Շվեդիա

Թուրքիայի արտգործնախարարը ՆԱՏՕ-ի գլխավոր քարտուղարի հետ հեռախոսազրույց է ունեցել |armenpress.am|

armenpress.am: Թուրքիայի արտգործնախարար Մևլութ Չավուշօղլուն հեռախոսազրույց է ունեցել ՆԱՏՕ-ի գլխավոր քարտուղար Յենս Ստոլտենբերգի հետ: Այս մասին հայտնում է թուրքական hurriyet.com.tr-ն: «ԱԳ նախարար Մևլութ Չավուշօղլուն այսօր հեռախոսազրույց է ունեցել ՆԱՏՕ-ի գլխավոր քարտուղար Յենս Ստոլտենբերգի հետ: Զրույցի ժամանակ քննարկվել են ՆԱՏՕ-ի ընդլայնմանը վերաբերող հարցեր»,- ասվում է Թուրքիայի ԱԳՆ կողմից տարածված հայտարարության մեջ։ Ֆինլանդիան և Շվեդիան ՆԱՏՕ-ին անդամակցելու հայտ են ներկայացրել: ՆԱՏՕ-ին այս երկու երկրների անդամակցությանը դեռևս դեմ է հանդես գալիս միայն Թուրքիան:

13:59 - 15 հունիսի, 2022

Ֆինլանդիան չի անդամակցի ՆԱՏՕ-ին առանց Շվեդիայի․ նախագահ Սաուլի Նիինիստյո |armenpress.am|

armenpress.am: Ֆինլանդիայի նախագահ Սաուլի Նիինիստյոն լրագրողներին հայտարարել է, որ Ֆինլանդիան ՆԱՏՕ-ին չի անդամակցի առանց Շվեդիայի: «Երբ ես վերջին անգամ այցելեցի Շվեդիա, ես շատ հստակ հասկանալ տվեցի դա»,-ասել է Նիինիստյոն՝ ՆԱՏՕ-ի գլխավոր քարտուղար Յանս Ստոլտենբերգի հետ Հելսինկիում կայացած համատեղ մամուլի ասուլիսի ընթացքում: Նախագահը պարզաբանել է. «Շվեդիայում ասում են, որ ֆիննական հարցը մեր գործն է, եւ հենց նույնպիսին է շվեդական հարցը՝ դա մեր գործն է, իսկ դա նշանակում է, որ մենք առաջ ենք ընթանում ձեռք ձեռքի տված»: Նա նշել է, որ ՆԱՏՕ-ին Ֆինլանդիայի անդամակցության դեմ Թուրքիայի առարկություններն իր համար անսպասելի են դարձել: «Ես զարմացած եմ Թուրքիայի դիրքորոշմամբ, սակայն մենք պետք է լրջորեն վերաբերվենք այն թեմաներին, որոնց կապակցությամբ նա անհանգստություն է հայտնում»,-ասել է Ֆինլանդիայի ղեկավարը, հույս հայտնելով, որ «կհաջողվի լուծում գտնել, որը բոլորին կբավարարի»: Ստոլտենբերգն իր հերթին, խոսելով Թուրքիայի պահանջների մասին, հայտարարել է. «Դրանք օրինական կասկածներ են, խոսքը ահաբեկչության մասին է, խոսքը զենքի արտահանման մասին է»: Նրա խոսքով՝ հարկ է «հիշել եւ հասկանալ, որ ՆԱՏՕ-ի ոչ մի դաշնակից չի տուժել այն մեծ քանակությամբ ահաբեկչական հարձակումներից, որքան Թուրքիան»: Ֆինլանդիան եւ Շվեդիան ՆԱՏՕ-ին անդամակցության հայտեր են ներկայացրել մայիսի 18-ին: Սակայն Թուրքիան ներկայում այդ հարտերի քննարկումն արգելափակում է: Անկարան մի շարք պահանջներ ունի սկանդինավյան երկրների նկատմամբ. մասնավորապես, նա նրանց մեղադրում է քրդական խմբավորումներին աջակցելու մեջ, որոնք Թուրքիայում համարվում են ահաբեկչական, հաղորդել է «Ինտերֆաքս»-ը:

12:30 - 13 հունիսի, 2022

ՆԱՏՕ-ին Շվեդիայի և Ֆինլանդիայի անդամակցության վերաբերյալ Թուրքիայի մտավախություններն արդարացված են․ Ստոլտենբերգ

ՆԱՏՕ-ին Շվեդիայի և Ֆինլանդիայի անդամակցության հեռանկարի առնչությամբ Թուրքիայի անհանգստությունն անվտանգության հարցերի շուրջ արդարացված է։ Այսպիսի հայտարարություն է արել այսօր ՆԱՏՕ-ի գլխավոր քարտուղար Յենս Ստոլտենբերգը Ֆինլանդիա կատարած այցի ժամանակ, հայտնում է DW-ն։ ՆԱՏՕ-ի ոչ մի այլ երկիր նման քանակությամբ ահաբեկչական գրոհների չի ենթարկվել, որքան Թուրքիան։ Ադ պատճառով էլ Անկարայի մտավախություններին պետք է լուրջ մոտենալ, ընդգծել է Ստոլտենբերգը Ֆինլանդիայի նախագահ Սաուլի Նիինիստյոյի հետ հանդիպման ժամանակ։ Վաղը՝ հունիսի 13-ին, ՆԱՏՕ-ի գլխավոր քարտուղարը Շվեդիայում բանակցություններ կանցկացնի նաև այդ երկրի վարչապետ Մագդալենա Անդերսոնի և նրա գլխավորած կառավարության անդամների հետ։ Ֆինլանդիան ու Շվեդիան հայտարարել են ՆԱՏՕ-ին անդամակցելու մտադրության մասին՝ ուկրաինական պատերազմի ֆոնին։ Այս երկրների անդամակցության համար անհրաժեշտ է դաշինքի բոլոր 30 անդամների համաձայնությունը։ Սակայն Անկարան մին օրս կողմ չի արտահայտվում այդ նախաձեռնությանը։ Թուրքիայի նախագահ Ռեջեփ Թայիփ Էրդողանը դա հիմնավորում է այն «քրդերի հարցում Ֆինլանդիայի և Շվեդիայի հստակ դիրքորոշման բացակայությամբ», որոնց Թուրքիայում համարում են ահաբեկչական կազմակերպության ներկայացուցիչ։ Բացի այդ, Անկարային դուր չի գալիս, որ 2019 թ-ին Ստոկհոլմն ու Հելսինկին այդ երկրին զենքի մատակարարման էմբարգո են սահմանել։ Նորա Վանյան

19:00 - 12 հունիսի, 2022

Թուրքիան նախկինի նման չի աջակցում Շվեդիայի և Ֆինլանդիայի՝ ՆԱՏՕ-ին անդամակցելուն. Էրդողան |armenpress.am|

armenpress.am: Անկարան նախկինի նման չի համաձայնել Շվեդիայի և Ֆինլանդիայի՝ ՆԱՏՕ մտնելու հետ։ Ինչպես հաղորդում է ՏԱՍՍ գործակալությունը,այս մասին հայտարարել է նախագահ Ռեջեփ Թայիփ Էրդողանը՝ Վենեսուելայի նախագահ Նիկոլաս Մադուրոյի հետ բանակցություններից հետո Անկարայում կայացած մամուլի ասուլիսում։ «Շվեդական հեռուստատեսությունը հարցազրույց է վարել ահաբեկչական խմբավորումների առաջնորդների հետ։ Դրանից հետո մենք չենք կարող ասել՝ բարի գալուստ ՆԱՏՕ։ Նույնը վերաբերում է Ֆինլանդիային»,- ասել է Թուրքիայի նախագահը։

21:38 - 08 հունիսի, 2022

Շվեդիայի խորհրդարանում չի հաջողվել անվստահություն հայտնել արդարադատության նախարարին

