Դիլիջան համայնք

Դիլիջանը խոշորացված համայնք է Տավուշի մարզում, ձևավորվել է 2016 թվականին։

Համայնքի կազմում միավորվել են հետևյալ համայնքները․

  • Հաղարծին ,
  • Թեղուտ,
  • Հովք,
  • Գոշ,
  • Խաչարձան,
  • Աղավնավանք      

Դիլիջանի համայնքապետի պաշտոնակատարը Դավիթ Սարգսյանն է։

Ապօրինություն Դիլիջանի մանկական երաժշտական դպրոցում․ Ոստիկանություն

Ապօրինություն Դիլիջանի մանկական երաժշտական դպրոցում․ Ոստիկանություն

Ոստիկանությունը տեղեկացնում է, որ մայիսի 12-ին Դիլիջանի բաժնում տեղեկություններ են ստացվել, որ սկսած 2016 թվականից` Դիլիջանի մանկական երաժշտական դպրոցի տնօրինությունը դպրոցի տեխնիկական ապարատում հրամանագրել է աշխատակիցների, որոնք փաստացի աշխատանքի չեն ներկայացել, սակայն նրանց անվամբ դուրս են գրվել աշխատավարձեր և յուրացվել: Նյութերի նախապատրաստման ընթացքում պարզվել է, որ Վանաձորի 65-ամյա մի բնակիչ, որը միաժամանակ աշխատում է Վանաձորի Շարա Տալյանի անվան երաժշտական դպրոցում և կամերային նվագախմբում, 2015 թվականի սեպտեմբերից մեկ դրույքով հրամանագրվել է նաև Դիլիջանի մանկական երաժշտական դպրոցում: Սակայն, այս պահին քննությանը հայտնի տվյալներով, ըստ աշխատանքային պայմանագրի` ամեն օր, ժամը 9-ից մինչև ժամը 18-ը, աշխատանքի չի ներկայացել, բայց նրա աշխատաժամանակի հաշվարկի տեղեկագրում բացակայությունները նշելու փոխարեն գրառումներ են կատարվել ներկա լինելու վերաբերյալ և 2015 թ. սեպտեմբերի մեկից մինչև 2020 թ. ապրիլ ամիսը վճարել մոտ 4 միլիոն դրամ:Առերևույթ հանցագործության դեպքի առթիվ հարուցվել է քրեական գործ:Ձեռնարկվում են միջոցառումներ` բոլոր հանգամանքները պարզելու ուղղությամբ:Նախաքննությունը շարունակվում է:
14:16 - 25 մայիսի, 2020
Առերևույթ պաշտոնեական չարաշահումներ Դիլիջանի համայնքապետարանի և «Դիլիջան ազգային պարկ» ՊՈԱԿ-ի պաշտոնատար անձանց կողմից

Առերևույթ պաշտոնեական չարաշահումներ Դիլիջանի համայնքապետարանի և «Դիլիջան ազգային պարկ» ՊՈԱԿ-ի պաշտոնատար անձանց կողմից

