Լիդիան Արմենիա

Լիդիան Արմենիան երկրաբանահետախուզական ընկերություն է, որը Հայաստանի կառավարությունից Ամուլսարի տարածքում համանուն ոսկու հանքավայրի շահագործման թույլտվություն է ստացել։

«Լիդիան Արմենիայի» բաժնետոմսերի 100%-ը պատկանում է «Լիդիան Ինթերնեյշնլ» ԲԲԸ-ն։ «Լիդիան Արմենիան» հիմնադրվել է 2005 թվականին։ Լիդիան Ինթերնեյշնլ ընկերության բաժնետերերի շարքում են Միջազգային ֆինանսական կորպորացիան, Վերակառուցման և զարգացման եվրոպական բանկը, ինչպես նաև բարեգործական մի շարք հայկական կազմակերպություններ։

 

 

Տարիների պայքարն ու բողոքներն իրենց արդյունքը տվեցին․ ՎԶԵԲ-ն այլևս հետաքրքրված չէ Լիդիանով․ ՀԲՃ

Տարիների պայքարն ու բողոքներն իրենց արդյունքը տվեցին․ ՎԶԵԲ-ն այլևս հետաքրքրված չէ Լիդիանով․ ՀԲՃ

«Հայկական բնապահպանական ճակատ» կամավորական քաղաքացիական նախաձեռնությունը հայտարարություն է տարածել՝ ՎԶԵԲ-ի՝ Լիդիան ընկերությունում ու Ամուլսարի ծրագրում ներդրումները դադարեցնելու վերաբերյալ, որը ներկայացնում ենք ստորև․«2020թ. հուլիս ամսվա դրությամբ Վերակառուցման և զարգացման եվրոպական բանկը (ՎԶԵԲ) դադարեցրել է իր ներդրումները Լիդիան ընկերությունում և Ամուլսարի ծրագրում։ ՎԶԵԲ-ը 2009թ-ից ֆինանսավորել է Լիդիան ընկերությանը՝ սկզբում երկրաբանահետախուզական փուլում (2009թ. դրությամբ ունենալով 5,8 միլիոն կանադական դոլարի արժետոմս), այնուհետև հանքի շահագործման տեխնիկական ու տնտեսական հիմնավորումների կազմման ժամանակ (2016թ. ՎԶԵԲ-ի արժետոմսերի ընդհանուր արժեքը Լիդիանում 10․5 միլիոն կանադական դոլար էր), իսկ արդեն ծրագրի վերջնական հաստատումից հետո՝ բնապահպանական և սոցիալական բացասական ազդեցության մեղմման նպատակով (ի դեպ, այդ ծրագրով էր նախատեսվել Լիդիանի կողմից Ջերմուկ ազգային պարկի ստեղծումը և կարմիր գրքում գրանցված բուսատեսակի տեղափոխման ծրագիրը)։ 2018թ․ դրությամբ ՎԶԵԲ-ը համարվում էր Լիդիան Ինթերնեշընըլի խոշոր 7 բաժնետերերից մեկը։ Վերակառուցման և զարգացման եվրոպական բանկը խոշոր ֆինանսական հաստատություն է, որի բաժնետոմսերի շուրջ 60 տոկոսը պատկանում է Եվրամիության անդամ պետություններին, ԵՄ-ին և Եվրոպական ներդրումային բանկին։ Կենտրոնակայանը գտնվում է Լոնդոնում։ Այն ստեղծվել է 1991թ․ Միացյալ նահանգների և եվրոպական պետությունների կողմից հետխորհրդային երկրներում մասնավորեցմանը խթանելու և բիզնեսին աջակցելու նպատակով։ Հանդիսանում է պետությունների և մասնավոր ընկերությունների խոշոր վարկատու, այդ թվում՝ Հայաստանում, որի արտաքին պարտքի մինչև մեկ տոկոսը պատկանում է ՎԶԵԲ-ին։ Համաշխարհային բանկի անդամ հանդիսացող Միջազգային ֆինանսական կորպորացիայի հետ միասին, որը դադարեցրեց իր մասնակցությունն Ամուլսարի ծրագրում դեռ 2017թ-ին, ՎԶԵԲ-ը հանդիսացել է Լիդիանի ո՛չ միայն խոշոր ֆինանսական հենասյունը, այլև քաղաքական ապավենը։ Լիդիան ընկերության ղեկավարները հաճախ էին շահարկում ՎԶԵԲ-ի անունն ու հեղինակությունը՝ որպես  Ամուլսարի հանքարդյունաբերական ծրագրի «բարձր ստանդարտների» երաշխիք։ Կարելի է միայն կռահել, որ Միացյալ Թագավորության արտաքին գերատեսչության ահռելի ներգրավվածությունն Ամուլսարի հարցում և ՀՀ կառավարության հետ այս թեմայով պարբերական հանդիպումները կարող էին պայմանավորված լինել բրիտանական խոշոր կապիտալ ունեցող այս բանկով։ Հայաստանում Միացյալ Թագավորության դեսպանատան ներգրավվածության մասին պարբերաբար գրել է open democracy կայքը։ Լիդիանի երկարատև հովանավոր ՎԶԵԲ-ն իր կայքում  գրում է. «2019-ին Լիդիան Ինթերնեշընլըն անվճարունակ է դարձել և իր վարկատուներից պաշտպանություն է հայցել Կանադայում, ինչը հնարավորություն է տվել ընկերությանը վերակազմավորել իր բիզնեսն ու ֆինանսական գործերը։ Սնանկության գործընթացների շրջանակում ընդունվել է կորպորատիվ վերակազմավորման պլան, որի արդյունքում ընկերության ակտիվների նկատմամբ վերահսկողությունն ու սեփականատիրությունն անցնում է Լիդիան Կանադային, Լիդիան ՄԹ-ին և Լիդիան Արմենիային պարտք տված երեք խոշորագույն պարտատուներին, իսկ Լիդիան Ինթերնեշնլը պետք է փակվի Ջերսիում իրավասու դատարանի գործընթացներին համապատասխան։ 2020թ. հուլիսի դրությամբ Ամուլսարի ոսկու հանքի սեփականատեր է Լիդիան Վենչըրս Կանադան, որի բաժնետեր ՎԶԵԲ-ը չի հանդիսանում։ Ներկա դրությամբ ՎԶԵԲ-ը բաժնեմաս ունի միայն Ջերսիում գրանցված Լիդիան Ինթերնեշընըլում, որն այլևս որևէ գույքի չի տիրապետում։ Պարտատերերը դիմելու են Ջերսիի դատարան ընկերության լուծարման համար։ Բանկը Լիդիան Ինթերնեշնլի բաժնետիրական կապիտալն ավելացնելու նպատակով ընկերությունում ներդրել է 11.4 միլիոն կանադական դոլար՝ գնելով արժետոմսեր։ Այս գումարներն օգտագործվել են Բնապահպանական ու սոցիալական ազդեցությունը մեղմացնելու նպատակով։ ՎԶԵԲ-ը ներդրում չի կատարել Լիդիան Վենչըրսում և դրա նկատմամբ ֆինանսական հետաքրքրություն չունի»։ Կարելի է փաստել, որ ներկա դրությամբ Ամուլսարի ծրագրից դուրս են եկել բոլոր հիմնական ներդրողները, և մասնավորապես՝ ՎԶԵԲ-ն ու ՄՖԿ-ն, որոնք Լիդիանի քաղաքական հենարանն էին և որոնց հեղինակությանն ու «բարձր չափանիշներին» հղում էր անում ընկերությունը։ Ջերսիում ընթացող լուծարման գործընթացում ներգրավված են ծանր տեխնիկա տրամադրող երկու խոշոր պարտատերեր՝ Caterpillar Financial Services Uk-ը և արտահանումների խթանման շվեդական SEK հիմնադրամը։ Լիդիանի սեփականատերերն այժմ Orion Resource Partners, Osisko Mining and Resource Capital Fund ներդրումային ֆոնդերն են։ Փաստացի գոյություն չունի նաև Լիդիան Ինթերնեշնլ ընկերությունը, որը Հայաստանին սպառնում էր միջազգային արբիտրաժով։ Հայկական բնապահպանական ճակատի գնահատականով՝ տեղացիների աննկուն պայքարն ու ՎԶԵԲ-ին գրված բազմաթիվ բողոքի նամակները, ինչպես նաև 2014, 2017 և 2020 թվականներին Ջերմուկ համայնքի բնակիչների և բնապահպանական կազմակերպությունների անունից ՎԶԵԲ-ի Ծրագրերի հաշվետվողականության անկախ մեխանիզմին հասցեագրված գանգատարկումը հասան իրենց նպատակին։ Թեև 2014թ․ բողոքը մերժվել էր, իսկ 2017-ինը բանկն ընդհանրապես հրաժարվել էր դիտարկել, 2020-ին ներկայացված բողոքին ընթացք է տրվել, և հուսով ենք, որ ՎԶԵԲ-ը կկարողանա պատասխան տալ այս տարիների ընթացքում բնապահպանական ու սոցիալական այսաստիճան բացասական ազդեցություն ունեցող ծրագրին աջակցելու համար։ Ամուլսարի ծրագրից հրաժարվելու վրա կարևոր ազդեցություն ունեցավ նաև ֆինանսավորող շուրջ մեկ տասնյակ հաստատություններին հասցեագրված առցանց հանրագիրը, որը բացվել է 2016թ․ և մինչ օրս հավաքել 27000 ստորագրություն։ Ամուլսարի հանքարդյունաբերական ծրագրի ֆինանսավորումը դադարեցնելու պահանջով հանրագրին միացել էին ոչ միայն Հայաստանի բնակիչներն ու արտերկրի հայերը, այլև Ամուլսարի ծրագիրը ֆինանսավորող բանկերի և ընկերությունների հիմնադրման երկրների՝ Մեծ Բրիտանիայի, Կանադայի, ԱՄՆ-ի և այլ պետությունների բազմաթիվ քաղաքացիներ։ Այս հաղթանակում կարևոր դեր ունեցավ նաև միջազգային համերաշխությունն Ամուլսարի պայքարին՝ տասնյակ լրագրողներ, կազմակերպություններ ու բազմաթիվ անհատներ նպաստեցին խնդրի բարձրաձայնմանը միջազգային լրատվամիջոցներում, իրենց պետական օղակներում, քաղաքների փողոցներում։ Ամուլսարում հանք բացելով շահագրգռված անձանց ու ձեռնարկություններին, ներառյալ սփյուռքի դրամատերերին, Ջերմուկից ու Երևանից բազմիցս կոչեր են հասցեագրվել, որպեսզի նրանք չվատնեն իրենց դրամը՝ ներդնելով այն Լիդիանում։ Ստացվում է, որ բազմաթիվ արժետոմսեր փոշիացել են անհեռանկար այս ծրագրին հավատալու պատճառով։  Այս փուլում վերջնական հաղթանակի համար ՀՀ Շրջակա միջավայրի նախարարությունը պետք է ուժը կորցրած ճանաչի 2016թ-ին Հայաստանի նախկին կոռումպացված կառավարության կողմից Ամուլսարի ՇՄԱԳ-ին տված բնապահպանական դրական եզրակացությունը»։
14:55 - 16 օգոստոսի, 2020
Կառավարությունը պետք է անի ամեն ինչ, որպեսզի հանքը չբացվի․ Ջերմուկի քթի տակ հանք շահագործելն անտրամաբանական է․ Սրբուհի Գրիգորյան

Կառավարությունը պետք է անի ամեն ինչ, որպեսզի հանքը չբացվի․ Ջերմուկի քթի տակ հանք շահագործելն անտրամաբանական է․ Սրբուհի Գրիգորյան

