ԱՄՆ

Ամերիկայի Միացյալ Նահանգները դաշնային սահմանադրական հանրապետություն է Հյուսիսային Ամերիկայում, որը բաղկացած է որոշակի ինքնավարություն ունեցող 50 նահանգներից և դաշնային նշանակության Կոլումբիա մարզից։ Ամերիկայի Միացյալ Նահանգները հյուսիսում սահմանակցում է Կանադային, հարավում՝ Մեքսիկային, ծովային սահման ունի Ռուսաստանի հետ։

Մայրաքաղաքը՝ Վաշինգտոն, տարածքը 9,826,675 կմ² է։ 2019 թվականին դրությամբ բնակչությունը կազմում է 328 239 523 մարդ։ Գործող նախագահը Ջոզեֆ Բայդենն է։

Ամերիկայի Միացյալ Նահանգները ներկայումս անդամակցում է ՄԱԿ-ի Անվտանգության Խորհրդին, Հյուսիսատլանտյան դաշինքին, Առևտրի համաշխարհային կազմակերպությանը, Տնտեսական համագործակցության և զարգացման կազմակերպությանը և այլ միջազգային կազմակերպությունների։

ԱՄՆ-ն կոչ է անում կասեցնել ՌԴ անդամությունը ՄԱԿ-ի մարդու իրավունքների խորհրդից

ԱՄՆ-ն ՄԱԿ-ի Գլխավոր ասամբլեային կխնդրի հեռացնել Ռուսաստանին Մարդու իրավունքների խորհրդից։ Այս մասին, ինչպես փոխանցում է Reuters-ը, երեկ հայտնել է ՄԱԿ-ում ԱՄՆ դեսպանը այն բանից հետո, երբ Ուկրաինան մեղադրել է ռուսական զորքերին Բուչա քաղաքում տասնյակ խաղաղ բնակիչների սպանության մեջ: 193 անդամ ունեցող վեհաժողովը ձայների երկու երրորդով կարող է դադարեցնել պետության անդամությունը՝ մարդու իրավունքների կոպիտ և համակարգված խախտումներ կատարելու համար։ «Ռուսաստանի մասնակցությունը Մարդու իրավունքների խորհրդին ֆարս է»,- ասել է ԱՄՆ դեսպան Լինդա Թոմաս-Գրինֆիլդը Ռումինիա կատարած այցի ժամանակ: «Եվ դա սխալ է, այդ իսկ պատճառով մենք կարծում ենք, որ ժամանակն է, որ ՄԱԿ-ի Գլխավոր ասամբլեան քվեարկի նրան հեռացնելու համար»:

10:44 - 05 ապրիլի, 2022

Դեսպան Թրեյսին հանդիպել է 2020 և 2021 թթ․ գերեվարված հայ զինծառայողների ազգականներին

Մարտի 29-ին դեսպան Թրեյսին հանդիպեց 2020 և 2021թթ․ գերեվարված հայ զինծառայողների ազգականներին․ ներկա էին և՛ անհայտ կորածների, և՛ Ադրբեջանում երկարատև ազատազրկման դատապարտված զինծառայողների ազգականներ։ Այս մասին հայտնում է ՀՀ-ում ԱՄՆ դեսպանատունը։ «Քննարկման առանցքում մարդու իրավունքների հարցերն էին, այդ թվում՝ հրադադարի մասին 2020թ․ նոյեմբերին Հայաստանի, Ադրբեջանի և Ռուսաստանի եռակողմ հայտարարության 8-րդ կետը՝ ռազմագերիների, պատանդների և պահվող այլ անձանց ու մահացածների մարմինների փոխանակման մասին, և Ժնևյան կոնվենցիան։ Մենք կոչ ենք անում ազատ արձակել բոլոր բանտարկյալներին և, հաշվի առնելով հարազատների գտնվելու վայրի ու ճակատագրի մասին տեղեկություններ չունեցող ընտանիքների ցավը, մեծացնել ջանքերը՝ միտված անհայտ կորած զինծառայողների մասին (այդ թվում՝ 1990-ականներից) տեղեկություններ ձեռք բերելուն»։

