Երևանի քաղաքապետարան

Երևանի քաղաքապետարանը համայնքային ծառայություններ իրականացնող պետական մարմին, որի նպատակն ու խնդիրն ավագանու և քաղաքապետի լիազորությունների լիարժեք և արդյունավետ իրականացման, ինչպես նաև քաղաքացիական իրավահարաբերություններին ավագանու և քաղաքապետի մասնակցության ապահովումն է։ Երևանի քաղաքապետը և ավագանին քաղաքապետարանի միջոցով համակարգում Երևանի ենթակայության հիմնարկների, առևտրային և ոչ առևտրային կազմակերպությունների գործունեությունը, կազմակերպում հանրապետական գործադիր մարմինների և դրանց՝ Երևանի տարածքային ծառայությունների հետ հարաբերությունները։

Քաղաքապետարանը ստեղծվում, վերակազմակերպվում և նրա գործունեությունը դադարեցվում է ավագանու որոշմամբ։

«Մայր Հայաստանը» չի մասնակցելու ավագանու նիստին և համընդհանուր բոյկոտի կոչ է անում

Երևանի կառավարման համակարգը ճգնաժամի մեջ է։ Ունենք փոքրամասնության իշխանություն, ինչը լեգիտիմության և կառավարման խնդիրներ է առաջացնում։ Ինչու է այդպես ստացվել և ինչ պետք է անել, Facebook-ում գրել է «Մայր Հայաստան» շարժման առաջնորդ Անդրանիկ Թևանյանը։ ««Մայր Հայաստանը» Երևանի ավագանու ընտրությունները դիտարկում էր որպես Հայաստանում ամբողջական իշխանափոխության հնարավորություն։ Մեր նվազագույն խնդիրը մայրաքաղաքում «Քաղաքացիական պայմանագիր» կուսակցության վերարտադրություն թույլ չտալն էր, ինչի հնարավորությունը 2023թ․ սեպտեմբերի 17–ի ընտրության արդյունքում ստեղծվել էր, սակայն ոչ իշխանական հատվածում, մեր կամքից անկախ, ընդհանուր հայտարար չեղավ։ Արդյունքում՝ ՔՊԿ + «Հանրապետություն» փոքրամասնության կոալիցիան «Հանրային ձայն» խմբակցության անուղղակի աջակցությամբ Երևանում ձևավորեց իշխանություն, ընտրեց ՔՊԿ–ական քաղաքապետ։ «Մայր Հայաստանն» անցած տարվա սեպտեմբերից առաջարկում է Երևանում գնալ նոր ընտրությունների։ Եթե քաղաքապետ չընտրվեր կամ եթե 3 ամիս շարունակ ավագանու նիստերը չկայանային, ապա օրենսդրության համաձայն պետք է նշանակվեին նոր ընտրություններ։ Սակայն «Հանրային ձայն» խմբակցության վարքագծի պատճառով և՛ քաղաքապետ ընտրվեց, և՛ նիստերը բոյկոտելու մարտավարությունը չաշխատեց, և՛ տեղական տուրքերի ու վճարների թանկացումներն անցան։ Երևանի ավագանու վերջին ընտրությունների արդյունքներով ՔՊԿ–ն ու իր քույր կուսակցությունը ստացել են 32 մանդատ։ «Մայր Հայաստանը», «Ազգային առաջընթացը», «Հանրային ձայնը» միասին ունեն 33 մանդատ, սակայն «Հանրային ձայնից» 2–ը օբյեկտիվորեն չեն կարող մասնակցել նիստերին։ Դա նշանակում է, որ Երևանի ավագանիում ոչ իշխանական հատվածը դե ֆակտո ունի 31 մանդատ, այսինքն՝ ավելի քիչ, քան իշխանություն ձևավորած կոալիցիան։ Դա էլ իր հերթին նշանակում է, որ մենք չենք կարող ՔՊԿ+«Հանրապետություն» կոալիցիայի հակաժողովրդական ու թալանչիական որոշումները