Ամուլսարի շուրջ ծավալվող իրադարձությունները շարունակում են մնալ հանրային քննարկման տիրույթում։ Վերջին օրերին Ջերմուկում իրավիճակը լարված է։ Սա այն բանից հետո, երբ Ամուսարի հանքը շահագործելու նպատակ ունեցող «Լիդիան» ընկերության կողմից վարձված պահնորդական ծառայությունը հեռացրեց բնակիչների տեղադրած շարժական տնակները ու փոխարենը տեղադրեց իր տնակները։ Արդեն մի քանի օր է՝ ջերմուկիցներն ու բնապահպանները ակցիաներ են իրականացնում Ամուլսար տանող ճանապարհին։ Նրանք պահանջներ են ներկայացրել կառավարությանը՝ հեռացնել պահնորդական ծառայության կողմից տեղադրված տնակները, սադրանքներ հրահրող պահնորդական ծառայությանը զրկել լիցենզիայից եւ վերջնական դիրքորոշում հայտնել խնդրի վերաբերյալ։ Թեմայի շուրջ Infocom.am-ը զրուցել է «Լուսավոր Հայաստան» խմբակցության պատգամավոր Սրբուհի Գրիգորյանի հետ։ Պատգամավորի համոզմամբ՝ ամեն ինչ պետք է անել, որպեսզի հանքը չշահագործվի․ «Ես տեղանքին շատ լավ ծանոթ եմ, եւ Սիսիան եկող բոլոր ջրերի ակունքները՝ այդ թվում նաեւ Որոտան գետի, հենց այդ հատվածներում են, եթե հանքը շահագործվի, էկոլոգիական խնդիրների առջեւ կանգնելու է ոչ միայն ամբողջ Վայոց Ձորը՝ Ջերմուկով, Արենիով հանդերձ, այլեւ ամբողջ Սյունիքը, որովհտետեւ Որոտանը ամենախոշոր գետերից մեկն է, սկիզբ է առնում հենց Ամուլսարից, գնում խառնվում Արաքսին․ սա առաջին խնդիրն է։ Բացի էկոլոգիական խնդիրները՝ այն կարծիքին եմ, որ ՀՀ-ում պետք է աստիճանաբար գնալ մյուս հանքերի փակմանը, որովհետեւ դրանք երկարաժամկետ առումով ավելի մեծ վնաս են տալիս, քան այդ ընթացքում օգուտ, այլ հարց է, եթե հանքը շահագործի հենց պետությունը, եւ ամբողջ եկամուտը ուղղվեն այլ խնդիրներին»,- ընդգծեց Գրիգորյանը։ Պատգամավորը հավելեց՝ չի ցանկանա, որ ՀՀ-ն դառնա հանքավայր։ Վերջինս նկատեց, թե տարբեր կարծիքներ կան, որ Ամուլսարի պահապանները վերջին օրերին սկսեցին ակտիվանալ, սակայն դա թյուր կարծիք է․ նրանք ավելի վաղ են սկսել իրենց պայքարը, անգամ մինչեւ հեղափոխությունը։ Գրիգորյանն ասաց, որ հետեւում է իրադարձություններին եւ Ամուլսարի պաշտպանների կողքին է։ «Հանդես եմ եկել հայարարությամբ, որ կառավարությունը կարողանա քայլեր ձեռնարկել՝ վերջնական եզրակացության գալու, այսինքն՝ ամեն ինչ անել, որ հանքը չշահագործվի։ Հայաստանը նույնպես պետք է աստիճանբար գնա հանքերի եւ կոմբինատների փակման, որովհետեւ ավելի մեծ են դրանց երկարատեւ վնասները, քան վճարած մի քանի կոպեկ հարկը»,- հավելեց Գրիգորյանը։ Անդրադառնալով ոստիկանության գործողություններին՝ պատգամավորն ասաց, որ հետեւում է նաեւ իրավապահների  միջամտությանը, եւ նշեց, որ ոստիկանությունը սկսել է շատ ակտիվորեն բռնի ուժ կիրառել։ Գրիգորյանն ընդգծեց, որ խոսքը միայն Ամուլսարում տեղի ունեցածի մասին չէ։ Պատգամավորի խոսքով՝ այս առումով մենք հետընթաց ունենք, որովհետեւ ոստիկանությունը պետք է անհամաչափ ուժ չկիրառի քաղաքացիների նկատմամբ։ Ըստ Գրիգորյանի՝ յուրաքանչյուրը կարող է իր ձայնը բարձրացնել ժողովրդավար երկրում, եւ նրա հանդեպ բռնի ուժ չպիտի կիրառվի։  Խոսելով այն տեսակետների մասին, թե կառավարությունը օգտագործում է արտակարգ դրության իրավիճակը՝ Ամուլսարի խնդիրը լուծելու եւ քաղաքացիների ակցիաները ճնշելու համար, պատգամավորն ասաց․ «Այդ ցույցերը սկսեցին դեռեւս այն ժամանակ, երբ Տավուշում կրակոցներ էին, երբ իրավիճակը լարված էր, եւ բոլորիս ուշադրությունը, այդ թվում՝ լրագրողների, սեւեռված էր հյուսիսային սահմանի եւ Նախիջեւանի իրադարձություններին։ Մենք հիմա չպետք է այսպես աչքաթող անենք որեւէ խնդիր՝ կնետրոնանալով ամենակարեւորների վրա։ Չեմ կարծում, թե կառավարությունը այդ աստիճանի կիջներ, որովհետեւ դա հատուկ էր նախորդ կառավարություններին, ամեն դեպում դա իմ ցանկությունն է, որ այդպես չլինի։ Եթե հիշում եք՝ այն ժամանակ հենց սահմանին կրակոցներ էին լինում, նախկին իշխանությունները նման գործողություններ էին սկսում, դա նախորդի ձեռագիրն է, որի կրկնությունը պետք է բոլորով բացառենք» ։ Գրիգորյանը նշեց, որ կառավարությունը չի կարող խնդիրը թողնել այս անորոշ, լողացող իրավիճակում։ Պատգամավորի կարծիքով՝ հարցի լուծման անընդհատ ձգձգումը կարող է իրոք բերել բախումների՝ Լիդիանի աշխատակիցների, ոստիկանության եւ բնակիչների միջեւ։ Գրիգորյանի համոզմամբ՝ խնդրի լուծումը պետք է տա կառավարությունը, պետք է վերջապես տեղից շարժվել, նորից ուսումնասիրել խնդիրը։ ««Իմ քայլից» որոշ պատգամավորներ այս բանավեճերի ընթացքում ներկայացրել են, որ շահագործման դեպքում որոշակի գումարներ գնալու են հայոց բանակին եւ այլն, բայց նորից պետք է ե՛ւ սպասվելիք հարկերը , ե՛ւ առողջապահական խնդիրները, որոնց հանգելու են սերունդները, էկոխնդիրները, դրվեն նժարին։ Այսօր Ջերմուկի քթի տակ հանք շահագործելը ոչ մի տրամաբանության մեջ չի տեղավորվում։ Եթե մենք նայենք մեր երկրի հողային ռեսուրսները, կհասկանանք, որ այլեւս ոչ մի քառակուսի մետր չենք կարող դնել հանքի տակ, բացի այդ՝ մենք գիտենք, որ Կապանի քթի տակ գտնվում է Քաջարանի պոչամբարը։ Մենք այդքան հեկտարը դարձրել ենք պոչամբար, հետեւաբար, հիմա ոչ մի թիզ հող այլեւս չպետք է դառնա հանքի զոհ՝ այն էլ օտար երկրները հարստացնելու համար»,- հավելեց պատգամավորը։ Նա ընդգծեց, որ երկար ուսումասնիրել է խնդիրը եւ հիմա հավաստիացնում է, որ հանքի շահագործման դեպքում խմելու ջրի խնդիր է առաջանալու՝ բաժակներում թունավոր ջուր է լինելու։ Ըստ պատգամավորի՝ հանքի շահագործումը, եթե անգամ այս կառավարության վերջը չլինի, ապա իշխանության վարկանիշի անկում անպայման կլինի․ «Բայց իշխանութունը չպետք է մտածի վարկանիշի մասին, որովհետեւ ցանկացած իշխանություն եւ ցանկացած քաղաքական գործիչ ժամանակավոր է։ Հավերժ է մեր երկիրը եւ շատ երկարաժամկետ վտանգվելու է քաղաքացիների առողջությունն ու մեր երկրի էկոհամակարգը։ Իշխանությունները գալու-գնալու են, ինչքան էլ ուժեղ կառչած լինեն իրենց աթոռներից, մենք նախկինում էլ դա տեսանք, մենք բոլորս պետք է մտածենք մեր երկրի եւ ապագա սերունդների մասին»,- եզրափակեց Գրիգորյանը։ Infocom.am-ը զրուցեց նաեւ «Լուսավոր Հայաստան» խմբակցության պատգամավոր Հրանտ Այվազյանի հետ, որն ընդգծեց՝ ցանկացած պարագայում դեմ է բռնությանը, իսկ հարցի լուծումը պետք է գտնվի միայն իրավական գործընթացների արդյունքում։ Այվազյանը նշեց, որ գործող հէկերը եւ հանքերը նույնպես պետք է գործեն իրավական դաշտում եւ չվնասեն շրջակա միջավայրը՝ համապատասխան լինեն բոլոր չափորոշիչներին։  Խոսելով «Էլարդ» ընկերության փարձաքննության մասին՝ Այվազյանը նշեց, որ չի կարող խիստ մասնագիտական գնահատական տալ դրան, սակայն չի հերքում, որ գուցե անհրաժեշտություն կա մեկ այլ տեղ պատվիրել նոր փորձաքննություն։ Պատգամավորի կարծիքով՝ բնակիչների պահանջներն արդարացի են, եթե կասկածներ կան, պետք է փարատվեն, իսկ անհամաչափ ուժի գործադրումը բացառվի։  «Ես չեմ կարող ասել՝ իշխանությունը կողմ է, թե դեմ հանքի շահագործմանը, բայց այս լռությունը, ինձ համար նույնպես անընդունելի է։ Միգուցե դա կախված է նրանից, որ նոր նախարար ունենք ու դեռ լիովին չի ուսումնասիրել խնդիրը, բայց այնտեղ կան մարդիկ, որոնք նախկինում ծանոթ են եղել խնդրին, ունեն իրենց կարծիքները։ Կարծում եմ՝ այստեղ նաեւ քաղաքական կամք դրսեւորելու խնդիր կա, պետք է կառավարությունը իր դիրքորոշումը հստակ հայտնի»,- եզրափակեց Այվազյանը։ Ասպրամ Փարսադանյան
15:10 - 09 օգոստոսի, 2020
Ոստիկանությունն Ամուլսարի խնդրով Երեւանում իրականացված ակցիաների հարցում երկակի ստանդարտներով է առաջնորդվում

Ոստիկանությունն Ամուլսարի խնդրով Երեւանում իրականացված ակցիաների հարցում երկակի ստանդարտներով է առաջնորդվում

«Արտակարգ դրության իրավական ռեժիմի մասին» ՀՀ օրենքի հոդված 7-ի համաձայն՝ արտակարգ դրության ժամանակ  հավաքներ կամ հանրային միջոցառումներ իրականացնելը սահմանափակվում կամ արգելվում է։ Չնայած Հայաստանի Հանրապետությունում ամիսներ շարունակ գործում է արտակարգ դրության ռեժիմը, քաղաքական տարբեր խմբավորումներ, քաղաքացիների խմբեր չեն հետեւում օրենքի պահանջին․ այս ընթացքում հավաքներ ու բողոքի ակցիաներ են կազմակերպել ոչ միայն քաղաքական ուժերի ներկայացուցիչները, օրինակ, ԲՀԿ-ականները՝ Գագիկ Ծառուկյանին առնչվող քրեական գործերի մասին հայտնի դառնալուց հետո, այլ նաեւ Ամուլսարը որպես հանք շահագործելու նպատակ ունեցող «Լիդիան» ընկերության աշխատակիցները, հանքի շահագործմանը կողմ քաղաքացիները։ Վերջիններս հուլիսի 30-ին իրենց բազմամարդ հավաքն իրականացնում էին կառավարության շենքի մոտ՝ հիմնականում չպահելով սոցիալական հեռավորություն։ Դրվագները՝ Tert.am-ի տեսանյութից Երեկ կառավարության շենքի դիմաց ակցիա էին իրականացնում արդեն Ամուլսարը հանք դարձնելուն դեմ քաղաքացիները՝ իրարից բավականին մեծ հեռավորություն պահելով, նրանցից ոմանք, այդ թվում՝ իրավապաշտպան Նինա Կարապետյանցը, անհատական ակցիա էին իրականացնում։ ՀՀ ոստիկանության աշխատակիցները, սակայն, այս օրերին նույն վերաբերմունքն ու գործողությունները չեն դրսեւորել տարբեր գաղափարների համար ակցիա իրականացնող քաղաքացիների հանդեպ։ Մասնավորապես, թեեւ ոստիկանները ծառայություն էին իրականացնում կառավարության շենքի մոտ «Լիդիանի» աշխատակիցների՝ շուրջ 40 րոպեանոց հավաքի ժամանակ, սակայն նրանց բերման չենթարկեցին, նույնիսկ այն ժամանակ, երբ մասնակիցները, առանց դիմակները պատշաճ դնելու, խմբվել էին՝ լրագրողների հետ զրուցելու համար։ Իրավապահները միայն զգուշացրին, որ ակցիան պետք է դադարեցնել, քանի որ այն անօրինական է։ Այնինչ՝ նույնը տեղի չունեցավ նախօրեին՝ հանքին դեմ քաղաքացիների ակցիայի ժամանակ։ Ակցիան սկսելուց րոպեներ անց իրավապահներն ակտիվիստներին բերման ենթարկեցին՝ ոստիկանի օրինական պահանջը չկատարելու համար, եւ պնդեցին, որ արտակարգ դրության ժամանակ հավաքներ անելն արգելված է։ Բերման ենթարկվեց նաեւ Նինա Կարապետյանցը։ Ոստիկանական բաժանմունք տարան նաեւ փաստաբան Արա Կարագյոզյանին, որը ոչ թե ակցիայի մասնակից էր, այլ կառավարության շենքի մոտ էր՝ քաղաքացիների իրավունքները պաշտպանելու։ Դրվագը՝ News.am-ի տեսանյութից «Հավաքների ազատության մասին» ՀՀ օրենքի իմաստով՝ հավաքը երկու կամ ավելի անձանց խաղաղ եւ առանց զենքի ժամանակավոր ներկայությունն է որեւէ վայրում` հանրային հետաքրքրություն ներկայացնող հարցերի շուրջ ընդհանուր կարծիք ձեւավորելու կամ արտահայտելու մտադրությամբ:  Իսկ «Արտակարգ դրության իրավական ռեժիմի մասին» ՀՀ օրենքը ոչ թե միայն արգելում է հավաքներ իրականացնելը, այլ սահմանափակում։ Եւ, ինչպես արդեն նշեցինք, բերման ենթարկված իրավապաշտպան Նինա Կարապետյանցն անհատական ակցիա էր իրականացնում՝ միայնակ կանգնած։ Վերջինս մեր զրույցում պատմեց, որ մյուս ցուցարարներից հեռու էր կանգնած այնքան ժամանակ, քանի դեռ ոստիկանությունը մեկ այլ մասնակցի չէր մոտեցել․ «Մենք մոտեցանք՝ հարցնելու, թե ինչ պահանջ ունի ոստիկանությունը։ Բայց մինչեւ իմ առանձնանալը՝ ոստիկանության գնդապետերից մեկի հետ խոսակցություն ունեցանք, ու նա բաց հարց տվեց՝ դուք Ամուլսարի հարցի վերաբերյա՞լ եք եկել, ասացի՝ այո, իսկ նա՝ ուրեմն բոլորդ մի գաղափարի շուրջ եք հավաքվել, հետեւաբար դուք հանրահավաք եք իրականացնում, հետեւաբար բոլորին պետք է բերման ենթարկել։ Ես հարցրի՝ դուք գաղափարի համա՞ր եք բերման ենթարկվում, որովհետեւ փաստացի այդպես է ստացվում, մարդն ինչ մտածում էր, այն էլ ասաց»,- մեր զրույցում ասաց իրավապաշտպանը՝ համոզված լինելով, որ եթե փողոցով այդ պաստառով քայլելիս լիներ, մեկ է՝ իրեն էլի բերման էին ենթարկելու։ Կարապետյանցը նշեց, որ ինքը հենց այն սկզբունքով է գնացել կառավարության դիմաց, որ միայնակ պիկետ է անցկացնելու, անգամ եթե բոլորը հավաք իրականացնեն, քանի որ չի կարծում, թե այս շրջանում հավաքները խնդիրները լուծելու լավագույն տարբերակն են։ Մեր հարցին՝ արդյոք ոստիկանության երկակի ստանդարտները վկայում են նաեւ կառավարության դիրքորոշմա՞ն մասին, Նինա Կարապետյանցը նկատեց՝ փաստորեն, կարելի է այդպես կարծել․ «Որովհետեւ ոստիկանությունը վարչապետին կից կառույց է, հետեւաբար, ես վստահ եմ, որ այս հարցերը քննարկվել են, վստահ եմ, որ զեկուցվել են առանցքային իրադարձությունները, ուրեմն՝ վարչապետը գիտի՝ ինչ է կատարվում։ Բայց գուցե ոստիկանապետն ինքնուրույն է կայացնում որոշումները, գուցե համաձայնեցնում է։ Բոլոր դեպքերում, սա ակնհայտորեն խտրական վերաբերմունք է․ եթե ակցիա անելն արգելված է, ապա արգելված պիտի լինի բոլորի համար»։  Նինա Կարապետյանցն առաջիկա օրերին շարունակելու է միայնակ ակցիաներ անցկացնել, բայց այս պահին զբաղվում է միջազգային իրավապաշտպան կառուցներին արձագանքելով․ «Շատ վատ վիճակի մեջ եմ, որովհետեւ չեմ ուզում կառավարությանը թիկունքից հարվածել, որովհետեւ մեր գործողությունները որեւէ կերպ ուղղված չեն իշխանության դեմ, սակայն տեղի ունեցողն արդեն իսկ գրավել է միջազգային իրավապաշտպան կառույցների ուշադրությունը։ Ես կփորձեմ հնարավորինս զուսպ ու հավասարակշռված ներկայացնել փաստերը»,- ասաց մեր զրուցակիցը՝ շեշտելով, որ, այնուհանդերձ, հարցի լուծման այլընտրանք չկա․ Ամուլսարը հանք չի դառնալու։ Այսպիսով, արտակարգ դրության ընթացքում կազմակերպված ակցիաների ժամանակ ոստիկանությունն առաջնորդվում է երկակի ստանդարտներով՝ մի գաղափարին հարող ցուցարաներին բերման ենթարկելով, մյուսների ակցիաներին միայն որպես դիտորդ մասնակցելով եւ հսկելով հասարակական կարգի պահպանումը։ Այս հրապարակման մեջ դիտարկված են միայն Երեւանում տեղի ունեցած ակցիաները։ Ջերմուկում, թեեւ ոստիկանությունը պարբերաբար տեղեկացնում էր հավաքի՝ արտակարգ դրության ռեժիմի սահմանափակումները խախտելու մասին, սակայն բողոքի ակցիան չցրեց։ Հայարփի Բաղդասարյան
20:23 - 07 օգոստոսի, 2020
Իրավիճակն Ամուլսարում․ թարմացվող

