Ուկրաինա

Ուկրաինան գտնվում է Արևելյան Եվրոպայում։ Այն հյուսիսից և հյուսիս-արևելքից սահմանակից է Ռուսաստանին, հյուսիս արևմուտքից՝ Բելառուսին, արևմուտքից՝ Լեհաստանին, Սլովակիային և Հունգարիային, հարավ արևմուտքից՝ Մոլդովային, հարավից և հարավ-արևելքից համապատասխանաբար Սև ծովին և Ազովի ծովին։

Այն 603,628 կմ² ցուցանիշով Եվրոպային հարակից երկրների մեջ Ռուսաստանի Դաշնությունից հետո երկրորդն է իր տարածքով։ Գործող նախագահը Վլադիմիր Զելենսկին է։

Կրեմլում բացասաբար են վերաբերվում Ռուսաստանի դեմ հնարավոր պատժամիջոցներին․ Պեսկով

Կրեմլում բացասաբար են վերաբերվում արեւմտյան պատժամիջոցներին՝ ընդդեմ Պուտինի եւ նախարարների կաբինետի, հայտարարել է ՌԴ նախագահի մամուլի խոսնակ Դմիտրի Պեսկովը հայտարարել է։ Այս մասին հայտնում է «Риа новости»-ն։ Ավելի վաղ Նիդերլանդների վարչապետ Մարկ Ռյուտտեն հայտարարել էր, որ պետք է Պուտինի եւ նրա կառավարության դեմ սանկցիաներ ուղղվեն՝ Ուկրաինայում ՌԴ-ի գործողությունների պատճառով։«Բացասաբար», - հայտարարել է Պեսկովը՝ պատասխանելով հարցին, թե ինչպես է Կրեմլը վերաբերում Նիդերլանդների վարչապետի՝ Պուտինի դեմ պատժամիջոցների վերաբերյալ առաջարկին։ «Եկեք վերլուծենք դեպքերը եւ հաշվարկենք հետագա քայլերը՝ խնդիրների ի հայտ գալուն պես», - հավելել է Պեսկովը՝ պատասխանելով հարցին՝ կհաջորդի՞ արդյոք ՌԴ-ի պատասխան արձագանքը։

16:01 - 24 փետրվարի, 2022

Ուկրաինական կողմը լուրջ կորուստներ ունի․ Զելենսկի |azatutyun.am|

azatutyun.am: Ուկրաինայի նախագահ Վլադիմիր Զելենսկին այսօր ժողովրդին հղած տեսաուղերձով հայտնել է, որ Ուկրաինան խզում է դիվանագիտական հարաբերությունները Ռուսաստանի հետ։ Զելենսկին ասել է, որ ուկրաինական կողմը լուրջ կորուստներ ունի, և դոնորներին կոչ է արել արյուն հանձնել։ Ռուսաստանի ներխուժման առաջին ժամերի մասին տեղեկությունները հակասական են, մասնավորապես հաղորդվել է, որ 40 ուկրաինացի է զոհվել, ևս 10-ը վիրավորվել են։ Ուկրաինայի նախագահը հեռախոսազրույցներ է ունեցել ԱՄՆ-ի նախագահի, Գերմանիայի կանցլերի, Բրիտանիայի վարչապետի, Եվրոպական խորհրդի նախագահի հետ։ «Կոչ եմ անում անհապաղ կանգնեցնել Պուտինին, հակապուտինյան կոալիցիա կազմել և պատժամիջոցներ սահմանել։ Ուկրաինային պաշտպանական և ֆինանսական աջակցություն տրամադրել։ Փակել օդային տարածքը։ Աշխարհը պետք է ստիպի Ռուսաստանին խաղաղության գնալ», - ասել է Զելենսկին։

