Գերմանիա

Գերմանիան (պաշտոնապես՝ Գերմանիայի Դաշնային Հանրապետություն) պետություն է Արեւմտյան Եվրոպայում։ Հյուսիսում սահմանակցում է Դանիային, արեւելքում՝ Չեխիային եւ Լեհաստանին, հարավում՝ Ավստրիային եւ Շվեյցարիային, հարավում՝ Ֆրանսիային, իսկ Լյուքսեմբուրգին, Բելգիային եւ Նիդերլանդներին՝ արեւմուտքում։ Մայրաքաղաքն է Բեռլինը։

ԳԴՀ-ն բաժանված է 16 վարչատարածքային միավորների՝ երկրամասերի, եւ ընդգրկում է շուրջ 357 386 քկմ տարածք։ Ունենալով շուրջ 83 միլիոն բնակչություն՝ համարվում է ՌԴ-ից հետո Եվրոպայի խոշորագույն պետությունը, ինչպես նաեւ ԵՄ ամենախիտ բնակեցված պետությունը։ Ամենաբնակեցված, արդյունաբերական խոշոր երկրամասը Ռուրն է, որի գլխավոր քաղաքներն են Դորտմունդն ու Էսսենը։ Գերմանիայի մյուս նշանավոր քաղաքներն են Մայնի Ֆրանկֆուրտը, Համբուրգը, Մյունխենը, Քյոլնը, Շտուտգարտը, Դյուսելդորֆը, Լայպցիգը, Դրեզդենը, Բրեմենը, Հաննովերը, Գելզենկիրխենը եւ Նյուրնբերգը։

Մերօրյա Գերմանիան դաշնային խորհրդարանական հանրապետություն (բունդեսհանրապետություն) է, որը կառավարվում է վարչապետի՝ կանցլերի կողմից։ Այժմ կանցլերն է Անգելա Մերկելը։

ԳԴՀ-ն 1957-ից ի վեր հանդիսանում է Եվրոպական տնտեսական համագործակցության, իսկ 1993-ից՝ Եվրոպական միության համահիմնադիր անդամ, 1999-ից՝ Շենգենյան գոտի։ Անդամակցում է նաեւ ՄԱԿ-ին, Հյուսիսատլանտյան դաշինքին (ՆԱՏՕ), «Մեծ յոթնյակին», Տնտեսական համագործակցության եւ զարգացման կազմակերպությանը եւ այլն։

«Ղարաբաղն Ադրբեջան է, դա Բեռլինի հստակ դիրքորոշումն է»․ Գերմանիայի նախագահ |factor.am|

factor.am: Ղարաբաղն Ադրբեջան է, այդպիսին է պաշտոնական Բեռլինի հստակ դիրքորոշումը։ Ադրբեջանական լրատվամիջոցների հաղորդմամբ՝ այս մասին հայտարարել է Գերմանիայի նախագահ Ֆրանկ-Վալտեր Շտայնմայերը Բաքվում Ադրբեջանի նախագահ Իլհամ Ալիևի հետ մամուլի համար համատեղ հայտարարությունների ժամանակ։ «Մենք միշտ ասել ենք, որ դա ձեր տարածքն է, և այսօր էլ հաստատում ենք Գերմանիայի այդ հստակ դիրքորոշումը»,- ասել է Շտայնմայերը։ Նա նաև շնորհավորել է Ադրբեջանին և Հայաստանին խաղաղության պայմանագրի տեքստի համաձայնեցման կապակցությամբ՝ կոչ անելով Բաքվին ու Երևանին բաց չթողնել պահը և հնարավորինս շուտ ստորագրել համաձայնագիրը։ «Շատ մեծ քայլ է արվել դեպի առաջ, և ես շնորհավորում եմ երկու կողմերին խաղաղության պայմանագրի տեքստի համաձայնեցման համար: Երբ այսօր խոսեցի պարոն նախագահի [Իլհամ Ալիևի] հետ, հույս հայտնեցի, որ շուտով մենք կկարողանանք ականատես լինել խաղաղության պայմանագրի ստորագրմանը, և կլինի շատ տևական խաղաղություն։ Ես մեծ հույս ունեմ ու կոչ եմ անում կողմերին բաց չթողնել այդ պահը՝ չնայած բոլոր դժվարություններին ու մարտահրավերներին»,-ասել է Գերմանիայի նախագահը։ Նա նշել է, որ կողմերը պետք է քաղաքական կամք դրսևորեն, որպեսզի գործընթացը հասցնեն ավարտին, և համոզված է, որ դա տեղի կունենա։ Շտայնմայերը նաև կարծում է, որ Ադրբեջանին և Հայաստանին ժամանակ է պետք փոխադարձ վստահությունը վերականգնելու համար։ «Մենք հասկանում ենք, որ փոխվստահությունը վերականգնելու համար ժամանակ և ջանք է պահանջվում: Սա շատ երկար գործընթաց է: Ե՛վ երկրներին, և՛ ժողովուրդներին շատ ժամանակ է պետք։ Հաշտեցման համար ժամանակ կպահանջվի, և մենք չպետք է այն բաց թողնենք»,- ասել է նա։ Հավելենք, որ Հայաստանում գտնվելու ընթացքում Գերմանիայի նախագահը սոցցանցում Արցախի դրոշով հրապարակում էր արել, որն առաջացրել էր Բաքվի դժգոհությունը։ Ադրբեջանի ԱԳՆ էր կանչվել երկրում Գերմանիայի դեսպանը, նրան խիստ բողոք էր հայտնվել ու հրապարակային ներողություն պահանջ ներկայացվել։ Ադրբեջանական իշխանամերձ աղբյուրներն էլ հայտարարել էին, որ ներողություն չխնդրելու դեպքում Գերմանիայի նախագահի Բաքու այցի նպատակահարմարությունը կասկածի տակ է դրվում։ Ի վերջո, Գերմանիայի նախագահականը ներողություն էր խնդրել։