Իրավիճակն Ամուլսարում․ թարմացվող

07․08․2020 19:00- Ամուլսարի պահապանների վագոն-տնակներից մեկն, այնուամենայնիվ, կմնա տարածքում, սակայն կտեղափոխվի այնպիսի վայր, որ չխոչընդոտի երթևեկությանը։ Ակցիան ավարտվեց, մասնակիցները նշեցին, որ իրենց պահանջը մասնակի բավարարվել է:17։54- «Լիդիան»-ի վագոն-տնակներն արդեն «Լիդիան»-ի տարածքում են, ճանապարհից կհեռացվեն նաև ցուցարարների վագոն-տնակները։   16։58- Այս պահին Ամուլսար տանող ճանապարհից տեղափոխում են «Լիդիան»-ի վագոն-տնակները։   16։56- Իրավական բոլոր օրենքները պաշտպանելով իրականացնում ենք մեր գործառույթները։ Այս տարածքում տնակաների տեղադրումը ապօրինի է, այս տարածքը, որտեղ տեղադրված են տնակները՝ պայմանագրային  հիմքունքներով տրված է եղել «Լիդիան» ընկերությանը։ Վերոնշյալ տարածքը չեզոքության գոտի է և ոչ ոք իրավունք չուներ, առանց համայնքի ղեկավարի թույլտվության ինչ-որ մի բան տեղադրել։ [Ջերմուկի համայնքապետի օգնական Հայկ Դավթյան]   16։19- |tert.am|Ամուլսարում բողոքի ակցիան վերսկսվել է, «Լիդիան»-ի վագոն-տնակը կտեղափոխեն. Ուղիղ   15։58- Վարչապետ Նիկոլ Փաշինյանը հետևում է Ամուլսարի շուրջ տեղի ունեցող զարգացումներին։ Այս մասին ասաց վարչապետի մամուլի խոսնակ Մանե Գևորգյանը։ Հարցին՝ հնարավո՞ր է վարչապետը հանդիպի Ամուլսարի տարածքում հանքի շահագործման դեմ պայքարող ակտիվիստներին, Մանե Գևորգյանն ասաց, որ այս պահին մեկնաբանություն տալ չի կարող։ |aysor.am|   14։10- «Լիդիան Արմենիան» հայտնում է, որ իր վագոն-տնակների տեղադիրքը օրինական է, իսկ ցանկացած տեղափոխման փորձ՝ ապօրինիъ առանց ընկերության համաձայնության, ինչպես և «Լիդիանի» հետ վերջին երկու տարիներին տեղի ունեցող հակաօրինական մյուս բոլոր գործընթացները: Այն հողերի վարձակալության համար, որտեղ օրինական տեղադրվել են «Լիդիան» վագոն-տնակները և որոնք վերջին երկու տարիների ընթացքում գտնվել են ապօրինի շրջափակման մեջ, Վարդան Հովհաննիսյանի օրոք համայնքային բյուջե «Լիդիանը» փոխանցել մոտ 500 միլիոն ՀՀ դրամ։ [«Լիդիան Արմենիա»]   12:56- Ջերմուկի համայնքապետարանն իրացնում է օրենքով սահմանված իր գործառույթը, եթե ամեն ինչ նորմալ ընթանա՝ ակցիա իրականացնող բնակիչները կհամարեն, որ իրենց առաջին պահանջը կատարվել է և առաջ կքաշեն մնացած պահանջները։ Այս պահին բնակիչները չունեն քննարկած հստակ որոշում՝ տնակների տեղափոխումից հետո ակցիաները կդադարեցվեն, թե ոչ։ [Ջերմուկի բնակիչ Շիրակ Բունիաթյան]   12։46-Կառավարությունը փորձեց «Էլարդի» փորձաքննությունն օգտագործել ի շահ իրենց նպատակների, որովհետև ի սկզբանե պարզ էր, որ Կառավարությունը որոշակի քաղաքական լծակներ ունի, որոնց շրջանակներում նա ուղղակիորեն չի կարող այդ հանքը չշահագործել: Այս մասին ասաց «Մեկ Առողջություն» կոալիցիայի համահիմնադիրներից Սիլվա Ադամյանը` խոսելով Ամուլսարի շուրջ լարված իրավիճակի և շրջակա միջավայրի առողջության ոլորտում պետական քաղաքականության վտանգների վերաբերյալ: |tert.am|   11։56- |factor.am| Ամուլսարի հանքի տարածքից հեռացնում են Լիդիան Արմենիայի տնակները. Ուղիղ   06․08․2020 22:25- Այսօրվա բողոքի ակցիան ավարտվեց։21:55- Ես պարզ բառերով ասացի, որ գործընթաց է գնում, մենք այսօր նամակ ենք գրել Լիդիանին, իրենք սխալվել են վագոն-տնակների տեղադրման կետով, վաղը կգան համապատասխան մասնագետները, ձեր ներկայությամբ ցույց կտան՝ որտեղ պետք է դրանք տեղադրվեն, և իրենց միջոցներով տնակները կտեղափոխվեն համապատասխան վայր։ Կոնկրետ ժամ չնշեմ, բայց ասում եմ, որ գործընթացը կսկսվի վաղն առավոտվանից։ [Ջերմուկի քաղաքապետ]21:35- Ջերմուկի քաղաքապետ Վարդան Հովհաննիսյանի կարծիքով՝ վաղը «Լիդիան Արմենիա» ընկերության և Ամուլսարի շահագործման դեմ հանդես եկողների վագոն-տնակները կհանվեն։ «Լուծումները քննարկվում են, կառավարությունը տեղյակ է։ Հիմա այստեղ տեղադրված վագոն-տնակի հարցի ուղղությամբ ենք նամակ գրել «Լիդիանին»։ Պայմանավորվել ենք երկու կողմերի հետ, որ 2 կողմից էլ պիտի վագոն-տնակները գնան, և միանշանակ, ճանապարհ չպետք է փակվի»,- ասաց Ջերմուկի քաղաքապետը՝ ավելացնելով, որ վագոն-տնակները ամենայն հավանականությամբ կտեղափոխվեն վաղը։ |armenpress.am|21:15- Վարչապետի՝ իմ ամուսնու մեկ տարի առաջվա լայվից հետո, ես չգիտեմ՝ ինչ փոխվեց, ինչու հանկարծ այս բռնկումը տեղի ունեցավ, եթե մեկ տարի ոչինչ տեղի չի ունեցել, ոչ մի պրոցես չի ընթացել, ի՞նչ տեղի ունեցավ, որ նորից սկսվեց։ Դա հարց է, որի պատասխանը ես չկարողացա գտնել՝ հետևելով իրադարձություններին, լսելով հարցազրույցներ, հատկապես այն մարդկանց, որոնք այնտեղ գործողություններ են անում։ Բուն խնդրի էության մեջ ոչինչ չի փոխվել, այսինքն՝ շահագործվելո՞ւ է, հանքը, թե՞ ոչ։ [Աննա Հակոբյան] |armenpress.am|19:35- Ամուլսարի հանքի շահագործման դեմ կառավարության դիմաց բողոքի ակցիա իրականացնող քաղաքացիներին բերման ենթարկելու վերաբերյալ ահազանգի և սոցիալական մեդիայի մշտադիտարկման հիման վրա Մարդու իրավունքների պաշտպանի հանձնարարությամբ արագ արձագանքման խմբերը մեկնել են ոստիկանության բաժիններ: Պաշտպանի ներկայացուցիչներն առանձնազրույցներ կունենան բերման ենթարկված անձանց, այդ թվում՝ բերման ենթարկված իրավապաշտպանների հետ,  կծանոթանան նրանց իրավունքների ապահովման վիճակին, բերման ենթարկելու հիմքերին:19:25- Ոստիկանները քիչ առաջ բերման ենթարկեցին Ազատության հրապարակի տարածքից ի պաշտպանություն Ամուլսարի հեծանվային երթ իրականացնել փորձող քաղաքացիներին։17։44- ՀԲՃ-ն հրապարակել է ի պաշտպանություն Ամուլսարի պայքարողների պահանջը: ՀՀ կառավարությանն ուղղված հանրային պահանջը հետևյալ կետերն է ներառում. «Հեռացնել Ջերմուկ տանող մայրուղու վրա տեղադրված տնակները։ Հեռացնել սադրանքներ հրահրող զինված վարձկաններին Ամուլսարից։  ՀՀ կառավարությունը պետք է չեղարկի 2016թ-ին Ամուլսարի ՇՄԱԳ-ին տրված դրական եզրակացությունը։ Ամեն օր ժողովուրդը էլ ավելի է ավելացնելու հանրային ճնշումը։ Ինչքան շուտ այս խնդիրները լուծումներ ստանան, այդքան ավելի քիչ կամուրջներ կայրվեն ՀՀ քաղաքացիների և կառավարության միջև։ Ամուլսարի ճակատագիրը այլևս որոշված է։ Ամուլսարը պիտի սար մնա ու վերջ»:   05․08․2020 23:55- Ամուլսարի տարածքում ակցիայի մասնակիցները որոշեցին այսօր ավարտել ակցիան, գնալ տուն՝ հանգստանալու և վաղը կրկին նույն վայրում ու նույն պահանջներով հավաքվելու։23:20- Բերման ենթարկված բոլոր քաղաքացիները դուրս են եկել ոստիկանության բաժնից և շարժվելով գալիս են այստեղ։ [Ակցիայի մասնակից]22:25- Ամուլսարում բողոքի ակցիայի մասնակիցներն ընթերցեցին բերման ենթարկված յոթ քաղաքացիների անունները՝ վանկարկելով՝ «ազատություն»։ Նշեցին, որ ոստիկանությունից իրենց հավաստիացրել են՝ մինչև երեք ժամը լրանալը բոլոր բերման ենթարկվածները կլինեն ազատության մեջ։22:10- Ամուլսարում այս օրերին պայքարող հարգելի քաղաքացիներ, սիրելի' ընկերներ, ցավում եմ, որ Կորոնավիրուսի պատճառով ի վիճակի չեմ լինել տեղում, ի վիճակի չեմ նույնիսկ ողջ գործընթացի պատճառներն ու մանրամասները վերահսկել։ Որոշ ճշտումներ արդեն իսկ իրականացրել եմ Լիդիանի պահնորդական կազմակերպության գործողությունների իրավաչափության վերաբերյալ եւ այդ առումով ողջ այս գործընթացի իրավական հստակ պարզաբանումների եմ սպասում Ոստիկանության եւ կառավարության գործընկերների կողմից։ Հորդորում եմ ոստիկանությանը լինել խիստ հարգալից ակտիվիստների նկատմամբ, գործել բացառապես իրավաչափության շրջանակներում։ [Գայանե Աբրահամյան]21:55- Քիչ առաջ տեղեկացա, որ Ամուլսարի տարածքում քաղաքացիներից մեկը վնասել է ոտքը, հայտնեցին, որ վերջինս վրաերթի է ենթարկվել ոստիկանական մեքենայի կողմից, հետևողական եմ լինելու գործի անաչառ քննությանը: [«Իմ քայլը» խմբակցության պատգամավոր Սոնա Ղազարյան]21:30- Վարչական իրավախախտումների վերաբերյալ օրենսգրքի 182-րդ հոդվածով (ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը) նախատեսված արարք կատարելու համար Ամուլսարի տարածքից 7 անձ բերվել է ոստիկանություն։  [ՀՀ ոստիկանության լրատվության վարչության պետի տեղակալ Էդգար Ջանոյան]21:00- Այս պահին Ամուլսարի շահագործման դեմ պայքարի մասնակիցները Ջերմուկի ճանապարհին նստացույց են իրականացնում։ Մինչ այդ ոստիկանների հետ միջադեպի ժամանակ վնասվել է Գնդեվազ գյուղի բնակիչներից մեկի ոտքը․ ոստիկանական մեքենան անցել է նրա ոտքի վրայով։ Քաղաքացին որպես բողոքի նշան հրաժարվում է հեռանալ ակցիայի տարածքից։20:30- Ամուլսարում իրավիճակը լարված է, ոստիկանությունը փորձում է բացել ճանապարհը և բերման ենթարկել բողոքի ակցիայի մասնակիցներին։19:55- Շիրակ Բունիաթյանն ընդգծեց, որ կարճաժամկետ լուծման համար իրենց պահանջը եղել և մնում է վագոն-տնակների ապօրինի տեղակայումը․ դրանք ամենաքիչը 30 մետր պետք է հետ գնան, իսկ հիմնական պահանջն այն է, որ Ամուլսարի հարցը ստանա վերջնական հանգուցալուծում։ Նա շեշտեց՝ հիմա այստեղ են ակցիա անում, բայց եթե ամեն ինչ գնում է նրան, որ իրենց քաղաքի ճանապարհը փակելով չեն ստանալու արձագանք, ուրեմն՝ հաջորդ ակցիաները կկազմակերպեն տարբեր վայրերում․ «Ամեն ինչ անելու ենք ոչ բռնի եղանակով, չենք տրվելու սադրանքների։ Մի օր Երևանում կանենք, մի օր, մեր վարչապետի օրինակին հետևելով, միջպետական ճանապարհ կփակենք։ Մեզ՝ մեր խաղաղ հավաքի վայրից հեռացնելով՝ մեր դիրքորոշումը չի փոխվում․ Ամուլսարի փրկության համար կանգնելու ենք մինչև վերջ, պայքարելու ենք թույլատրելի բոլոր ձևերով»։15։58- Այսօր՝ ժամը 17։00-ից սկսած, մեր ընտանիքներով հավաքվում ենք Ջերմուկի տաքսիների կանգառում և այնտեղից մեզ միացած մարդկանց հետ 18։00-ին գնալու ենք Ամուլսար՝ առաջ քաշելու մեր պահանջները։ [Ջերմուկի բնակիչ Շիրակ Բունիաթյան]   11։25- Ամուլսարի մասով ես մի քանի անգամ ասել եմ, որ գնահատականներ չեմ տալու, մինչև անձամբ փորձագիտական գնահատականներ չունենամ, մինչև մասնագետների հետ չխորհրդակցեմ: Հիմա առաջին հերթին ձեռնամուխ եմ եղել Սևանի, նրա ափերի հետ կապված խնդիրներին: Իսկ թե բնապահպաններն ու «Լիդիանի» ներկայացուցիչներն ինչ խնդիր են իրար մեջ լուծում, դա թող մյուս գերատեսչությունները, այդ թվում՝ ոստիկանությունը հասկանա և կարգավորի այդ հարցը: [Շրջակա միջավայրի նախարար Ռոմանոս Պետրոսյան] |lragir.am|   10։02- Երեկ գիշեր Ամուլսարում հավաքը դադարեցվեց և կշարունակվի այսօր: Հանրության պահանջներից ոչ մեկը դեռևս չի բավարարվել: Կառավարության և ԱԺ-ի ներկայացուցիչները շարունակում են պահպանել քար լռությունը: Ոստիկանությունը շարունակում է ՀՀ անունից պաշտպանել խոշոր կապիտալն ընդդեմ քաղաքացիների իրավունքների ու հանրային շահի: [ՀԲՃ]   09։23- Տեղեկացա Ջերմուկում տիրող իրավիճակից, և թե որքան են «Լիդիան» ընկերության վարձու աշխատակիցներն անցել բոլոր սահմանները` կռվի բռնվելով ոստիկանության հետ և հայհոյելով պայքարողներին։ Սա անթույլատրելի է և աններելի և պահանջում եմ նման ինքնակոչ պահնորդական կազմակերպություններին զրկել արտոնագրից, որոնք պարտավոր են լինել իրավապահ, բայց առաջինն են խախտում օրենքը։ [«Իմ քայլը» խմբակցության պատգամավոր Սոֆյա Հովսեփյան]   04․08․2020 22:22- Ամուլսարի ճանապարհին ցույց անող ակտիվիստներն ու Վայոց ձորի ոստիկանապետ գնդապետ Գևորգ Ազիզյանն ընդհանուր հայտարարի չեկան: Ամուլսար տանող ճանապարհը շարունակում է փակ մնալ ակտիվիստների կողմից: Ակտիվիստները պահանջեցին, որպեսզի բերեն ամբարձիչ կռունկ ու 30 մետրով դեպի հետ տանեն «Լիդիան Արմենիա» ընկերությանը պատկանող տնակները: Վայոց ձորի ոստիկանապետ Գևորգ Ազիզյանը նշեց, որ նման քայլի դիմել չեն կարող և ակտիվիստներին հորդորեց բացել ճանապարհն ու վաղը շարունակել իրենց հավաքը, որին չհամաձայնեցին ցուցարարները: Նրանք նշեցին, որ պատրաստ են իրենց ակցիան շարունակել նաև գիշերը: 21:30- Ցուցարարներին մոտեցավ Վայոց Ձորի ոստիկանապետ Գևորգ Ազիզյանը և տեղեկացրեց, որ իրենք իրավիճակի հանգուցալուծման համար քննարկումներ են ունեցել: «Չնայած սա այսօրվա լուծվելիք հարց չի, բայց փորձեցի մաքսիմալ լուծում գտնել: Այս պահին հարցը դեռ քննարկման փուլում է, վերջնական որոշված չէ, քննարկման փուլում է տեղաշարժման հարցը, բայց ես խոսք չեմ տալիս, որ դա կարող է այս պահին լինել: Վաղը կարող է ձեր խումբը գնալ կառավարություն և կոնստրուկտիվ քննարկում ունենալ այս հարցի հետ կապված, այնտեղ պարզաբանվելու է, որ իրականում այս պահին շահագործման մասին խոսք չկա»,- ասաց նա: Ազիզյանը նշեց՝ կցանկանար, որ այս հարցում լուծման հասնեն, տեղեկացրեց՝ կա հարուցված քրեական գործ, բայց ինքն իրավասություն չունի գործի մանրամասների վերաբերյալ բարձրաձայնելու. դա կանի, եթե նախաքննության մարմինը թույլ կտա: 20:35- Ի պաշտպանություն Ամուլսարի՝ ցույցի դուրս եկած քաղաքացիները հայտնեցին՝ փոխզիջումային առաջարկ ունեն, որի էությունը հետևյալն է. վագոն տնակները պետք է 30 մետր հետ տարվեն, իրենք իրենց հերթին պատրաստ են հանդիպել և հարցը քննարկել կառավարության անդամների հետ: Ցույցի մասնակիցները հնչեցված առաջարկը գոհունակությամբ ընդունեցին: Համաձայնություն ձեռք բերվեց այդ պահակակետները տեղափոխել ճամփեզրից 30 մ հեռավորության վրա: 20:20- Infocom-ի հետ զրույցում Էդգար Ջանոյանը հայտնեց, որ Ամուլսարի տարածքից, բացի տասը քաղաքացիներից, բերման է ենթարկվել նաև պահնորդական ծառայության երկու աշխատակից։ «Այսինքն՝ ընդհանուր առմամբ 12 բերման ենթարկված կա»,- նշեց նա։ 19:38- Ամուլսարի տարածքից տասը քաղաքացի բերման է ենթարկվել ոստիկանության բաժին: Այս մասին ասաց ՀՀ ոստիկանության լրատվության վարչության պետի տեղակալ Էդգար Ջանոյանը։ «Վարչական իրավախախտումների վերաբերյալ օրենսգրքի 182-րդ հոդվածով նախատեսված արարք կատարելու համար Ամուլսարի տարածքից 10 անձ բերվել է ոստիկանություն»,- նշել է նա։ Նշենք, որ Վարչական իրավախախտումների վերաբերյալ ՀՀ օրենսգրքի 182-րդ հոդվածը սահմանում է՝ ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը:19:10- Ամուլսարում քաղաքացիներին բերման ենթարկելու վերաբերյալ ահազանգեր ստանալուն պես Մարդու իրավունքների պաշտպանի հանձնարարությամբ արագ արձագանքման խումբ է գործուղվել Ջերմուկ քաղաք: Այցի ընթացքում Պաշտպանի ներկայացուցիչներն առանձնազրույցներ կունենան բերման ենթարկված անձանց հետ, կծանոթանան նրանց իրավունքների ապահովման վիճակին, բերման ենթարկելու հիմքերին:    17։09- Ոչ բռնի պայքարի միջոցներով իշխանության եկած պաշտոնյաները զարմանալիորեն չեն խոսում ու գրում, որ Ամուլսարում տեղի ունեցողը անընդունելի է ժողովրդավարական հասարակությունում։ Ավելին, կան նաև օրենքի խախտումներ՝ պահնորդների և ընկերության անունները չկային համազգեստների վրա, նրանց վկայականների առկայությունը և հարկային թափանցիկ գործունեությունը դեռ հարցականի տակ են. այս ամենի մասին բողոք է գրվել ոստիկանությանը։ [«Ձախ դիմադրություն»]   11։51- Ոստիկանությունից չմեկնաբանեցին, սակայն, մեր դիտարկումը, որ այդպիսով, փաստորեն, Ընկերությունը խախտել է Ջերմուկի ոստիկանության բաժնի պետ, ոստիկանության մայոր Ա․ Արմենակյանի տրամադրած փաստաթղթի այն հիմունքը, ըստ որի՝ շարժական տնակները չեն գտնվում Ընկերությանը պատկանող անշարժ գույքային միավորների տարածքում։    09։07- «Լիդիան Արմենիա» ընկերության կողմից վարձված պահնորդական ծառայությունը գիշերը հանել է Ամուլսար տանող ճանապարհի մոտ բնակիչների կողմից տեղադրված տնակները և տեղադրել սեփական տնակները։ [Ջերմուկի բնակիչ Շիրակ Բունիաթյան]
19:03 - 07 օգոստոսի, 2020
Ջերմուկի մայրուղու ճամփեզրին ինչպե՞ս է տիրացել Լիդիանը․ ՀԲՃ |armecofront.net|

