ԿԳՄՍՆ

Հեռավար կրթությունից դուրս մնացած աշակերտները կլրացնեն դասերը․ ԿԳՄՍՆ

11:30 - 02 օգոստոսի, 2020

Աշակերտների 15-20%-ը չի մասնակցել հեռավար դասընթացներին. ԿԳՄՍ նախարարությունը շարունակում է ճշտել տվյալները |hetq.am|

hetq.am: Աշակերտների 15-20%-ը չի մասնակցել հեռավար ուսուցմանը։ Նախարարությունը շարունակում է նրանց վերաբերյալ տեղեկատվության հստակեցումը։ Այս մասին «Հետքի» հարցմանն ի պատասխան տեղեկացրել է կրթության գիտության մշակույթի եւ սպորտի նախարարությունը։ Նախարարությունում մուտքագրվել է շուրջ 500 բողոք՝ հեռահաղորդակցության միջոց կամ ինտերնետ չունենալու պատճառով հեռավար ուսուցմանը չմասնակցելու վերաբերյալ։ Հայաստանում կորոնավիրուսի ի հայտ գալուց եւ տարածվելուց հետո փակվեցին ուսումնական հաստատությունները, այդ թվում՝ դպրոցները։ Մարտի 18-ին աշխատանքը սկսեցին իրականացնել օնլայն։ ԿԳՄՍ նախարարության այս որոշումը քննարկվեց մասնագիտական լսարանի, աշխակերտների ծնողների կողմից, որոնք պնդում էին՝ ոչ բոլոր երեխաներն են ապահովված տեխնիկական հնարավորություններով։ ԿԳՄՍ նախարար Արայիկ Հարությունյանն իր ելույթներում մի քանի անգամ հայտարարեց, որ այն երեխաները, որոնք դուրս են մնացել հեռավար կրթությունից, կունենան հնարավորություն եւ կլրացնեն բացթողածը։ Մի շարք կազմակերպություններ նախարարության հետ միասին անցկացրեցին նաեւ տեխնիկայի հավաքագրում, դրանք ուղարկվեցին տարբեր մարզեր։ Ըստ ԿԳՄՍՆ-ի «Հետքին» տրամադրած տվյալների՝ հավաքագրվել է 3500 տեխնիկական միջոց, որոնք ուղարկվել են տարբեր դպրոցներ։ Դպրոցական արձակուրդի ավարտին մեկ ամիս է մնում, սակայն նախարարությունը դեռեւս հստակ չի ներկայացրել, թե ինչպես կշարունակվի նոր ուսումնական գործընթացը, արդյոք կբացվեն դպրոցները, թե՞ ուսուցումը կշարունակվի հեռավար։ Այնուամենայնիվ, հեռավար ուսուցումը շարունակելու համար դեռեւս ոչ բոլոր աշակերտներն են ապահովված տեխնիկական հնարավորություններով, որի պատճառով էլ չեն կարողանա մասնակցել ուսումնական գործընթացին։ Նախարարությունը շարունակում է իրականացնել ռիսկերի գնահատում եւ հայտնաբերում, նոր ուսումնական տարում թե' առկա, թե' հեռավար ուսուցում իրականացնելու պարագայում։ Աշխատանքներն իրականացվում են ուսումնական հաստատությունների ղեկավարների հետ համատեղ։ Շարունակությունը՝ hetq.am կայքում։

17:35 - 01 օգոստոսի, 2020

Բուհեր չընդունված դիմորդները երկու հայց են ներկայացրել Վարչական դատարան |armenpress.am|

armenpress.am: 2020 թվականի ընդունելության միասնական քննություններում բարձրագույն ուսումնական հաստատություններ չընդունված մի խումբ դիմորդներ երկու հայցադիմում են մուտքագրել Վարչական դատարան՝ բուհեր ընդունելության վերաբերյալ կառավարության որոշումը վիճարկելու նպատակով։ Այս մասին լրագրողների հետ զրույցում ասաց փաստաբան Ալեքսանդր Կոչուբաևը: «Առաջին հայցադիմումով պահանջում ենք կառավարության որոշումը, որը կիրառվել է դիմորդների նկատմամբ, ճանաչել անվավեր։ Ընդ որում, առաջին հայցը չի լուծում դիմորդների խնդիրը և դրանով պետությանը՝ ՀՀ կառավարությանը ցանկանում ենք ցույց տալ, որ այս պայքարն արդար է եղել և իրապես նրանց նկատմամբ կիրառվել է ոչ իրավաչափ որոշում։ Երկրորդ հայցով պահանջում ենք արդեն անհատական մակարդակում դիմորդների նկատմամբ կարգի կիրառումը ճանաչել անվավեր և ռեաբիլիտացնել նրանց»,- ասաց Կոչուբաևը` հավելելով, որ խախտված իրավուքները տարբեր են, ուստի յուրաքանչյուր դիմորդի համար առանձին պահանջ է դրվել։ Նրա խոսքով՝ հայցերից մեկով միջնորդել են դատարանին կիրառել հայցի ապահովման միջոց և ժամանակավորապես հայցն ապահովել, ինչը հնարավորություն կտա մինչև սեպտեմբերի 1-ը դիմորդներին ուսանողի կարգավիճակ տալ՝ մինչև գործով վերջնական դատական ակտի կայացումը։

