Ալեն Սիմոնյան

8-րդ գումարման Ազգային ժողովի նախագահն է, «Քաղաքացիական պայմանագիր» կուսակցության վարչության անդամ։

Ծնվել է 1980թ․ հունվարի 5-ին։ 2000-2002թթ. ծառայել է ՀՀ զինված ուժերում:

2000թ. ավարտել է Երեւանի պետական համալսարանի իրավագիտության ֆակուլտետը: Իրավաբան: 2015թ.՝ ՀՀ ԳԱԱ գիտակրթական միջազգային կենտրոնի քաղաքագիտության ֆակուլտետի մագիստրատուրան: Քաղաքագետ է:

2002-2003թթ. աշխատել է Աջափնյակ-Դավթաշեն համայնքների առաջին ատյանի դատարանի նախագահի օգնական, գրասենյակի քարտուղար: 2003-2004թթ.՝ «Կոնվերս» բանկի մարդկային ռեսուրսների կառավարիչ:

2004-2010թթ. զբաղվել է ձեռնարկատիրական գործունեությամբ:

2006-2007թթ. աշխատել է «Սիթի FM» ռադիոկայանում: 2008թ. մասնակցել է «European Education & Research Center»-ի կազմակերպած «PR and Political Technologies» դասընթացներին: 2007-2012թթ., որպես պրոդյուսեր, տնօրեն, համագործակցել է «TV5», «Երկիր մեդիա», «Արմենիա» հեռուստաընկերությունների հետ: Եղել է մի շարք երաժշտական, քաղաքական, նախընտրական տեսահոլովակների պրոդյուսեր, ներկայացման տնօրեն: 2012-2018թթ.՝ «Արարատ» ամսագրի գլխավոր խմբագիր: 2013-2018թթ.՝ իր հիմնադրած «Ararat Media Group» ՍՊԸ («araratnews.am» կայք եւ «Արարատ» ամսագիր) գլխավոր խմբագիր:

2011 թվականին «Բարեւ Երեւան» դաշինքի ցուցակով մասնակցել է Երեւանի ավագանու ընտրություններին: 2013թ. տրանսպորտի թանկացման դեմ ուղղված «Car free» քաղաքացիական ակցիայի կազմակերպիչներից է:

2013-2015թթ. եղել է «Քաղաքացիական պայմանագիր» հանրային-քաղաքական միավորման կառավարման խորհրդի հիմնադիր անդամ: 2015թ. ընտրվել է «Քաղաքացիական պայմանագիր» կուսակցության վարչության հիմնադիր անդամ, 2016թ.՝ վերընտրվել: 2015-2016թթ.՝ «Քաղաքացիական պայմանագիր» կուսակցության խոսնակ:

2017-2018թթ.՝ Երեւանի ավագանու անդամ («Ելք» դաշինք):

2018-2019թթ.՝ ԱԺ պատգամավոր (թիվ 4 ընտրատարածք, «Ելք» կուսակցությունների դաշինք): ԱԺ եվրոպական ինտեգրման հարցերի մշտական հանձնաժողովի անդամ, «Ելք» խմբակցության անդամ:

2019-2021թթ.՝ ԱԺ պատգամավոր («Իմ քայլը» կուսակցությունների դաշինք, թիվ 4 ընտրատարածքի տարածքային ընտրական ցուցակ): ՀՀ Ազգային ժողովի նախագահի տեղակալ: ԱԺ արտաքին հարաբերությունների մշտական հանձնաժողովի անդամ: «Իմ քայլը» խմբակցության անդամ:

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

2021թ. օգոստոսի 2-ին ընտրվել է Հայաստանի Հանրապետության Ազգային ժողովի նախագահ:

Երբ խաղաղության պայմանագիր է կնքվում, Մինսկի խմբի իմաստը կորչում է. Ալեն Սիմոնյան |1lurer.am|

1lurer.am: Հայաստանն իր կողմից քայլեր իրականացնում է, և այդ քայլը Հայաստանի և Ադրբեջանի միջև խաղաղության պայմանագրի կնքումն է: Այդ մասին ԱԺ ճեպազրույցների ժամանակ հայտարարեց ԱԺ խոսնակ Ալեն Սիմոնյանը՝ անդադառնալով Իլհամ Ալիևի հայտարությանը, թե Հայաստանն ու Ադրբեջանը պետք է քայլեր իրականացնեն Մինսկի խմբի լուծարման համար: Ի՞նչ դիրքորոշում ունի ՀՀ-ն հարցի առնչությամբ: «Մինսկի խմբիի հետ կապված խոսակցություններն այն խոսակցություններն են, որոնք կարող են լինել խաղաղության պայմանագիրը կնքելուց հետո: Այսինքն՝ երբ խաղաղության պայմանագիր է կնքվում, դրա իմաստը կորչում է, որովհետև չէ՞ որ հենց նույն Ադրբեջանն ասում է, որ իբր Հայաստանն ինչ-որ նկրտումներ ունի, մենք ինչ-որ նկրտումներ ունենք, ինչ-որ պահանջներ ունենք: Ասում եմ՝ խաղաղության պայմանագիրը կկնքենք, և հարցը դուրս կգա»,- ասաց Ալեն Սիմոնյանը: ԱԺ խոսնակը նաև տարակուսանք հայտնեց, թե երբ մոտ ենք խաղաղության պայմանագրի ստորագրմանը, երբ արդեն համաձայնություններ կան, ինչո՛ւ է հենց Ալիևը փորձում հարվածել խաղաղության գործընթացին: «Լավ կլիներ՝ պարոն նախագահը խոսեր Սումգայիթի ջարդերից, Բաքվի ջարդերից, այդ ցեղասպանությունից նախ պետք է խոսեր, եթե մենք գնում ենք խաղաղության: Պետք է խաղաղություն ցանկացող կողմը նախևառաջ նշի, շեշտի բաց տեղերը, որոնք կարող են խանգարել խաղաղությանը, ոչ թե նման բաներից խոսեն»,- ասաց նա

