Բորիս Ջոնսոն

Ջոնսոնի կուսակիցները վարչապետին անվստահություն հայտնելու գործընթաց են սկսել |azatutyun.am|

azatutyun.am: Մեծ Բրիտանիայի իշխող կուսակցության ավելի քան հինգ տասնյակ պատգամավորներ վարչապետ Բորիս Ջոնսոնին անվստահություն հայտնելու գործընթաց են սկսել, հարցը Պահպանողական կուսակցության խմբակցությունում քվեարկության կդրվի այսօր երեկոյան՝ Համայնքների պալատում։ Ջոնսոնի կուսակիցների այդ նախաձեռնության պատճառը համաճարակի օրերին ծագած սկանդալն է, երբ պարզվել է, որ խիստ լոքդաունի պայմաններում վարչապետը մի քանի անգամ խախտել է կարգը և մասնակցել ընկերական երեկույթի, արգելված հավաքույթները հիմնականում կազմակերպվել են Ջոնսոնի առանձնատանը։ Վարչապետի հրաժարականին հասնելու համար պահանջվում են խմբակցության անդամների մեծամասնության՝ առնվազն 180 պատգամավորների քվեները:

14:50 - 06 հունիսի, 2022

Հայաստանը կարևորում է Միացյալ Թագավորության հետ նախորդ երեք տասնամյակների ընթացքում ձևավորված հարաբերությունները. Նիկոլ Փաշինյան

Վարչապետ Նիկոլ Փաշինյանը շնորհավորական ուղերձ է հղել Մեծ Բրիտանիայի և Հյուսիսային Իռլանդիայի Միացյալ Թագավորության վարչապետ Բորիս Ջոնսոնին՝ Ազգային տոնի առթիվ: Ուղերձում ասված է. «Ձերդ գերազանցություն, Ջերմորեն շնորհավորում եմ Ձեզ և Միացյալ Թագավորության բարեկամ ժողովրդին երկրի ազգային տոնի՝ Թագուհու ծննդյան օրվա և նրա գահակալման Պլատինե հոբելյանի առթիվ: Այս տարին խորհրդանշական է նաև հայ-բրիտանական հարաբերությունների համար, քանի որ 30 տարի առաջ մենք սկիզբ դրեցինք հայ-բրիտանական միջպետական հարաբերություններին՝ խարսխված ժողովրդավարական արժեքների, գործնական շահերի և փոխադարձ հարգանքի վրա: Հայաստանը կարևորում է Միացյալ Թագավորության հետ նախորդ երեք տասնամյակների ընթացքում ձևավորված հարաբերությունները և բարձր է գնահատում Միացյալ Թագավորության աջակցությունը մեր երկրում ընթացող ժողովրդավարական բարեփոխումներին, մարդու իրավունքների պաշտպանության և օրենքի գերակայության ամրապնդմանը։ Լիահույս եմ, որ համատեղ ջանքերով առաջիկա տարիների ընթացքում կկարողանանք նոր նախաձեռնություններով և ծրագրերով հագեցնել հայ-բրիտանական երկկողմ օրակարգը՝ ի շահ մեր պետությունների և բարեկամ ժողովուրդների։ Մաղթում եմ Ձերդ գերազանցությանը քաջառողջություն և բեղմնավոր գործունեություն, իսկ Միացյալ Թագավորության բարեկամ ժողովրդին՝ առաջընթաց և բարեկեցություն»։

12:20 - 05 հունիսի, 2022

Պուտինը դանդաղ, բայց շոշափելի առաջընթաց ունի Դոնբասում․ Մեծ Բրիտանիայի վարչապետ

Ռուսաստանի նախագահ Վլադիմիր Պուտինը դանդաղ, բայց շոշափելի առաջընթաց ունի Դոնբասում՝ Ուկրաինայի արևելքում, այսօր, ինչպես հայտնում է Reuters-ն, ասել է Մեծ Բրիտանիայի վարչապետ Բորիս Ջոնսոնը «Bloomberg»-ին։ Նա նշել է, որ իր և ռուսաստանցի զինվորականների համար մեծ գնով Պուտինը շարունակում է առաջխաղացումը Դոնբասում։ «Այդ պատճառով էլ կենսականորեն անհրաժեշտ է, որ մենք շարունակենք ռազմական աջակցություն ցուցաբերել ուկրաինացիներին»։ Ջոնսոնը հավելել է, որ Ուկրաինան ավելի շատ ռազմական աջակցության կարիք ունի, այդ թվում՝ համազարկային կրակի ռեակտիվ համակարգերի։ Նա ընդգծել է նաև, որ հակամարտությանը պետք է ավարտվի։ Նորա Վանյան

