Ալեքսանդր Լուկաշենկո

Լիտվայի ԱԳՆ-ն Բելառուսի հարցով պատժամիջոցների ցուցակում ներառել է 118 մարդու, այդ թվում՝ Լուկաշենկոյին |tert.am|

tert.am: Բելառուսի հարյուրից ավելի պաշտոնյաներ, այդ թվում՝ հանրապետության նախագահ Ալեքսանդր Լուկաշենկոն, Լիտվայի կողմից ընդգրկվել են այն անձանց ցուցակում, որոնց դեմ Վիլնյուսը մտադիր է պատժամիջոցներ կիրառել: Այս մասին չորեքշաբթի լրագրողներին հայտնել է ԱԳ նախարար Լինաս Լինկյավիչյուսի խորհրդական Ռասա Յակիլայտենեն, գրում է tass.ru-ն։ «Լիտվայի ԱԳՆ-ն ՆԳՆ-ին է ուղարկել թարմացված ցուցակ, որում ընդգրկված է 118 մարդ, այդ թվում՝ նախագահ Լուկաշենկոն»,- ասել է նա: Սա բալթյան հանրապետության պատժամիջոցների ցուցակի երկրորդ տարբերակն է: Նախնական ցանկը, որում Լուկաշենկոյի հետ միասին 32 մարդ էր ընդգրկված, որոնք, Վիլնյուսի գնահատմամբ, առնչություն ունեն Բելառուսում նախագահական ընտրությունների արդյունքների կեղծմանը և ցուցարարների նկատմամբ ուժի չարդարացված կիրառմանը, ԱԳՆ-ն ՆԳՆ-ի հաստատմանը փոխանցել էր օգոստոսի 19-ին: Հաջորդ օրը երկրի վարչապետ Սաուլիուս Սկվերնյալիսը հայտարարել էր, որ որոշ տեխնիկական հարցերի պատճառով թարմացված ցուցակը կհրապարակվի ավելի ուշ։ Ցուցակում ընդգրկված անձանց առաջարկվում է արգելել Լիտվա մուտքը և սառեցնել նրանց ակտիվները, եթե այդպիսիք կան հանրապետության ֆինանսական հաստատություններում:

15:38 - 26 օգոստոսի, 2020

«Մենք Ռուսաստան չենք, մենք Բելառուս ենք, և ոչ մի երկիր չպետք է ազդի մեր ժողովրդի որոշման վրա». Տիխանովսկայա |tert.am|

tert.am: Բելառուսի նախագահի նախկին ընդդիմադիր թեկնածու Սվետլանա Տիխանովսկայան ամերիկյան Fox News հեռուստաալիքի եթերում հայտարարել է, որ անթույլատրելի է «դրսից» Բելառուսի ներքին գործերին միջամտելը։ Ընդդիմության առաջնորդը հայտարարել է, որ ակտիվիստները ոչ արևմտամետ են, ոչ էլ հակառուսական տրամադրություններ ունեն․ իրենց երկիրն ինքնիշխան է։ «Մենք Ռուսաստան չենք, մենք Բելառուս ենք։ Մեր ժողովուրդը ցանկանում է ապրել ժողովրդավարական երկրում, և ոչ մի երկիր չպետք է ազդի մեր ժողովրդի որոշման վրա»,- ասել է նա։ Հարցին, թե մեկ տարի առաջ կզարմանար, եթե իրեն տեսներ այն կարգավիճակում, որում այսօր հայտնվել է, նա ժպիտով դրական պատասխան է տվել։ «Իհարկե։ Ես իմ մեջ այնպիսի ուժ գտա, որը չէի կարող պատկերացնել, որ ունեմ»,- պատասխանել է նա։

10:46 - 26 օգոստոսի, 2020

Եվրախորհրդի ղեկավարն արդեն քանի օր է՝ չի կարողանում կապ հաստատել Լուկաշենկոյի հետ |tert.am|