Ջերմուկի մայրուղու ճամփեզրին ինչպե՞ս է տիրացել Լիդիանը․ ՀԲՃ |armecofront.net|

armecofront.net: Օգոստոսի 4-ին Ամուլսարում Լիդիան ընկերության վարձած զինված խմբավորումն ինքնակամ տեղահանել է Ամուլսարի պահապանների տնակներն ու նույն տեղում՝ Ջերմուկ մայրուղու ճամփեզրին, տեղադրել իր տնակները: Հիշեցնենք, որ երկու տարի անընդմեջ Ջերմուկի ու Գնդեվազի բնակիչները պահպանել են Ամուլսարը հանքարդյունաբերական ավերիչ ծրագրից՝ հերթապահելով դեպի Ամուլսար տանող ճանապարհներին և ապաստանել են այդ տնակներում։ Երեք դիմադրական կետերում էլ տնակները տեղադրված են ավտոմայրուղու եզրին՝ հանրային օգտագործման տարածքում և ծառայում են հանրային շահի պաշտպանությանը, այլ ոչ մասնավորի շահույթին։ Ամիսներ շարունակ Լիդիանը լրատվամիջոցներով, դատական համակարգին դիմելով և իրեն հասանելի այլ միջոցներով պնդում է, թե Ամուլսարի պահապանները ներխուժել են իր սեփականություն հանդիսացող տարածք և պետք է դուրս բերվեն այնտեղից: Նույն պնդումն արդեն որերորդ անգամ արել են նաև երեկվա ապօրինությունն արդարացնելու համար: Զարմանալի է, որ ՀՀ Ոստիկանությունը, որն ամիսներ առաջ մեզ պաշտոնական գրություն է տրամադրել այն մասին, որ Ամուլսարի պահապանների տնակները չեն գտնվում Լիդիանի սեփականություն հանդիսացող տարածքում, որ տարածքում ներխուժում առկա չէ, որ կատարված գեոդեզիական չափումները վկայում են, որ մայրուղու եզերքի կոորդինատները, որոնց վրա տեղադրված են եղել պահապանների տնակները, Լիդիան Արմենիա ընկերության տարածքը չեն համարվում (լուսապատճենները տեսեք հոդվածի վերջում): Սակայն ինչ-ինչ կասկածելի գործընթացներ նախաձեռնելով, Լիդիանը կրկին սանտիմետրեր է հաշվել տվել և պետական սեփականություն հանդիսացող ավտոճանապարհի պաշտպանվող եզրն արձանագրել է տվել իբրև իր սեփական տարածք, որն էլ վկայակոչելով իրագործել է օգոստոսի 4-ի հակաիրավական գործողությունները։ Ի դեպ, Լիդիանն իր տնակները տեղադրել է ասֆալտապատ հատվածի ճիշտ եզրին, ավելի մոտ երթևեկելի մասին, ստեղծելով վթարային իրավիճակ, քան Ամուլսարի պահապանների տնակներն էին։ Շեշտում ենք, որ ընկերության տնակները տեղադրվել են հանրային նշանակության տարածքի՝ մայրուղու և հարակից տարածքի վրա, որոնց օգտագործման համար սահմանված են սահմանափակումներ։ ՀՀ հողային օրենսգրքի 17-րդ հոդ․ համաձայն․ «Հոդված 17. Տրանսպորտի օբյեկտների հողերը1. Տրանսպորտի օբյեկտների հողեր են համարվում երկաթուղային, ավտոմոբիլային, օդային, խողովակաշարային տրանսպորտի օբյեկտների` երկաթուղային կայարանների, երկաթգծերի, երկաթուղային և ավտոճանապարհների, թունելների ու կամուրջների, ավտոկայանների, օդանավակայանների և այլ տրանսպորտային օբյեկտների կառուցման ու սպասարկման համար տրամադրված հողամասերը:2․ Տրանսպորտի օբյեկտների կառուցման և սպասարկման համար հողամասեր տրամադրելիս սահմանվում են պաշտպանական գոտիներ, որոնցում սահմանվում է հողերի օգտագործման ու դրա նկատմամբ սահմանափակումների կիրառման հատուկ ռեժիմ: Տրանսպորտային օբյեկտների հողերը չեն կարող սեփականության իրավունքով կամ վարձակալությամբ փոխանցվել այլ անձանց»։ ՀՀ հողային օրենսգրքի 60-րդ հոդ․ համաձայն․ «Հոդված 60. Քաղաքացիներին և իրավաբանական անձանց սեփականության իրավունքով չփոխանցվող հողերըԱրգելվում է քաղաքացիներին և իրավաբանական անձանց սեփականության իրավունքով փոխանցել պետական և համայնքային սեփականություն հանդիսացող այն հողամասերը, որոնք` 10) զբաղեցված են ընդհանուր օգտագործման արոտավայրերով, անասունների անցատեղերով, ճանապարհներով, բնական ջրհորներով, աղբյուրներով և տեղական ինքնակառավարման մարմինների որոշմամբ, այլ օբյեկտներով. 11) ջրային օբյեկտների և ավազանների առափնյա շերտերի, ընդհանուր օգտագործման ավտոմոբիլային, երկաթուղային ճանապարհների, խողովակաշարային և այլ տրանսպորտի համար առանձնացված շերտերի, էլեկտրահաղորդիչ գծերի, մայրուղային ջրամատակարարման և ջրահեռացման համակարգերի, գազատարների, ջրանցքների, ինչպես նաև դրանց հեռանկարային զարգացման համար առանձնացված (պահեստավորված) հողեր են»: «Ավտոմոբիլային ճանապարհների մասին» ՀՀ օրենքի 2-րդ հոդ․ համաձայն․«ճանապարհի պաշտպանական գոտի` ճանապարհի երկու կողմերում դասավորված, որոշակի լայնությամբ և հատուկ օգտագործման պայմաններ ունեցող հողաշերտ»։ Նույն օրենքի 13-րդ հոդ․ համաձայն․ «2. Հայաստանի Հանրապետության ընդհանուր օգտագործման ավտոմոբիլային ճանապարհների պաշտպանական գոտիների չափերը, հաշված ճանապարհի առանցքից, սահմանվում են`ա) 1-ին կարգի ճանապարհների համար` 70 մետր.բ) 2-րդ և 3-րդ կարգի ճանապարհների համար` 50 մետր.գ) 4-րդ կարգի ճանապարհների համար` 30 մետր»: Եթե Ջերմուկի մայրուղու ճամփեզրը հանդիսացող հողերն ինչ-որ կերպ հայտնվել են Լիդիանի սեփականության ներքո, ապա դա ապօրինի է կատարվել. պետք է պարզել, թե ո՞ր պաշտոնյաներն են արել այս գործարքը, ու նրանք պետք է պատասխանատվության ենթարկվեն, իսկ հողերը պետք է վերադարձվեն հանրային նշանակության: Նորից ենք շեշտում Ամուլսարի պաշտպանությունը հանրային շահ է հետապնդում, իրականացվում է հանրային կոլեկտիվ ջանքով, ուստի ճամփեզրի գործածումը Ամուլսարի պահապանների կողմից արդարացված է, իսկ զավթումը Լիդիանի կողմից՝ ապօրինի։ Օրենքների այս հակասական ու ոչ միանշանակ լինելը կարող է և պետք է մեկնաբանվի միայն հանրության օգտին։
16:34 - 07 օգոստոսի, 2020
«ՔՈ» ՍԴ կուսակցությունը վերահաստատում է իր դիրքորոշումը Ամուլսարի հարցում և սատարում է քաղաքացիների ինչպես միջանկյալ, այնպես էլ վերջնական պահանջները

«ՔՈ» ՍԴ կուսակցությունը վերահաստատում է իր դիրքորոշումը Ամուլսարի հարցում և սատարում է քաղաքացիների ինչպես միջանկյալ, այնպես էլ վերջնական պահանջները

