armenpress.am: Ազգային ժողովում նոյեմբերի 21-ին նախատեսված է արտահերթ նիստ, որում կքննարկվի Լեռնային Ղարաբաղից բռնի տեղահանված անձանց կենսաթոշակների և նպաստների տրամադրումը ապահովելու հարցը։

Ազգային ժողովի հերթական նիստում այս մասին ասաց աշխատանքի և սոցիալական հարցերի նախարար Նարեկ Մկրտչյանը՝ ներկայացնելով «Հայաստանի Հանրապետության 2024 թվականի պետական բյուջեի մասին» օրենքի նախագիծը։

«2024 թվականին կշարունակենք իրականացնել Լեռնային Ղարաբաղից բռնի տեղահանված մեր հայրենակիցների աջակցության ծրագրերը, այդ թվում նաև մեր հայրենակիցները հնարավորություն կստանան օգտվել սոցիալական երաշխիքներից Հայաստանի Հանրապետության օրենսդրությամբ սահմանված կարգով։ Նոյեմբերի 21-ին նախատեսված է Ազգային ժողովում արտահերթ քննարկման ներկայացնել «Կենսաթոշակների և նպաստների մասին» օրենքում փոփոխության նախագիծը, որով հնարավորություն կտանք նաև մեր հայրենակիցներին իրացնելու իրենց իրավունքները կենսաթոշակ և տարբեր տեսակի նպաստներ ստանալու առումով»,- ասաց Մկրտչյանը։