14:23 - 02 ապրիլի, 2025

Ամենայն Հայոց կաթողիկոսը Գերմանիայի նախագահին խնդրել է Բաքվում բարձրաձայնել հայ ռազմագերիների ազատ արձակման մասին

Հայաստան պաշտոնական այցով ժամանած Գերմանիայի Դաշնային Հանրապետության նախագահ Ֆրանկ-Վալտեր Շտայնմայերն ապրիլի 1-ին այցելել է Մայր Աթոռ Սուրբ Էջմիածին: Ինչպես տեղեկանում ենք Մայր Աթոռի տեղեկատվական համակարգի տարածած հաղորդագրությունից, Ամենայն Հայոց Կաթողիկոսը նախագահ Շտայնմայերին և նրա մեծազնիվ տիկին Էլկե Բուդենբենդերին ողջունել է Միածնաէջ Մայր Տաճարում՝ ներկայացնելով Հայաստանյայց Առաքելական Սուրբ Եկեղեցու և Սուրբ Էջմիածնի մեծ դերակատարությունը հայ ժողովրդի ազգային ու քրիստոնեական ինքնության կերտման գործում, և նրա կարևոր ազգապահպան առաքելությունը։ Նորին Սրբությունը նշել է, որ պատմության ընթացքում հայ ազգն իր հավատքի զորությամբ և առ Աստված ապավինությամբ է դիմագրավել նեղություններն ու փորձությունները, Տեր և Փրկիչ Հիսուս Քրիստոսի նմանությամբ հաղթահարել բազում գողգոթաներ՝ այդ թվում 20-րդ դարասկզբին իր նկատմամբ իրականացված ցեղասպանությունը։ Հայոց Հովվապետը հույս է հայտնել, որ նույն հավատքով և ամուր կամքով հայ ժողովուրդը կհաղթահարի վերջին տարիներին հայրենիքին պատուհասած փորձությունները և ներկա ծանր մարտահրավերները։ Նկատի առնելով այն, որ Գերմանիայի նախագահը մեկնելու է նաև Ադրբեջան՝ Վեհափառ Հայրապետը խնդրանքով դիմել է պրն․ Ֆրանկ-Վալտեր Շտայնմայերին՝ Բաքվում բարձրաձայնելու ԼՂ ժողովրդի արդար իրավունքների, ինչպես նաև հայ ռազմագերիների ազատ արձակման, հայկական հոգևոր-մշակութային ժառանգության պահպանության հիմնախնդիրները։ Նորին Սրբության խոսքի համաձայն՝ առկա հարցերի հետևողական բարձրաձայնման շնորհիվ վերջիններիս արդար հանգուցալուծմամբ միայն հնարավոր պիտի լինի տարածաշրջանում կայուն խաղաղություն հաստատել և ժողովուրդների խաղաղ գոյակցության պայմաններ ստեղծել։ Գերմանիայի նախագահ Շտայնմայերը, շնորհակալություն հայտնելով Նորին Սրբություն Գարեգին Երկրորդ կաթողիկոսին քրիստոնեական հնագույն սրբավայր այցելելու հնարավորության համար, կարևորել է կրոնների դերակատարությունը ժողովրդների կյանքում խաղաղության և համերաշխության ապահովման գործում։ Պրն․ Շտայնմայերը հավաստիացրել է Հայոց Հայրապետին, որ իր միջնորդական ջանքերը կգործադրի ի նպաստ տարածաշրջանում վերջնական խաղաղության հաստատման։ Այնուհետև Ամենայն Հայոց կաթողիկոսը Գերմանիայի Դաշնային Հանրապետության նախագահի հետ միասին Իջման Սուրբ Սեղանի առջև աղոթք է բարձրացրել առ Աստված աշխարհում խաղաղության և մարդկության բարօր ու ապահով կյանքի համար։ Վերջում նախագահը Գերմանիայի Հայոց թեմի առաջնորդ Տ․ Սերովբե եպիսկոպոս Իսախանյանի ուղեկցությամբ շրջել է Մայր Տաճարում, ծանոթացել հիմնանորոգված սրբավայրի պատմությանը։