«Քաղաքացու որոշում» ՍԴԿ-ի հայտարարությունն Ամուլսարում տեղի ունեցող իրադարձությունների վերաբերյալ․ «Սույն թվականի օգոստոսի 4-ին «Լիդիան Արմենիա» ընկերության կողմից խախտվել է Ամուլսարի հարցում երկու տարի առաջ ձևավորված ստատուս քվոն՝ հեռացվել են հանրային տարածքում քաղաքացիների տեղադրած վագոն-տնակները և դրանց տեղում տեղադրվել են ընկերության տնակները։ Այս սադրանքը մեկ ամիս առաջ սկսած սադրիչ ռազմավարության մի հերթական քայլ է, որով նրանք փորձ են անում պահնորդական զինված խմբի միջոցով լուծել իրենց խնդիրները և քաղաքացիներին ներքաշել ապօրինությունների մեջ: Մասնավոր ռազմականացված կազմակերպությունը դարձել է Հայաստանի Հանրապետության և նրա քաղաքացիների դեմ ճնշման գործիք:Ստեղծված իրավիճակում քաղաքացիների պահանջներն են.1. Ընկերությանը պատկանող վագոն տնակները պետք է հեռացվեն2. Ապօրինություններ և սադրանքներ իրականացնող պահնորդական խումբը պետք է հեռացվի3. Կառավարությունը պետք է հստակություն մտցնի վերջնական որոշման ժամկետների հարցումՆշված միջանկյալ քայլերը անհրաժեշտ են ընկերության կողմից այս օրերին ստեղծված լարվածությունը մեղմելու համար։Քաղաքացիների հիմնական պահանջը մնում է անփոփոխ՝ Ամուլսարի տարածքում արգելել հանքի շահագործումը։«Քաղաքացու որոշում» կուսակցությունը վերահաստատում է իր դիրքորոշումը Ամուլսարի հարցում և սատարում է քաղաքացիների ինչպես միջանկյալ, այնպես էլ վերջնական պահանջները:Նախ դատապարտելի ենք համարում, որ այս սադրանքը իրականացվել է համավարակի պայմաններում՝ հաշվարկ ունենալով, որ քաղաքացիները հնարավորություն չեն ունենա իրացնել իրենց իրավունքները։Դատապարտելի է, որ կառավարությունը այս հակամարդկային հաշվարկի մեջ դարձել է մի սովորական գործիք և ստանձնել է արդար ու խաղաղ հավաքները ճնշելու գործառույթ։Ի վերջո դատապարտելի է քաղաքացիներին ավելի քան երկու տարի հյուծող խնդրի լուծումը հետաձգելու, քաղաքացիներին վերազգային կապիտալի դեմ միայնակ թողնելու, ողջամիտ փաստարկներն անտեսելու և հռչակված սկզբունքները խախտելու կառավարող ուժի գործելաոճը։Կառավարությունը պարտավոր է քաղաքական կամք դրսևորել, հարցին տալ վերջնական լուծում՝ լուծման հիմքում դնելով հեղափոխական արժեքները, սկզբունքները և մարդու անքակտելի իրավունքները։ Սա է իրական հեղափոխական ուժի առաքելությունը և գործելաոճը»։
14:18 - 07 օգոստոսի, 2020
Ջերմուկի համայնքապետը իրականացրել և իրականացնում է ապօրինություն․ «Լիդիան Արմենիա»

Ջերմուկի համայնքապետը իրականացրել և իրականացնում է ապօրինություն․ «Լիդիան Արմենիա»

«Լիդիան Արմենիա»-ն հայտարարություն է տարածել, որում ասվում է․ ««Լիդիան Արմենիան» հայտնում է, որ իր վագոն-տնակների տեղադիրքը օրինական է, իսկ ցանկացած տեղափոխման փորձ ապօրինի առանց ընկերության համաձայնության, ինչպես և «Լիդիանի» հետ վերջին երկու տարիներին տեղի ունեցող հակաօրինական մյուս բոլոր գործընթացները: Ի դեպ, ցանկանում ենք տեղեկացել, որ այն հողերի վարձակալության համար, որտեղ օրինական տեղադրվել են «Լիդիան» վագոն-տնակները և որոնք վերջին երկու տարիների ընթացքում գտնվել են ապօրինի շրջափակման մեջ, Վարդան Հովհաննիսյանի օրոք համայնքային բյուջե «Լիդիանը» փոխանցել մոտ 500 միլիոն ՀՀ դրամ` փաստացի զրկված լինելով իր բնականոն գործունեությունն իրականացնելու իրավունքից: Հետաքրքիր է, թե որքան է այդ գումարից ներդրվել համայնքում: Ստորև ներկայացնում ենք «Լիդիան Արմենիայի» գործադիր տնօրեն Հայկ Ալոյանի պաշտոնական նամակը Ջերմուկի համայնքապետ Վարդան Հովհաննիսյանին: ՀՀ Վայոց ձորի մարզի Ջերմուկ համայնքի ղեկավարՎ․ Հովհաննիսյանին Ի պատասխան 06 օգոստոսի, 2020թ․ N739 գրության՝ սույնով հայտնում ենք, որ ուշագրավ է այն հանգամանքը, որ համայնքի ղեկավարը ձեռնամուխ է եղել «Տեղական ինքնակառավարման մասին» ՀՀ օրենքի 42-րդ հոդվածի 1-ին մասի 9-րդ և 10-րդ կետերով նախատեսված իր լիազորությունների իրականացմանը ընդամենը երկու տարի անց այն իրադարձությունից, երբ մի խումբ անձինք առանց որեւէ թույլտվության, խախտելով թե՛ սեփականատիրոջ, թե՛ համայնքի օրինական շահերն ու իրավունքները, ինչպես նաեւ Ձեր կողմից վկայակոչված ակտերը, տեղադրել էին ժամանակավոր կառույցներ Ընկերության օրինական տիրապետման տակ գտնվող տարածքում։ Տրամաբանորեն հարց է ծագում՝ ինչ պատճառով երկու տարվա ընթացքում վերը նշված օրենքով քաղաքաշինության ոլորտում նախատեսված իր լիազորությունները դիտավորությամբ չի իրականացրել պաշտոնատար անձ հանդիսացող Ջերմուկ համայնքի ղեկավարը՝ նաեւ հաշվի առնելով այն հանգամանքը, որ ՀՀ քրեական օրենսգրքի 308-րդ հոդվածը քրեական պատասխատավություն է նախատեսում պաշտոնեական լիազորությունները չարաշահելու համար, իսկ նույն օրենսգրքի 3152–րդ հոդվածը՝ պաշտոնատար անձանց կողմից, շինությունների ինքնակամ կառուցումը կասեցնելու պարտականությունը դիտավորությամբ չկատարելու, դիտավրությամբ վարչական տույժ չկիրառելու համար։ Հասունանում է այն ենթադրությունը, որ պաշտոնեական լիազորությունները չկատարելը տվյալ դեպքում խարսխված է անձնական և խմբային շահերով՝ նպատակ ունենալով ապահովելու հետագա ՏԻՄ ընտրություններում հնարավոր հաղթանակը։ Թերեւս այդ հարցի սպառիչ պատասխանը կտա իրավասու նախաքննության մարմինը։ Ինչ վերաբերում է Ձեր գրության բովանդակային կողմին՝ Ընկերությունը շարունակում է մնալ այն դիրքորոշմանը, որ որևէ իրավանորմ, այդ թվում՝ Ձեր կողմից վկայակոչվածները, չի խախտել, Ընկերությունը օգտվում է ՀՀ Սահմանադրությամբ և ՀՀ քաղաքացիական օրենսգրքով նախատեսված և երաշխավորված իր օրինական տիրապետման տակ գտնվող գույքի անարգել օգտագործման իրավունքից»։
14:10 - 07 օգոստոսի, 2020
Պարոն վարչապետ, մի խաբեք հանրությանը, ասեք, որ հանքը շահագործվելու է. Սիլվա Ադամյանը՝ Ամուլսարում տիրող իրավիճակի և Կառավարության լռության մասին |tert.am|

Պարոն վարչապետ, մի խաբեք հանրությանը, ասեք, որ հանքը շահագործվելու է. Սիլվա Ադամյանը՝ Ամուլսարում տիրող իրավիճակի և Կառավարության լռության մասին |tert.am|

tert.am: Կառավարությունը փորձեց «Էլարդի» փորձաքննությունն օգտագործել ի շահ իրենց նպատակների, որովհետև ի սկզբանե պարզ էր, որ Կառավարությունը որոշակի քաղաքական լծակներ ունի, որոնց շրջանակներում նա ուղղակիորեն չի կարող այդ հանքը չշահագործել: Այս մասին այսօր լրագրողների հետ հանդիպման ժամանակ ասաց «Մեկ Առողջություն» կոալիցիայի համահիմնադիրներից Սիլվա Ադամյանը` խոսելով Ամուլսարի շուրջ լարված իրավիճակի և շրջակա միջավայրի առողջության ոլորտում պետական քաղաքականության վտանգների վերաբերյալ: «Մեր վերին ատյանները պարբերաբար փորձել են մեզ խաբել և մինչև հիմա խաբում են և՛ բնապահպաններին և հանրությանը, թե՝ մեզ ապացույցներ են ձեզանից պետք, որպեսզի կարողանանք կանգնեցնել հանքի շահագործումը: Իրականում իրավիճակը լրիվ այլ է, Կառավարությունը հրաշալի գիտի, թե ինչ է Ամուլսարում ինչ է կատարվելու և փորձագետներն ինչ են իրենց ասել, ներկայացրել, որ ուրան կա տարածքում, սակայն զավեշտն այն է, որ դա ևս չկանգնեցրեց մեր Կառավարությանը»,- ասաց նա: «Ասում են՝ վարչապետը ոչինչ չգիտի, քննչականն է խաբում, փորձագետն է խաբում: Հիմա ասում եմ իր երեսին՝ պարոն վարչապետ, դուք ամեն ինչ գիտեք, մի´ խաբեք հանրությանը, վե´ր կացեք ու ասե´ք, որ ամեն ինչ գիտեք, բայց հանքը շահագործվելու է»,- ասաց Ադամյանը: Սիլվա Ադամյանը նշեց, որ «Լիդիան»-ը փորձել է համագործակցել Ադրբեջանի և Վրաստանի հետ, սակայն նրանց դուրս են հանել, իսկ ՀՀ նախագահ Արմեն Սարգսյանը դրական կողմով է «Լիդիան»-ին ներկայացրել մեր երկրում և այստեղ Մարիամ Բադալյանը հարց բարձրացրեց, թե ում է ծառայում Հայաստանի կառավարությունը, քանի որ ըստ նրա՝ հաստատ ոչ ժողովրդին: Առավել մանրամասն՝ tert.am-ում
12:46 - 07 օգոստոսի, 2020
«Լիդիան Արմենիա»-ն որևէ մեկի հետ վագոն-տնակները տեղափոխելու պայմանավորվածություն ձեռք չի բերել․ հայտարարություն

«Լիդիան Արմենիա»-ն որևէ մեկի հետ վագոն-տնակները տեղափոխելու պայմանավորվածություն ձեռք չի բերել․ հայտարարություն

«Լիդիան Արմենիա» ընկերությունը հայտարարություն է տարածել իր վագոն-տնակի՝ ոչ ճիշտ վայրում տեղադրված լինելու հայտարարությունների վերաբերյալ։ «Քիչ առաջ մամուլից տեղեկացանք, որ Ջերմուկի քաղաքապետը «Լիդիան Արմենիայի» անունից հանդես է եկել մի շարք հայտարարություններով, այդ թվում, թե իբր «Լիդիանը» համաձայնել է տեղափոխել իր վագոն-տնակները:Հայտնում ենք, որ «Լիդիան Արմենիան» նման պայմանավորվածություն որևէ մեկի հետ ձեռք չի բերել: Վագոն-տնակները գտնվում են ընկերության օրինական տիրապետման տակ գտնվող տարածքում: «Լիդիանի» բոլոր գործողությունները օրենքի շրջանակներում են, ընկերությունը ունի բոլոր իրավունքներն ու թույլտվությունները իր օրինական տիրապետման ներքո գտնվող տարածքում կատարելու ցանկացած գործողություն, այդ թվում նաև տեղադրելու շարժական վագոն-տնակներ:«Լիդիանը» չի բանակցելու օրենքի շրջանակներից դուրս որևէ առարկայի շուրջ»:   
12:10 - 07 օգոստոսի, 2020
Իշխանությունների լռությունը վկայում է, որ հակված են հանքի շահագործմանը․ Անի Սամսոնյան

Իշխանությունների լռությունը վկայում է, որ հակված են հանքի շահագործմանը․ Անի Սամսոնյան

