Ուկրաինա

Ուկրաինան գտնվում է Արևելյան Եվրոպայում։ Այն հյուսիսից և հյուսիս-արևելքից սահմանակից է Ռուսաստանին, հյուսիս արևմուտքից՝ Բելառուսին, արևմուտքից՝ Լեհաստանին, Սլովակիային և Հունգարիային, հարավ արևմուտքից՝ Մոլդովային, հարավից և հարավ-արևելքից համապատասխանաբար Սև ծովին և Ազովի ծովին։

Այն 603,628 կմ² ցուցանիշով Եվրոպային հարակից երկրների մեջ Ռուսաստանի Դաշնությունից հետո երկրորդն է իր տարածքով։ Գործող նախագահը Վլադիմիր Զելենսկին է։

ԱՄՆ-ն մեկնաբանել է Դոնբասում Ուկրաինայի կողմից թուրքական անօդաչուի կիրառումը |tert.am|

tertam: Կիևում ԱՄՆ դեսպանատունը հիմնավորել է Ուկրաինայի Զինված ուժերի կողմից թուրքական անօդաչու թռչող սարքի օգտագործումը Դոնբասում։«Մենք կոչ ենք անում Դոնբասում հակամարտող երկու կողմերին պահպանել հրադադարի պայմանները, բայց եկեք պարզ լինենք. Ռուսաստանի կողմից աջակցվող կողմը բազմիցս օգտագործել է հրետանի և անօդաչու թռչող սարքեր ուկրաինական ուժերի դեմ»,- ասվում է դիվանագիտական առաքելության ֆեյսբուքյան էջում։Իսկ մինչ այդ Ուկրաինայի նախագահ Վլադիմիր Զելենսկին հայտարարել էր, որ Կիևի կողմից Դոնբասում թուրքական «Բայրաքթար» անօդաչու թռչող սարքի օգտագործումը պատասխան է թշնամու գործողություններին, այլ ոչ թե հարձակում։

23:11 - 29 հոկտեմբերի, 2021

Թուրքական Bayraktar-ները կանգնած են հերթապահության և մշտապես պատրաստ են մարտական կիրառման. Ուկրաինայի ԶՈւ հրամանատար |tert.am|

tert.am: Թուրքական արտադրության Bayraktar հարվածային անօդաչուները գտնվում են Ուկրաինայի Զինված ուժերի սպառազինման կազմում և մշտապես պատրաստ են մարտական կիրառման: Ինչպես հայտնում է ՏԱՍՍ գործակալությունը, այս մասին հայտարարել է Ուկրաինայի ԶՈւ հրամանատար գեներալ-լեյտենանտ Սերգեյ Նաևը:«Դրանք (Bayraktar-ները) մարտական հերթապահության են կանգնած այս տարվա գարնանից: Հետախուզություն և փորձարկում է անցկացվել: Երբ Ուկրիանան գնեց այդ համալիրները, տեղի է ունեցել նաև անձնակազմի համապատասխան վերապատրաստում դրանք օգտագործելու համար: Այսօր «Բայրաքթարների» բոլոր անձնկազմերը պատրաստ են հետախուզության ցերեկվա և գիշերային ժամերին, ինչպես նաև մարտական կիրառման»,- ասել է վերջինս:Նաևի խոսքով՝ ուկրաինական Bayraktar անօդաչուները կես տարուց ավելի է, ինչ հերթապահության են գտնվում և այդ ընթացքում ցույց են տվել իրենց արդյունավետությունը և գործնական տվյալներ են փոխանցել հակառակորդի մասին:

14:21 - 29 հոկտեմբերի, 2021

Ուկրաինայի դեսպանն ավարտում է իր դիվանագիտական առաքելությունը Հայաստանում

Հայաստանի արտաքին գործերի նախարարի տեղակալ Արմեն Ղևոնդյանը երեկ հանդիպել է Հայաստանի Հանրապետությունում Ուկրաինայի արտակարգ և լիազոր դեսպան Իվան Կուլեբայի հետ՝ Հայաստանում վերջինիս դիվանագիտական առաքելության ավարտի կապակցությամբ: Հանդիպման ընթացքում անդրադարձ է կատարվել հայ-ուկրաինական համագործակցության հիմնական ուղղություններին, քննարկվել են առևտրատնտեսական փոխգործակցության ծավալների ավելացման, ինչպես նաև ընթացիկ տարվա սեպտեմբերին կայացած միջկառավարական հանձնաժողովի նիստի շրջանակներում ձեռք բերված պայմանավորվածությունների իրականացման ուղիները։ Քննարկվել են նաև բազմակողմ հարթակներում համագործակցությանն առնչվող հարցեր, ընդգծվել մշակութային և հումանիտար բնագավառներում նախագծերի խթանման կարևորությունը։ Նախարարի տեղակալը դեսպանին շնորհակալություն է հայտնել երկու երկրների ժողովուրդների բարեկամությանը համահունչ երկկողմ համագործակցության աշխուժացմանը միտված ջանքերի համար՝ մաղթելով քաջառողջություն և հաջողություններ հետագա գործունեությունում։

18:28 - 28 հոկտեմբերի, 2021

Թուրքական անօդաչուների մատակարարումն Ուկրաինային չի նպաստում Դոնբասում իրավիճակի կարգավորմանը. Պեսկով |tert.am|

tert.am: Թուրքական հարվածային անօդաչուների մատակարարումն Ուկրաինային կարող է հանգեցնել Դոնբասի շփման գծում տիրող իրավիճակի ապակայունացմանը: ՏԱՍՍ գործակալության փոխանցմամբ՝ նման կարծիք է հայտնել ՌԴ նախագահի խոսնակ Դմիտրի Պեսկովը ասուլիսի ժամանակ:«Մենք իսկապես լավ և հատուկ հարաբերություններ ունենք Թուրքիայի հետ, սակայն տվյալ դեպքում, ցավոք սրտի, հաստատվում են մեր մտավախություններն այն մասին, որ նման տեսակի սպառազինման մատակարարումներն ուկրաինացի զինվորականներին կարող են հանգեցնել իրավիճակի ապակայունացմանը շփման գծում»,- ասել է Կրեմլի ներկայացուցիչը:

15:02 - 27 հոկտեմբերի, 2021

Լուգանսկի ներկայացուցիչը գնահատել է Կիևի կողմից Դոնբասում թուրքական անօդաչուի կիրառումը |tert.am|

tert.am: Կիևը, Դոնբասում կիրառելով թուրքական Bayraktar հարվածային անօդաչուները, ստուգել է՝ որքան հեռու իրենք կարող են գնալ Մինսկի պայմանավորվածությունները խախտելով:Ինչպես փոխանցում է «ՌԻԱ Նովոստի»-ն, նման կարծիք է հայտնել Լուգանսկի ինքնահռչակ հանրապետության ներկայացուցիչ Ռոդիոն Միրոշնիկը: « Ուկրաինայի բարձրագույն պաշտոնյաների հայտարարություններն օդաչու կիրառելու և Մինսկի պայմանավորվածությունների գիտակցված խախտման մասին մարտահրավեր է և փորձ՝ գործով պարզելու, թե էլ ինչ իրենց թույլ կտրվի անել, որքան հեռու կարող են իրենք գնալ, ինչի համար գլխին հարվածա չեն ստանա, և որքան կհանդուրժեն այդ ամենը»,- ասել է Միրոշնիկը:

13:31 - 27 հոկտեմբերի, 2021

Ուկրաինան «Բայրաքթար» է կիրառել Դոնբասում |1lurer.am|

1lurer.am: Ուկրաինայի զինված ուժերը երեքշաբթի Դոնբասի տարածքում առաջին անգամ կիրառել են «Բայրաքթար» մարտական հետախուզական և հարվածային անօդաչու համակարգը՝ հայտնել է Դոնբասում միացյալ ուժերի շտաբի մամուլի կենտրոնը։ Այս մասին տեղեկացնում է Interfax-ը: «Հակառակորդին զինադադար պարտադրելու նպատակով Ուկրաինայի զինված ուժերի գերագույն գլխավոր հրամանատարի հրամանով կիրառվել է «Բայրաքթար»։ Անօդաչու թռչող սարքը չի հատել բախման գիծը և կառավարվող ռումբով ոչնչացրել է մեկ հրետանի»,- ասվում է հաղորդագրության մեջ։ Նշվել է նաև, որ «Բայրաքթարի» կիրառմամբ հաջողվել է դադարեցնել ուկրաինական դիրքերի ռմբակոծումը, ինչի հետևանքով զոհվել է մեկ ուկրաինացի զինվոր, մեկը վիրավորվել է: Դոնեցկի ղեկավարությունը հայտնել է, որ երեքշաբթի ուկրաինական բանակը առաջ է շարժվել Դոնբասի Ստարոմարևկա գյուղի տարածքում գործող անվտանգության գոտում։ Լուգանսկն էլ ուկրաինացի զինվորականներին մեղադրել է Մինսկյան պայմանավորվածությունները խախտելու համար՝ կապված Դոնբասում Ուկրաինայի զինված ուժերի կողմից թուրքական արտադրության «Բայրաքթար» մարտական ԱԹՍ-ի կիրառման հետ։

12:44 - 27 հոկտեմբերի, 2021

Բրիտանիայի վարչապետի և Ռուսաստանի նախագահի միջև հեռախոսազրույց է կայացել |azatutyun.am|

azatutyun.am: Մեծ Բրիտանիայի վարչապետ Բորիս Ջոնսոնի և Ռուսաստանի նախագահ Վլադիմիր Պուտինի միջև երկուշաբթի օրը հեռախոսազրույց է կայացել, որի ընթացքում Ջոնսոնը հայտնել է, որ երկու երկրների միջև դեռ առկա են զգալի բարդություններ, այդ թվում՝ 2018 թվականին Սկրիպալների թունավորման պատճառով։ Բորիս Ջոնսոնը, ըստ հաղորդագրության, նշել է, որ երկու երկրների միջև հարաբերություններն այնպիսին չեն, ինչպիսին կցանկանար տեսնել։ Երկու պետությունների ղեկավարները քննարկել են նաև Ուկրաինայի հարցը, Ջոնսոնն ընդգծել է Ուկրաինայի ինքնիշխանության կարևորությունը

10:51 - 26 հոկտեմբերի, 2021

Ռուսաստանն է սկսել պատերազմը Ուկրաինայի արևելքում և Ռուսաստանն է խոչընդոտում խաղաղ կարգավորմանը. Պենտագոնի ղեկավար |azatutyun.am|

azatutyun.am: ԱՄՆ-ի պաշտպանության նախարար Լոյդ Օսթինն այսօր Կիևում տեղի ունեցած մամուլի ասուլիսում ասել է, թե Ռուսաստանն է սկսել պատերազմը Ուկրաինայի արևելքում և Ռուսաստանն է խոչընդոտում խաղաղ կարգավորմանը։ Նա նշել է, որ ԱՄՆ-ն կշարունակի հնարավորինս աջակցել Ուկրաինային իր ինքնիշխան տարածքը պաշտպանելու կարողությունները զարգացնելու համար։ 2014 թվականից ի վեր ԱՄՆ-ն 2,5 միլիարդ դոլարի աջակցություն է ցուցաբերել ուկրաինական ուժերին։ Լոյդ Օսթինն ասել է, որ Ուկրաինայի ինքնիշխանությանն ու տարածքային ամբողջականությանը ԱՄՆ-ի աջակցությունը անսասան է և հայտարարել․ «Մենք կրկին կոչ ենք անում Ռուսաստանին վերջ տալ Ղրիմի օկուպացիային, դադարեցնել պատերազմը Ուկրաինայի արևելքում, դադարեցնել իր անկայունացնող ակտիվությունը Սև ծովում և Ուկրաինայի սահմանների երկայնքով, ինչպես նաև հաքերային մշտական հարձակումները և չարամիտ այլ գործողությունները ԱՄՆ-ի և մեր դաշնակիցների դեմ»։ Խոսելով ՆԱՏՕ-ին Ուկրաինայի անդամակցության հեռանկարի մասին, նա ասել է, որ որևէ երրորդ երկիր չի կարող վետո դնել ՆԱՏՕ-ի անդամակցության որոշումներին։ «Ուկրաինան իրավունք ունի որոշելու իր սեփական արտաքին քաղաքականության ապագան, և մենք ակնկալում ենք, որ նրանք դա կարող են անել առանց կողմնակի միջամտության»,- նշել է նա։