15:52 - 24 փետրվարի, 2022

Կիևում պայթյուններ են հնչում, Խարկովում ծանր մարտեր են, հրթիռակոծվում է Բրովարին |factor.am|

factor.am: Խարկովի մոտ ծանր մարտեր են ընթանում, զինվորականները հետ են մղել տանկային հարձակումը։ Այս մասին ճեպազրույցի ժամանակ հայտարարել է Ուկրաինայի նախագահի աշխատակազմի ղեկավարի խորհրդական Ալեքսեյ Արեստովիչը։ Ուկրաինայի զինված ուժերի գլխավոր շտաբը հայտնում է նաև, որ Խարկովի ուղղությամբ թեժ մարտեր են ընթանում։ Հակառակորդը կենդանի ուժի և տեխնիկայի կորուստներ է կրում։ Ռուսաստանը թևավոր հրթիռներով հարվածներ է հասցրել Բրովարիի ռազմական օբյեկտին։ Այս մասին էլ Facebook-ում հայտնել է Ուկրաինայի ՆԳ նախարարի տեղակալ Անտոն Գերաշչենկոն։ «Երկու թևավոր հրթիռներով հարված է հասցվել Բրովարիի մեր ռազմական օբյեկտին: Տեղեկություն Գլխավոր շտաբից»,- գրել է նա։ Զոհերի և ավերածությունների մասին տեղեկությունը ճշտվում է։ Մինչ այդ, ուկրաինական ԶԼՄ-ները հաղորդում են, որ կրկին պայթյուններ են լսվում Կիևի տարբեր հատվածներում։ Մասնավորապես, դրանք հնչում են Տրոյեշինայում։ Պայթյուն է գրանցվել նաև Կիևի կենտրոնում՝ Պոդիլում։

15:50 - 24 փետրվարի, 2022

Կիևի մարզում ռուսական զորքերը ճեղքել են պետական սահմանը

Կիևի մարզում ռուսական զորքերը ճեղքել են պետական սահմանը։ Այս մասին հայտնում են Ուկրաինայի սահմանապահ ծառայությունից։ «Հակառակորդի զինտեխնիկան մուտք է գործել Վիլչայի անցակետով»,- նշված է հաղորդագրության մեջ՝ հավելելումով, որ սահմանապահներն ուկրաինացի զինվորականների հետ միասին մարտեր են մղել։ Փետրվարի 24-ի առավոտյան ՌԴ նախագահ Վլադիմիր Պուտինը հայտարարել է հատուկ ռազմական գործողություն իրականացնելու մտադրության մասին, որի նպատակն է պաշտպանել մարդկանց, «որոնք ութ տարի շարունակ Կիևի ռեժիմի կողմից ենթարկվել են բռնությունների ու ցեղասպանության»։ Ուկրաինայի արտաքին գործերի նախարարությունը հայտարարել է, որ Պուտինը պատերազմ է սանձազերծել Ուկրաինայի դեմ՝ հարձակվելով ուկրաինական խաղաղ քաղաքների վրա։ Ուկրաինայի օդային սահմանը փակվել է, այդ երկրում ռազմական դրություն է հայտարարվել։

15:45 - 24 փետրվարի, 2022

Մենք կանգնած ենք Ուկրաինայի կողքին եւ դատապարտում ենք Ուկրաինայի հանդեպ ագրեսիան․ ՀՀ-ում ԵՄ դեսպան |aravot.am|

aravot.am: «Եվրոպական միության բոլոր կառույցները միասնական են։ Մենք կանգնած ենք Ուկրաինայի կողքին։ Մեր հայտարարությունները շատ հստակ են եւ դատապարտում են Ուկրաինայի հանդեպ ագրեսիան»,-ազգային ժողովում այսօր լրագրողների հետ ճեպազրույցում հայտարարեց ՀՀ-ում Եվրամիության դեսպան Անդրեա Վիկտորինը։ Նրա խոսքով․ «Եվրոպական պառլամենտը միասնական է աշխատում՝ ձեռք ձեռքի տված։ Մեր խորհրդակցությունների ժամանակ դա ընդգծվել է»։ Նկատառմանն ի պատասխան, որ Եվրոպան կարծես թե մենակ է թողել Ուկրաինային եւ միայն խոսքերով է սատարում, դեսպանն ընդգծեց․ «Կարդացեք մեր հայտարարությունները եւ կտեսնեք Եվրամիության հստակ դիրքորոշումը․․․մենք հավատում ենք, որ դիվանագիտության միջոցով հնարավոր կլինի հասնել․․․սա ահավոր է աշխարհի եւ Ուկրաինայի համար»։

