Վահագն Խաչատուրյան

Հայաստանի Հանրապետության 5-րդ նախագահ։

Վահագն Գառնիկի Խաչատուրյան (ապրիլի 22, 1959, Սիսիան, Հայկական ԽՍՀ, ԽՍՀՄ), հայ տնտեսագետ, քաղաքական և պետական գործիչ, Հայաստանի Հանրապետության բարձր տեխնոլոգիական արդյունաբերության նախկին նախարար։

1982-1992 թթ.- գիտամանկավարժական գործունեություն Երևանի Ժողվրդական տնտեսության ինստիտուտում։ 1982-1990 թթ. աշխատել է «Հրազդանմեքենա» արտադրական միավորումում՝ որպես տնտեսագետ, տնտեսական հետազոտությունների լաբորատորիայի վարիչ։ 1990-1992 թթ. եղել է «Մարս» արտադրական միավորման բաժնի վարիչ, գլխավոր տնօրենի տեղակալ։

1990-1995 թթ. - Երևանի քաղաքային խորհրդի պատգամավոր։

1992 թ. դեկտեմբերի 22-1996 թ. փետրվարի 22 - Երևանի քաղաքային խորհրդի գործադիր կոմիտեի նախագահ՝ Երևանի քաղաքապետ[2]։

1995-1999 թթ. - ՀՀ Ազգային ժողովի պատգամավոր։

1996-1998 թթ. - ՀՀ նախագահի խորհրդական։

2000 թ. - «Արմատ» ժողովրդավարության և քաղաքացիական հասարակության զարգացման կենտրոնի հիմնադիր անդամ։

2006 թ. - «Այլընտրանք» հասարակական-քաղաքական նախաձեռնության հիմնադիր անդամ։

2008-2013 թթ. - Հայ ազգային կոնգրեսի՝ Մալաթիայի տարածքային կառույցի ղեկավար, Կոնգրեսի տնտեսական հանձնախմբի անդամ։

ՀՀ նախագահը պարգևատրեց հայագիտության զարգացման գործում ներդրում ունեցած հայագետների

ՀՀ նախագահը պարգևատրեց հայագիտության զարգացման գործում ներդրում ունեցած հայագետների

Հայագիտության զարգացման գործում ներդրած նշանակալի ավանդի և երկարամյա արգասաբեր գործունեության համար ՀՀ նախագահ Վահագն Խաչատուրյանը պարգևատրեց մի խումբ հայագետների։ Պարգևատրման հանդիսավոր արարողությունը տեղի ունեցավ հուլիսի 19-ին նախագահի նստավայրում։ Խաչատուրյանը Մովսես Խորենացու մեդալով պարգևատրեց Ժնևի համալսարանի հայագիտության ամբիոնի պրոֆեսոր Վալենտինա Կալցոլարի Բուվիենին։ Կալցոլարին ղեկավարում է Ժնևի համալսարանի առաջին և Շվեյցարիայում  փաստացի միակ հայագիտական ամբիոնն ու կենտրոնը 1993 թվականից։ Դասական բանասիրության, քրիստոնեության պատմության և հայագիտության բնագավառներում մասնագիտացումը ձեռք է բերել Բոլոնիայի, Ժնևի և Միլանի համալսարաններում, եղել է երջանկահիշատակ Գաբրիելա Ուլուհոջյանի ուսանողներից մեկը։ Հայաստանի գիտությունների ազգային ակադեմիայի արտասահմանյան և Միլանի Ամբրոսիանական ակադեմիայի անդամ է, Ֆրանսիական բանասիրության և հնագիտության ակադեմիայի թղթակից անդամ է, 2007 թվականից  նախագահում է Հայագիտության միջազգային ընկերությունը։ Եղել է քրիստոնեական պարականոն գրականության ուսումնասիրման ընկերակցության նախագահը և ընտրվել է Հրանտ Դինք հիմնադրամի ժյուրիի խորհրդի անդամ։ Կազմակերպել  է միջոցառումներ՝ նվիրված հայոց պատմությանը, գրականությանը, մշակույթին և ներկա իրադարձություններին, այդ թվում՝ Արցախյան հակամարտության խնդրին։  
20:17 - 19 հուլիսի, 2024
Դուք բավական բարդ ու կարևոր գերատեսչություն եք ղեկավարելու. նախագահը՝ Գեւորգ Պապոյանին

Դուք բավական բարդ ու կարևոր գերատեսչություն եք ղեկավարելու. նախագահը՝ Գեւորգ Պապոյանին

