Գագիկ Ծառուկյան

«Բարգավաճ Հայաստան» կուսակցության նախագահ, ԱԺ «Բարգավաճ Հայաստան» խմբակցության գործող ղեկավար։ Ծնվել է 1956թ.-ի նոյեմբերի 25-ին։ 1989թ.-ին ավարտել է Ֆիզիկական կուլտուրայի հայկական պետական ինստիտուտը: 1996թ.-ին հռչակվել է բազկամարտի աշխարհի չեմպիոն, 1998թ.-ին դարձել է Եվրոպայի առաջնության հաղթող: 2004թ.-ից ղեկավարում է Հայաստանի ազգային օլիմպիական կոմիտեն:

2003թ.-ին մեծամասնական կարգով ընտրվել է ՀՀ Ազգային Ժողովի պատգամավոր։ 2004թ.-ին հիմնադրել է «Բարգավաճ Հայստան» կուսակցությունը, որը 2007թ.-ին կայացած ընտրություններում ձեւավորեց մեծությամբ երկրորդ խմբակցությունը։ 2012թ․-ին ԲՀԿ-ն ստացավ 37 մանդատ՝ կրկին գրավելով երկրորդ տեղը, 2017-ին 31 մանդատով՝ երկրորդ տեղում, 2018թ-ին 26 մանդատով՝ երկրորդ տեղում։ 

2020 թ․ հունիսի 13-ին ՀՀ ազգային անվտանգության ծառայությունը հայտարարություն տարածեց Գագիկ Ծառուկյանի բիզնեսներին վերաբերող քրեական գործի հարուցման վերաբերյալ, ըստ որի պետությանը պատճառվել է առանձնապես խոշոր չափերի վնաս։

2020 թվականի հունիսի 16-ին ՀՀ Ազգային Ժողովը նրան զրկեց պատգամավորական անձեռնմխելիությունից եւ համաձայնություն տվեց կալանավորելու միջնորդությանը։

Ստեփանակերտում տեղի է ունեցել Ռուսական կենտրոնի բացման հանդիսավոր արարողությունը

Ստեփանակերտում տեղի է ունեցել Ռուսական կենտրոնի բացման հանդիսավոր արարողությունը

Արցախի Հանրապետության նախագահ Արայիկ Հարությունյանը նոյեմբերի 19-ին Ստեփանակերտում մասնակցել է ԱՀ իշխանությունների նախաձեռնությամբ և «Բարգավաճ Հայաստան» կուսակցության նախագահ, բարերար Գագիկ Ծառուկյանի հովանավորությամբ հիմնադրված Ռուսական կենտրոնի բացման հանդիսավոր արարողությանը։ Այս մասին հաղորդում է Արցախի նախագահի աշխատակազմը։ Նշվել է, որ կառույցի գործունեությունն ուղղված կլինի ռուսաց լեզվի, ռուսական մշակույթի և պատմության մասսայականացմանը, կրթության ոլորտում երկխոսության և սերտ համագործակցության զարգացմանը։ Առկա հարուստ գրքային ֆոնդի շնորհիվ մատաղ սերունդը հնարավորություն կունենա նաև ուսումնասիրելու ռուս գրողների ստեղծագործություններ։ Նախագահ Հարությունյանը կարևորել է նման հաստատությունների գործունեության կարևորությունը մշակույթի և կրթության ոլորտում հայ-ռուսական կապերի հետագա զարգացման տեսանկյունից։ «Ռուսական կենտրոնների բացումը հանդիսանում է հայ և ռուս ժողովուրդների բազմադարյա բարեկամության ևս մեկ ակնառու ապացույց և մեր սերտ համագործակցության վառ օրինակ։ Արցախում միշտ հատուկ ուշադրություն է դարձվել ռուսաց լեզվի ուսումնասիրությանը, իսկ կենտրոնի բացումն առավել քան պահանջված է ներկա պայմաններում»,- նշել է Արայիկ Հարությունյանը։ Նախաձեռնության կարևորությունն ընդգծող խոսքով հանդես են եկել նաև «Բարգավաճ Հայաստան» կուսակցության քաղխորհրդի անդամ Իվետա Տոնոյանը, հանրային գործիչներ, ովքեր համոզմունք են հայտնել, որ կենտրոնը կդառնա կարևոր մշակութային և կրթական օջախ բոլոր արցախցիների համար։ Նախագահի աշխատակազմից հաղորդել են նաեւ, որ Հարությունյանը ընդունել է  «Բարգավաճ Հայաստան» կուսակցության՝ Ստեփանակերտ ժամանած պաշտոնական պատվիրակությանը: Հանդիպմանը քննարկվել են ներքին եւ արտաքին քաղաքականությանը վերաբերող հարցեր: Երկրի ղեկավարը բարձր է գնահատել քաղաքական ուժի ներկայացուցիչների  պարբերական այցերն Արցախ և դրանց ընթացքում ծավալվող  բովանդակային քննարկումները: Նախագահ Հարությունյանի խոսքով՝ ԲՀԿ առաջնորդ Գագիկ Ծառուկյանի կողմից  Արցախում տարբեր ծրագրերի իրականացման ուղղությամբ հետևողական աշխատանքներ են տարվում։ Նա այդ համատեքստում ընդգծել է Ստեփանակերտում ռուսական մշակութային կենտրոնի բացմանն աջակցելու օրինակը, ինչը լավագույնս նպաստելու է հայ և ռուս ժողովուրդների միջև մշակութային, կրթական ու հոգևոր կապերի զարգացմանն ու ամրապնդմանը:
16:53 - 19 նոյեմբերի, 2022
Գագիկ Ծառուկյանին պատկանող ընկերությունը տուգանվել է 290 մլն դրամի չափով․ քաղաքապետ
 |armtimes.com|

Գագիկ Ծառուկյանին պատկանող ընկերությունը տուգանվել է 290 մլն դրամի չափով․ քաղաքապետ |armtimes.com|

armtimes.com: Գագիկ Ծառուկյանին պատկանող ընկերությունը տուգանվել է 290 մլն դրամի չափով, քանի որ տարբեր խախտումներ են եղել։ Այս մասին այսօր Ազգային Ժողովում լրագրողների հետ զրույցում ասաց Երևանի քաղաքապետ Հրաչյա Սարգսյանը՝ պատասխանելով այն հարցին, թե մամուլում հրապարակումներ կան, որոնց համաձայն՝ քաղաքապետը թույլտվություն է տվել «Մոսկվա» կինոթատրոնի դիմաց Գագիկ Ծառուկյանին պատկանող ՍՊԸ-ի կողմից բարձրահարկ շենքի շինարարությանը։ «Եղել է նախագիծ, դրա շրջանակներում աշխատանքներ են տարվել, որոնք հաստատված չեն եղել, դրա շրջանակներում ընկերությունը տուգանք է վճարել։ Այդ նախագիծը տարբեր գերատեսչություններով անցել է, եկել է քաղաքապետարան, իմ կողմից թույլտվությունը ստացել է»,- ասաց նա։  Լրագրողների հարցին՝ ինչո՞ւ շինարարությունը կանգնեց, երբ Ծառուկյանը թունդ ընդդիմադիր գործունեություն ուներ, և այդ ժամանակ էլ Երևանի քաղաքապետը Մարությանն էր, արդյոք այդտեղ քաղաքական պատճառներ կայի՞ն, Սարգսյանը պատասխանեց․ «Կանգնեցվելը մեր կողմից չի եղել»։ Ըստ նրա՝ շինարարության հետ կապված խնդիրները բոլոր երկրներում առկա են, պետք է լուծել դրանք:
16:10 - 07 նոյեմբերի, 2022
Կառավարությունը որոշմամբ՝ Գագիկ Ծառուկյանին պատկանող «Մուլտի Տաբակ» ՍՊԸ-ն մաքսատուրքից ազատվեց

Կառավարությունը որոշմամբ՝ Գագիկ Ծառուկյանին պատկանող «Մուլտի Տաբակ» ՍՊԸ-ն մաքսատուրքից ազատվեց

Կառավարությունը այսօրվա նիստի ընթացքում որոշեց գերակա ոլորտում իրականացվող ներդրումային ծրագրի շրջանակներում մաքսատուրքից ազատել Գագիկ Ծառուկյանին պատկանող «Մուլտի Տաբակ» ՍՊԸ-ն-ին: Որոշման հիմնավորման մեջ նշվում է, որ «ՄՈՒԼՏԻ ՏԱԲԱԿ»-ի կողմից ներմուծվող հումքը նախատեսվում է օգտագործել ծխախոտի արտադրության համար։ Արտադրությունն իրականացվելու է ՀՀ Կոտայքի մարզում։ Ընկերությունը հիմնադրվել է 2019 թվականին։ Ծրագրի շրջանակներում նախատեսվում է իրականացնել 59 մլրդ դրամի ներդրում՝ հիմնական և շրջանառու միջոցների ձեռքբերման համար։ Արտադրանքի 80 տոկոսը և ավելին նախատեսվում է արտահանել։ Նախատեսվում է ներդրումային ծրագրի շրջանակներում ստեղծել 100 նոր աշխատատեղ՝ 350 հազ դրամ միջին ամսական աշխատավարձով։ Արտոնություն ստանալու համար ներկայացված ապրանքների արժեքը կազմում է 162.6 մլրդ դրամ: Մաքսատուրքից ազատման արտոնությունը գնահատվում է 16․5 մլրդ դրամ։
11:30 - 03 նոյեմբերի, 2022
Ծառուկյանի «Շանգրի լա»-ն պահանջում է իր տուրքերից նվազեցնել ևս 1,4 միլիարդ դրամ |civilnet.am|

