Ուկրաինա

Ուկրաինայում քաղաքացիական պատերազմը հեռու է ավարտից․ Սերգեյ Լավրով |tert.am|

tert.am: Ռուսաստանի Դաշնության արտգործնախարար Սերգեյ Լավրովը կարծում է, որ Ուկրաինայում քաղաքացիական պատերազմը հեռու է ավարտից։ Այս մասին նա հայտարարել է «ՌԻԱ Նովոստի»-ին տված հարցազրույցում։ «Ուկրաինայում արդեն ութերորդ տարին շարունակվող քաղաքացիական պատերազմը հեռու է ավարտվելուց։ Երկրի իշխանությունները չեն պատրաստվում քայլեր ձեռնարկել Դոնբասում հակամարտությունը լուծելու համար՝ Մինսկի անվիճելի միջոցառումների փաթեթի հիման վրա»,-ասել է Լավրովը: Նա նշել է, որ Կիևի ռազմատենչ նկրտումներին աջակցում են ԱՄՆ-ն և ՆԱՏՕ-ի այլ երկրներ՝ զենք մատակարարելով Ուկրաինային և այնտեղ ուղարկելով իրենց ռազմական մասնագետներին։ Նախարարը նաև ընդգծել է, որ ՆԱՏՕ-ի անդամ երկրները համակարգված կերպով Ուկրաինան վերածում են Ռուսաստանի դեմ ռազմական հենակետի, որտեղ կառուցում են իրենց բազաները և օգտագործում են նրա տարածքը զորավարժություններ անցկացնելու համար։

17:45 - 31 դեկտեմբերի, 2021

Պուտինն ու Բայդենը քննարկել են Եվրոպայում լարվածության թուլացումը և սպասվող բանակցությունները |1lurer.am|

1lurer.am: Դեկտեմբերի 30-ին Ռուսաստանի նախագահ Վլադիմիր Պուտինը հեռախոսազրույց է ունեցել ԱՄՆ նախագահ Ջո Բայդենի հետ: Կրեմլի մամուլի ծառայությունից հայտնել են, որ զրույցի առանցքային հարցերը եղել են «Ռուսաստանի անվտանգության ապահովման իրավական երաշխիքների տրամադրման վերաբերյալ սպասվող բանակցությունները»: «ՌԴ նախագահն ընդգծել է, որ համատեղ աշխատանքի արդյունքը պետք է դառնան ամուր իրավական երաշխիքները, որոնք կբացառեն ՆԱՏՕ-ի ընդլայնումը դեպի արևելք և սպառնալիք ներկայացնող սպառազինության տեղակայումը ռուսական սահմանների անմիջական հարևանությամբ»,- ասված է հաղորդագրության մեջ: Նախագահները պատրաստակամություն են հայտնել «նշված հարցերի ուղղությամբ լուրջ և բովանդակալից երկխոսություն ծավալել», շուտափույթ հասնել հստակ արդյունքների: Ըստ Կրեմլի հաղորդագրության՝ Բայդենը վստահեցրել է, որ ԱՄՆ-ը Ուկրաինայի տարածքում հարվածային հարձակողական զինատեսակներ տեղակայելու մտադրություն չունի: Հնարավոր նոր պատժամիջոցներ սահմանելու վերաբերյալ Պուտինը նշել է, որ դա «լրջագույն սխալ կլինի, որը կարող է հանգեցնել ռուս-ամերիկյան հարաբերությունների լիակատար խզմանը»։ Վերահաստատվել է, որ ԱՄՆ ներկայացուցիչների հետ Ռուսաստանի բանակցությունները տեղի կունենան հունվարի 9-10-ը Ժնևում, ՆԱՏՕ-ի հետ՝ հունվարի 12-ին Բրյուսելում, ԵԱՀԿ-ի հետ՝ հունվարի 13-ին (Վիեննայում): Սպիտակ տան պաշտոնական ներկայացուցիչ Ջեն Սակին նույնպես հանդես է եկել հեռախոսազրույցի վերաբերյալ հայտարարությամբ: «Նախագահ Բայդենը Ռուսաստանին կոչ է արել թուլացնել Ուկրաինայի հետ հարաբերություններում լարվածությունը։ Նա ընդգծել է, որ Միացյալ Նահանգներն ու նրա դաշնակիցներն ու գործընկերները վճռականորեն կարձագանքեն, եթե Ռուսաստանը շարունակի ներխուժումն Ուկրաինա»,- ասել է Սակին։ Նրա խոսքով՝ Բայդենն աջակցություն է հայտնել հունվարին Ռուսաստանի հետ սպասվող բանակցություններին: ԱՄՆ նախագահը հաստատել է, որ «սպասվող երկխոսություններում էական առաջընթաց կարող է լինել միայն ապաէսկալացման, այլ ոչ թե էսկալացիայի պայմաններում»:

11:43 - 31 դեկտեմբերի, 2021

ԱՄՆ-ը Ուկրաինայի պատճառով որոշել է միջուկային ավիակիրը թողնել Միջերկրական ծովում |1lurer.am|

1lurer.am: ԱՄՆ զինվորականները որոշել են Հարրի Թրուման ատոմային ավիակիրը թողնել Միջերկրական ծովում՝ Ուկրաինայի շուրջ ստեղծված իրավիճակի պատճառով։ Այդ մասին հայտնում է Associated Press-ը՝ հղում անելով Պենտագոնի աղբյուրին։ Հրատարակության զրուցակցի խոսքով՝ ավիակիրը պետք է ԱՄՆ ռազմածովային ուժերի հինգ նավերից բաղկացած խմբի հետ մեկներ Մերձավոր Արևելք, սակայն երթուղին փոխվել է՝ Եվրոպայում «մշտական ներկայություն» ապահովելու համար: Միջուկային ավիակրի տեղաշարժը դադարեցնելու հրամանը տվել է անձամբ Պենտագոնի ղեկավար Լլոյդ Օսթինը։ Նա նշել է, որ այդ քայլի նպատակը տարածաշրջանում ԱՄՆ դաշնակիցներին ու գործընկերներին աջակցություն ցուցաբերելն է։

21:06 - 29 դեկտեմբերի, 2021

Կիևը Թբիլիսիին կոչ է անում բանտ չվերադարձնել Սաակաշվիլիին |azatutyun.am|

azatutyun.am: Պաշտոնական Կիևը Թբիլիսիին կոչ է արել բանտ չվերադարձնել Վրաստանի նախկին նախագահ, նաև Ուկրաինայի քաղաքացի Միխեիլ Սաակաշվիլիին զինվորական հոսպիտալից, որտեղ նա վերականգնվում է հացադուլից հետո։ Սաակաշվիլիին զինվորական հոսպիտալից ազատազրկման վայր տեղափոխելու երեկվա փորձերը, Ուկրաինայի արտգործնախարարության պնդմամբ, «սխալ են արվել»։ «Վրաստանի քրեակատարողական ծառայության համապատասխան որոշման մասին փաստաբանները տեղեկացված չեն եղել։ Միխեիլ Սահակաշվիլիի առողջական վիճակը թույլ չի տալիս դա անել։ Նա հետագա վերականգնման կարիք ունի»,- ասված է նախարարության կայքում տեղադրված հայտարարությունում։ Գերատեսչությունը Վրաստանի իշխանություններին հորդորում է «հարգանքով վերաբերվել Ուկրաինայի քաղաքացուն և թույլ չտալ գործողություններ, որոնք սպառնում են նրա կյանքին ու առողջությանը», հաղորդում է ՏԱՍՍ-ը։ Վրաստանում ուկրաինացի դիվանագետները շարունակում են իրավիճակը հատուկ հսկողության տակ պահել, մշտական երկխոսություն են վարում վրացական իշխանությունների և Սաակաշվիլիի փաստաբանների հետ: Չորեքշաբթի օրը Վրաստանում Ուկրաինայի հյուպատոսը կայցելի Սաակաշվիլիին, ասվում է հայտարարության մեջ։

13:35 - 29 դեկտեմբերի, 2021

ԱՄՆ-ը կօգնի Ուկրաինային՝ ամրապնդել Ռուսաստանի և Բելառուսի հետ սահմանները |1lurer.am|