Նախագահը շնորհավորել է նախարարին պատասխանատու պաշտոնն զբաղեցնելու կապակցությամբ և հաջողություններ մաղթել: «Դուք բավական բարդ ու կարևոր գերատեսչություն եք ղեկավարելու, որի բնականոն աշխատանքից է էականորեն կախված երկրի զարգացման հետագա ընթացքը»,- նշել է նախագահը: Շնորհակալություն հայտնելով ընդունելության և մաղթանքների համար, նախարար Պապոյանը շեշտել է, որ հնարավոր ջանքերը կներդնի հայաստանյան տնտեսության զարգացման մեջ վերջին տարիներին առկա դրական միտումներին ապագայում էլ զարկ տալու համար: Հանդիպման ընթացքում նախարարը Հանրապետության նախագահին է ներկայացրել նախարարության ընթացիկ և առաջիկա ծրագրերն ու երկրի տնտեսական կայուն զարգացման ուղղությամբ տարվող աշխատանքները: Մտքեր են փոխանակվել տնտեսական քաղաքականության իրականացման առաջնահերթությունների շուրջ: Անդրադարձ է կատարվել տնտեսության ոլորտում առկա հիմնախնդիրներին և վերջիններիս լուծման համար ինչպես նախարարության, այնպես էլ այլ գերատեսչությունների և կառավարության որդեգրած սկզբունքներին և գործունեության ուղղություններին:
21:53 - 18 հուլիսի, 2024
Հանրապետության նախագահ Վահագն Խաչատուրյանն ընդունել է Հայաստանում Չինաստանի դեսպան Ֆան Յոնին

Հանրապետության նախագահ Վահագն Խաչատուրյանն ընդունել է Հայաստանում Չինաստանի դեսպան Ֆան Յոնին

Հանրապետության նախագահ Վահագն Խաչատուրյանը՝ դիվանագիտական առաքելությունն ավարտելու կապակցությամբ ընդունել է Հայաստանում Չինաստանի արտակարգ և լիազոր դեսպան Ֆան Յոնին: Այս մասին հայտնում են նախագահի աշխատակազմից։ «Նախագահ Խաչատուրյանը շնորհակալություն է հայտնել դեսպանին՝ պաշտոնավարման ընթացքում ծավալած արդյունավետ աշխատանքի համար, որն իր նպաստն է բերել հայ-չինական բարեկամական հարաբերությունների շարունակական զարգացման գործում։ «Ձեր պաշտոնավարման ընթացքը համընկել է Հայաստանի համար բավականին բարդ ժամանակաշրջանի հետ և առավել գնահատելի է այն ամենն, ինչ արել եք անձամբ Դուք և Չինաստանի Ժողովրդական Հանրապետությունը: Հայաստան-Չինաստան հարաբերությունները, մեր ժողովուրդների միջև կապերը երկարամյա պատմություն ունեն և դիվանագիտական հարաբերությունների հաստատումից հետո դինամիկ զարգացել են: Չինաստանը Հայաստանի Հանրապետության արտաքին քաղաքականության կարևոր առաջնահերթությունների շարքում է»,- ասել է Հանրապետության նախագահը: Դեսպան Ֆան Յոնը շնորհակալություն է հայտնել ընդունելության համար: «Հայաստանում աշխատել եմ չորս տարի, բայց շատ կապված եմ Հայաստանի հետ: Հայ ժողովրդի բարեկամական վերաբերմունքն անձամբ զգացել եմ: Չորս տարվա ընթացքում իմ հայ գործընկերների հետ տարբեր ոլորտներում աշխատել ենք և կարծում եմ հասել ենք լավ արդյունքների: Շնորհակալություն եմ հայտնում Ձեզ և պարոն Փաշինյանին իմ աշխատանքին աջակցելու համար»,- նշել է դեսպանը: Հանդիպման ընթացքում քննարկվել են երկու երկրների միջև բազմաշերտ հարաբերությունների հետագա զարգացման օրակարգային հարցեր: Երկուստեք բարձր է գնահատվել առաջիկայում Հայաստանի և Չինաստանի միջև ուղիղ թռիչքների մեկնարկը, ինչը նոր խթան կհանդիսանա ոչ միայն տուրիզմի, այլև առևտրատնտեսական և գործարար կապերի հետագա ընդլայնմանը: Զրույցի ընթացքում անդրադարձ է կատարվել տարածաշրջանային ընդհանուր իրադրությանն ու զարգացումներին: Այս համատեքստում Հանրապետության նախագահը նշել է, որ Հայաստանի դիրքորոշումն է բարիդրացիական հարաբերություններ ունենալ բոլոր հարևանների հետ՝ հիմնված տարածքային ամբողջականության, ինքնիշխանության և միջազգային հիմնարար իրավունքների և նորմերի վրա: Այս կապակցությամբ դեսպանը Յոնն իր խոսքում շեշտել է, որ Չինաստանը աջակցում է տարածաշրջանում կայուն և տևական խաղաղության հաստատմանը նպաստող բոլոր նախաձեռնություններին» - նշված է հայտարարությունում։
19:21 - 12 հուլիսի, 2024
Նախագահի գլխավորությամբ Արմավիրի մարզպետարանում տեղի է ունեցել աշխատանքային խորհրդակցություն