Ծառուկյանի «Շանգրի լա»-ն պահանջում է իր տուրքերից նվազեցնել ևս 1,4 միլիարդ դրամ |civilnet.am|

civilnet.am: «Բարգավաճ Հայաստան» կուսակցության ղեկավար, գործարար Գագիկ Ծառուկյանի ընտանիքին պատկանող «Շանգրի լա» խաղատունը պահանջում է Պետեկամուտների կոմիտեից 1,4 միլիարդ դրամ ճանաչել գերավճար և նվազեցնել խաղատան համար նախատեսված տուրքից։ Այդ մասին տեղեկանում ենք «Դատալեքս» տեղեկատվական հարթակից։ Հուլինին կառավարությունը որոշեց «Շանգրի լա» խաղատան լիցենզիայի տուրքի գումարը ընկերության փոխարեն փոխհատուցել՝ հաշվի առնելով, որ ֆինանսների նախարարի հրամանով «Շանգրի լա»-ի լիցենզիան դադարեցվել էր, դրան էլ գումարվել էին տուգանքներ ու տույժեր։ Դատարանում «Շանգրի լա»-ի իրավաբանական անձը՝ «Օնիրա քլաբ»-ը, հաղթել էր ֆինանսների նախարարությանը, ու կառավարությունը ստիպված էր փոխհատուցել խաղատան վնասները։ «Հետք»-ը հետագայում բացահայտել էր, որ կառավարությունը «Օնիրա քլաբ»-ի համար փոխհատուցել է ոչ թե 4,2, այլ 5,6 միլիարդ դրամ։ Կառավարության հետ այս փոխհատուցումների գործընթացն ավարտելուց հետո այժմ «Շանգրի լա»-ն աշխատում է, բայց ընկերությունը նոր պահանջներ է առաջ քաշել ընդդեմ Պետեկամուտների կոմիտեի։ Ըստ «Դատալեքս»-ի տվյալների՝ «Օնիրա քլաբ»-ը պահանջում է ամբողջ 2020-ի համար վճարված տուրքերի գումարը ճանաչել գերավճար ու կատարել վերահաշվարկ։ Գերավճար ճանաչելու պահանջը վերաբերում է մոտ 1,4 միլիարդ դրամի։ «Օնիրա քլաբ»-ը դիմել էր դատարան՝ հայցի ապահովման միջոց կիրառելու պահանջով, բայց հոկտեմբերի 25-ին վարչական դատարանի դատավոր Արթուր Ծատուրյանը պահանջը մերժել է։ Հունվարին կայանալու է ՊԵԿ-ի դեմ ընկերության հայցի առաջին դատական նիստը։ «Օնիրա քլաբ»-ի փաստաբաններից Էմիլ Խաչատրյանը ՍիվիլՆեթ-ի հետ զրույցում ներկայացնելով իրենց պահանջը ՊԵԿ-ից՝ պատմեց, որ 2020-ի առաջին և երկրորդ եռամսյակներում «Օնիրա քլաբ»-ը վճարել է խաղատան լիցենզիայի տուրքը, սակայն կորոնվիրուսով պայմանավորված՝ չի աշխատել, ծառայություն չի մատուցվել ու «Օնիրա քլաբ»-ի կողմից վճարված տուրքը պիտի ճանաչվի գերավճար։ «Գերավճար ճանաչվելուց հետո մենք կքննարկենք հաշվանցման խնդիրը։ Չեմ բացառում, որ դա հաշվարկվի որպես այս տարվա չորրորդ եռամսյակի տուրքի գումար լինի», -ասաց փաստաբանը։ Նրա խոսքով՝ 5,6 միլիարդ գումարը, որը որպես պարտավորություններ վերագրվել էր «Օնիրա քլաբ»-ին, բայց դատարանի որոշումներից հետո փոխհատուցվել է կառավարության կողմից, պետք չէ շփոթել պահանջվող 1,4 միլիարդի հետ. առաջին դեպքում խոսքը պետության կողմից հաշվարկվող հարկերի, տուրքի ու տույժերի մասին է, իսկ այս դեպքում՝ «Օնիրա քլաբ»-ի կողմից վճարված տուրքի, որը վերաբերել է 2020-ի առաջին եռամսյակի վերջին և երկրորդ եռամսյակին։   Ավելի մանրամասն` civilnet.am-ում 
18:35 - 01 նոյեմբերի, 2022
«Մոսկվա» կինոթատրոնի դիմաց բարձրահարկ հյուրանոց կառուցելու շինթույլտվություն է տրվել |hetq.am|

«Մոսկվա» կինոթատրոնի դիմաց բարձրահարկ հյուրանոց կառուցելու շինթույլտվություն է տրվել |hetq.am|

hetq.am: Երևանի քաղաքապետ Հրաչյա Սարգսյանը Երևանի Աբովյան փողոց 5/5 հասցեում բարձրահարկ հյուրանոցային համալիր կառուցելու շինթույլտվություն է տվել։ Տեղեկատվությունը «Հետք»-ին հայտնեցին Երևանի քաղաքապետարանից՝ հաստատելով Կենտրոն վարչական շրջանի նախկին ղեկավար Վիկտոր Մնացականյանի մտահոգությունը։ Նախկին պաշտոնյան «Ֆեյսբուք» սոցիալական ցանցի իր էջում այսօր գրել էր․ «Երևանի քաղաքապետարանի հարգելի գործընկերներ, կարող եք պատասխանել՝ արդյոք ճիշտ են լուրերը, որ Աբովյան փողոցի 5/1,2,5 հասցեով կառույցին տվել եք շինթույլտվություն՝ նախկին (նկարում փակցված) նախագծով՝ 18 հարկ»։ Հյուրանոցի կառուցման թույլտվությունը Երևանի քաղաքապետը տվել է սեպտեմբերի 19-ին։ Շինարարության թույլտվություն ստացել է գործարար Գագիկ Ծառուկյանին պատկանող «Մուլտի գրուպ կոնցեռն» ՍՊԸ-ն և նրա գործընկերները («Ա․Ա․Դ․ Հոթել ՓԲԸ»-ն և փաստաբան Դավթի Մանթաշյանը)։ Երևանի քաղաքապետ Հ․ Սարգսյանի օգոստոսի 19-ին տված նախագծման թույլտվությամբ նախատեսվել է կառույցը նախագծել 3 ստորգետնյա և շենքի հիմնական ծավալի համար մինչև 48 մետր բարձրությամբ, իսկ հետ ընկած գլանաձև հատվածի համար մինչև 71 մետր։ Աբովյան փողոցում հյուրանոց կառուցելու շինթույլտվությունը մեկ անգամ արդեն տրվել էր, սակայն 2018 թ․-ին մի քանի պատճառով կասեցվել էր շինարարությունը, և դատական գործընթաց էր սկսվել։ Այդ ժամանակ հյուրանոցի շենքի ստորգետնյա հարկերն ու առաջին երկու հարկը կառուցվել էին։ Կարդալ ավելին՝ hetq.am-ում։ 
18:29 - 21 հոկտեմբերի, 2022
Հատիսը կառուցապատվում է առանց հնագիտական ու երկրաբանական հետազոտությունների եւ սեյսմիկ վտանգի գնահատման
 |hetq.am|