16:12 - 29 հուլիսի, 2020

Բուհ չընդունված դիմորդները հանդիպեցին ԱԺ պատգամավորների հետ. խորհրդարանականները կդիմեն ԿԳՄՍ |armenpress.am|

armenpress.am: Բարձրագույն ուսումնական հաստատություններ չընդունված դիմորդներն ու նրանց ծնողներն Ազգային ժողովում հանդիպեցին խորհրդարանի երեք խմբակցությունների պատգամավորների հետ: Հանդիպման ընթացքում դիմորդներն ու նրանց ծնողները խորհրդարանականներին ներկայացրին իրենց խնդիրներն ու դրանց լուծման ուղիները: Բարձրագույն ուսումնական հաստատություններ չընդունված դիմորդներն ու նրանց ծնողները նշեցին, որ հիմնական խնդիրն այն է եղել, որ դիմում-հայտը լրացնելիս նրանք տեղյակ չեն եղել ընթացակարգում տեղի ունեցած փոփոխություններին: «Իմ քայլը» խմբակցության անդամ Լիլիթ Ստեփանյանը ծնողներին ու դիմորդներին հայտնեց, որ ԱԺ «Իմ քայլը», «Բարգավաճ Հայաստան» և «Լուսավոր Հայաստան» խմբակցության ներկայացուցիչներն իրենց ստորագրություններով գրություն կուղարկեն Կրթության, գիտության, մշակույթի և սպորտի նախարարություն: Ստեփանյանը նաև հավելեց, որ պետք չէ ողբերգության վերածել այն, որ երեխան առաջին տարում չի ընդունվել բուհ: «Եթե երեխան առաջին տարում չի ընդունվել բարձրագույն ուսումնական հաստատություն, պետք չէ սա սարքել անձնական ողբերգություն: Իմ հայրը 6-րդ փորձից է ընդունվել համալսարան, ես էլ դժվարությամբ եմ ընդունվել բարձրագույն ուսումնական հաստատություն: Որևէ մեկը չի կանխատեսել, որ հնարավոր է երկրում լինի արտակարգ դրություն»,- ասաց Լիլիթ Ստեփանյանը: Դիմորդներն ու նրանց ծնողները նշեցին նաև, որ փոփոխված ընթացակարգի մասին իրենք պատշաճ չեն ծանուցվել:

13:29 - 29 հուլիսի, 2020

Բուհ չընդունվածների հետ հանդիպում ԱԺ-ում. Ուղիղ |factor.am|

11:48 - 29 հուլիսի, 2020

Բուհ չընդունված դիմորդները շարունակում են բողոքի ակցիան ԿԳՄՍ նախարարության դիմաց |tert.am|

tert.am: Այսօր բուհ չընդունված դիմորդները շարունակում են բողոքի ակցիան ԿԳՄՍ նախարարության դիմաց: Դիմորդների ծնողները լրագրողների հետ զրույցում անդրադարձան երեկ ԿԳՄՍ նախարար Արայիկ Հարությունյանի այն հայտարարությանը, թե դիմորդների ակցիան քաղաքական աստառ է ստացել և որ այս ամենի հետևում որոշ ուժեր են կանգնած: Ծնողներից մեկն ասաց, որ եթե որևէ ոլորտի ղեկավար, որևէ մեկը իր հայացքներում, իր որոշումներում լիարժեք վստահ է, որ ինքը ճիշտ է, երբեք շահարկումների հետևից չի ընկնի: «Մենք երկու անգամ երեկ պահանջեցինք ընդունելություն, սակայն երկու անգամ էլ նախարարը մերժեց, որովհետև ինքը չէր կարող մեր ներկայությամբ հիմնավորել այն, ինչը լայվերում ասում է: Ինչ վերաբերում է քաղաքական մոտեցումներին, ասեմ, որ որևէ քաղաքական մոտեցում, քաղաքական ուղղվածություն մեր պահանջների մեջ չի կարող գոյություն ունենալ, մենք բոլորս ծնողներով ու դիմորդներով մեկ ասեղ ենք թելում և դա մեր երեխաների ԲՈւՀ ընդունվելու, սովորելու իրավունք է այս պահին, թե չէ ոչ մի քաղաքական մոտիվ գոյություն չունի»,- ասաց նա:

15:08 - 28 հուլիսի, 2020

ԿԳՄՍ նախարարն անդրադարձել է «Հայ գրականություն» առարկայի դասագրքի շուրջ ծավալվող խոսակցություններին |armenpress.am|

armenpress.am: ՀՀ կրթության, գիտության, մշակույթի և սպրոտի նախարար Արայիկ Հարությունյանը կեղծիք է համարում «Հայ գրականություն» առարկայի շուրջ ծավալվող բոլոր խոսակցությունները։ Նման կարծիք նա հայտնել է Հանրային հեռուստաընկերության «Հարցազրույց Պետրոս Ղազարյանի հետ» հաղորդաշարի ընթացքում։ «Մեզ մեծ մեղք են վերագրում․ ասում են, թե «Հայ գրականությունից» հանում եք «հայ» բառը․ չեմ կարողանում հասկանալ, թե այսչափ մեծ կեղծիքը որտեղից է գալիս։ Ընդ որում, այս սուտն ու կեղծիքը հնչում է կարևոր բուհական ու հետազոտական կենտրոններից, երբ դու նույնիսկ հերքում ես, թե այդպիսի բան չկա, նրանք շարունակում են դա անել։ Դավիթ Գասպարյանը, ով ամենաշատն է քննադատում, ժամանակին 7-րդ դասարանի գրականության դասագիրք է հրապարակել, որի վերնագրում հայ բառը չկա, նույնը` 8-րդ և 9-րդ դասարանների դասագրքերում։ Ես հասկանում եմ, մարդկանց մի մեծ խումբ, որ նախիկնում դասագրքեր է գրել և «ապահովել է» մեր զարգացումը, հիմա դուրս է մնացել այդ գործընթացներից, սակայն նրանք չեն հաջողելու։ Ավելին, մենք մեծ թվով ուսուցիչներ ենք ներգրավել այս գործընթացում, քանի որ հենց նրանք են, որ ամենաշատն են շփվում աշակերտների հետ, տեսնում են դասագրքերում եղած խնդիրները, հենց նրանք կարող են լավագույն լուծումներն առաջարկել։ Վերջին 15 օրվա ընթացքում մենք շուրջ 6 հազար ուսուցչի և մասնակցի հետ քննարկում ենք ունեցել, և նմանատիպ մասշտաբային քննարկում երբեք տեղի չի ունեցել»,- ասաց ԿԳՄՍ նախարարը։ Հարցին, թե արդյո՞ք մեր մեծերը՝ Նարեկացին, Քուչակը, լինելու են դասագրքերում, թե՞ ոչ, Արայիկ Հարությունյանը պատասխանեց, որ բոլորն են լինելու։ «Մենք հերքել ենք այդ տեղեկությունները, թե նրանք դուրս են գալիս դասագրքերից, բայց կեղծիքները մամուլում շարունակվում են։ Ես մեր հասարակության և հանրությանն ուզում եմ կոչ անել՝ չտրվել սադրանքներին, քանի որ այդպիսի բան չկա։ Խոսում են, թե հայրենասիրություն բառը չկա չափորոշիչներում։ Մենք թույլ չենք տալու, որ կեղծ հայրենասիրությամբ այդպիսի բաներ ասեն, պետք է այս եզրույթը քիչ կիրառել, որ չարժեզրկվի, լավ հայրենասիրությունը՝ լավ քաղաքացի դաստիարակելն է, իր իրավունքներն ու պարտականություններն իմացող քաղաքացի դաստիարակելն է։ Եվ այդ հայերնասիրությունը ավելի մեծ տեղ կունենա մեր հասարակության մեջ, քան այն կեղծ հայրենասիրությունը, որ դավանել է մարդկանց այդ խումբը»,- նշեց նախարարը։ Անդրադառնալով դասագրքերում ժամանակակից գրողներին ներկայացնելու թեմային՝ Արայիկ Հարությունյանն ընդգծեց, որ սարսափելի է այն ոճը, որով քննարկվում է այդ հարցը։ «30-ական թվականներին մարդիկ են եղել, ովքեր իրենց ժամանակակից գրողներին են քննադատել, ինչի արդյունքում էլ, օրինակ, Չարենցն ու Բակունցը գնդակահարվել են։ Հիմա պարզապես այլ պայմաններ են, սակայն սոցիալական ցանցերում շարունակվում են անընդունելի ոճով գրառումներ արվել այն ամենի մասին, այն փոփոխությունների ու ժամանակակից գրողների մասին, ինչը ժամանակը պետք է ցույց տա, որ արժեքավոր են այդ ստեղծագործություններն ու նյութերը, թե ոչ»,- ասաց նախարարը: Եզրափակելով իր խոսքը՝ Հարությունյանը շեշտեց, որ հայկականության դեմ ոչ մի դավադրություն չկա, այլ լրիվ հակառակն է։ «Մենք չափորոշիչներով ներմուծում ենք նոր առարկաներ, օրինակ՝ «Ես և իմ հայրենիքը» առարկան, որտեղ հասարակագիտական գիտելիքը ամբողջությամբ անցնում է մեր էպոսի, մեր հերոսների, մեզ համար շատ թանկ հերոսների կյանքով, սյուժեներով։ Մենք այս ամենը ցույց ենք տալիս մեր հասարակության անցած ճանապարհով, նրա լավ և վատ օրինակներով, ապագայի համար էլ պրոյեկտում ենք և ներկայացնելու ենք, թե որ որակներն են մեզ անհրաժեշտ լինելու՝ համակեցության կանոններով ապրող հասարակություն ունենալու համար»,- ընդգծեց ԿԳՄՍ նախարար Արայիկ Հարությունյանը։