10:32 - 02 ապրիլի, 2025

Գերմանիայի նախագահը ժամանել է Բաքու |azatutyun.am|

azatutyun.am: Բեռլինի և Բաքվի միջև դիվանագիտական սկանդալիֆոնին Գերմանիայի նախագահ Ֆրանկ-Վալտեր Շտայնմայերը պաշտոնական այցով ապրիլի 1-ին ժամանել է Բաքու։ Ըստ ադրբեջանական լրատվամիջոցների՝ օդանավակայանում Գերմանիայի նախագահին դիմավորել են Ադրբեջանի փոխվարչապետ Յաղուբ Էյուբովը, արտաքին գործերի փոխնախարար Ֆարիզ Ռզաևը։ Այսօր նախատեսված է Շտայնմայերի հանդիպումը Ադրբեջանի նախագահ Իլհամ Ալիևի հետ։ Շտայնմայերը Բաքու է ժամանել Երևանից։ Առաջին անգամ Հայաստան կատարած պաշտոնական այցիժամանակ, Գերմանիայի նախագահը Instagram-ի իր պաշտոնական էջում հրապարակել էր Արցախի դրոշի լուսանկարը՝ գրելով. - «Հակամարտությունը վերաբերում է Լեռնային Ղարաբաղի տարածքին: Տարածաշրջանը իրավաբանորեն պատկանում է Ադրբեջանին։ Այնտեղ հիմնականում հայեր են ապրում։ Վերջին մի քանի տասնամյակների ընթացքում բազմիցս բախումներ են եղել»։ Պաշտոնական Բաքվի արձագանքը չուշացավ․Ադրբեջանում Գերմանիայի դեսպանը կանչվեց երկրի արտգործնախարարություն, որտեղ նրան բողոքի նոտա փոխանցվեց։ Ավելի ուշ «Ազերթաջ»-ը հրապարակեց Գերմանիայի նախագահի աշխատակազմի ղեկավար, պետքարտուղար Դյորտե Դինգերի նամակը Ադրբեջանի նախագահի օգնական Հիքմեթ Հաջիևին, որտեղ պետքարտուղարը ներողություն է խնդրել հրապարակման համար՝ նշելով, որ այն տեխնիկական սխալի արդյունք է։ Դինգերը հայտնել է, որ Շտայնմայերի առաջիկա այցը Բաքու նպատակ ունի ամրապնդել երկու երկրների միջև գործընկերությունը և աջակցել տարածաշրջանում ընթացող խաղաղ գործընթացին։

09:50 - 02 ապրիլի, 2025

Գերմանական կողմը ներողություն է խնդրել Ադրբեջանից Արցախի դրոշի հրապարակման համար |azatutyun.am|

azatutyun.am: Գերմանական կողմը ներողություն է խնդրել Ադրբեջանից Արցախի դրոշի հրապարակման համար: Ադրբեջանական Azertac-ը հրապարակել է Գերմանիայի նախագահի աշխատակազմի ղեկավար, պետքարտուղար Դյորտե Դինգերի նամակն Ադրբեջանի նախագահի օգնական Հիքմեթ Հաջիևին, որտեղ պետքարտուղարը ներողություն է խնդրում հրապարակման համար՝ նշելով, որ այն տեխնիկական սխալի արդյունք է։ Դինգերը հայտնել է, որ երկրի նախագահ Շտայնմայերի առաջիկա այցը Բաքու նպատակ ունի ամրապնդել երկու երկրների միջև գործընկերությունը և աջակցել տարածաշրջանում ընթացող խաղաղ գործընթացին։ Հիշեցնենք, որ Ադրբեջանում Գերմանիայի դեսպան Ռալֆ Հորլեմանը մարտի 31-ին կանչվել էր երկրի արտգործնախարարություն։ Azertac-ի փոխանցմամբ, նրան խիստ բողոքի նոտա էր հղվել Գերմանիայի նախագահ Ֆրանկ-Վալտեր Շտայնմայերի՝ Հայաստան կատարած այցի ընթացքում Գերմանիայի նախագահի Instagram-ի պաշտոնական էջում հրապարակված Արցախի դրոշի կապակցությամբ, որն Ադրբեջանը համարել էր «ոտնձգություն երկրի տարածքային ամբողջականության նկատմամբ»։

