Մենք ռուս խաղաղապահներին չենք քննադատում, մենք ռուս խաղաղապահների գործունեության վերաբերյալ մեր մտահոգություններն ենք բարձրաձայնում․ Փաշինյան
Մենք ռուս խաղաղապահներին չենք քննադատում, մենք ռուս խաղաղապահների գործունեության վերաբերյալ մեր մտահոգություններն ենք բարձրաձայնում։ Այս մասին ասաց ՀՀ վարչապետ Նիկոլ Փաշինյանը մամուլի ասուլիսի ժամանակ։
«Ես անընդհատ մեր ռուս գործընկերների ուշադրությունն եմ հրավիրել, որ Ադրբեջանում սկսվել է ռուս խաղաղապահների վարկաբեկման պետական արշավ։ Եվ ինձ համար ակնհայտ է եղել, որ իրադարձությունները զարգանում են այդ ուղղությամբ»,- ասաց ՀՀ վարչապետը։
Նա նշեց, որ պետք է հասկանալ՝ ռուս խաղաղապահներն ինչ գործառույթ են իրականացնում։ Փաշինյանը հիշեցրեց, որ եռակողմ հայտարարության մեջ գրված է, որ Լաչինի միջանցքը մնում է ռուսաստանցի խաղաղապահների վերահսկողության ներքո․ «Այնտեղ գրված չէ, որ երբ Լաչինի միջանցքը խաղաղապահների վերահսկողության ներքո չէ, ՀՀ-ն պետք է այդ Լաչինի միջանցքի վրա վերահսկողություն ապահովի ու հանձնի ռուս խաղաղապահներին։ Այնտեղ պարտավորություններ ունեն ՌԴ-ն ու Ադրբեջանի Հանրապետությունը»։
Նա նշեց, որ ոչ մեկը չի վիճարկում, որ ռուս խաղաղապահներն են հենց այսօր ապահովում ԼՂ ժողովրդի անվտանգությունը, սակայն նաև հիշեցրեց Փառուխի ու Խծաբերդի դեպքերը, ու որ ոչ մի արձագանք չի եղել։ Փաշինյանը նշեց, որ Լաչինի միջանցքում ռազմական գործողությունների հետ կապ չունեցող մարդիկ են գերեվարվել Ադրբեջանի կողմից, երբ միջանցքը ռուս խաղաղապահների վերահսկողության ներքո է եղել։
«Մենք այս հարցերով զբաղվում ենք։ Ես էդ հարցերը ոչ թե ՌԴ խաղաղապահ զորախմբի հրամանատարի հետ եմ քննարկում, այլ ՌԴ խաղաղապահ զորախմբի հրամանատարի գերագույն գլխավոր հրամանատարի հետ եմ քննարկում, և դա է ճիշտ ֆորմատը»,- եզրափակեց նա։
14:28 - 10 հունվարի, 2023