13:00 - 28 հուլիսի, 2020

«Պահանջատեր դիմորդ» ակցիայի մասնակիցների ցույցերը քաղաքական երանգ են ստանում․ ԿԳՄՍ նախարար |armenpress.am|

armenpress.am: ՀՀ կրթության, գիտության, մշակույթի և սպորտի նախարար Արայիկ Հարությունյանի պնդմամբ «Պահանջատեր դիմորդ» ակցիայի մասնակիցների ցույցերը ստանում են քաղաքական երանգ։ Այս մասին Հարությունյանն ասաց Հանրային հեռուստաընկերության «Հարցազրույց Պետրոս Ղազարյանի հետ» հաղորդաշարի ընթացքում։ «Բարձր միավորներով բուհ չընդունվածների ցույցերը ստանում են քաղաքական երանգ․ցուցարարների շարքում է հայտնվել Ռոբերտ Քոչարյանի կողմնակիցը։ Ցուցարարներից ամենաակտիվի՝ գլխարկով տղամարդու որդին ոչ առաջին հայտով ընդունվել է, պարզապես նրանք ցանկանում են բողոքի այս ալիքի վրա հասնել այն բանին, որ նա ընդունվի այն ֆակուլտետը, որը լրացրել էին առաջին հայտով։ Դա չի լինելու, նրանք իրենց նպատակին չեն հասնելու»,- նշեց Հարությունյանը և հավելեց, որ ընդհանուր առմամբ եղել է 9372 դիմորդ, որոնք դրական գնահատական են ստացել և նրանցից 8706-ն ընդունվել է բուհ։ Նախարարի խոսքով՝ դրանից հետո, թափուր տեղերի համար դիմել է մոտավորապես 520 դիմորդ, որից 49-ը չի ընդունվել, 471-ն ընդունվել է, իսկ վերջում ստացվել է մի իրավիճակ, երբ չընդունվողների թիվը կազմել է ընդամենը 200։ «Անցած շաբաթ, երբ մենք լուծումների էինք հասել, երբ արդեն կայանալու էր հանդիպումը, երբ պետք է ամրագրեինք այդ լուծումները, ծնողների մի մասը ուրախացել էր, ասում էին՝ մեր հարցը լուծվեց։ Խոսքերիս որպես ապացույց ասեմ, որ բողոքող խումբը մեզ ներկայացրել էր 134 անձի ստորագրությամբ 2 դիմում, որոնցում մարդկանց անունները կրկնվել էին, և կային մարդիկ, որ առաջին հայտով ընդունվել են»,- ընդգծեց նախարարը։ «Մեզ համար անսպասելի էր, որ շաբաթ օրը, չսպասելով երկուշաբթի օրվա մեր լուծումներին, մենք տեսանք այդ քաղաքական խմբակների հետ որոշ բողոքողների ասուլիսները, հայտարարությունները, թե մենք այլևս փոխնախարարի հետ չենք հանդիպելու, մեր պահանջը նախարարի հետ հանդիպումն է։ Այս օրերին ես հանդիպել եմ և՛ դիմորդների, և՛ ծնողների հետ, քննարկել հարցեր և լուծումներ գտել։ Բայց հիմա այս ակտիվությունն արդեն այլ ուղղությամբ է գնում, և ես ուզում եմ դիմորդներին խորհուրդ տալ՝ չտրվել սադրանքներին, որովհետև, ըստ էության, լուծումները տրված են»,- ասաց ԿԳՄՍ նախարարը։

12:03 - 28 հուլիսի, 2020

«Գառնի» պատմամշակութային արգելոց-թանգարանում «փարթի» չի կազմակերպվել. ԿԳՄՍՆ ՊՈԱԿ-ի պարզաբանումը

