Տիգրան Ավինյան

ՀՀ նախկին փոխվարչապետ, «Քաղաքացիական պայմանագիր» կուսակցության վարչության անդամ։ Ծնվել է 1989թ. փետրվարի 28-ին։ 2005 թվականին ավարտել է Երեւանի Ալեքսանդր Պուշկինի անվան թիվ 8 դպրոցը: 2009 թվականին ավարտել է Հայ-ռուսական (սլավոնական) համալսարանի կիրառական մաթեմատիկայի ֆակուլտետի բակալավրիատը: 2011 թվականին ավարտել է Հայ-ռուսական (սլավոնական) համալսարանի կիրառական մաթեմատիկայի ֆակուլտետի մագիստրատուրան (տնտեսագիտության մեջ մաթեմատիկական մոդելավորման գծով): 2014 թվականին գերազանցությամբ ավարտել է Լոնդոնի Մարիա թագուհու համալսարանը, ստանալով ֆինանսների մագիստրոսի կոչում:

2009-2013 թվականներին աշխատել է Զարգացման Հայկական Բանկում որպես բիզնես վարկավորման բաժնի ավագ մասնագետ: 2010-2011 թվականներին հիմնադրել եւ ղեկավարել է ոռոգման համակարգերի տեղադրմամբ եւ լանդշաֆտային դիզայնով զբաղվող «Իրիգեյթ» ընկերությունը: 2014-2016 թվականներին աշխատել է ՇՏԵ ընկերությունում որպես SAP համակարգերի խորհրդատու: 2014-2018 թվականներին ղեկավարել է ծրագրային ապահովմամբ զբաղվող «Սայբեր Վիժըն» ընկերությունը։

2017-2018 թվականներին եղել է Երեւան քաղաքի ավագանու անդամ «ԵԼՔ» խմբակցությունից։ 2018 թվականի մայիսի 11-ին նշանակվել է Հայաստանի Հանրապետության փոխվարչապետ: Ավինյանի ընտանիքին են պատկանում «Սայբեր Վիժըն» ընկերությունը, որը այժմ ղեկավարում է նրա կինը՝ Մարիամ Պահլավունին, «Իրիգեյթ» ընկերությունը, որը ղեկավարում է նրա հայրը՝ Արմեն Ավինյանը։

