Մհեր Գրիգորյան

Մհեր Գրիգորյանը (փետրվարի 15, 1972, Աշտարակ) ՀՀ փոխվարչապետն է (2018 թ., մայիսի 12), ֆինանսաբանկային համակարգի մասնագետ, իրավաբան: 1989-1991 թթ. սովորել է Լոմոնոսովի անվան Մոսկվայի պետական համալսարանի իրավագիտության ֆակուլտետում: 1991-1994 թթ․ սովորել է ԵՊՀ իրավագիտության ֆակուլտետը։ 1997-1998 թթ. անցել է Մեծ Բրիտանիայի Լիդսի համալսարանի բիզնես դպրոցի 6-ամսյա որակավորման դասընթաց:

Մասնագիտական գործունեությունը սկսել է 1996 թ․ ՀՀ Կենտրոնական բանկում՝ որպես իրավաբան։ 1999-2005 թթ․ աշխատել է «Հայներարտբանկ» ՓԲԸ-ում (հետագայում՝ «Ամերիաբանկ» ՓԲԸ), 2002-2006 թթ. մատուցել է իրավաբանական-խորհրդատվական ծառայություններ Համաշխարհային բանկին: 2004-2005 թթ. համատեղության կարգով աշխատել է HSBC Բանկ Հայաստանի իրավաբանական ծառայության ղեկավարի պաշտոնում:

2005 թ․ նշանակվել է «Ինեկոբանկ» ՓԲԸ-ի գործադիր տնօրեն։ 2007-2011 թթ․ զբաղեցրել է «ՎՏԲ Բանկ-Հայաստան» ՓԲԸ-ի գլխավոր տնօրենի տեղակալի պաշտոնը: 2011 թ․ նշանակվել է «Արդշինբանկ» ՓԲԸ-ի վարչության նախագահ և աշխատել մինչև 2018 թ․ մայիսի 12-ը:

Գազավորված ըմպելիք արտադրողները ժամանակավորապես կդադարեցնեն բողոքի ցույցերը․ |news.am|

Փոխվարչապետ Մհեր Գրիգորյանը խոստացել է Հարկային օրենսգրքի փոփոխությունների փաթեթի գազավորված ըմպելիքների հարկման հարցը վերջնական քննարկել գազավորված ըմպելիքներ արտադրող ընկերությունների հետ, ապա նոր ուղարկել Ազգային ժողով։ Այս մասին NEWS.am-ի հետ զրույցում ասաց «Հայ կոլա» ընկերության տնօրեն Տիգրան Հովսեփյանը՝ անդրադառնալով փոխվարչապետ Մհեր Գրիգորյանի աշխատասենյակում տեղի ունեցած երեկվա հանդիպմանը։ «1 ժամ քննարկումից հետո փոխվարչապետը խոստացավ, որ մինչեւ հարցը մեզ հետ եւս մեկ անգամ վերջնական չքննարկեն, Ազգային ժողով չեն ուղարկի։ Ժամկետներ չեն պայմանավորվել, սակայն հաջորդ ուրբաթ զանգահարելու եմ, որպեսզի պարզեմ՝ ինչ քննարկումներ կան»,- ասաց նա։ «Հայ կոլա» ընկերության տնօրենի խոսքով՝ հանդիպմանը ներկա էին ֆինանսների նախարար Ատոմ Ջանջուղազյանը, առողջապահության նախարար Արսեն Թորոսյանը, տնտեսական զարգացման եւ ներդրումների նախարար Տիգրան Խաչատրյանը, ֆինանսների փոխնախարար Արման Պողոսյանը, ինչպես նաեւ վարչապետի օգնական Նաիրի Սարգսյանը․ «Ծավալվեց իրական քննարկում մեր 4 տեղական արտադրողների՝ «Հայ կոլա», «Մարի կոլա», «Թամադա լիմոնադներ», «Անի-Թամարա» ՍՊԸ ներկայացուցիչների հետ»,- նշեց նա։ Տիգրան Հովսեփյանը պատմեց, որ հանդիպման սկզբում առողջապահության նախարար Արսեն Թորոսյանը միանգամից ասել է, որ հարցը չպետք է ներկայացնել որպես առողջապահական խնդիր. «Քննարկմանը առողջապահության նախարար Արսեն Թորոսյանը նշեց, որ երբեւիցե չի ապացուցվել ասպարտամի վնասակարությունը։ Նա հստակ նշեց, որ եթե որոշվել է ասպարտամը կապել վնասակարության հետ, ապա ինքը համաձայն չէ դրա հետ, քանի որ եթե այն վնասակար է, ապա ՀՀ ներմուծվող դեղորայքի 90 տոկոսը պետք է արգելել, բացի այդ պետք է հարկել նաեւ մանկական կերերը, յոգուրտները, պաղպաղակները եւ այլն։ Նա քննարկումը վերադարձրեց շաքարի վնասակարության դաշտ, այսինքն՝ նա պնդեց, որ վնասակար են 5 տոկոսից ավելի շաքար պարունակող մթերքները»։ Տնտեսվարողները համաձայնել են շաքարով գազավորված ըմպելիքները հարկել այդ հարկատեսակով եւ դադարեցնել բողոքի ցույցերը. «Սակայն եթե որոշեն ասպարտամի համար հարկել, ապա տնտեսվարողները խոստացել են շարունակել իրենց պայքարը»,- նշեց ընկերության տնօրենը։ Նա նշեց, որ, մասնավորապես, «Հայ կոլան» շաքարով էլ է աշխատում, սակայն դեմ չեն դրանք հարկել. «Ապակյա շշերով ըմպելիքներն 100 տոկոսով հենց շաքարով են։ Ապակյա շշերի մեջ 10-12 տոկոս շաքար կա, ապակյա շշերը միանշանակ պետք է հարկվեն։ Սակայն ապակյա շիշը թանկ սեգմենտ է, եթե այն վաճառում ենք 60-65 դրամով, ռեստորանները վաճառում են 200 դրամով, մենք կարող ենք իրենց 75 դրամով մատակարարել, իրենք էլի 200 դրամով վաճառեն»։ Փոխվարչապետ Մհեր Գրիգորյանի գրասենյակից NEWS.am-ին հայտնեցին, որ այդ հարցով քննարկումները շարունակվում են։ news.am

07:58 - 21 մարտի, 2019