18:11 - 07 հունիսի, 2024

Ալեն Սիմոնյանը հանդիպել է Սլովենիայի նախագահի հետ

Սլովենիա կատարած պաշտոնական այցի շրջանակում Ալեն Սիմոնյանի գլխավորած պատվիրակությունը հունիսի 5-ին հանդիպել է Սլովենիայի Հանրապետության նախագահ Նատաշա Պիրց-Մուսարի հետ: Հանդիպմանը քննարկվել է անվտանգային իրավիճակը Հարավային Կովկասում, Եվրոպայում եւ Միջին Արեւելքում: Ալեն Սիմոնյանը Նատաշա Պիրց-Մուսարին է ներկայացրել Հայաստան-Ադրբեջան բանակցությունների կարգավորման գործընթացը, շեշտել Ադրբեջանում ապօրինի պահվող հայ ռազմագերիների վերադարձի խնդրի անհապաղ լուծման անհրաժեշտությունը: ԱԺ նախագահը նշել է, որ Հայաստանը հաստատակամ է Հարավային Կովկասում խաղաղության հաստատման հարցում եւ ներկայացրել ՀՀ կառավարության «Խաղաղության խաչմերուկ» նախագիծը: Զրույցի առանցքում են եղել Հայաստանում ժողովրդավարական բարեփոխումները, համատեղ իրականացվող ծրագրերը Եվրոպական միության հետ: Հայաստան-Սլովենիա երկկողմ հարաբերությունների խորացման համատեքստում պայմանավորվածություն է ձեռք բերվել ընդլայնել ոլորտային փոխգործակցությունը:

20:07 - 05 հունիսի, 2024

Ալեն Սիմոնյանի եղբոր կնոջ եւ Էկոնոմիկայի նախարարության այլ պաշտոնատար անձանց վերաբերյալ քրեական վարույթը կարճվել է

ՀՀ ԱԺ նախագահ Ալեն Սիմոնյանի եղբոր կնոջ եւ Էկոնոմիկայի նախարարության այլ պաշտոնատար անձանց վերաբերյալ քրեական վարույթը կարճվել է։ Տեղեկությունը Ինֆոքոմի հետ զրույցում հաստատեցին Գլխավոր դատախազությունից՝ մանրամասնելով․ «Նկատի ունենալով, որ ներքոնշյալ անձինք նախաքննության ընթացքում համագործակցել են քրեական հետապնդման մարմնի հետ, ամբողջությամբ ընդունել և չեն վիճարկել իրենց ներկայացված մեղադրանքները, դրանցում նկարագրված փաստական հանգամանքները՝ հսկող դատախազի կողմից նշված անձանց կողմից ներկայացված միջնորդությունների քննարկման արդյունքում, որոշումներ են կայացվել վերջիններիս նկատմամբ գործուն զղջալու հիմքով հանրային քրեական հետապնդումը դադարեցնելու մասին»։ Մասնավորապես՝ 2024 թվականի մայիսի 17-ին առևտրային կազմակերպության աշխատակից Լ․ Մ․-ի (Լիլի Մկրյան) նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: 2024 թվականի մայիսի 20-ին առևտրային կազմակերպության աշխատակից Ա․Գ․-ի (Ալեն Սիմոնյանի եղբոր կինը՝ Անի Գևորգյան) նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: 2024 թվականի մայիսի 23-ին Էկոնոմիկայի նախարարության աշխատակից Ա.Ս.-ի նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: 2024 թվականի մայիսի 27-ին Էկոնոմիկայի նախարարության աշխատակից Ա.Ի.-ի նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: 2024 թվականի մայիսի 29-ին Էկոնոմիկայի նախարարության աշխատակից Ս.Գ.-ի նկատմամբ հարուցված հանրային քրեական հետապնդումը դադարեցվել է՝ գործուն զղջալու հիմքով: Բացի այդ, 2024 թվականի մայիսի 20-ին Էկոնոմիկայի նախարարության աշխատակից Ա.Ղ.-ի նկատմամբ հարուցված հանրային քրեական հետապնդումը դադարեցվել է՝ մեղսագրվող արարքը վերջինիս կողմից կատարված չլինելու հիմքով»: Նշենք, որ ՀՀ քրեական օրենսգրքի համաձայն՝ եթե անձն առաջին անգամ է հանցանք կատարել, ապա կարող է ազատվել քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, եւ նա համագործակցում է քրեական հետապնդման մարմինների հետ, չի վիճարկում իրեն մեղսագրվող արարքը, վնաս պատճառած լինելու դեպքում հատուցել կամ այլ կերպ հարթել է հանցագործությամբ պատճառված վնասը:

17:53 - 05 հունիսի, 2024

Սլովենիայի փոխվարչապետը Ալեն Սիմոնյանի հետ քննարկել է անվտանգային իրավիճակը Հարավային Կովկասում

ՀՀ ԱԺ նախագահ Ալեն Սիմոնյանի գլխավորած պատվիրակությունը Սլովենիա կատարած պաշտոնական այցի շրջանակում հունիսի 4-ին հանդիպել է Սլովենիայի փոխվարչապետ, արտաքին եւ եվրոպական գործերի նախարար Տանյա Ֆայոնի հետ: «Գոհունակությամբ եմ նշում, որ Հայաստանի եւ Սլովենիայի համագործակցությունը քայլ առ քայլ առաջ է ընթանում: Անցած տարիներին կանոնավոր շփումներ են իրականացվել նախարարությունների, դեսպանատների մակարդակով, ակտիվ փոխանակումներ կրթության, գիտության, մշակույթի, առողջապահության եւ շատ այլ ոլորտներում»,- նշել է Ալեն Սիմոնյանը: Անդրադառնալով միջազգային կազմակերպությունների շրջանակներում Հայաստանի եւ Սլովենիայի համագործակցությանը՝ Ալեն Սիմոնյանը երկու երկրների փոխգործակցությունը գնահատել է արդյունավետ: «Մենք անհամբեր սպասում ենք մոտ ապագայում ԵՄ-ի հետ ընդլայնված գործընկերության նոր առաջնահերթությունների հեռանկարների վերաբերյալ առարկայական քննարկումներ սկսելուն»,- հավելել է խորհրդարանի ղեկավարը: Զրուցակիցները քննարկել են անվտանգային իրավիճակը Հարավային Կովկասում եւ Եվրոպայում, Հայաստան-Ադրբեջան բանակցությունների գործընթացը, Հայաստան-ԵՄ փոխգործակցության ընդլայնման հեռանկարները, ինչպես նաեւ Հայաստան-Սլովենիա երկկողմ հարաբերություններին վերաբերող մի շարք հարցեր: Կարեւորվել է ՀՀ քաղաքացիների համար ԵՄ վիզաների ազատականացման երկխոսության մեկնարկը: Անդրադառնալով Հայաստան-Ադրբեջան հարաբերությունների կարգավորման գործընթացին՝ Տանյա Ֆայոնը նշել է. «Մենք տեսնում ենք Հայաստանի կառուցողական մոտեցումը Հարավային Կովկասում խաղաղության հաստատման հարցում»:

13:32 - 05 հունիսի, 2024

Հայաստանը հավատարիմ է ժողովրդավարության և խաղաղության սկզբունքներին. ՀՀ ԱԺ նախագահը՝ Սլովենիայի իր գործընկերոջը

Սլովենիա կատարած պաշտոնական այցի շրջանակում ՀՀ ԱԺ նախագահ Ալեն Սիմոնյանի գլխավորած պատվիրակությունը հունիսի 4-ին հանդիպել է ՍՀ ԱԺ նախագահ Ուրշկա Կլակոչար Զուպանչիչի հետ: Այս մասին տեղեկացնում են ԱԺ մամուլի ծառայությունից: Զրուցակիցները բարձր են գնահատել Հայաստանի և Սլովենիայի միջև հաստատված հարաբերությունները՝ ընդգծելով խորհրդարանական դիվանագիտության կարևորությունը երկու երկրների արդյունավետ փոխգործակցության հարցում: Հանգամանալից քննարկվել է անվտանգային իրավիճակը Հարավային Կովկասում և Եվրոպայում: Ալեն Սիմոնյանն Ուրշկա Զուպանչիչին է ներկայացրել ՀՀ կառավարության «Խաղաղության խաչմերուկ» նախագիծը, ընդգծել ծրագրի կարևորությունը Հարավային Կովկասում խաղաղության հաստատման և տարածաշրջանի երկրների համար առևտրատնտեսական հնարավորություններ ստեղծելու համատեքստում: «Հայաստանը հավատարիմ է ժողովրդավարության և խաղաղության սկզբունքներին»,- նշել է խորհրդարանի ղեկավարը: Զրույցի առանցքում են եղել Հայաստան-ԵՄ հարաբերությունների սերտացման հեռանկարները, ՀՀ քաղաքացիների համար ԵՄ վիզաների ազատականացման երկխոսության մեկնարկը, հայ-ադրբեջանական հարաբերությունների կարգավորման գործընթացը և Ադրբեջանում ապօրինի պահվող հայ ռազմագերիների վերադարձի հրամայականը: Հանդիպման ավարտին կողմերը հանդես են եկել համատեղ մամուլի հայտարարությամբ, որից հետո Ալեն Սիմոնյանը գրառում է կատարել Պատվավոր հյուրերի գրանցամատյանում և շրջայց կատարել Սլովենիայի Ազգային ժողովում:

19:29 - 04 հունիսի, 2024

Ալեն Սիմոնյանը մասնակցել է Հայաստան-Սլովենիա դիվանագիտական հարաբերությունների հաստատման 30-ամյակին նվիրված միջոցառմանը

Պաշտոնական այցով Լյուբլյանայում գտնվող ՀՀ ԱԺ նախագահ Ալեն Սիմոնյանի գլխավորած պատվիրակությունը հունիսի 3-ին մասնակցել է Հայաստան-Սլովենիա դիվանագիտական հարաբերությունների հաստատման 30-ամյակին նվիրված միջոցառմանը: Միջոցառմանը բացման խոսքով հանդես են եկել ՀՀ ԱԺ նախագահ Ալեն Սիմոնյանը եւ Սլովենիայի Հանրապետության ԱԺ նախագահ Ուրշկա Կլակոչար Զուպանչիչը: Գործընկերները շնորհավորել են միմյանց երկու երկրների համար այս խորհրդանշական տարեթվի կապակցությամբ եւ կարեւորել երեք տասնամյակների ընթացքում հաստատված ամուր բարեկամական հարաբերությունները: Ալեն Սիմոնյանն իր խոսքում նշել է, որ Հայաստանի եւ Սլովենիայի միջեւ ձեւավորվել են բարձր մակարդակի քաղաքական երկխոսություն եւ ամուր միջխորհրդարանական հարաբերություններ: Հայաստանի խորհրդարանի ղեկավարը բարձր է գնահատել փոխգործակցությունը հատկապես տնտեսական, հումանիտար եւ մշակութային ոլորտներում: «Մեր հարաբերությունները վերջին տարիներին առաջընթաց են գրանցել խորհրդարանական դիվանագիտության ոլորտում, ինչի վկայությունն են բարձր մակարդակի շփումներն ու այցելությունները: Ես խորապես հավատում եմ, որ մեր հարաբերությունները զարգանալու մեծ ներուժ ունեն: Որպես Հայաստանի Հանրապետության Ազգային ժողովի նախագահ՝ ես իմ լիարժեք պատրաստակամությունն եմ հայտնում էլ ավելի խթանելու երկու երկրների կապերը՝ ի շահ մեր ժողովուրդների»,- ասել է ԱԺ նախագահը: Միջոցառմանը շնորհավորական ելույթներով հանդես են եկել նաեւ ՀՀ-ում ՍՀ արտակարգ եւ լիազոր դեսպան Մատեյա Պրեւոլշեկն ու ՍՀ-ում ՀՀ արտակարգ եւ լիազոր դեսպան Աշոտ Հովակիմյանը:

21:02 - 03 հունիսի, 2024

Ալեն Սիմոնյանի գլխավորած պատվիրակությունը պաշտոնական այցով մեկնել է Սլովենիա

ՀՀ Ազգային ժողովի նախագահ Ալեն Սիմոնյանի գլխավորած պատվիրակությունը պաշտոնական այցով հունիսի 3-6-ը գտնվելու է Սլովենիայի Հանրապետությունում: Այցի շրջանակում նախատեսվում են երկկողմ հանդիպումներ Սլովենիայի բարձրաստիճան պաշտոնյաների, այդ թվում՝ ՍՀ նախագահ Նատաշա Պիրց-Մուսարի, ՍՀ ԱԺ նախագահ Ուրշկա Կլակոչար Զուպանչիչի եւ ՍՀ փոխվարչապետ, արտաքին եւ եվրոպական գործերի նախարար Տանյա Ֆայոնի հետ

09:23 - 03 հունիսի, 2024

Այսօր՝ 2024 թվականին, մենք կրկին պետականություն ենք կերտում․ Ալեն Սիմոնյան

Հայաստանի Ազգային ժողովի նախագահ Ալեն Սիմոնյանը շնորհավորական ուղերձ է հղել Հանրապետության տոնի առթիվ։ Ուղերձում ասված է․ «Սիրելի՛ հայրենակիցներ, Այսօր մենք տոնում ենք մեր պատմության կարևորագույն իրադարձություններից մեկը՝ Հայաստանի առաջին հանրապետության հիմնադրման օրը: 1918 թվականի մայիսի 28-ին՝ Սարդարապատի, Բաշ-Ապարանի, Ղարաքիլիսայի հերոսամարտերից հետո, վերականգնվեց դարեր շարունակ խաթարված հայոց պետականությունը: Հայ ժողովուրդն իր առջև ծառացած ծանրագույն ժամանակաշրջաններից մեկն ապրելով՝ կարողացավ ոչ միայն պահպանել իր ինքնությունը, լեզուն և մշակույթը, այլև կերտեց անկախ հանրապետություն, որը մերօրյա ազատ և ինքնիշխան Հայաստանի հիմնասյունն է: Չնայած նրան, որ Հայաստանի առաջին հանրապետության կյանքը միայն 2 տարի տևեց, այն շրջադարձային էր մեր ազգային մտածողության համար: Անկախ և ինքնիշխան պետություն ունենալու անկոտրում գիտակցությունն առայսօր կարևորագույն շարժիչ ուժն է՝ հաղթահարելու Հայաստանի առջև ծառացած մարտահրավերները, կերտելու և պահպանելու հզոր, ինքնիշխան և ժողովրդավար պետություն, որի հիմքում քաղաքացու ընտրական իրավունքն ու իրավահավասարությունն են: Այո՛, այսօր՝ 2024 թվականին, մենք կրկին պետականություն ենք կերտում: Հայաստանի Հանրապետությունը կա և լինելու է անկախ, ունենալու է միջազգայնորեն ճանաչված սահմաններ, որոնք երաշխիքն են լինելու Հայաստանի երրորդ հանրապետության ինքնիշխան, ժողովրդավար և խաղաղ ապագայի: Շնորհավո՛ր Հայաստանի առաջին հանրապետության հռչակման և մեր պետականության վերածննդի օրը: Շնորհավո՛ր Մայիսի 28»:

09:50 - 28 մայիսի, 2024

Քննարկվել է ԵՄ-Հայաստան վիզաների ազատականացման գործընթացը

ՀՀ ԱԺ նախագահ Ալեն Սիմոնյանը մայիսի 22-ին ընդունել է Լյուքսեմբուրգի Մեծ Դքսության Պատգամավորների պալատի նախագահ Կլոդ Վիզլերի գլխավորած պատվիրակությանը: Հանդիպումը մեկնարկել է խորհրդարանների նախագահների առանձնազրույցով, որին հաջորդել է ընդլայնված կազմով հանդիպումը: Զրուցակիցները փաստել են Հայաստանի եւ Լյուքսեմբուրգի միջեւ բարձր մակարդակի քաղաքական երկխոսության մասին` ընդգծելով խորհրդարանական դիվանագիտության կարեւորությունը երկու երկրների հարաբերությունների դինամիկ զարգացման հարցում: «Բարձր ենք գնահատում մայիսի 16-ին Լյուքսեմբուրգի Պատգամավորների պալատի կողմից միաձայն ընդունված բանաձեւը Հայաստանին աջակցելու, տարածաշրջանում խաղաղության եւ կայունության հաստատման վերաբերյալ: Կարեւորում ենք, որ բանաձեւում դատապարտվում է Ադրբեջանի չհիմնավորված ռազմական գործողության արդյունքում ավելի քան 100,000 հայերի բռնի տեղահանումը Լեռնային Ղարաբաղից եւ կոչ արվում անհապաղ ազատ արձակել հայ ռազմագերիներին»,- նշել է ԱԺ նախագահը` հավելելով, որ այժմ ամբողջ միջազգային հանրության կոչերն ուղղված են պաշտոնական Բաքվին` իրագործելու բոլոր պայմանները Լեռնային Ղարաբաղի հայության անվտանգ եւ արժանապատիվ վերադարձի համար իրենց դարավոր հայրենիք: Կլոդ Վիզլերը նշել է, որ Լյուքսեմբուրգը պատրաստ է շարունակել աջակցել Հայաստանին Հարավային Կովկասում խաղաղության եւ անվտանգության հաստատման հարցում: «Մենք խրախուսում ենք ինչպես մեր, այնպես էլ ԵՄ անդամ այլ պետությունների ներգրավվածությունը Հայաստան-Ադրբեջան բանակցությունների կարգավորմանը: Կարեւորում ենք եւ պահանջում ռազմագերիների անհապաղ վերադարձն իրենց հայրենիք»,- նշել է Լյուքսեմբուրգի խորհրդարանի ղեկավարը: Քննարկվել են Հայաստան-ԵՄ տնտեսական հարաբերությունների զարգացման հնարավորությունները, ԵՄ-Հայաստան վիզաների ազատականացման գործընթացը, Հարավային Կովկասում անվտանգային իրավիճակը եւ Հայաստան-Լյուքսեմբուրգ միջխորհրդարանական փոխգործակցությանը վերաբերող հարցերի լայն շրջանակ: Անդրադարձ է կատարվել ՀՀ կառավարության «Խաղաղության խաչմերուկ» նախագծին եւ դրա կարեւորությանը` տարածաշրջանում անվտանգության հաստատման, ինչպես նաեւ առեւտրատնտեսական հարաբերությունների հաստատման եւ զարգացման հարցում: Հանդիպման ավարտին Լյուքսեմբուրգի խորհրդարանի Պատգամավորների պալատի նախագահը գրառում է կատարել Պատվավոր հյուրերի գրքում:

14:06 - 22 մայիսի, 2024

Պահանջում ենք, որ Բաքուն անմիջապես ազատ արձակի բոլոր ռազմագերիներին․ Կլոդ Վիզլեր |news.am|

news.am: Լյուքսեմբուրգը հավատարիմ է աջակցելու ԵՄ քաղաքացիական առաքելությանը Հայաստանում և պատրաստ է հետագայում զարգացնել այս առաքելությունը երկու կողմերի հետաքրքրությունների շրջանակներում: Այդ մասին այսօր՝ մայիսի 22-ին, ՀՀ Ազգային ժողովում ԱԺ խոսնակ Ալեն Սիմոնյանի հետ համատեղ ասուլիսից հետո ԱԺ-ում ունեցած իր ելույթում հայտարարեց Լյուքսեմբուրգի Մեծ Դքսության Պատգամավորների պալատի նախագահ Կլոդ Վիզլերը: «Մենք նորից կանգնած ենք ԵՄ նոր համագործակցության ծրագրի հետևում, որի նպատակն է զարգացնել համագործակցությունը բոլոր առումներով: Մենք խոստանում ենք, որ ԵՄ-ն ակտիվ կերպով կշարունակի տարածաշրջանում Հայաստանի և Ադրբեջանի միջև միջնորդի դերը ստանձնել, որպեսզի խաղաղության գործընթացը հաջող եզրահանգման գա: Ես խոր հույս ունեմ, որ խաղաղության բանակցությունները հաջողության կհասնեն»,- ասաց նա: Կլոդ Վիզլերը նաև ընդգծեց՝ մինչև երկարատև խաղաղության հասնելը շատ կարևոր է ստեղծել միջավայր, որտեղ բաց, ազնիվ և կառուցողական երկխոսությունը կարող է զարգանալ: «Եկեք գործադրենք մեր բոլոր ջանքերը՝ խոչընդոտները վերացնելու համար: Դրա համար մենք անհապաղ պահանջում ենք, որ Բաքուն անմիջապես ազատ արձակի բոլոր ռազմագերիներին և համապարփակ տեղեկություն տրամադրի անհայտ կորած անձանց մասին: Արդարությունը և մարդասիրությունը պահանջում են, որ այս անձինք ազատ լինեն՝ առանց որևէ հետաձգման, և սա պահանջ է, որ ընտանիքները ստանան պատասխաններ, որոնց նրանք պարզապես արժանի են»,- ասաց նա: Դահլիճում հնչեցին ծափողջույններ:

13:40 - 22 մայիսի, 2024

Ավելի քան 100 հազար հայ բռնի տեղահանվեց անհիմն ու անարդարացի ռազմական գործողությունների հետևանքով. Վիզլեր |1lurer.am|

13:26 - 22 մայիսի, 2024

Հայաստանը պատրաստակամ է խորացնել Լյուքսեմբուրգի հետ համագործակցությունը առանց որևէ սահմանափակման․ Ալեն Սիմոնյան |armenpress.am|

armenpress.am: Լյուքսեմբուրգի Մեծ Դքսության Պատգամավորների պալատի նախագահ Կլոդ Վիզլերի այցը Հայաստան վկայում է Հայաստանի և Լյուքսեմբուրգի միջև ամուր և աճող հարաբերությունների, ինչպես նաև Հայաստանի անվտանգային մարտահրավերների նկատմամբ ոչ միայն անտարբեր չլինելու, այլև դրանց հասցեագրման գործում ներդրում ունենալու պատրաստակամության մասին։ Մամուլի ասուլիսի ժամանակ այս մասին ասաց Ազգային ժողովի նախագահ Ալեն Սիմոնյանը։ «Ցանկանում եմ ընդգծել, որ պարոն Վիզլերը և այստեղ ներկա գտնվող մյուս գործընկերներն այն մարդիկ են, որոնց ջանքերով Լյուքսեմբուրգի դիրքորոշումը շատ հստակ է Հայաստանին վերաբերող հարցերում, ինչի համար շնորհակալ ենք։ Սրա վկայությունն է Լյուքսեմբուրգի պատգամավորների պալատի կողմից այս այցին ընդառաջ ընդունված Հայաստանին աջակցող ընդարձակ բանաձևը, որն անդրադառնում է Հայաստանի համար կարևորություն ունեցող մի շարք հարցերի, այդ թվում՝ Ալմա-Աթայի հռչակագրի հիման վրա Հայաստանի և Ադրբեջանի սահմանազատման աշխատանքների շարունակական, ինչպես նաև Արդարադատության միջազգային դատարանի 2023 թվականի նոյեմբերի 17-ի պարտադիր ուժ ունեցող որոշման կատարման ու Ադրբեջանի կողմից հայ ռազմագերիներին անհապաղ ազատ արձակելու կարևորությանը։ Բանաձևը դատապարտում է նաև Ադրբեջանի չհիմնավորված և չարդարացված ռազմական գործողության արդյունքում ավելի քան 100 հազար հայերի բռնի գաղթը Լեռնային Ղարաբաղից, ընդգծում Հայաստան-ԵՄ, Հայաստան-Լյուքսեմբուրգ հարաբերությունների խորացման կարևորությունը»,- ասաց Սիմոնյանը։ Հայաստանի ԱԺ նախագահը տեղեկացրեց, որ գործընկերոջ հետ հանդիպմանը քննարկել է բանաձևում ներկայացված տեսլականի մանրամասները՝ ընդգծելով Հայաստանի պատրաստակամությունը խորացնելու Լյուքսեմբուրգի հետ համագործակցությունը առանց որևիցե սահմանափակման՝քաղաքական երկխոսությունից մինչև պաշտպանական համագործակցություն, դիվանագիտական հարաբերությունների խորացումից մինչև կրթական, գիտական, նորարարության և մի շարք այլ ոլորտներում համագործակցության ընդլայնմամբ։