Տեղի է ունեցել Թվայնացման խորհրդի անդրանիկ նիստը

Փետրվարի 5-ին փոխվարչապետ Տիգրան Ավինյանի գխավորությամբ տեղի է ունեցել Թվայնացման խորհրդի անդրանիկ նիստը: Տիգրան Ավինյանը հանդես է եկել ելույթով, որում, մասնավորապես, ասել է. «Հարգելի՛ գործընկերներ, Ողջունում եմ բոլորիդ Թվայնացման խորհրդի անդրանիկ նիստին։ Ինչպես հայտարարել ենք նախընտրական քարոզարշավի ժամանակ, այնպես էլ կառավարության ծրագրում ամրագրված է, որ մենք ցանկանում ենք կառուցել տեխնոլոգիապես զարգացած ու նորարարական լուծումներով հարուստ երկիր, ստեղծել մարտահրավերներին դիմագրավող և տեղի ունեցող բեկումնային փոփոխություններից առավելագույնը քաղող պետական համակարգ: Այս նպատակներին հասնելու համար առանցքային դեր ունի թվայնացումը։ Թվայնացումը, նորարարությունը և նորագույն տեխնոլոգիաները կառավարությունը դիտարկում է որպես արդյունավետ ու մասնակցային պետական կառավարման համակարգ ունենալու, բարենպաստ բիզնես միջավայր ստեղծելու և տնտեսության առաջանցիկ աճը ապահովելու, բնակչությանը որակյալ հանրային ծառայություններ մատուցելու կարևորագույն գործիք։ Կառավարման արդյունավետության, տեխնոլոգիական զարգացման և թվայնացման ոլոտներում մենք կոնկրետ թիրախներ ենք ամրագրել:Այսպիսով.- Առաջին հերթին իրականացնել պետական կառավարման համակարգի արդիականացում, թվայնացում ու ավտոմատացում,- Ապահովել գործառույթների ծախսատարության գնահատում և ծախսերի նվազեցմանն ուղղված բարեփոխումների իրականացում, ինչպես նաև անհարկի բյուրոկրատական ընթացակարգերը կրճատել,- Ապահովել պետական տեղեկատվական համակարգի փոխգործելիությունը և համաժամանակեցումը,- Արդիականացնել, ավտոմատացնել և թվայնացնել պետության կողմից մատուցվող ծառայությունները՝ «մեկ կանգառ, մեկ պատուհան» ու «միայն մեկ անգամ» սկզբունքների հիման վրա: Սա հնարավորություն կտա պետական մարմինների միջև տվյալների փոխանակման շնորհիվ քաղաքացուց որևէ տվյալ պահանջել ընդամենը մեկ անգամ,- Իրականացնել տնտեսության թվայնացումը և թվային տնտեսության զարգացման համար ապահովել բարենպաստ միջավայր,- Թվայնացման ընթացքում ապահովել տեղեկատվական անվտանգությունը, կիբեռանվտանգությունը և անձնական տվյալների պաշպանությունը։ Ընդհանուր առմամբ, թվայնացման և տեխնոլոգիական զարգացման մասով սահմանված նպատակները բավականին հավակնոտ են և վերաբերում են պետական կառավարման, տեղական ինքնակառավարման և տնտեսության գրեթե բոլոր ոլորտներին: Նշված նպատակների իրականացումը պահանջում է համակարգված միջգերատեսչական համագործակցություն և հենց աշխատանքները ներդաշնակեցնելու նպատակով էլ ստեղծվել է Թվայնացման խորհուրդը։ Խորհրդի շրջանակներում մենք ապահովելու ենք․• Թվայնացմանը վերաբերող բոլոր ռազմավարությունների, ռազմավարական և ծրագրային փաստաթղթերի քննարկում,• Թվայնացմանը վերաբերող քաղաքականությունների ներդաշնակեցում,• Միջազգային կազմակերպությունների հետ համագործակցության համակարգում։Տարբեր պետական և տեղական ինքնակառավարման մարմիններ մեծածավալ աշխատանքներ են կատարել կառավարման ոլորտում ծառայությունները թվայնացնելու ուղղությամբ։ Առանձին գերատեսչություններ կիրառել են նորագույն տեխնոլոգիաներ: Կան գերատեսչություններ, որոնք կիրառել են արհեստական բանականության տարրեր։ Գնահատելով թվայնացման ոլորտում իրականացված աշխատանքների կարևորությունն ու արժեքը, այնուամենայնիվ գտնում եմ, որ թվայնացման ոլորտում պետք է վարվի միասնական պետական քաղաքականություն, ծրագրերը պետք է իրականացվեն փոխհամաձայնեցված, իսկ Թվայնացման խորհուրդը պետք է հանդիսանա այս ամենը համակարգող և համաձայնեցնող մարմինը»։ Այնուհետև Բարձր տեխնոլոգիական արդյունաբերության նախարար Հակոբ Արշակյանը ու նախարարի տեղակալ Արմեն Աբրոյանը ներկայացրել են թվայնացման ռազմավարության մասին զեկույց՝ մանրամասն անդրադառնալով ռազմավարության ցուցանիշներին ու թիրախներին: Դրանից հետո Պետական եկամուտների կոմիտեի նախագահի տեղակալ Միքայել Փաշայանը ներկայացրել է ՀՀ-ում խաղային ոլորտի թվայնացման «ճանապարհային քարտեզ», այն է՝ ՀՀ համապատասխան ստանդարտների ներդնում և ՊԵԿ ԷԿՀ (մոնիթորինգային կենտրոնի) ստեղծում:Զեկույցների ներկայացմանը հաջորդել է հարցուպատասխան:

05:28 - 06 փետրվարի, 2020

Տեղի է ունեցել Հայաստան-Եվրամիություն ներդրումային համաժողովի կազմակերպման միջգերատեսչական հանձնաժողովի նիստ

Հունվարի 22-ին փոխվարչապետ Տիգրան Ավինյանի գլխավորությամբ տեղի է ունեցել Հայաստան-Եվրոպական միություն ներդրումային համաժողովի կազմակերպման միջգերատեսչական հանձնաժողովի անդրանիկ նիստը: Տիգրան Ավինյանը հանդես է եկել ելույթով, որում, մասնավորապես, ասել է. «Հարգելի՛ պարոն Մարագոս,Հարգելի՛ դեսպան Վիկտորին,Հարգելի՛ գործընկերներ, Ողջունում եմ բոլորիդ Հայաստան-Եվրոպական միություն ներդրումային համաժողովի կազմակերպման միջգերատեսչական հանձնաժողովի անդրանիկ նիստին։ Կուզենայի խոսել այն նպատակների մասին, որոնց մենք պետք է հասնենք այս համաժողովի միջոցով: Կարծում եմ առաջին հերթին դա բազմապրոֆիլ օտարերկրյա ներդրումների ներգրավումն է, նոր գործարար կապերի հաստատումը, և, որ ամենակարևորն է, Եվրոպական միության հետ քաղաքական ու տնտեսական հարաբերությունների խորացումը և էլ ավելի ամրապնդումը: Համաժողովը ՀՀ վարչապետ Նիկոլ Փաշինյանի և Եվրամիության ընդլայնման և հարևանության քաղաքականության հարցերով արդեն նախկին հանձնակատար Յոհանես Հանի միջև ձեռք բերված պայմանավորվածությունների արդյունքն է: Եվ կցանկանայի շնորհակալություն հայտնել Եվրամիության մեր գործընկերներին՝ մեր կողքին լինելու և համաժողովի աշխատանքներին աջակցություն ցուցաբերելու համար։ Հարգելի՛ գործընկերներ, նախևառաջ կցանկանայի առանձնացնել համաժողովի մի քանի հայեցակարգային մոտեցումներ ու սկզբունքներ, որոնք կուղղորդեն մեր առաջիկա աշխատանքները։ Առաջին հերթին կարևորում եմ ներդրումային համաժողովի ռազմավարական նպատակների սահմանումը, որոնք պիտի բխեն պետության երկարաժամկետ տնտեսական առաջնահերթություններից ու ներդաշնակեցվեն տարվող այլ քաղաքականությունների ու միջոցառումների հետ։ Հետևապես, ակնկալվում է, որ հստակ ձևակերպված ցուցանիշների առկայություն պետք է լինի։ Համաժողովի նպատակը պիտի լինի ոչ այնքան Հայաստանի մասին ներդրողների շրջանում իրազեկվածության բարձրացումը, որքան ավելի կոնկրետ և իրական գործարար կապերի ստեղծումը և մեր կողմից թիրախավորված ուղղություններով օտարերկրյա ներդրումների ներգրավումը։ Հայաստանն արդեն ունի ներդրումային համաժողովների անցկացման որոշակի փորձ։ Անհրաժեշտ է հաշվի առնել նախորդ համաժողովներից քաղված դասերը՝ խուսափելով նախկին սխալները կրկնելուց և հնարավորինս կառուցելով հաջողված օրինակների վրա։ Համաժողովի արդյունավետությունը բարձրացնելու նպատակով պիտի ընտրենք երկու-երեք, առավելագույնը չորս թիրախային թեմաներ, որտեղ մենք ներդրումների կլանման ու հետագա զարգացման մեծ պոտենցիալ ունենք։ Մեր նպատակը պիտի լինի առաջադեմ ու ապագայամետ, տեխնոլոգիական զարգացման հնարավորություններից օգտվող ու մարդկային կապիտալի զարգացման մեծ պոտենցիալ ունեցող պետություն ներկայանալը։ Ընդ որում՝ մենք