Հատիսը կառուցապատվում է առանց հնագիտական ու երկրաբանական հետազոտությունների եւ սեյսմիկ վտանգի գնահատման |hetq.am|

hetq.am: «Հատիս լեռան տարածքում առկա և պատմության ու մշակույթի անշարժ հուշարձանների պետական ցուցակում ընդգրկված հուշարձանները պահպանվում են օրենքով սահմանված կարգով»,- «Հետքը» այս պատասխանն օրերս ստացել է  Կրթության, գիտության, մշակույթի և սպորտի (ԿԳՄՍ) նախարարությունից: ԿԳՄՍ-ում, թերևս, չեն դիտել հուլիսի 14-ին հրապարակած տեսանյութը, որը պատմում է Հատիս լեռան գագաթ տանող նոր կառուցվող ճանապարհների, էլեկտրական լարերի համար սյուներ տեղադրելու մասին։ Հատիսի համայնքապետարանը լեռան գագաթին ջրագիծ կառուցելու շինթույլտվություն է տվել «Գագիկ Ծառուկյան» բարեգործական հիմնադրամին։ Հիմնադրամն արդեն հանրությանը ներկայացրել է «Հիսուս Քրիստոսի մոնումենտալ արձան-համալիր» նախագծի անիմացիոն տարբերակը, ըստ որի՝ կառուցապատումն ընդգրկելու է լեռան  ողջ տարածքը։   Հատիս լեռան գագաթին Քրիստոսի արձանը տեղադրելու առիթով ԿԳՄՍ նախարարությունը նույնպես հայտարարություն էր տարածել, որտեղ նշել էր, որ լեռան լանջերին գտնվում են տարբեր դարաշրջաններով թվագրվող շուրջ 20 հուշարձաններ:  Իր հերթին ԳԱԱ Հնագիտության և ազգագրության ինստիտուտը (ՀԱԻ) տեղեկացրել էր, որ հայ-իտալական արշավախումբը 2019թ.-ից ուսումնասիրություններ է իրականացրել «Հատիսի ամրոց»  հնավայրի տարածքում: Մ.թ.ա. 2-1-ին հազարամյակներին վերագրվող ամրոցը ժողովրդի մեջ հայտնի է Շամիրամի կամ Քյոռօղլու բերդ անվանումներով: Լեռան գագաթին գտնվող բրոնզ-երկաթեդարյան ամրոցը և օժանդակ շինությունները ներկա պահին դեռևս գրանցված չեն հուշարձանների պետական ցուցակում, քանի որ համարվում են նորահայտ հուշարձաններ:  ՀԱԻ գիտխորհուրդը հուլիսի 14-ին ընդունած հայտարարության մեջ նկարագրել էր, որ հնավայրի տարածքում արձանի տեղադրման նպատակով կատարված շինարարական աշխատանքների արդյունքում անդառնալիորեն աղճատվել է հնավայրի հատկապես կենտրոնական հատվածը, այստեղ առկա կառույցները և արևելյան պարսպապատի մի հատվածը։  «Հողաշերտի հեռացման արդյունքում արևելյան պարսպապատի խաթարված հատվածը հնարավոր է վերականգնել, մինչդեռ դա այլևս անհնար է կենտրոնական մասում առկա կառույցների պարագայում, քանի որ դրանք ենթարկվել են ծանր տեխնիկայով քանդման, ինչից հետո նոր հող է կուտակվել այդ հատվածում ապագայում նախատեսված արձանի հիմքի համար։ Հնավայրի արևմտյան հատվածի պարսպապատը չի վնասվել, անդառնալիորեն ավերվել են նրան կից կառույցները, ինչը նույնպես հողալիցքի հեռացնելուց հետո հնարավոր չէ մաքրել և վերականգնել»,- ասվում էր հայտարարության մեջ։ ՀԱԻ ինստիտուտի գիտխորհուրդը հուշարձանների պահպանության համար պատասխանատու ԿԳՄՍ նախարարությանը հիշեցրել էր օրենքի պահանջը․ «Եթե նշված աշխատանքները կարող են վտանգել այդ տարածքներում գտնվող հուշարձանների պահպանությունն ու անվթարությունը, նախապես՝ աշխատանքների պատվիրատուի միջոցներով իրագործվում են հուշարձանների պահպանությունն ու անվթարությունն ապահովող միջոցառումներ` հետախուզություն, պեղումներ, վերականգնման աշխատանքներ, բացառիկ դեպքերում` տեղափոխում և լիազորված մարմնի կողմից առաջարկվող այլ աշխատանքներ»: Հատիս լեռան վրա շինարարությունը վաղուց իրողություն է, «Շամիրամ ամրոց» հուշարձանն՝ արդեն վնասված։ Մնում էր պարզել, թե լեռան լանջերին գտնվող պատմության հուշարձանների պահպանության երաշխավոր ԿԳՄՍ նախարարությունը «Գագիկ Ծառուկյան» բարեգործական հիմնադրամին շինարարական աշխատանքները սկսելուց առաջ հնագիտական աշխատանքները ֆինանսավորելու պահանջ ներկայացրե՞լ է։  «Հատիս լեռան տարածքում շինարարական աշխատանքներ իրականացնելու վերաբերյալ պաշտոնական գրություն չենք ստացել։ Հատիս լեռան գագաթին առկա բրոնզ-երկաթեդարյան ամրոցը դեռևս որևէ կարգավիճակ չունի։ Ուսումնասիրման աշխատանքներն ընթացքի մեջ են, ավարտից հետո փորձագիտական հանձնաժողովը կքննարկի ամրոցի կարգավիճակի հարցը»,- «Հետք»-ին հայտնում է ԿԳՄՍ նախարարությունը։  Շեշտենք՝ նախարարությունում քննարկելու են այն ամրոցի կարգավիճակի հարցը, որի մասին ՀԱԻ գիտխորհուրդը մոտ երկու ամիս առաջ հայտնել է, որ հայտնի օլիգարխի իրականացրած շինարարական աշխատանքների արդյունքում «անդառնալի վնաս է պատճառվել»։ Նախարարությունը չի պատասխանել մեր այն հարցին, թե առհասարակ, Հատիս լեռան տարածքում հնագիտական աշխատանքներ կատարելու անհրաժեշտություն տեսնո՞ւմ է, ինչպե՞ս է տնօրինելու 20 հուշարձանների ճակատագիրը։ Խոստանում են իրենց դիրքորոշումը հայտնել փաստաթղթերը ներկայացնելուց հետո։ Շարունակությունը՝ hetq.am-ում
13:58 - 30 սեպտեմբերի, 2022
Հայ-ռուսական հարաբերությունները կարիք ունեն ոչ թե վտանգման, այլ` բազմաշերտ և արդյունավետ խորացման․ Գագիկ Ծառուկյան

Հայ-ռուսական հարաբերությունները կարիք ունեն ոչ թե վտանգման, այլ` բազմաշերտ և արդյունավետ խորացման․ Գագիկ Ծառուկյան

«Բարգավաճ Հայաստան» կուսակցության նախագահ Գագիկ Ծառուկյանը հայտարարություն է տարածել․   «Որպես քաղաքացի և որպես քաղաքական ուժի ղեկավար` խորապես անհանգստացած եմ Հայաստանում հակառուսական տրամադրությունների հրահրման միտումներից։ Որքան էլ դրանք լինեն արհեստական և ուղղորդվող, միևնույն է, դրանք պարունակում են ահռելի ռիսկեր` մեր պետության, ազգային անվտանգության և մեր ժողովրդի համար։ Անկայուն և բարիկադավորված աշխարհի այսօրվա պայմաններում սա ուղղակի արկածախնդրություն է, որի միակ շահառուն հակառակորդն է։   Վստահ եմ, որ մեր ժողովրդի ճնշող մեծամասնությունը, քաղաքական, հասարակական վերնախավերը, գիտակից շերտերը շատ լավ հասկանում են, որ հայ-ռուսական դաշնակցային և խոր վստահության վրա ձևավորված բազմաշերտ հարաբերություններն են ունակ ապահովելու կայունություն` այս բարդ տարածաշրջանում, և մեր ժողովրդի համար խաղաղ զարգացման հնարավորություն։   Հայաստանը կարող է և պետք է ունենա բարիդրացիական հարաբերություններ այլ տերությունների հետ, զարգացնի միջպետական հարաբերություններ այլոց հետ, բայց դա չի կարող լինել ընդդեմ և ի հակակշիռ հայ-ռուսական հարաբերությունների։   Հայաստանը, մեր խաղաղասեր ու աշխատասեր ժողովուրդը փորձաքար չէ աշխարհքաղաքական վերադասավորումների և արկածախնդրությունների համար։ Ճակատագրի բերումով` հայ ժողովրդի մի զգալի մասն ապրում է Ռուսաստանում, միլիոնավոր հայեր՝ արևմուտքում։ Մենք չենք կարող մեզ թույլ տալ լրացուցիչ բարիկադներ և բաժանումներ։ Վստահ եմ` մեր ժողովուրդը սթափ է գնահատում ռիսկերը։ Իսկ հայ-ռուսական հարաբերությունները կարիք ունեն ոչ թե վտանգման, այլ` բազմաշերտ և արդյունավետ խորացման՝ ռազմաքաղաքական, անվտանգային, տնտեսական և այլ ոլորտներում»։
22:20 - 19 սեպտեմբերի, 2022
Գագիկ Ծառուկյանի դուստրը և նրա ամուսինը հրավիրվել են դատախազություն