ՀՀ Կրթության, գիտության, մշակույթի և սպորտի նախարարության «Պահպանության ծառայություն» ՊՈԱԿ-ը պարզաբանում է տարածել երեկ երեկոյան համացանցում հայտնված տեսանյութի վերաբերյալ, որում նշվում էր, թե որոշ մարդիկ փարթի են կազմակերպել «Գառնի» պատմամշակութային արգելոց-թանգարանում: ՊՈԱԿ-ի լրատվության բաժինը հերքում է այդ լուրերը: «Սոցիալական ցանցում տարածվել է տեսանյութ, իբրև թե «Գառնի» պատմամշակութային արգելոց-թանգարանում փարթի է անցկացվում։ Հայտնում ենք, որ արգելոց-թանգարանում նկարահանվում է ապրիլյան քառօրյա պատերազմին նվիրված «Ապրիլ» ֆիլմը։ Ըստ ֆիլմի տնօրեն Դիաննա Ավետիսյանի՝ նկարահանվել է մի դրվագ, որտեղ ներկայացվել է գլխավոր հերոսի` միջազգային ջութակահարների մրցույթին մասնակցելու դրվագը»,- նշված է հայտարարությունում: ՊՈԱԿ-ի լրատվության բաժինը հավելել է, որ ֆիլմի գլխավոր պրոդյուսերը և գլխավոր դերակատարը Ալեքսանդր Խաչատրյանն է։ Այն նկարահանվում է անվճար հիմունքներով, մի խումբ պրոֆեսիոնալների նախաձեռնությամբ։

09:54 - 28 հուլիսի, 2020

«Պահանջատեր դիմորդ» շարժման մասնակից բերման ենթարկվածներն ազատ են արձակվել․ բողոքի ակցիան շարունակվում է |armtimes.com|

armtimes.com: Բարձրագույն ուսումնական հաստատությունների ընդունելության հետ կապված բողոքի ակցիա իրականացնելիս բերման ենթարկվածներն ազատ են արձակվել։ Դիմորդի ծնող Մասիս Բաբալյանին, եւս մեկ ծնողի եւ «Հաղթանակած» շարժման համահիմնադիր Հովհաննես Հարությունյանին, որը եւս միացել է չընդունված մի շարք դիմորդների պայքարին, բերման էին ենթարկել ոստիկանների օրինական պահանջը չկատարելու պատճառով։ Ցույցի մասնակիցները փակել էին ՀՀ կրթության, գիտության, մշակույթի եւ սպորտի նախարարության շենքի հարակից փողոցների հատման կետը՝ նստացույց իրականացնելով։ «Պահանջատեր դիմորդ» շարժման մասնակիցները (շարժումը ստեղծվել է օրերս, նրանք բողոքում են ընդունելության նոր կարգից) թեեւ սկզբում որոշել էին, որ այսօր այլեւս ոչ մի ակցիա չեն իրականացնելու, քանի որ չեն ցանկանում, որ դիմորդներն այդքան ժամանակ արեւի տակ գտնվեն, փոխել են իրենց մտադրությունը: Նշում են, որ դիմորդների պահանջով նրանք շարժվել են ԿԳՄՍՆ շենքի առաջ՝ այնտեղ շարունակելու իրենց ակցիան։ Վերոնշյալ շարժման փաստաբանական թիմի ղեկավար Ալեքսանդր Կոչուբաեւը լրագրողների հետ զրույցում նշել է, որ այսօր վերջնական քննարկումներից հետո պատրաստվում են դիմել Վարչական դատարան, որպեսզի վիճարկեն ՀՀ Կառավարության ընդունած որոշման իրավաչափությունը։ Խոսքը «Պետական եւ ոչ պետական բարձրագույն ուսումնական հաստատությունների 2020-2021 ուսումնական տարվա ընդունելության կարգը եւ բարձրագույն ուսումնական հաստատությունների 2020-2021 ուսումնական տարվա մասնագիտությունների եւ ընդունելության քննությունների ցանկը հաստատելու մասին» որոշման մասին է, որն ընդունվել է ՀՀ Կառավարության՝ 2020 թվականի մայիսի 21-ի նիստում:

16:51 - 27 հուլիսի, 2020

Բուհ չընդունված ուսանողների ու նրանց ծնողների ակցիայի երկու մասնակից բերման ենթարկվեցին |tert.am|

tert.am: «Մենք պահանջում ենք նախարար Արայիկ Հարությունյանի հրաժարականը և հույս ունենք, որ երկրի վարչապետը տեսնում է, թե Արայիկ Հարությունյանը ինչպիսի մոտեցում է ցույց տալիս մեզ: Պարոն վարչապետ, հավատացնում եմ ձեզ, Արայիկ Հարությունյանը նկարած թվեր է ձեզ ցույց տալիս, իբր բոլորի խնդիրը լուծված է, 20 դիմորդ է մնացել, նրանց էլ առաջարկում ենք հեռակա սովորել, նա ձեզ խաբում է:Ես ուզում եմ, որ դուք մեզ ուշադիր լինեք և կայացնեք արդարացի որոշում, պահանջեք, թող Արայիկ Հարությունյանը հրաժարականի դիմում ներկայացնի, նա վնաս է բերում մեր հայրենիքին»:Ոստիկանը մոտեցավ և նշեց, որ գործողությունները ապօրինի են և պահանջեց դադարեցնել հավաքը, հակառակ դեպքում ոստիկանությունը հարկադրանքի միջոցներ կիրառելու լիազորություն ունի:Դիմորդները նստեցին նախարարության հարակից փողոցում՝ փակելով ճանապարհը:Ոստիկանները բերման ենթարկեցին ակցիայի մասնակիցներից երկու անձի՝ դիմորդի ծնող Մասիս Բաբալյանին և շարժմանը միացած Հովհաննես Հարությունյանին: Ավելին՝ tert.am-ում

