Արարատ Միրզոյան

ՀՀ արտաքին գործերի նախարար։ Այս պաշտոնին նա նշանակվել է 2021թ․ օգոստոսի 19-ին։

7-րդ գումարման Ազգային ժողովի նախագահն է։ «Քաղաքացիական պայմանագիր» կուսակցության վարչության անդամ։ Ծնվել է 1979թ․ նոյեմբերի 23-ին։ Մասնագիտությամբ պատմաբան է եւ պետական կառավարման, տեղական ինքնակառավարման մասնագետ։

2003-2005 թվականներին աշխատել է ՀՀ ԳԱԱ Հայոց ցեղասպանության թանգարան-ինստիտուտում՝ որպես կրտսեր գիտաշխատող: 2005-2007 թվականներին աշխատել է Հայաստանի ազգային արխիվում՝ որպես հասարակական-քաղաքական փաստաթղթերի բաժնի գլխավոր արխիվագետ։ 2007-2010 թվականներին աշխատել է «Էյչ-Էս-Բի-ՍԻ Բանկ Հայաստան» ՓԲԸ-ում: 2011-2012 թվականներին որպես վերլուծաբան՝ աշխատել է «Ռեգնում» միջազգային լրատվական գործակալությունում: 2012-2013 թվականներին աշխատել է Ընտրական համակարգերի միջազգային հիմնադրամում (IFES)՝ որպես ընտրողների իրազեկման ծրագրի համակարգող: 2012 թվականի հոկտեմբերից 2013 թվականի փետրվարն ընկած ժամանակահատվածում դասավանդել է ԵՊՀ-ում: 2013-2015 թվականներին եղել է «Հայաստանի զարգացման նախաձեռնություններ» (IDEA) հիմնադրամի «Ավրորա մրցանակ եւ 100 կյանք» նախաձեռնության հետազոտական խմբի ղեկավարը։ 2014-2017 թվականներին աշխատել է որպես Բազմակուսակցական ժողովրդավարության նիդեռլանդական ինստիտուտի (NIMD) քաղաքական կուսակցությունների եւ ռազմավարական պլանավորման փորձագետ։

Արարատ Միրզոյանը «Քաղաքացիական պայմանագիր» կուսակցության հիմնադիր անդամ է: 2016 թվականից հանդիսանում է «Քաղաքացիական պայմանագիր» կուսակցության վարչության անդամ: 2017 թվականի ապրիլի 2-ին «Ելք» կուսակցությունների դաշինքի թիվ 3 ընտրատարածքի տարածքային ընտրական ցուցակով ընտրվել է ՀՀ 6-րդ գումարման Ազգային ժողովի պատգամավոր: 2018 թվականին եղել է «Իմ քայլը» շարժումը նախաձեռնող խմբի անդամ: 2018 թվականի մայիսի 11-ին նշանակվել է ՀՀ առաջին փոխվարչապետ: 2018 թվականի դեկտեմբերի 9-ին կայացած արտահերթ խորհրդարանական ընտրություններում Երեւան քաղաքի Մալաթիա-Սեբաստիա եւ Շենգավիթ վարչական շրջաններն ընդգրկող թիվ 3 ընտրատարածքում լինելով «Իմ քայլը» դաշինքի ռեյտինգային թեկնածուներից մեկը՝ ստացել է 25 550 ձայն: 2019 թվականի հունվարի 10-ին ստացել է պատգամավորական մանդատը։

2019 թվականի հունվարի 14-ին տեղի ունեցած ՀՀ 7-րդ գումարման Ազգային ժողովի առաջին նիստի ժամանակ ընտրվել է ԱԺ նախագահ՝ 131 կողմ ձայնով:

Գլոբալ քաղաքականությունը շատ նման է մեգապոլիսի բազմակողմանի ավտոմոբիլային երթեւեկությանը. Արարատ Միրզոյան