tert.am: Եվրամիության արտաքին քաղաքականության ծառայության փոխղեկավար Հելգա Շմիդն այսօր հայտարարել է, որ մի քանի օր է՝ ԵՄ-ին չի հաջողվում կապ հաստատել Բելառուսի նախագահ Ալեքսանդր Լուկաշենկոյի հետ, գրում է tass.ru-ն։ Նրա խոսքով՝ վերջին օրերին Եվրախորհրդի ղեկավար Շառլ Միշելը փորձել է խոսել Բելառուսի նախագահ Ալեքսանդր Լուկաշենկոյի հետ, սակայն նրա ջանքերն ապարդյուն են եղել։ «Եվրախորհրդի ղեկավարը վերջին օրերին փորձել է կապվել Լուկաշենկոյի հետ, սակայն նրան չի հաջողվել»,- հայտարարել է նա՝ ելույթ ունենալով Եվրախորհրդարանի արտաքին գործերի հանձնաժողովի արտահերթ նիստում, որը նվիրված է Բելառուսում տիրող իրավիճակին: Նույն նիստում բելառուսական ընդդիմության առաջնորդ Սվետլանա Տիխանովսկայան տեսակապի միջոցով հայտարարել է, որ Բելառուսում նախագահական ընտրություններն անցկացվել են հազարավոր խախտումներով, իսկ դրանց պաշտոնական արդյունքները չեն ընդունվել բելառուս ժողովրդի կողմից: Նա նաև խոսել է բելառուսական ընդդիմության նպատակի մասին, այն է՝ խաղաղ երկխոսության միջոցով նոր ընտրությունների հասնելը։ Նախկին թեկնածուն հավելել է, որ ընդդիմությունը պատրաստ է իշխանությունների հետ բանակցությունների համար իր ներկայացուցիչներին առաջադրել։ «Հայտարարում եմ իշխանությունների հետ բանակցությունների մեջ մտնելու պատրաստակամության մասին։ Պատրաստ ենք ներկայացնել մեր բանակցողներին»,- հայտարարել է նա։

16:53 - 25 օգոստոսի, 2020

Լուկաշենկոն ազատել է Սլովակիայում Բելառուսի դեսպանին |tert.am|

tert.am: Բելառուսի նախագահ Ալեքսանդր Լուկաշենկոն պաշտոնից ազատել է Սլովակիայում երկրի դեսպան Իգոր Լեշչենկոյին, որն ավելի վաղ աջակցություն էր հայտնել երկրում տեղի ունեցող ցույցերին: ТАСС գործակալության փոխանցմամբ՝ այս մասին հայտնել է երկրի ղեկավարի մամլո ծառայությունը: «Իգոր Լեշչենկոն ազատվել է Սլովակիայում Բելառուսի Հանրապետության արտակարգ և լիազոր դեսպանի պաշտոնից: Համապատասխան հրամանագիրը ստորագրել է երկրի ղեկավարը»,- ասվում է հաղորդագրության մեջ: Լեշչենկոն մեկ շաբաթ առաջ առաջինն էր բելառուս դիվանագետներից, որոնք ուղերձով հանդես եկան՝ բողոքելով ցուցարարների նկատմամբ իշխանությունների գործողություններից:

10:30 - 25 օգոստոսի, 2020

ՌԴ և Բելառուսի նախագահները քննարկել են Բելառուսում ստեղծված իրավիճակը և կորոնավիրուսի դեմ պայքարը |armenpress.am|

armenpress.am: Բելառուսի նախագահ Ալեքսանդր Լուկաշենկոյի և Ռուսաստանի նախագահ Վլադիմիր Պուտինի միջև օգոստոսի 24-ին տեղի է ունեցել հեռախոսազրույց: Այս մասին հաղորդագրություն է տարածել Բելառուսի նախագահի լրատվական ծառայությունը։ Նախագահները քննարկել են ստեղված իրավիճակը Բելառուսի ներսում և Բելառուսի շուրջ։ Բացի այդ, պետությունների ղեկավարները քննարկել են կորոնավիրուսի դեմ պայքարը: Այս կապակցությամբ նախագահները համաձայնել են, որ Բելառուսի քաղաքացիները ինքնակամ մասնակցեն Ռուսաստանի Դաշնությունում արտադրված կորոնավիրուսային պատվաստանյութի փորձարկումների երրորդ փուլին: Բելառուսը կդառնա նաև առաջին երկիրը, որը կստանա այս պատվաստանյութը:

08:49 - 25 օգոստոսի, 2020

Լուկաշենկոն պահանջել է աշխատանքից հեռացնել այն ուսուցիչներին, որոնք չեն ցանկանում դասավանդել պետական գաղափարախոսությանը համապատասխան |tert.am|