16:01 - 27 մայիսի, 2022

Մեծ Բրիտանիան և Ճապոնիան ռազմական համաձայնագիր են ստորագրել |lragir.am|

lragir.am: Ճապոնիայի վարչապետ Ֆումիո Կիսիդան և Մեծ Բրիտանիայի վարչապետ Բորիս Ջոնսոնը Լոմդոնում ստորագրել են համաձայնագիր, որը թույլ է տալիս երկու երկրների զինված ուժերի մուտքը միմյանց տարածք զորավարժությունների և արտակարգ իրավիճակներին արձագանքման համար։ Միաժամանակ երկու երկրների վարչապետները հայտարարել են, որ «ամբողջ աշխարհի ժողովրդավարական երկրները պետք է միասնական կանգնեն ավտորիտար ռեժիմների դեմ», գրում է BBC-ն։ Միացյալ Թագավորության հետ համաձայնագրի նախապատրաստումը սկսվել էր սեպտեմբերին, երբ բրիտանական կառավարությունը որոշեց ակտիվացնել գործունեությունը Ասիա-Խաղաղօվկիանոսյան տարածաշրջանում (այս շրջադարձի մի մասն էր ԱՄՆ-ի և Ավստրալիայի հետ AUKUS դաշինքի ստեղծումը՝ համատեղ դիմակայելու համար Չինաստանին): Ապրիլի վերջին Ավստրալիայում Ճապոնիայի դեսպանը բացահայտեց, որ Տոկիոն աշխատանքներ է տանում միանալու Five Eyes հետախուզական դաշինքին (ԱՄՆ, Մեծ Բրիտանիա, Ավստրալիա, Կանադա, Նոր Զելանդիա), որի շրջանակներում դաշնակիցները կիսում են իրենց ամենագաղտնի հետախուզական տեղեկությունները:

10:16 - 06 մայիսի, 2022

Պուտինն ունի հսկայական բանակ. Ուկրաինայում պատերազմը կարող է տևել մինչև 2023-ի վերջ. Ջոնսոն |tert.am|

tert.am: Մեծ Բրիտանիայի վարչապետն ասել է, որ «իրական հավանականություն» կա առ այն, որ Ուկրաինայում պատերազմը կարող է տևել մինչև 2023 թվականի վերջ, հայտնում է BBC-ն։Նա նման կարծիք է հայտնել՝ պատասխանելով Նյու Դելիում լրագրողների այն հարցին, թե համաձա՞յն է արևմտյան հետախուզության այն գնահատականներին, որ ռազմական գործողությունները կարող են ձգվել մինչև հաջորդ տարվա վերջ։«Պուտինն ունի հսկայական բանակ»,- ասել է Ջոնսոնը՝ նշելով, որ Ռուսաստանի առաջնորդը գտնվում է «բարդ քաղաքական իրավիճակում, քանի որ աղետալի սխալ է թույլ տվել»։