10:24 - 05 ապրիլի, 2022

Իբրահիմ Քալընը և Վիկտորյա Նուլանդը, ի թիվս այլ հարցերի, քննարկել են նաև Հայաստանի վերաբերյալ հարցեր

Թուրքիայի նախագահի խոսնակ Իբրահիմ Քալընը և ԱՄՆ պետքարտուղարի քաղաքական հարցերով տեղակալ Վիկտորյա Նուլանդը հանդիպում են ունեցել Անկարայում։ Այս մասին հայտնում է թուրքական «Անադոլու» գործակալությունը։ Թուրքիայի նախագահի խոսնակի գրասենյակի հաղորդագրության համաձայն՝ նրանք քննարկել են այնպիսի հարցեր, ինչպիսիք են Սիրիան, Ադրբեջանը, Հայաստանը և Իսրայելը, էներգետիկ անվտանգությունը, պաշտպանական համագործակցությունը, երկկողմ քաղաքական և տնտեսական հարաբերությունները։ Նիստում նշվել է, որ մարտի 29-ին Ստամբուլում ռուս-ուկրաինական բանակցությունները «դրական թափ» են հաղորդել խաղաղության ջանքերին, ընդ որում Թուրքիան «կարևոր դեր» է խաղում Ռուսաստանի և Ուկրաինայի միջև պատերազմի ավարտի հարցում: Քալընը Նուլանդին հայտնել է, որ Թուրքիան վճռականորեն շարունակում է իր դիվանագիտական նախաձեռնությունները՝ հրադադարի, ինչպես նաև հումանիտար միջանքներ բացելու համար։ Հիշեցնենք, որ մարտի 29-ին Ստամբուլում կայացել է ռուս-ուկրաինական բանակցությունների հերթական փուլը։ Ռուսաստանի պատվիրակության ղեկավար Վլադիմիր Մեդինսկին լրագրողներին ասել է, որ դրանք կառուցողական են եղել։ Ուկրաինական պատվիրակության ղեկավար Դավիթ Արախամիան գոհունակություն է հայտնել, որ բանակցությունները կայացել են ոչ թե Բելառուսում, այլ Ստամբուլում։

09:52 - 05 ապրիլի, 2022

Խաթիբզադե․ «Իրանը չի կարող հավերժ սպասել միջուկային ծրագրի շուրջ համաձայնագրի կնքմանը» |azatutyun.am|

azatutyun.am: «Թեհրանը չի կարող հավերժ սպասել միջուկային ծրագրի շուրջ համաձայնագրի կնքմանը», - այսօր Իրանի մայրաքաղաքում կայացած ամենշաբաթյա ասուլիսի ընթացքում հայտարարել է իսլամական հանրապետության արտգործնախարարության խոսնակ Սաեդ Խաթիբզադեն։ Իրանի արտգործնախարարության պաշտոնական ներկայացուցչի խոսքով՝ Վիեննայում վերջին մի քանի ամիսներին ընթացող բանակցություններում արձանագրված դադարի գլխավոր մեղավորը ամերիկյան իշխանություններն են։ «Անկեղծ ասած մենք այժմ սպասում ենք Վաշինգտոնի վերջնական պատասխանին։ Եթե ամերիկացիները պատասխանեն առաջ քաշված հարցերին, մենք շուտափույթ կերպով կարող ենք մեկնել Վիեննա։ Իրանական պատվիրակությունը, սակայն, Ավստրիայի մայրաքաղաք կմեկնի ոչ թե նոր բանակցությունների, այլ միջուկային համաձայնագրի տեքստը ավարտին հասցնելու համար», - հայտարարում էր Խաթիբզադեն։

