ՄԱԿ

Միավորված Ազգերի Կազմակերպությունը միջկառավարական կազմակերպություն է, որի առաջադրանքն է պահպանել միջազգային խաղաղություն ու անվտանգություն, ազգերի միջև զարգացնել բարեկամական հարաբերություններ, հասնել միջազգային համագործակցության և ազգերի միջև գործողությունների ներդաշնակման կենտրոնում լինել: Ստեղծվել է 1945 թվականի հոկտեմբերի 24-ին։ Ներառում է 193 երկիր։

ՄԱԿ-ն ունի 6 հիմնական կառույց՝ Գլխավոր ասամբլեան, Անվտանգության խորհուրդը, Սոցիալ-տնտեսական խորհուրդը, Խնամակալության խորհուրդը, Արդարադատության միջազգային դատարանը և ՄԱԿ-ի քարտուղարությունը: ՄԱԿ-ի համակարգային գործակալությունները ընդգրկում են Համաշխարհային բանկի խումբը, Առողջապահության համաշխարհային կազմակերպությունը, Պարենի համաշխարհային ծրագիրը, ՅՈՒՆԵՍԿՕ-ն և ՅՈՒՆԻՍԵՖ-ը:

ՄԱԿ-ի ամենահայտնի պաշտոնյան գլխավոր քարտուղարն է. 2017 թվականի հունվարի 1-ից յադ պաշտոնը զբաղեցնում է պորտուգալացի քաղաքական գործիչ և դիվանագետ Անտոնիո Գուտիերեշը: ՄԱԿ-ի գլխամասային գրասենյակները գտնվում են Մանհեթեն և Նյու Յորք քաղաքներում ու համարվում են արտաօրենսդրական: Մյուս գլխավոր գրասենյակները տեղակայված են Ժնևում, Նայրոբիում և Վիեննայում:

Ուկրաինան Ռուսաստանի դեմ հայց է ներկայացրել Հաագայի Արդարադատության միջազգային դատարան

Ուկրաինայի նախագահ Վլադիմիր Զելենսկին հայտարարել է, որ Կիևը Ռուսաստանի դեմ հայց է ներկայացրել ՄԱԿ-ի Արդարադատության միջազգային դատարան և պահանջել է գործի քննություն իրականացնել հաջորդ շաբաթ։ ՏԱՍՍ-ի փոխանցմամբ՝ այս մասին գրել է Զելենսկին կիրակի օրը Twitter-ում։ «Ուկրաինան պաշտոնապես հայց է ներկայացրել ընդդեմ Ռուսաստանի Դաշնության Հաագայի Արդարադատության միջազգային դատարան: Պահանջում ենք Ռուսաստանին պատասխանատվության ենթարկել ագրեսիան արդարացնելու համար ցեղասպանություն հասկացության աղավաղման համար։ Մենք խնդրում ենք դատարանին անհապաղ կարգադրել Ռուսաստանի Դաշնությանը դադարեցնել ռազմական գործողություններ և լսումներ նշանակել հաջորդ շաբաթ»,- գրել է Զելենսկին։

15:18 - 27 փետրվարի, 2022

Զելենսկին ՄԱԿ գլխավոր քարտուղարին ասել է, որ ՌԴ-ին պետք է զրկել Անվտանգության խորհրդում քվեարկելու իրավունքից

Ուկրաինայի նախագահ Վլադիմիր Զելենսկին իր թվիթերյան էջում գրել է, որ զրուցել է ՄԱԿ գլխավոր քարտուղար Անտոնիո Գուտերեշի հետ։ «Ագրեսոր երկրին (Ռուսաստան- խմբ․) պետք է զրկել ՄԱԿ-ի Անվտանգության խորհրդում քվեարկելու իրավունքից, ՌԴ-ի գործողություններն ու հայտարարությունները որակել որպես Ուկրաինայի ժողովրդի ցեղասպանություն»,- գրել է Զելենսկին։ Նա նաև հավելել է, որ դիմել է ՄԱԿ գխավոր քարտուղարին, որ նրանք նաև օգնեն ռուս զինվորականների դիերը հանձնելու հարցում։