1lurer.am: ԱՄՆ-ը կֆինանսավորի Ռուսաստանի և Բելառուսի հետ Ուկրաինայի սահմանների ամրապնդման նախագծերը: Այս մասին հայտնել են Ուկրաինայի սահմանապահ ծառայությունից: Հայտարարության մեջ ասվում է, որ 20 մլն դոլար արժողությամբ նախագծերը ներառում են տեսագրության համակարգերի և անօդաչու թռչող սարքերի, ինչպես նաև սահմանապահների համար անհատական պաշտպանության միջոցների գնում:

18:21 - 28 դեկտեմբերի, 2021

Հայաստանի տարածքում կան փակ և դժվարանցանելի ավտոճանապարհներ

Արտակարգ իրավիճակների նախարարությունը տեղեկացնում է, որ Հայաստանի տարածքում կան փակ և դժվարանցանելի ավտոճանապարհներ։ Փակ է Արագածոտնի մարզում Ամբերդ ամրոցից դեպի Քարի լիճ տանող ավտոճանապարհը։ Վարդենյաց լեռնանցքը (առկա է մերկասառույց) դժվարանցանելի է կցորդիչով բեռնատարների համար (անհրաժեշտ է կիրառել անվաշղթաներ)։ Շիրակի մարզի Գյումրի-Բավրա, Սյունիքի մարզի Վերին Խոտանան-Աղվանի-Տաթև ավտոճանապարհներին, «Մեղրու սար» կոչվող հատվածին և Սիսիան-«Զանգեր» ճանապարհահատվածին տեղ-տեղ առկա է մերկասառույց։ Շիրակի մարզի Աշոցքի տարածաշրջանում մառախուղ է։ Լարսի մասին Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար, բացառությամբ բեռնատարների։ Վարորդներին խորհուրդ է տրվում երթևեկել բացառապես ձմեռային անվադողերով։

10:50 - 26 դեկտեմբերի, 2021

Ուկրաինան պատրաստակամություն է հայտնել կառուցողական կերպով զարգացնել Հայաստանի հետ երկկողմ հարաբերությունները |armenpress.am|

armenpress.am: Հայաստանն ու Ուկրաինան դեկտեմբերի 25-ին նշում են դիվանագիտական հարաբերությունների հաստատման 30-ամյակը: Այս կապակցությամբ Ուկրաինայի արտաքին գործերի նախարարությունն իր թվիթերյան էջում գրառում է կատարել՝ նշելով. «1991 թվականի այս օրը Ուկրաինայի և Հայաստանի միջև հաստատվեցին դիվանագիտական հարաբերություններ։ Մենք պատրաստ ենք կառուցողական կերպով զարգացնել երկկողմ հարաբերությունները՝ մեր փոխշահավետ համագործակցությունն էլ ավելի ամրապնդելու համար»։

15:32 - 25 դեկտեմբերի, 2021

Ուկրաինայի ԱԳՆ-ն հայտարարել է, որ Կիևը չի պատրաստվում ռազմական գործողությունների Դոնբասում |armenpress.am|

armenpress.am: Ուկրաինան չի պատրաստվում ռազմական գործողությունների երկրի արևելքում: Այս մասին դեկտեմբերի 23-ին հայտարարել է հանրապետության արտաքին գործերի նախարարության խոսնակ Օլեգ Նիկոլենկոն: Այս մասին հայտնում է ՏԱՍՍ-ը: «Ռուսաստանի նախագահ Վլադիմիր Պուտինի հայտարարությունը՝ Ուկրաինայի կողմից Դոնբասում «ռազմական գործողության» նախապատրաստման մասին, չի համապատասխանում իրականությանը։ «Նորմանդական ձևաչափը» ցույց է տալիս, որ Ուկրաինան կողմ է քաղաքական-դիվանագիտական ճանապարհով զինված հակամարտությունը լուծելուն»,- ասվում է մեկնաբանության մեջ։ Նիկալենկոյի խոսքով՝ Ուկրաինայի նախագահի գրասենյակի ղեկավար Անդրեյ Երմակը և հարնապետության պատվիրակությունը՝ Դոմբասում կարգավորման կոնտակտային խմբում, կատարել են հսկայական աշխատանք՝ երեկոյան հրադադարի հասնելու համար: ԱԳՆ-ն նաև կոչ է արել Ռուսաստանին կենտրոնանալ հրադադարի մասին պայմանավորվածությունների կատարման և Ուկրաինայի արևելքում միջազգային զինված հակամարտության դադարեցման վրա։ «Դոնեցկի և Լուգանսկի շրջանների սահմանազատման գծի երկու կողմերում գտնվող մարդիկ արժանի են խաղաղության և հանգստության, հատկապես ամանորյա տոների նախաշեմին»,- ասել է Նիկոլենկոն։