Գագիկ Ծառուկյանի դուստրը և նրա ամուսինը հրավիրվել են դատախազություն

«Բարգավաճ Հայաստան» կուսակցության առաջնորդ Գագիկ Ծառուկյանի դուստրը՝ Ռոզա Ծառուկյանը և նրա ամուսինը՝ Կոտայքի նախկին մարզպետ Կարապետ Գուլոյանը հրավիրվել են ՀՀ գլխավոր դատախազության՝ ապօրինի ծագում ունեցող գույքի բռնագանձման վարչություն։ Այս մասին տեղեկանում ենք «Ազդարար»-ից։ Ռոզա Ծառուկյանը և ամուսինը հրավիրվել են դատախազություն՝ ապօրինի ծագում ունեցող գոյւքի բռնագանձման վարույթի շրջանակներում՝ ծանոթանալու գործի նյութերին, ներկայացնելու դիրքորոշում, ինչպես նաև հայտարարագիր: Ըստ ծանուցման՝ Դատախազություն ներկայանալու օր է նշանակվել 2022 թվականի սեպտեմբերի 6-ը, որի անհնարինության դեպքում հարկավոր է օրը և ժամը համաձայնեցնելու նպատակով նախապես զանգահարել։ Նշենք, որ ծանուցագիրը ստանալու պահից սկսած՝ անձն ունի մեկ ամսվա ընթացքում ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն ներկայանալու, իր վերաբերյալ գործի նյութերին ծանոթանալու , ինչպես նաեւ դիրքորոշում եւ հայտարարագիր ներկայացնելու իրավունք։
15:29 - 19 սեպտեմբերի, 2022
Հատիսի լանջից 7 հեկտար նոր հողակտորներ են օտարվել «Գագիկ Ծառուկյան» հիմնադրամին
 |hetq.am|

Հատիսի լանջից 7 հեկտար նոր հողակտորներ են օտարվել «Գագիկ Ծառուկյան» հիմնադրամին |hetq.am|

hetq.am: Ազգային ժողովի նախկին պատգամավոր, ԲՀԿ նախագահ Գագիկ Ծառուկյանին պատկանող բարեգործական հիմնադրամը Հատիս լեռան լանջին գտնվող հողակտորներ է ձեռք բերել։ «Հետք»-ը պարզել է, որ Կոտայքի մարզի Ակունք խոշորացված համայնքի Ակունք բնակավայրի վարչական տարածքում գտնվող 3 առանձին հողակտոր «Գագիկ Ծառուկյան» հիմնադրամին է օտարվել 2022 թ.-ի օգոստոսի 10-ին։ Ակունք համայնքի ղեկավար Հունան Ռուբենյանը, օգոստոսի 10-ին հիմք ընդունելով նույն տարվա հուլիսի 17-ին կայացած աճուրդների արդյունքները, որոշել է «Գագիկ Ծառուկյան» հիմնադրամին օտարել ընդհանուր 7 հեկտար գյուղատնտեսական նշանակության հողակտոր։ 3.5, 1 և 2.5 հեկտար հողակտորների դիմաց «Գագիկ Ծառուկյան» հիմնադրամը համայնքային բյուջե պետք է վճարի կամ արդեն վճարել է 2 միլիոն 766 հազար դրամ։ Նշված հողակտորները գտնվում են Հատիսի լանջին գտնվող Սուրբ Պետրոս եկեղեցուց հյուսիս-արևմուտք։ Ավելի վաղ «Հետք»-ը գրել էր, որ «Գագիկ Ծառուկյան» բարեգործական հիմնադրամը սեփականության իրավունքով ձեռք է բերել Հատիս լեռան վրա գտնվող 9 հողակտոր։ Հողակտորների կադաստրային կոորդինատները համադրելով արբանյակից արված լուսանկարների հետ՝ պարզ է դառնում, որ դրանք գտնվում են անմիջապես Հատիս լեռան գագաթին։ «Գագիկ Ծառուկյան» հիմնադրամի ձեռք բերած հողակտորները ներառում են նաև Հատիսի բերդ կոչվող հնագիտական վայրը։ Կոտայքի մարզի Ակունք համայնքի ղեկավար Հունան Ռուբենյանը մեզ հետ զրույցում հաստատել էր, որ օտարված հողակտորները գտնվում են Հատիս լեռան գագաթին։ Հունան Ռուբենյանի խոսքով, 100 հեկտար հողակտորը «Ծառուկյան» հիմնադրամին օտարվել է համայնքի կողմից, իսկ 46 հեկտարը 2008 թ.-ին էր օտարվել քաղաքացի Նորիկ Պետրոսյանին, որն էլ այն նվեր է տվել «Գագիկ Ծառուկյան» հիմնադրամին։ Նախկին պատգամավոր, խոշոր գործարար Գագիկ Ծառուկյանը ծրագրել է Հատիսի գագաթին Հիսուս Քրիստոսի մոնումենտալ արձանը տեղադրել։ Վարչապետ Նիկոլ Փաշինյանը նախնական դրական կարծիք է հայտնել Գագիկ Ծառուկյանի գաղափարի վերաբերյալ, որին կողմ չէ Հայ Առաքելական եկեղեցին։
09:50 - 23 օգոստոսի, 2022
Ռոմանոս Պետրոսյան․ քաղաքապետարանում ՊՎԾ ուսումնասիրությունները պետք չէ քաղաքականացնել
 |azatutyun.am|

Ռոմանոս Պետրոսյան․ քաղաքապետարանում ՊՎԾ ուսումնասիրությունները պետք չէ քաղաքականացնել |azatutyun.am|

azatutyun.am: Պետական վերահսկողական ծառայության ղեկավար Ռոմանոս Պետրոսյանի խոսքով` Երևանի քաղաքապետարանում ուսումնասիրությունները մեկնարկել են դեռ անցած տարեվերջին: Ըստ նրա` դրանք պետք չէ քաղաքականացնել: Այս մասին Ռոմանոս Պետրոսյանը նշեց «Ազատության» «Ֆեյսբուքյան ասուլիսի» շրջանակներում: Ստորև ներկայացնում ենք հատվածներ ասուլիսից. «Երևանի քաղաքապետարանում ՊՎԾ-ն ուսումնասիրությունը մեկնարկել է անցած տարեվերջին, և դրան նախորդել է բավական երկար շրջափուլ վերլուծությունների, որոշակի տեղեկանքների կազմման», - ասաց Պետական վերահսկողական ծառայության ղեկավար Ռոմանոս Պետրոսյանը` ի պատասխան հարցին, թե եթե նախկին քաղաքապետ Հայկ Մարությանը քաղաքական անհամաձայնություն չունենար իշխող կուսակցության հետ, արդյոք կսկսվեի՞ն ուսումնասիրությունները նրա նախկինում ղեկավարած կառույցում: «Հանրագրերի, բողքների, դիմումների ու մեծամասամբ շինթույլտվությունների տրամադրման, դրանց ժամկետների ուշացման, ժամկետների խախտման, մերժումների հիմնավորումների հետ կապված բազմաթիվ բողոքներ են ստացվել Պետական վերահսկողական ծառայություն, և մենք ծառայության ղեկավարի միջնորդությամբ ու վարչապետի համաձայնությամբ հանձնարարագիրը ստորագրել ենք դեկտեմբրի 28 կամ 29-ին։ Շուրջ 6 ամիս է տևել ուսումնասիրությունը», - ասաց Պետրոսյանը։ Ըստ նրա` դեռևս 2020-ի սեպտեմբերին արդեն վարչապետից հանձնարարական է եղել մշտադիտարկման ենթարկել շինթույլտվությունների բլոկը, և նաև դրանք են հիմք հանդիսացել սկսել ուսումնասիրություններ Երևանի քաղաքապետարանում: Հուլիսի 28-ին Պետական վերահսկողական ծառայությունը հրապարակեց քաղաքապետարանում իր կատարած ուսումնասիրության արդյունքները, որոնք սկսվել էին իրականացվել 2019 թվականի դեկտեմբերին։ Ըստ ՊՎԾ-ի՝ Մարությանի օրոք հայտնաբերվել է շուրջ 8,5 միլիարդ դրամի խախտում, որոնք առնչվում են քաղաքի փողոցների ընթացիկ նորոգման և ճաքալցման, բարեկարգման, քաղաքապետարանի ենթակայությամբ գործող «Էլեկտրատրանսպորտ», «Երքաղլույս» և «Երևանտրանս» ընկերությունների գործունեությանը և այլն։ «Եթե Հայկ Մարությանի շրջանում են իրականացվել առերևույթ խախտումները, որոնց մի մասը գուցե օրենսդրական բացերի հետևանք է, մի մասը սուբյեկտիվ որոշումների կայացման, այո, կարծում եմ, դա իմ անձնական տեսակետն է, մի մասին էլ որոշակի կոռուպցիոն սխեմաների գործադրման արդյունք կարող է լինել, դա հետաքննությունը կբացահայտի, բայց Հայկ Մարությանը մենակ չի կառավարել Երևան քաղաքը, և կրտսեր մասնագետից մինչև քաղաքապետ իրենց լիազորություններն ու իրավասություններն են իրացրել, դա պետք չի քաղաքականացնել», - ասաց նա: «Այս պահին շուրջ 60 վերահսկողության գորառույթներ ենք իրականացնում տարբեր մարմիններում», - հայտնեց ՊՎԾ պետը` որպես օրինակ նշելով Առողջապահության նախարարության Պետական առողջապահության գործակալության և շուրջ 11 խոշորագույն բուժհաստատություններում հանդիպակաց ուսումնասիրությունները: Նաև նշեց «Հայ փոստը», Արդարադատության նախարարության քրեակատարողական բուժհաստատությունները և այլն: «ՊՆ-ում 4 ուղղություններով այս պահին ուսումնասիրություններ են ընթանում», - հավելեց Պետրոսյանը: «Գլոբալ առումով այն իրավիճակը, որը հասունացել է Հատիս լեռան հետ կապված, բնականաբար, հաճելի չէ ու շատ մտահոգում է ինձ` որպես Աբովյանի բնակչի, որպես Կոտայքի նախկին մարզպետ», - անդրադառնալով Հատիս լեռան գագաթին Քրիստոսի արձանի տեղադրման հետ կապված իրավիճակին` ասաց Պետրոսյանը: Ըստ նրա` տվյալ նախաձեռնողները հողերը ձեռք բերելուց հետո որևէ գործընթաց չպիտի իրականացնեին, քանի դեռ չունեին ամբողջ նախագծի թույլտվությունները, լսումների արդյունքները և այլն: Նրա խոսքով` իր մարզպետ եղած ժամանակ այս նախաձեռնության վերաբերյալ որևէ խոսք չի եղել: Ռոմանոս Պետրոսյանը նաև հերքեց լուրերը, թե այս տեղանքին մոտ ինքը հողատարածք է ձեռք բերել: ԿԳՍՄ նախարարությունը դիմել է ոստիկանությանը Հատիսի գագաթին հողային աշխատանքները կասեցնելու համար։ Նախարարությունը դիմումի հիմք է ընդունել Հնագիտության և ազգագրության ինստիտուտի հայտարարությունը, թե լեռան գագաթին հայտնաբերված հնավայրը Քրիստոսի արձանի տեղադրման աշխատանքների հետևանքով վնասվել է:  
11:11 - 02 օգոստոսի, 2022
Հատիսի վրա Հիսուսի արձանի տեղադրման ծրագիրը կարող է չիրականանալ՝ անհաղթահարելի խոչընդոտների դեպքում․ Վահան Քերոբյան
 |factor.am|