23:41 - 26 փետրվարի, 2022

Ռուսաստանն արգելափակել է ՄԱԿ-ի ԱԽ-ի ՌԴ գործողություններն Ուկրաինայում դատապարտող բանաձեւը

Ռուսաստանը գործադրել է իր վետոյի իրավունքը ՄԱԿ-ի Անվտանգության խորհրդում և արգելափակել է մի խումբ արևմտյան երկրների կողմից ներկայացված բանաձևը, որը դատապարտում էր Ռուսաստանի ռազմական գործողությունն Ուկրաինայում, հայտնում է ՏԱՍՍ-ի թղթակիցը։ Բանաձեւի նախագծին կողմ էին քվեարկել մարմնի 11 անդամներ, Չինաստանը, Հնդկաստանը եւ ԱՄԷ-ն ձեռնպահ էին մնացել քվեարկությունից։ Ավելի քան 60 պետությունների կողմից համահեղինակված փաստաթուղթը դատապարտում էր Ռուսաստանի գործողությունները որպես ՄԱԿ-ի կանոնադրության խախտում, նախագծի հեղինակները պահանջում էին Ռուսաստանի Դաշնությունից անհապաղ դադարեցնել ուժի կիրառումը Ուկրաինայի դեմ և դուրս բերել իր բոլոր զորքերը երկրի միջազգայնորեն ճանաչված սահմաններից։ Բացի այդ, հեղինակները դատապարտել են Ռուսաստանի կողմից Դոնեցկի և Լուգանսկի ժողովրդական հանրապետությունների ճանաչումը և պահանջել, որ նա հրաժարվի այս որոշումից։

10:33 - 26 փետրվարի, 2022

Չինաստանը աջակցում է բոլոր երկրների, այդ թվում՝ Ուկրաինայի ինքնիշխանությանն ու տարածքային ամբողջականությանը․ԱԳ նախարար Վան Ին

Չինաստանը կարեւոր է համարում հարգել աշխարհի բոլոր երկրների, այդ թվում՝ Ուկրաինայի ինքնիշխանությունը։ ՏԱՍՍ-ի փոխանցմամբ՝ այդ մասին ուրբաթ օրը հայտնել է Չինաստանի արտգործնախարար Վան Ին՝ Մեծ Բրիտանիայի արտաքին գործերի նախարար Լիզ Թրուսի, ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելի և Ֆրանսիայի նախագահի խորհրդական Էմանուել Բոնի հետ հեռախոսազրույցի ժամանակ։ «Չինաստանը վճռականորեն հանդես է գալիս բոլոր երկրների ինքնիշխանության և տարածքային ամբողջականության հարգման և պաշտպանության օգտին, ինչպես նաև փաստացիորեն հետևում է ՄԱԿ-ի կանոնադրության նպատակներին և սկզբունքներին: Այս դիրքորոշումը հետևողական է և հստակ, այն հավասարապես վերաբերում է Ուկրաինային», - ասվում է ԱԳՆ-ի տարածած հաղորդագրության մեջ։ ԱԳ նախարարը հավելել է, որ ՆԱՏՕ-ի ընդլայնման համատեքստում անհրաժեշտ է հաշվի առնել անվտանգության ոլորտում Ռուսաստանի օրինական պահանջները։

00:43 - 26 փետրվարի, 2022

ՀՅԴ երիտասարդները ՄԱԿ–ի գրասենյակի մոտ բողոքի ակցիա են իրականացնում՝ Արցախի հուշարձանների պահպանության պահանջով