Նախագահի գլխավորությամբ Արմավիրի մարզպետարանում տեղի է ունեցել աշխատանքային խորհրդակցություն

Նախագահ Վահագն Խաչատուրյանն Արմավիրի մարզ կատարած այցի արդյունքներն ամփոփել է Արմավիրի մարզպետարանում կայացած աշխատանքային խորհրդակցությամբ: Այս մասին հաղորդում են նախագահի աշխատակազմից։ Խորհրդակցության ընթացքում Արմավիրի մարզպետ Դավիթ Խուդաթյանը Հանրապետության նախագահին է ներկայացրել վերջին տարիներին մարզում իրականացված դպրոցաշինության և մանկապարտեզաշինության, ինչպես նաև ենթակառուցվածքների զարգացմանն ուղղված մի շարք ծրագրերի վերաբերյալ ամփոփ տվյալներ: Աշխատանքային խորհրդակցության ընթացքում քննարկվել են Արմավիրի մարզում խմելու և ոռոգման ջրի, ճանապարհաշինության և պետական սուբսիդավորման միջոցով իրականացվող այլ ծրագրերի վերաբերյալ հարցեր: Անդրադարձ է կատարվել մարզի ինչպես հրատապ, այնպես էլ երկարաժամկետ կտրվածքով լուծում պահանջող հիմնախնդիրների չեզոքացման ուղղությամբ երկրի բարձրագույն և համայնքային իշխանությունների ձեռնարկներին: Հանդիպման ընթացքում նախագահ Վահագն Խաչատուրյանը ներկաներին մանրամասներ է հայտնել վերջին շրջանում երկրի պաշտպանունակության բարձրացման ուղղությամբ տարվող աշխատանքների մասին: Հանրապետության նախագահը համապատասխան գերատեսչությունների ներկայացուցիչներից հետաքրքրվել է նաև մարզում տիրող սոցիալ-տնտեսական, իրավական և ընդհանուր մթնոլորտից: Խորհրդակցության ընթացքում կարևորվել են մարզային և համայնքային խնդիրների քարտեզագրման և վերհանման գործում քաղաքացիների մասնակցայնության բարձրացման խթանմանն ուղղված ջանքերը:  
17:33 - 12 հուլիսի, 2024
Վահագն Խաչատուրյանն ընդունել է Հայաստանում Եգիպտոսի դեսպան Սերենադ Գամիլին. քննարկվել են համագործակցության հեռանկարները

Վահագն Խաչատուրյանն ընդունել է Հայաստանում Եգիպտոսի դեսպան Սերենադ Գամիլին. քննարկվել են համագործակցության հեռանկարները

Հանրապետության նախագահ Վահագն Խաչատուրյանը Եգիպտոսի Արաբական Հանրապետության ազգային տոնին ընդառաջ այսօր իր նստավայրում ընդունել է Հայաստանում Եգիպտոսի դեսպան Սերենադ Գամիլին:Նախագահ Վահագն Խաչատուրյանը շնորհավորել է դեսպանին և ի դեմս նրա՝ Եգիպտոսի բարեկամ ժողովրդին, խնդրել է նաև իր ջերմ բարեմաղթանքները փոխանցել նախագահ Աբդել Ֆաթթահ Ալ Սիսիին: «Բարեկամ Եգիպտոսի ժողովրդին և ղեկավարությանը մաղթում եմ հաջողություններ, նոր ձեռքբերումներ, ինչպես նաև խաղաղություն, որի գինն ու նշանակությունը Եգիպտոսը մեզ նման շատ լավ գիտի: Բոլորս ընդունում և հասկանում ենք, որ առանց կայուն խաղաղության հաստատման դժվար է իրականացնել ծրագրեր և արձանագրել առաջընթաց»,- նշել է Հանրապետության նախագահը:Դեսպան Սերենադ Գամիլին շնորհակալություն է հայտնել ջերմ ընդունելության և բարեմաղթանքների համար: «Մեծապես գնահատում և զգում ենք այն հարգանքն ու սերը, որ տածում եք մեր երկրի և մեր ժողովրդի նկատմամբ: Ջերմ հարաբերություններ են ձևավորվել նաև Ձեր և մեր երկրի նախագահի միջև: Համոզված ենք, որ այս ամենը միտված է երկկողմ հարաբերությունների ամրապնդմանն ու սերտացմանը»,- ասել է Հայաստանում Եգիպտոսի դեսպանը: Զրուցակիցները քննարկել են քաղաքական, տնտեսական, գիտական, բարձր տեխնոլոգիաների, մշակութային և այլ ոլորտներում երկկողմ փոխգործակցությանը վերաբերող հարցեր: Երկուստեք կարևորվել է գործարար կապերի ակտիվացումը և զբոսաշրջության ոլորտի զարգացումը՝ որպես դրան նպաստող կարևոր հանգամանք նշվել Երևանի և Կահիրեի միջև ուղիղ օդային հաղորդակցության առկայությունը:Երկկողմ կապերի ամրապնդման գործում զրուցակիցները մեծ տեղ են վերապահել փոխայցելությունների ակտիվացմանը, որի լավագույն ապացույց են նախորդ տարվա սկզբին Եգիպտոսի նախագահի՝ Հայաստան և այս տարի Հայաստանի վարչապետի Եգիպտոս կատարած պաշտոնական այցերը:Հանդիպման ընթացքում Հանրապետության նախագահը վերահաստատել է Հայաստանի քաղաքական կամքը՝ Հարավային Կովկասում խաղաղության հաստատման վերաբերյալ:
19:17 - 10 հուլիսի, 2024
Տեղի է ունեցել ՀՀ էկոնոմիկայի և ԲՏԱ նախարարների երդման արարողությունը