Հատիսի վրա Հիսուսի արձանի տեղադրման ծրագիրը կարող է չիրականանալ՝ անհաղթահարելի խոչընդոտների դեպքում․ Վահան Քերոբյան |factor.am|

factor.am: Քաղաքացիական ակտիվիստներն ահազանգում են, որ չնայած ԿԳՄՍ-ի, Շրջակա միջավայրի նախարարության զգուշացումներին, որ Հատիս լեռան վրա շինաշխատանքները պետք է կասեցվեն՝ դրանք, այդուհանդերձ, շարունակվում են։ Ինչո՞ւ իրավապահները չեն կասեցնում աշխատանքները, որովհետև Նիկոլ Փաշինյանը ողջունե՞լ է արձանի կանգնեցումը․ ՀՀ Էկոնոմիկայի նախարար Վահան Քերոբյանը, պատասխանելով այս հարցին, նշում է․ «Ես գիտեմ, որ շինարարական աշխատանքները չեն իրականացվում։ Ինձ ՊՎԾ-ի իմ գործընկերն է ասել, որ ոչ մի շինարարություն չի ընթանում։ Մենք այս ծրագիրը դիտարկում ենք որպես պոտենցիալ ներդրումային ծրագիր և, որը կարող է իրականանալ և կարող է չիրականանալ, եթե հանկարծ պարզվի, որ կան անհաղթահարելի խոչընդոտներ։ Եվ եթե պարզվի, որ օրենսդրական առումով չենք կարողանալու հաղթահարել այդ խոչընդոտները, ապա որևէ մեզնից որևէ մեկը կաշկանդված չէ իր՝ որևէ միջոցառման մասնակցությամբ կամ հրապարակային ասած որևէ խոսքով»։
15:46 - 29 հուլիսի, 2022
ԿԳՄՍ-ն դիմել է ոստիկանություն՝ Հատիսում շինաշխատանքների հետ կապված
 |civilnet.am|

ԿԳՄՍ-ն դիմել է ոստիկանություն՝ Հատիսում շինաշխատանքների հետ կապված |civilnet.am|

civilnet.am: «Բարգավաճ Հայաստան» կուսակցության առաջնորդ, գործարար Գագիկ Ծառուկյանի նախաձեռնությամբ Հիսուս Քրիստոսի մոնումենտալ արձանի հիմնարկեքը Հատիս լեռան գագաթին տեղի ունեցավ հուլիսի 9-ին։ Արձանի գաղափարը և հատկապես դրա տեղադրությունը վիճահարույց է և քննադատության է արժանացել մասնագիտական որոշ շրջանակների կողմից։ Կրթության, գիտության, մշակույթի և սպորտի նախարարության (ԿԳՄՍ) խոսնակ Գեղամ Մելիքբեկյանը հուլիսի 19-ին հայտնեց, որ հիմք ընդունելով Հնագիտության և ազգագրության ինստիտուտի մասնագիտական եզրակացությունը՝ Հատիս լեռան գագաթին նոր հայտնաբերված ամրոցի վնասման վերաբերյալ, նախարարությունը դիմել է ոստիկանություն՝ հնարավորինս սեղմ ժամկետում միջոցներ ձեռնարկելու Հատիսի գագաթին հողային աշխատանքները կասեցնելու, ինչպես նաև ներկայացված եզրակացությունը ուսումնասիրելու և օրենքով սահմանված կարգով ընթացք տալու համար։ Օրեր առաջ լեռան գագաթին գտնվող հնավայր-ամրոցի տարածքում իրականացվել էին հողի լիցքի և հարթեցման աշխատանքներ։ Հնագիտության և ազգագրության ինստիտուտը հայտարարություն էր տարածել, որ այդ աշխատանքների հետևանքով «անդառնալիորեն աղճատվել է հնավայրի՝ հատկապես կենտրոնական հատվածը, այնտեղ առկա կառույցները և արևելյան պարսպապատի մի հատվածը»։ Հատկանշական է, որ արձանի հիմնարկեքին մասնակցել էր Էկոնոմիկայի նախարարը, իսկ երկու նախարարություններ հաջորդող օրերին հայտարարել էին, որ չեն հաստատել նախագիծը և մտահոգություններ հայտնել լեռան վրա տեղակայված պատմական հուշարձանների և լեռան՝ որպես բնության հուշարձանի խաթարման վերաբերյալ։ Չնայած կառավարությունը դեռ չի հաստատվել արձանի նախագիծը, Հատիս լեռան գագաթ տանող ճանապարհի և ենթակառուցվածքների կառուցման աշխատանքներն արդեն իրականացվում են։ Նախապատմություն Հայաստանում Հիսուս Քրիստոսի արձան կառուցելու մասին Ծառուկյանը հայտարարեց 2022-ի հունվարին։ Հայ առաքելական եկեղեցին առաջարկին դեմ էր արտահայտվել, իսկ վարչապետ Նիկոլ Փաշինյանը հայտարարել էր, որ վերջին խոսքը կառավարությանն է։ «Ի վերջո կա օրենք, կա կարգ, կան կառավարության որոշումներ, և երբ որ այդ նախագիծը սահմանված կարգով կներակայցվի, այդ թվում մասնագիտական քննարկման […] պետությունը սահմանված ընթացակարգերով որոշում կկայացնի»,- հունվարի 24-ի ասել էր Փաշինյանը։ Մայիսի 10-ին հայտարարվեց Հիսուս Քրիստոսի մոնումենտալ արձան-համալիրի տարբերակի վերջնական ընտրության մասին։ Ավելի վաղ հայտարարվել էր, որ այն կունենա 33 մետր բարձրություն։ Հուլիսի 7-ի կառավարության նիստին Փաշինյանը հայտնեց, որ նախնական դրական գնահատական է տրվել Հատիս լեռան վրա արձան տեղադրելու նախագծին, որովհետև այն Հայաստանի հանդեպ զբոսաշրջային հետաքրքրությունը կմեծացնի։ Փաշինյանը նաև նշեց, որ կառավարության մարմինները դեռ պետք է քննարկեն և որոշում կայացնեն։ «Հուսով եմ՝ մեր համապատասխան մարմինները պատշաճ ժամկետներում հարցը կքննարկեն։ Այնտեղ մի շարք վարչական որոշումների անհրաժեշտություն կա։ Այդ որոշումները կկայացնենք, և նախագիծը առաջ կընթանա նախատեսված ձևով և տրամաբանությամբ»,- ասաց Փաշինյանը։ Հիմնարկեքը և նախարարությունների արձագանքը Նախնական դրական եզրակացությունից երկու օր անց՝ հուլիսի 9-ին, տեղի ունեցավ արձանի հիմնարկեքը, որին մասնակցում էր նաև էկոնոմիկայի նախարար Վահան Քերոբյանը։ Նա նախագիծը անվանեց «շռնդալից» և շնորհակալություն հայտնեց Ծառուկյանին։ «Մենք, ինչպես այլ ներդրումների պարագայում, այս դեպքում էլ պատրաստ ենք հնարավորինս ամեն ինչ անել, որպեսզի նախագիծը ինչքան հնարավոր է արագ և առանց խոչընդոտների իրականություն դառնա»,- ասում էր Քերոբյանը։ Նախարարն ավելի ուշ՝ հուլիսի 18-ին, պնդեց, որ արձանի հիմնարկեքին իր մասնակցությունը դեռևս չի նշանակում, որ կառավարության համապատասխան բոլոր որոշումները կան։ Հիմնարկեքի հաջորդ օրը ԿԳՄՍ-ն հայտարարություն արեց՝ պահանջելով դադարեցնել ցանկացած գործունեություն Հատիսի գագաթին առկա բրոնզ-երկաթեդարյան հնավայր-ամրոցի տարածքում, որը հակասում է գործող օրենսդրությանը և կարգերին։ Հայտարարության մեջ նաև նշվում էր, որ Հատիսի փեշերին ընդհանուր առմամբ առկա է պետական ցուցակում գրանցված պատմության և մշակույթի շուրջ 20 հուշարձան: Շարունակությունը՝ civilnet.am-ում
17:17 - 19 հուլիսի, 2022
Քերոբյանի խոսքով՝ Քրիստոսի արձանի շինարարության մեկնարկին իր մասնակցությունը չի նշանակում, որ պետք է շրջանցվեն օրենքները |azatutyun.am|