ՀՅԴ «Նիկոլ Աղբալյան» ուսանողական միության անդամները Հայաստանում ՄԱԿ-ի գրասենյակի առջեւ բողոքի ակցիա են իրականացնում՝ Արցախի հայկական մշակութային հուշարձանների ինքնությունը պահպանելու պահանջով։ Ուսանողական միության հայտարարությունը ներկայացնում ենք ստորև․ «Արցախի Հանրապետության օկուպացված տարածքներում գտնվող հազարավոր պատմամշակութային հուշարձանների հայկական ինքնությունը վտանգված է։ Ադրբեջանի կողմից պետական մակարդակով և լայն թափով իրականացվում է մշակութային հերթական ցեղասպանությունը։Այդ ուղղությամբ հայկական երկու հանրապետությունների իշխանությունների կողմից որևէ առարկայական քայլեր չեն ձեռնարկվում։Արցախը հայությանն է, և հայությունն ինքը պետք է հետամուտ լինի Արցախի հայկականության պահպանման գործին։Սիրելի՛ հայրենակիցներ Պահպանելու համար մեր բազմադարյա մշակութային ժառանգությունը, հիմնվելով միջազգային իրավունքի հիմնարար նորմերի վրա, անհրաժեշտ ենք համարում անհապաղ քայլեր ձեռնարկել՝ հրավիրելու մասնագիտացված կազմակերպությունների ուշադրությունը մշակութային ցեղասպանության վրա։ Ելնելով վերոնշալ համոզումներից՝ սկսում ենք թշնամու կողմից օկուպացված տարածքներում գտնվող պատմամշակութային հայկական ժառանգության պահպանման պահանջով ձեռնարկումների շարք»։

17:05 - 25 փետրվարի, 2022

ՄԱԿ-ի գնահատմամբ 100 հազար մարդ Ուկրաինայի դեմ ՌԴ ռազմական գործողությունների պատճառով ստիպված է լքել տները

ՄԱԿ-ի գնահատմամբ 100 հազար մարդ Ուկրաինայի դեմ Ռուսաստանի ռազմական գործողությունների պատճառով ստիպված է լքել տները։ Նրանց մեծ մասն այժմ գտնվում է ուկրաինական տարածքում: Այս մասին հայտնում է BBC-ի ռուսական ծառայությունը։ Լեհաստանը հայտնել է, որ հինգշաբթի իր սահմանն Ուկրաինայից հատել է 29 հազար մարդ՝ ավելի շատ, քան սովորական ժամանակ: Լեհաստանի իշխանությունները փախստականների ընդունման համար 9 կենտրոն են կահավորել։ Երկրի հարավ-արևելքում գտնվող Պերեմիշլ քաղաք գնացքով ժամանել է շուրջ հազար մարդ, նրանցից շատերը ստիպված են եղել գիշերել կայարանում: Փախստականների մի մասը մեկնել է Ռումինիա և Հունգարիա։ Մոլդովայի Ներքին գործերի նախարարությունը հայտնում է, որ ուրբաթ առավոտվա տվյալներով երկիր է ժամանել Ուկրաինայի 15.8 հազար քաղաքացի, 315 մարդ ապաստան է խնդրել։ 3.1 հազար մարդ էլ ժամանել է Ռումինիա։

15:17 - 25 փետրվարի, 2022

Դոնբասում տեղի ունեցողը ցեղասպանություն չէ, իսկ ռուսական զորքերն էլ խաղաղապահներ չեն․ ՄԱԿ-ի գլխավոր քարտուղար |hetq.am|

hetq.am: Դոնեցկի և Լուգանսկի ինքնահռչակ հանրապետություններում տեղի ունեցողը չի համապատասխանում ցեղասպանություն հասկացությանը։ Այդ մասին հայտարարել է ՄԱԿ-ի գլխավոր քարտուղար Անտոնիու Գուտերիշը։ «Ցեղասպանությունը հանցագործություն է, որն ունի հստակ սահմանում, իսկ այդ սահմանման օգտագործումը անհրաժեշտ է միջազգային իրավունքին համապատասխան։ Ես կարծում եմ, որ սա այդ դեպքը չէ»,- ասել է Գուտերիշը։ Նա հավելել է, որ ՄԱԿ-ը ռուսական զինծառայողներին չի համարի խաղաղապահներ, եթե նրանք մտնեն Լուգանսկի և Դոնեցկի ինքնահռչակ հանրապետություններ։ «Երբ մի երկրի զորքերը մտնում են մեկ այլ երկրի տարածք, առանց նրա համաձայնության, նրանք անկողմնակալ խաղաղապահներ չեն։ Նրանք ընդհանրապես խաղաղապահներ չեն»,- ասել է ՄԱԿ-ի գլխավոր քարտուղարը։ Գուտերիշը Ռուսաստանին կոչ է արել ամբողջությամբ հետևել ՄԱԿ-ի կանոնադրությանը։