15:43 - 24 փետրվարի, 2022

«Ռոսկոմնադզորը» ԶԼՄ-ներից պահանջել է տեղեկություն տարածել միայն պաշտոնական աղբյուրներից

«Ռոսկոմնադզորը» լրատվամիջոցներից պահանջել է տեղեկություն տարածել միայն պաշտոնական աղբյուրներից։ «Ռոսկոմնադզորը տեղեկացնում է լրատվամիջոցներին, տեղեկատվական ռեսուրսներին, որ Լուգանսկի Ժողովրդական Հանրապետությունում և Դոնեցկի Ժողովրդական Հանրապետությունում ստեղծված իրավիճակի հետ կապված հատուկ գործողության անցկացման վերաբերյալ իրենց նյութերն ու հրապարակումները պատրաստելիս պարտավոր են օգտագործել միայն ռուսական պաշտոնական աղբյուրներից ստացված տեղեկությունը և տվյալները։ Լրատվամիջոցները կարող են տուգանվել «կեղծ տեղեկություններ» տարածելու համար, իսկ այդ նյութերը կարող են արգելափակվել»,- նշված է հաղորդագրության մեջ։ Փետրվարի 24-ի առավոտյան ՌԴ նախագահ Վլադիմիր Պուտինը հայտարարել է հատուկ ռազմական գործողություն իրականացնելու մտադրության մասին, որի նպատակն է պաշտպանել մարդկանց, «որոնք ութ տարի շարունակ Կիևի ռեժիմի կողմից ենթարկվել են բռնությունների ու ցեղասպանության»։ Ուկրաինայի արտաքին գործերի նախարարությունը հայտարարել է, որ Պուտինը պատերազմ է սանձազերծել Ուկրաինայի դեմ՝ հարձակվելով ուկրաինական խաղաղ քաղաքների վրա։ Ուկրաինայի օդային սահմանը փակվել է, այդ երկրում ռազմական դրություն է հայտարարվել։

15:15 - 24 փետրվարի, 2022

ՆԱՏՕ-ի անդամ որոշ երկրներ գործարկել են դաշինքի 4-րդ հոդվածը՝ ռուս-ուկրաինական պատերազմի թեմայով խորհրդակցություն սկսելու համար

ՆԱՏՕ-ի անդամ երկրները՝ Լեհաստանը, Էստոնիան, Լատվիան եւ Լիտվան գործարկել են դաշինքի 4-րդ հոդվածը՝ Ուկրաինայի վրա Ռուսաստանի հարձակման վերաբերյալ դաշինքի ներսում խորհրդակցություններ սկսելու համար։ Հյուսիսատլանտյան դաշինքի 4-րդ հոդվածը սահմանում է, որ պայմանավորվող կողմերը միշտ խորհրդակցելու են միմյանց հետ, եթե նրանցից որևէ մեկի կարծիքով՝ պայմանավորվող կողմերից որևէ մեկի տարածքային ամբողջականությունը, քաղաքական անկախությունը կամ անվտանգությունը վտանգված է: ՆԱՏՕ-ի պաշտոնական կայքի տվյալներով՝ 4-րդ հոդվածը նախկինում կիրառվել է վեց անգամ, որոնցից հինգը՝ Թուրքիայի, մեկը՝ Լեհաստանի կողմից։

15:11 - 24 փետրվարի, 2022

Դոնեցկից դուրս եկող հայեր կան, սակայն հիմնական մասը նախընտրում է մնալ |armenpress.am|