Քերոբյանի խոսքով՝ Քրիստոսի արձանի շինարարության մեկնարկին իր մասնակցությունը չի նշանակում, որ պետք է շրջանցվեն օրենքները |azatutyun.am|

azatutyun.am: Էկոնոմիկայի նախարար Վահան Քերոբյանի խոսքով՝ Հիսուս Քրիստոսի մոնումենտալ արձանի շինարարության մեկնարկին իր մասնակցությունը չի նշանակում, որ պետք է շրջանցվեն օրենքները, հակառակը: «Սա ինչ-որ նախագծի մեկնարկի մասին միջոցառում է, և որևէ շինարարության մասին խոսք չի գնում, բնականաբար այս նախագիծը պետք է անցնի բոլոր ընթացակարգերով և հաստատումները ստանալուց հետո անցնի աշխատանքային փուլի», - «Ազատության» «Ֆեյսբուքյան ասուլիսի» շրջանակներում ասաց նա: Ստորև ներկայացնում ենք հատվածներ ասուլիսից. «Մեր ինչ-որ միջոցառումների մասնակցելը դեռևս չի նշանակում, որ կառավարության համապատասխան բոլոր որոշումները կան, և ըստ ընթացակարգերի արդեն անցել են շինարարական աշխատանքների», - անդրադառնալով Հատիս լեռան բարձունքին Հիսուս Քրիստոսի մոնումենտալ արձանի շինարարության մեկնարկին իր մասնակցությանն՝ ասաց էկոնոմիկայի նախարար Վահան Քերոբյանը: «Սա ինչ-որ նախագծի մեկնարկի մասին միջոցառում է, և որևէ շինարարության մասին խոսք չի գնում, բնականաբար այս նախագիծը պետք է անցնի բոլոր ընթացակարգերով և հաստատումները ստանալուց հետո անցնի աշխատանքային փուլի: Իհարկե, կա մեծ տրամադրվածություն թե՛ ներդրողի կողմից, թե՛ վարչապետն իր ելույթների ընթացքում հրապարակային հավանության է արժանացրել այս նախագիծը, բայց ակնհայտորեն մեզանից որևէ մեկը չի պատրաստվում օրենքներ խախտելով նախագծեր իրականացնել: Ամեն ինչը կկատարվի օրենքով սահմանված կարգով», - վստահեցրեց կառավարության ներկայացուցիչը: Ըստ նրա՝ եթե ծրագիրը իրականանա, ապա այնտեղ շատ մեծ զբոսաշրջային հոսք կառաջանա նաև. «Ամայի տարածք է իրականում Հատիսի սարը, արշավներ են գնում, բայց չնչին ակտիվություն է՝ համեմատած նրա, ինչ որ նախատեսվում է: Եթե ծրագիրն իրականանա, ապա այնտեղ տասնյակ, եթե ոչ հարյուրավոր միլիոն դոլարների ներդրումներ կլինեն: Պատմամշակութային տարածքներում բացառված չեն ներդրումները, սակայն կա հատուկ կարգ ներդրումները անելու, պետք է տարբեր գերատեսչություններ իրենց համաձայնությունը տան, պատմամշակութային միջավայրը չխաթարվի», - ասաց նա: Նախարարն ընդգծեց՝ իր ներկայանալը այդ միջոցառմանը չի նշանակում, որ պետք է շրջանցեն օրենքները, հակառակը: Չնայած պետական երկու գերատեսչությունների հայտարարություններին, որ Հատիս լեռան վրա շինարարությունը կասեցվել է, այսօր էլ սարի լանջին շինաշխատանքներ էին ընթանում, պարզել էր «Ազատության» նկարահանող խումբը: Նախարարն ասուլիսի ժամանակ ասաց, թե այն, ինչ կատարվում է, օրենքով թույլատրելի է: Իսկ եթե այս տարածքը բացառվի, կգտնեն այլ լուծումներ, հավաստիացրեց Քերոբյանը: Էկոնոմիկայի նախարարն անդրադարձավ նաև անկանխիկ գործարքներին անցնելուն. հուլիսի 1-ից կանխիկի կրճատման օրենքը մտել է շրջանառության մեջ, և մասնավոր ընկերությունները, անհատ ձեռներեցները 300 հազար դրամը գերազանցող իրենց գործարքները պետք է իրականացնեն միայն անկանխիկ։ «Մենք խոսում ենք նրա մասին, որ կառուցենք երկիր, որ արժանի տեղ կլինի մեր երեխաների համար ապրելու», - նախ ասաց նախարարը՝ հավելելով, որ վաղուց պետք է ընկերություններում սովորած լինեին անկանխիկ գործարքներին: Քերոբյանը կոչ արեց բոլորին մտածել, թե ինչպես թափանցիկ աշխատելով կարողանան աշխատել եկամտաբեր. «Հաճախ աշխատում ենք ցածր արտադրողականությամբ, և բիզնեսների խնդիրների մեծ մասը ցածր արտադրողականության մեջ է թաղված, և շատ ժամանակ ընկերությունների հիմնադիրները փոխանակ google անեն և տեսնեն, թե աշխարհի մյուս երկրներում իրնց գործընկերներն ինչպես են բարձր արտադրողականությամբ աշխատում նույն բիզնեսն անելիս, մտածում են, որ հարկերից խուսափելը կամ հարկերը թաքցնելը ամենալավ ձևն է փող աշխատելու: ՀՀ միջին բիզնեսը մոտ 7-8 անգամ ավելի ցածր արտադրողականություն ունի, քան նույն բիզնեսը տնտեսական զարգացման և համագործակցության կազմակերպության անդամ երկրների մեջ», - հավելեց նա: Օգտատերերից մեկը հետաքրքրվել էր՝ եթե դրամն էլի արժևորվի, Կենտրոնական բանկը պե՞տք է թույլ տա անվերջ լողալ, թե՞ ոչ, Վահան Քերոբյանն արձագանքեց. «Այնպես չէ, որ ԿԲ-ն հիմա ոչինչ չի անում, այնպես չէ, որ այս աշխատանքը միայն ԿԲ-ն պիտի անի: Մեր կարծիքով՝ 450 դրամը մեր տնտեսության համար կարմիր գիծ է, և այսպիսի բարձր արժևորում ունեցող դրամը խիստ վտանգում է մի շարք արտահանմանը միտված ոլորտներ»: Հարցին, թե ունե՞ն ծրագրեր՝ ՀՀ տեղափոխված ռուս մասնագետներին երկրում պահելու համար, Վահան Քերոբյանը պատասխանեց. «Մենք ՄըքՔենզի ընկերության հետ բավական լուրջ աշխատանք ենք կատարել և այդ աշխատանքի արդյունքում ձևավորել ենք այն անելիքների ցանկը, որը անելու պարագայում կկարողանանք երկար պահել այս մարդկանց Հայաստանում: Ամբողջ աշխարհում շատ սուր պայքար է նորարարական մտածելակերպ ունեցող տաղանդավոր մարդկանց համար, և աշխարհի քաղաքները սուր մրցակցության մեջ են այդ պայքարում: Այս պայքարին միացավ նաև Հայաստանը, և մենք տեսնում ենք շատ լավ հնարավորություններ»: Ըստ նրա՝ իրենց բիզնեսը ՀՀ տեղափոխած շատ ընկերություններ են խոստացել մնալ Հայաստանում: Օգտատերերից մեկի հարցին՝ կո՞ղմ է արդյոք հայ - թուրքական սահմանի բացմանը՝ հաշվի առնելով առկա մտավախությունները, մասնավորապես՝ թե Հայաստանի տնտեսությունը «կուլ կգնա» այդ մեծ տերության տնտեսությանը, տեղական արտադրողները կտուժեն, հաշվարկվա՞ծ են արդյոք վտանգները, նախարարն արձագանքեց. «Մենք ժամանակին շատ դեմ էինք, որ հայ - թուրքական սահմանը բացվի, թուրքական ապրանքների արգելքը հանվի, բայց մեր գործընկերների հետ, կառավարության գործընկերների հետ տնտեսական և քաղաքական շահերը համադրելու արդյունքում որոշվեց, որ պետք է բացվի, հանվի թուրքական ապրանքների էմբարգոն: Եվ հիմա, ըստ էության, շուկան աշխատում է միակողմանի, առևտուրը աշխատում է միակողմանի՝ մենք միայն գնում ենք: Եվ հիմա հայ - թուրքական սահմանի բացումը տնտեսական առումով նշանակելու է, որ մենք ոչ միայն գնում ենք, այլ նաև վաճառում ենք, և դա էապես լավացնելու է այսօրվա իրավիճակը, ոչ թե վատացնելու»: «Այսօր մենք արդեն որևիցե սահմանափակում չունենք թուրքական ապրանքներ գնելու առումով, և մեր ընկերությունները, ինչքան իրենց անհրաժեշտ է, այդ ապրանքները գնում են», - նշեց Քերոբյանը՝ տեղական արտադրողների վերաբերյալ հարցին պատասխանելով. - «Տեղական արտադրողները որոշ չափով արդեն տուժում են, որովհետև թուրքական տնտեսությունը հզոր է, թուրքական լիրան կտրուկ ձևի արժեզրկվում է, իսկ մերը՝ արժևորվում, բազմաթիվ դժվարություններ կան: Բայց, էլի եմ ասում՝ եթե հայ - թուրքական սահմանը բացվի, մենք կկարողանանք գնելու հետ մեկտեղ նաև վաճառել, այսօր մենք միայն կարողանում ենք գնել»: «Հայ - թուրքական սահմանի բացվելը միայն մեզ է օգուտ՝ այս պարագայում», - վստահեցրեց նախարարը:  
09:32 - 19 հուլիսի, 2022
Պահանջում ենք անհապաղ դադարեցնել Հատիս լեռան վրա ցանկացած շինաշխատանք․ հայտարարություն