ՀՀ ԱԺ նախագահ Արարատ Միրզոյանի ելույթը Եվրասիայի երկրների խորհրդարանների խոսնակների չորրորդ համաժողովում․ Հարգելի պարոն Վոլոդին, հարգելի պարոն Մուն Հի Սան, հարգելի պարոն Նիգմատուլին, հարգելի գործընկերներ, տիկնայք եւ պարոնայք, ինձ համար մեծ պատիվ է մասնակցել Եվրասիական երկրների խորհրդարանների խոսնակների 4-րդ համաժողովին: Նախ եւ առաջ ուզում եմ շնորհակալություն հայտնել Ռուսաստանի եւ Կորեայի խորհրդարանների ղեկավարներին՝ համաժողովը նախաձեռնելու համար, ինչպես նաեւ հատուկ շնորհակալություն հայտնել պարոն Նիգմատուլինին, ղազախական կողմին՝ ջերմ ընդունելության եւ ավանդական հյուրընկալության, ինչպես նաեւ միջոցառման հիանալի կազմակերպման համար: Հարգելի գործընկերներ, այս ձեւաչափը եզակի է բազմաթիվ առումներով. նախ` աշխարհագրական ծածկույթով: Այս հարթակը մեզ հնարավորություն է տալիս քննարկելու ամենամեծ մայրցամաքի օրենսդիր մարմինների միջեւ համագործակցության հեռանկարները, ինչն իր հերթին նպաստում է ինտեգրացիոն նախագծերի հաջող զարգացմանը, առեւտրատնտեսական կապերի ընդլայնմանը: Պատմությունն ապացուցում է, որ սերտ համագործակցությունն ու մարդասիրական հարաբերությունները մարդկության համար խաղաղության եւ առաջընթացի հիմքն են: Գաղտնիք չեմ բացահայտի, եթե նշեմ այն գլոբալ մարտահրավերները, որոնք առկա են ինչպես ամբողջ աշխարհում, այնպես էլ եվրասիական տարածքում: Եվ այս խնդիրների լուծման բանալին շատ պարզ է եւ, միեւնույն ժամանակ, շատ բարդ՝ երկխոսություն, վստահություն եւ գործընկերություն: Հենց այս բանաձեւն է այն խնդիրները լուծելու ճանապարհը, որով մենք, հարգելի գործընկերներ, բախվում ենք բոլորս միասին եւ, բնականաբար, միայն համատեղ ջանքերով կկարողանանք լուծել այդ խնդիրները: Գլոբալ քաղաքականությունը շատ նման է մեգապոլիսի բազմակողմանի ավտոմոբիլային երթեւեկությանը, եւ միայն համակարգված գործողությունները թույլ կտան վարորդներին խուսափելու դժբախտ պատահարներից եւ հասնելու իրենց նպատակակետին՝ արտակարգ իրավիճակներ չստեղծելով ինչպես իրենց ուղեւորների, այնպես էլ այս երթեւեկության մյուս մասնակիցների համար: Չեմ բացահայտի մեկ այլ գաղտնիք, եթե ասեմ, որ այս որոշումը արդիական էր բոլոր ժամանակներում: Եվ պատմության մեջ դուք կարող եք գտնել երկխոսության, վստահության եւ գործընկերության նախագծեր, որոնք ժամանակին ապահովում էին ողջ տարածաշրջանի բարգավաճումը: Որպես ամենավառ օրինակներից մեկը՝ կցանկանայի նշել Մեծ Մետաքսի ճանապարհը: Մեծ Մետաքսի ճանապարհը, լինելով ողջ մարդկության պատմամշակութային ժառանգությունը, կարեւոր դեր ունեցավ Արեւմուտքի եւ Արեւելքի երկրների եւ ժողովուրդների միջեւ տնտեսական կապերի զարգացման գործում: Հայկական լեռնաշխարհում հատվում էին առեւտրային մայրուղիները, հետեւաբար