Տեղի է ունեցել ՀՀ էկոնոմիկայի և ԲՏԱ նախարարների երդման արարողությունը

 Նախագահական նստավայրում ՀՀ նախագահ Վահագն Խաչատուրյանի և վարչապետ Նիկոլ Փաշինյանի ներկայությամբ տեղի է ունեցել Բարձր տեխնոլոգիական արդյունաբերության նախարար Մխիթար Հայրապետյանի և Էկոնոմիկայի նախարար Գևորգ Պապոյանի երդման արարողությունը: Ինչպես տեղեկանում ենք Հայաստանի կառավարության տարածած հաղորդագրությունից, նախարարներն, ընթերցելով երդման տեքստը, նշել են.  «Հանուն համազգային նպատակների իրականացման և հայրենիքի հզորացման՝ երդվում եմ բարեխղճորեն կատարել ժողովրդի առջև ունեցած պարտավորություններս, պահպանել Հայաստանի Հանրապետության Սահմանադրությունը և օրենքները, նպաստել Հայաստանի Հանրապետության ինքնիշխանության և շահերի պահպանմանը, հավատարիմ մնալ Կառավարության անդամի բարձր կոչմանը»: Երդման արարողության ավարտին Նիկոլ Փաշինյանը և Վահագն Խաչատուրյանը շնորհավորել են նախարարներին՝ մաղթելով բեղմնավոր ու արգասաբեր աշխատանք:
16:08 - 10 հուլիսի, 2024
Վահագն Խաչատուրյանը շնորհավորական ուղերձ է հղել Իրանի նորընտիր նախագահին

Վահագն Խաչատուրյանը շնորհավորական ուղերձ է հղել Իրանի նորընտիր նախագահին

Հանրապետության նախագահ Վահագն Խաչատուրյանը շնորհավորական ուղերձ է հղել Մասուդ Փեզեշքիանին Իրանի Իսլամական Հանրապետության նախագահական ընտրություններում հաղթանակի կապակցությամբ: «Վստահ եմ, որ Ձեր հարուստ փորձառությունն ու գիտելիքները կծառայեցնեք երկրի հետագա առաջընթացին և բարգավաճմանը: Հայաստանը կարևորում է Իրանի հետ փոխադարձ հարգանքի և վստահության վրա հիմնված դարավոր բարեկամական կապերի հետևողական ամրապնդումն ու խորացումը: Ուրախ եմ արձանագրել, որ այսօր էլ Հայաստան-Իրան հարաբերությունները դինամիկ զարգացում են ապրում: Համոզված եմ, որ Ձեր պաշտոնավարման ընթացքում Հայաստանի Հանրապետության և Իրանի Իսլամական Հանրապետության միջև համագործակցությունը կշարունակի ընդլայնվել՝ ի նպաստ մեր եղբայրական ժողովուրդների բարօրության և տարածաշրջանում խաղաղության ու կայունության հաստատման: Մաղթում եմ Ձեզ ամենայն բարիք և արգասաբեր գործունեություն այդ պատասխանատու առաքելության ճանապարհին»,- մասնավորապես ասվում է նախագահ Վահագն Խաչատուրյանի ուղերձում:
15:06 - 06 հուլիսի, 2024
Սահմանադրությունը մեկանգամյա ամրագրման հռչակագիր չէ, այլ ճկուն ու բազմաբովանդակ գործիք. ՀՀ նախագահ

Սահմանադրությունը մեկանգամյա ամրագրման հռչակագիր չէ, այլ ճկուն ու բազմաբովանդակ գործիք. ՀՀ նախագահ