09:16 - 20 հոկտեմբերի, 2021

Հայաստանի և Ուկրաինայի ՄԻՊ-երը Ծիծեռնակաբերդում հարգանքի տուրք են մատուցել Հայոց ցեղասպանության զոհերի հիշատակին

ՄԻՊ գրասենյակից տեղեկացնում են, որ ՀՀ մարդու իրավունքների պաշտպան Արման Թաթոյանի ուղեկցությամբ Ուկրաինայի Գերագույն ռադայի մարդու իրավունքների հանձնակատար Լյուդմիլա Դենիսովայի գլխավորած պատվիրակությունն այսօր այցելել է Ցեղասպանության զոհերի հուշահամալիր: Պատվիրակության անդամները ծաղիկներ են խոնարհել անմար կրակի մոտ՝ հարգելով 1915թ. անմեղ զոհերի հիշատակը: Հյուրերը եղել են Հայոց ցեղասպանության թանգարան-ինստիտուտում, ծանոթացել Հայոց ցեղասպանությունը հավաստող փաստաթղթերին ու վավերագրերին: Ուկրաինայի Գերագույն ռադայի մարդու իրավունքների հանձնակատար Լյուդմիլա Դենիսովան գրառում է կատարել Հայոց ցեղասպանության թանգարանի հուշամատյանում: Նշենք, որ խոշտանգումների կանխարգելման ոլորտում Եվրոպայում առաջատարներից համարվող Հայաստանի մարդու իրավունքների պաշտպանի փորձի փոխանակման նպատակով Հայաստանում է գտնվում Ուկրաինայի Գերագույն ռադայի մարդու իրավունքների հանձնակատարի գլխավորած պատվիրակությունը:

12:57 - 19 հոկտեմբերի, 2021

Նախագահ Արմեն Սարգսյանն ընդունել է Ուկրաինայի Գերագույն ռադայի մարդու իրավունքների հանձնակատարին

Հանրապետության նախագահ Արմեն Սարգսյանը հոկտեմբերի 18-ին ընդունել է Ուկրաինայի Գերագույն ռադայի մարդու իրավունքների հանձնակատար Լյուդմիլա Դենիսովային և նրա գլխավորած պատվիրակությանը: Հանդիպմանը մասնակցել է նաև Հայաստանի Հանրապետության մարդու իրավունքների պաշտպան Արման Թաթոյանը: Հանրապետության նախագահը ողջունել է ուկրաինական պատվիրակության այցը և մարդու իրավունքների պաշտպանության ոլորտում Հայաստանի և Ուկրաինայի միջև համագործակցության ամրապնդումը: «Մարդու իրավունքների պաշտպանության հարցերով զբաղվող կառույցների գործունեությունը և դերը շատ կարևոր են: Դուք աշխատում եք անմիջապես անհատների հետ, և մարդկանց ակնկալիքները ձեզնից շատ մեծ են»,- ինչպես հայտնում են ՀՀ նախագահի աշպատակազմից, նշել է Արմեն Սարգսյանը: Ուկրաինայի Գերագույն ռադայի մարդու իրավունքների հանձնակատարը, նախագահ Սարգսյանին տեղեկացնելով, որ Հայաստանում է խոշտանգումների կանխարգելման ոլորտում փորձի ուսումնասիրման նպատակով, նշել է, որ Հայաստանը և Ուկրաինան մարդու իրավունքների պաշտպանության ոլորտում համագործակցության լայն հնարավորություններ ունեն, և իր այցի շրջանակում ստորագրված հուշագիրը դրա համար լավ հիմքեր է ստեղծում:

18:00 - 18 հոկտեմբերի, 2021

Զելենսկին և Պուտինը Մերկելի և Մակրոնի հետ քննարկել են Դոնբասում հակամարտության կարգավորման քայլերը |armenpress.am|

armenpress.am: Ուկրաինայի նախագահ Վլադիմիր Զելենսկին հայտնել է, որ հեռախոսազրույց է ունեցել Գերմանիայի կանցլեր Անգելա Մերկելի և Ֆրանսիայի նախագահ Էմանուել Մակրոնի հետ: Այս մասին Զելենսկին գրառում է կատարել «Թվիթեր»-ում: Ինչպես տեղեկացնում է ՏԱՍՍ-ը, նա նշել է, որ հեռախոսազրույցի ընթացքում քննարկել են Դոնբասում առկա իրավիճակի կարգավորմանն ուղղված հարցեր, ինչպես նաև «Նորմանդական քառյակ»-ի (Գերմանիա, Ֆրանսիա, Ռուսաստան և Ուկրաինա) գագաթնաժողովի նախապատրաստական ընթացքը: Զելենսկին հայտնել է, որ Գերմանիան ու Ֆրանսիան կողմ են հաջորդական քայլերի շուրջ համաձայնության հասնելուն, որը կարող է ապահովել խաղաղություն երկրի արևելքում: ՌԴ նախագահ Վլադիմիր Պուտինը նույնպես հեռախոսազրույց է ունեցել Գերմանիայի կանցլեր Անգելա Մերկելի ու Ֆրանսիայի նախագահ Էմանուել Մակրոնի հետ: «Նորմանդական քառյակի» առաջնորդների գագաթնաժողովի անցկացման հնարավորության քննարկումը կշարունակվի: Այս մասին երկուշաբթի հայտնել Է Կրեմլի մամուլի ծառայությունը ՝ ամփոփելով ՌԴ նախագահ Վլադիմիր Պուտինի ՝ Գերմանիայի կանցլեր Անգելա Մերկելի և Ֆրանսիայի նախագահ Էմանուել Մակրոնի հետ հեռախոսազրույցի արդյունքները։ «Քառյակի երկրների արտգործնախարարները գործը կվարեն դեպի այդ ձևաչափով իրենց մակարդակով հանդիպման անցկացումը։ Պայմանավորվածություն է ձեռք բերվել նաև նպատակահարմարության դեպքում շարունակել համապատասխան խողովակներով «նորմանդական գագաթաժողովի» հնարավոր կազմակերպման նախադրյալների ուսումնասիրությունը», - ասված է հաղորդագրության մեջ:

22:06 - 11 հոկտեմբերի, 2021

Կիևում հայտնաբերել են Ուկրաինայի Գերագույն ռադայի պատգամավորի դին |azatutyun.am|

azatutyun.am: Այսօր առավոտյան Կիևում հայտնաբերվել է Ուկրաինայի Գերագույն ռադայի պատգամավոր Անտոն Պոլյակովի դին, հայտնում է «Ազատության» ուկրաինական ծառայությունը։ Պաշտոնական վարկածի համաձայն՝ Պոլյակովի ինքնազգացողությունը վատացել է ճանապարհին, տաքսու մեջ։ Շտապ օգնության ծառայության բժիշկներին չի հաջողվել փրկել նրա կյանքը, հայտնել է Կիևի ոստիկանությունը։ Մահվան փաստով հարուցվել է քրեական գործ «կանխամտածված սպանության» հոդվածով՝ «բնական մահ» նշագրմամբ։ 33-ամյա Պոլյակովը Գերագույն ռադայում ներկայացնում էր «Ժողովրդի ծառա» խմբակցությունը, սակայն 2019 թվականին իշխող ուժը որոշում է կայացրել դադարեցնել համագործակցությունը նրա հետ՝ «խմբակցության ներսում ոչ էթիկական պահվածքի» պատճառաբանությամբ։ Ինքը Պոլյակովը «Ազատության» ուկրաինական ծառայության հետ զրույցում հայտարարել էր, որ իրեն խմբակցությունից վտարել են այն ժամանակ գլխավոր դատախազի պաշտոնը զբաղեցնող Ռուսլան Ռյաբոշապկային անվստահություն հայտնելու համար ստորագրահավաք նախաձեռնելու պատճառով։ Արդյունքում՝ պատգամավորը միացել էր «Հանուն ապագայի» խորհրդարանական խմբակցությանը։