20:58 - 23 դեկտեմբերի, 2021

Պետք է բացառենք Ուկրաինայի անդամակցումը ՆԱՏՕ-ին. ՌԴ ԱԳՆ |tert.am|

tert.am: Ռուսաստանի փոխարտգործնախարար Սերգեյ Ռյաբկովը Международная жизнь ամսագրին տված հարցազրույցում խոսել է այն նպատակների ու խնդիրների մասին, որոնց առջև կանգնած են ռուս բանակցողները անվտանգության երաշխիքների վերաբերյալ խորհրդակցությունների ժամանակ։«Մենք պետք է վերջ դնենք ՆԱՏՕ-ի, նատօական ենթակառուցվածքների, նատօական կարողությունների առաջխաղացմանն դեպի արևելք: Մենք պետք է բացառենք Ուկրաինայի անդամակցումը ՆԱՏՕ-ին: Մենք պետք է երաշխավորենք մեր անվտանգությունը գոնե այն պարամետրերով և այն սահմաններով, որոնք ունեինք 1997 թվականին Ռուսաստան-ՆԱՏՕ հիմնադիր ակտի կնքման ժամանակ... Պարզապես ուզում եմ ընդգծել՝ ամերիկյան կողմը տեղյակ է մեր առաջնահերթություններին, մեր նախասիրություններին։ ԱՄՆ նախագահի ազգային անվտանգության գծով օգնական Ջեյք Սալիվանը կապի մեջ է Մոսկվայում բարձրաստիճան պաշտոնյաների հետ»,- ասել է Ռյաբկովը։Նրա խոսքով, վերջերս մի քանի շատ կարևոր, նշանակալից հեռախոսազրույցներ են եղել Ռուսաստանի նախագահի օգնական Յուրի Ուշակովի և Սալիվանի միջև։

13:58 - 23 դեկտեմբերի, 2021

Ներկայումս ռուսական զորքը չի պատրաստվում ներխուժել Ուկրաինա. ԵՄ-ում Ռուսատանի դեսպան |azatutyun.am|

azatutyun.am: Ռուսաստանը ռազմական ներխուժում չի նախապատրաստում Ուկրաինա, դեկտեմբերի 23-ին ասել է Եվրամիությունում Ռուսաստանի դեսպան Վլադիմիր Չիժովը: «Ռուսաստանը ոչ մի երկրի դեմ հարձակում չի ծրագրում: Ես կարող եմ ձեզ վստահեցնել, որ ներկայումս ռուսական զորքը չի պատրաստվում ներխուժել Ուկրաինա»,- ասել է Չիժովը գերմանական Die Welt թերթին տված հարցազրույցում: Արևմուտքը պնդում է, որ ռուսական կողմը մոտ 100 հազարանոց զորք է կուտակել Արևելյան Ուկրաինայի սահմանի մոտ՝ անհանգստություն առաջացնելով Ուկրաինայի, ՆԱՏՕ-ի և ԱՄՆ-ի և նրա եվրոպացի գործընկերների մոտ: Մոսկվան նախկինում հերքել էր զորքերի կուտակման վերաբերյալ Արևմուտքի մտահոգությունները՝ ասելով, որ ազատ է ուժեր տեղակայելու ցանկացած վայրում, որտեղ անհրաժեշտ է իր տարածքում: Ավելի վաղ՝ դեկտեմբերի 22-ին Մոսկվայում, Ռուսաստանի ԱԳ նախարար Սերգեյ Լավրովը հայտարարել էր, որ հաջորդ տարվա սկզբին ռուս և ամերիկացի բանակցողները կքննարկեն Մոսկվայի անվտանգության առաջարկները, որոնք ներառում են դեպի արևելք ՆԱՏՕ-ի ընդլայնման դադարեցման և Արևելյան Եվրոպայում դաշինքի ռազմական գործունեության սահմանափակումների պահանջը։ Ռուսաստանը հունվարին նաև առանձին բանակցություններ կսկսի ՆԱՏՕ-ի հետ, ասել է Լավրովը՝ հավելելով, որ առանձին բանակցություններ կանցկացվեն նաև Եվրոպայի անվտանգության և համագործակցության կազմակերպության (ԵԱՀԿ) գլխավորությամբ։

