Այսօր ոստիկանությունն առավել կոփված է, կարողունակ, պատասխանատու. Վահե Ղազարյանի շնորհավորանքը
ՀՀ ոստիկանության պետ, ոստիկանության գեներալ-մայոր Վահե Ղազարյանը շնորհավորական ուղերձ է հղել Ոստիկանության օրվա առթիվ:
«ՀՀ ոստիկանության կոլեգիայի անունից և անձամբ շնորհավորում եմ ողջ անձնակազմին մեր մասնագիտական տոնի՝ Ոստիկանության օրվա առթիվ:
Ոստիկանությունը պետության հիմնասյուներից է և ամենօրյա ծառայությամբ է հաստատում հավատարմությունը իրավակարգի պահպանման և քաղաքացու իրավունքների պաշտպանության իր առաքելությանը:
Մեր հարյուրավոր ծառայակիցներ անձնազոհությամբ են հավաստել այդ հավատարմությունը, և մենք միշտ պիտի արժանի լինենք նրանց սխրանքին, ովքեր պետության ու քաղաքացու պաշտպանության զոհասեղանին դրեցին իրենց կյանքը:
Հավերժ փառք և խորին խոնարհում ծառայողական պարտականությունները կատարելիս զոհված մեր գործընկերների անմար հիշատակին:
Ոստիկանությունը բազմիցս է առերեսվել բարդագույն իրավիճակների, ունեցել ծանր կորուստներ, բայց միշտ կարողացել է դիմակայել մարտահրավերներին և բարձրանալ պրոֆեսիոնալիզմի նոր մակարդակի: Եվ այսօր էլ վերջին տարիների ծանրագույն իրադարձությունների միջով անցած ոստիկանությունն առավել կոփված է, կարողունակ, պատասխանատու:
Շնորհավորում ու շնորհակալությունս եմ հայտնում ոստիկանական ընտանիքներին՝ մեր ծառայակիցներին ամուր թիկունք լինելու համար:
Խորին խոնարհումս ու երախտագիտությունս մեր զոհված զինակիցների ծնողներին՝ այդպիսի զավակներ դաստիարակելու համար:
Շնորհավորում եմ մեր վետերաններին, որ ոստիկանական բազում սերունդներ են կրթել և այսօր էլ շարքում են:
Շնորհավորում եմ բոլորին ու բոլորիս և մաղթում ուժ, կամք, զորություն՝ մեր ծառայությունն անմնացորդ կատարելու գործում:
Բարի ծառայություն բոլորին»,- ասված է ուղերձում:
10:27 - 16 ապրիլի, 2022