11:00 - 01 ապրիլի, 2025

ՀՀ և Գերմանիայի նախագահները այցելել են Թումո ստեղծարար տեխնոլոգիաների կենտրոն

Հանրապետության նախագահ Վահագն Խաչատուրյանը պաշտոնական այցով Հայաստանում գտնվող Գերմանիայի նախագահ Ֆրանկ-Վալտեր Շտայնմայերի և վերջինիս տիկնոջ՝ Էլկե Բուդենբենդերի հետ այցելել է Թումո ստեղծարար տեխնոլոգիաների կենտրոն: Այս մասին հայտնում են ՀՀ նախագահի մամուլի ծառայությունից։Ինչպես նշվում է՝ նախագահները շրջել են կենտրոնում, ծանոթացել իրականացվող ծրագրերին և զրուցել աշակերտների հետ:

22:51 - 31 մարտի, 2025

Ադրբեջանի ԱԳՆ-ն Գերմանիայի դեսպանին խիստ բողոքի նոտա է հայտնել նախագահ Շտայնմայերի կողմից սոցցանցում Արցախի դրոշի հրապարակման առնչությամբ |tert.am|

tert.am: Ադրբեջանում Գերմանիայի դեսպան Ռալֆ Հարլեմանը կանչվել է Ադրբեջանի ԱԳՆ։ Նրան խիստ բողոքի նոտա են հայտնել Գերմանիայի նախագահի կողմից սոցցանցում Արցախի դրոշի հրապարակման առնչությամբ, հաղորդում է Ադրբեջանի ԱԳՆ-ն: Հիշեցնենք, որ տարածաշրջանային այցով Երևանում գտնվող Գերմանիայի նախագահ Ֆրանկ-Վալտեր Շտայնմայերն իր սոցիալական ցանցերում լուսանկար է հրապարակել Արցախի դրոշով և անդրադարձել արցախահայության թեմային։ Հրապարակմանը կից տեքստում նախագահը մասնավորապես նշել է, որ Լեռնային Ղարաբաղը բնակեցված էր հիմնականում հայերով։

19:05 - 31 մարտի, 2025

Հայաստանի և Գերմանիայի նախագահները քննարկել են վերականգնվող էներգիայի ոլորտում համագործակցության ընդլայնմանը վերաբերող հարցեր |armenpress.am|

armenpress.am: Հայաստանի և Գերմանիայի նախագահները քննարկել են երկկողմ տնտեսական համագործակցության խորացմանն ու զարգացմանը վերաբերող մի շարք օրակարգային հարցեր՝ այդ թվում էներգետիկայի ոլորտում։ Հայաստանի նախագահ Վահագն Խաչատուրյանի հետ համատեղ մամուլի ասուլիսի ժամանակ հայ-գերմանական տնտեսական համագործակցության ներկա մակարդակին և դրանք զարգացման հեռանկարներին վերաբերող հացին ի պատասխան նշեց Գերմանիայի նախագահ Ֆրանկ-Վալտեր Շտայնմայերը: Նա կարևորեց վերականգնվող էներգիայի ոլորտում իրականացվող աշխատանքը և այդ հարցում երկրների միջև համագործակցությունը։ «Մենք տեսնում ենք, որ Հայաստանում արդեն այդ փոփոխությունը վաղուց սկսվել է։ Եթե մեկ քայլ առաջ նայենք, ապա կարևոր է ոչ միայն քամու էներգիան, այլև՝ ջրածնի էներգիան»,- շեշտեց Շտայնմայերը։ Գերմանիայի նախագահն ընդգծեց՝ կարևոր է ոչ միայն վերականգնվող էներգիայի ստեղծումն, այլև այլ տարածաշրջաններ դրա փոխադրումն ու այդ նպատակով հաղորդակցությունների ստեղծումը։«Եթե Հայաստանը կարող է այդպիսի ենթակառուցվածքներ ստեղծել, մենք դա ողջունում ենք»,-շեշտեց նա: Հայաստանի նախագահ Վահագն Խաչատուրյանի համոզմամբ՝ հայ-գերմանական պատվիրակությունների միջև քննարկումներում չէին կարող չարծարծվել երկկողմ տնտեսական հարաբերություններին վերաբերող հարցեր, քանի որ ԵՄ-ի անդամ երկրներից հենց Գերմանիան է Հայաստանի հետ ապրանքաշրջանառության ծավալներով գտնվում առաջին տեղում։Շարունակությունը՝ սկզբնաղբյուր կայքում։