tert.am: Բելառուսի նախագահ Ալեքսանդր Լուկաշենկոն պահանջել է աշխատանքից հեռացնել այն ուսուցիչներին, որոնք չեն ցանկանում դասավանդել պետական գաղափարախոսությանը համապատասխան։ Այս մասին նա հայտարարել է օգոստոսի 24-ին կրթության նախարար Իգոր Կարպենկոյի հետ հանդիպման ժամանակ, հայտնում է «Բելտա» պետական լրատվական գործակալությունը։ Իր խոսքում շեշտելով Բելառուսում պետական կրթություն, պետական դպրոցներ, պետական գաղափարախոսություն տերմինները՝ Լուկաշենկոն հայտարարել է․ «Եվ նրանք, ովքեր ցանկանում են հետևել այս սկզբունքներին, խնդրեմ՝ գնացեք ուսուցանեք, ուսուցանեք, աշխատեք։ Նրանք, ովքեր չեն ուզում, ուրեմն դպրոցում չպետք է լինեն։ Այս մասին պետք է ասվի ուղիղ, անկեղծ և ազնիվ կերպով»։ Նա նաև պահանջել է պաշտպանել ուսուցիչներին։ «Պաշտպանեք ուսուցիչներին ամեն տեսակի հարձակումներից։ Մենք դա արդեն սկսել ենք անել, ընդ որում՝ շատ ակտիվորեն և շատ խստորեն կասեցնում ենք բոլոր տեսակի հարձակումներն ուսուցիչների, բժիշկների նկատմամբ»,-ասել է նա։

15:56 - 24 օգոստոսի, 2020

Լուկաշենկոն ուղղաթիռով ժամանել է Անկախության պալատ․ նա ուղղաթիռից դուրս է եկել՝ ինքնաձիգը ձեռքին

Ալեքսանդր Լուկաշենկոն ուղղաթիռով ժամանել է Մինսկի Անկախության պալատ, որի մոտ հավաքվել էին ցուցարարները, որոնք այսօր երթ էին կազմակերպել քաղաքի կենտրոնում: Այս մասին հայտնում է meduza.io-ն։ Դատելով «Пул Первого» տելեգրամյան ալիքի տեսանյութից (այն Լուկաշենկոյի մամուլի ծառայության ալիքն է)՝ նա ուղղաթիռից դուրս է եկել՝ ինքնաձիգը ձեռքին: «Նախագահը կրում է զրահաբաճկոն, ձեռքին ինքնաձիգ է», - հայտնել է մամուլի ծառայությունը: Անկախության պալատը Լուկաշենկոյի նստավայրն է: Ոստիկանությունն այսօր արգելափակել էր Հաղթանակի պողոտան, որտեղ գտնվում է նստավայրը, որպեսզի կանխեր ցուցարարների զանգվածային երթը: Ակցիայի մասնակիցները կանգ էին առել ոստիկանական շղթայի առաջ. ցուցարարներից ոմանք ցրվել էին, ոմանք շարժվել էին հակառակ ուղղությամբ: Ավելի վաղ հայտնել էինք, որ Մինսկի Անկախության հրապարակում ավելի քան 100 հազար մարդ է հավաքվել։ Ցուցարարները պահանջում էին ազատել բոլոր ձերբակալվածներին և քաղբանտարկյալներին, դատել նրանց, ովքեր մեղավոր են խոշտանգումների և սպանությունների համար, ինչպես նաև Ալքսանդր Լուկաշենկոյի հրաժարականը։ Լուսանկարը՝ Дождь-ի տելեգրամյան ալիքից։

21:54 - 23 օգոստոսի, 2020

Բելառուսում ցուցարարները պահանջում են ազատել բոլոր ձերբակալվածներին և քաղբանտարկյալներին, դատել նրանց, ովքեր մեղավոր են խոշտանգումների և սպանությունների համար

Բելառուսի մայրաքաղաք Մինսկի Անկախության հրապարակում, Tut.by- ի և Euroradio-ի գնահատմամբ, ավելի քան 100 հազար մարդ է հավաքվել։ Այս մասին հայտնում է meduza.io-ն։ Ցուցարարները երթով առաջ են շարժվել, բայց նախագահ Լուկաշենկոյի նստավայրի մոտ նրանց ճանապարհը փակել են։ Այնուհետև ցուցարարները քաղաքի կենտրոնով քայլել են դեպի «Պլանետա» հյուրանոցը: Այստեղ տեղի ունեցած կարճ հանրահավաքից հետո նրանք գնացել են Պետական դրոշի հրապարակ: Բելառուսի քաղաքներում բնակիչները հավաքվում են կենտրոնական հրապարակներում և երթեր կազմակերպում: Գրոդնո քաղաքում կա ավելի քան 10 հազար ցուցարար: Nexta տելեգրամյան ալիքի փոխանցմամբ՝ ցուցարարները պահանջում են ազատել բոլոր ձերբակալվածներին և քաղբանտարկյալներին, դատել նրանց, ովքեր մեղավոր են խոշտանգումների և սպանությունների համար, ինչպես նաև Ալքսանդր Լուկաշենկոյի հրաժարականը։ Ավելի վաղ հայտնել էինք, որ Մինսկի Անկախության հրապարակում ցուցարարները կաթվածահար են արել տրանսպորտի աշխատանքը: Լուսանկարը՝ Nexta-ի։

19:29 - 23 օգոստոսի, 2020