ՀՀ նախագահ Վահագն Խաչատուրյանը շնորհավորական ուղերձ է հղել Սահմանադրության օրվա առթիվ. «Սիրելի հայրենակիցներ, շնորհավորում եմ բոլորիս Հայաստանի Հանրապետության Սահմանադրության օրվա կապակցությամբ: Պետականությունների ստեղծման և ամրության հիմնաքարային դրույթները շատ չեն և հաճախ հանգում են Անկախության հռչակմանն ու Սահմանադրության ընդունմանը: Այս տեսանկյունից, ինչպես 1991 սեպտեմբերի 21-ի Անկախության, այնպես էլ 1995 թվականի հուլիսի 5-ի Սահմանադրական հանրաքվեները Հայաստանի ժողովրդի՝ անկախ ինքնիշխան, սոցիալական ու զարգացող պետություն ունենալու հավաքական կամքի արտահայտություններն էին: Մեր Սահմանադրությունն անցած շուրջ երեք տասնամյակի ընթացքում բազում խոչընդոտներ, փոփոխություններ ու նաև ոտնձգություններ է հաղթահարել և հենց այստեղ է կայանում նաև Սահմանադրության էությունը, որովհետև այն նորմերի կամ սահմանումների, ձևակերպումների և հայտարարությունների համահավաք փաստաթուղթ չէ, այլ պետություն-հասարակություն-քաղաքացի հարաբերությունների ներդաշնակության և համակեցության գրված ու չգրված կանոնները երաշխավորող Մայր օրենք: Միևնույն ժամանակ, Սահմանադրությունը մեկանգամյա ամրագրման հռչակագիր չէ, այլ ճկուն ու բազմաբովանդակ գործիք, որը հավասարակշռում է իշխանության թևերի, երկրում իրականացվող բարեփոխումների, ընթացիկ զարգացումների, հասարակական և քաղաքական անցուդարձի՝ ինչպես ընդունված է ասել, սահմանադրական հունի մեջ մնալը: Այս առումով Հայաստանի Հանրապետության բոլոր քաղաքացիները, և մասնավորապես պետական պաշտոնյաներն իրենց գործունեության մեջ պետք է ելակետ ունենան հենց սահմանադրականության գաղափարը, որը հանդես է գալիս որպես կողմնորոշիչ, որպես ուղեցույց՝ մեր իղձերի ու երազանքների Հայաստանը կերտելու ճանապարհին: Կրկին շնորհավորում եմ բոլորիս մեր պետականության կարևորագույն տոնի կապակցությամբ, մաղթում տոկունություն և ամրություն, Հայաստանի Հանրապետությանը զարգացում, հզորություն և բարգավաճում»,-նշված է ուղերձում։
10:50 - 05 հուլիսի, 2024
Կանադան բարձր է գնահատում ՀՀ շարունակական ջանքերը՝ ուղղված տարածաշրջանում խաղաղությանը. դեսպանը՝ ՀՀ նախագահին

Կանադան բարձր է գնահատում ՀՀ շարունակական ջանքերը՝ ուղղված տարածաշրջանում խաղաղությանը. դեսպանը՝ ՀՀ նախագահին

Հայաստանի Հանրապետության նախագահ Վահագն Խաչատուրյանն ընդունել է Հայաստանում Կանադայի դեսպան Էնդրյու Թըրներին:Նախագահ Վահագն Խաչատուրյանը շնորհավորել է դեսպանին ազգային տոնի կապակցությամբ և խնդրել է իր ջերմ բարեմաղթանքները փոխանցել Կանադայի վարչապետ Ջասթին Թրյուդոյին, Կանադայի գեներալ-նահանգապետ Մերի Սայմոնին և Կանադայի բարեկամ ժողովրդին:Նախագահը համոզմունք է հայտնել, որ ամիսներ առաջ Հայաստանում Կանադայի նստավայր դեսպանության բացումով արձանագրվեց երկկողմ հարաբերությունների խորացում և տարբեր բնագավառներում փոխշահավետ համագործակցության ընդլայնում:«Համոզված եմ՝ մեր երկրում ծավալած Ձեր գործունեությունն իր նպաստն է բերում ոչ միայն մեր հարաբերությունների առավել զարգացման գործին, այլ նաև հնարավորություն է ընձեռում իրական պատկերացում կազմել այստեղ տեղի ունեցող իրադարձությունների մասին»,- ասել է նախագահը:Վահագն Խաչատուրյանը նաև շնորհակալություն է հայտնել այն աջակցության համար, որ Կանադան ցուցաբերել է Հայաստանին և դժվարին ժամանակահատվածում կանգնել է Հայաստանի կողքին՝ արտահայտելով իր համերաշխությունը: Այդ համատեքստում առանձնակի ընդգծվել է Կանադայի ներգրավվածությունը ԵՄ դիտորդական առաքելության կազմում, որն արժեքավոր ներդրում է տարածաշրջանի անվտանգության և խաղաղության ամրապնդման համար:Դեսպան Էնդրյու Թըրները շնորհակալություն է հայտնել ջերմ ընդունելության և բարեմաղթանքների համար: «Մենք մեծապես զգացված ենք այն վերաբերմունքից, որ ստանում ենք Հայաստանում Կանադայի դեսպանության բացման պահից, որն իրականացվեց հոկտեմբերին արտգործնախարար Ժոլիի մասնակցությամբ: Մեծապես ոգևորված ենք, որ այսօր արդեն տեղում՝ դեսպանության միջոցով հնարավորություն ունենք աշխատել տարբեր ոլորտներում համագործակցության խորացման ուղղությամբ»,- մասնավորապես ասել է դեսպանը:Էնդրյու Թըրները նշել է, որ Կանադան բարձր է գնահատում Հայաստանի շարունակական ջանքերը՝ ուղղված տարածաշրջանում խաղաղությանն ու կայունությանը, և այս առնչությամբ կշարունակի իր օժանդակությունը: Նա նաև հայտնել է Կանադայի պատրաստակամությունը՝ շարունակելու աջակցել ՀՀ ղեկավարությանը՝ երկրում ժողովրդավարության ամրապնդմանն ուղղված քայլերին:Զրուցակիցները մտքեր են փոխանակել տարբեր բնագավառներում հայ-կանադական փոխշահավետ համագործակցությունը խթանելու և առավել խորացնելու շուրջ:
20:23 - 04 հուլիսի, 2024
Ամերիկայի Միացյալ Նահանգները Հայաստանի Հանրապետության կարևորագույն գործընկերներից է. ՀՀ նախագահ