18:08 - 31 մարտի, 2025

Նիկոլ Փաշինյանը և Աննա Հակոբյանը Կառավարությունում հյուրընկալել են Ֆրանկ-Վալտեր Շտայնմայերին և Էլկե Բուդենբենդերին

Վարչապետ Նիկոլ Փաշինյանը և տիկին Աննա Հակոբյանը Կառավարությունում հյուրընկալել են պաշտոնական այցով Հայաստանում գտնվող Գերմանիայի նախագահ Ֆրանկ-Վալտեր Շտայնմայերին և տիկին Էլկե Բուդենբենդերին: Այս մասին հայտնում են ՀՀ վարչապետի աշխատակազմից։ ՀՀ վարչապետը և Գերմանիայի նախագահը հանդիպել են ընդլայնված կազմերով, տեղի է ունեցել նաև Աննա Հակոբյանի և Էլկե Բուդենբենդերի առանձնազրույցը: Նիկոլ Փաշինյանը ողջունել է պարոն Շտայնմայերի այցը Հայաստանի Հանրապետություն և նշել, որ այն պատմական է, քանի որ Գերմանիայի նախագահի առաջին այցն է մեր երկիր: Վարչապետն ընդգծել է, որ Հայաստանն ու Գերմանիան ունեն ակտիվ և խորացող համագործակցություն։ Այդ առումով, երկրի ղեկավարը շեշտել է Գերմանիայի աջակցությունը ՀՀ Կառավարության ժողովրդավարական բարեփոխումների օրակարգին և շնորհակալություն հայտնել այդ ուղղությամբ Ֆրանկ-Վալտեր Շտայնմայերի անձնական ջանքերի համար։ Գերմանիայի նախագահը շնորհակալություն է հայտնել ջերմ հյուրընկալության համար և նշել, որ իր երկիրը կարևորում է Հայաստանի հետ բազմաոլորտ փոխգործակցության խորացումը: Ֆրանկ-Վալտեր Շտայնմայերը հեռանկարային է համարել փոխգործակցությունը տնտեսության, ներդրումների, ենթակառուցվածքների զարգացման, էներգետիկայի, զբոսաշրջության, կրթության և մշակույթի ոլորտներում: Գերմանիայի նախագահը հայտնել է իր երկրի աջակցությունը Հայաստան-ԵՄ փոխգործակցության զարգացման ու ՀՀ Կառավարության բարեփոխումների օրակարգի արդյունավետ իրականացման գործում: Զրուցակիցներն ընդգծել են երկկողմ հարաբերությունների հետևողական զարգացման ու խորացման մեծ ներուժն իրացնելու անհրաժեշտությունը, ինչին կարող է նպաստել նաև մարդկային շփումների ակտիվացումը: Այս համատեքստում, վարչապետ Փաշինյանը կարևորել է ԵՄ-ի հետ վիզաների ազատականացման ուղղությամբ երկխոսությունը:Անդրադարձ է կատարվել «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագրի նախագծի համաձայնեցմանը: ՀՀ վարչապետը և Գերմանիայի նախագահը կարևորել են համաձայնագրի ստորագրումը՝ ի նպաստ Հարավային Կովկասում խաղաղության ու կայունության ապահովման: Ֆրանկ-Վալտեր Շտայնմայերը շեշտել է Գերմանիայի աջակցությունը ՀՀ Կառավարության խաղաղության օրակարգին: Մտքեր են փոխանակվել նաև ՀՀ Կառավարության «Խաղաղության խաչմերուկ» նախագծի, ինչպես նաև երկուստեք հետաքրքրություն ներկայացնող այլ հարցերի շուրջ:

17:37 - 31 մարտի, 2025

Մայրաքաղաք Երևանի և Գերմանիայի Լայպցիգ քաղաքի միջև ստորագրվել է մշակութային համագործակցության համաձայնագիր

Երևանի քաղաքապետ Տիգրան Ավինյանն ու Լայպցիգի քաղաքապետ Բուրքհարդ Յունգը ստորագրել են համաձայնագիր՝ «Երևան և Լայպցիգ քաղաքների միջև մշակութային տարի իրականացնելու վերաբերյալ»։ Այս մասին հայտնում են Երևանի քաղաքապետարանից, նշելով, որ նախաձեռնությունը միտված է խթանելու Երևանի և Լայպցիգի միջև մշակութային փոխանակումները և ամրապնդելու երկու քաղաքների գործընկերային կապերը՝ համատեղ նախագծերի և միջոցառումների միջոցով։ Բուրքհարդ Յունգը Երևանում է ժամանել Գերմանիայի նախագահի գլխավորած պատվիրակության կազմում: Մարտի 31-ից ապրիլի 1-ը պաշտոնական այցով Հայաստան է ժամանել Գերմանիայի նախագահ Ֆրանկ-Վալտեր Շտայնմայերը։