13:45 - 27 հուլիսի, 2020

Բուհ չընդունված դիմորդներն ու նրանց ծնողները ցանկանում են հանդիպել միայն նախարար Արայիկ Հարությունյանի հետ |tert.am|

tert.am: ԿԳՄՍ նախարարության հասարակայնության հետ կապերի և տեղեկատվության վարչության պետի տեղակալ Օֆելյա Կամավոսյանը հանդիպեց բուհ չընդունված դիմորդների և դիմորդի ծնող Մասիս Բաբալյանի հետ և նշեց, որ դիմորդների և ծնողների հետ կարող է հանդիպել ԿԳՄՍ փոխնախարար Գրիշա Թամրազյանը, ինչին Մասիս Բաբալյանն արձագանքեց՝ իրենք ցանկանում են հանդիպել միայն նախարար Արայիկ Հարությունյանի հետ: «Ձեր նախարարը չի տիրապետում, թե ի՞նչ է նշանակում պատշաճ կերպով ծանուցել: Կամ պետք է փաստաթուղթն առձեռն տրվեր դիմորդին, կամ ուղարկվեր փոստով, կամ՝ էլեկտրոնային փոստով, որը չի իրականացվել ԿԳՄՍ նախարարության և ԳԹԿ-ի կողմից: Նախարարը իր լայվով պատշաճ կերպով ծանուցման մասին էր խոսում, ասում էր՝ 57 հազար դիտորդ կար լայվում, կներեք, 57 հազար դիտորդը կարող էին կապ չունենալ, կամ որ ասում են ԳԹԿ-ի աշխատակիցները հեռուստատեսությամբ բազմիցս խոսել են, դիմորդը նստած պարապում է, կարող է չտեսնի, դրա համար կարգ կա, պետք է դիմորդի էլելտրոնային փոստին ուղարկվեր, որ մայսի 21-ին Կառավարության կողմից ընդունվել է նոր որոշում : Նախարարը չի տիրապետում իրավական նորմերին, մարդը իր կաբինետից է լայվ մտնում,- ասաց Մասիս Բաբալյանը։ Ավելին՝ tert.am-ում

13:25 - 27 հուլիսի, 2020

Բուհ չընդունված դիմորդներն ու նրանց ծնողները կրկին ԿԳՄՍՆ դիմաց են, շարունակում են բողոքի ակցիան․ Ուղիղ |news.am|

news.am: Բուհ չընդունված դիմորդներն ու ուսանողները այսօր՝ հուլիսի 27-ին կրկին հավաքվել են ԿԳՄՍՆ դիմաց՝ շարունակելու իրենց բողոքի ակցիան: Ակցիայի կազմակերպիչ, դիմորդներից մեկի ծնող Մասիս Բաբայանը հորդորեց հավաքվածներին պահել սոցիալական հեռավորություն, հանգստություն: Վերջինս էլ գնաց տեղյակ պահելու, որպեսզի նախարարն ընդունի իրենց:

12:20 - 27 հուլիսի, 2020

Ավարտվել է լրացուցիչ փուլով թափուր տեղերի մրցույթը, բուհ ընդունվել է 472 դիմորդ, չի ընդունվել 49 դիմորդ․ Արայիկ Հարությունյան