armenpress.am: Ուկրաինայի շուրջ տեղի ունեցող իրադարձությունների ֆոնին Դոնեցկում բնակվող որոշ հայեր դուրս գալու ցանկություն են հայտնել, սակայն հիմնական մասը նախընտրում է մնալ: Այս մասին նշեց Ուկրաինայի հայերի միության Դոնեցկի մարզի ներկայացուցչության նախագահ Վահագն Մաթևոսյանը: «Տարհանման պլանն իրականում մենք պատրաստել ենք դեռ շաբաթներ առաջ: Կոնկրետ Դոնեցկի մարզից այն հայերը, որոնք դուրս գալու ցանկություն են հայտնել, գնացել են: Եղել են հայեր, որոնք ցանկացել են դուրս գալ, փոխադրամիջոց չեն ունեցել, մենք այդ հարցում աջակցել ենք: Ասեմ, որ շատ մեծ զանգված նախընտրում է մնալ Դոնեցկում, իրենց տներից չեն ցանկանում դուրս գալ»,-ասաց Վահագն Մաթևոսյանը: Նա տեղեկացրեց, որ ինչպես Ուկրաինայի տարբեր հատվածներում, Դոնեցկում նույնպես բանկերում, բանկոմատների, դեղատների մոտ հերթեր են: Մարդիկ չեն կարողանում կանխիկացնել իրենց գումարները: Հերթեր են նաև գազալցակայաններում: «Քաղաքում կրակոցների ձայներ լսվում են, զգացվում է, որ ծանր հրետանի է աշխատում, սակայն կդժվարանամ ներկայում մանրամասն տեղեկություններ հաղորդել: Միայն կասեմ, որ հայերի շրջանում վիրավորներ չկան»,-ասաց Վահագն Մաթևոսյանը:

15:06 - 24 փետրվարի, 2022

Զելենսկին Գերագույն Ռադա է ներկայացրել համընդհանուր մոբիլիզացիայի մասին օրինագիծ

Ուկրաինայի նախագահ Վլադիմիր Զելենսկին Գերագույն Ռադա է ներկայացրել համընդհանուր մոբիլիզացիայի մասին օրինագիծ։ Այս մասին, ինչպես հաղորդում է «Իզվեստիա»-ն, փետրվարի 24-ին, նշված է Ուկրաինայի խորհրդարանի կայքում։ Համապատասխան օրինագիծը փետրվարի 24-ին գրանցվել է Գերագույն ռադայում 7113 համարով, որի տեքստը և այլ մանրամասներ չեն նշվում։ Փետրվարի 24-ի առավոտյան ՌԴ նախագահ Վլադիմիր Պուտինը հայտարարել է հատուկ ռազմական գործողություն իրականացնելու մտադրության մասին, որի նպատակն է պաշտպանել մարդկանց, «որոնք ութ տարի շարունակ Կիևի ռեժիմի կողմից ենթարկվել են բռնությունների ու ցեղասպանության»։ Ուկրաինայի արտաքին գործերի նախարարությունը հայտարարել է, որ Պուտինը պատերազմ է սանձազերծել Ուկրաինայի դեմ՝ հարձակվելով ուկրաինական խաղաղ քաղաքների վրա։ Ուկրաինայի օդային սահմանը փակվել է, այդ երկրում ռազմական դրություն է հայտարարվել։

14:58 - 24 փետրվարի, 2022

Բեռլինը խոստանում է ամենակոշտ պատժամիջոցները սահմանել Մոսկվայի դեմ |factor.am|

factor.am: Բեռլինը խոստանում է ամենակոշտ պատժամիջոցները սահմանել Մոսկվայի դեմ։ DW-ի ռուսական ծառայության փոխանցմամբ՝ Գերմանիայի ԱԳ նախարար Աննալենա Բերբոկը հայտարարել է «Ռուսաստանի դեմ ամենալայնամասշտաբ պատժամիջոցների մասին»։ «Մենք պատրաստվում ենք այդ իրադարձություններին և այժմ կգործենք մեր գործընկերների ու դաշնակիցների հետ, կհամակարգենք մեր յուրաքանչյուր գործողությունը մեր ուկրաինացի գործընկերների հետո։ Այսօր ԵՄ-ի, ՆԱՏՕ-ի, G7-ի շրջանակում կհամակարգենք մեր գործողությունները։ Մենք կհամաձայնեցնենք Ռուսաստանի հանդեպ ամենամասշտաբային պատժամիջոցների փաթեթը»,- հայտարարել է Գերմանիայի արտաքին քաղաքական գերատեսչության ղեկավարը։