17:20 - 22 ապրիլի, 2022

ԱՄՆ-ն, Մեծ Բրիտանիան և Կանադան հրետանի են խոստանում Ուկրաինային

ԱՄՆ-ի, Մեծ Բրիտանիայի և Կանադայի առաջնորդները հայտարարել են, որ Ուկրաինա կուղարկեն ավելի շատ հրետանային զինատեսակներ՝ ի պատասխան երկրի արևելյան ուղղությամբ ռուսական կողմի նոր հարձակման: Այս մասին գրում է Reuters-ը: ԱՄՆ նախագահ Ջո Բայդենը, Մեծ Բրիտանիայի վարչապետ Բորիս Ջոնսոնը և Կանադայի վարչապետ Ջասթին Թրյուդոն երեքշաբթի նման հայտարարությամբ են հանդես եկել իրենց և այլ դաշնակիցների հետ տեսազանգից հետո՝ կապված Ռուսաստանի ներխուժման նոր փուլի հետ: Սպասվում է, որ առաջիկա օրերին Բայդենը կհայտարարի Ուկրաինայի համար ռազմական օգնության նոր փաթեթի մասին, որը կարող է լինել մոտ նույն քանակի, ինչ անցյալ շաբաթ ուղարկված 800 միլիոն դոլարը: Այս մասին Reuters-ին հայտնել են լավատեղյակ աղբյուրները: Եթե օգնության փաթեթը լինի այնքան լայնամասշտաբ, որքան սպասվում է, ապա Ուկրաինային ԱՄՆ օգնությունը ՌԴ ներխուժումից հետո կանցնի երեք միլիարդ դոլարի շեմը: Նյու Հեմփշիր կատարած այցի ժամանակ լրագրողների հարցին, թե արդյո՞ք ԱՄՆ-ն հրետանային զենք է ուղարկելու Ուկրաինային, Բայդենը պատասխանել է «այո»: Լոնդոնում Բորիս Ջոնսոնը օրենսդիրներին ասել է. «Սա հրետանային հակամարտություն է դառնալու, նրանք ավելի շատ հրետնային միջոցների օգնության կարիք ունեն. ահա թե ինչ մենք կտանք նրանց՝ ի հավելում աջակցության մյուս ձևերի»: Թրյուդոն հայտնել է, որ Կանադան ծանր հրետանի կուղարկի, ինչպես նաև խոստացել է ավելի շատ մանրամասներ հաղորդել: Լուսանկարը՝ Reuters-ի

11:51 - 20 ապրիլի, 2022

Մոսկվան արգելել է Բորիս Ջոնսոնի և նրա կառավարության անդամների մուտքը Ռուսաստան |azatutyun.am|

azatutyun.am: Պաշտոնական Մոսկվան այսօր հայտարարել է, որ Մեծ Բրիտանիայի կառավարության ձեռնարկած «աննախադեպ թշնամական քայլերի պատճառով» անհատական պատժամիջոցներ է սահմանում այդ երկրի մի շարք ղեկավարների նկատմամբ։ Ռուսաստանի ԱԳՆ տարածած հայտարարության համաձայն` Մեծ Բրիտանիայի վարչապետ Բորիս Ջոնսոնի, արտգործնախարար Էլիզաբեթ Թրասի, պաշտպանության նախարար Բեն Ուոլեսի և կառավարության ևս վեց անդամների մուտքը երկրի տարածք այսուհետ արգելվելու է։ Ռուսաստանի տարածք չեն կարող այցելել նաև Մեծ Բրիտանիայի նախկին վարչապետ Թերեզա Մեյլը, Շոտլանդիայի վարչապետ Նիկոլա Սթարջընը, Անգլիայի և Ուելսի Գլխավոր դատախազ Սուելա Բրավերմանը։ «Մոտ ապագայում այս ցուցակը կընդլայնվի ի հաշիվ այն բրիտանացի քաղաքական գործիչների և խորհրդարանականների, որոնք նպաստում են հակառուսական հիստերիայի խորացմանը», - նշված է Ռուսաստանի ԱԳՆ հայտարարության մեջ։

15:20 - 16 ապրիլի, 2022

Ջոնսոնը մեկնել է Կիև, հանդիպել Զելենսկու հետ |factor.am|

factor.am: Առանց այցի նախնական հայտարարության Կիև է ժամանել Մեծ Բրիտանիայի վարչապետ Բորիս Ջոնսոնը: Այժմ նա հանդիպում է անցկացնում Ուկրաինայի նախագահ Վլադիմիր Զելենսկու հետ։ Այս մասին ապրիլի 9-ին հայտնել է նախագահի գրասենյակի ղեկավարի տեղակալ Անդրեյ Սիբիգան Facebook-ում։ «Բորիս Ջոնսոնի այցը Կիև սկսվեց նախագահ Զելենսկու հետ առանձնազրույցով»,- գրել է Սիբիգան։