ԳԹԿ-ից ստացված տվյալների համաձայն՝ 2020 թ․ ընդունելության միասնական քննություններին հայտագրվել է 11979 դիմորդ, միասնական քննություններին մասնակցել է 11648 դիմորդ, դրական գնահատական ստացել է 9372 դիմորդ (ներառված չեն ռազմական և գերատեսչական բուհերի ուսանողները), որից բուհեր հիմնական փուլով ընդունվել է 8706 դիմորդ: Այս մասին այսօր իր ֆեյսբուքյան էջում հրապարակված տեսանյութի միջոցով հայտնեց ՀՀ կրթության, գիտության, մշակույթի և սպորտի նախարար Արայիկ Հարությունյանը։ Նախարարը նշեց, որ երեկ ավարտվել է լրացուցիչ փուլով թափուր տեղերի մրցույթը, մրցույթի արդյունքով բուհ ընդունվել է 472 դիմորդ, չի ընդունվել 49 դիմորդ։ «Ստացվում է, որ շուրջ 12 հազար դիմորդից դրական գնահատական ստացած և բուհ չընդունված դիմորդների թիվը 223 է։ Նրանք հնարավորություն ունեն սեպտեմբերին՝ հեռակա ուսուցման ընդունելության ժամանակ, պահպանելով իրենց գնահատականները, դիմել բուհեր, և այն համակարգը, որ մշակում ենք, շատ քիչ հնարավորություն է տալիս, որ նրանք կարող են չընդունվել»,- նշեց նախարարը։ Արայիկ Հարությունյանն անդրադարձավ նաև այն դիմորդներին, որոնք գերազանց գնահատական են ստացել, բայց որևէ բուհ չեն ընդունվել։ «Այս տարի միասնական քննության արդյունքում գերազանց (18 և ավելի միավոր) գնահատական ստացած, բայց բուհ չընդունված 6 դիմորդի առաջարկվել են իրենց դիմում-հայտերի հաջորդ կրթական ծրագրերին համպատասխան լուծումներ, և 6-ից արձագանքել է 4 դիմորդ․ այդ 4 դիմորդն արդեն, ըստ էության, ուսանող է»,- հայտնեց նախարարը։ Մանրամասները՝ տեսանյութում։

19:28 - 26 հուլիսի, 2020

Չորեքշաբթի դիմորդների ընդունման նոր կարգի վերաբերյալ կառավարության որոշումը կվիճարկենք Վարչական դատարանում՝ հատուկ վարույթի կարգով, կդիմենք նաև ՍԴ և ՄԻԵԴ․ փաստաբան |tert.am|

tert.am: Նորմատիվ իրավական ակտ է ընդունվել, որը պատշաճ չի ծանուցվել: Եթե ընդունենք, որ մայիս 25-ին է որոշումը ընդունվել, ուրեմն առնվազն մայիս 26-ին է փաստաթուղթն ուժի մեջ մտել, ինչը նշանակում է, որը այն հետադարձության հետ կապված որոշակի խնդիրներ ունի։ Այս մասին այսօր բուհ չընդունված դիմորդների ասուլիսի ժամանակ նշեց փաստաբան Ալեքսանդր Կոչուբաևը՝ անդրադառնալով Կառավարության որոշմանը, համաձայն որի՝ 59-րդ կետով դիմորդների հայտ ներկայացնելու հետ կապված փոփոխություն է կատարվել, որի մասին դիմորդները բավարար իրազեկված չեն եղել: «Չեմ կարող ասել՝ Կառավարության որոշումն իրավական անգրագիտության, թե մշակված քաղաքականության արդյունք է, սակայն հակասում է մի շարք օրենքների: Այն, ինչ ընդունել է Կառավարութունը, ստեղծում է հակասահմանադրական իրավիճակներ, մենք սահմանել ենք հակաքայլեր: Կառավարության որոշումը, որով ընդունելության նոր կարգ է սահմանվել, մենք չորեքշաբթի կվիճարկենք Վարչական դատարանում՝ հատուկ վարույթի կարգով: Քննարկում ենք և արդեն ունենք հստակ դիրքորոշում, որ մյուս շաբաթվա մեջ կդիմենք Սահմանադրական Դատարան և ՄԻԵԴ: Մասնագետներ կան, որ մեր քայլերը չեն ընդունում, սակայն ակնհայտ է՝ մենք չունենք ՍԴ, ՄԻԵԴ դիմելու կանոնների սպառման խնդիր, այսինքն ներպետական ատյաններով անցնելու խնդիր չունենք, քանի որ և՛ Եվրոպական դատարանի, և՛ ՍԴ պրակտիկայի համատեքստում, մի դեպքում սահմանադրականության, մյուս դեպքում՝ Եվրոպական կոնվենցիայով իրավունքների խախտումը ներպետական ատյաններում սպառելու ոչ արդյունավետ միջոցներ են»,- նշեց փաստաբանը: Ալեքսանդր Կոչուբաևը նշեց նաև, որ որպես վերջին տարբերակ Վարչական դատարան կդիմեն՝ կրկին վիճարկելու Կառավարության որոշումը։ Ավելին՝ tert.am-ում

16:52 - 25 հուլիսի, 2020

Կրթության, գիտության, մշակույթի ոլորտներում հայ-գերմանական ծրագրերը զարգացման մեծ ներուժ ունեն