Ամերիկայի Միացյալ Նահանգները Հայաստանի Հանրապետության կարևորագույն գործընկերներից է. ՀՀ նախագահ

Հանրապետության նախագահ Վահագն Խաչատուրյանը շնորհավորական ուղերձ է հղել Ամերիկայի Միացյալ Նահանգների նախագահ Ջո Բայդենին ազգային տոնի՝ Անկախության օրվա կապակցությամբ: «Ամերիկայի Միացյալ Նահանգները Հայաստանի Հանրապետության կարևորագույն գործընկերներից է: Վստահ եմ, որ այսուհետ ևս համատեղ ջանքերով կզարգացնենք մեր երկրների միջև ավելի քան երեսնամյա բազմաշերտ հարաբերությունները։ Բարձր ենք գնահատում Միացյալ Նահանգների շարունակական աջակցու­թյունն ու ջանքերը՝ ուղղված ինչպես Հարավային Կովկասում խաղաղության և կայունության պահպան­մանը, այնպես էլ Հայաստանում ժողովրդավարական ու տնտեսական բարեփոխումների իրականացմանը: Հայ-ամերիկյան համագործակցությանը մեծապես նպաստում են նաև ԱՄՆ-ում բնակվող մեր հայրենակիցները, որոնք նշանակալի ավանդ ունեն երկու ժողովուրդների բարեկամության ամրապնդման գործում»,- մասնավորապես ասվում է նախագահ Խաչատուրյանի ուղերձում:  
12:52 - 04 հուլիսի, 2024
Նախագահի հրամանագրով դատավորներ են նշանակվել

Նախագահի հրամանագրով դատավորներ են նշանակվել

ՀՀ նախագահ Վահագն Խաչատուրյանը հրամանագիր է ստորագրել Սարգիս Պետրոսյանին Հակակոռուպցիոն դատարանի դատավոր նշանակելու մասին: «Հիմք ընդունելով Սահմանադրության 139-րդ հոդվածի 1-ին և 166-րդ հոդվածի 6-րդ մասերը, ինչպես նաև Բարձրագույն դատական խորհրդի 2024 թվականի հունիսի 28-ի ԲԴԽ-68-Ո-130 որոշմամբ ներկայացված առաջարկությունը. Սարգիս Պետրոսյանին նշանակել հակակոռուպցիոն դատարանի կոռուպցիոն հանցագործությունների վերաբերյալ վարույթներով մասնագիտացմամբ դատավոր»,- նշված է հրամանագրում: Նախագահի մեկ այլ հրամանագրով Գոռ Գասպարյանը նշանակվել է Սյունիքի մարզի առաջին ատյանի ընդհանուր իրավասության դատարանի դատավոր: «Հիմք ընդունելով Սահմանադրության 139-րդ հոդվածի 1-ին և 166-րդ հոդվածի 6-րդ մասերը, ինչպես նաև Բարձրագույն դատական խորհրդի 2024 թվականի հունիսի 28-ի ԲԴԽ-68-Ո-129 որոշմամբ ներկայացված առաջարկությունը. Գոռ ԳԱՍՊԱՐՅԱՆԻՆ նշանակել Սյունիքի մարզի առաջին ատյանի ընդհանուր իրավասության դատարանի դատավոր»,- ասված է հրամանագրում:
20:37 - 01 հուլիսի, 2024
Վահագն Խաչատուրյանն այցելել է «Ինժեներական քաղաք»