18:41 - 09 ապրիլի, 2022

Բորիս Ջոնսոնը հայտարարել է Ուկրաինային ավելի շատ զենք ուղարկելու մասին

Մեծ Բրիտանիայի վարչապետ Բորիս Ջոնսոնը այսօր հայտարարել է Ուկրաինային 100 միլիոն ֆունտ ստերլինգ արժողությամբ զենք ուղարկելու մասին։ Այս մասին հաղորդել է BBC-ն։ Վարչապետն ասել է, որ Մեծ Բրիտանիան լրացուցիչ ռազմական տեխնիկա կուղարկի, ներառյալ «Starstreak» զենիթահրթիռային համակարգեր և 800 հակատանկային հրթիռներ։ Ջոնսոնն այս հայտարարությունը արել է այն բանից հետո, երբ տասնյակ մարդիկ են զոհվել Ուկրաինայի արևելքում մարդաշատ երկաթուղային կայարանը հրթիռակոծության հետևանքով։ Ելույթ ունենալով Գերմանիայի կանցլեր Օլաֆ Շոլցի հետ Դաունինգ Սթրիթում կայացած մամուլի ասուլիսի ժամանակ՝ Ջոնսոնը զգուշացրել է, որ Ռուսաստանը չի խուսափի պատժից Կրամատորսկ կայարանում տեղի ունեցած հարձակումից հետո։ «Ես գիտեմ, որ Մեծ Բրիտանիան և Գերմանիան նույն սարսափի և նողկանքի զգացումն ունեն այն դաժանությունից, որը սանձազերծվել է, ներառյալ այսօր առավոտյան իրենց տները լքող փախստականների անխիղճ ռմբակոծությունը»,- հայտարարել է Ջոնսոնը` հավելելով, որ «քաղաքացիների վրա հարձակվելը միանշանակ ռազմական հանցագործություն է, և Ռուսաստանի ռազմական հանցագործությունները Ուկրաինայում աչքաթող չեն արվի կամ անպատիժ չեն մնա»: Ջոնսոնը նշել է, որ Մեծ Բրիտանիան ճշգրիտ զինամթերք կուղարկի Ուկրաինային, որոնք «կարող են երկար մնալ երկնքում այնքան ժամանակ մինչև դեպի թիրախ ուղարկվելը», ինչպես նաև ավելի շատ սաղավարտներ, զրահաբաճկոններ և գիշերը տեսնելու համար նախատեսված սարքեր։ Միացյալ Թագավորության պաշտպանության նախարար Բեն Ուոլեսը հայտարարել է, որ Բրիտանիան Ուկրաինային կտրամադրի նաև զրահապատ «Մաստիֆ» մեքենաներ՝ Ռուսաստանի ներխուժման դեմ պայքարելու համար: Դրանք ծանր զրահամեքենաներ են, որոնք հարմար են ճանապարհային պարեկների և շարասյուների համար: Լուսանկարը՝ PA Media-ի

22:03 - 08 ապրիլի, 2022

Պուտինը երբեք չի գրավի Ուկրաինան. Բորիս Ջոնսոն |tert.am|

tert.am: Մեծ Բրիտանիայի վարչապետ Բորիս Ջոնսոնը հաջակցություն Ուկրաինայի տեսանյութ է հրապարակել, որում հայտարարել է, որ ՌԴ նախագահ «Վլադիմիր Պուտինը երբեք չի կոտրի ուկրաինացի ժողովրդի ոգին ու չի գրավի նրանց հայրենիքը», գրում է The Guardian-ը:«Ուկրաինան կրկին ոտքի կկանգնի և իր տեղը կզբաղեցնի ազատ և ինքնիշխան ազգերի շարքում... մենք՝ բրիտանացիներս, հիացած ենք ուկրաինացիների հայրենասիրությամբ: Մեր գործն է անել ամեն ինչ նրանց աջակցելու համար: Բրիտանիան երբեք չի հրաժարվի ընկերներին աջակցելուց»,-ասել է վարչապետը:

14:35 - 04 ապրիլի, 2022

Բորիս Ջոնսոնը հայտարարել է, որ «դժվար է» բավարարել Ուկրաինայի՝ ռազմական ինքնաթիռներ և տանկեր ուղարկելու խնդրանքը