11:34 - 23 դեկտեմբերի, 2021

Գերմանիան մտահոգված է Ուկրաինայի շուրջ իրադրությամբ |armenpress.am|

armenpress.am: Գերմանիան խիստ մտահոգ է Ուկրաինայի շուրջ ստեղծված իրադրությամբ: Այս մասին Բեռլինում հրավիրված մամուլի ասուլիսի ժամանակ ասել է Գերմանիայի արտգործնախարար Աննալենա Բերբոկը: «Ես խիստ անհանգստացած եմ, սակայն դա նշանակում է, որ պետք է օգտագործել դեպի երկխոսություն շարժվելու յուրաքանչյուր միլիմետրը»,- ասել է նա: Բերբոլը կարևորել է «նորմանդյան ձևաչափով» բանակցային սեղանին վերադառնալը՝ օգտագործելով շփումները Ռուսաստան-ՆԱՏՕ խորհրդի շրջանակում, ինչը թույլ կտա խուսափել հետագա լարումից:

19:19 - 22 դեկտեմբերի, 2021

Վաշինգտոնը «կեղծ և սադրիչ հռետորաբանություն» է որակում Շոյգուի հայտարարությունները |azatutyun.am|

azatutyun.am: Միացյալ Նահանգները Ռուսաստանին կոչ է արել դադարեցնել «կեղծ և սադրիչ հռետորաբանությունը»՝ Ուկրաինայում իրավիճակի վերաբերյալ Սերգեյ Շոյգուի հայտարարություններից հետո։ Երեքշաբթի օրը Ռուսաստանի պաշտպանության նախարարն իր գլխավորած գերատեսչության կոլեգիայի նիստում պնդել է, որ Դոնեցկի մարզում ամերիկացիները կրակային դիրքեր են տեղակայում բնակելի շենքերում և սոցիալական նշանակության օբյեկտներում ու նախապատրաստում են արմատական զինված խմբավորումներին ակտիվ ռազմական գործողությունների համար: «Մենք կոչ ենք անում Ռուսաստանին դադարեցնել կեղծ, սադրիչ հռետորաբանությունը և արդյունավետ քայլեր ձեռնարկել լարվածությունը թուլացնելու համար՝ քննարկումների դրական մթնոլորտ ստեղծելով», - հայտարարել է ԱՄՆ Պետդեպարտամենտի խոսնակ Նեդ Փրայսը: ՌԴ ՊՆ կոլեգիայի ընդլայնված նիստում ասվել է նաև, թե Ռուսաստանը պետք է շարունակի կատարելագործել և ուժեղացնել իր զինված ուժերը, քանի որ չի կարելի վստահել նույնիսկ Արևմուտքի օրինականորեն ձևակերպված անվտանգության երաշխիքներին։ Սերգեյ Շոյգուն իր զեկույցում նշել է երկրի արևմտյան սահմանների մոտ իրավիճակի սրման մի քանի օրինակ, այդ թվում հայտարարել է, որ Դոնեցկի մարզում մասնավոր ռազմական ընկերություններ են հայտնաբերվել:

11:57 - 22 դեկտեմբերի, 2021

Զելենսկին հայտարարել է, որ Կիևը պատրաստ է Մոսկվայի հետ երկխոսության ցանկացած ձևաչափով |armenpress.am|

armenpress.am: Ուկրաինան պատրաստ է Ռուսաստանի հետ երկխոսության ցանկացած ձևաչափով, ինչպես միջնորդների ներգրավմամբ, այնպես էլ ուղղակիորեն Ռուսաստանի Դաշնության ղեկավարության հետ։ Ինչպես տեղեկացնում է ՏԱՍՍ-ը, այս մասին հայտնել է Ուկրաինայի նախագահ Վլադիմիր Զելենսկին լրագրողներին: «Մենք պատրաստ ենք հանդիպել Ռուսաստանի Դաշնության հետ: Մենք դրանից չենք վախենում, մենք պատրաստ ենք ցանկացած ձևաչափով՝ ինչպես ցանկացած գործընկերների հետ: Մենք պատրաստ ենք նաև ուղիղ երկխոսության», - ասել է Զելենսկին՝ անդրադառնալով ՌԴ նախագահ Վլադիմիր Պուտինի հետ բանակցությունների պատրաստակամության մասին հարցին։ Զելենսկու խոսքով՝ Ռուսաստանի Դաշնության նախագահի հետ հնարավոր հանդիպման օրակարգը համաձայնեցվում է, և անհրաժեշտության դեպքում նա պատրաստ է անձամբ զանգահարել Պուտինին՝ համաձայնեցնելու բանակցությունների թեմաները։ «Ես կարծում եմ, որ մենք պետք է ամեն ինչ անենք հանդիպման տարբեր ձևաչափեր ստեղծելու համար»,- ասել է Զելենսկին: ՌԴ նախագահի մամուլի քարտուղար Դմիտրի Պեսկովը հայտնել է, որ Մոսկվայի և Կիևի միջև ամենաբարձր մակարդակով շփումների հեռանկարը դեռևս տեսանելի չէ, քանի որ նախկին համաձայնագրերի ձևերն ու կարգավիճակը չեն փոխվում։ Միաժամանակ նա հիշեցրել է Պուտինի պատրաստակամությունը նման երկխոսության՝ համապատասխան օրակարգի առկայության դեպքում, ինչը բազմիցս ընդգծվել է։

22:12 - 21 դեկտեմբերի, 2021

ՆԱՏՕ-ն պետք է հասկանա, որ Ուկրաինայի անդամակցության շնորհիվ դաշինքը ուժեղանալու է. Զելենսկի |azatutyun.am|

azatutyun.am: Այսօր Արևմտյան Ուկրաինայում գտնվող Գուտա ամառանոցային քաղաքում կայացել է Լեհաստանի, Լիտվայի և Ուկրաինայի նախագահների «Լյուբլինյան եռանկյունի» կոչվող ձևաչափում կազմակերպված առաջին հանդիպումը։ Ուկրաինական աղբյուրների փոխանցմամբ` եռակողմ բանակցությունների գլխավոր թեման Ուկրաինայի սահմանների մոտ ռուսական զորքերի կուտակումն էր և ՆԱՏՕ-ի ընդլայնումը դեպի արևելք։ «Ուկրաինան և Ուկրաինայի նման մյուս երկրները ՆԱՏՕ-ին կանդամակցեն այն ժամանակ, երբ ՆԱՏՕ-ում հասկանան, որ այդ քայլը ոչ թե այդ պետություններին է ուժեղացնում, այլ դաշինքը», - բանակցությունների ավարտին հայտարարում էր Ուկրաինայի նախագահ Վլադիմիր Զելենսկին։ Լեհաստանի նախագահի խոսքով` Արևելյան Եվրոպայի երկրները ակտիվորեն զբաղվում են Ուկրաինայի սահմանների երկայնքով ռուսական զորքերի կուտակման հարցով։ «Ցանկանում եմ նշել, որ մենք այդ ուղղությամբ ակտիվորեն աշխատում ենք։ Ես համոզված եմ, որ մեր քաղաքականությունն այս ուղղությամբ կարող է անվտանգությանը միտված լուրջ հարթակ ստեղծել։ Այդպիսով մենք կարող ենք ռուսական ագրեսիայից պաշտպանել ոչ միայն ՆԱՏՕ-ի անդամ պետությունները, այլև Ուկրաինան։ Մենք, սակայն, պետք է կանխարգելիչ քայլեր ձեռնարկենք։ Մենք պետք է պահանջենք, որ Ռուսաստանը լուրջ հետքայլ կատարի», - հայտարարում էր Լեհաստանի նախագահ Անջեյ Դուդան։