16:58 - 31 մարտի, 2025

Վահագն Խաչատուրյանը հանդիպել է Գերմանիայի նախագահ Ֆրանկ-Վալտեր Շտայնմայերի հետ

Հայաստանի Հանրապետության նախագահ Վահագն Խաչատուրյանը նախագահական նստավայրում հանդիպում է ունեցել պաշտոնական այցով Հայաստան ժամանած Գերմանիայի նախագահ Ֆրանկ-Վալտեր Շտայնմայերի հետ: Այս մասին հայտնում են ՀՀ նախագահի աշխտակազմից։ Երկու երկրների նախագահները նախ առանձնազրույց են ունեցել, որին հաջորդել է երկու երկրների պատվիրակությունների հանդիպումն ընդլայնված կազմով:Հանդիպման ընթացքում քննարկվել են երկու երկրների միջև բազմոլորտ համագործակցության ընդլայնմանն ու խորացմանը վերաբերող հարցերի լայն շրջանակ։ Կողմերն ընդգծել են ինչպես երկկողմ, այնպես էլ Եվրամիության շրջանակում փոխգործակցության առավել արդյունավետ կազմակերպման կարևորությունը՝ հատուկ ուշադրություն դարձնելով տնտեսական, կրթական, մշակութային և գիտական ոլորտներում հարաբերությունների խորացմանը։ Հանդիպման ընթացքում կարևորվել է էներգետիկ բնագավառում համատեղ ծրագրերի իրականացումը՝ նպատակ ունենալով ձևավորել նոր հեռանկարներ և ամրապնդել գործընկերային կապերը։ Կողմերը պատրաստակամություն են հայտնել շարունակելու համատեղ ջանքերը՝ կառուցողական երկխոսության, փոխշահավետ նախաձեռնությունների և ամուր համագործակցության հիման վրա։ Հանդիպումների ավարտին երկու երկրների միջև ստորագրվել է համաձայնագրեր: Ըստ այդմ՝ ստորագրվել է «Հայաստանի Հանրապետության կառավարության և Գերմանիայի Դաշնային Հանրապետության կառավարության միջև ֆինանսական համագործակցության մասին» համաձայնագիր, որը հայկական կողմից ստորագրել է ՀՀ էկոնոմիկայի նախարար Գևորգ Պապոյանը, իսկ գերմանական կողմից՝ Հայաստանում Գերմանիայի դեսպան Կլաուդիա Բուշը: Ստորագրվել է նաև «Երևան և Լայպցիգ քաղաքների միջև մշակութային տարի իրականացնելու վերաբերյալ» համաձայնագիր, որը ստորագրել են Երևանի քաղաքապետ Տիգրան Ավինյանը և Լայպցիգի քաղաքապետ Բուրկհարդ Յունը:

16:02 - 31 մարտի, 2025

Հայաստանը բարձր է գնահատում Գերմանիայի աջակցությունը տարբեր ոլորտներում կայուն զարգացումը խթանելու համար. Վահագն Խաչատուրյան

15:36 - 31 մարտի, 2025

Շտայնմայերը ժամանել է Երևան |azatutyun.am|

azatutyun.am: Գերմանիայի նախագահ Ֆրանկ-Վալտեր Շտայնմայերը մարտի 30-ին ժամանել է Հայաստան։ Ըստ Գերմանիայի նախագահի պաշտոնական կայքէջի՝ Շտայնմայերը տարածաշրջանում կլինի մինչև ապրիլի 2-ը, կայցելի նաև Ադրբեջան։ Սա Գերմանիայի նախագահի առաջին այցն է Երևան և Բաքու։ Երևանում նախատեսված են Շտայնմայերի հանդիպումները նախագահ Վահագն Խաչատուրյանի և վարչապետ Նիկոլ Փաշինյանի հետ։ Գերմանիայի նախագահը կայցելի «ԹՈՒՄՈ», կմասնակցի մշակութային ընդունելությանը, կլինի նաև Դիլիջանում, որտեղ նախատեսված է հանդիպում կին ձեռներեցների հետ, ապա Սևանում կայցելի հայկական եկեղեցի և հիդրոօդերևութաբանական չափիչ կայան։ Բաքվում Գերմանիայի նախագահը կհանդիպի Ադրբեջանի նախագահ Իլհամ Ալիևի հետ, ապա կմասնակցի Ադրբեջանում կանանց իրավիճակի քննարկմանը։