պատմականորեն Հայաստանը դարեր շարունակ Մետաքսի ճանապարհի ամենակարեւոր տարանցիկ կետն էր՝ միացնելով Եվրոպան եւ Ասիան: Այսօր անհրաժեշտ է բարձրացնել ինտեգրացիոն գործընթացների արդյունավետությունը, խթանել կապերի զարգացումը: Որպես Եվրասիական տնտեսական միության նախագահող երկիր՝ Հայաստանը հատուկ կարեւորություն է տալիս արտաքին տնտեսական հարաբերությունների ընդլայնմանն ինչպես կազմակերպության անդամների, այնպես էլ այլ գործընկերների միջեւ: Մեր առաջնահերթությունները ներառում են այնպիսի ոլորտներ, ինչպիսիք են էներգետիկ արդյունաբերությունը, եվրասիական տրանսպորտային ենթակառուցվածքների տարանջատումը, տնտեսության բարձր տեխնոլոգիաների բնագավառի զարգացումը եւ միության թվային օրակարգի լիարժեք իրականացումը, ֆինանսական հատվածի աճի եւ կայունության ապահովումը: Հայաստանը ջանքեր է գործադրում Սինգապուրի, Սերբիայի, Եգիպտոսի եւ Հնդկաստանի հետ բանակցություններն արդյունավետ ավարտելու ուղղությամբ՝ համագործակցության առավել փոխշահավետ տնտեսական հարթակներ ձեռք բերելու համար: Իրանի եւ Չինաստանի հետ համաձայնագրերն արդեն վավերացվել են Հայաստանի Ազգային ժողովի կողմից: Հարգելի գործընկերներ, գլոբալիզացիայի դարաշրջանում անթույլատրելի են բաժանարար գծերը եւ փակ սահմանների առկայությունը: Փակ սահմանները, շրջափակումները ամբողջ Եվրասիական տարածաշրջանի խնդիրներն են, քանի որ բաժանարար գծերի պայմաններում անհնար է լիարժեք տնտեսական զարգացում, քաղաքական, մշակութային երկխոսություն: Միջոցների ազատ տեղաշարժը, անխափան շփումները ժամանակակից տնտեսական եւ հումանիտար հարաբերությունների զարգացման ամենակարեւոր պայմաններն են: Եվրասիական տարածաշրջանի կայուն զարգացումը հնարավոր է միայն անվտանգ միջավայրում: Հակամարտությունների առկայությունը Հարավային Կովկասում խոչընդոտում է տարածաշրջանի զարգացմանը: Հայաստանը վերահաստատում է իր նվիրվածությունը Լեռնային Ղարաբաղի հակամարտության բացառապես խաղաղ կարգավորմանը՝ ԵԱՀԿ Մինսկի խմբի համանախագահության ձեւաչափով: Այս հակամարտությունը ռազմական ճանապարհով լուծելու ցանկացած փորձ ոտնձգություն է մարդու իրավունքների, ժողովրդավարության եւ խաղաղության համար: Մեզ համար գերակա նշանակություն ունեն Լեռնային Ղարաբաղի կարգավիճակի եւ անվտանգության հարցը, ժողովրդի անվտանգ եւ ազատ գոյության անհերքելի իրավունքի հարգումը: Գործընկերներ, այսօր մենք ներկա ենք բաց քննարկման հարթակում՝ հավասար երկխոսության համար: Մենք ցանկանում ենք հարստացնել մեր փորձը եւ գտնել փոխգործակցության առավել արդյունավետ ուղիներ եւ ձեւեր: Համոզված եմ, որ այս իրադարձությունը կնպաստի բարեկամության ամրապնդմանը` բացահայտելով փոխշահավետ համագործակցության նոր ուղիներ՝ հանուն Եվրասիայի ժողովուրդների բարօրության:

13:17 - 24 սեպտեմբերի, 2019

Հայաստանում փոփոխության է ենթարկվում արտաքին քաղաքականություն վարելու ոճը. Արարատ Միրզոյան

ՀՀ ԱԺ նախագահ Արարատ Միրզոյանը ՀՀ ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի մասնակիցների հետ հանդիպման ժամանակ հանդես է եկել ելույթով: «Սիրելի՛ գործընկերներ, ուրախ ենք հյուրընկալել ԱԳՆ կենտրոնական ապարատի եւ օտարերկրյա պետություններում ՀՀ դիվանագիտական ծառայության մարմինների ղեկավարներին Ազգային ժողովի հարկի տակ: Այս հավաքն առաջինն է, որն անց է կացվում նախորդ տարի Հայաստանում տեղի ունեցած ժողովրդավարական հեղափոխությունից հետո, երբ մեր պետության քաղաքացիները ոտքի կանգնեցին կյանքի կոչելու մեր հավաքական իղձերը՝ ապրելու ինքնիշխան, ժողովրդավարական, մարդու եւ քաղաքացու իրավունքներն ու ազատությունները պաշտպանող երկրում: Եւ սա այն պատգամն է, որ բոլորս՝ յուրաքանչյուր հանրային ծառայող, պարտավոր ենք կյանքի կոչել: Սա անկախացումից ի վեր Հայաստանի Հանրապետության զարգացման կարեւորագույն հանգրվաններից մեկն է: Այն պիտի առիթ դառնա, որպեսզի վերանայվեն, վերաիմաստավորվեն եւ արդյունքում վերահաստատվեն կամ անհրաժեշտության դեպքում էականորեն փոփոխվեն պետական ոլորտային քաղաքականությունները, այդ թվում արտաքին քաղաքականությունը: Այս ուղղությամբ, ինչպես եւ հայտարարվել էր, չեն եղել եւ չեն նախատեսվում աշխարհաքաղաքական ուղենիշների փոփոխություններ, բայց փոփոխության է ենթարկվում արտաքին քաղաքականություն վարելու ոճը թերեւս, առնվազն որովհետեւ եթե դեսպանները, օրինակ, մի յուրօրինակ առաջնագծում առանց զենքի պաշտպանում են երկիրը, նրանք չեն կարող նույն փաստարկային բազայով կամ նույն դիրքերից հանդես գալով կամ նույն մեթոդով ու բառակազմով պաշտպանեն այն, ինչն էականորեն փոխվել է: Իսկ Հայաստանն, արդեն ասացի, էականորեն փոխվել է: Փոխվել է, դեռեւս գուցե ոչ բոլոր ուղղություններով վերջնական արդյունքների առումով, բայց հաստատապես այն արժեքների, այն գաղափարական, փիլիսոփայական հենքի առումով, որի վրա կառուցվում է պետությունը եւ նրա բոլոր ինստիտուտները, այն հենքի առումով, որի վրա կառուցվում են հասարակական հարաբերությունները: Ըստ այդմ՝ Հայաստանն աշխարհին պիտի ներկայանա որպես ինքնիշխան, սեփական շահերը գիտակցող եւ համարձակորեն պաշտպանող, միեւնույն ժամանակ գործընկերային եւ հավասարակշռված արտաքին քաղաքականություն վարող միջազգային իրավունքի սուբյեկտ, որովհետեւ Հայաստանում արդեն ամրագրվել են ժողովրդավար պետություն կառուցելու երաշխիքները. Հայաստանի Հանրապետության քաղաքացին գիտակցում է, որ հանդիսանում է իշխանության միակ աղբյուրը: Օգտագործեք այս օրերին Հայաստանում գտնվելու փաստը եւ շփվեք փողոցում մեր քաղաքացիների հետ, այն քաղաքացիների հետ, որոնց ներկայացնում եք արտերկրում: Հայաստանի Հանրապետության քաղաքացին ազատ է, քան երբեւէ, զգում է իր` իշխանության աղբյուր լինելն ավելի, քան երբեւէ, պահանջատեր է, քան երբեւէ, հաստատակամ է, քան երբեւէ: Սա մեր աշխատանքում պիտի լինի առաջ մղող եւ միեւնույն ժամանակ պարտավորեցնող կարեւորագույն գործոնը: Հայաստանի Հանրապետության քաղաքացին յուրաքանչյուրիցս ակնկալում է ամբողջապես այլ արժեքների վրա հիմնված գործողություններ: Այս առումով գտնում եմ, որ շատ խորհրդանշական է ընտրված