Պահանջում ենք անհապաղ դադարեցնել Հատիս լեռան վրա ցանկացած շինաշխատանք․ հայտարարություն

Մի խումբ ՀԿ-ներ հանդես են եկել Հատիս լեռան վրա Հիսուսի արձանի տեղադրման, հարակից տարածքում այլ օբյեկտների շինաշխատանքների դեմ հայտարարությամբ: Հայտարարության մեջ նշվում է. «2022 թվականի հուլիսի 7-ին ՀՀ Կառավարության կողմից նախնական հավանություն է տրվել Հատիս լեռան վրա Գագիկ Ծառուկյանի կողմից Հիսուս Քրիստոսի արձանի կառուցման վերաբերյալ։ Ինչպես նախագծի հեղինակի, այնպես էլ ՀՀ կառավարության կողմից նշվել է, որ Հիսուսի արձանի տեղադրումը Հատիս լեռան վրա էականորեն կմեծացնի զբոսաշրջային հետաքրքրությունը Հայաստանի նկատմամբ։ Հետաքննող լրագրողների կողմից օրերս իրականացված ուսումնասիրության արդյունքներից էլ պարզ է դարձել, որ «Գագիկ Ծառուկյան» բարեգործական հիմնադրամը սեփականության իրավունքով ձեռք է բերել Հատիս լեռան վրա գտնվող 9 հողակտոր։ Հողակտորների կադաստրային կոորդինատները համադրելով արբանյակից արված լուսանկարների հետ՝ պարզ է դառնում, որ տարածքը գտնվում է անմիջապես Հատիս լեռան գագաթին։ «Գագիկ Ծառուկյան» հիմնադրամի ձեռք բերած հողակտորները ներառում են նաև Հատիսի բերդ կոչվող հնագիտական վայրը։ 2022 թվականի հուլիսի 14-ին հրապարակված մեկ այլ ուսումնասիրության համաձայն՝ Հատիս լեռան գագաթ տանող ճանապարհներ են կառուցվում, էլեկտրալարերի սյուներ տեղադրվում։ Ըստ տեղեկության՝ Կոտայքի մարզի Ակունք խոշորացված համայնքի գյուղերից դեպի Հատիս լեռան գագաթ տանող ճանապարհներ են կառուցվում։ Մեկ այլ հրապարակման համաձայն՝Հատիս լեռան ճանապարհին արդեն իսկ տեղադրվել են դարպասներ, որոնք թույլ չեն տալիս կողմնակի անձանց հատել դարպասներն ու բարձրանալ լեռը։ Համաձայն «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքի հոդված 22-ի՝ «Հուշարձաններ ներառող տարածքներում շինարարական, գյուղատնտեսական և այլ կարգի աշխատանքների համար հողի հատկացումները, կառուցապատման, ինժեներատրանսպորտային հաղորդակցության ուղիների նախագծերը սահմանված կարգով համաձայնեցվում են լիազորված մարմնի հետ»: Եթե նշված աշխատանքները կարող են վտանգել այդ տարածքներում գտնվող հուշարձանների պահպանությունն ու անվթարությունը, նախապես, աշխատանքների պատվիրատուի միջոցներով իրագործվում են հուշարձանների պահպանությունն ու անվթարությունն ապահովող միջոցառումներ` հետախուզություն, պեղումներ, վերականգնման աշխատանքներ, բացառիկ դեպքերում` տեղափոխում և լիազորված մարմնի կողմից առաջարկվող այլ աշխատանքներ: Հոդված 24-ի բ ենթակետը սահմանում է հուշարձանների կամ դրանց պահպանության գոտիների տարածքներում գյուղատնտեսական, շինարարական կամ այլ աշխատանքների ընթացքում հուշարձանները ուսումնասիրելու, վավերագրելու, պահպանելու, իսկ բացառիկ դեպքերում` տեղափոխելու անհրաժեշտությունը։ Համաձայն «Պատմության և մշակույթի անշարժ հուշարձանների պետական հաշվառման, ուսումնասիրման, պահպանության, ամրակայման, նորոգման, վերականգնման և օգտագործման կարգը հաստատելու մասին» ՀՀ կառավարության 2002 թվականի ապրիլի 20-ին ընդունված որոշման 33-րդ կետի՝ Հուշարձանի զբաղեցրած տարածքում արգելվում են հուշարձանի նպատակային օգտագործմանը չհամապատասխանող շինարարական, գյուղատնտեսական և այլ աշխատանքների կատարումը, ինչպես նաև տնտեսական ու արտադրական գործունեությունը: Այդ տարածքում կարող են կատարվել միայն հուշարձանի ուսումնասիրման, պահպանման, թանգարանացման և ցուցադրության կազմակերպման, ինչպես նաև հուշարձանի նպատակային օգտագործմանը նպաստող վերականգնողական և նորոգման աշխատանքներ: Սույն որոշման 42-րդ կետի համաձայն «Հուշարձաններ ընդգրկող տարածքներում շինարարական, ճանապարհաշինարարական, երկրաբանական և այլ աշխատանքների նախագծերը լիազորված մարմնի հետ համաձայնեցվում են նոր շինարարության նախագծման ու տեխնիկատնտեսական հիմնավորման առաջադրանքի մշակման նախապատրաստման փուլում»: 2008 թվականից ի վեր Հատիսը ճանաչված է որպես բնության հուշարձան: «Բնության հատուկ պահպանվող տարածքների մասին» ՀՀ օրենքի 1-ին հոդվածի համաձայն՝ բնության հուշարձանը «գիտական, պատմամշակութային և գեղագիտական առանձնահատուկ արժեք ներկայացնող բնական օբյեկտ» է: Ըստ նույն օրենքի 19-րդ հոդվածի 1-ին մասի ՝ «Հայաստանի Հանրապետությունում բնության հուշարձանի զբաղեցրած տարածքում արգելվում է ցանկացած գործունեություն, որը սպառնում է դրա պահպանությանը»։ Ավելին, «Շրջակա միջավայրի վրա ազդեցության գնահատման և փորձաքննության մասին» ՀՀ օրենքի 14-րդ հոդվածը սահմանում է շրջակա միավայրի վրա ազդեցության գնահատման և փորձաքննության ենթակա հիմնադրութային փաստաթղթերը եւ նախատեսվող գործունեության տեսակները։ Նույն հոդվածի 8-րդ մասը նախատեսում է, որ փորձաքննության ենթակա են նաև այդ հոդվածի 3-րդ մասում չթվարկված բոլոր նախատեսվող գործունեության տեսակները, որոնք իրականացվելու են բնության հատուկ պահպանվող և անտառային տարածքներում, պատմամշակութային հուշարձանների սահմաններում, ընդհանուր օգտագործման կանաչ տարածքներում։ Այսինքն, մինչ Կառավարության կողմից նախնական թույլտվություն տալը, ծրագրի հեղինակները պարտավոր էին իրականացնել օրենքով սահմանված՝ շրջակա միջավայրի վրա ազդեցության գնահատումը և փորձաքննությունը, քանի որ քննարկող տարածքը ինչպես ներկայացվեց, համարվում է հատուկ պահպանության ենթակա բնության հուշարձան: Հատիս լեռան վրա Հիսուսի արձանի կառուցման եւ նշված տարածքների օտարման առնչությամբ ակնհայտ են առնվազն հետևյալ խնդիրները՝ – Հանրային նշանակության եւ մշակութային հուշարձան հանդիսացող տարածքը մասնավոր անձի օտարելը լի է կոռուպցիոն ռիսկերով, և հերթական անգամ վեր է հանում ՀՀ իշխանությունների անհետևողական, ոչ թափանցիկ գործունեությունը, ինչը մեծացնում է իշխանությունների նկատմամբ հանրային անվստահությունը։ – ՀՀ իշխանությունները, ի դեմս Կառավարության, խախտում են ՀՀ մշակութային ժառանգության պահպանության օրենսդրությունը։ Մինչդեռ Կառավարությունը առաջնային պատասխանատվություն է կրում հետևել ՀՀ օրենսդրությանն ու հետևողական լինել մշակութային ժառանգության օբյեկտների պահպանությանը։ – ՀՀ իշխանությունները եւ արձանի կառուցման հեղինակները կոպտորեն խախտում են «Շրջակա միջավայրի վրա ազդեցության գնահատման եւ փորձաքննության մասին» ՀՀ օրենքի և «Բնության հատուկ պահպանվող տարածքների մասին» ՀՀ օրենքի պահանջները։ – Հանրային նշանակության և նման կարևորության հարցի առնչությամբ ակնկալվում էր հանրային լսումների անցկացում, որը անտեսվել է ՀՀ իշխանությունների կողմից։ Մինչդեռ նման լսումները կարող էին օբյեկտիվ քննության առարկա դարձնել ինչպես արձանի կառուցման նպատակային նշանակության և անհրաժեշտության, այնպես էլ անօրինական կերպով մշակութային հուշարձանը օտարելու հետ կապված մի շարք հարցեր։ Հաշվի առնելով ներկայացված հանգամանքները, հարցի առնչությամբ տիրող հանրային բողոքն ու ակնհայտ անօրինականությունները՝ Պահանջում ենք՝ Անհապաղ դադարեցնել Հատիս լեռան վրա եւ տարածքում ցանկացած շինարարական աշխատանքի իրականացում, Չեղարկել Հատիս լեռան վրա Հիսուսի արձանի կառուցման Կառավարության նախնական համաձայնությունը, Իրականացնել հանրային լսումներ արձանի կառուցման նպատակային նշանակության եւ անհրաժեշտության վերաբերյալ՝ բոլոր շահագրգիռ կողմերի մասնակցությամբ, Իրականացնել քննություն Հատիս լեռան գագաթի օտարման ու սեփականաշնորհման օրինականության ստուգման նպատակով, ինչպես նաև ուսումնասիրել Հատիս լեռան վրա ապօրինի շինարարական աշխատանքների կատարումն ու պատասխանատվության ենթարկել մեղավորներին։ Իրավունքների պաշտպանություն առանց սահմանների ՀԿ Թրանսփարենսի Ինթերնեշնլ Հակակոռուպցիոն Կենտրոն Հելսինկյան Քաղաքացիական ասամբլեայի Վանաձորի գրասենյակ Բաց Հասարակության հիմնադրամներ Հայաստան «Համայնքային համախմբման և աջակցության կենտրոն» ՀԿ Երևանի Մամուլի Ակումբ Ինֆորմացիայի ազատության կենտրոն Հելսինկյան ասոցիացիա իրավապաշտպան ՀԿ «Ազատ քաղաքացի» քաղաքացիական նախաձեռնությունների աջակցման ՀԿ «Հեռանկարային զարգացման կենտրոն» ՀԿ Հանրային լրագրության ակումբ Գորիսի մամուլի ակումբ Մեդիա նախաձեռնությունների կենտրոն Հայկական բնապահպանական ճակատ կամավորական նախաձեռնություն Խոսքի ազատության պաշտպանության կոմիտե Իրավունքի զարգացման և պաշտպանության հիմնադրամ
17:22 - 18 հուլիսի, 2022
«Արմօյլ» ՓԲԸ-ին սնանկ ճանաչելու պահանջով հայց է ներկայացվել դատարան
 |hetq.am|

