, 2020

Այսօրվա դրությամբ հաստատվել է կորոնավիրուսային հիվանդության ընդհանուր 2782 դեպք, 24 ժամում հաստատվել է 163 նոր դեպք

Մայիսի 6-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 2782 դեպք, որոնցից 1135-ն` առողջացած, 40-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 1600 պացիենտ: Ընդհանուր առմամբ, կատարվել է 26929 թեստավորում: Այսպիսով` ունենք կորոնավիրուսային հիվանդությամբ հաստատված 163 նոր դեպք և 24 առողջացած։ Նախորդ օրը արձանագրվել է մահվան 1 դեպք, երբ պացիենտի մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 7 է։

10:57 - 06 մայիսի, 2020

Աշխարհում, նաև Հայաստանում գրանցվել են կորոնավիրուսային հիվանդությամբ վարակման կրկնակի դեպքեր․ ԱՆ

Աշխարհում, նաև Հայաստանում գրանցվել են կորոնավիրուսային հիվանդությամբ վարակման կրկնակի դեպքեր: Այս մասին հայտնում է ՀՀ առողջապահության նախարարությունը։ «Այժմ միջազգային ակադեմիական մակարդակներում քննարկվում են` արդյոք կրկնակի վարակման դեպքեր են, այսինքն նորից անձը վարակվե՞լ է, թե պարզապես եղել է վիրուսի ապաակտիվացում և հետո ակտիվացում: Այսօր դեռևս այս հարցի վերջնական և միանշանակ պատասխան չկա, քանի որ վիրուսը ապաակտիվ վիճակում չի հայտնաբերվել: Սակայն գիտական հանրությունը հակված է այն մտքին, որ կարող է վիրուսի ոչ ակտիվ մասնիկների առկայություն լինել հյուսվածքներում` երբ վիրուսը չի բազմանում, սակայն ՌՆԹ-ն առկա է բջիջների մեջ, ինչը հայտնաբերվում է թեստավորման արդյունքում: Այդուհանդերձ նման դեպքերը Հայաստանում այս պահին 3-ն են: Պացիենտները որևէ գանգատ կամ ախտանիշ չունեն: Վերջիններիս մոտ վիրուսը կրկին հայտնաբերվել է հիվանդանոցից դուրս գրվելուց 2 շաբաթ հետո: Նրանք մեկուսացվել են` հավանական վարակը կանխարգելելու նպատակով: Նշենք, որ Հարավային Կորեայի գիտնականներն էին եկել այն եզրակացության, որ նման դեպքերը ոչ թե կրկնակի վարակում է, այլ վիրուսի մասնիկների պահպանում բերանի խոռոչի, կոկորդի հյուսվածքներում, ինչը հայտնաբերվում է ՊՇՌ թեստավորմամբ: Դեռևս այս հարցի վերջնական և ստույգ պատասխան չկա: Ուստի, պետք է շարունակել պահպանել անվտանգության կանոնները»,- նշվում է ԱՆ տարածած հաղորդագրության մեջ:

20:15 - 05 մայիսի, 2020

Վարչապետին զեկուցվել է առողջապահության ոլորտում կապիտալ ծախսային ծրագրերի ընթացքը

Վարչապետ Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում քննարկվել են Առողջապահության 2020 թ. կապիտալ ծախսային ծրագրերը։ Առողջապահության նախարար Արսեն Թորոսյանը զեկուցել է Մարտունու և Եղեգնաձորի բժշկական կենտրոնների կառուցման ուղղությամբ իրականացվող աշխատանքների մասին: Նշվել է, որ ներկայումս ընթացքի մեջ են 5,1-ական մլրդ դրամ գնահատվող ծրագրերի մրցույթների կազմակերպման աշխատանքները, որոնց ավարտից հետո բուն շինարարությունը կմեկնարկի: Բացի այդ, ևս 12 բժշկական կենտրոնների վերանորոգման, կառուցման և վերակառուցման ծրագրեր են իրականացվում հանրապետության տարբեր քաղաքներում և համայնքներում: Աշխատանքները գտնվում են տարբեր փուլերում: Այս օբյեկտների շինաշխատանքների ընդհանուր արժեքը գնահատվում է 18,5 մլրդ դրամ, ևս 3,8 մլրդ դրամ նախատեսվում է հատկացնել անհրաժեշտ սարքավորումներ և գույք ձեռք բերելու համար: Վարչապետ Նիկոլ Փաշինյանը կարևորել է աշխատանքների որակյալ և սահմանված ժամկետներում իրականացումը: Կառավարության ղեկավարն ընդգծել է, որ կապիտալ ծախսային ծրագրերը պետք է ապահովեն կապիտալ արդյունք և ստեղծեն նոր աշխատատեղեր, հատկապես շինարարության ոլորտում:

15:14 - 05 մայիսի, 2020

ԱԺ-ն երկրորդ ընթերցմամբ քննարկում է «Բնակչության բժշկական օգնության և սպասարկման մասին ՀՀ օրենքում փոփոխություն կատարելու վերաբերյալ» օրենքի նախագիծը

Ազգային ժողովը երկրորդ ընթերցմամբ քննարկում է կառավարության կողմից ներկայացված «Բնակչության բժշկական օգնության և սպասարկման մասին ՀՀ օրենքում փոփոխություն կատարելու մասին» օրենքի նախագիծը և կից ներկայացված օրենքի նախագծերի փաթեթը։ Նախագծի հիմնական զեկուցողը Առողջապահության նախարարի տեղակալ Անահիտ Ավանեսյանն է։ Ավանեսյանը իր խոսքում նշեց, որ արվել են մեծ փոփոխություններ և օրենքը շարադրվել է նոր խմբագրությամբ։ «Նախագծով նախատեսվում է սահմանել անձնական տվյալների՝ մասնավորապես բժշկական գաղտնիքի մշակման, փոխանցման համար իրավական կարգավորումներ։ Ներառյալ պատասխանատվություն նախատեսող դրույթներ, ապահովելով քաղաքացիների անձնական կյանքը, մասնավոր կյանքի անձեռնամխելիության և անձնական տվյալների պահպանման սահմանադրական իրավունքները»,- ասաց նախարարի տեղակալը։ Վերջինս շեշտեց, որ նախագծով առաջարկվում է ամրագրել պացիենտների իրավունքների և պարտականությունների ավելի հստակ շրջանակ՝ ապահովելով նաև նրանց իրավունքների իրացմումը։ Սահմանել իրավական հիմքեր և կարգավորումներ էլեկտրոնային առողջապահության համակարգի ներդրման և կիրառման համար։ Օենսդրորեն կարգավորել արտակարգ իրավիճակների, ռազմական կամ ահաբեկչական գործողությունների դեպքում տուժած անձանց բժշկական օգնության և սպասարկման կազմակերպման առանձնահատկությունները։ «Ճշգրտել բժշկական օգնությունների ցանկը, լրացնել օրենսդրական բացերը, սահմանել պարտադիր դատաբժշկական փորձաքննությունների դեպքերը և ձևերը։ Օրենսդրորեն կարգավորել բժշկական արտադրատեսակների շրջանառության հետ կապված հարաբերությունները, ստեղծել բժշկական սարքավորումների, արտադրատեսակների ստեղծման, ներմուծման և շրջանառության լիարժեք օրենսդրական հիմքեր։ Բավարարել բուժաշխատող- պացիենտ, բուժաշխատող- բուժաշխատող հարաբերությունները, ապահովելով էթիկայի հանձնաժողովի ստեղծումը և սահմանելով այդ հանձնաժողովի գործառույթները։ Սահմանել բժշկական օգնության տեսակները, լիազորող նորմեր տալ դրանց իրականացման համար։ Սահմանել լաբորատոր գործունեության վերաբերյալ դրույթ»,- հավելեց Ավանեսյանը։ Ավանեսյանի խոսքով, ըստ նախածի ՝ բժշկական օգնության և սպասարկում իրականացնողների համար, որպես պարտականություն ամրագրել՝ ՀՀ ոստիկանություն՝ բժշկական հաստատություն տեղափոխված պացիենտի վերաբերյալ հաղորդում ներկայացնելը , այն դեպքերում, որոնք հիմք են տալիս ենթադրելու, որ դա բռնության կամ այլ հակաօրինական գործողության արդյունք է։ «Բժշկական օգնության և սպասարկման առանձին տեսակների համար սահմանել լիցենզիայում նշված վայրից դուրս վերջիններիս իրացման հնարավորությունները»- եզրափակեց Առողջապահության նախարարի տեղակալը ։