Ամուլսարի շուրջ ծավալվող իրադարձությունները շարունակում են մնալ հանրային քննարկման տիրույթում։ Վերջին օրերին Ջերմուկում իրավիճակը լարված է։ Սա այն բանից հետո, երբ Ամուսարի հանքը շահագործելու նպատակ ունեցող «Լիդիան» ընկերության կողմից վարձված պահնորդական ծառայությունը հեռացրեց բնակիչների տեղադրած շարժական տնակները ու փոխարենը տեղադրեց իր տնակները։ Արդեն մի քանի օր է՝ ջերմուկիցներն ու բնապահպանները ակցիաներ են իրականացնում Ամուլսար տանող ճանապարհին։ Նրանք պահանջներ են ներկայացրել կառավարությանը՝ հեռացնել պահնորդական ծառայության կողմից տեղադրված տնակները, սադրանքներ հրահրող պահնորդական ծառայությանը զրկել լիցենզիայից եւ վերջնական դիրքորոշում հայտնել խնդրի վերաբերյալ։ Թեմայի շուրջ Infocom.am-ը զրուցել է «Լուսավոր Հայաստան» խմբակցության պատգամավոր Անի Սամսոնյանի հետ։ - Տիկին Սամսոնյան, չնայած տեղի ունեցող իրադարձություններին եւ լարվածությանը՝ իշխող քաղաքական թիմի ներկայացուցիրները կարծես լռություն են պահպանում։ Այն պարագայում, երբ ոստիկանական ուժերը անգամ ուժ գործադրեցին ցուցարարների նկատմամբ։ Դուք ի՞նչ դիրքորոշում ունեք այս հարցի վերաբերյալ։ - Ես կարծում եմ, որ իշխանության լռությունը բնական է, եւ այն պետք է սպասելի լիներ՝ թե՛ ջերմուկցիների, թե՛ բոլորիս համար, որովհետեւ պետք է համադրենք 2019 թվականին իշխանության արած հայտարարությունների հռետորաբանության փաստերը, պետք է վերհիշենք, որ հունվարին Նիկոլ Փաշինյանն անդրադարձավ Ամուլսարին եւ ասաց, որ եթե այն շահագործվեր, մենք ավելի շատ եկամուտներ կունենայինք բյուջեում, նույնիսկ հնարավոր է՝ երկնիշ աճ ունենալ։ Հետեւաբար, սա վկայում է տրամադրությունն այն մասին, որ իշխանությունը հակված է այն մտքին, որ Ամուլսարը պետք է շահագործվի։ Այդ լռությունը դրա վկայությունն է, որ եթե իրենք հակված են, որ հանքը շահագործվի, ուրեմն պետք է մնան անհաղորդ այս իրադարձություններին, որովհետեւ ի՞նչ պետք է ասի իշխանությունը ջերմուկցիներին, որովհետեւ երբ նոր էր հեղափոխությունը եղել, նույն իշխանությունը նույն ջերմուկցիներին խոսք էր տվել, որ Ամուլսարը մնալու է սար եւ հանք չի դառնալու, բայց երար քննարկելով իշխանությունների հետ եւ հասկանալով, որ այս հարցը քննարկումների դաշտում չի լուծվելու, ջերմուկիցները որոշեցին իրենց բողոքը այլ կերպ ներկայացնել։ Սկսեցին պահպանություն իրականացնել, փողոցային ակցիաներ իրականացնել։ Այս գործիքը ջերմուկցիների եւ Ամուլսարի պաշտպանների միակ գործիքն է այսօր։ Մենք կարող ենք նաեւ ասել, որ իշխանությունը, լավ հասկանալով, որ դա միակ գործիքն է, ընտրել է լավագույն պահը՝ Ամուլսարի հարցին վերջնական լուծում տալու համար՝ այն առումով, որ արտակագ դրության պայմաններում արգելված են հավաքները, եւ մարդիկ չեն կարող կիրառել իրենց բողոքի ձայնն արտահայտելու գործիքը։ Այս պայմաններում պարզ է, որ ո՛չ կառավարությունը, ո՛չ էլ իշխանության մեծամասնությունը, եւ ոչ էլ այդ մեծամասնությունում գտվող նախկին եւ ներկայիս ակտիվ բնապահպան պատգամավորները պետք է լուռ մնան, որովհետեւ իրենք այդ հարցի վերաբերյալ այլեւս ասելիք չունեն։  - Ինչպե՞ս եք գնահատում ոստիկանության իրականացրած գործողությունները․ տեսանք, որ ուժ գործադրեցին ցուցարարների նկատմամբ, բերման ենթարկվածներ եղան։ - Որպեսզի ես ոստիկանական գործողություններին գնահատական տայի, շատ կարեւոր էր, որ լինեի ոստիկանական բաժանմունքում, այդ պատճառով օգոստոսի 4-ին եղա Վայքի ոստիկանական բաժանմունքում, որտեղ տեղափոխել էին բերման ենթարկվածներին։ Վարչական կալանքի ենթարկված անձանց հետ խոսեցի, իրենք թե՛ բերման ենթարկելու ընթացքում, թե՛ ոստիկանական բաժանմունքում որեւէ խնդիր չունեին։ Իրենք ասացին, որ խնդիր չունեն, բայց մինչեւ բերման ենթարկելու իրադարձությունը՝ տեղի են ունեցել ավելի վատ իրադարձություններ, ընդ որում՝ դրանց ակտիվ մասնակցություն է ունեցել «Լիդիանի» վարձած պահնորդական ընկերությունը։ Երեկ բնակիչները պատմեցին, որ նրանք քարերով են հարձակվել քաղաքացիների վրա, փոխադարձ հայհոյանքներ են հնչել եւ նույնիսկ պահնորդական ծառայություն իրականացնող անձանցից ոմանք ուժ են գործադրել ոստիկանության ծառայողների հանդեպ։ Ինձ որքանով տեղեկացրին՝ ոստկանակության ծառայողները եղել են քաղաքացիական հագուստով եւ նրանք չեն իմացել, որ դրանք ոստիկաններ են, բայց բոլոր դեպքերում սա չի արդարացնում այդ գործողությունները։ Ես կարծում եմ, որ ոստիկանության համար նույնպես պետք է քննարկման առարկա դառնան պահնորդական խմբի կատարած այս գործողությունները։ Այսինքն՝ դրանք պետք է օբյեկտիվ քննության առարկա դառնան եւ հասկանանք, թե որքանով են օրինաչափ։ Օգոստոսի 4-ին Վայքի բաժանմունք էին բերման ենթարկել 4 հոգու, որոնք պահնորդական ծառայություն իրականացնող խմբի անդամ էին։ Ինչպես հասկացա՝ նրանիցից մեկը բերման էր ենթարկվել խուլիգանություն կատարելու կասկածանքով՝ հայհոհել էր, հետո ասաց, որ հայհոյել են իրեն եւ ինքը փոխադարձ հայհոհանքներ է հնչեցրել։ Ընդհանուր իրավիճակը եղել է շատ լարված եւ ագրեսիվ։ Ես կարեւորում եմ ոստիկանության աշխատանքը այն տեսանկյունից, որ կարող են բախումներ լինել ոչ միայն ոստիկանության եւ քաղաքացիների միջեւ, այլեւ պահնորդական ծաայություն իրականացնողների եւ քաղաքացիների միջեւ, ինչպես տեսել ենք։ Ոստիկանությունը պետք է աչալուրջ լինի, գործի իրավաչափ եւ ամենակարեւորը, ուզում եմ շեշտադրել, որ ոստիկանությունն իրականացնում է հրահանգ, մարդկանց թույլ տալ, որ իրենց բողոքն արտահայտեն, դա պետք է թույլ տա կառավարությունը, իսկ կառավարությունը նորից եմ կրկնում, ընտրել է այն ժամանակը, երբ կա պարետի որոշում։ Անթուլատրելի է ուղղակի, որ մարդիկ չկարողանան իրենց բողոքի ձայնը բարձրացնել։ Ես միշտ ասել եմ, որ Ամուլսարի խնդիրը իրենք համարում են իրենց կյանքի եւ անվտանգության խնդիրը։ Մարդու կյանքի իրավունքը իր հիմնարար իրավունքն է, եւ եթե հնարավորություն չունի իր բողոքն արտահայտելու, հետեւաբար մենք խնդիր ունենք առհասարակ ժողովրդավարության հետ։ Մի անգամ վարչապետ Նիկոլ Փաշինյանին հարց տվեցի՝ եթե Դուք այդքան գնահատում եք հանրաքվեի ինստիտուտը՝ որպես ժողովրդավարության կարեւոր ինստիտուտներից մեկը, եւ կարծում եք, որ մարդիկ կարող են որոշել ՍԴ-ի հարցը, արդյոք Դուք պատրա՞ստ եք, որ Ամուլսարի հարցն էլ լուծվի հանրաքվեով, որովհետեւ սա լավագույն օրինակն էր, որ տեղական հանրաքվեի միջոցով մարդիկ կարող էին որոշել՝ հանքը շահագործվի, թե ոչ։ Սա անմիջական ազդեցություն ունի այն մարդկանց վրա, որոնք ապրում են այստեղ եւ այդ մարդիկ կենսական անհրաժեշտություն ունեն՝ իրենց բողոքը արտահայտելու։  - Կառավարությունը «էլարդի» փորձագիտական խմբին պատվիրել էր համապարփակ եւ օբյեկտիվ փորձաքննություն ներկայացնել, ինչը արվել է, եւ պարզվել է, որ հանքի շահագործումը կարող է որոշակի ազդեցություն ունենալ ջրային ռեսուրսների, բնության վրա, եւ, փորձաքննության համաձայն, «Լիդիանի» արած ՇՄԱԳ-ը թերի է եղել, ակտիվիստները պահանջում են կառավարությունից՝ այդ ՇՄԱԳ-ը ուժը կորցրած ճանաչել։ Ընկերությունն էլ պնդում է, որ խախտվում են իրենց իրավունքները․ ի՞նչ պետք է անի կառավարությունը։ - Անցյալ տարի մենք եւ անձամբ ես ուսումնասիրել էի այդ փորձաքննության փաստաթուղթը, իսկապես «էլարդն» ասում է՝ այո՛, իրականացվել է փորձաքննություն, բայց այն իրականացվել է թերի եւ փաստ չէ, որ այդ ռիսկերը կառավարելի են։ Մենք կարողացանք փաստեր վեր հանել փաստաթղթից, որ, օրինակ, փորձաքննություն իրականացնող անձիք Ամուլսարում եղել են միայն մեկ օր։ Մնացած ամբողջ տեղեկությունը իրենք հավաքագրել են եւ վերլուծել են՝ ըստ «Լիդիանի» տված տեղեկության, սա շատ կարեւոր փաստ է այնքանով, որ մենք հասկանանք՝ օբյեկտի՞վ է եղել արդյոք «Լիդիանի» տված տեղեկությունը, որպեսզի նաեւ հասկանանք՝ «Էլարդի» փորձաքննությունն օբյեկտի՞վ է, թե՞ ոչ։ Մենք անվստահություն ենք հայտնել Էլարդի փորձաքննության նկատմամբ, եւ դրանից հետո չի իրականացվել այլ փորձաքննություն, ՇՄԱԳ-ն էլ ուժը կորցրած չի ճանաչվել։ Այսինքն՝ չի լուծվել այն խնդիրը, որը մեզ կարող էր ապացուցել, որ Ամուլսարի հանքի շահագործումը ռիսկեր չի պարունակում․ այս հարցերը մնացել են օդում կախված։  - Հանքի շահագործման դեմ պայքարողները պնդում են, որ շահագործումը կլինի այս կառավարության վերջը։ Եթե հանքը շահագործվի, ի՞նչ զարգացումներ կարող են տեղի ունենալ։ - Ես չեմ կարող ասել կամ կանխատեսել, թե ինչպիսի զարգացումներ կլինեն։ Զարգացումներ, բնականաբար, կլինեն, որովհետեւ հեղափոխական ժամանակավոր իշխանությունը չի կատարել իր խոստումը։ Բնական է, որ սա կառավարության ֆիասկոն է՝ ջերմուկցիների եւ այն մարդկանց համար, որոնք կարծում էին, որ Ամուլսարը սար է մնալու եւ չի շահագործվելու որպես հանք։ Մարդիկ իրենց խաբված են զգում, եւ սա միայն նրա համար, որ իշխանությունը բավարար կամք չցուցաբերեց։ Infocom.am-ը թեմայի վերաբերյալ զրուցել է նաեւ «Բարգավաճ Հայաստան» խմբակցության քարտուղար Արման Աբովյանի հետ։  «Մենք նշել ենք, որ բոլոր որոշումները պետք է լինեն համահունչ մարդկանց, ջերմուկցիների որոշումների հետ, ուրիշ տարբերակ չկա։ Երկորդը՝ ոչ մի դեպքում չի կարելի թույլ տալ, որ Ամուլսարում լինեն բախումներ եւ ուժային ճնշումներ, եւ երրորդը՝ ոչ մի դեպքում չպետք է թույլ տալ, որ Ամուլսարի իրավիճակը կրկին լինի դեստրուկտիվ իրավիճակի՝ Հայաստանի քաղաքական, ներքաղաքական կյանքի համար»,- մեր զրույցում ասաց Աբովյանը։  Պատգամավորը շեշտեց, որ յուրաքանչյուր որոշում պետք է ընդունելի լինի ՀՀ քաղաքացիների, ջերմուկցիների եւ բոլորիս համար։ Անձամբ իր կարծիքով՝ Ամուլսարի հանքի շահագործումը վտանգավոր է եւ շատ մեծ բնապահպանական ռիսկեր է պարունակում՝ հաշվի առնելով բոլոր եզրակացությունները։  Ասպրամ Փարսադանյան
22:21 - 06 օգոստոսի, 2020
Քաղաքական ուժի լռություն պահպանելը ինքնանպատակ չէ, լռությունը ներքին քննարկումների, ներքին աղմուկի հետեւանք է․ Վահագն Թևոսյան

Քաղաքական ուժի լռություն պահպանելը ինքնանպատակ չէ, լռությունը ներքին քննարկումների, ներքին աղմուկի հետեւանք է․ Վահագն Թևոսյան