13:06 - 22 մայիսի, 2024

Ալեն Սիմոնյանը Ուկրաինայի Գերագույն ռադայի նախագահի հետ քննարկել է միջխորհրդարանական կապերի ընդլայնման հնարավորությունները

Ուկրաինական կողմի նախաձեռնությամբ մայիսի 21-ին տեսակոնֆերանսի ձևաչափով տեղի է ունեցել զրույց ՀՀ ԱԺ նախագահ Ալեն Սիմոնյանի և Ուկրաինայի Գերագույն ռադայի նախագահ Ռուսլան Ստեֆանչուկի միջև: Այդ մասին հայտնում են ԱԺ-ից: Զրուցակիցները քննարկել են անվտանգային իրավիճակը Հարավային Կովկասում և Ուկրաինայում, Հայաստան-Ուկրաինա միջխորհրդարանական կապերի ընդլայնման հնարավորությունները, ինչպես նաև փոխադարձ հետաքրքրություն ներկայացնող այլ հարցեր:

18:24 - 21 մայիսի, 2024

2026-ի ընտրություններին ՔՊ-ն այդ գյուղերում հաղթելու է շռնդալից ձևով․ Ալեն Սիմոնյան |azatutyun.am|

azatutyun.am: Ի՞նչ է լինելու, եթե կիրանցեցիները հրաժարվեն դուրս գալ իրենց տներից, որոնք պետք է անցնեն Ադրբեջանի վերահսկողության տակ, «Ազատության» այս հարցին Ազգային ժողովի նախագահ Ալեն Սիմոնյանը պատասխանեց՝ կբանակցեն այնքան ժամանակ, մինչև որ իրենց համաձայնությունը տան: Հարցին, թե հնարավո՞ր է նրանց թույլ տան մնալ իրենց տներում, ԱԺ նախագահը պատասխանեց. - «Չգիտեմ, ամեն ինչ էս աշխարհում հնարավոր է: ժամը մեկ ամեն ինչ փոխվում է, կարա շատ բան փոխվի»: ԱԺ խոսնակը վստահեցրեց՝ ՀՀ-ն իր քաղաքացիներից որևէ մեկին չի նեղացնելու, անտեր չի թողնելու, անտուն չի թողնելու: «Վստահեցնում եմ, մի քանի տարի հետո էդ գյուղերը լինելու են օրինակելի գյուղեր: Եվ 2026-ի ընտրություններին «Քաղաքացիական պայմանագիրը» այնտեղ հաղթելու է շռնդալից ձևով», - ասաց Սիմոնյանը: Հայաստանի ու Ադրբեջանի սահմանազատման հանձնաժողովները մայիսի 15-ին ստորագրեցին ԽՍՀՄ ԶՈՒ գլխավոր շտաբի 1976թ. քարտեզով Բաղանիս– Բաղանիս Այրում, Ոսկեպար– Աշաղը Ասկիպարա, Կիրանց– Խեյրումլի և Բերքաբեր– Կըզըլ Հաջիլի բնակավայրերի միջև սահմանագծի համաձայնեցման մասին արձանագրությունը։ Իշխանության պնդմամբ՝ սա ԽՍՀՄ վերստուգված ամենավերջին քարտեզներն են: Երևանի ու Բաքվի ավելի վաղ ձեռք բերած պայմանավորվածության համաձայն՝ այս հատվածներն այլևս համարվում են սահմանազատված։ Օրեր առաջ Անվտանգության խորհրդի քարտուղար Արմեն Գրիգորյանը հարցազրույց տվել Հանրային ու ասաց, որ Կիրանցում 4 շինություն է անցնում այն կողմ՝ մեկ տուն, մեկ կացարան, ավտոտնակ և խանութ: Բացի տներից, նաև կամրջի հարցը կա այստեղ, ընդհանրապես Վրաստան գնացող միջպետական ճանապարհի մի հատվածն անցնում է ադրբեջանական կողմին: Պաշտոնյաները խոստանում են, որ շրջանցիկ ճանապարհ է կառուցվելու երկու ամսվա ընթացքում:

14:59 - 21 մայիսի, 2024

ՀՀ իշխանություններն ամեն ինչ անելու են, որ այն, ինչ պատկանում է ՀՀ-ին, վերադառնա ՀՀ-ին. Ալեն Սիմոնյան |1lurer.am|