«hetq.am» կայքի «Ում թիրախում են հայտնվել «Դիլիջան» ազգային պարկի անտառները. Մաս 1» վերտառությամբ հրապարակման հիման վրա Տավուշի մարզի դատախազությունում իրականացվել է պետական շահերի պաշտպանության հարցադրումներով բազմածավալ ուսումնասիրություն: Այդ շրջանակներում տվյալներ են ձեռք բերվել, որ ՀՀ Դիլիջան համայնքի Պարզ Լճի փողոց 24 հասցեում հանգստի կազմակերպման և սպասարկման ծառայությունների մատուցման համալիր կառուցելու համար Դիլիջանի համայնքապետարանի կողմից մի քաղաքացու 2016թ. հուլիսի 22-ին տրվել է շինարարության թույլտվություն, որով շինարարական աշխատանքների համար սահմանվել է 12 ամիս ժամկետ: Թեև վերջինիս գործողությունը դադարել է 2017թ. հուլիսի 22-ին, սակայն շինարարության թույլտվությամբ սահմանված ժամկետը չի երկարաձգվել և շինարարության ավարտական ակտ չի տրվել:  «Քաղաքաշինության մասին» ՀՀ օրենքի 23-րդ հոդվածի համաձայն՝ սահմանված ժամկետներում կառուցապատումը չավարտվելու դեպքում, շինարարության թույլտվություն տվող մարմինը գրավոր նախազգուշացնում է կառուցապատողին շինարարության թույլտվությամբ սահմանված ժամկետը երկարաձգելու և այդ ժամկետում կառուցապատումն ավարտելու կամ սեփականության իրավունքով իրեն պատկանող քաղաքաշինական գործունեության օբյեկտն օտարելու վերաբերյալ: Նշված պահանջը չկատարելու դեպքում կառուցապատողը շինարարության թույլտվություն տվող մարմնի կողմից օրենքով սահմանված կարգով ենթարկվում է վարչական պատասխանատվության՝ շինարարության նախահաշվային արժեքի մեկ տոկոսի չափով տուգանքի: Մինչդեռ, Դիլիջանի համայնքապետարանի պաշտոնատար անձինք չեն կատարել իրենց ծառայողական պարտականությունները՝ չեն նախազգուշացրել կառուցապատողին շինարարության թույլտվությամբ սահմանված ժամկետը երկարաձգելու և այդ ժամկետում կառուցապատումն ավարտելու կամ քաղաքաշինական գործունեության օբյեկտն օտարելու վերաբերյալ, ինչի հետևանքով բացառվել է կառուցապատողին 3.204.000 դրամի չափով վարչական պատասխանատվության ենթարկելու հնարավորությունը՝ համայնքին պատճառելով նույնքան դրամի նյութական վնաս: Պարզվել է նաև, որ հողամասի կառուցապատման իրավունքի տրամադրման մասին «Դիլիջան ազգային պարկ» ՊՈԱԿ-ի և քաղաքացու միջև ավելի վաղ կնքված պայմանագրով շինարարական աշխատանքների իրականացման համար սահմանվել է կադաստրային գրանցում ստանալու օրվանից 5 տարվա ժամկետ, իսկ այդ ժամկետում շինարարական աշխատանքները չկատարելու և բիզնես-ծրագրով նախատեսված, ինչպես նաև ճարտարապետահատակագծային առաջադրանքով սահմանված պայմանները չկատարելու դեպքում պայմանագիրը համարվում է չեղյալ, և հողամասը վերադարձվում է սեփականատիրոջն առանց փոխհատուցման: Շինարարական աշխատանքները պետք է ավարտվեին մինչև 2018թ. նոյեմբերի 5-ը: Սակայն դրանք չեն ավարտվել, իսկ «Դիլիջան ազգային պարկ» ՊՈԱԿ-ի պաշտոնատար անձինք, անտեսելով այդ հնգամանքը, միջոցներ չեն ձեռնարկել պայմանագիրը չեղյալ համարելու, շուրջ 5000 ք/մ հողամասը պետությանը առանց փոխհատուցման վերադարձնելու ուղղությամբ, ինչի արդյունքում պետությունը զրկվել է նշված հողամասը լիարժեք տնօրինելու իր իրավունքից։ Նկատի ունենալով, որ ուսումնասիրությամբ ի հայտ են բերվել հանցագործությունների հատկանիշների առերևույթ առկայությունը մատնանշող բավարար տվյալներ՝ Դիլիջանի համայնքապետարանի և «Դիլիջան ազգային պարկ» ՊՈԱԿ-ի պաշտոնատար անձանց կողմից իրենց ծառայողական պարտականությունները չկատարելու արդյունքում համայնքի և պետության օրինական շահերին էական վնաս պատճառելու փաստերի առթիվ Տավուշի մարզի դատախազությունում ՀՀ քրեական օրենսգրքի 308-րդ հոդվածի 1-ին մասով  հարուցվել է քրեական գործը և ուղարկվել ՀՀ ՔԿ Տավուշի մարզային քննչական վարչություն՝ նախաքննություն կատարելու հանձնարարությամբ: Բացի այդ Տավուշի մարզի դատախազությունում նույն հոդվածի կապակցությամբ իրականացված ուսումնասիրությամբ տվյալներ են ստացվել, որ «Դիլիջան ազգային պարկ» ՊՈԱԿ-ի «Հաղարծին» տեղամասում ռեստորանային մասնաշենք և 4 քոթեջներ կառուցելու համար Դիլիջանի համայնքապետարանի կողմից 2009թ. օգոստոսի 18-ին ՍՊԸ-ին տրվել է շինարարության թույլտվություն: Պարզվել է, որ շինարարության թույլտվությամբ շինարարական աշխատանքների իրականացման համար սահմանվել է 25 ամիս ժամկետ, որի գործողությունը դադարել է 2011թ. սեպտեմբեր ամսվա ընթացքում: Ըստ ուսումնասիրության՝ այս դեպքում ևս ժամկետը չի երկարաձգվել և շինարարության ավարտական ակտ չի տրվել, մինչդեռ Դիլիջանի համայնքապետարանի պաշտոնատար անձինք չեն կատարել իրենց վերոնշյալ ծառայողական պարտականությունները: Արդյունքում հնարավոր չի դարձել կառուցապատողին  օրենքով սահմանված կարգով 747.000 դրամի չափով վարչական պատասխանատվության ենթարկել: Հաշվի առնելով, որ առերևույթ առկա են հանցագործության հատկանիշներ մատնանշող տվյալներ, որոնք առաջացնում են լրացուցիչ ստուգման անհրաժեշտություն, Տավուշի մարզի դատախազության կողմից հանձնարարվել է ոստիկանության Դիլիջանի բաժնին քրեադատավարական կարգով նախապատրաստել նյութեր և լուծել ընթացքը: «Դիլիջան ազգային պարկ»-ի մյուս տարածքներով վարձակալության հանձնված հողերի մասով ուսումնասիրությունները շարունակվում են:
12:55 - 21 մայիսի, 2020
ՀՀ տարածքում ավտոճանապարհները հիմնականում անցանելի են. դժվարանցանելի են Դիլիջանի ոլորանները