14:23 - 05 մայիսի, 2020

Այս պահին ունենք առանձնացված մոտ 1550 մահճակալ, իսկ ամբողջ երկրի մահճակալային ֆոնդը մոտ 12.000 է․ Արսեն Թորոսյան

ՀՀ Առողջապահության նախարար Արսեն Թորոսյանը ֆեյսբուքյան իր էջում գրում է․ «Երեկ խոսեցի կորոնավիրուսային հիվանդության տարածման մի սցենարի մասին, որը բարեբախտաբար դեռ տեղի չի ունեցել։ Եվ մենք պետք է ամեն ինչ անենք, որ այն երբեք տեղի չունենա։ Նկարում այդ սցենարի հաշվարկներն են։ Դեպքերի ընդհանուր թիվ՝ 524.032, որից ծանր՝ 26.202։ Պահանջվող մահճակալների թիվ պիկի ժամանակ՝ 12.445։ Հիշեցնեմ, որ մենք այս պահին ունենք առանձնացված մոտ 1550 մահճակալ, իսկ ամբողջ երկրի մահճակալային ֆոնդը մոտ 12.000 է»։

11:57 - 05 մայիսի, 2020

Այսօրվա դրությամբ հաստատվել է կորոնավիրուսային հիվանդության ընդհանուր 2619 դեպք, ունենք հաստատված 112 նոր դեպք

Մայիսի 5-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 2619 դեպք, որոնցից 1111-ն` առողջացած, 40-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 1462 պացիենտ: Ընդհանուր առմամբ, կատարվել է 25846 թեստավորում: Այսպիսով` ունենք կորոնավիրուսային հիվանդությամբ հաստատված 112 նոր դեպք և 40 առողջացած։ Մահվան դեպքի վերաբերյալ հայտնում ենք, որ պացիենտը եղել է 64 (կին) տարեկան և ունեցել է ուղեկցող խրոնիկական հիվանդություններ: Նախորդ օրը արձանագրվել է մահվան ևս 2 դեպք, երբ պացիենտի մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 6 է։

10:59 - 05 մայիսի, 2020

Իտալիայում գործող սահմանափակումների մեղմացումից հետո մեր շարժական մամոգրաֆը վերջապես շարժվեց դեպի Հայաստան․ Արսեն Թորոսյան

Առողջապահության նախարար Արսեն Թորոսյանն իր ֆեյսբուքյան էջում գրում է․ «Լավ լուրեր Իտալիայից։ Իտալիայում գործող սահմանափակումների մեղմացումից հետո մեր շարժական մամոգրաֆը վերջապես շարժվեց դեպի Հայաստան։ Քանի որ այն ճանապարհի մի մասը անցնելու է ծովով, այն ամենայն հավանականությամբ Հայաստան կհասնի մոտ մեկ ամսից»։

20:30 - 04 մայիսի, 2020

Կորոնավիրուսով հիվանդների թիվը մինչեւ մայիսի վերջ կարող է հասնել 10 հազարի. Թորոսյան |armtimes.com|