դեսպանաժողովի անունը՝ «Արժեքներ գործողության մեջ: Հայաստանի շահերը արագ փոփոխվող աշխարհում»: Եվ իսկապես, այս արագ փոփոխվող աշխարհագրական փոփոխությունների համատեքստում Հայաստանի ինքնիշխանության շահերն առաջ մղելու համար անհրաժեշտ է անշեղորեն հետեւել ազգային եւ ժողովրդավարական արժեքներին եւ չհապաղել մեր գործողություններում: Իսկ դիպուկ եւ տեղին գործելու համար անհրաժեշտ է զգալ մեր պետության զարկերակը, ինչպես նաեւ արձանագրել այն կարեւորագույն իրադարձությունները, որոնք պայմանավորել են հայաստանյան հասարակական-քաղաքական զարգացումների ողջ տրամաբանությունը: Այս համատեքստում կցանկանայի եւս մեկ անգամ ձեր ուշադրությունը հրավիրել նախորդ տարվա ընթացքում տեղի ունեցած հանգրվանային երկու այլ իրադարձությունների, որոնք անկյունաքարային են հայկական ժողովրդավարության համար, որն արդարացիորեն ձեր դիվանագիտական զինանոցում գտնվող կարեւորագույն գործիքներից մեկն է: Առաջինը՝ Հայաստանի Հանրապետության անցումն է կառավարման խորհրդարանական մոդելին: Երկրորդը՝ 2018 թվականի դեկտեմբերին Հայաստանում տեղի ունեցած արտահերթ խորհրդարանական ընտրություններն են, որոնք ոչ միայն բարձրագույն լեգիտիմություն ունեցան Հայաստանի Հանրապետության բնակչության շրջանում, այլ նաեւ արժանացան ամենաբծախնդիր միջազգային գործընկերների ամենաբարձր գնահատականին: Կարծում եմ՝ վերոնշյալ երկու իրադարձությունները պայմանավորում են Հայաստանի Հանրապետության Ազգային ժողովի` որպես ինստիտուտի եւ Ազգային ժողովի պատգամավորների` որպես այս ներկայացուցչակական մարմնի անդամների դերակատարությունը ոչ միայն Հայաստանի ներքաղաքական, այլեւ արտաքին քաղաքական կյանքում: Պատահական չէ, որ ելույթս սկսեցի հենց «հարգելի գործընկերներ» բառերով, որովհետեւ դահլիճում հավաքված թե՛ արտաքին գործերի նախարարության ներկայացուցիչները, թե՛ Ազգային ժողովի պատգամավորները արտաքին քաղաքականության համատեքստում միեւնույն գործն են անում՝ արտերկում ներկայացնելով մեր հայրենիքի շահերը: Վստահաբար տեղյակ եք, թե ինչ ծավալի աճ ունի եւ որքան է ինտենսիվացել խորհրդարանական դիվանագիտությունը, որն արդեն իսկ, թույլ տվեք ասել, մի քանի շոշափելի արդյունքներ է արձանագրել: Փոխըմբռնում, փոխլրացում եւ փոխօգնություն: Ահա այն բանաձեւը, որն, ըստ իս, մեր համատեղ արդյունավետ աշխատանքի գրավականն է: Այստեղ հավաքված պատգամավորներն իհարկե պետք է հետեւեն արտգործնախարարության կողմից մշակված ուղենիշներին, առաջարկվող բանաձեւերին ու զանազան ձեւակերպումների իմաստային նրբություններին, բայց նրանք նաեւ պիտի մասնակից լինեն այդ ուղենիշների մշակմանը: Նրանք ներկայացնում են Հայաստանի Հանրապետության ժողովրդին: Կարող եմ վերաձեւակերպել՝ նրա՛նք են իրենց առաջնային մանդատով ներկայացնում Հայաստանի Հանրապետության ժողովրդին: Գոհունակությամբ կարող եմ նշել, որ այս ամիսների ընթացքում արդեն իսկ ունենք արդյունավետ համագործակցության հաջողության պատմություններ եւ վստահ եմ, որ այսօրվա քննարկումը նույնպես կտա իր պտուղները: Եվս մեկ անգամ թույլ տվեք ողջունել ձեզ, հարգելի գործընկերներ, եւ բոլորիս այսօր մաղթել բեղմնավոր քննարկումներ՝ ի կատարումն Հայաստանի Հանրապետության ազգային շահերի»,-ասել է ՀՀ խորհրդարանի ղեկավարը:

10:29 - 29 օգոստոսի, 2019