Շվեդիայի կառավարությունը կարողացել է խուսափել խորհրդարանի կողմից անվտսահություն հայտնելուց, գրում է Reuters-ը։ Շնորհիվ այն բանի, որ խորհրդարանի անկախ, իրանաքրդական ծագման պատգամավոր Ամինե Կակաբավեն ձեռնպահ է մնացել քվեարկությունից, խորհրդարանը չի կարողացել անվստահություն հայտնել երկրի արդարադատության նախարար Մորգան Յոհանսոնին։ Քվեարկություն նախաձեռնելու պատճառը հանցավորության աճն էր։ Առանց Կակաբավեի քվեի՝ նախարարին անվստահություն հայտնելուն կողմ է արտահայատվել խորհրդարանի 174 պատգամավոր, սակայն որոշման կայացման համար անհրաժեշտ էր 175 ձայն։ Ավելի վաղ երկրի վարչապետ Մագդալենա Անդերսոնը հայտարարել էր, որ իր կառավարությունը հրաժարական կտա, եթե խորհրդարանը նախարարին անվստահություն հայտնի։ Նորա Վանյան

19:03 - 07 հունիսի, 2022

ՆԱՏՕ-ի գլխավոր քարտուղարը և Թուրքիայի նախագահը հեռախոսազրույց են ունեցել․ քննարկվել է Շվեդիայի և Ֆինլանդիայի՝ ՆԱՏՕ-ին անդամակցելու հարցը |tert.am|

tert.am: Շվեդիան և Ֆինլանդիան ՆԱՏՕ-ին միանալու համար պետք է հստակ ցույց տան, որ հրաժարվում են աջակցել Քրդստանի Աշխատավորական կուսակցությանը։ Այս մասին հայտարարել է Թուրքիայի նախագահ Ռեջեփ Թայիփ Էրդողանը ՆԱՏՕ-ի գլխավոր քարտուղար Ենս Ստոլտենբերգի հետ հեռախոսազրույցի ժամանակ, գրում է ՏԱՍՍ-ը։ «Կողմերը քննարկել են Շվեդիայի և Ֆինլանդիայի՝ ՆԱՏՕ-ին անդամակցելու հարցը։ Նախագահ Էրդողանն ասել է, որ Թուրքիայի անհանգստությունը ՆԱՏՕ-ին Շվեդիայի և Ֆինլանդիայի անդամակցության վերաբերյալ հիմնված է իրավական պահանջների վրա։ Նախագահ Էրդողանն ընդգծել է, որ երկու երկրները պետք է հստակ ցույց տան, որ հրաժարվել են ահաբեկչությանն աջակցելուց, չեղարկել են Թուրքիայի դեմ պատժամիջոցները և պատրաստ են համերաշխություն ցուցաբերել դաշինքին»,- լրագրողներին ասել են Թուրքիայի նախագահի գրասենյակից։ Ստոլտենբերգն իր հերթին նշել է, որ «առանցքային դաշնակից Թուրքիայի ակնկալիքները պետք է իրականացվեն»։

11:02 - 04 հունիսի, 2022

Ստոլտենբերգը Թուրքիայի, Ֆինլանդիայի և Շվեդիայի միջև ՆԱՏՕ-ին անդամակցության հարցով բանակցություններ է կազմակերպում |factor.am|