ՀՀ տարածքում ավտոճանապարհները հիմնականում անցանելի են. դժվարանցանելի են Դիլիջանի ոլորանները

Արտակարգ իրավիճակների նախարարությունը տեղեկացնում է, որ ապրիլի 24-ի ժամը 08:55-ի դրությամբ ՀՀ տարածքում ավտոճանապարհները հիմնականում անցանելի են: Արագածոտնի մարզի Ամբերդ ամրոց և Քարի լիճ տանող ավտոճանապարհները դեռ անորոշ ժամանակ փակ կլինեն: Դիլիջանի ոլորանները դժվարանցանելի են բեռնատարների համար: Ապարան-Արագած ավտոճանապարհին առկա է մերկասառույց: «Չայնիի ոլորաններ» կոչվող հատվածում բուք է: Լոռու մարզի Վանաձոր, Սպիտակ, Ստեփանավան, Տաշիր քաղաքներում, Վայոց ձորի մարզի Ջերմուկ քաղաքում, Շիրակի մարզի Արթիկ և Մարալիկ քաղաքներում, Արագածոտնի, Սյունիքի, Կոտայքի, Գեղարքունիքի մարզերում տեղում է ձյուն:  Լարսի մասինՎրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը ձնամաքրման ինտենսիվ աշխատանքներից հետո բաց է միայն բեռնատար տրանսպորտային միջոցների համար։ Միաժամանակ հայտնում ենք, որ օտարերկրացիների՝ Վրաստան մուտքն արգելող որոշումը շարունակում է ուժի մեջ մնալ։ Արգելքը չի վերաբերում բեռնափոխադրումներին։ Վարորդներին խորհուրդ է տրվում երթևեկել բացառապես ձմեռային անվադողերով:
09:12 - 24 ապրիլի, 2020
Դիլիջանի հայտնի «Կճուճ», «Լոշ», «Թավա» ռեստորանները կանգնած են փակման վտանգի առաջ. «Որոշումներ են կայացվում՝ առանց նրբությունները հաշվի առնելու» |medialab.am|

Դիլիջանի հայտնի «Կճուճ», «Լոշ», «Թավա» ռեստորանները կանգնած են փակման վտանգի առաջ. «Որոշումներ են կայացվում՝ առանց նրբությունները հաշվի առնելու» |medialab.am|