ՆԱՏՕ, ԵՄ և «Մեծ յոթնյակի» (G7) առաջնորդները Բրյուսելում երեկ արտակարգ հանդիպումներ են անցկացրել՝ քննարկելու Ուկրաինայում իրավիճակը։ Հանդիպումներից հետո Մեծ Բրիտանիայի վարչապետ Բորիս Ջոնսոնը ասուլիս է տվել, որի ընթացքում նախազգուշացրել է, որ եթե ՌԴ նախագահ Պուտինը քիմիական զենք օգտագործի, ապա դրա հետևանքները «աղետալի կլինեն նրա համար»։ Այս մասին հայտնում է BBC-ն։ Բորիս Ջոնսոնը նաև ասել է, որ Մեծ Բրիտանիայի կառավարությունը նախատեսում է Ուկրաինա ուղարկել ևս 6000 հրթիռ, ինչպես նաև լրացուցիչ 25 միլիոն ֆունտ ստեռլինգ աջակցություն՝ օգնելու Ուկրաինային վճարել աշխատավարձերը զինված ուժերում։ Նա նաև խոստացել է բրիտանական նոր զորքեր տեղակայել Բուլղարիայում՝ ի հավելումն Լեհաստանում և Էստոնիայում զորքերի կրկնապատկմանը: Ջոնսոնը հավելել է, որ արևմտյան երկրները ձգտում են «անշեղորեն ավելացնել» ռազմական սարքավորումների քանակը, որոնք ուղարկում են Ուկրաինա, սակայն «դժվար է» բավարարել Ուկրաինայի խնդրանքը՝ ռազմական ինքնաթիռներ և տանկեր ուղարկելու մասով: Ավելի վաղ Ուկրաինայի նախագահ Վլադիմիր Զելենսկին ՆԱՏՕ-ին ասել էր, որ խնդրում է «Դաշինքի բոլոր ինքնաթիռների 1%-ը և բոլոր տանկերի 1%-ը»: Ջոնսոնն ասուլիսի ընթացքում ասել է. «Նախագահ Զելենսկին փորձում է ազատել Մարիուպոլը և օգնել քաղաքում գտնվող հազարավոր ուկրաինացի մարտիկներին: Այդ նպատակով նրան, ինչպես ինքն է ասում, զրահատեխնիկա է պետք։ Մենք փորձում ենք հասկանալ, թե ինչ կարող ենք անել օգնելու համար: Բայց լոգիստիկ առումով դա շատ դժվար է թվում և՛ զրահատեխնիկայի, և՛ ինքնաթիռների մասով»,- ասել է Մեծ Բրիտանիայի վարչապետը: Ջոնսոնը հավելել է, որ արևմտյան ոչ մի ուժ չի ձգտում «ոչ թռիչքային» գոտի սահմանել Ուկրաինայի երկնքում։

13:29 - 25 մարտի, 2022

Մեծ Բրիտանիայի վարչապետ Բորիս Ջոնսոնը Պուտինի հետ նորմալ հարաբերություններին վերադարձ չի տեսնում

Մեծ Բրիտանիայի վարչապետ Բորիս Ջոնսոնը շաբաթ օրը` մարտի 19-ին, հայտարարել է, որ սխալ կլինի կարգավորել հարաբերությունները ՌԴ նախագահ Վլադիմիր Պուտինի հետ՝ Ռուսաստանի՝ Ուկրաինա ներխուժումից հետո։ Այս մասին հայտնում է «Reuters»-ը։ «Սրանից հետո Պուտինի հետ հարաբերությունները վերականգնելու փորձը, ինչպես մենք արեցինք 2014 թվականին, կնշանակի նորից նույն սխալը թույլ տալ»,- ասել է Ջոնսոնը Պահպանողական կուսակցության համաժողովում։

21:27 - 19 մարտի, 2022

Արևմուտքը պետք է ապահովի, որ «այլևս երբեք խոցելի չի լինի Պուտինի շանտաժների առաջ». Բորիս Ջոնսոն