16:02 - 23 փետրվարի, 2022

ՄԱԿ-ի գլխավոր քարտուղարը հայտարարել է, որ անհանգստացած է Ուկրաինայում հետագա Էսկալացիայի ռիսկերից |armenpress.am|

armenpress.am: Ուկրանիայի շուրջ իրադրության հետ կապված վերջին իրադարձությունները, այդ թվում հրադադարի ռեժիմի խախտման հաճախացած դեպքերը, լուրջ անհանգստւթյուն են առաջացնում: Փետրվարի 22-ին այդ մասին հայտարարել է ՄԱԿ-ի գլխավոր քարտուղար Անտոնիու Գուտերիշը, որն այդ պատճառով կրճատել է իր արտասահմանյան ուղեւորությունը, հաղորդել է ՏԱՍՍ-ը: «Ես լրջորեն անհանգստացած եմ Ուկրաինայի հետ կապված վերջին իրադարձություններից, այդ թվում շփման գծին հրադադարի ռեժիմի խախտման հաճախացած դեպքերի մասին հաղորդումներից»,- ասել է նա: «Այս ճգնաժամային պահին ես անհապաղ հրադադարի եւ իրավունքի գերակայության վերականգնման կոչ եմ նում»,- հավելել է նա: Գուտերիշը կարծում է, որ Ուկրաինայի շուրջ ներկայիս ճգնաժամը կարող է կործանարար լինել Կիեւի եւ Մոսկվայի համար, նա կողմերին կոչ է անում ձեռնպահ մնալու այն գործողություններից եւ հայտարարություններից, որոնք կարող են սաստկացնել վտանգավոր իրադրությունը։

11:26 - 23 փետրվարի, 2022

Ռուսաստանը կոչ է անում այլ երկրներին ճանաչել ԴԺՀ-ն եւ ԼԺՀ-ն․ ՌԴ ԱԳՆ |news.am|

news.am: Ռուսաստանը այլ երկրներին կոչ է անում ճանաչել Դոնեցկի եւ Լուգանսկի ժողովրդական հանրապետությունների (ԴԺՀ եւ ԼԺՀ) անկախությունը։ Այս մասին հայտարարությունը հրապարակվել է ՌԴ արտաքին գործերի նախարարության պաշտոնական կայքում։ «Ռուսաստանը կոչ է անում այլ երկրներին հետեւել իր օրինակին»,- ասվում է հաղորդագրությունում։ Հայտարարությունում ընդգծվում է, որ Դոնբասի հանրապետությունների ճանաչումը հարկադրական եւ միակ ճիշտ որոշումն էր՝ Կիեւի ռեժիմի կողմից սպառնալիքների պայմաններում։ Այն թույլ կտա երաշխավորել տեղի բնակիչների խաղաղ կյանքի իրավունքը, պաշտպանել նրանց օրինական իրավունքներն ու շահերը։ «Որոշումն ընդունվել է՝ հաշվի առնելով Դոնբասի բնակիչների ազատ կամարտահայտությունը՝ ՄԱԿ Կանոնադրության, Միջազգային իրավունքի սկզբունքների մասին 1970թ. Հռչակագրի...դրույթների հիման վրա»,- ասվում է ՌԴ ԱԳՆ հաղորդագրությունում։ Նախօրեին Ռուսաստանի նախագահ Վլադիմիր Պուտինը հրամաններ է ստորագրել Դոնեցկի եւ Լուգանսկի ժողովրդական հանրապետությունների անկախության ճանաչման մասին, որոնց շրջանակում հանձնարարել է ՌԴ պաշտպանության նախարարությանը ապահովել այդ տարածքներում խաղաղության պահպանումը։ Փետրվարի 22-ին ԴԺՀ եւ ԼԺՀ ղեկավարները վավերացրել են Ռուսաստանի հետ բարեկամության, համագործակցության եւ փոխօգնության պայմանագիրը։