factor.am: ՆԱՏՕ-ն հայտարարել է, որ բանակցություններ է անցկացնելու Թուրքիայի, Ֆինլանդիայի և Շվեդիայի մասնակցությամբ՝ հույս ունենալով այս ամիս կայանալիք գագաթնաժողովից առաջ վերջ տալ Անկարայի դիմադրությանը դաշինքին այս երկրների միանալուն։ Այս մասին հայտնել է AFP-ն, որին վկայակոչում է Turkish Minute-ը։ ՆԱՏՕ-ի գլխավոր քարտուղար Յենս Ստոլտենբերգն ասել է, որ առաջիկա օրերին երեք երկրների բարձրաստիճան պաշտոնյաներին հավաքելու է Բրյուսելում, որպեսզի առաջընթաց ապահովի ՆԱՏՕ-ին Շվեդիայի և Ֆինլանդիայի միանալու դիմումների հարցում։«Իմ մտադրությունն է դա անել նախքան հունիսի 28-ին Մադրիդում կայանալիք ՆԱՏՕ-ի գագաթնաժողովը։ Ֆինլանդիան և Շվեդիան հստակեցրել են, որ պատրաստ են նստել սեղանի շուրջ և անդրադառնալ Թուրքիայի մտահոգություններին»,- ասել է Ստոլտենբերգը ԱՄՆ պետքարտուղար Էնթոնի Բլինքենի հետ համատեղ մամուլի ասուլիսում։

15:53 - 02 հունիսի, 2022

Շվեդիայի վարչապետը հայտարարել է, որ Թուրքիայի հետ երկխոսությունը ՆԱՏՕ-ին անդամակցելու շուրջ կշարունակվի |factor.am|

factor.am: Շվեդիայի վարչապետ Մագդալենա Անդերսոնը հայտարարել է, որ Թուրքիայի հետ երկխոսությունը ՆԱՏՕ-ին Ստոկհոլմի անդամակցության վերաբերյալ կշարունակվի, և Շվեդիան ուղղակիորեն կպատասխանի Թուրքիային՝ հնարավոր «թյուրիմացությունները կարգավորելու» համար, գրում է CNN-ը։«Մենք ունենք քննարկումներ, երկխոսություն Թուրքիայի հետ, և այդ երկխոսությունը կշարունակվի։ Ես անհամբեր սպասում եմ Թուրքիայի հետ հետագա կառուցողական հանդիպումներին մոտ ապագայում»,- ասել է Անդերսոնը Ստոկհոլմում ՄԱԿ-ի գլխավոր քարտուղարի հետ մամուլի ասուլիսում։ Նա նշել է, որ իրենց պատասխանները Թուրքիայի պահանջներին ու հարցերին ուղիղ են ուղղելու Անկարային և կլուծեն ցանկացած խնդիր կամ թյուրիմացություն, որ կարող է լինել։

22:00 - 01 հունիսի, 2022

Ֆինլանդիան ու Շվեդիան կշարունակեն ՆԱՏՕ-ին անդամակցության շուրջ բանակցությունները Թուրքիայի հետ

Ֆինլանդիան ու Շվեդիան հայտարարել են, որ շարունակելու են երկխոսությունը Թուրքիայի հետ՝ ՆԱՏՕ-ին սկանդինավյան այս երկրների անդամակցության շուրջ Անկարայի առարկությունների վերաբերյալ, գրում է Reuters-ը։ Երկու երկրներն էլ մայիսին ՆԱՏՕ-ին անդամակցության հայտ են ներկայացրել, սակայն բախվել են Թուրքիայի դիմադրությանը, որը նրանց մեղադրում է քուրդ զինյալների համար ապաստան լինելու համար և պահանջում, որպեսզի նրանք չեղարկեն Թուրքիային զենքի մատակարարման արգելքը։ «Շվեդիայի հետ միասին մենք կպատրաստվենք այն հարցերին, որոնք ունի Թուրքիան», - լրագրողներին ասել է Ֆինլանդիայի արտգործնախարար Պեկա Հաավիստոն։ ՆԱՏՕ-ի անդամ դառնալու համար անհրաժեշտ է դաշինքի բոլոր 30 անդամ երկրների համաձայնությունը։ Շվեդիայի վարչապետ Մագդալենա Անդերսոնն էլ հայտարարել է, որ մոտ ապագայում Թուրքիայի ներկայացուցիչների հետ կառուցողական հանդիպումներ է ակնկալում։ Նորա Վանյան

17:21 - 01 հունիսի, 2022

Թուրքիան սկսում է Սիրիայի հյուսիսում իրականացվող գործողության հերթական փուլը․ Էրդողան |azatutyun.am|

azatutyun.am: «Թուրքիան մուտք է գործում Սիրիայի հետ սահմանի երկայնքով 30 կիլոմետրանոց անվտանգություն գոտի ստեղծելուն ուղղված գործողության հերթական փուլ», - այսօր Անկարայում, իշխող «Արդարություն և Զարգացում» կուսակցության խորհրդարանական խմբակցության անդամների հետ հանդիպման ժամանակ, հայտարարել է Թուրքիայի նախագահ Ռեջեպ Թայիփ Էրդողանը։ «Առաջիկայում թուրքական բանակը Թել-Ռիֆաաթի և Մանբիջի շրջանները կզտի այստեղ գործող ահաբեկչական կառույցներից։ Աստիճանաբար այդ գործողությունները կտարածվեն նաև [Սիրիայի հյուսիսի] մյուս շրջանների վրա», - ասել է Թուրքիայի նախագահը։ Այսօրվա ելույթում Էրդողանը անդրադարձել է նաև այն առարկություններին, որ ներկայացնում են թուրքական իշխանությունները՝ Շվեդիայի և Ֆինլանդիայի ՆԱՏՕ-ին անդամակցելու հեռանկարների հետ կապված։ «Մենք փաստարկված կերպով բացատրել ենք, թե ինչու ենք առարկում այս երկրների անդամակցությանը։ Մինչ օրս, սակայն, որևէ փաստաթուղթ, որ կփարատեր մեր մտավախությունները, չենք ստացել», -նշել է Թուրքիայի նախագահը։

16:11 - 01 հունիսի, 2022

Թուրքիան դեմ է պատժամիջոցներին, սակայն թույլ չի տա իր միջոցով շրջանցել դրանք․ Չավուշօղլու

Թուրքիայի արտգործնախարար Մևլյութ Չավուշօղլուն «Անադոլու» լրատվական գործակալության լրագրողների հետ հանդիպման ժամանակ անդրադարձել է Ուկրաինա ներխուժման պատճառով Ռուսաստանի դեմ կիրառված պատժամիջոցներին։ Նա նշել է, որ պատժամիջոցների ազդեցությունը կրում են ոչ միայն այն երկրները, որոնք մտցնում են այդ սահմանափակումները, կամ նրանք, ում դեմ դրանք կիրառվում են, այլև շատ այլ երկրներ։ «Թուրքիան տեղակայված է մի տարածաշրջանում, որտեղ շարունակվում է պատերազմը։ Հակամարտության [գոտուց] մեզ միայն ծովն է բաժանում։ Մեր երկիրը կրում է պատժամիջոցների հետևանքները, չնայած որ չի սատարել դրանք։ Ռուսաստանը պատասխան սահմանափակումներ է կիառում, սահմանփակում է արտահանումը։ Դա վերաբերում է, օրինակ, պարարտանյութերի, արևածաղկի ձեթի և հացահատիկի արտահանմանը», - նշել է նա։ Չավուշօղլուն ընդգծել է, որ իր երկրի դիրքորոշումն այս հարցի վերաբերյալ հստակ է․ «Մենք սկզբունքորեն դեմ ենք ցանկացած տիպի պատժամիջոցներին։ Թուրքիան հայտարարում է, որ կսատարի միայն այն սահմանափակումները, որոնք կիրառվում են ՄԱԿ մակարդակով։ […] Մենք չենք սատարել [ՌԴ դեմ] պատժամիջոցները, սակայն դա չի նշանակում, թե Անկարան թույլ կտա սահմանափակումները շրջանցել Թուրքիայի միջոցով»։ Ինչ վերաբերում է ՆԱՏՕ-ին Շվեդիայի և Ֆինլանդիայի անդամակցությանը, Թուրքիայի ԱԳ նախարարն ասել է, որ Անկարան այդ երկրներից ակնկալում է «ահաբեկչական խմբավորումների հետ ցանկացած կապի դադարեցում»։ «Մեզ հստակ գրավոր երաշխիքներ են պետք։ […] Սկանդինավյան երկրները մեզ հայտնում են ազգային օրենսդրության վերանայման անհրաժեշտության մասին։ Մենք պատրաստ ենք սպասել այնքան, որքան պետք է, մինչև որ բավարարվեն Թուրքիայի ազգային անվտանգությանն առնչվող պահանջները», - ասել է նա։ Նորա Վանյան