պետք է ուշադրություն դարձնենք ոչ այնքան կարճաժամկետ հնարավորություններին, այլ երկարաժամկետ կտրվածքում արդյունքներ ապահովող ոլորտներին՝ մասնավորապես, հետազոտության և մշակման, նորարարության և կանաչ տնտեսության վրա։ Այս համաժողովի առանձնահատկությունը նաև պիտի լինի բազմաշահառու համագործակցության ապահովումը։ Համաժողովը պիտի դիտարկվի ոչ այնքան պետական ծրագրերը ներկայացնելու հարթակ, որոնք բազմաթիվ են, որքան մասնավոր հատվածի մեծ ներդրումային ծրագրերի համար ֆինանսավորման ներգրավման բացառիկ հնարավորություն, որտեղ պետությունը ներկայանալու է իբրև մասնավոր հատվածի գործընկեր և ներդրումների համար բարենպաստ միջավայր ու դրանց պաշտպանության երաշխիքներ ստեղծող։ Պատահական չէ, որ հանձնաժողովի աշխատանքներում ներգրավել ենք նաև ոլորտային ասոցիացիաների ներկայացուցիչների, քանի որ վստահ ենք, որ դուք մեզ հետ համատեղ պիտի լինեք համաժողովի սեփականատերը։ Բացի այդ՝ համաժողովի ձևաչափը հնարավորություն է տալու ավելի ակտիվացնելու մասնավոր հատվածի, փորձագիտական խմբերի ու զարգացման գործընկերների հետ ամենօրյա շփումները։ Կարծում եմ, որ համապատասխան գերատեսչությունները պիտի օգտագործեն ընձեռված հնարավորությունները՝ վեր հանելու ներդրումային միջավայրի գրավչությունը նվազեցնող խնդիրները և հընթացս այդ խնդիրներին արդեն կոնկրետ լուծումներ տան։ Եվ վերջապես, համաժողովի արդյունքը տեսանելի կդառնա միայն հետադարձ կապի ու մշտադիտարկում իրականացնելու արդյունքում։ Պարոն Խաչատրյան, կարծում եմ, որ Էկոնոմիկայի նախարարությունը՝ իր ենթակա մարմինները ներառելով, կստանձնի և լավագույն կերպով կիրականացնի ինչպես միջոցառման նախապատրաստումը, այնպես էլ հետադարձ կապը և ներդրումների սպասարկումը»։ Այնուհետև, ելույթներով հանդես են եկել Էկոնոմիկայի նախարար Տիգրան Խաչատրյանը, Եվրոպական հանձնաժողովի Հարևանության և ընդլայնման բանակցությունների գլխավոր տնօրինության Հայաստանի հետ գործընկերության հարցերով բաժնի ղեկավար Վասիլիս Մարագոսը ու Հայաստանում ԵՄ պատվիրակության ղեկավար Անդրեա Վիկտորինը: Էկոնոմիկայի նախարարն ասել է, որ կառավարությունը նախատեսում է կյանքի կոչել ներդրումային համաժողովների կազմակերպման նոր մոդել․առաջինն այս շարքում հենց Հայաստան - ԵՄ համաժողովն է։ Նա հավելել է, որ համաժողովի թեմաների նախնական առաջարկների թվում են՝ «Կանաչ տնտեսության» ենթակառուցվածք, գյուղատնտեսություն և բարձր տեխնոլոգիաների ու նորարարությունների ֆինանսավորման համակարգեր: Ելույթներին հաջորդած քննարկման ընթացքում մասնակիցներն անդրադարձել են համաժողովի կազմակերպման հայեցակարգային մոտեցումներին և բյուջեին, սահմանել միջոցառումների ժամանակացույց: Որոշվել է նաև, որ համաժողովի նախապատրաստմամբ կզբաղվի Էկոնոմիկայի նախարարությունը:Փոխվարչապետի կողմից պատասխանատու գերատեսչություններին տրվել են անհրաժեշտ հանձնարարականներ:

14:00 - 22 հունվարի, 2020