Նիկոլայ Բաղդասարյան

Նիկոլայ Յուրիի Բաղդասարյանը (հոկտեմբերի 4, 1975, Երեւան) ՀՀ ԱԺ 7-րդ գումարման «Իմ քայլը» խմբակցության պատգամավոր է, ԱԺ Պետական-իրավական հարցերի մշտական հանձնաժողովի անդամ։ «Քաղաքացիական պայմանագիր» կուսակցության անդամ է։

1995-1997թթ. ծառայել է ՀՀ զինված ուժերում: 1998թ․ ավարտել է «Հայկական բաց համալսարանը», իրավագիտության մագիստրոս է։

1994-1996թթ. եղել «Սելենա» գործարանի իրավախորհրդատու: 1998թ.՝ Հայկական բաց համալսարանի մեթոդաբանական կաբինետի վարիչ: 1998-ից զբաղվել է փաստաբանական գործունեությամբ: 2006թ.՝ ՀՀ փաստաբանների պալատի դրամաշնորհային ծրագրի համակարգող, 2007թ.՝ ՀՀ փաստաբանների պալատի «Արդարադատության մատչելիությունը ՀՀ սոցիալապես անապահով բոլոր խավերի համար» դրամաշնորհային ծրագրի ղեկավար, «ՀՀ փաստաբանների պալատի» դրամաշնորհային ծրագրի դասախոս, ՀՀ փաստաբանների պալատի «Գրադարանի վերանորոգում» դրամաշնորհային ծրագրի համակարգող: 2008-2009թթ.՝ ՀՀ փաստաբանների պալատի նախագահի տեղակալ ծրագրերի իրականացման եւ աշխատանքների կառավարման հարցերով, 2009-2011թթ.՝ գործադիր տնօրեն: 2012-2014թթ.՝ «ՀՀ փաստաբանական դպրոց» հիմնադրամի տնօրեն: 2003-2019թթ. «Արնի Լեգալ Էյդ» ՍՊԸ տնօրեն:

2018թ. դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի թիվ 2 ընտրատարածքի տարածքային ընտրական ցուցակով:

ԱԺ-ն քննարկեց վկային և տուժողին տեսակապի միջոցով հարցաքննելու հնարավորություն տվող նախագիծը |armenpress.am|

armenpress.am: ՀՀ ազգային ժողովի քննարկեց «Իմ քայլը» խմբակցության պատգամավորների կողմից ներկայացված օրենքի նախագիծը, որով առաջարկվում է հնարավորություն տալ հեռավար կարգով՝ տեսակապի միջոցով հարցաքննել քրեական գործով վկաներին և տուժողներին: Պատգամավորներ Նիկոլայ Բաղդասարյանի, Արուսյակ Ջուլհակյանի հեղինակած «ՀՀ քրեական դատավարության օրենսգրքում» լրացում կատարելու մասին» օրենքի նախագիծը ԱԺ լիագումար նիստում ներկայացրեց Բաղդասարյանը: «Նախագծի նպատակն է իրավունք վերապահել վարույթ իրականացնող մարմնին հեռավար կարգով՝ տեսակապի միջոցով հարցաքննել քրեական գործով վկաներին և տուժողներին՝ նույն նախագծով սահմանված դեպքերում: Այդ դեպքերն են, երբ վկան կամ տուժողը առողջական վիճակի կամ տարիքի պատճառով չի կարող ներկայանալ քրեական վարույթ իրականացնող մարմնին, անհրաժեշտ է ապահովել վկայի կամ տուժողի անվտանգությունը, հարցաքննության կատարումն անհնար է կամ անհրաժեշտ է ապահովել նախաքննության արդյունավետությունը »,-ասաց Բաղդասարյանն ու հավելեց՝ սրա նպատակն է հարցաքննությունն արագացնել: Նախագիծը չի նախատեսում, որ նման հարցաքննություն կարող է կատարվել արտերկրում գտնվող անձի հետ: Սակայն Բաղդասարյանը տեղեկացրեց, որ ԱԳՆ-ի հետ քննարկման արդյունքում հանգել են նրան, որ արտերկրում գտնվող ՀՀ քաղաքացին, որը որևէ գործով տուժող կամ վկա է, կարող է ներկայանալ հյուպատոսարան, և քննիչը կկարողանա հեռավար կարգով հարցաքննել: ՀՀ արդարադատության փոխնախարար Սրբուհի Գալյանը տեղեկացրեց, որ կառավարության կողմից ներկայացված բազմաթիվ առաջարկներն ընդունվել են նախագծի հեղինակների կողմից: Պայմանավորվածություն են ձեռք բերել առաջինից երկրորդ ընթերցման ժամանակահատվածում նախագիծը լրամշակել:

11:53 - 05 մարտի, 2020