armtimes.com: ՀՀ առողջապահության նախարար Արսեն Թորոսյանը, այսօր ԱԺ-ում խոսելով վերջին օրերին նոր կորոնավիրուսի բավականին բարձր ցուցանիշների մասին, հայտնեց, որ վարակի տարբեր աղբյուրներ կան, եւ մենք բոլորս պետք է մաքսիմալ զգուշ լինենք: Թորոսյանը նշեց վերջին 2 մեծ դեպքերի հետ կապված աղբյուրները. «Օրինակ՝ 34 քաղաքացիներ կարանտինից են, բուժաշխատողներ ունենք, հուղարկավորության արարողության մասնակիցներ եւ մի քանի գործող տնտեսվարող սուբյեկտների աշխատողներ»: Թորոսյանն ավելի վաղ հայտարարել էր, որ եթե կանոնները չպահպանվեն, կարող ենք ունենալ մինչեւ 500 հազար կորոնավիրուսով հիվանդներ եւ հազարավոր մահեր: Լրագրողները հետաքրքրվեցին, թե հաշվի անելով սահմանափակումների վերացումն ու վերջին օրերին հիվանդության թվի աճի նման տեմպը՝ մտավախություն կա՞, որ վերը նշված կանխատեսումը կարող է իրականություն դառնալ: «Իմ ասածը պարզապես օդում թիվ չէր, դա մոտ մեկ ամիս առաջ Առողջապահության համաշխարհային կազմակերպության գնահատումն էր Հայաստանի Հանրապետության համար՝ 500 հազար դեպք, տասնյակ հազարվոր հոսպիտալիզացիաներ եւ հազարավոր մահեր: Բարեբախտաբար, դա տեղի չի ունեցել, որովհետեւ մենք կարողացել ենք հարթեցնել կորը: Վիրուսի կորը բլուր է դառնում, բայց պետք է կարողանանք հարթեցնել»,- պատասխանեց նախարարը: Ըստ Թորսոյանի՝ եթե մեկ ամիս առաջ Հայաստանում բացվեին սրճարաններն ու այլ սննդի կետեր, իրենք չէին կարողանա ճիշտ ձեւով աշխատել, չկային գրված կանոններ: Այժմ դրանք մշակվել են պատշաճ ձեւով, եւ ոչ մեկի մոտ հարց չի կարող առաջանալ, թե ինչպես բացի իր բեզնեսը, որպեսզի աշխատողները չվարակվեն: Այդ ամենը, ըստ նրա, իրավական տեսք է ստացել, եւ չկատարողները կենթարկվեն պատասխանատվության: Առաջիկայում որքան կլինեն վարակվածները՝ նախարարը նշեց՝ միանշանակ պայմանավորված է մեզնից յուրաքանչյուրի վարքագծով: Նա հավանական թիվ նշեց, որ մայիսի վերջին գրանցված դեպքերի թիվը կարող է հասնել 10 հազարի: «Նույնիսկ, եթե շատ թիվ ունենանք, մեզ պետք է կայուն թիվ, կայուն թվի դեպքում կիմանանք՝ ինչպես աշխատել»,- ասաց նա:

15:44 - 04 մայիսի, 2020

Բուժաշխատողների շրջանում վարակի դեպքեր առաջինը ունենում ենք պաշտպանիչ միջոցներին կարևորություն չտալու պատճառով․ նախարար |aysor.am|

aysor.am: Բուժաշխատողների շրջանում կորոնավիրուսով վարակվածության դեպքերը ոչ թե պաշտպանիչ միջոցների բացակայության պատճառով են, այլ՝ դրանց անհրաժեշտ կարևորություն չտալու, ՀՀ ԱԺ առողջապահության և սոցիալական հարցերի մշտական հանձնաժողովի նիստի ժամանակ ասաց առողջապահության նախարար Արսեն Թորոսյանը։ «Բուժաշխատողների շրջանում, երբ դեպքեր ենք ունենում, ոչ թե պաշտպանիչ միջոցների իսպառ բացակայության պատճառով ենք ունենում, այլ առաջինը դրանց կարևորություն չտալու, չուզելու, չստանալու կամ չգնելու պատճառով։ Օրինակ, հիվանդանոցում չկա դիմակ, որովհետև ոչ թե շուկայում չկա, այլ հիվանդանոցը կամ ԲԿ-ն չի կարևորել այնքան, որքան պիտի կարևորեր։ Գուցե տասը հոգու համար է գնել, բայց ամբողջ անձնակազմի համար պիտի գներ», - ասաց նախարարը։ Նա նկատեց, որ անգամ պաշտպանիչ միջոցների առկայության դեպքում բժշկական անձնակազմը ոչ միշտ է դրանք կրում։ «Այդ ուղղությամբ շարունական աշխատանքներ են տարվում՝ սովորեցնելու, թե ինչպես է ճիշտ կրել, գիտակցության բարձրացման առումով, որ բժիշկները հասկանան իրենք «անպարտելի» չեն և կարող են վարակվել ու վարակել ուրիշներին թե բժիշկ, թե պացիենտ։ Ինչպես նաև որոշակի պատժիչ մեխանիզմներ՝ օգտագործելով եղած գործիքակազմի շրջանակներում։ Այդ աշխատանքները շարունակական են լինելու, քանի որ մենք բոլորս հասկանում ենք, որ այս ամեն ինչը երկար է տևելու, այսինքն՝ չի դադարելու մեր կողմից բուժաշխատողների պաշտպանվածությանն մակարդակը բարձրացնելուն ուղղված գործողությունները», - ասաց նա։