15:33 - 04 ապրիլի, 2022

Ռուս-ուկրաինական բանակցությունները կարող են հանգեցնել հակառուսական պատժամիջոցների չեղարկման. Բլինքեն |1lurer.am|

1lurer.am: Ռուսաստանի դեմ պատժամիջոցները կարող են չեղարկվել, եթե Ռուսաստանի և Ուկրաինայի ներկայացուցիչների միջև բանակցությունները հանգեցնեն Ուկրաինայում ռազմական գործողությունների դադարեցման՝ կիրակի NBC-ին ասել է ԱՄՆ պետքարտուղար Էնթոնի Բլինքենը։ Նա ընդգծել է, որ պատժամիջոցները չեն սահմանվում երբեք չավարտվելու պայմանով: Դրանց նպատակը Ռուսաստանի քաղաքականությունը փոխելն է։ «Եթե բանակցություններն ավարտվեն այնպես, որ պատերազմը դադարեցվի, դա, ի վերջո, կպահանջի պատժամիջոցների վերացում»,- ասել է Բլինքենը՝ պատասխանելով Ռուսաստանի դեմ պատժամիջոցների վերացման հնարավորության մասին հարցին՝ կախված բանակցային գործընթացից։ CNN-ի հետ հարցազրույցում էլ Բլինքենն նշել է, որ ԱՄՆ-ն իր դաշնակիցների հետ մշտապես քննարկում է Ռուսաստանի դեմ պատժամիջոցների հետագա խստացման հարցը։

15:05 - 04 ապրիլի, 2022

Լեհաստանը կցանկանար ավելի շատ ամերիկյան զորքեր տեսնել Եվրոպայում․ Կաչինսկի

Լեհաստանը կողջուներ Եվրոպայում ամերիկյան զորքերի ավելացումը 50%-ով, Reuters-ի փոխանցմամբ՝ հայտարարել է երկրի իշխող «Իրավունք և արդարություն» կուսակցության առաջնորդ Յարոսլավ Կաչինսկին՝ ուկրաինական հակամարտության առնչությամբ Մոսկվայի դեմ ավելի կոշտ գործողություններ ձեռնարկելու Վարշավայի կոչերի ֆոնին։ «Լեհաստանն ուրախ կլիներ, եթե Ռուսաստանի ագրեսիվության աճի պատճառով ամերիկացիներն ապագայում ավելացնեին իրենց ներկայությունը Եվրոպայում՝ ներկայիս 100 հազար զինվորից այն հասցնելով 150 հազարի»,- ասել է Կաչինսկին գերմանական Welt am Sonntag թերթին։ «75 հազար զինվոր պետք է տեղակայվի արևելյան թևում՝ Ռուսաստանի հետ սահմանին, 50 հազարը՝ Բալթյան երկրներում և Լեհաստանում», - ասել է նա։ Կաչինսկին նաև նշել է, որ Լեհաստանը «բաց» կլինի երկում միջուկային զենքի տեղակայման համար, սակայն ներկա պահին դա չի քննարկվում։ Ռուսաստանի Դաշնության խորհրդի փոխխոսնակ Կոնստանտին Կոսաչյովը միջուկային զենքի մասին Կաչինսկու այս հայտարարությունը «հերթական սադրանք» է որակել և նշել է, որ դա «ամերիկյան միջուկային անձրևանոցի տակ ավելի լավ տեղավորվելու» նպատակ է հետանպդում, գրում է ՌԻԱ Նովոստին։ Նորա Վանյան

16:52 - 03 ապրիլի, 2022

Զախարովա. «Բելգորոդի վրա Ուկրաինայի ԶՈւ ավիահարվածը տեղի է ունեցել այն բանից հետո, երբ ԱՄՆ-ն կոչ արեց իր քաղաքացիներին լքել Ռուսաստանը»