Ամուլսարի շուրջ ծավալվող իրադարձությունները շարունակում են մնալ հանրային քննարկման տիրույթում։ Վերջին օրերին Ջերմուկում իրավիճակը լարված է։ Սա այն բանից հետո, երբ Ամուսարի հանքը շահագործելու նպատակ ունեցող «Լիդիան» ընկերության կողմից վարձված պահնորդական ծառայությունը հեռացրեց բնակիչների  տեղադրած շարժական տնակները ու փոխարենը տեղադրեց իր տնակները։ Արդեն մի քանի օր է՝ ջերմուկիցներն ու բնապահպանները ակցիաներ են իրականացնում Ամուլսար տանող ճանապարհին։ Նրանք պահանջներ են ներկայացրել կառավարությանը՝ հեռացնել պահնորդական ծառայության կողմից տեղադրված տնակները, սադրանքներ հրահրող պահնորդական ծառայությանը զրկել լիցենզիայից և վերջնական դիրքորոշում հայտնել խնդրի վերաբերյալ։ Թեմայի շուրջ Infocom.am-ը զրուցել է «Իմ քայլը» խմբակցության պատգամավոր Վահագն Թեւոսյանի հետ։  - Պարոն Թեւոսյան, չնայած տեղի ունեցող իրադարձություններին եւ լարվածությանը՝ ձեր քաղաքական թիմը լռություն է պահպանում։ Սա այն պարագայում, երբ ոստիկանական ուժերը նույնիսկ ուժ գործադրեցին ցուցարարների նկատմամբ։ Դուք ի՞նչ դիրքորոշում ունեք այս հարցով։ - Իմ անձնական վերաբերմունքը Ամուլսարի խնդրի շուրջ որոշակիորեն տարբերվում է այն վերաբերմունքից, որը ես՝ որպես պաշտոնատար անձ, պարտավոր եմ որդեգրել՝ իմ գործունեության ընթացքում։ Ես կարող եմ անձնական կարծիք ունենալ տարբեր երեւույթների մասին, բայց որպես պաշտոնատար անձ՝ պարտավոր եմ հետեւողական լինել, որպեսզի ցանկացած պրոցես ընթանա իրավական նորմերի շրջանակում՝ պարտադիր կերպով, որովհետեւ դա մշակույթ է, որը պարտավոր ենք փոխանցել։ Երբ մենք ուզում ենք, որ երկիրը լինի իրավական, ուրեմն պետք է լինի այդպիսին։ Ըստ այդմ՝ ոստիկանների գործողությունները ես կարող եմ որակել կամ իրավաչափ, կամ ոչ իրավաչափ։ Չեմ կարող որակել՝ բռնություն ցուցարարների կամ պահնորդների նկատմամբ, ես կարող եմ որակել իրավաչափ են եղել գործողությունները, թե ոչ, բացի դա՝ կարող եմ որակել շատ ավելի բարձր կոմպետենցիայով մարդու ստացած տեղեկության հիման վրա հետեւություն անելով, որովհետեւ ես այդ կոմպետենտությունը չունեմ։ Իրադարձությունները շատ ցավալի են այնտեղ, ես, ամեն դեպքում, կարծում եմ, որ ՀՀ քաղաքացիները իրավունք ունեն իրենց բողոքի ձայնը բարձրացնել ցանկացած խնդրի առիթով, որովհետեւ դա ժողովրդավարության հիմքերից մեկն է, բայց, այնուամենայնիվ, արտակարգ դրության ժամանակ նման մասսայական միջոցառումները չեմ ողջունում` այդուհանդերձ հասկանալով, որ դրանք որոշակի հիմքեր ունեին, եւ հենց այդ տնակների տեղափոխման հետ կապ ունեին։ Ուշի-ուշով հետեւում եմ, լռություն պահպանելը ինքնանպատակ չէ, լռությունը ներքին քննարկումների, ներքին աղմուկի հետեւանք է, որովհետեւ, եթե մեզնից յուրաքանչյուրը առանձին-առանձին ինչ-որ բան սկսի խոսել, դա գուցե կլինի շատ անհոդաբաշխ եւ ինքնանպատակ։ Այնուամենայնիվ, քաղաքական թիմի վերաբերմունքը որոշակիորեն արտահայտվել է դեռեւս մեկ տարի առաջ եւ դեռեւս դրանում էական փոփոխություն առկա չէ, սպասենք զարգացումներին։ Ինձ համար ցավալի է այդ պրոցեսներին հետեւելը, ես այնտեղ ունեմ մարդիկ, որոնց շատ հարգանքով եմ վերաբերում, շատ ծանր է հետեւել այդ իրադարձություններին, բայց կարծում եմ, որ քաղաքացիները իրացնում են իրենց իրավունքը։ Արտակարգ դրության պայմաններում, իհարկե, ցանկալի չէր լինի, մանավադ COVID-ի պայմաններում, քանի որ բազմամարդ հավաքները ահագին վտանգներ են ստեղծում վարակի տարածման համար։ - Կառավարությունը «էլարդի» փորձագիտական խմբին պատվիրել էր համապարփակ եւ օբյեկտիվ փորձաքննություն ներկայացնել, ինչը արվել է, եւ պարզվել է, որ հանքի շահագործումը կարող է որոշակի ազդեցություն ունենալ ջրային ռեսուրսների, բնության վրա, եւ, փորձաքննության համաձայն, «Լիդիանի» արած ՇՄԱԳ-ը թերի է եղել, ակտիվիստները պահանջում են կառավարությունից՝ այդ ՇՄԱԳ-ը ուժը կորցրած ճանաչել։ Ընկերությունն էլ պնդում է, որ խախտվում են իրենց իրավունքները․ ի՞նչ պետք է անի կառավարությունը։ -Ես կարծում եմ, որ կառավարությունը եւ, ընդհանրապես, քաղաքական թիմը ամենաշահագրգիռ կողմն են, որ այս թնջուկը հնարավորինս շուտ ավարտվի, որովհետեւ, եթե նույնիսկ շատ հաշվենկատ տրամաբանությունից ելնենք, որը շատ դեպքերում այդպես չէ, եւ շատ հաճախ ոչ պոպուլյար բաներ ենք անում՝ ելնելով ռեֆորմների անհրաժեշտությունից, բայց նույնիսկ, եթե վերցնենք շատ հաշվենկատ ելակետ, ապա հասկանալի է, որ Ամուլսարի թնջուկը հենց գործող իշխանությունների խաչն է։ Ըստ այդմ, ես չեմ կարծում, որ հնարավոր առաջին միանշանակ ելքի դեպքում կառավարությունն այդ քայլին չի գնա, ամեն դեպքում իմ կոմպետենցիան այդ հարցում բավական ցածր է, որովհետեւ ես կրթության, գիտության հանձնաժողովից եմ եւ հիմանկանում այդ ուղղությամբ են իմ ուսումնասիրությունները, այս հարցը ավելի ճիշտ կլիներ մեկնաբանեին տնտեսական հարցերի հանձնաժողովի պատգամավորները, որովհետեւ իրենք շատ ավելի կոմպետենտ են եւ ավելի խորն են ուսումնասիրել։ Ես տեղյակ եմ, որ մեր թիմից մի խումբ պատգամավորներ, որոնք բեւեռային տեսակտներ ունեն հարցի շուրջ, ձեռնարկել են եւ հնարավոր է՝ տեղի են ունեցել որոշակի հանդիպումներ գործադիրի եւ ՏԻՄ-երի հետ։ Կարծում եմ՝ այս պրոցեսը պետք է առաջ գնա, այն կանգնած չի եղել, ուղղակի հիմա սրվեց՝ հասկանալի իրավիճակի պատճառով, ինչքանով ես հասկացա՝ այդ տնակների հեռացումն էր պատճառը։  - Ձեր ընդդիմախոսները պնդում են, որ եթե հնարավոր էր Սահմանադրական բարեփոխումների հարցը լուծել հանրաքվեի միջոցով, ապա Ամուլսարի հարցը լավագույնս կարող էր լուծվել, եթե կառավարությունը հանրաքվե իրականացներ։ Ըստ Ձեզ՝ որքանո՞վ է հանրաքվեի տարբերակը արդյունավետ լուծում։  - Սա իմ սուբյեկտիվ կարծիքն է, նորից եմ նշում, որ գուցե ոչ կոմպետենտ, կամ նվազ կոմպետենտ բաներ ասեմ, բայց քանի որ այստեղ առկա է միջազգային իրավունքի խնդիր եւ մենք նաեւ խնդիր ունենք միջազգային իրավունքի շրջանակում՝ մեր բարեվարքության էլեմենտը պահպանելու։ Այսինքն՝ չէ՞ որ մենք ուզում ենք, որ ներդրողներ գան, դրսի մարդիկ տեղյակ են, տեսնում են, թե ինչ է կատարվում, եւ մենք մեզ ոնց ենք պահում տնտեսվարողների նկատմամբ։ Այդ ամենից են իրենք հետեւություն անում՝ գա՞լ, թե՞ ոչ։ ՍԴ-ի խնդիրը մեր ներքին քաղաքական խնդիրն էր, այս պարագայում կարող է տպավորություն ստեղծվել, թե մենք ցանկացած տնտեսական վեճ դնում ենք հանրաքվեի։ Այո՛, սա բացառիկ դեպք է, բայց իրենց համար մեկ է՝ դա կլինի հանքարդյունաբերություն, ապակու գործարան, թե ինչ-որ ռեստորան, իրենք նայում են որպես բիզնես։ Կարող է տպավորություն ստեղծվել, որ մենք ցանկացած նմանատիպ խնդիր կարող ենք հանրաքվեով չեղարկել, դա վտանգավոր է այդ հնարավոր տպավորությունը ստեղծելու տեսանկյունից։ Սա իմ սուբյեկտիվ կարծիքն է։ Իհարկե, ես գլոբալ առումով շատ կողմնակից եմ հանրաքվեներին, որովհետեւ համարում եմ, որ անկախ նրանից, թե մարդիկ որքանով են տիրապետում ինֆորմացիային, համենայն դեպս էմոցիոնալ եւ մշակութաբանական շերտը շատ կարեւոր է, որովհետեւ որքան էլ մարդուն բացատրես ռացիոնալ կողմը, եթե ինքը իռացիոնալ բնույթով դեմ է մի երույթի, դժվար թե այդ երեւույթից լավ բան դուրս գա։ - Հանքի շահագործման դեմ պայքարողները պնդում են, որ շահագործումը կլինի այս կառավարության վերջը։ Եթե հանքը շահագործվի, ի՞նչ զարգացումներ կարող են տեղի ունենալ։ - Ես, անկեղծ, չգիտեմ՝ հանքը կշահագործվի՞, թե՞ ոչ, նորից կրկնեմ, որ ցավոք այդքան կոմպետենտ չեմ, որ կարողանամ հետեւություններ անել պրոցեսների հնարավոր ելքի վերաբերյալ, բայց ուզում եմ ասել, որ մենք ինքնանպատակ իշխանություն չենք եւ մեր խնդիրը իշխանություն պահելը չէ, եթե մենք ինչ-որ մակարդակ հետո մի որոշում կընդունենք, որով Հայաստանի լավ ապագան կպայմանավորվի մեր հեռացումով, բնականաբար մենք ժամանակավոր ենք՝ հարատեւ Հայաստանի համեմատ։ Այս իշխանության վերջը կլինի․ այլ իշխանություն կգա, կշարունակի, այսինքն այդ երկու հանգամանքները համեմատելի չեն։ Մեր քաղաքական թիմը երբեք չի քննարկում հարցը այն կոնտեքստում, թե ոնց անենք, որ մեր իշխանությունը մնա։ Մենք քննարկում ենք՝ ոնց անենք, որ հարցը լուծվի, որ Հայաստանի հարատեւության կոնտեքստում հարցը երկարատեւ խնդիրներ չառաջացնի, այլ ընդհակառակը՝ լուծի ինչ-որ խնդիրներ եւ նոր զարգացումների հիմք դառնա։ - Երեկ «Իմ քայլը» խմբակցությունը ժամեր շարունակ փակ նիստ էր անցկացնում․ Ամուլսարի հարցը քննարկվե՞լ է։ - Այս հարցը երեկ չի քննարկվել, որովհետեւ պակաս կարեւորություն չունեցող հարց էր քննարկվում։ Երկու կարեւոր հարցերի քննարկումը անարդյունավետ կլիներ։  Infocom.am-ը թեմայի վերաբերյալ զրուցել է նաեւ «Իմ քայլը» խմբակցության պատգամավոր Վահե Ղալումյանի հետ, որը, պատասխանելով վերը նշված հարցերին, ասաց, որ խմբակցության լռության պատճառը չի կարող քաղաքական պայմանավորվածությունը լինել։  «Ես ամբողջովին ինֆորմացված չեմ, քանի որ արձակուրդում եմ։ Ոստիկանությունը ուժ է գործադրել ճանապարհը բացելու համար, ճի՞շտ է։ Ես կարծում եմ, որ հիմա քաղաքական դիրքորոշում հայտնելու ժամանակը չէ, հիմա պետք է Շրջակա միջավայրի նախարարությունը ՇՄԱԳ-ի հետ կապված եզրակացություն տա, թե արդյոք նոր ՇՄԱԳ-ի որոշում պե՞տք է կայացվի կամ հին ՇՄԱԳ-ը համարվի ուժի մեջ»,- հավելեց պատգամավորը։  Ղալումյանն ընդգծեց, որ կառավարության քայլերը միանշանակ պետք է տեղավորվեն օրենքի շրջանակներում, եթե նոր ՇՄԱԳ-ի օրենսդրական հնարավորություն չլինի, կառաջանան նոր, ավելի դժվար խնդիրներ։ Անդրադառնալով հարցը հանրաքվեի միջոցով լուծելու տարբերակին՝ Ղալումյանը նշեց, որ, իր կարծիքով, հանրաքվե իրականացնելու անհրաժեշտություն չկա, քանի որ այս դեպքում պետք են մասնագիտական եզրակացություններ, վերջիններս պետք է որոշեն՝ Ամուլսարի շահագործումը բնապահպանական վտանգ պարունակո՞ւմ է, թե՞ ոչ։ «Եթե չեմ սխալվում՝ բնապահպանության տեսչությունը պետք է եզրակացություն տար, որպեսզի նոր ՇՄԱԳ-ի որոշում կայացվեր։ Էլարդի կատարած փորձաքննության մեջ էլ հակասություններ կան, քրեական գործ է հարուցվել։ Հանքի շահագործումը միանշանակ պետք է օրենսդրական հիմք ունենա, ՇՄԱԳ եզրակացությունով, օրենքով ամրագրված։ Եթե մեր կառավարությունը օրենքի գերակայության կողքին կանգնած է, չեմ կարծում, թե սա կարող է մեր վերջը լինել, կարծում եմ կլինի մեր շարունակությունը, քանի որ դա կլինի օրինական պրոցես։ Ե՛ւ հանքի շահագործումը, ե՛ւ չշահագործումը պետք է սահմանված լինեն օրենքով, հստակ եզրակացություններով։ Սա տրամադրություններից չպետք է կախված լինի, որ ես բնապահպան եմ՝ չեմ ուզում, կամ հակառակը՝ ուզում եմ շահագործվի, այստեղ միայն օրենքով սահմանված փաստարկներ են պետք։ Եթե եզրակացությունը հաստատվի, որ հանքի շահագործումը բնապահպանական ռիսկեր չի պարունակում, իմ կարծիքով, պետք է հանքը շահագործվի, եթե եզրակացությունը կլինի, որ դա պարունակում է բնապահպանական ռիսկեր, ապա մեր կառավարությունը այդ եզրակացությունը կպաշտպանի»,- եզրափակեց Ղալումյանը։ Ասպրամ Փարսադանյան
19:10 - 06 օգոստոսի, 2020
Տպավորություն է, որ պատասխանատու մարմինները դիտորդի կարգավիճակում հետեւում են, թե ով է հաղթելու այս մարաթոնում․ բնապահպան

Տպավորություն է, որ պատասխանատու մարմինները դիտորդի կարգավիճակում հետեւում են, թե ով է հաղթելու այս մարաթոնում․ բնապահպան

