Ունենք հին կադրեր, որոնք ցույց են տվել, որ կարող են փոխվել եւ նոր կադրեր, որոնք երազում են հների տեղում լինել․ Փաշինյան
|armtimes.com|
armtimes.com: Մենք միշտ ասում ենք, եւ փաստացի հենց այդպես է, որ պետական կառավարման համակարգում այսօր մեծ մասամբ հին կադրերն են աշխատում։ Այս մասին այսօր ԱԺ-ում կառավարության հետ հարցուպատասխանի ժամանակ ասաց «Իմ քայլը» խմբակցության ղեկավար Լիլիթ Մակունցը։ Նրա խոսքով՝ սրա համար քաղաքական մեծամասնությունը եւ կառավարությունը պարբերաբար արժանանում են քննադատության։ Մակունցը հետաքրքրվեց՝ կա՞ արդյոք լուծման ճանապարհ։
Վարչապետ Նիկոլ Փաշինյանը նշեց՝ ցավոք, այս ընթացքում չհասցրեց գտնել ձայնագրություն, այնուամենայնիվ, ընդգծեց, որ դա նույնպես հեղափոխության ժամանակ իր տված խոստման շրջանակում է։ «Ես ասել եմ, որ կադրային ջարդ չի լինելու եւ այդ խոստումը տվել եմ շատ ավելի առաջ, քան որեւէ մեկը լրջորեն կմտածեր, թե ես ստանձնելու եմ ՀՀ վարչապետի պաշտոնը»,- ասաց Փաշինյանը՝ շեշտելով, որ իր տված խոստումները շատ կարեւոր է համարում։
«Բայց ընդհանուր առմամբ որն է ռազմավարությունը․ արդոք ասելով, որ կադրային ջարդ չի լինելու՝ նկատի ենք ունեցել, որ պետական կառավարման համակարգը պետք է մնա նո՞ւյնը։ Ո՛չ, մենք դա նկատի չենք ունեցել, բայց չենք էլ նկատի ունեցել, որ պետական կառավարման համակարգում եղած այս, այս, այս մարդուն պետք է փոխարինեն այս, այս, այս մարդիկ»,- ասաց վարչապետը՝ հավելելով, որ ի սկզբանե էլ համարել է, որ դա վատ մոտեցում է։ Նա նաեւ նշեց, որ, ցավոք սրտի, մի քանի նոր կարդեր ընդամենը մի քանի օրվա ընթացքում ապացուցել են, որ կարող են մտնել կաբինետ եւ իրենց դնել իրենց նախորդի տեղը։ «Ես ստիպված եմ եղել իմ նշանակած մարդկանց շատ արագ ազատել աշխատանքից հենց այդ ուղիղ հիմնավորմամբ, նույնիսկ՝ ամենամերձավոր թիմի ներկայացուցիչներին»,- ասաց նա՝ հավելելով՝ հիմնավոր կասկածներ կան, որ նոր կադրերը ներգրավված են եղել նույնիսկ կոռուպցիոն գործարքների մեջ։
«Իմ ընկալածը ոչ թե այն է եղել, որ այս մարդուն պետք է փոխարինի այն մարդը, այլ իմ ընկալածը եղել է, որ փոփոխությունները պետք է տեղի ունենան մեր ներսում, մեզնից յուրաքանչյուրի ներսում։ Մենք ունենք հին կադրեր, որոնք այս ընթացքում ցույց են տվել, որ կարող են փոխվել եւ ունենք նոր կադրեր, որոնք ապացուցել են, որ իրենց երազանքը հների տեղում հայտնվելն է»,- ասաց Փաշինյանը։ Նա նաեւ ընդգծեց՝ մի կողմից ասվում է, որ պետական համակարգի աշխատողների աշխատավարձը պետք չէ բարձրացնել, բայց ո՞վ է պատրաստ այդ աշխատավարձով գալ եւ այսօր անել այդ ծառայությունը։
19:47 - 15 ապրիլի, 2020