09:39 - 21 դեկտեմբերի, 2021

Մեծ Բրիտանիայի պաշտպանության նախարարը քիչ հավանական է համարում Ուկրաինա բրիտանական զորքերի ուղարկումը |hetq.am|

hetq.am: Մեծ Բրիտանիայի պաշտպանության նախարար Բեն Ուոլեսը հայտարարել է, որ ռուսական հնարավոր ագրեսիայից պաշտպանելու նպատակով Ուկրաինայի տարածքում բրիտանական զորքերի տեղակայումը քիչ հավանական է, քանի որ Ուկրաինան ՆԱՏՕ-ի անդամ պետություն չէ։ Այդ մասին գրում է BBC-ն՝ հղում անելով Spectator ամսագրի խմբագիր Էնդրյու Նիլին Բեն Ուոլեսի տված հարցազրույցին։ Ուոլեսն ընդգծել է, որ ոչ ոք չպետք է խաբված մնա և Ուկրաինան տեղյակ է, որ Լոնդոնը չի պատրաստվում զորքեր ուղարկել։ «Այսինքն, նրանք իրենց հույսի՞ն են»,- հարցրել է լրագրողը։ Ուոլեսը, ի պատասխան, դարձյալ հիշեցրել է, որ Ուկրաինան ՆԱՏՕ-ի անդամ չէ և ընդգծել, որ Բրիտանիան ու իր դաշնակիցները ձեռնարկում են դիվանագիտական բոլոր ջանքները, որպեսզի թույլ չտան իրավիճակի սրում։ Այս տարվա նոյեմբերին Ուկրաինայի պաշտպանության նախարար Ալեքսեյ Ռեզնիկովի հետ համատեղ հայտարարության մեջ բրիտանացի նախարարն իր աջակցությունն էր հայտնել Կիևին։ «Միացյալ Թագավորությունը մեջք մեջքի կանգնած է Ուկրաինայի ժողովրդի հետ»,- նշվում էր հայտարարության մեջ։ Ավելի վաղ, Ջո Բայդենը հայտարարել էր, որ ներկայումս չի դիտարկվում Ուկրաինա ամերիկյան զորքերի ուղարկումը։ «Այդուհանդերձ, դա կախված կլինի նրանից, թե ինչի են պատրաստ գնալ ՆԱՏՕ-ի մյուս երկրները»,- հավելել էր ամերիկացի նախագահը։

17:17 - 19 դեկտեմբերի, 2021

Զելենսկին հայտարարել է սպառազինության մատակարարման հարցում ՆԱՏՕ-ի լիակատար աջակցության կարիքի մասին |1lurer.am|

1lurer.am: Ուկրաինայի նախագահ Վոլոդիմիր Զելենսկին ՆԱՏՕ-ի գլխավոր քարտուղար Ենս Ստոլտենբերգի հետ հանդիպման ավարտին հայտարարել է, որ Կիևը սպառազինության մատակարարման հարցում զգում է կառույցի լիակատար աջակցությունը, փոխանցում է Sputnik գործակալությունը: «Զենքի մատակարարման մասին պայմանագրերի հարցում ես զգում եմ գլխավոր քարտուղարի լիակատար աջակցությունը, և մենք այլ ուղիներր ենք փնտրում այդ հարցերի լուծման համար»,- ասել է Զելենսկին: Ավելի վաղ նշվել էր, որ Գերմանիայի նախկին կանցլեր Անգելա Մերկելն անձամբ էր արգելափակել ՆԱՏՕ-ի գծով Ուկրաինային զենքի մատակարարումները: Այդ առթիվ իր դժգոհությունն էր հայտնել Ուկրաինայի պաշտպանության նախարար Ալեքսեյ Ռեզնիկովը: Նա նշել է, որ Բեռլինն օգտագործել է վետոյի իրավունքը՝ դադարեցնելով ամերիկյան խոշոր տրամաչափի հրացանների և ԱԹՍ-ների դեմ պայքարող միջոցների մատակարարումները: Ավելի ուշ Գերմանիան մեղմացրել էր իր դիրքորոշումը:

19:16 - 16 դեկտեմբերի, 2021