14:54 - 24 փետրվարի, 2022

Մոլդովան արտակարգ դրություն կմտցնի Ուկրաինայի դեմ Ռուսաստանի հարձակման պատճառով |news.am|

news.am: Մոլդովայի Անվտանգության բարձրագույն խորհուրդը որոշել է արտակարգ դրություն մտցնել երկրում՝ Ուկրաինայի դեմ Ռուսաստանի հարձակման համատեքստում։ Այս մասին տեղեկացնում է «Европейская правда»-ն։ «Այսօր առավոտյան Ռուսաստանը հարձակում է սկսել հարեւան պետության՝ Ուկրաինայի դեմ՝ խախտելով միջազգային նորմերը։ Միջազգային հանրությունը միահամուռ դատապարտում է այդ ռազմական գործողությունները։ Այս առնչությամբ ես հրավիրել եմ Անվտանգության բարձրագույն խորհրդի նիստ։ Մենք որոշել ենք, որ կառավարությունը խնդրի խորհրդարանին՝ արտակարգ դրություն հայտարարել»,- ասել է Մոլդովայի նախագահ Մայա Սանդուն Անվտանգության բարձրագույն խորհրդի նիստից հետո։ Սանդուի խոսքով՝ արտակարգ դրության հանձնաժողովն այսօր նիստ կգումարի եւ կքննարկի ճգնաժամի կառավարման հնարավորությունները։ Միեւնույն ժամանակ, Սանդուն կարգադրել է ուժեղացնել պաշտպանության նախարարության ստորաբաժանումների պարեկումը՝ հնարավոր սադրանքների կանխման նպատակով։

14:37 - 24 փետրվարի, 2022

Ռուսաստանի զինված ուժերը հրթիռային հարված չեն հասցնում քաղաքների ուղղությամբ. ՌԴ ՊՆ |1lurer.am|

1lurer.am: Ռուսաստանի զինված ուժերը հրթիռային հարված չեն հասցնում Ուկրաինայի քաղաքների ուղղությամբ: Այդ մասին հայտնել են ՌԴ պաշտպանության նախարարությունից: Ռուսաստանի ռազմական գերատեսչությունում նշել են նաև Ուկրաինայի ռազմական ենթակառուցվածքները շարքից հանելու մասին։ «Ուկրաինայի ռազմական ենթակառուցվածքները, հակաօդային պաշտպանության օբյեկտները, ռազմական օդանավակայանները և ռազմական ավիացիան բարձր ճշգրտության զենքերով հանվում են շարքից։ Ռուսական ուժերը հրթիռային, ավիացիոն կամ հրետանային հարվածներ չեն հասցնում ուկրաինական քաղաքներին»,- ասված է ՌԴ ՊՆ հայտարարության մեջ։ Ուկրաինայի սահմանապահ ծառայությունից փոխանցել են, որ ռուսական ուժերն առաջ են շարժվում ինչպես Ռուսաստանի, այնպես էլ Բելառուսի տարածքից:

14:15 - 24 փետրվարի, 2022

Մոլդովան ևս ամբողջությամբ փակում է իր օդային սահմանները |armtimes.com|

armtimes.com: Ուկրաինայում ստեղծված իրավիճակով պայմանավորված՝ Մոլդովան ևս փակում է իր օդային սահմանները՝ տեղական ժամանակով 13:00-ից սկսած (ՀՀ ժամանակով 14:00): Այս մասին հայտնել է երկրի փոխվարչապետը: Ավելի վաղ հայտնել էինք, որ Ուկրաինան այսօրվանից անորոշ ժամանակով փակում է իր երկրի օդային տարածքը քաղաքացիական ինքնաթիռների համար: Մոսկվայի բոլոր օդանավակայաններում ընդհանուր առմամբ արդեն իսկ հետաձգվել կամ չեղարկվել է ավելի քան 200 չվերթ:

14:11 - 24 փետրվարի, 2022

Պուտինը պատասխանատու է պատերազմը Եվրոպա վերադարձնելու համար․ ԵՄ ներկայացուցիչ

Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Ժոզեֆ Բորելը եւ Եվրահանձնաժողովի ղեկավար Ուրսուլա ֆոն դեր Լեյենը այսօր Բրյուսելում հանդես են եկել համատեղ հայտարարությամբ՝ անդրադառնալով Ուկրաինայի վրա ՌԴ հարձակմանը։ ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեֆ Բորելը ասել է, որ Ռուսաստանի հարձակումն Ուկրաինայի վրա դասվել է վերջին 80 տարվա ընթացքում Եվրոպայի ամենածանր ժամերի շարքին․ «Սրանք Եվրոպայի համար ամենածանր ժամերից են Երկրորդ համաշխարհային պատերազմի ավարտից հետո», - լրագրողների հետ զրույցում նշել է նա: Բորելը խոստացել է հրատապ օգնություն ցուցաբերել Ուկրաինային, ինչպես նաև աջակցել մարդկանց, այդ թվում՝ ԵՄ անձնակազմի տարհանմանը։ Խոսելով Ռուսաստանի դեմ հնարավոր պատժամիջոցների մասին՝ նա ասել է, որ 27 անդամներից բաղկացած դաշինքի պատժիչ միջոցները Ռուսաստանի դեմ լինելու են պատժամիջոցների ամենախիստ փաթեթը, որը երբևէ իրականացվել է: Եվրահանձնաժողովի ղեկավար Ուրսուլա ֆոն դեր Լեյենն էլ նշել է, որ ՌԴ նախագահ Վլադիմիր Պուտինը պատասխանատու է պատերազմը Եվրոպա վերադարձնելու համար, ինչով պայմանավորված՝ ԵՄ-ն նրան պատասխանատվության կենթարկի․ «Այս փաթեթով մենք կթիրախավորենք Ռուսաստանի տնտեսության ռազմավարական ոլորտները՝ արգելափակելով նրանց հասանելիությունը հիմնական տեխնոլոգիաներ և շուկաներ։ Մենք կթուլացնենք Ռուսաստանի տնտեսական բազան և արդիականացման կարողությունները։ Դրանից բացի, կսառեցնենք ԵՄ-ում ռուսական ակտիվները և կդադարեցնենք ռուսական բանկերի մուտքը եվրոպական ֆինանսական շուկա»,- նշել է Լեյենը։

14:11 - 24 փետրվարի, 2022

ԵԱՀԿ-ում կոչ են արել ՌԴ-ին անհապաղ դադարեցնել բոլոր ռազմական գործողությունները |factor.am|

factor.am: ԵԱՀԿ գործող նախագահ, Լեհաստանի ԱԳ նախարար Զբիգնև Ռաուն և ԵԱՀԿ գլխավոր քարտուղար Հելգա Շմիդտը դատապարտել են ՌԴ նախագահ Վլադիմիր Պուտինի կողմից Ուկրաինայում ռազմական գործողության մեկնարկի որոշումը և հանդես եկել հայտարարությամբ, ասված է կազմակերպության պաշտոնական կայքում հրապարակված հաղորդագրությունում։ «Մենք խստորեն դատապարտում ենք Ռուսաստանի ռազմական գործողությունն Ուկրաինայի դեմ։ Ուկրաինայի վրա այս հարձակումը լուրջ վտանգի տակ է դնում միլիոնավոր մարդկանց կյանքերը և հանդիսանում է միջազգային իրավունքի և Ռուսաստանի պարտավորությունների կոպիտ խախտում։ Կոչ ենք անում անհապաղ դադարեցնել բոլոր ռազմական գործողությունները»,- ասված է հայտարարությունում։

14:05 - 24 փետրվարի, 2022

Ուկրաինան խզում է դիվանագիտական հարաբերությունները Ռուսաստանի հետ

Ուկրաինան խզում է դիվանագիտական հարաբերությունները Ռուսաստանի Դաշնության հետ։ Ինչպես հայտնում է ria.ru-ն, այս մասին ասել է Ուկրաինայի նախագահ Վլադիմիր Զելենսկին։

14:00 - 24 փետրվարի, 2022