Լիբանան

Հայաստանը ողջունում է Լիբանանի և Իսրայելի միջև հրադադարի համաձայնությունը

Հայաստանի Հանրապետության արտաքին գործերի նախարարությունը հաղորդագրություն է տարածել՝ ողջունելով Լիբանանի և Իսրայելի միջև ձեռք բերված հրադադարի համաձայնագիրը։ «Հայաստանը ողջունում է Լիբանանի և Իսրայելի միջև վերջերս ձեռք բերված հրադադարի համաձայնագիրը և հույս է հայտնում, որ այս զինադադարը՝ որպես առանցքային քայլ, կծառայի հումանիտար խնդիրների լուծման ու ողջ տարածաշրջանում խաղաղության հաստատմանը»,-նշված է ՀՀ ԱԳ նախարարության՝ X-ի միկրոբլոգում կատարված գրառման մեջ։

19:19 - 27 նոյեմբերի, 2024

ՄԱԿ-ի գլխավոր քարտուղարը ողջունել է Իսրայելի և Լիբանանի միջև հրադադարի համաձայնագիր |azatutyun.am|

azatutyun.am: ՄԱԿ-ի գլխավոր քարտուղար Անտոնիո Գուտերեշը ողջունել է Իսրայելի և Լիբանանի միջև հրադադարի մասին հայտարարությունը։ «Հուսով եմ, որ այս համաձայնագիրը վերջ կդնի բռնությանը, տառապանքին և ավերածություններին, որոնք ապրում են երկու երկրները», - X-ում գրել է Գուտերեշը։ Երեկ ուշ երեկոյան ԱՄՆ նախագահ Ջո Բայդենը հայտարարեց, որ Իսրայելն ու Լիբանանը համաձայնել են ավարտել Իսրայելի և «Հեզբոլա»-ի «կործանարար հակամարտությունը»։ «Սա նախատեսում է ռազմական գործողությունների մշտական դադարեցում», - ասել է Բայդենը։ Այսօր առավոտյան Reuters-ը հաղորդեց, որ հրադադարի մասին համաձայնագիրն ուժի մեջ է մտել նոյեմբերի 27-ին գրինվիչի ժամանակով ժամը 2-ին։ 2023-ի հոկտեմբերից Գազայում սկսված պատերազմին զուգահեռ «Հեզբոլա»-ի հետ հակամարտությունը նույնպես սրվեց, միմյանց ուղղությամբ հարվածները այս ամբողջ ընթացքում չէին դադարում։ Երկու ամիս առաջ Իսրայելը Լիբանանում զանգվածային օդային հարձակում սկսեց, պարբերաբար թիրախավորում էր մայրաքաղաք Բեյրութը, սրան էլ հաջորդեց սահմանամերձ հատվածներում Իսրյալելի ցամաքային գործողությունը։ Այս ընթացքում Լիբանանում ավելի քան երեք հազար մարդ սպանվեց, նրանցից շատերը խաղաղ բնակիչներ էին։

10:27 - 27 նոյեմբերի, 2024

Լիբանանի և Իսրայելի միջև հրադադարն ուժի մեջ կմտնի չորեքշաբթի |1lurer.am|

1lurer.am: Իսրայելը համաձայնել է Լիբանանի հետ կրակի դադարեցմանը, հայտարարել է վարչապետ Բենիամին Նեթանյահուն։ Որոշումն ընդունվել է նախարարների կաբինետի նիստի արդյունքում։ Հրադադարն ուժի մեջ կմտնի նոյեմբերի 27-ին՝ ժամը 10:00-ին: Նեթանյահուն նշել է, որ կառավարության հաստատմանը կներկայացնի համաձայնության կնքման ծրագիր։ Իսրայելի վարչապետը հրադադարի երեք պատճառ է նշել՝ իրանական սպառնալիքը, ՑԱՀԱԼ-ի զինամթերքի թարմացումը և Գազայում իրավիճակը։ Իսրայելի նախարարների կաբինետի կողմից ընդունված համաձայնությունը պահանջում է Հարավային Լիբանանից իսրայելական զորքերի դուրսբերում և այդ հատվածում Լիբանանի բանակի տեղակայում։ Իր հերթին «Հըզբոլլահ»-ը կդադարեցնի զինված ներկայությունը Լիթանի գետից հարավ ընկած հատվածում։ Նշվում է, որ դրա համար նախատեսվում է 60 օր: ԱՄՆ պետքարտուղար Էնթոնի Բլինքենը հայտարարել է, որ համաձայնագիրը կլուծի Իսրայելի ու «Հըզբոլլահ»-ի միջև տասնամյակներ ձգվող հակամարտությունը։ «Այս համաձայնությունը կդառնա լուծումը մի խնդրի, որ տանջում էր մերձավորարևելյան տարածաշրջանը մի քանի տասնամյակ շարունակ»,- ասել է Բլինքենը։ Նա նշել է, որ իրենք մի քանի ամիս շարունակ աշխատել են այս համաձայնագրի շուրջ, որը ենթադրում է ՄԱԿ ԱԽ 1701 բանաձևի պահպանում:

09:14 - 27 նոյեմբերի, 2024

Իսրայելի հզոր ավիահարվածը ցնցել է Բեյրութի կենտրոնը. կան զոհեր |tert.am|

tert.am: Իսրայելական ավիահարվածի հետևանքով Բեյրութում առնվազն 4 մարդ է զոհվել: Այս մասին հայտնում է Reuters–ը՝ հղում կատարելով առողջապահության նախարարությունը: Լիբանանի ազգային լրատվական գործակալությունը հաղորդել է, որ հարվածների հետևանքով ավերվել է 8–հարկանի շենք, կան զոհեր և վիրավորներ: Reuters–ի ականատեսներն ասել են, որ պայթյունները ցնցել են մայրաքաղաքը առավոտյան ժամը 04:00-ի սահմաններում: Անվտանգության ոլորտի աղբյուրները հայտնել են, որ առնվազն չորս ռումբ է արձակվել:Լուսանկարը՝ AP լրատվական գործակալության։

12:39 - 23 նոյեմբերի, 2024

Իսրայելի բանակը զանգվածային ավիահարվածներ է հասցրել Բեյրութին |1lurer.am|

1lurer.am: Իսրայելի բանակը մի շարք զանգվածային ավիահարվածներ է հասցրել Լիբանանի մայրաքաղաք Բեյրութի հարավում գտնվող Դահիա շրջանի ուղղությամբ: Լրատվամիջոցների տվյալով՝ ավիահարվածների թիրախ է դարձել Հադես թաղամասը: ՑԱՀԱԼ-ի մամուլի քարտուղար Ավիհայի Ադրային ավելի վաղ քարտեզ էր հրապարակել, որի վրա կարմիրով նշված շենքերի բնակիչներին հորդորել է տարհանվել՝ հայտարարելով, որ նշված շենքերում տեղակայված են «Հըզբոլլահ» շարժման օբյեկտները: Լրատվամիջոցները նաև հայտնում են, որ Իսրայելի ռազմաօդային ուժերի ինքնաթիռները հրթիռային հարվածով ամբողջությամբ ոչնչացրել են Բեյրութի հարավային արվարձանի Շիյահ շրջանում գտնվող բնակելի բազմահարկ շենքը: Ավերված շենքը տեղակայված էր հարավային արվարձանի սահմանին, որտեղ հիմնականում ապրում է շիա բնակչությունը։

20:34 - 22 նոյեմբերի, 2024

Խիստ անհանգստացած ենք Լիբանանում ահագնացող անվտանգային իրավիճակով. Փաշինյանը՝ Լիբանանի վարչապետին

Վարչապետ Նիկոլ Փաշինյանը շնորհավորական ուղերձ է հղել Լիբանանի վարչապետ Նաջիբ Միկաթիին Անկախության օրվա առթիվ, որում մասնավորապես, ասված է. «Ջերմորեն շնորհավորում եմ Ձեզ և Լիբանանի բարեկամ ժողովրդին անկախության օրվա առթիվ:Հայաստանի և Լիբանանի հարաբերությունների հիմքում ընկած են երկու ժողովուրդների դարավոր բարեկամությունը, փոխշահավետ համագործակցությունը և փոխադարձ հարգանքը, ինչը լավագույնս բնորոշում է Հայաստանի և Լիբանանի քաղաքական հարաբերությունների ներկայիս մակարդակը: Խիստ մտահոգված և անհանգստացած ենք Մերձավոր Արևելքում, մասնավորապես՝ Լիբանանում, ահագնացող անվտանգային իրավիճակով և անթույլատրելի ենք համարում խաղաղ բնակչության և քաղաքացիական ենթակառուցվածքների թիրախավորումը: Հայաստանի Հանրապետությունն աջակցում է Լիբանանի տարածքային ամբողջականությանը, ինքնիշխանությանն ու սահմանների անձեռնմխելիությանը և գործուն մասնակցությամբ՝ հայկական խաղաղապահ զորախմբի միջոցով, իր ներդրումն է ունենում Լիբանանի անվտանգության ամրապնդման գործում:

10:33 - 22 նոյեմբերի, 2024

«Հեզբոլլահ»-ը հայտարարել է Իսրայելի ռազմաբազաներին հարվածելու մասին |armenpress.am|

armenpress.am: Լիբանանյան «Հեզբոլլահ» շարժման մարտիկները նոյեմբերի 21-ին շուրջ 20 ռազմական գործողություններ են իրականացրել Իսրայելի բանակի դեմ՝ հրթիռակոծելով Աշդոդում և Հայֆայում գտնվող ռազմակայանները: «Արմենպրես»-ի հաղորդմամբ՝ այդ մասին նշված է շարժման տարածած հաղորդագրությունում: Ըստ տեղեկությունների՝ սահմանային Թել Հարֆա բնակավայրում հարձակման են ենթարկվել նաև իսրայելական մեկ դիվերսիոն և մի քանի տարհանման խմբեր՝ զրահատեխնիկայով հանդերձ: Նշվում է, որ իսրայելական կողմն ընդունել է չորս զինվորականների զոհվելու և վեց մարտիկի վիրավորվելու փաստը: Իսրայելցի զինվորականների ևս մի քանի խմբեր հարձակման են ենթարկվել Իսրայելի տարածքում՝ Միտուլա բնակավայրի մոտ: Հաղորդագրության համաձայն՝ «Հեզբոլլահ»-ի մարտիկներն առաջին անգամ հրթիռակոծել են Լիբանանի հետ սահմանից 150 կմ հեռավորության վրա՝ Աշդոդ քաղաքից արևելք գտնվող իսրայելական Հաթցոր ավիաբազան: Նաև հրթիռներով և անօդաչու թռչող սարքերով գրոհի են ենթարկվել Ակկո քաղաքում գտնվող Շարագա ռազմաբազան, Հոլանի բարձունքներում տեղակայված վաղ նախազգուշացման կենտրոնը և Իսրայելի ռազմածովային ուժերի Հայֆայի բազան, որը գտնվում է Լիբանանի հետ սահմանից 35 կմ հեռու: Իսրայելական ինքնաթիռներն էլ իրենց հերթին հարվածների չորս շարք է հասցրել Բեյրութի հարավային արվարձաններին, ինչպես նաև արևելյան Լիբանանի Բեքաայի հովտի մի քանի բնակավայրերին:

22:24 - 21 նոյեմբերի, 2024

Իսրայելը հարվածներ է հասցրել Բեյրութի հարավային արվարձանին |armenpress.am|

armenpress.am: Իսրայելի պաշտպանության բանակը գիշերը երեք ավիահարված է հասցրել Բեյրութի հարավային արվարձանին՝ ավերելով մի քանի շենք։ Այդ մասին հաղորդում է Al Jazeera-ն՝ վկայակոչելով Լիբանանի պետական լրատվական գործակալությունը։ Հարվածները հասցվել են լուսաբացից առաջ: Զոհերի և վիրավորների մասին տեղեկություններ առայժմ չեն հաղորդվում։ Լիբանանի պետական գործակալությունը նաև հայտնել է, որ նոյեմբերի 20-ի ուշ երեկոյան իսրայելական հարվածներից Լիբանանի Մաարկեհ քաղաքում զոհվել է 5 մարդ, 23-ը՝ վիրավորվել։ Իսկ Տյուրոս քաղաքում զոհվել է 9 մարդ, վիրավորվել՝ 65-ը։ 2023 թ. հոկտեմբերի 7-ին Իսրայելի վրա պաղեստինյան ՀԱՄԱՍ-ի հարձակմանը հաջորդած ռազմական գործողություններին զուգահեռ լիբանանյան «Հեզբոլլահ»-ը և Իսրայելը պարբերաբար փոխադարձ հարվածներ են իրականացնում։ 2024 թ. սեպտեմբերի 23-ին Իսրայելը «Հեզբոլլահ»-ի դեմ սկսել է «Հյուսիսի նետեր» գործողությունը Լիբանանի հարավում։ Մեկ տարվա ընթացքում Լիբանանում իսրայելական հարվածներից զոհվել է ավելի քան 3500 մարդ, վիրավորվել՝ ավելի քան 15 000 մարդ։ Հարյուր հազարավոր մարդիկ տեղահանվել են։ Իսրայելի հյուսիսից ևս տասնյակ հազարավոր մարդիկ են տեղահանվել «Հեզբոլլահ»-ի գնդակոծությունների պատճառով։