12:50 - 08 հոկտեմբերի, 2021

Չավուշօղլուն և Կուլեբան խոսել են Ուկրաինայում «Բայրաքթար» ԱԹՍ-ների համատեղ արտադրություն սկսելու մասին |azatutyun.am|

azatutyun.am: Թուրքիայի արտգործնախարարը ժամանել է Լվով, որտեղ ուկրաինացի գործընկերոջ՝ Դմիտրի Կուլեբայի հետ քննարկել է երկկողմ հարաբերությունների ամրապնդումը քաղաքականության, տնտեսության, տրանսպորտի, ինչպես նաև ռազմաարդյունաբերության ոլորտներում։ Ըստ պաշտոնական հաղորդագրության, կողմերը խոսել են մասնավորապես Ուկրաինայում «Բայրաքթար» անօդաչու թռչող սարքերի համատեղ արտադրություն սկսելու մասին։ Ուկրաինայի պաշտպանության նախարարությունը այս մասին համաձայնագիրը Անկարայի հետ ստորագրել էր դեռ անցած տարվա դեկտեմբերին՝ ղարաբաղյան երկրորդ պատերազմից հետո, որտեղ Ադրբեջանն առավելության հասավ նաև թուրքական անօդաչու թռչող սարքերի օգնությամբ։

09:30 - 08 հոկտեմբերի, 2021

Զելենսկին անժամկետ պատժամիջոցներ է սահմանել Ղրիմում ՌԴ Պետդումայի ընտրություններին առնչություն ունեցած 95 անձանց դեմ |azatutyun.am|

azatutyun.am: Ուկրաինայի նախագահ Վլադիմիր Զելենսկին անժամկետ անձնական պատժամիջոցներ է սահմանել Ղրիմի տարածքում Ռուսաստանի Դաշնության Պետդումայի ընտրություններին առնչություն ունեցած 95 անձանց նկատմամբ: Նշվում է, որ նրանց թվում ինչպես Ռուսաստանի, այնպես էլ Ուկրաինայի քաղաքացիներ են: Այդ անձանցից շատերն ընտրություններին մասնակցել են որպես թեկնածուներ:

12:02 - 06 հոկտեմբերի, 2021

Վրաստանում Ուկրաինայի հյուպատոսը բանտում այցելել է Սաակաշվիլիին |tert.am|

tert.am: Ուկրաինայի հյուպատոսը Ռուսթավի քաղաքի բանտում այցելել է Վրաստանի նախկին նախագահ Միխեիլ Սաակաշվիլիին: Ուկրաինայի արտաքին գործերի նախարարության մամուլի քարտուղար Օլեգ Նիկոլենկոյի խոսքով՝ քաղաքական գործչի վիճակը բավարար է: Նիկոլենկոն նշել է, որ ուկրաինացի դիվանագետները կշարունակեն հյուպատոսական և իրավական աջակցություն ցուցաբերել Սաակաշվիլիին, քանի որ վերջինս Ուկրաինայի քաղաքացի է: Սաակաշվիլիի փաստաբան Նիկա Գվարամիան հայտնել էր, որ իր պաշտպանյալը կշարունակի հացադուլը, քանի դեռ իրեն չեն ազատել բանտից: Վրացի քաղաքական գործիչը պահանջում է նաև ազատ արձակել այն մարդկանց, որոնք ձերբակալվել են իր պատճառով:

09:34 - 05 հոկտեմբերի, 2021

Սաակաշվիլին չի կարող «պատանդ վերցնել» Ուկրաինայի հետ հարաբերությունները. Զալկալիանի |1lurer.am|

1lurer.am: Թբիլիսիի և Կիևի հարաբերությունները չպետք է կախված լինեն մեկ մարդուց։ Այս մասին հայտարարել է Վրաստանի փոխվարչապետ և ԱԳ նախարար Դավիթ Զալկալիանին՝ մեկնաբանելով երկրի նախկին նախագահ Միխայիլ Սաակաշվիլիի ձերբակալությունը՝ փոխանցում է ТАСС-ը։ «Անթույլատրելի է, որ մի մարդ պատանդ վերցնի վրաց-ուկրաինական ռազմավարական գործընկերությունը։ Ես վստահ եմ, որ մեր հարաբերությունները հետագայում ևս աչքի կընկնեն լուրջ դինամիկայով»,- ասել է Զալկալիանին: Նա նշել է, որ դատախազությունից ստացված տեղեկատվությունը փոխանցվել է ուկրաինական կողմին:

17:43 - 02 հոկտեմբերի, 2021