տորպեդահարել՝ «դեմ» քվեարկելով, բայց կարող ենք դրանց ընդունումը թույլ չտալ՝ նիստերը բոյկոտելով։ Այսինքն՝ եթե մենք դեմ ենք որևէ որոշման (օրինակ՝ կարմիր կետագծերով ավտոկայանատեղիների կամ տրանսպորտի թանկացմանը), ապա ոչ թե պետք է մասնակցենք նիստին ու «դեմ» քվեարկենք, այլ պետք է նիստին չմասնակցենք, քվորում չապահովենք, ինչի հետևանքով նիստը չի կայանա ու վիճահարույց որոշումն էլ չի ընդունվի։ Այս մարտավարությունը, սակայն, մինչև այժմ չի հաջողվել կիրառել, քանզի «Հանրային ձայնը» միշտ գործել է իշխանությունների օգտին՝ դառնալով Երևանում իշխող կոալիցիայի փաստացի անդամ։ ՔՊԿ–ն ու «Հանրաապետությունը» մշտապես կանգնած են Երևանի ավագանու նիստերին քվորում ապահովելու խնդրի առաջ և վիճահարույց հարցերում ստիպված կուլիսային առևտրի մեջ են մտնում «Հանրային ձայնի» հետ։ Հիմա նրանք նախաձեռնել են ավագանու «Մայր Հայաստան» և «Ազգային առաջընթաց» խմբակցությունների 5 անդամի՝ Սոնա Աղեկյան, Գևորգ Ստեփանյան, Նարինե Հայրապետյան, Զարուհի Փոստանջյան, Հայկ Մարության մանդատազրկման գործընթաց։ Որպես հիմնավորում ներկայացվում է նրանց՝ քվեարկությունների կեսից ավելիից բացակայելը։ Իրավական–տեխնիկական դետալների մեջ չմտնելով նկատենք, որ քվեարկություններին չմասնակցելը, քվորում չապահովելը հակաիշխանական խմբակցությունների միակ արդյունավետ գործիքն է և դեմ լինելու քաղաքականության դրսևորման միակ ձևը։ Ավագանու ընդդիմադիր անդամների դեմ սանկցիաներ կիրառելով՝ իշխող կոալիցիան փորձում է ճնշումների միջոցով ստիպել «Մայր Հայաստանին» ու «Ազգային առաջընթացին» հրաժարվել բոյկոտի գործիքից, քանզի ամեն անգամ «Հանրային ձայնի» հետ կուլիսային առևտուրն, ըստ ամենայնի, թանկ է նստում ու տհաճություններ պատճառում։ Ավագանու 5 անդամի մանդատից զրկելու նախաձեռնությունը ոչ լեգիտիմ է։ Այդ նախաձեռնությունը չեզոքացնելու արդյունավետ գործիքը նիստը բոյկոտելն է, որպեսզի քվորում չապահովվի, նիստը չկայանա ու նիկոլփաշինյանական ծրագիրը կյանքի չկոչվի։ «Մայր Հայաստանը» չի մասնակցելու այդ նիստին և համընդհանուր բոյկոտի կոչ է անում։ Բայց եթե մեր կամքից անկախ («Հանրային ձայնի» որևէ ներկայացուցչի կամ ներկայացուցիչների մասնակցության դեպքում) այդ նիստը կայանա, ապա մեր խմբակցության անդամները կմտնեն նիստերի դահլիճ, որպեսզի իրենց ասելիքն ասեն ՔՊԿ–ի, «Հանրապետության» ու «Հանրային ձայնի» ծախված անդամի/անդամների երեսներին։ Բուն մանդատազրկման քվեարկությանն այդ դեպքում «Մայր Հայաստանը» կրկին չի մասնակցի։ Ակնհայտ է, որ ընդդիմադիր ավագանիների դեմ հարձակվել են ու նրանց ուզում են մանդատից զրկել, որպեսզի կարողանան մարսել քաղաքային տրանսպորտի թանկացման և հետագա այլ թանկացումների որոշումները։ Այս պահին դժվար է ասել, թե ինչպիսի ընթացք կստանա փետրվարի 7–ին նշանակված Երևանի ավագանու արտահերթ նիստը։ Քաղաքական կյանքն այնքան է այլասերվել ու գռեհիկ դարձել, որ բոլորը նստած սպասում են, թե արդյոք «Հանրային ձայնի» այս կամ այն անդամը/անդամները կծախվի/կծախվեն, թե ոչ։ Այսինքն՝ բոլորը գիտեն, որ նիկոլենք ապօրինի եղանակներով ուզում են «անասնագողությամբ» զբաղվել։ «Ժողովրդավարության բաստիոն» կոչվածում ոչնչացվում է ՏԻՄ–ը։ Նախկին արատավոր բարքերը քննադատողներն այսօր այնպիսի բարքեր են ներմուծում, որ նախկին իշխանությունները բարի փերիներ կարող են թվալ սրանց ֆոնին։ Ստեղծված ճգնաժամային իրավիճակում քաղաքական հանգուցալուծումը Երևանի ավագանու նոր ընտրություններն են։ Նախորդ տարվա սեպտեմբերին մենք առաջարկում էինք Երևանի քաղաքապետի ընտրության նիստերը բոյկոտել և այդպիսով նպաստել ավագանու նոր ընտրությունների անցկացմանը, սակայն հայտնի գործարքի արդյունքում փաշինյանենց հաջողվեց քաղաքապետի պաշտոնը պահել իրենց մոտ և խուսափել նոր ընտրություններից։ Հիմա կա հնարավորություն թույլ չտալ տրանսպորտի թանկացումները, մյուս հակաժողովրդական որոշումները՝ նիստերը բոյկոտելու միջոցով։ Ավագանու նիստերի բոյկոտը նաև նոր ընտրությունների գնալու հնարավորություն կտա։ Եթե առնվազն 3 ամիս ավագանու նիստերը չկայանան, ապա կառավարությունը պետք է նշանակի Երևանի ավագանու նոր ընտրություններ։ Մենք կողմ ենք նոր ընտրություններին։ Թե ինչպիսի զարգացումներ կունենանք, պարզ կդառնա փետրվարի 7–ին։ Եթե «անասնագողությունը» ստացվել է, ուրեմն նիստերի բոյկոտը չի ստացվի։ Եթե «անասնագողությունը» չի ստացվել, ուրեմն պետք է բոյկոտել բոլոր նիստերն ու գնալ նոր ընտրությունների»։

14:14 - 06 փետրվարի, 2024

Ի պատասխան «Կանաչապատում և շրջակա միջավայրի պահպանություն» ՀՈԱԿ-ի՝ «Հետք»-ի հոդվածի հերքման |hetq.am|

hetq.am: «Կանաչապատում և շրջակա միջավայրի պահպանություն» ՀՈԱԿ-ը 2024-ի հունվարի 30-ին «Հետք»-ի «Քաղաքապետարանը շալախ տեսակի մեկ ծիրանենին գնել է 19 500 դրամով» հոդվածին անդրադարձել է հերքմամբ՝ բերված փաստերը համարելով խեղաթյուրված: Նախապատմություն «Հետքը» ներկայացրել էր «Կանաչապատում և շրջակա միջավայրի պահպանություն» ՀՈԱԿ-ի երկու գնումները: ՀՈԱԿ-ը նույնատիպ ծիրանենին առաջին գնումից մոտ մեկ տարի անց նույն կազմակերպությունից ձեռք է բերել գնային մեծ տարբերությամբ: 2023-ի փետրվարի 16-ին «Կանաչապատում և շրջակա միջավայրի պահպանություն» ՀՈԱԿ-ը և «Գնումների աջակցման խորհրդատվական կենտրոն» ընկերությունը պայմանագիր են կնքել «Երևան» տեսակի (հայտնի է նաեւ շալախ անունով) 100 ծիրանենու մատակարարման վերաբերյալ։ Պայմանագրի տվյալներով՝ մեկ ծիրանենու գինը 19 500 դրամ է։ Պայմանագրի ընդհանուր գինը 1 մլն 950 հազար դրամ է։ Նմանատիպ մեկ այլ պայմանագիր նույն ընկերության հետ կնքվել էր 2022-ի ապրիլի 4-ին, ըստ որի՝ ՀՈԱԿ-ին մատակարարվել են տարբեր տեսակի ծառեր, այդ թվում՝ ծիրանենի «Երևան», մեկ հատի գինը՝ 2 400 դրամ։ Պայմանագրով գնվել է 50 հատ, ընդհանուր գինը՝ 120 000 դրամ։ «Հետք»-ը ՀՈԱԿ-ին խնդրել էր պատասխանել՝ ինչու է մեկ ծառը գնվել 19 500 դրամով, եթե դրա շուկայական արժեքը տատանվում է 1 500-2 000 դրամի սահմաններում, և ինչու՞ են այս երկու պայմանագրով գնված ծիրանենիների գներն այսչափ տարբերվում։ Մեր հարցմանը ՀՈԱԿ-ը հստակ պատասխան չի տվել, միայն նշել է, որ գնված ծառերն ունեցել են հստակ տեխնիկական բնութագիր։ Վերոնշյալ երկու պայմանագրում առկա տեխնիկական բնութագրերը տարբերվում են, և դրանց տարբերության արդյունքում գնային առաջարկը փոխվել է՝ 2 400-ից դառնալով 19 500 դրամ։ Ի՞նչ տարբերություններ կան այդ տնկիների միջև, որ գումարը ավելացել է 17 100 դրամով։ Հետքի անդրադարձը ՀՈԱԿ-ի հայտարարությանը Հոդվածի հրապարակման օրը ՀՈԱԿ-ի ֆեյսբուքյան էջում եւ կայքում հերքման տեքստ հարապարակվեց: ՀՈԱԿ-ի տեքստում նշվում է, որ երկու պայմանագրերում տեխնիկական բնութագրերը տարբերվում են և գնային նման տարբերության պատճառը դա է։ 2 400 դրամով գնված ծառի տեխնիկական բնութագրում նշված է՝ 2․5-3․5 սմ ցողունի տրամագծով։ 19 500 դրամով գնված ծառի տեխնիկական բնութագրում նշված է՝ 10-12 սմ բնի պարագծով։ Այս հանգամանքը շփոթեցնող է: Ըստ երկրաչափական հաշվարկների՝ պարագիծը հավասար է π * տրամագիծ, π = 3․14։ Ստացվում է, որ 2 400 դրամով գնված ծառի պարագիծը պետք է լիներ 7․85-11 սմ՝ միջինում 9․4 սմ։ Ասպիսով, տնկիների ցողունի, ըստ երկորրդ պայմանագրի՝ բնի պարագծերի տարբերությունը 1,6 սմ է։ Ծիրանենիների հիմնական տարբերությունը դրանց ճյուղերի քանակի և ճյուղերի երկարության մեջ է, քանի որ երկու դեպքում էլ պետք է լիներ փակ արմատային համակարգով, 2 մետր բարձրության սահմաններում և այլն։ Այսպիսով՝ տեխնիկական բնութագրով քիչ տարբերվող երկու ծիրանենու գնի միջեւ 17 100 դրամի տարբերություն կա։ ՀՈԱԿ-ը ֆեյսբուքյան էջում երկու լուսանկար է տեղադրել եւ ցուցադրել այս երկու տեխնիկական բնութագրերով տնկիները: Առաջին լուսանկարում 2 400 դրամով գնված ծիրանենին է, որը չի համապատասխանում պայմանագրում նշված տեխնիկական բնութագրին։ Ծառի ցողունի տրամագիծը 2․5-3․5սմ չէ կամ ցողունի պարագիծը 7․85-11սմ չէ: Մենք չափել ենք լուսանկարի ծառի տրամագիծը eleif.net/photomeasure-ի միջոցով և պարզել, որ դրանց տրամագիծը նույնիսկ 1․5սմ չէ։ Ի տարբերություն երկրորդ լուսանկարի ծառի արմատային համակարգի՝ առաջին լուսանկարի ծառի արմատային համակարգը փակ չէ, պարզապես հողագնդային է։ Ստացվում է՝ կամ այս լուսանկարի ծառը այն ծառը չէ, որը գնվել է 2022-ի ապրիլի 4-ի պայմանագրով, կամ վաճառող ընկերությունը մատակարարել է տեխնիկական բնութագրին չհամապատասխանող ծառ, եւ ՀՈԱԿ-ն այն ընդունել է։ «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանի պարզաբանումը Մենք հանդիպեցինք ՀՈԱԿ-ի տնօրեն Արմեն Բեգոյանի հետ և ներկայացրեցինք՝ ինչ տարբերություններ կան ծառերի միջև և որ դրանք, ըստ տեխնիկական բնութագրերի, քիչ են տարբերվում միմյանցից։ Այս ամենին ի պատասխան՝ նա ասաց․ «Եթե նույնիսկ ծառերը նույն չափսերի լինեին, չնայած այս դեպքում տարբերություններ կան, տեսեք՝ պայմանագրերում (19 500 դրամով կնքված) սաղարթի ճյուղերի քանակ կա, ճյուղերի երկարություն կա, որը հուշում է, որ ավելի հասուն ծառ ենք գնել։ Եթե դրանք (երկու պայմանագրերով գնված ծառերը) չափսերով հավասար էլ լինեին, մեկ դեպքում եղել է տնկի, մյուս դեպքում ծառը աճեցվել է թաղարի մեջ։ Այսինքն՝ ոչ թե այդ ծառը աճեցվել է դաշտում՝ սերմով, այլ ծառերն աճեցվել են թաղարի մեջ, դույլանման թաղարի մեջ։ Դրանք սովորաբար թանկ են արժենում, քան թե դաշտում աճեցված ծառերը։ Այո, տեխնիկական բնութագրերը առաջին հայացքից նման են, բայց նաև այն հանգամանքը, որ 7-9 ճյուղ ենք պահանջել գնման ժամանակ, խոսում է, որ մենք պահանջել ենք արդեն սաղարթ ձևավորած ծառ։ Իսկ 2-3 ճյուղը նշանակում է, որ դա շիվ է, երկար աճած, բարակ շիվ է»։ Արմեն Բեգոյանը նշեց, որ ծառերի տնկման վայրը լցված է եղել շինաղբով, և այնտեղ ռեկուլտիվացիոն աշխատանքներ են արվել, այդ պատճառով էլ անհրաժեշտություն է եղել ֆասադային հատվածում նման ծառեր տնկել։ «Այսպես ասած՝ լիցքը նստած չի եղել, և մենք բոլորս էլ հասկանում էինք, որ տարածք ջրելուց հետո, արանքներով լցված, էդ քարհանքից բերված աղբի արանքներով ջուրը հոսելու է և չի մնալու ծառի բնաբաժակում։ Իսկ տվյալ դեպքում ծառն ամբողջությամբ կպած է հողին, եթե նույնիսկ փորձես պոկել նրան կպած հողագունդը, այն չի պոկվի։ Այս նպատակով մասնագետները առաջարկել են, որ ծառերը լինեն անպայման փակ արմատային համակարգով աճեցված»,- ասաց Արմեն Բեգոյանը։ Իսկ թե ինչու 2022-ին 2 400 դրամով գնված ծառը չի եղել փակ արմատային համակարգով՝ ինչպես նշված է թե՛ 2022-ի, թե 2023-ի պայմանագրերում, Արմեն Բեգոյանն ասաց, որ 2022-ի պայմանագրով գնված ծառը եղել է պոլիէթիլենային տոպրակների մեջ, այդպես են իրեն փոխանցել, քանի որ ինքն այդ ընթացքում տնօրեն չի եղել։ «Ամեն սանտիմետրը, երբ որ ծառը հաստանում է, առնվազն տարիների հարց է, դեռ տարբեր ձևերով աճեցված լինելու մասին չեմ խոսում։ Նախկինում Երևանում տասնյակ հազարավոր շիվեր են տնկվել, ես չեմ տեսել՝ այդ ծառերը ուր են, որովհետև դրանք ծառ չեն դարձել։ Դրանք արժեցել են մի քանի հազար դրամ։ Այսօր Երևանը ձեռք է բերում 50-80 հազար դրամանոց ծառեր։ Գները տարբերվում են, բայց որակը նույնպես տարբերվում է։ Եթե իմ հարցազրույցները նայեք, ես միշտ ասում եմ, որ Երևանը այլևս չի գնելու ճկույթի չափի շիվեր, որոնք այդպես էլ ծառ չեն դառնում»,- ասաց Արմեն Բեգոյանը։ Շարունակությունը՝ սկզբնաղբյուր կայքում

09:54 - 02 փետրվարի, 2024