13:41 - 04 մայիսի, 2020

Այսօրվա դրությամբ հաստատվել է կորոնավիրուսային հիվանդության ընդհանուր 2507 դեպք, որոնցից 1071-ն` առողջացած

Մայիսի 4-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 2507 դեպք, որոնցից 1071-ն` առողջացած, 39-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 1393 պացիենտ: Ընդհանուր առմամբ, կատարվել է 24177 թեստավորում: Այսպիսով` ունենք կորոնավիրուսային հիվանդությամբ հաստատված 121 նոր դեպք և 36 առողջացած։ Մահվան դեպքերի վերաբերյալ Առողջապահության նախարարությունից հայտնում են, որ պացիենտները եղել են 71 (կին), 83 (տղամարդ), 66 (տղամարդ) և 79 (տղամարդ) տարեկան։ Վերջիններս ունեցել են ուղեկցող խրոնիկական հիվանդություններ:

10:58 - 04 մայիսի, 2020

Կորոնավիրուսի 2386 դեպքից 320-ը կամ մոտ 13.4%-ը արձանագրվել է բուժաշխատողների մոտ. Արսեն Թորոսյան

Քանի որ այս հարցը հաճախ է հնչում, տեղեկացնեմ, որ կորոնավիրուսային հիվանդության 2386 դեպքից 320-ը կամ մոտ 13.4%-ը արձանագրվել են բուժաշխատողների մոտ։ Այս մասին ֆեյսբուքի իր էջում գրել է ՀՀ առողջապահության նախարար Արսեն Թորոսյանը։ Նա նշել է, որ սա շատ ցավալի, սակայն, կարելի է ասել, անխուսափելի երևույթ է։ «Հավանաբար կարող եք պատկերացնել, թե ինչ դժվար է առողջապահական համակարգի համար, երբ պետք է բուժես կամ մեկուսացնես այն մարդուն, ով ինքը պետք է բուժի կորոնավիրուսային հիվանդությամբ պացիենտներին։ Եվ հաշվի առնելով հիվանդության բավականին երկար տևողությունը բուժաշխատողները շատ երկար ժամանակ չեն կարողանում աշխատել։ Բարեբախտաբար, մահվան ելքով դեպքեր բուժաշխատողների շրջանում չեն արձանագրվել՝ շնորհիվ նաև առողջապահության նախարարության այն ցուցման, որ 60-ից բարձր տարիքով և քրոնիկ հիվանդություններով բուժաշխատողները առավելագույնս մնան տանը։ Սա իհարկե կրկին բարդացնում է իրավիճակը, քանի որ բազմաթիվ բուժաշխատողներ չեն կարողանում օգնել իրենց առավել երիտասարդ ու առողջ գործընկերներին պայքարել պացիենտների կյանքի համար՝ ավելի մեծացնելով վերջիններիս ծանրաբեռնվածությունը և վտանգը, որի մեջ նրանք աշխատում են»,- գրել է Թորոսյանը։

11:52 - 03 մայիսի, 2020

Հայաստանում հաստատվել է կորոնավիրուսով վարակի ևս 113 դեպք, երկու մարդ մահացել է․ ԱՆ

Մայիսի 3-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 2386 դեպք, որոնցից 1035-ն` առողջացած, 35-ը` մահվան ելքով: Այս մասին հայտնում է ՀՀ առողջապահության նախարարության մամուլի խոսնակ Ալինա Նիկողոսյանը։Կորոնավիրուսային հիվանդությամբ այս պահին փաստացի բուժում է ստանում 1312 պացիենտ: Ընդհանուր առմամբ, կատարվել է 24177 թեստավորում: Այսպիսով` ունենք կորոնավիրուսային հիվանդությամբ հաստատված 113 նոր դեպք և 25 առողջացած։ Մահվան դեպքերի վերաբերյալ հայտնում ենք, որ պացիենտները եղել են 79 (կին) և 58 (տղամարդ) տարեկան։ Վերջիններս ունեցել են ուղեկցող խրոնիկական հիվանդություններ: Նախորդ օրը արձանագրվել է մահվան ևս 1 դեպք, երբ պացիենտի մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 4 է։

11:05 - 03 մայիսի, 2020