Վերջին մեկ ամսվա գործընթացները ցույց տվեցին, որ վերակազմավորման արդյունքում նոր ֆինանսական միջոցներ ձեռք բերած «Լիդիան» ընկերությունը, ամենայն հավանականությամբ, այդ միջոցների որոշակի մաս էլ տրամադրել է ինչ-որ գործողություններ անելու եւ ինչ-որ նպատակներ հետապնդելու համար։ Ամուլսարում տեղի ունեցող իրադարձությունների վերաբերյալ, առցանց քննարկման ժամանակ  ասաց Հայկական բնապահպանական ճակատի անդամ, աշխարհագրագետ Լեւոն Գալստյանը։  Գալստյանի խոսքով՝ վերոգրյալը սկսվել է հունիսի 30-ին, երբ ընկերությունը նոր պահնորդական ծառայության հետ պայմանագիր էր կնքել, նրանք էլ, Գալստյանի խոսքով, վայրենի ձեւով ներխուժել էին տարածք, երեք շան ձագ սպանել իրենց մեքենաների անիվների տակ, զենքերով ու մահակներով ուժի ցուցադրություն արել․ «Որոշակի կոնֆլիկտներ ստեղծելու, դրա հետեւանքով պահապաններին ինչ-ինչ խնդիրների առաջ կանգնեցնելու համար պահնորդները անընդհատ գալիս էին, ճանապարհի եզրին կանգնում, անընդհատ կոնֆլիկտների մեջ էին մտնում։ Վերջին գործողությունն այն էր, որ գիշերով Ամուլսարի պահապանների տնակները ճանապարհի մյուս եզրին տեղափոխեցին, դրանց տեղերում էլ դրեցին իրենց տնակները։ Դա մարդկանց հունից հանեց, եւ երեկ, շատ մեծ քանակությամբ մոբիլիզացիա անելով, մարդիկ գնացին եւ 6-7 ժամ փակեցին այդ ճանապարհը։ Ըստ էության, պահապանները պահանջ դրեցին՝ կարճ ժամկետում տնակները հեռացնել, դրանք 20-30 մետր տանել հեռու․ սա կարճաժամկետ պահանջն էր։ Երկարաժամկետ պահանջն այն է, որ կառավարությունը դուրս գա այս թմրած, ոչ մի արձագանք չտալու վիճակից եւ արտահայտի իր կարծիքը։ Բնականաբար, ժողովրդի կարծիքը արդեն ակնհայտ է՝ ե՛ւ տեղացիների, ե՛ւ Հայաստանի քաղաքացիների, որ այս հանքը չպետք է շահագործվի»,- ընդգծեց բնապահպանը՝ շարունակելով, որ, կամ էլ կառավարությունը պետք է հայտարարի, որ գնում է հակառակ ճանապարհով, որպեսզի հասկանալի լինի, թե ժողովուրդը ինչ է անում։ Գալստյանի խոսքով՝ այս ամենի խորքային պատճառները գալիս են դեռեւս 2008-2009 թվականից, երբ Ջերմուկի բնակիչների իրավունքները խախտվել են, եւ նրանք չեն մասնակցել որոշումների կայացմանը, չեն տվել իրենց համաձայնությունը՝ իրենց քաղաքի՝ տնտեսական, սոցիալական, էկոլոգիական, բնապահպանական վիճակը փոխելու։ Նրա պնդմամբ՝ չտված համաձայնության պայմաններում այդ գործողությունների իրականացումը բերել է այս հանգրվանին։ Աշխարագրագետը հավելեց, որ այս իրավիճակը լուծում է պահանջում, պահանջում է ժողովրդավարական եւ քաղաքացիների իրավունքների պահպանությամբ լուծում։ Գնդեվազ համայնքի բնակիչ, բնապահպան Թեհմինե Ենոքյանը ներկայացրեց, թե երեկ ինչպիսի տրամադրություններ են եղել Գնդեվազում․ «Պետք է արձանագրենք, որ այսօր «մենք մերոնցով» ենք քննարկում խնդիրը, եւ պատասխանատու մարմիններից որեւէ մեկը չկա։ Երեկ տրամադրությունները Գնդեվազում բավականին բուռն էին, տեղացի կանայք եւ երեխաները, բոլորը հավքվել էին Ամուլսարի երկրորդ հենակետի մոտ եւ արժանապատվորեն դիմացան բոլոր վիրավորանքներին ու սադրանքներին։ Պահ կար, որ պահնորդական խմբի ներկայացուցիչները հայհոյանքներ ուղղեցին այդ հատվածում կանգնած բնակիչներին, սադրեցին, բայց բնակիչները սադրանքի չգնացին»,- ասաց Ենոքյանը։ Վերջինս պատմեց, որ դրանից հետո ոստիկանության ներկայացուցիչները մոտեցել են պահնորդական խմբի աշխատակիցներին եւ նրանց միջեւ հրմշտոց է տեղի ունեցել, հարվածներ են եղել՝ անգամ մարզի ոստիկանապետի եւ մի քանի այլ ոստիկանների նկատմամբ։ «Վայոց Ձորի նորանշանակ ոստիկանապետ Գեւորգ Ազիզյանը, որը այդ տարածքում է, ճիշտ է հերքում է, որ իրեն հարվածել են, բայց տեսնողներ են եղել, որ ոստիկանության աշխատակիցներին հարվածել են պահնորդական խմբի աշխատակիցները։ Մենք նկատել ենք, որ իրենք զինված են, երկաթյա շղթաներ ունեն․ իրենք այս սադրանքները մեկ ամիս է՝ իրականացվում են։ Պահնորդական խմբից երկու հոգու բերման են ենթարկել, կարգավիճակի մասին տեղեկություններ չունենք»,- մանրամասնեց բնապահպանը։ Խոսելով գնդեվազցիների տրամադրությունների մասին՝ նա նշեց, որ դրանք հստակ են․ բնակիչները ցանկություն չունեն այդտեղ հանք հանդուրժելու․ «Պետք է ասել, որ պահանջները մի քանիսն են, բայց ամենագլխավոր պահանջը, որը ես երեկ հնչեցրել եմ Շրջակա միջավայրի նախարարության առջեւ, ՇՄԱԳ փաստաթուղթն ուժը կորցրած ճանաչելն է։ Դրան եւ քաղաքացիների պահանջին ի պատասխան՝ Շրջակա միջավայրի նախարարությունը հայտարարել է, որ անելիք չունի այդ գործում։ Մինչդեռ, մենք հասկանում ենք, որ այդ խնդրի լուծման բանալին գտնվում է նախարարության իրավասության ներքո։ Իրենք պարզապես շրջանցում են եւ ոստիկանության վրա են դնում ամբողջ բեռը, բայց այստեղ ոստիկանության դերը հասարակական կարգի պահպանումն է, իսկ գլոբալ խնդիրը լուծելու համար անհրաժեշտ է ՇՄԱԳ փաստաթուղթը ուժը կորցրած ճանաչել»,- շեշտեց Ենոքյանը։ Վերջինս նաեւ նշեց, որ պատասխանատու մարմինների լռությունը կասկածներ է առաջացնում, որ նրանք համաձայն են հանքի շահագործմանը։ Բանախոսն այն կարծիքին է, որ կառավարությունից կամ գոնե Ազգային ժողովից պետք է լիներ մեկը, որը կցրեր այդ կասկածները․ «Իրավական բոլոր հիմնավորումները ներակայացված են ե՛ւ ԱԺ, ե՛ւ կառավարություն, ե՛ւ Շրջակա միջավայրի նախարարություն, այս առումով ամենաթողություն եւ անպատասխանատվություն է։ Տպավորություն է, որ կողք են քաշվել եւ դիտորդի կարգավիճակում հետեւում են, թե ով է հաղթելու այս մարաթոնում, մինչդեռ, մենք գործ ունենք զինված խմբի հետ, իսկ քաղաքացիները խաղաղ եղել են, խաղաղ են եւ չեն տրվելու սադրանքներին»,- եզրափակեց բնապահպանը։ Ասպրամ Փարսադանյան
17:27 - 05 օգոստոսի, 2020
«Լիդիան Արմենիան» չի բանակցելու օրենքի շրջանակներից դուրս որևէ առարկայի շուրջ. հայտարարություն

«Լիդիան Արմենիան» չի բանակցելու օրենքի շրջանակներից դուրս որևէ առարկայի շուրջ. հայտարարություն

«Լիդիան Արմենիա» ընկերությունը հայտարարությունում է տարածել, որում ասվում է. ««Լիդիան Արմենիան» խիստ մտահոգություն է հայտնում Ամուլսարում ստեղծված իրավիճակի առնչությամբ: Երեկ «Լիդիանը» իր տարածքից հեռացրել է արդեն երկու տարի ապօրինի տեղադրված վագոն-տնակները: «Լիդիանի» տարածք ապօրինի ներխուժած խմբավորումը օգոստոսի 4-ին ողջ օրը սադրիչ հայտարարություններով հրահրում էր համայնքի բնակիչներին` սպառնալով «արյունահեղությամբ» ու կոչ անելով միանալ ապօրինությանը: Չնայած բոլոր ջանքերին, համայնքը հիմնականում անմասն մնաց ապօրինություն իրականացնող խմբավորման գործողություններից, և նրանց աջակցելու միացան մի քանի տասնյակ սադրիչ Երևանից: Հազարավոր մարդիկ այս համայնքներում արդեն երկու տարի սպասում են խնդրի օրինական կարգավորմանը: Զրկված օրինական աշխատանքից, հուսահատված մարդիկ ապրում են ապօրինություն իրականացնող խմբավորման մշտական սպառնալիքների ներքո` չստանալով իրենց իրավունքների օրինական պաշտպանություն պետությունից և իրավապահ մարմիններից: Երեկ ևս համայնքի ավելի քան 5 հազար բնակիչ ուղիղ եթերում հետևում էր, թե ինչպես է մի քանի տասնյակ սադրիչ` այդ թվում տարբեր պատեհապաշտներ` Երևանից, համայնքի անունից բանակցում այս ապօրինության հանդեպ հետևողական հանդուրժողականություն դրսևորող ոստիկանության հետ: «Լիդիան Արմենիան» պաշտոնապես հայտարարում է, որ ընկերությունը շարունակելու է լինել Հայաստանի այն բացառիկ ընկերություններից, որ որևէ պարագայում չի շեղվելու օրենքի տառից, որքան էլ դա դժվար լինի: Ընկերությունը չի բանակցելու օրենքի շրջանակներից դուրս որևէ առարկայի շուրջ: Ընկերությունը շարունակելու է պայքարել իր օրիանական իրավունքները վերականգնելու համար, ի հեճուկս բոլոր այն ուժերի, որոնք փորձում են ապօրինի գործողություններով տապալել երկրի խոշորագույն և օրինակելի ներդրումը: «Լիդիան Արմենիան» հայտարարում է, որ չի դառնալու քաղաքական խաղաքարտ որևէ ուժի համար: Ողջ աշխարհը արդեն երկու տարի հետևում է այս աննախադեպ ապօրինությանը, որը խարան է թողել Հայաստանի հեղինակության վրա: «Լիդիան Արմենիան» կառավարությանը և ոստիկաությանը կոչ է անում վերականգնել օրենքը և կանգնել օրենքի երկամյա ոտնահարումից տուժած հազարավոր քաղաքացիների իրավունքների կողքին»:
13:04 - 05 օգոստոսի, 2020
Սեւանի ափին ապօրինի կառույցները պետք է ապամոնտաժվեն․ դրանց թիվն այս պահին մոտավորապես 3800 է |lragir.am|

Սեւանի ափին ապօրինի կառույցները պետք է ապամոնտաժվեն․ դրանց թիվն այս պահին մոտավորապես 3800 է |lragir.am|

lragir.am: Հարցազրույց Շրջակա միջավայրի նախարար Ռոմանոս Պետրոսյանի հետ։ Պարոն Պետրոսյան, Ամուլսարում իրավիճակը գնալով բարդանում է։ Շատերը նշում են, որ Ամուլսարը, որտեղ լուրջ զարգացումներ են տեղի ունենում, փորձաքար է Ձեզ համար: Ինչպե՞ս եք գնահատում այս օրերին այնտեղ տեղի ունեցած բողոքի ակցիաները, դրանք ի՞նչ ցույց տվեցին, և այս խնդիրն ինչպիսի լուծում է ունենալու: Ամուլսարի մասով ես մի քանի անգամ ասել եմ, որ գնահատականներ չեմ տալու, մինչև անձամբ փորձագիտական գնահատականներ չունենամ, մինչև մասնագետների հետ չխորհրդակցեմ: Հիմա առաջին հերթին ձեռնամուխ եմ եղել Սևանի, նրա ափերի հետ կապված խնդիրներին: Իսկ թե բնապահպաններն ու «Լիդիանի» ներկայացուցիչներն ինչ խնդիր են իրար մեջ լուծում, դա թող մյուս գերատեսչությունները, այդ թվում ոստիկանությունը հասկանա և կարգավորի այդ հարցը: Այսինքն՝ Դուք դեռ ուսումնասիրո՞ւմ եք խնդիրը: Այո, դրա համար ես չեմ ուզում հիմա գնահատականներով հանդես գալ: Ես ասել եմ, որ այս պահին Շրջակա միջավայրի նախարարությունը այս օրերի զարգացումներին միջամտելու ոչ մանդատ ունի, ոչ էլ ասելիք: Պարզ է, որ մեր ոլորտն է և ասելիք ունենալու եմ և ունեմ, բայց երեկվա զարգացումները, տնակներ տանել-բերելը շրջակա միջավայրի հետ ոչ մի կապ չունի: Երկու սուբյեկտների միջև խնդիր է ծագել, բողոքի ակցիաներ են ընթանում: Շրջակա միջավայրի նախարարությունն այդտեղ բովանդակային հարց ունի լուծելու, ոչ թե կոնկրետ երեկվա զարգացումների վերաբերյալ: Ես կրկնեմ, որ դեռ հարցը պետք է ուսումնասիրեմ, և իմ կարծիքը, բնականաբար, պետք է կառուցվի բացառապես փաստերի, փաստարկների, ինչպես նաև փորձագիտական շրջանակների հետ աշխատելուց հետո: Իսկ որքա՞ն ժամանակ կպահանջվի Ամուլսարի խնդիրն ուսումնասիրելու և դիրքորոշում արտահայտելու համար: Ժամկետ չեմ կարող ասել, բայց շատ չենք ուշացնի: Հատկանշական էր նախարարի պաշտոնում Սևանի խնդրի շուրջ Ձեր առաջին քայլը. Ինչո՞ւ սկսեցիք Սևանի ափին հենց ձեր թիմակցի կողմից շահագործվող ապօրինի կառույցի գործունեությունից՝ արգելելով այն: Քանի որ այդ հարցը հանրային մեծ հնչեղություն էր ստացել, և դա համընկավ իմ նշանակման հետ, բնականաբար, ես այդ դեպքով էլ անմիջապես սկսեցի զբաղվել: Իմ թիմակցի անվան հետ կապվում է, բայց առնվազն տնտեսվարողի ներկայացրած փաստաթղթերն ու տվյալները դե յուրե ոչ մի աղերս չունեին իմ թիմակցի հետ, բացառությամբ այն դրվագի, որ վերջինս ասաց, որ ընկերական հարաբերություններ ունի և պարզապես այցելում է այնտեղ: Բոլոր դեպքերում, անկախ նրանից, թե ով է տնօրինում այդ ափը, ով է տնտեսվարող և ով ինչ կապ ունի մեր թիմակցի, մեր պատգամավորի հետ, մենք այդ առումով որևէ անձով չենք պայմանավորում աընդունելի երևույթները: Փաստաթղթերի ուսումնասիրությունից պարզվեց, որ ափի տնտեսվարողը ափի տնօրինման իրավական կարգավիճակ չունի, և ապօրինի է թե տաղավարների, թե մնացած ժամանցի ենթակառուցվածքների տեղակայումն այդ ափին: Հետևաբար, ես կարգադրեցի «Սևան ազգային պարկի» տնօրենի ժամանակավոր պաշտոնակատարին ամենասեղմ ժամկետներում կասեցնել դրա գործունեությունը և ապամոնտաժել տաղավարները: Տարօրինակ չէ՞, որ հեղափոխությունից հետո այսպիսի երևույթներ կան, հատկապես, եթե դրան թեկուզ անուղղակի առնչություն ունի ձեր թիմակիցը: Ինձ համար ոչ միայն տարօրինակ է, այլև շատ անընդունելի է, և իմ նախկին կարգավիճակում գործունեությունս նաև մեծապես միտված է եղել նոր Հայաստանում բացառելու նման երևույթները ոչ միայն նախկինից ժառանգած, այլև մեր իշխանության ընթացքում եղած նման փորձերը: Այդ պատճառով էլ Կոտայքի մարզում ունեցել ենք բավականին թեժ կետեր, թեժ զարգացումներ, տարբեր, այդ թվում օլիգարխիկ, կլանային շահեր հետապնդող շրջանակների թեժ դիմադրությանն ենք հանդիպել: Այժմ արդեն կարծես ավելի լայն մասշտաբի շրջափուլ է մտել դա: Այո, պետք է բոլոր նմանատիպ ապօրինի հողազավթումները կասեցնել, վերադարձնել նախկին տեսքին, ապա միայն ըստ նպատակահարմարության և բացառապես պետական շահից ելնելով, մրցույթների միջոցով, ամենաօբյեկտիվ ընթացակարգերով դրանք տրամադրել տնտեսվարողներին: Բոլոր ափերի հետ կապված նմանատիպ ուսումնասիրություններ արդեն արվո՞ւմ են: Այո, արդեն արվում են, և մոտ 300 այդպիսի ապօրինի գործող տնտեսվարող կա: Այս պահին «Սևան ազգային պարկի» տարածքում 970 պայմանագիր կա, և հաստատ դրանց շարքում կլինեն ապօրինի գործողներ, նմանատիպ դրվագներ ունենալու ենք: Շարունակությունը՝ lragir.am-ում
11:25 - 05 օգոստոսի, 2020