Նախօրեին հրապարակվեցին Հայաստանում հանրային կարծիքի վերաբերյալ Միջազգային հանրապետական ինստիտուտի (International Republican Institute) Հարցումների հետազոտության կենտրոնի նախաձեռնությամբ անցկացված հարցումների արդյունքները։ Հարցումներն անցկացվել են այս տարվա առաջին եռամսյակի ընթացքում, մասնավորապես հունվարի 23-մարտի 04-ն ընկած ժամանակահատվածում դեմ առ դեմ հարցման մեթոդով։ Իսկ հարցումներում ընդգրկվել է 18 տարին լրացած 1513 ՀՀ քաղաքացի։

Որքանո՞վ է կոռուպցիան (կաշառակերությունը) խնդիր մեր երկրում․ ահա այս հարցին մասնակիցների 41%-ը պատասխանել է, որ կոռուպցիան Հայաստանում շատ մեծ խնդիր է, 6%-ը կարծում է, որ կոռուպցիան շատ փոքր խնդիր է կամ չկա այդպիսի խնդիր։ 32%-ը պատասխանել է, որ կոռուպցիան ավելի շուտ մեծ խնդիր է, իսկ 19%-ը՝ հակառակ կարծիքին է՝ կոռուպցիան ավելի շուտ փոքր խնդիր է։

Հարցվածների 21%-ը կարծում է, որ անցած 12 ամիսների ընթացքում իշխանությունների շրջանում կոռուպցիան աճել է, 30%-ը կարծում է՝ նվազել է, 39%-ը կարծում է, որ կոռուպցիան մնացել է նույնը, 10%-ը դժվարացել է պատասխանել այս հարցին։

Հարցումների ժամանակ ընթերցվել է հաստատությունների ցանկ, եւ հարցվողները պատասխանել են, թե ըստ իրենց դրանցից յուրաքանչյուրում կոռուպցիան առկա է շատ, որոշ չափով, քիչ, թե՞ չկա ընդհանրապես:

Այսպես, հարցվածների 21%-ը կարծում է, որ հանրային առողջապահական հաստատություններում կոռուպցիան շատ է, հարցվածների նույնքան տոկոսը կարծում է, որ այս հաստատություններում կոռուպցիա չկա, 37%-ը կարծում է, որ որոշ չափով կա։

Հարցվածների 20%-ը պատասխանել է, որ դատարաններում կոռուպցիան շատ է, 12%-ը պատասխանել է, որ դատարաններում կոռուպցիա չկա, իսկ 34%-ը կարծում է, որ կոռուպցիա կա որոշ չափով։

Ոստիկանության, այդ թվում՝ ճանապարհային ոստիկանության վերաբերյալ հարցին 12%-ը պատասխանել է, որ կոռուպցիան շատ է, 28%-ը պատասխանել է, որ չկա, իսկ 33%-ը պատասխանել է, որ կա որոշ չափով։

Հարցվածները թվել են նաեւ իրենց իմացած հակակոռուպցիոն բարեփոխումները, որոնք ներդրվել են կառավարության կողմից։ Ըստ հարցման տվյալների՝ հարցվածների 32%-ը չի նշել ոչ մի բարեփոխում, 7%-ը նշել է, որ կա կոռուպցիոն հանցագործությունների բացահայտման արդյունավետության բարձրացում, 4%-ը հիշատակել է մասնագիտացված հակակոռուպցիոն մարմինների մասին, 2%-ը՝ Հակակոռուպցիոն դատարանի մասին։