15:42 - 22 փետրվարի, 2022

ՄԱԿ-ի Անվտանգության խորհուրդն սկսել է Ուկրաինայի իրադրության քննարկումը |armenpress.am|

armenpress.am: ՄԱԿ-ի Անվտանգության խորհուրդը (ԱԽ) փետրվարի 21-ի երեկոյան ձեռնամուխ է եղել Ուկրաինայի իրադրության քննարկմանը։ Մարմնի նիստը, որը գումարվել է Ալբանիայի, Մեծ Բրիտանիայի, Իռլանդիայի, Մեքսիկայի, Նորվեգիայի, ԱՄՆ-ի, Ուկրաինայի եւ Ֆրանսիայի նախաձեռնությամբ, սկսվել է տեղական ժամանակով 21:00-ին (Երեւանի ժամանակով 06:00-ին): Ռուսաստանից դրան մասնակցում է ՄԱԿ-ում ՌԴ-ի մշտական ներկայացուցիչ Վասիլի Նեբեզնյան, Ուկրաինայից՝ համաշխարհային կազմակերպությունում երկրի մշտական ներկայացուցիչ Սերգեյ Կիսլիցան: Նիստը տեղի կունենա բաց ձեւաչափով: Նախ, ինչպես սպասվում է, ելույթ կունենա քաղաքական հարցերով ՄԱԿ-ի գլխավոր քարտուղարի տեղակալ Ռոզմարի Լի Կառլոն: Ուկրաինայի արեւելքի շփման գծում իրադրությունը սրվել է փետրվարի 17-ին: ԴԺՀ-ում եւ ԼԺՀ-ում հայտնել են վերջին ամիսներին Ուկրաինայի կողմից ամենաատիվ գնդակոծումների մասին: Դրանք հանգեցրել են քաղաքացիական ենթակառուցվածքի մի շարք օբյեկտների վնասման: ՌԴ-ի նախագահ Վլադիմիր Պուտինը փետրվարի 21-ին անցկացրել է Ռուսաստանի Անվտանգության խորհրի նիստ, որի անդամները հանդես են եկել Դոնեցկի եւ Լուգանսկի Ժողովրդական հանրապետությունների ճանաչման օգտին: Ավելի ուշ Ռուսաստանի ղեկավարը հայտարարել է ԴԺՀ-ի եւ ԼժՀ-ի ինքնիշխանության ճանաչման մասին: Դրանց ղեկավարների հետ ստորագրվել են բարեկամության, համագործակցության եւ փոխադարձ օգնության մասին պայմանագրեր, հաղորդել է ՏԱՍՍ-ը:

10:19 - 22 փետրվարի, 2022

Արարատ Միրզոյանն ընդունել է «Եվրանեսթ» խորհրդարանական վեհաժողովի համանախագահներին