09:50 - 31 մարտի, 2025

Գերմանիան եւ Ֆրանսիան ողջունել են Հայաստանի ու Ադրբեջանի միջեւ խաղաղության պայմանագրի շուրջ ձեռք բերված համաձայնությանը |1lurer.am|

1lurer.am:Գերմանիան եւ Ֆրանսիան ողջունել են Հայաստանի ու Ադրբեջանի միջեւ խաղաղության պայմանագրի շուրջ ձեռք բերված համաձայնությանը։ Գերմանիայի ԱԳ նախարարության հայտարարության մեջ նշված է. «Տեղեկությունը, որ Հայաստանն ու Ադրբեջանը պայմանավորվածություն են ձեռք բերել խաղաղության պայմանագրի մասին, հույս է ներշնչում։ Տասնամյակների թշնամանքից ու պատերազմից հետո այն փաստը, որ կայուն խաղաղությունն արդեն հասանելի է, կարևոր է թե տարածաշրջանի համար, թե նրա սահմաններից դուրս»,- գրել է նա։ «Երկար բանակցություններից հետո Հայաստանի խիզախ ընդառաջ քայլերով արվում է այս վերջին քայլը այն ճանապարհին, որով մենք ուղեկցել ենք երկու երկրներին։ Ես կոչ եմ անում կողմերին ստորագրել խաղաղության պայմանագիրը»,- նշված է նախարար Անալենա Բերբոքի անունից Գերմանիայի ԱԳ նախարարության X-ի միկրոբլոգում տարածված հայտարարության մեջ։ Ֆրանսիան նույնպես ողջունել է Հայաստանի և Ադրբեջանի միջև խաղաղության պայմանագրի շուրջ բանակցությունների ավարտի մասին հայտարարությունը։ Այդ մասին ասված է հանրապետության ԱԳ նախարարության տարածած հաղորդագրության մեջ: «Ֆրանսիան հույս է հայտնում, որ դրա ստորագրումը հնարավորինս շուտ կկայանա։ Հայաստանի և Ադրբեջանի հարաբերությունների կարգավորումը՝ երկու պետությունների տարածքային ամբողջականության և ինքնիշխանության հարգման պայմաններում, պետք է հնարավորություն տա Հարավային Կովկասին դառնալու խաղաղության, ինտեգրման և համագործակցության վայր՝ բաց սահմաններով՝ հանուն տարածաշրջանի ժողովուրդների շահերի»,- նշված է գերատեսչության հայտարարության մեջ։ Հիշեցնենք, որ մարտի 13-ին նախ Ադրբեջանի ԱԳ նախարար Ջեյհուն Բայրամովը, իսկ ավելի ուշ ՀՀ ԱԳՆ-ն հայտարարեցին, որ խաղաղության համաձայնագիրը պատրաստ է ստորագրման։ ԱԳՆ-ից նշեցին՝ ՀՀ-ն պատրաստ է Ադրբեջանի հետ սկսել խորհրդակցություններ Համաձայնագրի ստորագրման ժամկետների և տեղի շուրջ։ Հիշեցնենք, որ խաղաղության պայմանագրի շրջանականերում կողմերը չէին համաձայնեցրել երկու կետ. միմյանց նկատմամբ միջազգային հայցերը հետ կանչելու և սահմանին երրորդ երկրների ներկայացուցիչներ չտեղակայելու կետերը։ Բացի այդ, Ադրբեջանը պահանջում է փոխել Հայաստանի Մայր օրենքը՝ խնդրահարույց համարելով նախաբանում հղումը Անկախության հռչակագրին, որում Արցախի ու Հայաստանի միավորման մասին հիշատակում կա։