ՌԴ ԱԳՆ պաշտոնական ներկայացուցիչ Մարիա Զախարովան ուշադրություն է հրավիրել «այն փաստի վրա, որ Ուկրաինայի զինված ուժերը ավիահարված են հասցրել Բելգորոդի նավթային պահեստին այն բանից հետո, երբ ԱՄՆ Պետդեպարտամենտը ԱՄՆ քաղաքացիներին կոչ է արել լքել Ռուսաստանի Դաշնության տարածքը»։ «Վաշինգտոնը գիտե՞ր» - ինչպես փոխանցում է ՏԱՍՍ-ը, Զախարովան գրել է Telegram-ի իր ալիքում։ Զախարովան հիշեցրել է, որ մարտի 31-ին՝ մոտավորապես ժամը 19:30-ին ԱՄՆ Պետդեպարտամենտի մամուլի ծառայության ղեկավար Նեդ Փրայսը կոչ է արել Ռուսաստանում և Ուկրաինայում գտնվող Ամերիկայի քաղաքացիներին անհապաղ լքել այդ երկրները: «Այս տարվա ապրիլի 1-ին՝ ժամը 02:00-ին՝ վեց ժամ անց, ուկրաինական երկու Մի-24 ուղղաթիռներ հատել են Ռուսաստանի սահմանը և հարձակվել Բելգորոդի օբյեկտների վրա»,- նշել է ռուս դիվանագետը։

20:03 - 02 ապրիլի, 2022

ԱՄՆ-ն շահագրգռված չէ Ռուսաստանում իշխանափոխությամբ․ Քամալա Հարիս |armenpress.am|

armenpress.am: ԱՄՆ փոխնախագահ Քամալա Հարիսը հայտարարել է, որ ԱՄՆ-ն շահագրգռված չէ Ռուսաստանում իշխանափոխությամբ։ Ինչպես հաղորդում է Forbes-ը, Հարիսն այդ մասին ասել է MSNBC-ին տված հարցազրույցում։ «Թույլ տվեք շատ պարզ ասել. Մենք [ԱՄՆ] շահագրգռված չենք ռեժիմի փոփոխությամբ. Սա մեր քաղաքականությունը չէ», - հայտարարել է նա: Ըստ Հարիսի, ԱՄՆ-ի քաղաքականությունն ի սկզբանե նպատակ է ունեցել ստիպել Ռուսաստանին կրել «իրական կորուստներ կոշտ պատժամիջոցների միջոցով», ինչպես նաև հումանիտար օգնություն տրամադրել Ուկրաինային և խաղաղ բնակիչներին:

18:12 - 02 ապրիլի, 2022

Պենտագոնը հայտարարում է Ուկրաինային 300 միլիոն դոլարի հավելյալ օգնություն հատկացնելու մասին |armenpress.am|

armenpress.am: ԱՄՆ-ի պաշտպանության նախարարությունը ապրիլի 1-ին Կոնգրեսին ծանուցել է Ուկրաինայի անվտանգության աջակցության նախաձեռնության (USAI) կողմից տրամադրված լրացուցիչ աջակցության գործողությունների մասին: Այս մասին հայտնում է ԱՄՆ պաշտպանության վարչությունը։ «USAI-ի միջոցով կտրամադրվի մինչև 300 միլիոն դոլարի աջակցություն անվտանգության ոլորտում Ուկրաինայի պաշտպանունակությունն ուժեղացնելու համար: Այս որոշումը ընդգծում է Միացյալ Նահանգների անսասան հավատարմությունը Ուկրաինայի ինքնիշխանությանը և տարածքային ամբողջականությանը»,- ասված է հաղորդագրության մեջ:

15:35 - 02 ապրիլի, 2022

ԱՄՆ-ն ողջունել է Եմենում երկամսյա հաշտեցման մասին հայտարարությունը |armenpress.am|

armenpress.am: Միացյալ Նահանգների նախագահ Ջո Բայդենը ողջունել է հայտարարությունը Եմենում երկամսյա հաշտեցման մասին: Այս մասին նշվում է ԱՄՆ նախագահի մամուլի ծառայության տարածած հաղորդագրության մեջ: Բայդենը նշել է, որ սա կարևոր, սակայն ոչ բավարար քայլ է, որը թույլ է տալիս սկսել «քաղաքական փոխզիջումների որոնումները, որոնք ապագայի համար կապահովեն Եմենի ժողովրդի կայուն խաղաղությունը»: Նա շնորհակալություն հայտնել Սաուդյան Արաբիային և Օմանին տվյալ նախաձեռնությունը կյանքի կոչելու համար, ինչպես նաև երախտագիտություն հայտնել Եմենի կառավարությանը համառ աշխատանքի և ՄԱԿ-ի միջնորդներին վստահելու համար:

12:54 - 02 ապրիլի, 2022

Վիկտորիա Նուլանդը Եվրոպայում քննարկելու է Ուկրաինայի պատերազմի խնդիրը |azatutyun.am|

azatutyun.am: Ամերիկայի Միացյալ Նահանգների պետական քարտուղարի քաղաքական հարցերով տեղակալ Վիկտորիա Նուլանդն ապրիլի 2-ից 9-ը կայցելի Ֆրանսիա, Թուրքիա, Հունաստան, Կիպրոս և Գերմանիա: Այցերի ընթացքում Նուլանդը քննարկելու է Ուկրաինայի պատերազմի և Ռուսաստանի նկատմամբ պատժամիջոցների հարցերը: Այդ մասին հայտնել է ԱՄՆ-ի պետական դեպարտամենտի մամլո ծառայությունը: Նուլանդի նպատակն է «հանդիպումների ընթացքում ամրապնդել երկկողմ կապերը, ընդգծել Ուկրաինային սատարելու անհրաժեշտությունը և համակարգել Ռուսաստանին պատասխանելու աշխատանքը»: Ֆրանսիայում Նուլանդը կհանդիպի ոչ միայն ֆրանսիացի, այլև բրիտանացի և գերմանացի գործընկերների հետ, իսկ Գերմանիայում կհանդիպի պաշտոնակիցներին «Մեծ յոթնյակից»:

11:35 - 02 ապրիլի, 2022

Միջազգային էներգետիկ գործակալությունն արտակարգ նիստ կանցկացնի նավթի գների աճի զսպումը քննարկելու

Միջազգային էներգետիկ գործակալությունն այսօր արտակարգ նիստ կանցկացնի՝ քննարկելու նավթի ռազմավարական պահուստներից նոր չափաբաժնի օգտագործման հարցը, ինչպես նաև ԱՄ-ի՝ մայիսից խոշոր մատակարարումներ իրականացնելու պլանը, որն ուղղված է նավթի գների կտրուկ աճի զսպմանը, գրում է Reuters-ը։ Խոշոր սպառողները նավթի համաշխարհին գների ազդեցությունն իրենց տնտեսությունների վրա նվազեցնելու ուղիներ են փնտրում, որոնք այս տարի աճել են ավելի քան 30%-ով հատկապես այն բանից հետո, երբ ՕՊԵԿ+ երկրները հայտարարել են, որ մայիսին նավթի արդյունահանումը կավելացվի օրական ընդամենը 432 հազար բարելով։ Միջազգային էներգետիկ գործակալության տվյալներով Ուկրաինա ներխուժման համար Ռուսաստանի դեմ կիրառված արևմտյան պատժամիջոցները կհանգեցնեն ապրիլին ռուսական նավթի օրական շուրջ 3 մլն բարելի կորստի։ Նավթի պակասը լրացնելու համար ԱՄՆ նախագահ Ջո Բայդենը երեկ հայտարարել է երկրի ռազմավարական պահուստներից ռեկորդային քանակությամբ նավթ դուրս բերելու մասին՝ օրական մեկ միլիոն բարել վեց ամսվա ընթացքում՝ սկսած մայիսից։ Այս հայտարարությունն արվել է Միջազգային էներգետիկ գործակալության այն հայտարարությունից առաջ, որ ուրբաթ օրը կազմակերպության անդամ երկրների նիստ է կայանալու՝ քննարկելու համար շուրջ 60 մլն բարել նավթի օգտագործման մասին մարտի 1-ի որոշումը։ Կազմակերրպոպւթյան անդամներից ոմանք արդեն հայտարարել են, որ կսատարեն ՄԷԳ նախաձեռնությունը։ Նորա Վանյան