ՀՀ ԱԳ նախարար Արարատ Միրզոյանը փետրվարի 21-ին ընդունել է «Եվրանեսթ» խորհրդարանական վեհաժողովի համանախագահներ Անդրիուս Կուբիլիուսին և Մակա Բոտչորիշվիլիին: Ինչպես հայտնում են Արտաքին գործերի նախարարությունից, Հանդիպմանը մասնակցում էր նաև «Եվրանեսթ» խորհրդարանական վեհաժողովում ՀՀ Ազգային ժողովի պատվիրակության ղեկավար Մարիա Կարապետյանը: Հայաստանի արտաքին քաղաքական գերատեսչության ղեկավարը գոհունակություն է հայտնել Հայաստան-Եվրամիություն գործընկերության զարգացման դինամիկայի առնչությամբ՝ այդ համատեքստում բարձր գնահատելով խորհրդարանական դիվանագիտության դերը։ Արարատ Միրզոյանը նաև շնորհակալություն է հայտնել Եվրախորհրդարանին՝ Հայաստանի համար մի շարք կարևոր հարցերի վերաբերյալ համապատասխան բանաձևերով իր սկզբունքային դիրքորոշումն արտահայտելու համար։ Զրուցակիցները նաև մտքեր են փոխանակել Արևելյան գործընկերության շրջանակներում հետագա համագործակցության հեռանկարների շուրջ։ «Եվրանեսթ» խորհրդարանական վեհաժողովի համանախագահները բարձր են գնահատել վերջին տարիներին Հայաստանում իրականացված բարեփոխումները ժողովրդավարության, օրենքի գերակայության, կոռուպցիայի դեմ պայքարի ոլորտներում: Երկուստեք կարևորվել է բազում մարտահրավերների պայմաններում 2021թ. հունիսին Հայաստանում ազատ ու թափանցիկ արտահերթ ընտրությունների անցկացումը: ՀՀ ԱԳ նախարարն ու «Եվրանեսթ» խորհրդարանական վեհաժողովի համանախագահներն անդրադարձել են տարածաշրջանային անվտանգության և կայունության հարցերի լայն շրջանակի։ Անդրադառնալով հրատապ լուծում պահանջող հումանիտար հարցերին՝ նախարար Միրզոյանն ընդգծել է Ադրբեջանում անօրինական կերպով պահվող հայ ռազմագերիների ու քաղաքացիական անձանց հայրենադարձման անհրաժեշտությունը։ ԱԳ նախարարը շեշտել է Ադրբեջանի կողմից միջազգային իրավունքի նորմերի շարունակական խախտման և ՄԱԿ-ի Արդարադատության միջազգային դատարանի հրատապ միջոցներ կիրառելու մասին որոշումը չկատարելու անթույլատրելիությունը։ Ընդգծվել է նաև ԵԱՀԿ Մինսկի խմբի համանախագահության մանդատի ներքո Լեռնային Ղարաբաղի հիմնախնդրի համապարփակ և տևական կարգավորման նպատակով բանակցային գործընթացի լիարժեք վերսկսման անհրաժեշտությունը։ Հանդիպման ընթացքում նաև անդրադարձ է կատարվել Հայաստանի և Թուրքիայի միջև հարաբերությունների կարգավորման գործընթացին։

14:57 - 21 փետրվարի, 2022

Ռուսաստանը հակամարտության կողմ դարձնելու փորձերն ուժ և հիմք չունեն․ ՌԴ ԱԳ փոխնախարար |azatutyun.am|

azatutyun.am: Ռուսաստանի որոշ շրջաններից զորքերը դուրս բերելու՝ Միացյալ Նահանգների պահանջներն անընդունելի են, իսկ Ուկրաինա ներխուժում պլանավորելու մեղադրանքները Մոսկվայի վրա ճնշում գործադրելու փորձ են, հայտարարել է Ռուսաստանի արտգործնախարարությունը։ Ռուսաստանը վստահեցնում է, որ զորավարժությունների ավարտից հետո իր զորքերը կվերադարձնի մշտական տեղակայման վայրեր: «Ռուսաստանի վրա պատասխանատվությունը տեղափոխելու, նրան հակամարտության կողմ դարձնելու փորձերն ուժ և հիմք չունեն», - ՄԱԿ-ի Անվտանգության խորհրդի նիստի ժամանակ հայտարարել է ՌԴ փոխարտգործնախարար Սերգեյ Վերշինինը՝ հավելելով․ - «Չեմ կարող չասել, որ մենք ծայրաստիճան հիասթափված ենք առնվազն մեր արևմտյան գործընկերների ջայլամի դիրքորոշումից, որոնք փորձում են չնկատել այս ակնհայտ բաները»։ Շարունակվող ռուս-բելառուսական համատեղ զորավարժությունները, ըստ արևմտյան և ուկրաինացի դիվանագետների, ընկալվում են որպես սպառնալիք։ «Ուկրաինան հավատարիմ է մնում ռուս-ուկրաինական հակամարտության խաղաղ կարգավորմանը՝ քաղաքական և դիվանագիտական միջոցներով», - հայտարարել է ՄԱԿ-ում Ուկրաինայի մշտական ներկայացուցիչ Սերգեյ Կիսլիցան։ - «Ուկրաինան ցանկանում է խաղաղություն, անվտանգություն և կայունություն ոչ միայն իր, այլև ամբողջ Եվրոպայի համար։ Միաժամանակ, կրկնում եմ, եթե Ռուսաստանն ընտրի էսկալացիայի ճանապարհը, Ուկրաինան կպաշտպանվի»։ Երեկ, ըստ լրատվամիջոցների, ուկրաինացի զինվորականների և Դոնբասի ռուսամետ անջատողականների միջև փոխհրաձգությունը սաստկացել է։ Ըստ ուկրաինական կողմի՝ արկերից մեկը դիպել է մանկապարտեզի շենքին։ Այդ պահին այնտեղ երեխաներ չեն եղել, սակայն երկու խաղաղ բնակիչ վիրավորվել է։