11:52 - 21 նոյեմբերի, 2024

Արթուր Դալիբալթյանը կնշանակվի Լիբանանում ՀՀ ռազմական կցորդ

ՀՀ վարչապետը որոշում է ստորագրել, համաձայն որի՝ Արթուր Դալիբալթյանը կնշանակվի Լիբանանի Հանրապետությունում Հայաստանի Հանրապետության ռազմական կցորդ: «Հիմք ընդունելով «Դիվանագիտական ծառայության մասին» Հայաստանի Հանրապետության օրենքի 10-րդ հոդվածի 9-րդ մասը` Արթուր Դալիբալթյանին 2024 թվականի նոյեմբերի 25-ից նշանակել Լիբանանի Հանրապետությունում Հայաստանի Հանրապետության ռազմական կցորդ՝ 3 տարի ժամկետով (նստավայրը` Բեյրութ)»,- ասված է որոշման մեջ:

12:11 - 20 նոյեմբերի, 2024

Բեյրութում իսրայելական ռմբակոծության հետևանքով զոհվել է «Հեզբոլլահի» մամուլի խոսնակը |hy.armradio.am|

hy.armradio.am: «Հըզբոլլահի» մամուլի խոսնակ Մուհամմեդ Աֆիֆը սպանվել է Բեյրութի կենտրոնում իսրայելական հարձակման հետևանքով։ Լուրը հաստատել է լիբանանյան զինյալ խմբավորումը, հայտնում է BBC-ն։ Կիրակի օրը հարված է հասցվել «Բաաս» կուսակցության շտաբին, որը գտնվում է խիտ բնակեցված Ռաս ալ Նաբա թաղամասում, հայտնում է Լիբանանի պետական ազգային լրատվական գործակալությունը: Ըստ երկրի առողջապահության նախարարության՝ չորս մարդ է զոհվել, զոհերի անունները չեն նշվել:

13:34 - 18 նոյեմբերի, 2024

Իսրայելը հարվածներ է հասցրել Դամասկոսի կենտրոնին |factor.am|

factor.am: Իսրայելական ռազմական ավիացիան, ըստ նախնական տվյալների, հարվածներ է հասցրել Սիրիայի մայրաքաղաք Դամասկոսի կենտրոնական Մազզեի շրջանին, հաղորդում է սիրիական SANA գործակալությունը։ «Նախնական տվյալներով՝ Մազզեի շրջանում պայթյունների պատճառը եղել է թշնամական Իսրայելի օդից հարձակումը», – նշվում է հրապարակման մեջ։ Գործակալության տվյալներով՝ իսրայելական օդուժի հերթական հարվածն ուղղված է եղել բնակելի շենքին։

19:47 - 14 նոյեմբերի, 2024

Հեզբոլլահը հայտարարել է Իսրայելի ռազմաօդային ուժերի բազան գրոհելու մասին |armenpress.am|

armenpress.am: «Հեզբոլլահի» կործանիչները մի շարք հրթիռներ են արձակել Թել Ավիվի հարավում գտնվող Իսրայելի ռազմաօդային ուժերի ռազմակայանի ուղղությամբ։ Ինչպես տեղեկացնում է «ՌԻԱ Նովոստի»-ն, այդ մասին հայտնել է շարժման մամուլի ծառայությունը: Ավելի վաղ «Հեզբոլլահի» մամուլի ծառայությունը հայտարարել էր Ակրե քաղաքի հյուսիսում գտնվող Շարագա բազայի և Նևե Զիվ շրջանում իսրայելական բանակի հրետանային դիրքերի ուղղությամբ հրթիռային հարձակման մասին։

21:55 - 12 նոյեմբերի, 2024

Իսրայելը շարունակում է հարձակումները Գազայի և «Հեզբոլլահ»-ի ուղղությամբ |azatutyun.am|

azatutyun.am: Իսրայելը վերսկսել է հարձակումները Գազայի հատվածում և Լիբանանում գտնվող թիրախների վրա, հայտնել է Պաշտպանության բանակը՝ հավելելով, որ «սպանվել են տասնյակ ահաբեկիչներ»։ Գազայի հյուսիսում գտնվող Ջաբալիա քաղաքում իսրայելական զորքերը «մեկուսացրել են ահաբեկիչների բազմաթիվ ենթակառուցվածքներ, ինչպես նաև զենքի պահեստ այդ տարածքում», ասվում է Տելեգրամում հրապարակված հայտարարության մեջ: Իսրայելական զորքերը նաև շարունակում են «ճշգրիտ, հետախուզության վրա հիմնված օպերատիվ գործողություններ» իրականացնել Գազայի հատվածի հարավում գտնվող Ռաֆահ շրջանում: Լիբանանում, ասվում է հայտարարության մեջ, իսրայելական օդուժը վերջին օրերին հարձակվել և սպանել է «Հեզբոլլահ»-ի տասնյակ գրոհայինների, որոնց Միացյալ Նահանգները համարում է ահաբեկչական խմբավորում, թեև ԵՄ-ն սև ցուցակում է ներառել միայն նրա զինված թևը:

14:48 - 10 նոյեմբերի, 2024

Իսրայելն օդային հարվածներ է հասցրել Բեյրութի հարավային արվարձաններին |1lurer.am|

1lurer.am: Լիբանանի պետական լրատվամիջոցները հաղորդել են Բեյրութի հարավային արվարձաններին օդային հարվածների մասին այն բանից հետո, երբ Իսրայելը տարհանման կոչ էր հրապարակել: Reuters գործակալության տվյալով՝ հարվածների հետևանքով ավերվել են շենքեր։ Նշվում է, որ տեղի բնակիչների մեծ մասը վերջին շաբաթների ընթացքում հեռացել էր: Ավելի վաղ հայտնի էր դարձել, որ առնվազն 3 մարդ զոհվել է, 30-ը՝ վիրավորվել Լիբանանի հարավում գտնվող Տյուրոս նավահանգստային քաղաքին իսրայելական հարվածի հետևանքով: Այդ անգամ իսրայելական բանակը չի զգուշացրել տարհանման անհրաժեշտության մասին՝ հայտարարելով, որ իր թիրախը եղել են «Հըզբոլլահ» շարժման հետախուզական և հրամանատարական համալիրները: Բացի դրանից՝ ուրբաթ Իսրայելը հայտարարել է Գազայի հատված նոր հումանիտար միջանցքի առաջիկա բացման մասին՝ չհստակեցնելով, թե երբ դա տեղի կունենա:

16:01 - 09 նոյեմբերի, 2024

Իսրայելը հարվածներ է հասցրել Լիբանանի հարավում գտնվող քաղաքի կենտրոնին |armenpress.am|

armenpress.am: Իսրայելի ուժերը հարվածներ են հասցրել Լիբանանի հարավում գտնվող Տյուր քաղաքի կենտրոնին՝ ավերելով մի քանի շինություններ: «Արմենպրես»-ի փոխանցմամբ՝ այս մասին «ՌԻԱ Նովոստի»–ին հայտնել են ականատեսները։ «Իսրայելական ինքնաթիռները մի քանի շատ ուժեղ հարվածներ են հասցրել Տյուր քաղաքի կենտրոնին՝ Ջումբլաթ թաղամասում», - ասել են «ՌԻԱ Նովոստի»–ին: Ականատեսների խոսքով՝ այդ տարածքում մեծ թվով խաղաղ բնակիչներ են ապրում։

22:04 - 08 նոյեմբերի, 2024

Իսրայելի հարվածների հետևանքով Լիբանանում առնվազն 30 մարդ է զոհվել

Իսրայելական բանակը հարվածներ է հասցրել Լիբանանի Բաալբեկ նահանգի ուղղությամբ․ առնվազն 20 արկ է արձակվել։ Շրջանի նահանգապետ Բաչիր Խոդրն ասել է, որ առնվազն 30 մարդ է զոհվել և 35-ը վիրավորվել հարձակման հետևանքով։ Իսրայելի ռազմաօդային ուժերի կործանիչները գրոհել են նաև Լիբանանի մայրաքաղաքի հարավային շրջանները, որոնք գտնվում են Ռաֆիկ Հարիրիի միջազգային օդանավակայանի մոտ։ Նշվում է, որ Բեյրութի օդանավակայանը շարունակում է գործել։ Իսրայելի պաշտպանության բանակն էլ իր հերթին հաղորդում է, որ երկրի ուղղությամբ՝ Լիբանանի տարածքից արձակվել է 50 արկ։ «Վերին Գալիլեայի շրջանում որոշ ժամանակ առաջ հնչած օդային տագնապի ազդանշանից հետո արձանագրվել է Լիբանանից արձակված մոտ 50 արկի արձակում: Արկերի մի մասը որսացել է ՀՕՊ-ը, մյուսներն ընկել են բաց տարածքում»-ասվում է հաղորդագրության մեջ։

20:51 - 06 նոյեմբերի, 2024