ՀՀ կրթության, գիտության, մշակույթի և սպորտի նախարար Արայիկ Հարությունյանն ընդունել է ՀՀ-ում Գերմանիայի Դաշնային Հանրապետության արտակարգ և լիազոր դեսպան Միխայել Յոհաննես Բանցհաֆի գլխավորած պատվիրակությանը: Հանդիպմանը ներկա է եղել նաև նախարարի տեղակալ Արթուր Մարտիրոսյանը: Ողջունելով հյուրերին՝ նախարարն ասել է, որ կորոնավիրուսի հետևանքները մեծ ազդեցություն են թողել կրթության և գիտության ոլորտների վրա՝ առաջացնելով հեռավար ծրագրեր իրականացնելու անհրաժեշտություն, բայց ստեղծված իրավիճակից առավել շատ տուժել են մշակույթի և սպորտի ոլորտները: Հարությունյանի գնահատմամբ՝ գերմանական կողմի հետ բոլոր ոլորտներում համագործակցությունը բարձր մակարդակի վրա է: Նախարարը դեսպանին տեղեկացրել է, որ հայ-ադրբեջանական սահմանում վերջին շրջանի լարվածության պայմաններում թիրախավորվել են քաղաքացիական հաստատությունները: «Անթույլատրելի է, որ Ադրբեջանը հրետակոծել է անգամ կրթական կառույցները՝ դպրոցներն ու մանկապարտեզները»,-ընդգծել է նախարարը՝ հույս հայտնելով, որ գործընկերները նույնպես համարժեք կարձագանքեն կատարվածին: Դեսպան Բանցհաֆի խոսքով՝ ԵԱՀԿ-ն, ԵԱՀԿ գլխավոր քարտուղարը տվել են համապատասխան գնահատական՝ արձանագրելով, որ միայն բանակցային խաղաղ ճանապարհով է հնարավոր հասնել կարգավորման: Անդրադառնալով համատեղ կրթական ծրագրերին՝ կողմերը համակարծիք են եղել, որ առաջիկայում նախատեսվող Գերմանական ակադեմիական փոխանակման ծառայության (DAAD) տեղեկատվական կենտրոնի Երևանյան գրասենյակի տեղափոխումը Թբիլիսի բացասաբար կանդրադառնա այդ կազմակերպության՝ Հայաստանում իրականացվող նախագծերի արդյունավետության վրա: Դեսպանը հայտնել է, որ այսօր կազմակերպությունը վերակազմակերպման փուլում է, այս պահին ունի 18 գրասենյակ և 53 տեղեկատվական կենտրոն, և ինքը դիմել է Թբիլիսիի կենտրոն՝ տեղեկանալու, թե որքանով է հնարավոր կենտրոն չունենալու պարագայում նույն արդյունավետությամբ ծրագրեր իրականացնել Հայաստանում: Նախարարը բարձր է գնահատել մասնագիտական կրթության և ուսուցման ոլորտում Գերմանիայի միջազգային համագործակցության ընկերության (GIZ) հետ իրականացվող ծրագրերը, ինչպես նաև հայ-գերմանական համագործակցությունը գիտության բնագավառում: Կարևորվել են նաև ուսուցիչների վերապատրաստման ծրագրերը և հանրակրթության ոլորտում հայ–գերմանական համագործակցությունը, որն իրականացվում է հիմնականում Սաքսոնի-Անհալթ դաշնային երկրամասի հետ համագործակցության շրջանակում: Կողմերը մեծապես կարևորել են նաև Երևանում գերմաներենի ուսուցման Գյոթեի անվան ինստիտուտի գործընկեր կենտրոնի գործունեության ընդլայնման ուղղությամբ այս պահին տարվող հայ-գերմանական համատեղ ջանքերը։ Նախարարն արձանագրել է, որ այս տարվա բյուջեով առաջին անգամ միջոցներ են տրամադրվելու Հալլեի «Մեսրոպ» հայագիտական հետազոտությունների կենտրոնին և Պոտսդամի Լեփսիուսի տուն-թանգարանի ինստիտուտին, և եկող տարի ֆինանսավորումը շարունակվելու է:Խոսելով մշակութային ծրագրերի մասին՝ կողմերը վերահաստատել են, որ աշնանը նախատեսված Բեթհովենի 250-ամյակին նվիրված միջոցառումները չեն չեղարկվում, այլ հետաձգվում են և ավելի ուշ կիրականացվեն բարձր մակարդակով: Հարությունյանը նաև իրազեկել է, որ նախատեսվում է վերանորոգել Դիլիջանի կոմպոզիտորների տան Բեթհովենի սրահը: Կորոնավիրուսով պայմանավորված արտակարգ դրության ռեժիմի ավարտից հետո նախատեսվում է նաև Մյունխենի ֆիլհարմոնիայի համերգը Երևանում, ինչպես նաև «Գեղարդ» երգչախմբի ելույթը Նաումբուրգում: Կողմերը կարևորել են ինչպես Երևան և Լայպցիգ, Գյումրի և Հալլե, այնպես և Արարատ և Նաումբուրգ քաղաքների միջև համագործակցության ծրագրերի իրականացումը:

12:00 - 25 հուլիսի, 2020