09:30 - 14 մարտի, 2025

Ցույց Բեռլինում՝ ի պաշտպանություն հայ գերիների |civilnet.am|

civilnet.am: Ադրբեջանի ապօրինի դատավարությունների դեմ անհապաղ միջոցներ ձեռնարկելու կոչով Բեռլինում մարտի 10-ին բողոքի ակցիա է տեղի ունեցել: Ակցիային մասնակցել են նշանավոր իրավապաշտպաններ, այդ թվում՝ Գերմանիայի հայերի կենտրոնական խորհրդի (ZAD)-ի նախագահ Ջոնաթան Սպանգենբերգը, որն իր ելույթում ընդգծել է հայերի համակարգված հալածանքները և Ադրբեջանի կողմից քաղբանտարկյալներին որպես սակարկության գործիք օգտագործելը բանակցություններում: «Ձերբակալվածները, այդ թվում՝ Ռուբեն Վարդանյանը, ապրում են անմարդկային պայմաններում: Խոշտանգումների և վատ վերաբերմունքի մասին է հաղորդվում։ Վարդանյանն այս պահին հացադուլի մեջ է, և նրա կյանքը մեծ վտանգի տակ է։ Մենք չենք կարող լռել»,- հայտարարել է Սպանգենբերգը։ Ակցիայի մասնակիցները բարձրաձայնել են Ադրբեջանի կողմից միջազգային իրավունքի խախտումների մասին, մասնավորապես՝ ՄԱԿ-ի ցեղասպանության կոնվենցիայի և Մարդու իրավունքների եվրոպական կոնվենցիայի դրույթների: Նրանք դիմել են Եվրամիությանը, Գերմանիային և Ֆրանսիային՝ պահանջելով հետևյալ քայլերը. Նպատակային պատժամիջոցներ կիրառել Ադրբեջանի այն պաշտոնյաների և կառույցների դեմ, ովքեր պատասխանատու են հայ բանտարկյալների անօրինական կալանքի և խոշտանգումների համար: Ճնշում գործադրել Ադրբեջանի վրա՝ թույլատրելու ՄԱԿ-ի Խոշտանգումների դեմ կոմիտեին և Միջազգային Կարմիր Խաչին մոնիտորինգ իրականացնել բանտերում: Պահանջել բոլոր հայ կալանավորների անհապաղ և անվերապահ ազատ արձակում՝ համաձայն միջազգային պարտավորությունների: Հետաքննել և կանխել օկուպացված Արցախում հայկական մշակութային և կրոնական վայրերի ոչնչացումը: Ստեղծել միջազգային պաշտպանության մեխանիզմներ՝ տեղահանված հայերի անվտանգ վերադարձն իրենց հայրենիք ապահովելու համար: Իրավապաշտպան կազմակերպությունների կոալիցիան ծրագրում է ցույցեր անցկացնել ամբողջ Եվրոպայում: Կոալիցիան պաշտոնական միջնորդություն կներկայացնի Եվրախորհրդարան՝ կոչ անելով անհապաղ պատժամիջոցներ կիրառել Ադրբեջանի դեմ: Բողոքի ակցիայի կազմակերպիչները նաև կոչ են արել եվրոպացի քաղաքացիներին բարձրացնել իրազեկվածությունը և ճնշում գործադրել իրենց կառավարությունների վրա՝ պայքարելու մարդու իրավունքների այս կոպիտ խախտումների դեմ:

11:13 - 11 մարտի, 2025

Համբուրգի օդանավակայանը գործադուլի պատճառով չեղարկել է բոլոր թռիչքները |armenpress.am|

armenpress.am: Գերմանիայում մարտի 9-ին փակվել է Համբուրգի օդանավակայանը՝ առանց նախազգուշացման սկսված գործադուլի պատճառով: Այս մասին X-ի միկրոբլոգում տարածած հաղորդագրությամբ հայտնել է Համբուրգի օդանավակայանի մամուլի ծառայությունը: Նշվում է, որ գործադուլը կազմակերպվել է Ver.di արհմիության կողմից: «Այդ պատճառով օդանավակայանը փակ է, և ողջ օրվա ընթացքում թռիչքներ և ժամանումներ չեն լինի»,- ասված է հաղորդագրության մեջ։ Նշվում է, որ թռիչքի հետ կապված հարցերի համար անհրաժեշտ է դիմեք համապատասխան ավիաընկերությանը:

15:21 - 09 մարտի, 2025

Գերմանիայում մեքենան մխրճվել է մարդկանց բազմության մեջ. կան զոհեր |azatutyun.am|

azatutyun.am: Գերմանիայի Մանհայմ քաղաքում մեքենան մխրճվել է հավաքված մարդկանց բազմության մեջ, հաղորդվում է զոհերի մասին։ Իրավապահներն առանց մանրամասներ փոխանցելու հայտնում են, որ քաղաքի կենտրոնում ոստիկանական գործողություններ են իրականացվում։ Հաղորդվում է, որ քաղաքացիները հավաքվել էին՝ կառնավալային շքերթներին մասնակցելու համար։ Վերջին ամիսներին Գերմանիայում մի շարք մահացու հարձակումներ են տեղի ունեցել․ նախորդ ամիս՝ Մյունխենում, դեկտեմբերին՝ Մագդեբուրգում, իսկ 2024-ի մայիսին էլ Մանհայմ քաղաքի հրապարակում մի տղամարդ դանակով հարձակվել էր անցորդների վրա և վիրավորել մի քանիսին։

17:20 - 03 մարտի, 2025