Նիկոլ Փաշինյանը գործադիրի նիստի ժամանակ նշեց, որ Կառավարության չզեկուցվող հարցերի փաթեթում ներառված է ԼՂ-ին լրացուցիչ 4 միլիարդ դրամի աջակցություն ցուցաբերելու հարցը։ Նրա խոսքով՝ ԼՂ ժողովրդին անհրաժեշտ հումանիտար, սոցիալ-հոգեբանական աջակցություն ցուցաբերելը բացարձակ անհրաժեշտություն է։
«Հումանիտար ճգնաժամի միջազգային հանրահռչակումը նույնպես մեր ամենօրյա աշխատանքի մասը պետք է դառնա։ Գործընկեր պետությունները, միջզագային կազմակերպությունները պիտի մանրամասնորեն տեղյակ լինեն հաստատված հումանիտար ճգնաժամի և իրավիճակի վատթարացման մասին»,- նշեց Փաշինյանը։
ՀՀ վարչապետը ևս մեկ անգամ ընդգծեց, որ Լաչինի միջանցքի փակումը 2020թ․ նոյեմբերի 9-ի եռակողմ հայտարարության 6-րդ կետի կոպիտ խախտում է․ «Այս կետով պարտավորություն են կրում եռակողմ հայտարարության կողմերից երկուսը՝ Ադրբեջանի Հանրապետությունը և Ռուսաստանի Դաշնությունը։ Ադրբեջանը երաշխավորում է Լաչինի միջանցքով քաղաքացիների, տրանսպորտային միջոցների և բեռների երթևեկության անվտանոգությունը, իսկ ՌԴ խաղաղապահ զորախումբը վերահսկողության տակ է պահում Լաչինի միջանցքը»։
Փաշինյանի խոսքով՝ միջազգային հարթակներում Ադրբեջանի կողմից շրջանառվող դրույթը, թե Լաչինի միջանցքը բաց է երթևեկության համար, սին է և իրականության հետ որևէ կապ չունի․ «Լաչինի միջանցքը փակվել Ադրբեջանի կողմից, և սա նրա միջազգային պարտավորության կոպտագույն խախտում է։ Եթե նույնիսկ հիմնվենք Ադրբեջանի պրոպագանդիստական վարկածի վրա, թե Լաչինի միջանցքը փակել են էկոակտիվիստները, 2020թ․ նոյեմբերի 9-ի եռակողմ հայտարարության 6-րդ կետով Լաչինի միջանցքով քաղաքացիների, տրանսպորտային միջոցների և բեռների անվտանգ երթևեկություն ապահովելը Ադրբեջանի ուղիղ պարտավորությունն է։ Այս պայմաններում իրավիճակի հստակ պարզաբանմամբ պետք է հանդես գան ԼՂ-ում ՌԴ խաղաղապահ զորախումբը և ՌԴ-ն, որը անվտանգային կոնկրետ պարտավորություններ է ստանձնել ԼՂ ժողովրդի առաջ»
Փաշինյանը հարցեր հնչեցրեց, մասնավորապես, թե որն է իրադրության ՌԴ գնահատականը, որն է Լաչինի միջանցքով երթևեկությունը վերականգնելու նրա պլանն ու ճանապարհային քարտեզը․ «Սրանք հարցեր են, որոնց պատասխանները ՀՀ ու ԼՂ հանրությունը սպասում է ՌԴ-ից, որը հիշեցնեմ՝ նաև ՄԱԿ-ի անվտանգության խորհրդի մշտական անդամ է։ Եթե ՌԴ-ն օբյեկտիվ կամ սուբյեկտիվ պատճառներով չի կարողանում ապահովել կայունությունն ու անվտանգությունը ԼՂ-ում, կարծում եմ՝ ինքը պետք է քննարկում կազմակերպի ՄԱԿ-ի ԱԽ-ում և ԼՂ-ում ՌԴ խաղաղապահ զորախմբին ՄԱԿ ԱԽ-ի մանդատով օժտելու կամ ԼՂ լրացուցիչ բազմազգ խաղաղապահ ուղարկելու հարց բարձրացնի։ Նման հարցադրում ծագում է նաև այն պատճառով, որ Լաչինի միջանցքի փակումը Ադրբեջանի կողմից ԼՂ-ում ՌԴ խաղաղապահ զորախմբի պատասխանատվության գոտի ներխուժելու առաջին դեպքը չէ։ Սրան նախորդել են Փառուխի և Խծաբերդի իրադրություննները, որի հետևանքով ՀՀ շուրջ երեք տասնյակ քաղաքացիներ շարունակում են մնալ գերեվարված»։
Փաշինյանն ընդգծեց, որ բոլոր նախանշանները կան պնդելու, որ Ադրբեջանը հերթական ռազմական սադրանք է պատրաստում, այդ թվում ԼՂ-ում, և իրադրության զարգացումները հրատապ պատասխանի սպասող հարցեր են բարձրացնում՝ ԼՂ-ում խաղաղապահ զորախմբի գործունեության հետ կապված։
«ՀՀ-ն ԼՂ-ում ՌԴ խաղաղապահ զորախմբի ներկայության համոզված կողմնակիցն է և ջատագովը, բայց մեզ համար անընդունելի է ԼՂ հայաթափման լուռ վկա դառնալու ՌԴ խաղաղապահ զորախմբի ավելի ու ավելի տեսանելի դարձող գործելակերպը։ Ամեն դեպքում մենք այս հարցերի պարզաբանման շուրջ պիտի սերտորեն աշխատենք ՌԴ և մյուս միջազգային գործընկերների հետ իրադրության հետագա սրում թույլ չտալու և համապարփակ կագրավորումների հասնելու համար»,- նշեց Փաշինյանը։
Նա նաև վերահաստատեց Ադրբեջանի հետ խաղաղության պայմանագիր ստորագրելու, սահմանների դելիմիտացիան ավարտին հասցնելու, տարածաշրջանային կոմունիկացիաները բացելու Հայաստանի պատրաստակամությունն ու հաստատակամությունը։
comment.count (0)