12:29 - 01 ապրիլի, 2022

ԱՄՆ-ն աջակցում է եվրոպական երկրների՝ ռուսական գազի դիմաց ռուբլով վճարելու մերժմանը |azatutyun.am|

azatutyun.am: Միացյալ Նահանգներն աջակցում է մի շարք եվրոպական երկրների՝ ռուսական բնական գազի մատակարարումների համար ռուբլով վճարելու մերժմանը, ասել է Սպիտակ տան հաղորդակցության գծով տնօրեն Քեյթ Բեդինգֆիլդը։ «Կարծում եմ՝ Գերմանիայի կանցլերը հստակ ասել է, որ պայմանագրերը կան այնպես, ինչպես կան, և փոփոխություններ չեն լինի», - ասել է նա։ Սպիտակ տունը Մոսկվայի պահանջը դիտարկում է որպես Ռուսաստանի կենտրոնական բանկի կողմից ռուբլուն արհեստական աջակցություն: Երեկ Ռուսաստանի նախագահ Վլադիմիր Պուտինը ստորագրել է ապրիլի 1-ից ռուսական գազի մատակարարումների դիմաց վճարումների նոր կարգի մասին հրամանագիրը։

11:26 - 01 ապրիլի, 2022

Դեսպան Մակունցը կոնգրեսական Փրայսին ներկայացրել է ՀՀ-ի և Արցախի շուրջ ստեղծված անվտանգային միջավայրը

ԱՄՆ-ում ՀՀ դեսպան Լիլիթ Մակունցը հանդիպում է ունեցել «House Democracy Partnership» հանձնախմբի նախագահ, կոնգրեսական Դեյվիդ Փրայսի հետ։ ԱՄՆ-ում ՀՀ դեսպանությունը տեղեկացնում է, որ դեսպան Մակունցը կարևորել է 2020թ․ ՀՀ ԱԺ անդամակցությունը, որպես գործընկեր, «House Democracy Partnership» հանձնախմբին և բարձր գնահատել երկու օրենսդիր մարմինների միջև առկա արդյունավետ համագործակցությունը։ Դեսպան Մակունցը կոնգրեսականին է ներկայացրել Հայաստանի և Արցախի շուրջ ստեղծված անվտանգային միջավայրը և այդ կապակցությամբ ընդգծել ԱՄՆ և ԵԱՀԿ Մինսկի խմբի համանախագահ մյուս երկրների ակտիվ ներգրավվածության անհրաժեշտությունը՝ Ադրբեջանի կողմից տարածաշրջանում հետագա լարվածությունը զսպելու գործում։ Հանդիպմանը դեսպան Մակունցը կոնգրեսական Փրայսին է փոխանցել ՀՀ ԱԺ նախագահի կարգադրությամբ արժանացած «Պատվո Մեդալը» հայ-ամերիկյան միջխորհրդարանական բարեկամական հարաբերությունների զարգացման ու ամրապնդման գործում ներդրած նշանակալի ավանդի համար։

10:07 - 31 մարտի, 2022

Բայդենը ցավակցություն է հայտնել Իսրայելի վարչապետին երկրում տեղի ունեցած ահաբեկչությունների առիթով