«Արմօյլ» ՓԲԸ-ին սնանկ ճանաչելու պահանջով հայց է ներկայացվել դատարան |hetq.am|

hetq.am: «Արմօյլ» փակ բաժնետիրական ընկերությանը սնանկ ճանաչելու պահանջով «Անքրաժ» ՍՊԸ-ն հայցադիմում է ներկայացրել Սնանկության դատարան։ Այս մասին տեղեկանում ենք «Դատալեքս» դատական տեղեկատվական համակարգից։ Հայցադիմումը դատարում ստացվել է 2022թ․ հունիսի 23-ին։ Հունիսի 28-ին դատավոր Նելլի Հարությունյանը վարույթ է ընդունել «Անքրաժ» ՍՊԸ-ի դիմումը։ Ձգձգված շինարարություն և իրավական խնդիրներ «Բարգավաճ Հայաստան» կուսակցության նախագահ Գագիկ Ծառուկյանին և իրանահայ գործարար Հենրիկ Տեր-Ղուկասյանին պատկանող «Արմօյլ» ՓԲԸ-ն Կոտայքի մարզի Եղվարդ համայնքում նավթամթերքի վերամշակման գործարան է կառուցել, որտեղ նախատեսվում էր բիտում և քսայուղեր արտադրել։  Գործարանի շինարարությունը մեկնարկել էր 2015 թվականին և ավարտվել 2019-ին, սակայն մինչև օրս գործարանը շահագործման չի հանձնվել, քանի որ ամբողջ ընթացքում իրավական ընթացակարգերի հետ կապված տարատեսակ հարցեր են առաջացել։ Նախ առաջինը՝ ընկերության կառուցած հսկայական շինություններն ինքնակամ են, քանի որ «Արմօյլը» Եղվարդի քաղաքապետարանից (այժմ՝ Նաիրի խոշորացված համայնք) շինարարական թույլտվություն չէր ստացել։  Չնայած դրան՝ ընկերությունը գործարանի կառուցման համար կառավարությունից արտոնություն էր ստացել 2015թ․ դեկտեմբերի 24-ին, իսկ 2018 թվականի օգոստոսի 30-ին արտոնության ժամկետը երկարաձգվել էր։ Ընկերությանը թույլատրվել էր ներդրումային ծրագրի շրջանակներում սարքավորումներ ներմուծել առանց ավելացված արժեքի հարկի վճարման: Երկրորդ գլխավոր հարցը վերաբերում էր շրջակա միջավայրի վրա ազդեցության գնահատմանը (ՇՄԱԳ), քանի որ ընկերության գործունեությունը Շրջակա միջավայրի վրա ազդեցության գնահատման և փորձաքննության մասին օրենքով՝ ենթակա էր բնապահպանական փորձաքննության՝ պարզելու համար, թե որքանով է այդ տեսակի գործունեությունը անվտանգ շրջակա միջավայրի համար։ ՇՄԱԳ փորձաքննություն իրականացնելու համար ընկերությունը մի քանի անգամ դիմել է փորձաքննական կենտրոնին, սակայն փաստաթղթերը լրակազմ չլինելու պատճառով հետ են վերադարձվել։ Դրանից հետո «Արմօյլը» մշտապես պնդում էր, թե ընկերության գործունեությունը ենթակա է չէ փորձաքննության։ Բնապահպանության և ընդերքի տեսչական մարմինը մի քանի անգամ վարչական տույժերի է ենթարկել ընկերությանը՝ արգելելով գործարանի տարածքում որևէ տեսակի գործողություն, սակայն «Արմօյլը» այնուամենայնիվ, ավարտին է հասցրել գործարանի շինարարությունը, սակայն ՇՄԱԳ փորձաքննության վերաբերյալ ընկերության և պետության տարբեր մոտեցումների պատճառով, գործարանն այդպես էլ չի գործարկվել։   Շարունակությունը՝ hetq.am-ում
16:07 - 14 հուլիսի, 2022