Ուկրաինան «վճարում է այն բանի գինը», որ Արևմուտքը չի կարողացել հասկանալ Վլադիմիր Պուտինից եկող սպառնալիքը։ Այս մասին BBC-ին տված հարցազրույցում հայտարարել է Մեծ Բրիտանիայի վարչապետ Բորիս Ջոնսոնը։ Բորիս Ջոնսոնն ասել է, որ Ռուսաստանի նախագահի «ներխուժումն արդեն ձախողվել է», քանի որ նա թերագնահատել է Ուկրաինայում «դիմադրության ուժը»: Խոսելով Ուկրաինայում տեղի ունեցողից՝ Ջոնսոնն ասել է, որ ՌԴ նախագահ Պուտինն այնտեղ «ռազմական հանցագործություններ է կատարում»։ Ջոնսոնը նաև մեղադրել է եվրոպական երկրներին, որոնք «սկսել են կրկին Պուտինին վերաբերվել որպես իրենց համայնքի մի մասի»՝ 2014 թվականին «Ղրիմի բռնակցումից հետո»։ Բորիս Ջոնսոնը, որն այցելել էր Սաուդյան Արաբիա՝ քննարկելու էներգետիկ անվտանգություն, BBC-ին ասել է՝ Արևմուտքը պետք է ապահովի, որ «այլևս երբեք խոցելի չի լինի Պուտինի շանտաժների առաջ», հատկապես երբ խոսքը վերաբերում է ռուսական նավթին և գազին ապավինելուն: Իր ուղևորության ընթացքում Ջոնսոնը հանդիպել էր Սաուդյան Արաբիայի գահաժառանգ արքայազն Մուհամեդ բին Սալմանին՝ ռուսական նավթից և գազից կախվածությունը դադարեցնելու շուրջ բանակցությունների նպատակով։ Դրանից հետո վարչապետի աշխատակազմը հայտնել էր, որ Մեծ Բրիտանիան և Սաուդյան Արաբիան համաձայնել են համագործակցել էներգիայի շուկայում կայունությունը պահպանելու և վերականգնվող էներգիայի աղբյուրները խթանելու ուղղությամբ: Ջոնսոնը հարցազրույցի ընթացքում ասել է, որ նախատեսում է ուշադրություն դարձնել արևային, քամու և միջուկային էներգիային՝ «մի քանի մեծ խաղադրույքներ կատարելու նպատալով», սակայն կարճաժամկետ լուծումներ նույնպես անհրաժեշտ են: «Մեծ Բրիտանիան Սաուդյան Արաբիայի հետ պատմական և երկարատև հարաբերություններ ունի,- ասել է Բորիս Ջոնսոնն ու հավելել,- Դա ոչ մի կերպ չպետք է խանգարի մեզ բարձրացնել մարդու իրավունքների հարցերը [Սաուդյան Արաբիայում]»։

14:47 - 17 մարտի, 2022

Բորիս Ջոնսոնը կընդունի Բալթյան և Հյուսիսային Եվրոպայի երկրների առաջնորդներին՝ ՌԴ մեկուսացման նոր ուղիները քննարկելու

Մեծ Բրիտանիայի վարչապետ Բորիս Ջոնսոնը եկող շաբաթ կընդունի Ռուսաստանի հյուսիսարևմտյան հարևանների առաջնորդներին՝ քննարկելու ռուսական տնտեսության մեկուսացման նոր ուղիների որոնումն ու արձագանքը նախագահ Վլադիմիր Պուտինի՝ Ուկրաինա ներխուժմանը, գրում է Reuters-ը։ Մեծ Բրիտանիայի գլխավորած Միացյալ էքսպեդիցիոն ուժերի երկրների՝ Դանիայի, Էստոնիայի, Ֆինլանդիայի, Իսլանդիայի, Լատվիայի, Լիտվայի, Նիդերլանդների և Շվեդիայի առաջնորդները կհանդիպեն Լոնդոնում եկող երեքշաբթի։ Սպասվում է, որ նրանք համաձայնության կգան Հյուսիսային Ատլանտիկայում և Բալթիկ ծովում զորավաժությունների անցկացման շուրջ, կքննարկեն պատերազմն Ուկրաինայում և էներգետիկ անվտանգության հարցեր, հաղորդել է Բորիս Ջոնսոնի գրասենյակը։ «Եվրոպական անվտանգությունը խաթարվել է Ուկրաինայի վրա Ռուսաստանի հարձակման հետևանքով, և մեր գործընկերների հետ միասին մենք միջոցներ կձեռնարկենք՝ ավելի ուժեղ և միավորված դառնալու համար»,- ասված է Ջոնսոնի հայտարարությունում․ «Պուտինի սպառնալիքներին մեր տոկունության ապահովումը պետք է դուրս գա մեր ռազմական դիրքորոշման շրջանակից․ Հյուսիսային և Բալթիկ ծովերի երկրների հետ միասին մենք պետք է ապահովենք մեկուսացումը Ռուսաստանի միջամտությունից և մեր էներգամատակարարումների, տնտեսության և արժեքների վրա նրա ազդեցությունից»։ Մեծ Բրիտանիան պատժամիջոցներ է սահմանել հարյուրավոր ռուսաստանյան ֆիզիկական և իրավաբանական անձանց նկատմամբ, խոստացել աստիճանաբար հրաժարվել ռուսական նավթի ներկրումից և իր ֆինանսական կենտրոնից օգտվելու սահմանափակումներ մտցրել ռուսական ընկերությունների համար։ Նորա Վանյան

