Գեղարքունիքի մարզ

Գեղարքունիքը մարզի կարգավիճակ ունեցող վարչատարածքային միավոր է Հայաստանի արեւելքում։

Սահմանակից է հյուսիսում՝ Տավուշի, արեւմուտքում՝ Կոտայքի եւ Արարատի, հարավում՝ Վայոց ձորի մարզերին, արեւելքում՝ Ադրբեջանի Հանրապետության Գետաբեկի, Դաշքեսանի եւ Թովուզի շրջաններին, հարավ-արեւելքում՝ Արցախի Հանրապետության Շահումյանի շրջանին:

Մասշտաբով երկրի ամենամեծ մարզն է, որի մարզկենտրոնն է հանդիսանում Գավառ քաղաքը: Մարզում է գտնվում Հայկական լեռնաշխարհի երեք խոշորագույն լճերից մեկը՝ Սեւանա լիճը:

Գեղարքունիքի մարզում հաստատվել է կորոնավիրուսով վարակման 10 նոր դեպք. մարզպետ

Գեղարքունիքի մարզում հաստատվել է կորոնավիրուսային հիվանդության 10 նոր դեպք: Այս մասին ֆեյսբուքյան իր էջում գրել է մարզպետ Գնել Սանոսյանը։ Սանոսյանը նշել է նաև, որ մարզում կորոնավիրուսից ապաքինվել է 3 մարդ։

18:46 - 12 մայիսի, 2020

Վաղաշենում այս տարի կիրականացվի երեք սուբվենցիոն ծրագիր

Գեղարքունիքի մարզի Վաղաշեն գյուղում այս տարի կիրականացվի սուբվենցիոն երեք ծրագիր: Դրանք արդեն հավանության են արժանացել միջգերատեսչական հանձնաժողովի կողմից: Ինչպես տեղեկացրեց Գեղարքունիքի մարզպետարանի զարգացման ծրագրերի, զբոսաշրջության և վերլուծության բաժնի պետ Վարդուհի Մնացականյանը, սուբվենցիոն առաջին ծրագրով նախատեսված է բազմաֆունկցիոնալ ամբարձիչ էքսկավատորի ձեռքբերում: Ծրագրի նախահաշվային արժեքը կազմում է 35 միլիոն 500 հազար դրամ, որի 55 տոկոսը կամ 19 միլիոն 525 հազար դրամը հատկացնում է ՀՀ կառավարությունը, 45 տոկոսը կամ 15 միլիոն 975 հազար դրամը՝ Վաղաշենի համայնքապետարանը: Սուբվենցիոն երկրորդ ծրագրով նախատեսվում է գույքի ձեռքբերում համայնքի մանկապարտեզի կարիքների համար: Նույն աղբյուրի տեղեկացմամբ այս ծրագրի նախահաշվային արժեքը կազմում է 15 միլիոն 460 հազար դրամ, որի 55 տոկոսը կամ 8 միլիոն 503 հազար դրամը հատկացնում է ՀՀ կառավարությունը, 45 տոկոսը կամ 6 միլիոն 957 հազար դրամը՝ Վաղաշենի համայնքապետարանը: Սուբվենցիոն երրորդ ծրագրով նախատեսվում է «Կոփոյ վար» կոչվող արոտավայրի ջրարբիացման, ոռոգման, կենցաղային եւ տեխնիկական ջրի ջրաքանակի ավելացում: Ծրագրի նախահաշվային արժեքը կազմում է 50 միլիոն 750 հազար դրամ, որի 70 տոկոսը կամ 35 միլիոն 525 հազար դրամը հատկացնում է ՀՀ կառավարությունը, 30 տոկսոսը կամ 15 միլիոն 225 հազար դրամը՝ Վաղաշենի համայնքապետարանը: Վաղաշեն համայնքի ղեկավար Արթուր Սուվարյանի հավաստմամբ՝ շինարարական երեք մրցույթներն էլ արդեն կայացել են: «Համայնքի համար կենսական նշանակության շատ կարեւոր ծրագրեր են իրականացվում: Բազմաֆունկցիոնալ ամբարձիչ էքսկավատորը կօգտագործվի համայնքի ոռոգման առուների մաքրման, խմելու ջրագծի վթարների վերականգնման, ճանապարհների հարթեցման ու մաքրման համար: Այն նաեւ կտրամադրվի վարձակալության՝ համայնքի բյուջեի համար լրացուցիչ եկամուտներ ապահովելու նպատակով: Վաղաշենի մանկապարտեզում այժմ ընթանում են հիմնանորոգման աշխատանքներ, որոնք մեկնարկել են անցած տարվա վերջերից, դարձյալ սուբվենցիոն ծրագրի շրջանակներում, 112 միլիոն 374 հազար դրամ պայմանագրային արժեքով: Շատ կարեւոր է մանկապարտեզն ապահովել համապատասխան գույքով, որպեսզի տարիներ շարունակ անբարեկարգ վիճակի պատճառով պարապուրդի մատնված մանկապարտեզի վերաբացման համար որեւէ խնդիր չառաջանա: Մեր համայնքի բնակիչները շատ երկար են սպասել նաեւ «Կոփոյ վար» կոչվող տարածքի արոտավայրի ջրարբիացման ծրագրի իրականացմանը: Ջրաքանակի ավելացմամբ համայնքում լուծում կստանան արոտների ջրարբիացման եւ ոռոգման ջրի մատակարարման հետ կապված խնդիրները: Լեռնային բարդ պայմաններում կկառուցվի 1,8 կիլոմետր երկարության ջրատար եւ 3 աղբյուրակապ»,-ներկայացրեց Վաղաշեն համայնքի ղեկավարը:

11:58 - 11 մայիսի, 2020

Գեղարքունիքում վերջին երկու օրում հաստատվել է վարակի 11 նոր դեպք, ապաքինվել է ևս 7 քաղաքացի, 1 մարդ մահացել է․ Գնել Սանոսյան

Հ Գեղարքունիքի մարզպետ Գնել Սանոսյանը ֆեյսբուքյան իր էջում գրառում է կատարել՝ անդրադառնալով մարզում վերջին օրերին կորոնավիրուսով վարակվելու դեպքերին։ Սանոսյանը գրել է․«Արձանագրվել է մահվան 1 դեպք։ Պացիենտը եղել է 61 տարեկան (կին) և ունեցել է ուղեկցող խրոնիկական հիվանդություններ։Հաստատված դեպքեր ունենք մարզի Վարդենիս, Մեծ Մասրիկ, Շատվան, Սոթք, Նորակերտ, Ծովինար, Ծովազարդ, Սևան, Դդմաշեն, Գեղամավան և Մարտունի (քաղաք) համայնքներում։Բոլոր վարակակիրների շփման շրջանակը պարզվում է, ըստ բժշկական ցուցումների՝ կատարվում է քաղաքացիների ինքնամեկուսացման և մեկուսացման գործընթացը»։

15:05 - 10 մայիսի, 2020

Արթուր Մկրտչյանը նշանակվել է ոստիկանության Գեղարքունիքի մարզային վարչության պետ |armenpress.am|