17:40 - 31 մայիսի, 2022

«Ահաբեկչությունը սատարող» երկրներին թույլ չենք տալու անդամակցել ՆԱՏՕ-ին․ Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ նախորդ շաբաթ ֆիննական և շվեդական պատվիրակությունների հետ բանակցությունները «սպասված մակարդակով» չեն անցել, և Անկարան չի կարող «այո» ասել «ահաբեկչությունը սատարող» երկրների անդամակցությանը ՆԱՏՕ-ին, գրում է Reuters-ը։ «Քանի դեռ Թայիփ Էրդողանն է Թուրքիայի Հանրապետության ղեկավարը, մենք միանշանակ չենք կարող «այո» ասել ՆԱՏՕ-ին այն երկրների անդամակցությանը, որոնք սատարում են ահաբեկչությունը», - ասել է նա։ Թուրքիան ՆԱՏՕ-ին Շվեդիայի և Ֆինլանդիայի անդամակցության հայտերի առնչությամբ առարկություններ ունի այն հիմքով, թե այդ երկրներն օգնում են Թուրքիայում ահաբեկչական համարվող Քրդստանի աշխատավորական կուսակցության հետ կապ ունեցող անձանց։ Նա այս երկրներից պահանջում է նաև չեղարկել 2019 թ-ին Անկարային զենքի մատակարարման էմբարգոն։ Շվեդիան ու Ֆինլանդիան հայտարարել են, որ դատապարտում են ահաբեկչությունը։ Էրդողանը նշել է նաև, որ Թուրքիան ցանկանում է, որ Ռուսաստանի և Ուկրաինայի միջև պատերազմը հնարավորինս շուտ ավարտվի, սակայն իրավիճակն օրեցօր ավելի է վատթարանում։ «Երկուշաբթի հեռախոսազրույց եմ ունենալու Ռուսաստանի և Ուկրաինայի հետ։ Մենք շարունակելու ենք կողմերին կոչ անել օգտագործելու երկխոսության և դիվանագիտության խողովակները», - ասել է նա։ Նորա Վանյան

17:45 - 29 մայիսի, 2022

ՆԱՏՕ-ն ստիպված կլինի փոխզիջումներ փնտրել Թուրքիայի հետ. ՌԴ ԱԳՆ |tert.am|

tert.am: ՆԱՏՕ-ի գործընկերները, ամենայն հավանականությամբ, ստիպված կլինեն փոխզիջման գնալ Թուրքիայի հետ Շվեդիայի և Ֆինլանդիայի՝ դաշինք մտնելու հարցում, և Անկարայի մտահոգությունների վրա աչք չեն փակի, հայտարարել է Ռուսաստանի փոխարտգործնախարար Ալեքսանդր Գրուշկոն։«Ակնհայտ է, որ ո՛չ Բրյուսելում, ո՛չ Ստոկհոլմում, ո՛չ Հելսինկիում չեն կարողանա այդքան հեշտ մի կողմ դնել թուրքական կողմի մտահոգությունները: Չեմ կարծում, որ Անկարային կարելի է համոզել միայն ՆԱՏՕ-ի համերաշխության մասին փաստարկի միջոցով: Կարծում եմ, որ որոշ փոխզիջումներ կգտնվեն, որոնք կհամապատասխանեն Անկարայի ձևակերպված շահերին ու դիրքորոշումներին»,- ՌԻԱ «Նովոստի»-ի փոխանցմամբ՝ ասել է նա:

10:48 - 28 մայիսի, 2022

Շվեդիան ահաբեկչական կազմակերպություններին չի ֆինանսավորում․ երկրի վարչապետ

Շվեդիայի վարչապետ Մագդալենա Անդերսոնը հայտնել է, որ շվեդ դիվանագետներն Անկարայում այսօր կայանալիք հանդիպումների ժամանակ կքննարկեն ՆԱՏՕ-ին Շվեդիայի և Ֆինլանդիայի անդամակցության առնչությամբ Թուրքիայի պահանջները, գրում է Reuters-ը։ «Մենք կքննարկենք [առարկությունների] ցանկը, կպարզենք մի շարք հարցեր, որոնք մեդիահաղորդագրություններում և այլ տեղերից ստացված հաղորդագրություններում անհստակ էին», - ասել է Անդերսոնը Ստոկհոլմում կայացած ասուլիսի ժամանակ։ «Ակնհայտ է, որ մենք փող չենք ուղարկում ահաբեկչական կազմակերպություններին, զենք՝ նույնպես», - ընդգծել է նա։ Նորա Վանյան

18:38 - 25 մայիսի, 2022

Թուրքիան Ֆինլանդիայի և Շվեդիայի հետ վաղը կքննարկի նրանց անդամակցությունը ՆԱՏՕ-ին

Թուրքիայի պաշտոնատար անձինք Անկարայում մայիսի 25-ին կհանդիպեն Շվեդիայի և Ֆինլանդիայի պատվիրակությունների հետ՝ ՆԱՏՕ-ին Ստոկհոլմի և Հելսինկիի անդամակցության հայտերը քննարկելու, Reuters-ի փոխանցմամբ՝ հայտնել է Թուրքիայի արտգործնախարարությունը։ Թուրքիայի նախագահ Ռեջեփ Թայիփ Էրդողանը, որը դեմ էր արտահայտվել ՆԱՏՕ-ին Շվեդիայի և Ֆինլանդիայի անդամակցությանը, շաբաթ օրը հեռախոսազրույց էր ունեցել այս երկու երկրների առաջնորդների հետ և քննարկել իր մտահոգությունները։ Թուրքիան պնդում է, որ Շվեդիան ու Ֆինլանդիան սատարում են Քրդստանի աշխատավորական կուսակցության հետ առնչություն ունեցող անձանց և Ֆեթուլլահ Գյուլենի հետևորդներին, որին Անկարան մեղադրում է 2016 թ-ին պետական հեղաշրջման փորձի համար։ Նորա Վանյան

16:11 - 24 մայիսի, 2022

ՆԱՏՕ-ն պետք է վերջ տա Շվեդիայի և Ֆինլանդիայի անդամակցության հարցով անիմաստ հայտարարություններին․ Էրդողան |azatutyun.am|

azatutyun.am: «Թուրքիան ակնկալում է, որ ՆԱՏՕ-ն անիմաստ հայտարարությունների փոխարեն կոնկրետ քայլեր կձեռնարկի Շվեդիայի և Ֆինլանդիայի անդամակցության շուրջ Անկարայի մտահոգությունները փարատելու հարցում», - այսօր հայտարարել է Թուրքիայի նախագահ Ռեջեփ Թայիփ Էրդողանը։ «ՆԱՏՕ-ի մեր գործընկերներից ահաբեկչության դեմ պայքարում մենք պատշաճ օգնություն չենք ստացել։ Մենք չենք կարող աչք փակել այն պատժամիջոցների վրա, որ մեր դեմ կիրառում է Շվեդիան։ Այդ պատժամիջոցներն ուղղակի անբացատրելի են», - հայտարարել է Թուրքիայի նախագահը։ «Քանի որ այն դերը, որ մենք խաղում ենք դաշինքում, հստակ է, մենք շարունակում ենք պատժամիջոցների վերացման հարցը քննարկել մեր դաշնակիցների հետ», - նշել է Էրդողանը։ 2019 թվականին Սիրիայի քրդաբնակ շրջաններ թուրքական ներխուժմանն ի պատասխան Շվեդիան դադարեցրել էր սպառազինության վաճառքը Անկարային։

15:58 - 23 մայիսի, 2022