14:33 - 13 մարտի, 2022

ԱՄՆ-ի, Գերմանիայի, Ֆրանսիայի և Մեծ Բրիտանիայի ղեկավարները հայտարարել են Կիևին հետագա օգնություն ցուցաբերելու իրենց հանձնառության մասին

ԱՄՆ նախագահ Ջո Բայդենը, Ֆրանսիայի նախագահ Էմանուել Մակրոնը, Գերմանիայի կանցլեր Օլաֆ Շոլցը և Մեծ Բրիտանիայի վարչապետ Բորիս Ջոնսոնը երկուշաբթի օրը տեսակոնֆերանսի միջոցով խորհրդակցությունների ժամանակ հայտարարել են Կիևին հետագա օգնություն ցուցաբերելու իրենց հանձնառության մասին, այդ թվում՝ ռազմական: Այս մասին բանակցություններից հետո հայտնել է Սպիտակ տան մամուլի ծառայությունը։ «Ղեկավարները վերահաստատել են իրենց վճռականությունը՝ շարունակելու Ռուսաստանի Դաշնության համար մեծացնել պետական ծախսերը՝ կապված Ուկրաինայում նրա հատուկ ռազմական գործողության հետ։ Նրանք նաև ընդգծել են Ուկրաինային տնտեսական, հումանիտար և անվտանգության ոլորտում աջակցություն ցուցաբերելու իրենց հանձնառությունը։ Բացի այդ, ղեկավարներրը քննարկել են իրենց վերջին հաղորդակցությունները Ուկրաինայի և Ռուսաստանի նախագահների հետ»:

23:53 - 07 մարտի, 2022

Արևմուտքը չի կարող մեկ օրում հրաժարվել ռուսական նավթից ու գազից․ Ջոնսոն

Ռուսաստանից նավթի և գազի մատակարարումից հրաժարվելը չի կարող տեղի ունենալ մեկ օրում, սակայն Արևմուտքի երկրները պետք է համակարգված կերպով շարժվեն այդ ուղղությամբ։ Այս մասին երկուշաբթի օրը Լոնդոնում կայացած մամուլի ասուլիսում հայտարարել է Մեծ Բրիտանիայի վարչապետ Բորիս Ջոնսոնը։ «Չի կարելի մեկ գիշերվա ընթացքում նավթն ու գազը թողնել, նույնիսկ եթե դրանք գալիս են Ռուսաստանից: Դա, անշուշտ, աշխարհի ոչ բոլոր երկրները կարող են անել: Միացյալ Թագավորությունը և մյուս երկրները կարող են արագ շարժվել դեպի դա, բայց տարբեր երկրներ տարբեր կերպ են կախված մատակարարումներից։ Միևնույն ժամանակ, մենք պետք է ձգտենք ապահովել, որ մենք շարժվենք միասին և մտածենք նույն ուղղությամբ», - ասել է Ջոնսոնը։ Ջոնսոնը նաև նշել է, որ ռուսական ածխաջրածինների մերժումը կարող է զուգակցվել ընդհանրապես ածխաջրածինների մերժման հետ՝ որպես գլոբալ տաքացման դեմ պայքարի մաս։ Միաժամանակ նա խոստովանել է, որ Ռուսաստանի Դաշնության հետ «տնտեսական առճակատման» հետեւանքները մեծապես կազդեն արեւմտյան երկրների սպառողների վրա։ «Ամեն ինչ պետք է անել սպառողներին և հանրությանը պաշտպանելու համար: Անկասկած, Ռուսաստանի Դաշնության դեմ պատժամիջոցների կիրառումը հետևանքներ կունենա։ Արևմուտքի հաջողությունը իր միասնության մեջ է, և մենք բոլորս, կարծում եմ, ավելի ու ավելի ենք կիսում այն կարծիքը, որ ռուսական ածխաջրածինները պետք է լքեն դաշտը՝ միաժամանակ ապահովելով այլընտրանքների առկայությունը և դրանց մատակարարումը»,- ասել է վարչապետ Ջոնսոնը։

23:46 - 07 մարտի, 2022