armenpress.am: ՀՀ ոստիկանապետ Արման Սարգսյանի հրամանով՝ Աշտարակի բաժնի պետ ոստիկանության գնդապետ Արթուր Մկրտչյանը ազատվել է զբաղեցրած պաշտոնից և նշանակվել ոստիկանության Գեղարքունիքի մարզային վարչության պետ։ Այս մասին տեղեկացրին ՀՀ ոստիկանության հասարակայնության հետ կապի և լրատվության վարչությունից։ Ավելի վաղ, ՀՀ ոստիկանության պետ Արման Սարգսյանի հրամանով աշխատանքից ազատվել և ոստիկանության կադրերի ռեզերվ էր ուղարկվել ոստիկանության Գեղարքունիքի մարզային վարչության պետ ոստիկանության գնդապետ Գևորգ Հակոբյանը։ Ապրիլի 28-ին Գեղարքունիքի մարզի Գավառ քաղաքում՝ Գավառի համալսարանի մոտակայքում ժամը 17:40-ի սահմաններում փոխհրաձգություն է տեղի ունեցել, որի հետևանքով մահացել էր 2 մարդ, 4 հոգի մարմնական վնասվածքներով տեղափոխվել էին հիվանդանոց: Փոխհրաձգությունից հետո մի խումբ քաղաքացիներ փորձել էին հաշվեհարդար տեսնել այդ հրաձգության մասնակիցներից մեկի նկատմամբ և հարձակվել էին Գավառի բժշկական կենտրոնի վրա։ ՀՀ քննչական կոմիտեն Գավառ քաղաքում երկու անձի սպանելու և չորս անձի հրազենային մարմնական վնասվածքներ պատճառելու, ինչպես նաև՝ մի խումբ անձանց կողմից բռնությամբ և գույքը ոչնչացնելով զուգորդված զանգվածային անկարգությունների դեպքերի առթիվ հարուցել է քրեական գործեր, որոնք միացրել է մեկ վարույթում: Մայիսի 2-ի դրությամբ՝ քննվող քրեական գործով կալանավորվել էր 13 անձ, ևս 2 անձի ձերբակալման որոշում էր կայացվել։

15:48 - 06 մայիսի, 2020

Դդմաշեն համայնքում գրանցվել է կորոնավիրուսային հիվանդության բռնկման նոր օջախ, մուտքի եւ ելքի հատուկ ռեժիմ է սահմանվում, եւ կիրառվելու են սահմանափակումներ

Գեղարքունիքի մարզպետ Գնել Սանոսյանը ֆեյսբուքյան իր էջում գրում է․ «Գեղարքունիքի մարզի հարգելի՛ բնակիչներ․ Հաշվի առնելով, որ Գեղարքունիքի մարզի Դդմաշեն համայնքում գրանցվել է կորոնավիրուսային հիվանդության բռնկման նոր օջախ՝ՀՀ պարետ Տիգրան Ավինյանի 6 մայիսի, 2020 N 66 որոշման համաձայն` (https://www.gov.am/files/docs/4041.pdf),Գեղարքունիքի մարզի Դդմաշեն համայնքի մուտքի եւ ելքի հատուկ ռեժիմ է սահմանվում, եւ կիրառվելու են սահմանափակումներ։Որոշման համաձայն, համայնքի վարչական սահման մուտք գործելու եւ վարչական սահմանից ելք կատարելու համար սահմանվել է հատուկ ռեժիմ։Սահմանափակումներն ուժի մեջ են մտնում 2020 թվականի մայիսիի 6-ի՝ ժամը 18։00–ից մինչեւ 2020 թվականի մայիսի 16-ը` ժամը 23:59-ը։ Այսօրվա դրությամբ մարզում հաստավել է 32 նոր դեպք, ընդհանուր ունենք հաստատված 149 դեպք, որից 39 դեպք Դդմաշեն համայնքում։ Հաստատված դեպքեր ունենք նաեւ մարզի Վարդենիս, Մեծ Մասրիկ, Շատվան, Սոթք, Նորակերտ, Ծովինար, Ծովազարդ, Սեւան եւ Գեղամավան համայնքներում։Դդմաշենում առաջին դեպքը գրանցվել է հուղարկավորության հետեւանքով, այլ մարզից ժամանած ազգականների շփման արդյունքում։ Մեծամասամբ նոր դեպքերը գրանցվել են մեկուսացված եւ ինքնամեկուսացված քաղաքացիների շրջանում։Բոլոր վարակակիրների շփման շրջանակը պարզվել է, նրանց մի մասը ինքնամեկուսացված է, մի մասը` մեկուսացված։ Գործընթացը կրում է շարունակական բնույթ»։

14:46 - 06 մայիսի, 2020