Վահագն Խաչատուրյանն այցելել է «Ինժեներական քաղաք»

Հանրապետության նախագահ Վահագն Խաչատուրյանն այցելել է «Ինժեներական քաղաք» և ծանոթացել վերջին երկու տարիների ընթացքում կատարված աշխատանքներին: Հայաստանի ինժեներական ասոցիացիայի տնօրենների խորհրդի նախագահ Արամ Սալաթյանի և «Ձեռնարկությունների ինկուբատոր հիմնադրամի» տնօրեն Բագրատ Ենգիբարյանի ուղեկցությամբ նախագահը շրջայց է կատարել «Ինժեներական քաղաքում», ծանոթացել տարածաշրջանում դեռևս միակ՝ «Ազնավուր» անվանումով գերհամակարգչի հնարավորություններին: Բագրատ Ենգիբարյանը և Արամ Սալաթյանը «ինժեներական քաղաքում» կայացած աշխատանքային խորհրդակցության ընթացքում Հանրապետության նախագահին են ներկայացրել ներկայումս տարվող ընթացիկ աշխատանքները, առաջիկա նախագծերն ու ընթացիկ խնդիրները: Խորհրդակցության ընթացքում կարևորվել են բարձր տեխնոլոգիաների կիրառության ընդլայնումն ինչպես տեղային, այնպես էլ համապետական նշանակության ոլորտներում և ուղղություններում: Քննարկվել են բարձրտեխնոլոգիական և հարակից ոլորտներում հայաստանյան ներուժի լիարժեք իրականացման ուղղությամբ անհրաժեշտ քայլերի և միջոցառումների կյանքի կոչման վերաբերյալ հարցեր: Հանրապետության նախագահ Վահագն Խաչատուրյանն այցելել է նաև «ՋիԷնՍի-Ալֆա» (OVIO) հեռահաղորդակցական կազմակերպության կողմից սույն թվականի մայիսին գործարկված Հայաստանում ամենահզոր տվյալների մշակման կենտրոն: «ՋիԷնՍի-Ալֆա» ՓԲԸ գլխավոր տնօրեն Հայկ Ֆարամազյանի ուղեկցությամբ նախագահը շրջայց է կատարել կենտրոնում և ծանոթացել վերջինիս հնարավորություններին։ Տվյալների կենտրոնը կառուցված է միջազգային հեղինակավոր TIER III ստանդարտին համապատասխան, ինչը ենթադրում է տվյալների կրկնակի պատճենման ապահովում, սնուցում էլեկտրամատակարարման երկու ենթակայանից, հովացման պահուստային համակարգ, սպասարկման և թարմացումների ժամանակ տվյալների մշակման կենտրոնի անխափան աշխատանք և այլ առավելություններ։ Տվյալների մշակման կենտրոնի ներդրումային ծրագիրն արժանացել է ՀՀ Կառավարության հավանությանը և ներառվել ՀՀ Էկոնոմիկայի «Ենթակառուցվածքներ ներդրումների դիմաց» օժանդակության տրամադրման ծրագրում:
10:04 - 28 հունիսի, 2024
Քննարկվել են ՀՀ-ի և Մեքսիկայի գործարար շրջանակների միջև նոր կապերի ստեղծման ուղղությամբ անհրաժեշտ քայլեր ձեռնարկելու հարցեր

Քննարկվել են ՀՀ-ի և Մեքսիկայի գործարար շրջանակների միջև նոր կապերի ստեղծման ուղղությամբ անհրաժեշտ քայլեր ձեռնարկելու հարցեր