Հեռախոսազրույց են ունեցել ԱՄՆ նախագահ Ջո Բայդենն ու Իսրայելի վարչապետ Նաֆթալի Բեննեթը։ Այս մասին հայտնում են Սպիտակ տան մամուլի ծառայությունից։ Բայդենը իր խորին ցավակցությունն է հայտնել Իսրայելում սարսափելի ահաբեկչական հարձակումների առիթով, որոնց հետևանքով 11 մարդ է զոհվել Իսրայելի երեք քաղաքներում: «ԱՄՆ Նախագահն ընդգծել է, որ Միացյալ Նահանգները հաստատակամ և վճռական կերպով կանգնած է Իսրայելի կողքին այս ահաբեկչական սպառնալիքի և Իսրայել պետությանը սպառնացող բոլոր վտանգները դիմակայելիս»,- ասվում է ամերիկյան կողմի հաղորդագրության մեջ։ Նշվում է նաև, որ երկու երկրների ղեկավարները քննարկել են տարածաշրջանային գործընկերության կարևորությունը, ինչպես օրինակ՝ Աբրահամի համաձայնագրերով և Նեգևի գագաթնաժողովով, անվտանգության խթանման և Մերձավոր Արևելքի մարդկանց կյանքի բարելավման գործում: «ԱՄՆ նախագահը համապատասխան օգնություն է առաջարկել Իսրայելի դաշնակիցներին, երբ նրանք դիմակայում են իրենց քաղաքացիներին սպառնացող վտանգներին»,- նշված է հայտարարության մեջ։:

09:46 - 31 մարտի, 2022

Աշխարհը չպետք է հավատա Պուտինի խոսքին. Սպիտակ տունը հայտնել է Բայդեն-Պուտին հանդիպման նախապայմանները |tert.am|

tert.am: Սպիտակ տան հեռահաղորդակցային բաժնի ղեկավար Քեյթ Բեդինգֆիլդը հայտարարել է, որ Ռուսաստանի կողմից Ուկրաինայում որոշակի ուղղություններով ռազմական ակտիվությունը մի քանի անգամ կրճատելու մասին հայտարարության ֆոնին աշխարհը պետք է պարզ աչքերով նայի ու չհավատա ՌԴ նախագահ Վլադիմիր Պուտինի խոսքին: Ինչպես գրում է The Guardian-ը, Սպիտակ տան ներկայացուցիչն ընդգծել է, որ պետք է հետևել ու տեսնել՝ արդյոք ռուսների գործողությունները համընկնում են նրանց խոսքերին: «Կարծում եմ՝ մենք պետք է պարզ աչքերով նայենք իրականությանը, ոչ ոք չպետք է հիմարացվի ՌԴ-ի հայտարարություններով: Մենք կարծում ենք, որ Կիևի շուրջ ուժերի ցանկացած տեղաշարժ վերաբաշխում է և ոչ թե նահանջ, և աշխարհը պետք է պատրաստ լինի մեծ հարձակման Ուկրաինայի այլ տարածքների վրա»,- ասել է Բեդինգֆիլդը։ Նա հավելել է, որ ԱՄՆ նախագահ Ջո Բայդենը պատրաստ կլինի հանդիպելու Պուտինի հետ, բայց միայն այն դեպքում, եթե նախապես որոշակի երաշխիքներ տրվեն: «Դա կախված կլինի նրանից , թե ինչի շուրջ նախագահ Պուտինը կցանկանա խոսել: Մենք շատ պարզ ենք այն հարցում, որ պետք է շոշափելի ապաէսկալացիա լինի Ռուսաստանի կողմից և հստակ, անկեղծ հավատարմություն դիվանագիտությանը, նախքան նախագահը նման խոսակցություն կունենա»,-եզրափակել է Բեդինգֆիլդը: Հիշեցնենք, որ երեկ ՌԴ պաշտպանության նախարարի տեղակալ Ալեքսանդր Ֆոմինը հայտարարել է, որ Ռուսաստանի պաշտպանության նախարարությունը որոշել է արմատապես կրճատել մարտական գործողությունները Կիևի և Չեռնիգովի ուղղություններով:

11:17 - 30 մարտի, 2022