1lurer.am: ՀՀ տարածքից չի զիջվել, չի զիջվում, չի զիջվելու, չի քննարկվել, չի քննարկվում, չի քննարկվելու, և դրա մասին նույնիսկ խոսակցություն տեղի չի ունեցել և չի կարող տեղի ունենալ: Այդ մասին ԱԺ ճեպազրույցների ժամանակ ասաց խորհրդարանի խոսնակ Ալեն Սիմոնյանը՝ անդրադառնալով Կիրանցում սահմանազատման գործընթացին: Հարցին՝ այդ դեպքում կիրանցիներին ի՞նչ փոխհատուցումներ տալու մասին է խոսքը, եթե ՀՀ սուվերեն տարածքից 1 միլիմետր չի զիջվում, Ալեն Սիմոնյանը պատասխանեց. «Փոխհատուցումները տրվում են այն բանի համար, որ այդ մարդկանց իրավիճակն այդ սահմանային փոփոխության հետևանքով ինչ-որ ձևով փոխհատուցվի: Բայց դա չի նշանակում, որ մենք տալիս ենք այն, ինչ պատկանում է ՀՀ-ին, և չի նշանակում, որ նույն կիրանցիները, օրինակ, երբ ավելանում է մի քանի հեկտարով, իրենք վերցնում են Ադրբեջանից [տարածք]»: Ըստ Ալեն Սիմոնյանի՝ ընտրվել է 1976 թվականի քարտեզը, որովհետև դրանց տակ կա իրավական հիմք, որը նաև Ադրբեջանի կողմից է հաստատված, ոչ միայն հայկական կողմից: «ՀՀ սահմանն այն սահմանն է, որով ՀՀ-ն անկախացել է, այդտեղ վերադառնում ենք Ալմա-Աթայի հռչակագրին, որում նշված է, որ ՀՀ-ն և մնացած հանրապետությունները, որոնք ստորագրել են այդ փաստաթուղթը, այդ թվում՝ Ադրբեջանը, իրենց վարչական սահմաններով դառնում են [հանրապետություն]»,- ասաց նա և հավելեց, որ վստահ է՝ ՀՀ իշխանություններն ամեն ինչ անելու են, որ այն, ինչ պատկանում է ՀՀ-ին, վերադառնա ՀՀ-ին, և այն, ինչ պատկանում է Ադրբեջանի Հանրապետությանը, վերադառնա հավասարության սկզբունքով:

13:20 - 21 մայիսի, 2024

Ինձ համար անընդունելի է, որ եկեղեցականն ու Եկեղեցին զբաղվում են քաղաքականությամբ. Ալեն Սիմոնյան

Դերակատարները նույնն են, հայտնի են: Հիմա թե ինչ կերպարանքով հանդես կգան՝ նախասիրության հարց է: Որևիցե նոր բան չենք տեսնում, որևիցե անսպասելի և անծանոթ բան չենք տեսնում: Այսինքն՝ այն պրոցեսները, որոնք տեղի են ունեցել ՀՀ-ում անցյալում, նույնի կրկնությունն է: Վազգեն Մանուկյանին փոխարինել են Բագրատ սրբազանով: Այդ մասին ԱԺ ճեպազրույցների ժամանակ ասաց խորհրդարանի խոսնակ Ալեն Սիմոնյանը՝ անդրադառնալով ներքաղաքական զարգացումներին և սահմանազատման գործընթացի մասով դժգոհություններին: «Անհնար է, որ որևիցե երկրում, որևիցե իշխանություն, այդ թվում՝ մենք, 100 տոկոսանոց աջակցություն [ունենանք] և 100 տոկոսանոց ընկալում ամեն ինչի: Մենք դրանից ենթադրություն ենք անում, որ մեր աշխատանքը է՛լ ավելի պետք է ուժեղացնենք, և մարդկանց հասցնենք այն ամենը, ինչ կատարվում է: Այստեղ կարծիքների բախում է, և ես որևիցե աննորմալ, արտառոց բան չեմ տեսնում»,- ասաց Ալեն Սիմոնյանը և հավելեց, որ սա «նորմալ ժողովրդավարական» գործընթաց է: Հարցին՝ Ալեն Սիմոնյանը բացառո՞ւմ է, որ մի ընթացք գա, որ իշխող ուժն ընդունի սրբազանի առաջարկած հաշտեցման գործընթացը և առաջընթաց քայլ անի, ԱԺ խոսնակն արձագանքեց՝ ո՞ւմ հետ հաշտություն, դա աբսուրդ է: «Նախ՝ ինձ համար անընդունելի է, որ եկեղեցականն ու Եկեղեցին զբաղվում է քաղաքականությամբ: Եկեղեցին չպետք է զբաղվի քաղաքականությամբ... Անտարբեր նայելը և քաղաքական գործունեությամբ զբաղվելը տարբեր բաներ են: Աստվածաշնչի մեջ էլ է ասված՝ իմ հոր տունը մի՛ սարքեք առևտրի տեղ, քաղաքականությունն առևտուր է, այսինքն՝ ձեզ թվում է՝ երբ մենք միջազգային գործընկերների հետ բանակցում ենք, քաղաքական առևտրով չենք զբաղվո՞ւմ: Քաղաքականությունը առևտուր է: Առևտուր է, երբ կոալիցիա ես ստեղծում, երբ ցուցակ ես կազմում, և Եկեղեցին, իր գործը թողած, զբաղվում է առևտրով»,- ասաց Ալեն Սիմոնյանը:

12:27 - 21 մայիսի, 2024