medialab.am: Դիլիջանում հայտնի և մշակույթ ձևավորած «Կճուճ», «Լոշ», «Թավա» ռեստորանների աշխատանքը խաթարվել է կորոնավիրուսով պայմանավորված երկրում և աշխարհում արտակարգ իրավիճակի պատճառով։ Սա հանգեցրել է տուրիստական նախնական ամրագրումների չեղարկման, ինչպես նաև պարտքերի կուտակման, որոնք հավաքագրվել են պասիվ սեզոնի ընթացքում։ «Այս պահին ելնելով երկրի իրավիճակից՝ մենք կանգնած ենք բազում ֆինանսական խնդիրների առջև, որը ինքնուրույն չենք կարողանում լուծել։ Մեր գործունեությունը մարզում է, իսկ մարզը ունի սեզոնայնության խնդիր։ Նոյեմբեր ամսից մեզ մոտ սկսվում է պասիվ սեզոնը, որը տևում է մինչև մարտ-ապրիլ ամիսները։ Այս պարագայում ստացվեց, որ փետրվարից արդեն իսկ մեր տուրիսատական ամրագրումները սկսեցին չեղարկվել, իսկ մարտի 16-ին հայտարարվեց արտակարգ դրություն»,- ասում է «Կճուճ», «Լոշ», «Թավա» ռեստորանների և «Հաղարծնի գաթա» նախագծի թիմի անդամ Ասյա Ավետիսյանը։ Այժմ ռեստորանի էլեկտրաէներգիան և գազը անջատել են, քանի որ կուտակվել է պարտք, ընկերությունը չի կարողանում այլևս վճարումներ կատարել․ «Մինչև ապրիլի 20-ը պետք է վճարենք հարկային պարտավորությունները, որոնք կազմում են 1 միլիոն 800․000 դրամի կարգի։ Այդ գումարի մեջ մտնում է նաև առաջին եռամսյակի շրջանառության հարկը։ Պասիվ սեզոնի արդյունքում կուտակել ենք գործընկերների պարտքացուցակ՝ մոտ 2,5 միլիոնի կարգի։ Տարածքի վարձը չենք կարողացել ամբողջությամբ տալ, իսկ մեր տված գումարով Դիլիջանի 2-3 ընտանիք է ապրում, մեր աշխատակիցներին աշխատավարձ ենք կարողացել տալ մինչև մարտի 15-ի համար, դեռ ունենք որոշակի պարտքեր, բայց դա մեր ամբողջ գումարն էր, որը կարողացել ենք տրամադրել»,- նշում է նա։ Ավետիսյանն ասում է, որ կառավարության աջակցության ծրագրերը ուսումնասիրելուց հետո ամենաօգտակարը, որ իրավիճակը հաղթահարելի կդարձնի, 3-րդ ծրագիրն էր, որին դիմել են, սակայն ստացել են բացասական պատասխան։«Պատճառը՝ ոչ բարվոք հարկային պատմություն։ Պարզաբանման մեջ ասվում է, որ մեկ- երկու օր ուշացում ենք ունեցել հարկերի վճարման հետ կապված, այդ պատճառով է մերժվել, բայց այդ ուշացումներից հետո մենք վճարել ենք բոլոր հարկերը և տույժերը ներառյալ։ Չկա սահմանված ձև՝ ինչ է նշանակում ոչ բարվոք հարկային պատմություն»,- ասում է Ավետիսյանը։ Նա ընդգծում է, որ այժմ միակ բանը, որ կարող են անել՝ առաքումներ կազմակերպելն է․  «Սակայն Դիլիջանում հիմնականում սպառումներ չենք կարողանում անել, քանի որ մեր սպառողները եղել են հիմնականում Երևանի հյուրերը, որոնք հանգստացել են Դիլիջանում, կամ զբոսաշրջիկները, իսկ այս պահին ոչ ոք չկա: Եթե չլիներ նման իրավիճակ երկրում, մենք պետք է արդեն համագործակցեինք Երևանում մեր լավ գործընկերներից մեկի հետ և ներկայացված լինեինք, սակայն այս իրավիճակի պատճառով Երևանում ապրիլի 10-ից մեր մի փոքրիկ թիմով հանդես ենք գալիս առաքումներով»։  Ավետիսյանը նշում է, որ թեպետ Երևանում շատերն ուրախացել են՝ իմանալով, որ կարող են ռեստորանների սիրված ուտեստները պատվիրել նաև Երևանում, սակայն այս իրավիճակից ելնելով ֆինանսական հնարավորությունները թույլ չեն տալիս պատվերներ կատարելու։ «Հաճախորդների արձագանքը ջերմ էր, դա մեզ շատ ոգևորեց և ուրախացրեց, սակայն եթե ֆինանսական տեսանկյունից վերցնենք՝ մեզ համար այդքան էլ շահութաբեր չէր: Հասկանում եմ՝ երկրի իրավիճակից ելնելով մարդիկ հնարավորություն չունեն պատվիրելու։ Դեռ չգիտեմ՝ ինչպես կստացվի»,- ասում է նա։ Ավետիսյանը նշում է, որ 8-րդ ծրագրով լրացրել են իրենց աշխատակիցների անունները, որպեսզի նրանք պետությունից փոխհատուցում, որևէ աջակցություն ստանան․ «Բայց այստեղ նույնպես խնդիր է առաջացել. մեր աշխատակիցների մի մասը՝ մատուցողները, մաքրուհիները, ձևակերպված են ոչ թե հիմնական պայմանագրով, այլ քաղաքացիական իրավական պայմանագրով, ստացվում է՝ նրանք չեն փոխհատուցվում, ոչ մի ձև աջակցություն չեն ստանում պետությունից»։ Շարունակությունը՝ medialab.am-ում։
23:19 - 22 ապրիլի, 2020
Դիլիջան համայնքի ղեկավարին մեղադրանք է առաջադրվել՝ առերևույթ պաշտոնեական կեղծիք կատարելու և պաշտոնեական լիազորությունները չարաշահելու համար