Հանրապետության նախագահ Վահագն Խաչատուրյանն ընդունել է Մեքսիկայի Սան Լուիս Պոտոսիի նահանգապետ Խոսե Ռիկարդո Գալյարդո Կառդոնային:Ողջունելով հյուրին նախագահը բարձր է գնահատել նահանգապետի այցը Հայաստան:«Նմանօրինակ փոխայցելությունները խթանում են մեր երկրների միջև բարեկամական կապերի և տարբեր մակարդակներում համագործակցության զարգացումը»,- նշել է Վահագն Խաչատուրյանը:Շնորհակալություն հայտնելով ընդունելության համար Խոսե Ռիկարդո Գալյարդո Կառդոնան շեշտել է, որ իր այցելության կարևոր նպատակներից է երկու երկրների միջև տնտեսական համագործակցության նոր հեռանկարների բացահայտումը, ինչպես նաև առկա համագործակցային ներուժի իրականացումը:Հանդիպման ընթացքում քննարկվել են Հայաստանի և Մեքսիկայի գործարար շրջանակների միջև նոր կապերի ստեղծման ուղղությամբ անհրաժեշտ քայլեր ձեռնարկելու, ինչպես նաև փոխադարձաբար ներդրումները խթանելու վերաբերյալ հարցեր:Զրույցի ընթացքում Հանրապետության նախագահը մանրամասներ է հայտնել տարածաշրջանային իրողությունների և առկա զարգացումների վերաբերյալ: Այս համատեքստում նախագահը շեշտել է, որ Հայաստանը շահագրգիռ է բոլոր հարևանների հետ հարաբերությունները տարածքային ամբողջականության, ինքնիշխանության, փոխադարձ հարգանքի և բարիդրացիության ելակետային սկզբունքների հիման վրա զարգացնելու հարցում:Հանդիպմանն անդրադարձ է կատարվել տնտեսության, բարձր տեխնոլոգիաների, մշակույթի, տուրիզմի և այլ ոլորտներում փոխգործակցության հետագա խթանման ուղիներին և հնարավորություններին:
19:42 - 24 հունիսի, 2024
Հայաստանը և Գերմանիան համագործակցության խորացման մեծ ներուժ ունեն. ՀՀ նախագահն ընդունել է դեսպան Ռիխտերին

Հայաստանը և Գերմանիան համագործակցության խորացման մեծ ներուժ ունեն. ՀՀ նախագահն ընդունել է դեսպան Ռիխտերին

Հանրապետության նախագահ Վահագն Խաչատուրյանը դիվանագիտական առաքելությունն ավարտելու կապակցությամբ ընդունել է Հայաստանում Գերմանիայի արտակարգ և լիազոր դեսպան Վիկտոր Ռիխտերին:Նախագահը շնորհակալություն է հայտնել դեսպանին պաշտոնավարման ընթացքում ծավալած գործունեության և հայ-գերմանական հարաբերությունների խորացմանն ուղղված ջանքերի համար: «Իհարկե, նաև հույս եմ հայտնում, որ պատեհ առիթի դեպքում կայցելեք Հայաստան, և մենք ուրախ կլինենք հանդիպել Ձեզ»,- ասել է նախագահ Խաչատուրյանը և հաջողություն է մաղթել Վիկտոր Ռիխտերին հետագա գործունեության մեջ:Հանրապետության նախագահը նշել է, որ Հայաստանը բարձր է գնահատում Գերմանիայի հետ դինամիկ զարգացող հարաբերությունները: «Վստահ եմ, որ կշարունակվի համագործակցության այս ձևը, որը մենք ընտրել ենք, որի հիմքում ընկած է փոխվստահությունը, ձեռք բերված պայմանավորվածությունների կյանքի կոչումը: Կցանկանայի ընդգծել, որ մենք համոզված ենք՝ Հայաստանի Հանրապետությունն առանց ժողովրդավարության և ժողովրդավարական արժեքների՝ զարգացում չի կարող ունենալ»,- նշել է նախագահը:Դեսպանը շնորհակալություն է հայտնել ընդունելության և ջերմ խոսքերի համար:«Հայաստանում դիվանագիտական ծառայության տարիները լի էին մեծ ու խոր տպավորություններով, որոնք ջերմորեն կհիշեմ: Ես նաև ականատեսը եղա մեր երկու երկրների միջև արդեն իսկ արդյունավետ ընթացող երկկողմ հարաբերությունների ավելի մեծ աճին»,- ասել է դեսպանը: Հանդիպմանը մտքեր են փոխանակվել ինչպես երկկողմ հարաբերությունների ներկա օրակարգի, այնպես էլ Եվրամիության շրջանակներում սերտ համագործակցության հարցերի շուրջ: Անդրադարձ է կատարվել տարածաշրջանային անվտանգության և կայուն խաղաղության հասնելուն ուղղված ջանքերին:Կողմերը նշել են, որ Հայաստանը և Գերմանիան համագործակցության խորացման մեծ ներուժ ունեն և փոխշահավետ ծրագրեր կարող են իրականացնել տնտեսության, ներդրումների և այլ ոլորտներում:Երկուստեք բարձր են գնահատվել երկու երկրների միջև առկա միջխորհրդարանական դիվանագիտության հետագա զարգացմանն ուղղված քայլերը:Զրույցի ընթացքում կարևորվել է Հայաստանում ժողովրդավարական բարեփոխումների շարունակականությունը, ինչի կապակցությամբ դեսպանն ընդգծել է Գերմանիայի պատրաստակամությունն ապագայում էլ ցուցաբերել անհրաժեշտ աջակցություն՝ Հայաստանում ժողովրդավարության ինստիտուտների կայացման գործընթացին:
18:18 - 20 հունիսի, 2024