13:37 - 18 փետրվարի, 2022

Ուկրաինայում նոր հակամարտության հավանականությունն անգամ չենք կարող ընունել․ ՄԱԿ գլխավոր քարտուղարի տեղակալ

ՄԱԿ-ը մտահոգությամբ է նշում Ուկրաինայի արևելքում հրադադարի խախտման մասին հաղորդագրությունները և կոչ է անում բոլոր կողմերին առավելագույն զսպվածություն ցուցաբերել։ Այս մասին, ինչպես փոխանցում է «Ռիա նովոստի»-ն, ՄԱԿ-ի Անվտանգության խորհրդի նիստին ասել է կազմակերպության գլխավոր քարտուղարի քաղաքական հարցերով տեղակալ Ռոզմարի Դի Կարլոն։ «Մենք մտահոգությամբ նշել ենք վերջին մի քանի ժամվա ընթացքում շփման գծում հրադադարի ռեժիմի խախտումների մասին հաղորդումները: Եթե դրանք հաստատվեն, ապա չպետք է թույլ տալ, որ այդ խախտումները ավելի մեծանան: Մենք բոլոր կողմերին կոչ ենք անում առավելագույն զսպվածություն ցուցաբերել»,- մասնավորապես ասել է Դի Կարլոն: Նրա խոսքով Ուկրաինայում նոր հակամարտության հավանականությունն անգամ չեն կարող ընունել․ «Իրականում մենք փորձության առաջ ենք»։

19:53 - 17 փետրվարի, 2022

Արարատ Միրզոյանը Լիլա Պիտերս Յահիայի հետ հանդիպմանը շեշտել է ԼՂ-ում միջազգային մասնագիտացված կառույցների ներգրավվածության անհրաժեշտությունը

ՀՀ ԱԳ նախարար Արարատ Միրզոյանը փետրվարի 17-ին ընդունել է ՀՀ-ում Միավորված ազգերի կազմակերպության մշտական համակարգողի պաշտոնակատար Լիլա Պիտերս Յահիային: ԱԳՆ-ից հայտնում են, որ նախարարը գոհունակություն է հայտնել Հայաստանում ՄԱԿ-ի գրասենյակի հետ արդյունավետ փոխգործակցության առնչությամբ և կարևորել ՄԱԿ-ի և ՄԱԿ-ի մասնագիտացված գործակալությունների հետ շարունակական սերտ համագործակցությունը` Հայաստանում ժողովրդավարական ինստիտուտների ամրապնդման, կայուն զարգացման նպատակների արդյունավետ իրականացման ուղղությամբ: Զրուցակիցներն անդրադարձել են նաև Հայաստանի՝ ՄԱԿ անդամակցության 30-ամյակի շրջանակներում նախատեսվող միջոցառումներին: Կողմերը քննարկել են Արցախի դեմ ադրբեջանական ագրեսիայի հետևանքով առաջացած հումանիտար խնդիրները։ Արարատ Միրզոյանը շեշտել է Լեռնային Ղարաբաղում միջազգային մասնագիտացված կառույցների, այդ թվում՝ ՄԱԿ-ի և ՄԱԿ-ի գործակալությունների անխոչընդոտ ներգրավվածության անհրաժեշտությունը:

17:53 - 17 փետրվարի, 2022

ՄԱԿ-ում հայտնել են 2021 թվականին համաշխարհային առեւտրի ռեկորդային ծավալի մասին |armenpress.am|

armenpress.am: 2021 թվականին համաշխարհային առեւտրի ծավալը հասել Է 28,5 տրիլիոն դոլարի ռեկորդային բարձր մակարդակի՝ 2020 թվականի համեմատությամբ ավելանալով 25 տոկոսով, 2019 թվականի համեմատությամբ ցուցանիշն աճել Է 13 տոկոսով: Ընթացիկ տարա առաջին եռամսյակում սպասվում Է այդ բնագավառում աճի տեմպերի դանդաղում, ասված Է ՄԱԿ-ի Առեւտրի եւ զարգացման կոնֆեդերացիայի (ՅՈՒՆԿՏԱԴ)՝ փետրվարի 17-ին Ժնեւում հրապարակված զեկույցում: «Ամբողջությամբ վերցված համաշխարհային առեւտրի ծավալը 2021 թվականին հասել Է շուրջ 28,5 տրիլիոն դոլար ռեկորդային մակարդակի, ինչն իրենից ներկայացնում Է մոտավորապես 25 տոկոսով աճ 2020 թվականի համեմատությամբ եւ աճ 13 տոկոսի շրջանում մինչհամավարակային 2019 թվականի համեմատությամբ»,- ասված Է զեկույցում: ՅՈՒՆԿՏԱԴ-ի կանխատեսման համաձայն՝ 2022 թվականի առաջին եռամսյակի ընթացքում առեւտրի աճի տեմպերը «կդանդաղեն», ուստի առեւտրի ծավալը, ինչպես սպասվում Է, «նման կլինի 2021 թվականի չորրորդ եռամսյակի մակարդակին»: Անցյալ տարի «դրական միտւմը միջազգային առեւտրի բնագավաում» զգալի չափով պայմանավորված Էր, ինչպես կարծում են փորձագետները, հումքային ապրանքների գների բարձրացմամբ, համավարակի հետ կապված սահմանափակումների մեղմացմամբ եւ պահանջակի ուժեղ վերականգնմամբ՝ տնտեսության խթանման միջոցների փաթեթների շնորհիվ»: Այս տարի, կարծում են ՅՈՒՆԿՏԱԴ-ում, գլոբալ առեւտրի վրա կազդեն մի շարք գործոններ, մասնավորապես գնաճն ԱՄՆ-ում եւ անհանգստությունը Չինաստանում անշարժ գույքի հատվածի դրության առիթով: Զեկույցի հեղինակներն ընդգծում են, որ համավարկը հանգեցրել Է «աննախադեպ ճնշման մատակարարումների շղթայի վրա: Լոգիստական խախտումները, կիսահաղորդիչների պակասը եւ Էներգակիրների աճող գները նպաստել են «հետագա պակասի մատակարարումների ոլորտում» եւ ծովային բեռնափոխադրումների կտրուկ թանկացման, արձանագրել են ՅՈՒՆԿՏԱԴ-ում, հաղորդել Է ՏԱՍՍ-ը:

13:24 - 17 փետրվարի, 2022

Զասը ՄԱԿ-ն անվանել է ՀԱՊԿ գլխավոր միջազգային գործընկեր |armenpress.am|

armenpress.am: Հավաքական անվտանգության պայմանագրի կազմակերպությունը դիտարկում է ՄԱԿ-ը որպես գլխավոր միջազգային գործընկեր: Այս մասին ՄԱԿ-ի Անվտանգության խորհրդի նիստին հայտարարել է ՀԱՊԿ-ի գլխավոր քարտուղար Ստանիսլավ Զասը: «Մենք ՄԱԿ-ը դիտարկում ենք որպես մեր գլխավոր միջազգային գործընկեր և հետաքրքրված ենք համաշխարհային կազմակերպության դերակատարման ուժեղացմամբ»,- ՏԱՍՍ-ի փոխանցմամբ, ասել է նա: Զասը հայտարարել է, որ ՀԱՊԿ-ն հանդես է գալիս ՄԱԿ-ի հետ հակաահաբեկչական համագործակցության հետագա ընդլայնման օգտին: Նա հավելել է, որ կառույցը մշակում է ՄԱԿ-ի գործող առաքելություններում իր խաղաղապահների մասնակցության ծրագիրը:

20:59 - 16 փետրվարի, 2022