Դիլիջան համայնքի ղեկավարին մեղադրանք է առաջադրվել՝ առերևույթ պաշտոնեական կեղծիք կատարելու և պաշտոնեական լիազորությունները չարաշահելու համար

ՀՀ քննչական կոմիտեի Տավուշի մարզային քննչական վարչության Դիլիջանի քննչական բաժնում քննվող քրեական գործով իրականացված մեծածավալ քննչական և այլ դատավարական գործողությունների արդյունքում պարզվել են Դիլիջան համայնքի ղեկավարի կողմից թույլ տրված առերևույթ պաշտոնեական կեղծիք կատարելու և պաշտոնեական լիազորությունները չարաշահելու մի շարք հանգամանքներ:Մասնավորապես պարզվել է, որ Դիլիջան համայնքի ղեկավարը, որը 2005 թվականից մինչ օրս զբաղեցրել է հիշյալ պաշտոնը, պատասխանատու լինելով Դիլիջան քաղաքի գույքի, տարածքի և այլ նյութական միջոցների պահպանության և տնօրինման համար, շահադիտական, անձնական այլ շահագրգռվածությունից ելնելով պաշտոնեական դիրքը ծառայության շահերին հակառակ օգտագործելով, անտեսելով «Ընդերքի մասին», «Տեղական ինքնակառավարման մասին» ՀՀ օրենքների պահանջները, չունենալով ընդերքօգտագործման իրավունք տրամադրելու լիազորություն և համայնքի գույքը օտարելու իրավունք, առանց համայնքի ավագանուն առաջարկություն ներկայացնելու, 2013-2016 թվականներին արտադրական կոոպերատիվի նախագահի հետ, որն իր մտերիմն է, կնքել է պայմանագրեր, որոնց հիման վրա՝ Աղստև գետի հունի մաքրման աշխատանքներից առաջացած շուրջ 21.205 մ/խ ավազակոպճային խառնուրդն անհատույց տրամադրվել է հիշյալ կոոպերատիվին՝ պետության, համայնքի իրավունքներին ու օրինական շահերին պատճառելով էական վնաս:Այնուհետև, համայնքի ղեկավարը, 2016-2019թթ. ընկած ժամանակահատվածում, կրկին առանց համայնքի ավագանուն առաջարկություն ներկայացնելու, համայնքին պատկանող «TLB-825-RM» մակնիշի էքսկավատորը և «ՄԱԶ» մակնիշի բեռնատարը, առանց որևէ փաստաթղթային ձևակերպման, պարբերաբար, անհատույց օգտագործման համար, տրամադրել է վերոհիշյալ կոոպերատիվի նախագահին: Իսկ երբ համայնքի գույքն առանց փաստաթղթային ձևակերպման հանձնելու փաստն իրավապահ մարմինների կողմից բացահայտվել է, այն թաքցնելու համար, նախնական համաձայնության գալով արտադրական կոոպերատիվի նախագահի հետ, համայնքի ղեկավարը հետին թվով կազմել է կեղծ փաստաթուղթ՝ պայմանգիր՝ նշված տեխնիկան կոոպերատիվին վարձակալության հանձնելու վերաբերյալ:Ձեռք բերված բավարար ապացույցների համակցությամբ՝ Դիլիջան համայնքի ղեկավարին մեղադրանք է առաջադրվել՝ ՀՀ քրեական օրենսգրքի 308-րդ հոդվածի (պաշտոնեական լիազորությունները չարաշահելը) 1-ին մասով և 314-րդ հոդվածի (պաշտոնեական կեղծիք) 1-ին մասով:Նախաքննությունը շարունակվում է:Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
16:15 - 20 ապրիլի, 2020
Ապօրինություններ՝ Դիլիջանի թիվ 2 դպրոցում. պետությանը պատճառվել է 2,287,000 դրամից ավելի գումար վնաս

