Ադրբեջանցիներն Արցախի Խրամորթ գյուղի վարչական սահմանների մոտ քարոզչական հայտարարություններ են արել, բայց բնակիչները չեն տրվում սադրանքներին
Երեկ երեկոյան՝ ժամը 6-ի սահմաններում, ադրբեջանական զինված ուժերի ներկայացուցիչներն Արցախի Հանրապետության Ասկերանի շրջանի Խրամորթ գյուղի վարչական սահմանների մոտ բարձրախոսով ձայնագրություն են միացրել, որում հայտարարվել է, թե բնակիչները պետք է լքեն բնակավայրը, այլեւս վար ու ցանք չանեն Խրամորթում, որ այն իբրեւ թե ադրբեջանական տարածք է եւ այլն։ Այս մասին Infocom-ի հետ զրուցում ասաց Խրամորթի գյուղապետ Զորիկ Աբրահամյանը.
«Ժամը վեցի արանքին իրենց քարոզչության մեքենան հայերենով զապիս էր միացրել՝ միկրաֆոններն ավտոյի վրա դրած, թե իբր դա ադրբեջանական հող ա, դուք պիտի լքեք, գյուղատնտեսական աշխատանքներ մի արեք, եթե չեք ուզում կորուստներ ունենաք, եթե ձեր համար թանկ է երեխաների կյանքը»,- մանրամասնեց գյուղապետը՝ համոզմունք հայտնելով, որ սա ընդամենը ադրբեջանական քարոզչամեքենայի գործիքներից է՝ մարդկանց մեջ տագնապ արթնացնելու համար։ Սակայն Աբրահամյանը միեւնույն ժամանակ վստահեցրեց, որ գյուղացիներն այդպիսի սադրանքների չեն տրվում.
«Հոգեբանական ճնշում են ուզում անել, որ ժողովրդին խուճապի մեջ գցեն, էդքան բան։ Բայց մեր վրա դա չի ազդում»,- շեշտեց մեր զրուցակիցը, հավելելով՝ մարդիկ մնալու են Խրամորթում, տեղ չունեն գնալու իրենց հայրենի գյուղից։
Գյուղապետի խոսքով՝ պատերազմի դադարից հետո նման դեպք երկրորդ անգամ է լինում, մեկը՝ երեկ, մեկն էլ՝ օրեր առաջ։ Բայց կրակոցներ չեն եղել, միայն խոսքերով են փորձել խուճապ տարածել։
Միայն թե այս տարվա փետրվարին Խրամորթի վարչական սահմաններում հերկ անելիս ադրբեջանցիները կրակել են Ասկերանի շրջանի Խնապատ գյուղի բնակչի ուղղությամբ. գյուղապետի փոխանցմամբ՝ գնդակը դիպել է տրակտորի անվադողին, ծակել, բնակիչը չի տուժել բարեբախտաբար։
Այս պահին գյուղամիջյան հատվածներում տեղացիները գյուղատնտեսական աշխատանքներ անում են, բայց սահմանին մոտ՝ դեռեւս ոչ, բանն այն է, որ վարելահողերը շատ մոտ են հակառակորդին, դիտարկվում են, բայց այգիներում աշխատանքները շարունակվում են։
Մեր հարցին ի պատասխան՝ Աբրահամյանը մեկնաբանեց, որ հակառակորդի այս գործելաոճը գոնե սաստելու համար իշխանությունները միջամտություններ անում են, բանակցում են, խաղաղապահների հետ անում են այն, ինչ իրենցից կախված է։
Զորիկ Աբրահամյանի փոխանցմամբ՝ այս պահին գյուղում հանգիստ է իրավիճակը, իսկ սահմանի մոտ առավոտվա դրությամբ սադրանքներ չեն եղել։ Բնակիչներն էլ, ասում է, խուճապի չեն մատնվում, մտադիր էլ չեն լքել գյուղը, ինչն ապացույցն է, որ հակառակորդի այստեսակ քարոզչական սադրանքներն անօգուտ են։
Լուսանկարում՝ Խրամորթի գյուղապետ Զորիկ Աբրահամյանը
Հայարփի Բաղդասարյան
11:26 - 26 փետրվարի, 2022