Երևանի մետրոպոլիտեն

Երևանի մետրոպոլիտենը շահագործվում է 1981թ.-ից, ունի 10 կայարան, շահագործվող գծերի երկարությունը 12,1 կմ է, առկա է 45 վագոն։ Աշխատանքային օրերին գիծ է դուրս բերվում 26 վագոն (13 շարժակազմ), իսկ շաբաթ և կիրակի օրերին` 24 վագոն (12 շարժակազմ)։

2016 թ.-ից մետրոպոլիտենով իրականացվող ուղևորափոխադրումներում նկատվում է աճի միտում, ինչը պայմանավորված է նոր երթուղային ցանցի ներդրմամբ, մասնավորապես` միկրոավտոբուսների քանակի նվազմամբ, որի հետևանքով այս պահին մետրոպոլիտենի ցուցանիշը մայրաքաղաքի ընդհանուր ուղևորափոխադրումների հաշվեկշռում կազմում է մոտ 10%։

Երևանի մետրոպոլիտենի տնօրենի պաշտոնակատարն անդրադարձել է նոր կայարանի կառուցման աշխատանքներին |armenpress.am|

Երևանի մետրոպոլիտենի դեպի Աջափնյակ վարչական շրջան նոր կայարանի կառուցման աշխատանքներն ընթացքի մեջ են: «Արմենպրես»-ի մամուլի սրահում հրավիրված ասուլիսում «Կ. Դեմիրճյանի անվան Երևանի մետրոպոլիտեն» ՓԲԸ-ի տնօրենի ժ/պ Գևորգ Ավետիսյանը նշեց, որ աշխատանքները տարվում են, պարզապես այս պահին փակագծեր չի բացում: «Նոր կայարանը լինելու է Աջափնյակ թաղամասում, ասեմ, որ այդ ուղղությամբ աշխատանքները տարվում են, պարզապես այս փուլում փակագծերը չեմ բացի, որովհետև քննարկման շրջան է: Կարող եմ ասել, որ գործն ընթացքի մեջ է»,- ասաց Գևորգ Ավետիսյանը: Մետրոպոլիտենի ցանցի զարգացման մասին ակտիվ քննարկումները վերսկսվեցին 2019 թվականին: Նշվում էր դեպի Աջափնյակ վարչական շրջան մետրոպոլիտենի նոր կայարանի կառուցման մասին՝ դիտարկելով բիզնեսին ներգրավելու հնարավորությունները: 2020 թվականի սեպտեմբերին Երևանի քաղաքապետ Հայկ Մարությանը հայտնեց, որ Երևանում մետրոյի նոր կայարանը կկառուցվի պետական միջոցներով: Երևանի մետրոպոլիտենը ներկայում ունի ավելի քան 12 կմ ընդհանուր շահագործվող երկարության գիծ, 10 կայարան, վագոնային պարկը բաղկացած է 45 վագոնից, այս պահին գլխավոր գծերում աշխատում է 11 շարժակազմ՝ բաղկացած 2 և 3 վագոններից: Չարբախ-Շենգավիթ ուղեհատվածում գործում է մեկ վագոնով երկու շարժակազմ:

15:26 - 05 մարտի, 2021

Համավարակի հետևանքով 2020-ին Երևանի մետրոպոլիտենի ուղևորահոսքը կիսով չափ կրճատվել է |armenpress.am|

armenpress.am: 2020 թվականին համավարակն իր բացասական ազդեցությունը թողեց մետրոպոլիտենի աշխատանքի վրա: «Արմենպրես»-ի մամուլի սրահում հրավիրված ասուլիսում Կ. Դեմիրճյանի անվան «Երևանի մետրոպոլիտեն» ՓԲԸ-ի տնօրենի ժ/պ Գևորգ Ավետիսյանը, բացասական ազդեցությունն ավելի լավ պատկերացնելու համար, ներկայացրեց մեկ թիվ: «Եթե մենք 2019 թվականին տեղափոխել ենք գրեթե 21 մլն ուղևոր, ապա 2020 թվականին այդ թիվը կազմել է 11 մլն: Համարյա 50 տոկոսով կրճատվել է: Եղավ այնպես, որ Երևանի մետրոպոլիտենն իր պատմության մեջ առաջին անգամ ապրիլի 1-ից մայիսի 17-ը դադարեցրեց աշխատանքը»,-ասաց Գևորգ Ավետիսյանը: «Երևանի Մետրոպոլիտեն» ՓԲԸ-ի տնօրենի ժամանակավոր պաշտոնակատարը նշեց, որ խստագույն ձևով հետևում են համավարակի հետ կապված անվտանգության կանոններին: Բոլոր աշխատակիցները կրում են դիմակներ, աշխատասենյակները, վագոնները համալրված են ախտահանիչ նյութերով: Օրվա ավարտին բոլոր վագոններն ախտահանվում են մասնագիտացված կառույցի կողմից: Նրա խոսքով՝ պատասհական չէ, որ առողջապահական տեսչական խմբի կողմից կատարված ստուգումների շրջանակում Երևանի մետրոպոլիտենը միակ տրանսպորտային փոխադրամիջոցն է եղել, որտեղ խախտումներ չեն արձանագրվել: Ներկայում մետրոպոլիտենում ուղևորահոսքը քիչ-քիչ վերակագնվում է, օրական միջինը տեղափոխում են 50-55 հազար ուղևոր:

14:42 - 05 մարտի, 2021

Երևանի մետրոպոլիտենը 40 տարեկան է. երկարամյա աշխատանքային փորձ ունեցող աշխատակիցները կպարգևատրվեն |armenpress.am|

armenpress.am։ Կարեն Դեմիրճյանի անվան Երևանի մետրոպոլիտենի հոբելյանական 40-ամյակը կնշվի միջոցառումներով: «Արմենպրես»-ի մամուլի սրահում հրավիրված ասուլիսում Կ. Դեմիրճյանի անվան «Երևանի Մետրոպոլիտեն» ՓԲԸ-ի տնօրենի ժ/պ Գևորգ Ավետիսյանը նշեց, որ կլինեն ցուցահանդեսներ, պարգևատրումներ: «Հաշվի առնելով երկրում ստեղծված իրավիճակը՝ չենք պատրաստվում ճոխ միջոցառումներ կազմակերպել, բայց չենք էլ կարող մեր ուղևորներին չհիշեցնել, որ մետրոպոլիտենը 40 տարեկան է: Ինչպես գիտեք, մետրոպոլիտենում հաճախ են իրականցվում մշակութային միջոցառումներ, ցուցահանդեսներ, գրքերի շնորհանդեսներ: Այս ֆոնի վրա «Երիտասարդական» և «Հանրապետության Հրապարակ» կայարաններում կլինեն ցուցահանդեսներ»,- ասաց Գևորգ Ավետիսյանը: Այցելուները լուսանկարների միջոցով կծանոթանան մետրոյի պատմությանը՝ սկսած շինարարությունից: Այն աշխատակիցները, որոնք երկարամյա աշխատանքային փորձ ունեն, անպայման կարժանանան ուշադրության: Կլինեն պարգևատրումներ, շնորհակալագրերի, պատվոգրերի, մեդալների տեսքով: 1966-1970թվականներին Երևանի համար ամենահրատապ հարցերից էր մարդատար տրանսպորտի շուտափույթ կարգավորումը: Խնդիրը պայմանավորված էր այդ տարիներին բնակչության աճի աննախադեպ տեմպով: 1962-1964 թվականներին մշակված Երևանի նոր հատակագծի համաձայն` մետրոպոլիտենի միջոցով ազգաբնակչության տրանսպորտային սպասարկումն ամենաարդյունավետն էր դիտվում և համապատասխանում էր մայրաքաղաքի զարգացման հեռանկարին: Ի պատիվ այն ժամանակվա իշխանությունների, 1971 թվականին ստացվեց ստորգետնյա արագընթաց տրամվայի շինարարության թույլտվությունը, ապա 1977 թվականին նաև համաձայնություն տրվեց, որ այն վերափոխվի մետրոպոլիտենի շինարարության: 1981 թվականի մարտի 7-ին տեղի ունեցավ Երևանի մետրոպոլիտենի բացման հանդիսավոր արարողությունը: Շահագործվեց 5 կայարան:

14:08 - 05 մարտի, 2021

Երևանի մետրոպոլիտենում երթևեկությունն ամբողջ գծով վերականգնված է

Երևանի մետրոպոլիտենում հունվարի 8-ի, ժամը 20:51-ի դրությամբ երթևեկությունն ամբողջ գծով վերականգնված է։ Այս մասին «Ֆեյսբուք»-ի իր էջում գրել է Երևանի մետրոպոլիտենի մամուլի խոսնակ Տաթև Խաչատրյանը: Ավելի վաղ, Երևանի մետրոպոլիտենում հունվարի 8-ին գրանցվել էր տեխնիկական խափանում, որից հետո ժամը 19:45-ից մետրոպոլիտենն աշխատում էր մեկ գծանի երկկողմանի երթևեկությամբ՝ «Գարեգին Նժդեհ» - «Սասունցի Դավիթ» ուղեհատվածում:

21:48 - 08 հունվարի, 2021

Երևանի մետրոպոլիտենում գրանցվել է տեխնիկական խափանում

Երևանի մետրոպոլիտենում հունվարի 8-ին գրանցվել է տեխնիկական խափանում, որից հետո ժամը 19:45-ից մետրոպոլիտենն աշխատում է մեկ գծանի երկկողմանի երթևեկությամբ՝ «Գարեգին Նժդեհ» - «Սասունցի Դավիթ» ուղեհատվածում: Այս մասին հաղորդագրություն է տարածել Երևանի մետրոպոլիտենը: «Հարգելի’ ուղևորներ, հունվարի 8-ին ՝ ժամը 19:35-ին, Երևանի մետրոպոլիտենում գրանցվել է տեխնիկական խափանում, որից հետո ժամը 19:45-ից մետրոպոլիտենն աշխատում է մեկ գծանի երկկողմանի երթևեկությամբ՝ «Գարեգին Նժդեհ» - «Սասունցի Դավիթ» ուղեհատվածում։ Այս պահին տեղում աշխատում են մասնագետների խմբերը՝ խնդիրը վերացնելու նպատակով։ Տեխնիկական խնդիրը լուծվելուն պես կտրվի լրացուցիչ տեղեկատվություն։ Մետրոպոլիտենի տնօրինությունը հայցում է ուղևորների ներողամտությունը՝ պատճառված անհարմարության համար»,- նշված է հաղորդագրության մեջ:

21:05 - 08 հունվարի, 2021

Երևանի մետրոպոլիտենի աշխատանքային գրաֆիկում ժամային փոփոխություններ չեն լինի

«Կարեն Դեմիրճյանի անվան Երևանի մետրոպոլիտեն» ՓԲԸ-ն տեղեկացնում է, որ աշխատանքներն իրականացվելու են բնականոն ռեժիմով: «Սիրելի՛ քաղաքացիներ, Ամանորի և Սուրբ Ծննդյան տոների առթիվ «Կարեն Դեմիրճյանի անվան Երևանի մետրոպոլիտեն» ՓԲԸ-ն աշխատանքներն իրականացնելու է բնականոն ռեժիմով: Մետրոպոլիտենի աշխատանքային գրաֆիկում չեն լինի ժամային փոփոխություններ: Աշխատանքները կսկսվեն ժ. 07:00-ից և կավարտվեն 23:00-ին»,- տեղեկանում ենք մետրոպոլիտենի Ֆեյսբուքի էջից:

14:17 - 31 դեկտեմբերի, 2020

Մետրոպոլիտենի «Գործարանային» կայարանում ակցիա իրականացրած անձը որպես մեղադրյալ է ներգրավվել նաև առանձնապես խոշոր չափերով վատնում կատարելուն օժանադակելու համար

ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում շարունակվում է 2020թ. դեկտեմբերի 11-ին մետրոպոլիտենի «Գործարանային» կայարանում ակցիա իրականացնելու և մետրոպոլիտենի բնականոն աշխատանքը խաթարելու դեպքի առթիվ հարուցված քրեական գործի նախաքննությունը:Նախաքննության ընթացքում իրականացված քննչական և օպերատիվ-հետախուզական միջոցառումների արդյունքում պարզվել են դեպքի մի շարք հանգամանքներ, այդ թվում՝ ակցիա իրականացրած անձանցից երեքի ինքնությունը, որոնք հանդիսանում են Էրեբունի վարչական շրջանի նախկին ղեկավարը՝ Դ.Գ-ն., վերջինիս որդին՝ Թ.Գ.-ն, և Էրեբունի վարչական շրջանի ղեկավարի նախկին տեղակալ Ա.Օ.-ն: Նախաքննական մարմնի որոշմամբ՝ վերջիններս քրեական գործով ներգրավվել են որպես կասկածյալ:Բացի այդ, մեկ այլ՝ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում «Կարեն Դեմիրճյանի անվան Երևանի մետրոպոլիտեն» ՓԲ ընկերության տնօրենի կողմից պաշտոնեական դիրքի օգտագործմամբ առանձնապես խոշոր չափերով վատնում կատարելու դեպքի առթիվ քննվող քրեական գործով պարզվել է, որ 2014թ. օգոստոսից մինչև 2017թ. հունվարն ընկած ժամանակահատվածում Էրեբունի վարչական շրջանի նախկին ղեկավար Դ.Գ-ն. զբաղեցրել է վերոնշյալ ընկերության տնօրենների խորհրդի նախագահի պաշտոնը:Քննության տվյալներով՝ վերջինս պաշտոնավարման ընթացքում, պաշտոնեական դիրքի օգտագործմամբ, օժանդակել է ՓԲ ընկերության տնօրենի կողմից առանձնապես խոշոր չափերով վատնում կատարելուն:Ձեռք բերված բավարար ապացույցների հիման վրա՝ Դ.Գ.-ին մեղադրանք է առաջադրվել՝ ՀՀ քրեական օրենսգրքի 38-179-րդ (վատնելուն օժանդակելը) հոդվածի 2-րդ մասի 1-ին կետով և որպես խափանման միջոց կիրառվել ստորագրություն՝ չհեռանալու մասին:Քրեական գործերի նախաքննությունը շարունակվում է:

20:10 - 17 դեկտեմբերի, 2020