Ապօրինություններ՝ Դիլիջանի թիվ 2 դպրոցում. պետությանը պատճառվել է 2,287,000 դրամից ավելի գումար վնաս

Ոստիկանության Դիլիջանի բաժնում նախապատրաստվող նյութերի շրջանակում ձեռնարկված օպերատիվ-հետախուզական միջոցառումներով փաստական տվյալներ են ձեռք բերվել Դիլիջանի թիվ երկու հիմնական դպրոցում կատարված ապօրինությունների վերաբերյալ, տեղեկացնում է Ոստիկանության կայքը։ Մասնավորապես, պարզվել է, որ դպրոցի պաշտոնատար անձինք, օգտագործելով պաշտոնեական դիրքը, 2009-ից 2013 թվականների ընթացքում երեք անձի դպրոցի հնոցապան են ձևակերպել։ Նրանք աշխատանքի չեն ներկայացել, սակայն նրանց անվամբ աշխատավարձ է դուրս գրվել։ Բացի այդ, Դիլիջանի երկու բնակչուհու ձևակերպել են դպրոցի պահակ, ապա տրամադրել նախածննդյան ու հետծննդյան արձակուրդներ։ Այդ ընթացքում նրանց պարտականությունները կատարել է մեկ ուրիշը։Հիշյալ ապօրինությունների հետևանքով յուրացվել է ընդհանուր 2 միլիոն 287 հազար դրամից ավելի գումար։ Պաշտոնեական դիրքն օգտագործելով՝ խոշոր չափերի յուրացման կամ վատնման և պաշտոնեական կեղծիքի փաստերով ոստիկանության Դիլիջանի բաժնում քրեական գործ է հարուցվել, որն ուղարկվել է քննչական կոմիտե։ 
17:43 - 20 փետրվարի, 2020
«Այբ» կրթական հիմնադրամը և Տավուշի մարզպետարանը համատեղ կիրականացնեն կրթական ծրագրեր

«Այբ» կրթական հիմնադրամը և Տավուշի մարզպետարանը համատեղ կիրականացնեն կրթական ծրագրեր

