19:17 - 18 հունվարի, 2022
ԲՏԱ նախարարը Կատարինա Բյորլին Հանսենի հետ քննարկել է բարձր տեխնոլոգիաների ոլորտում փոխգործակցության հնարավորությունները
ՀՀ բարձր տեխնոլոգիական արդյունաբերության նախարար Վահագն Խաչատուրյանը հունվարի 17-ին ընդունել է Վերակառուցման և զարգացման եվրոպական բանկի (ՎԶԵԲ) Կովկասի, Մոլդովայի և Բելառուսի տարածաշրջանային ղեկավար, տնօրեն Կատարինա Բյորլին Հանսենին: Այս մասին ասված է նախարարության ֆեյսբուքյան էջում:
Ողջունելով հյուրին՝ Վահագն Խաչատուրյանն ընդգծել է, որ բարձր է գնահատում Վերակառուցման և զարգացման եվրոպական բանկի գործունեությունը և կարևորում է նախարարության հետ համագործակցության ընդլայնումը:
Նախարարը մատնանշել է ՀՀ կառավարության և ԲՏԱ նախարարության ռազմավարական ծրագրերի այն ոլորտներն ու առաջնահերթությունները, որտեղ փոխգործակցության հնարավորություններ են նախանշվում: Մասնավորապես՝ Վահագն Խաչատուրյանը ներկայացրել է գերարագ ինտերնետ ունենալու և թվայնացման ստանդարտների մշակման ուղղությամբ իրականացվող աշխատանքները:
Կատարինա Բյորլին Հանսեն Վերակառուցման և զարգացման եվրոպական բանկի պատրաստակամությունն է հայտնել՝ աջակցելու ներկայացված առաջնահերթությունների իրականացմանը, ինչպես նաև նպաստելու ոլորտի հետագա զարգացմանը՝ անհրաժեշտ խորհրդատվության և ներդրումների տրամադրման միջոցով:
Հանդիպման ժամանակ կողմերն անդրադարձել են նաև երկկողմ տնտեսական գործակցության, թվային կառավարման, բլոկչեյն տեխնոլոգիաների ներդրման և բարձր տեխնոլոգիական արդյունաբերության զարգացման համար անհրաժեշտ ֆինանասավորման հարցերին, նախանշել հետագա անելիքներն ու համագործակցության հեռանկարները։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)