Դիլիջանի կենտրոնական դպրոցում ապրիլի 26-ին Տավուշի մարզպետ Հայկ Չոբանյանը և «Այբ» կրթական հիմնադրամի գործադիր տնօրեն Սոնա Կոշեցյանը ստորագրեցին համագործակցության հուշագիր՝ ամրագրելով մարզում համատեղ որակյալ կրթական մշակույթ և միջավայր ստեղծելու իրենց ձգտումն ու նպատակը։ Ինչպես հայտնեցին ՀՀ Տավուշի մարզպետարանից, մարզպետարանն ու «Այբ» կրթական հիմնադրամը պատրաստակամ են ներդնել իրենց ջանքերը՝ ստեղծելու որակյալ կրթություն և նպաստելու բոլոր երեխաների համար հավասար հնարավորությունների ստեղծմանը և կհամագործակցեն՝ հաշվի առելով գործունեության ընդհանուր շրջանակն ու 13 տարիների ընթացքում հիմնադրամի իրականացրած կրթական հաջողված ծրագրերը։ «Այբ» կրթական հիմնադրամը համագործակցության հուշագրի շրջանակում պատրաստակամ է առանձին և այլ գործընկեր կառույցների հետ համատեղ իրականացնելու կրթական ծրագրեր ՀՀ Տավուշի մարզում` նպաստելով մարզի կրթական ոլորտի բարելավմանը, հանրակրթական հաստատությունների վերազինմանը, ուսուցիչների վերապատրաստմանը, աշակերտների գիտելիքների ձեռք բերմանը, երիտասարդության շրջանում կրթության հանդեպ հետաքրքրության ավելացմանը, ինքնակրթության մշակույթի ձևավորմանը: Համատեղ աշխատանքներ կիրականացվեն մի քանի ուղղություններով, մասնավորապես. «ԱյբԼաբ» ծրագրի տարածում ու ներդրում ՀՀ Տավուշի մարզի դպրոցներում, ծրագրի շրջանակում դպրոցների ուսուցիչների գործնական հմտությունների զարգացում, ուսուցիչների վերապատրաստում, «Այբ»-ի գործընկեր դպրոցների ցանցում Տավուշի մարզի դպրոցների ներգրավում, նախագծային ուսումնառություն, ինքնազարգացմանն ուղղված առցանց ուսման խրախուսում՝ «Քան» ակադեմիայի հայալեզու հարթակի հիման վրա, կրթական տուրիզմի ոլորտում ջանքերի համադրում: Մարզում «Այբլաբերի» հիմնադրման համար բազա կհանդիսանա ոչ թե մայրաքաղաքում, այլ հենց մարզում հաջողությամբ փորձարկված՝ Դիլիջանում գործող այբական դպրոցի լաբորատորիայի մոդելը։ Մինչ փաստաթղթի ստորագրումը Տավուշի մարզպետ Հայկ Չոբանյանը, Դիլիջանի քաղաքապետ Արմեն Սանթրոսյանը, հիմնադրամի տնօրեն Սոնա Կոշեցյանը, ԿԲ Դիլիջանի ուսումնահետազոտական կենտրոնի տնօրեն Արմեն Նուրբեկյանը, Դիլիջանի դպրոցի տնօրեն Նաիրա Դալուզյանը և այլ հյուրեր շրջեցին Դիլիջանի կենտրոնական դպրոցում՝ ծանոթանալով մարզում արդեն վեց տարի գործող, հանրակրթական ամենախիստ չափանիշներին համապատասխանող և համայնքային կարևոր նշանակության դպրոցի կրթական հնարավորություններին, այդ թվում՝ ԿԲ նախաձեռնությամբ գործող Ֆաբլաբի աշխատանքներին։ Հայկ Չոբանյանը, կարևորելով մարզում կրթությանն ուղղված նախաձեռնությունների իրականացումը, նշեց. «Ամենամեծ ներդրումը մարդկային ներուժի զարգացմանն ուղղված ջանքերն են։ Ժամանակակից տեխնոլոգիական դարաշրջանում բնագիտական ուժեղ կրթությունը հաղթելու բանաձև է։ Այսօր մենք ոչ միայն հուշագիր ենք ստորագրում, այլև սկսում ենք մի գործընթաց, որի արդյունքը ուժեղ ուսուցիչն է, ուժեղ քաղաքացին և ուժեղ պետությունը»։  
06:31 - 27 ապրիլի, 2019
Դիլիջանի պետական քոլեջի երկու դասախոսներ մեղադրվել են փաստաթղթեր կեղծելու համար

Դիլիջանի պետական քոլեջի երկու դասախոսներ մեղադրվել են փաստաթղթեր կեղծելու համար

«Դիլիջան պետական քոլեջ» ՊՈԱԿ-ի դասախոսներ Լ. Մկրտչյանին և Մ. Թամամյանին մեղադրանք է առաջադրվել փաստաթղթեր կեղծելու համար: Ըստ նախաքննական մարմնի, վերջիններս պարտավոր լինելով դասամատյանում կատարել ուսանողների հաճախումների և առաջադիմության ընթացիկ հաշվառում՝ 2017-2018թ թվականների ուսումնական տարում, երկու ուսանողի բացակաները չեն հաշվառել: Ավելին, ուսանողները Հայաստանից բացակայել են, սակայն, նրանց կողմից հետագա ուսումը շարունակելն ապահովելու նպատակով՝ ուսանողների անվան դիմաց Լ. Մկրտչյանը մեկ այլ դասախոսի խնդրանքով նշանակել է թվով 7 դրական գնահատական: Ըստ նախաքննական մարմնի՝ հետագայում իմանալով, որ ուսանողները երկրից բացակայում են սպիտակացնող նյութով ջնջել է նշված գնահատականները և դրան վրա կատարել բացակա գրառում:  Դասախոս Մ. Թամամյանը, առաջադրված մեղադրանքի համաձայն, նույն ուսանողների բացականները ևս սահմանված կարգով չի հաշվառել: Վերջիններիս հետագա ուսումը շարունակելն ապահովելու նպատակով՝ նրանց անվան դիմաց նշանակել է թվով 3 դրական գնահատականներ: Գործն ուղարկվել է Տավուշի մարզի ընդհանուր իրավասության դատարան՝ քննության:
06:01 - 11 մարտի, 2019