«Հայաստան» դաշինք

Ընդդիմության անդամները երթով Իջևանից գալիս են Երևան |tert.am|

tert.am: Իջևանից մեկնարկեց քաղաքացիների երթը դեպի Երևան։ Այս մասին ֆեյսբուքյան էջում գրել է «Հայաստան» խմբակցության անդամ, ԱԺ փոխխոսնակ Իշխան Սաղաթելյանը։ Նա նշել է, որ նման երթեր են մեկնարկելու ևս 3 խորհրդանշական վայրերից։«Մենք անպայման կհայտնենք, թե որ օրն ենք միասին դիմավորելու տարբեր ուղղություններով մայրաքաղաք ժամանող երթերի մասնակիցներին։ Իսկ մինչ այդ գործ ունենք անելու Երևանում։ Ուղիղ եթերին կարող եք հետևել՝ tert.am-ում

12:49 - 25 ապրիլի, 2022

Զանգն արդեն հնչել է, եկել է գործելու ժամանակը. այսօր Իջևանից քաղաքացիները երթով կգան Երևան, մայրաքաղաքում կլինի իրազեկման ակցիա․ Իշխան Սաղաթելյան

«Հայաստան» դաշինքն այսօր ընդդեմ իշխանության գործողությունների վերաբերյալ տեղեկությունները է հայտնել։ «Հայաստան» խմբակցության պատգամավոր Իշխան Սաղաթելյանը հայտնել է, թե ինչ գործողություններ է անելու այսօր ընդդիմությունը․«Սիրելի հայրենակիցներ, մենք հայտարարել ենք, որ զանգն արդեն հնչել է, եկել է գործելու ժամանակը։ Տեղեկացնում եմ, որ առավոտյան 11։00-ին, Իջևանից Հայաստանի արժանապատիվ քաղաքացիները կսկսեն իրենց երթը դեպի Երևան։ Առաջիկայում նման երթեր կմեկնարկեն Հայաստանի այլ մարզերից ևս։ Մի քանի օր անց մենք տարբեր ուղղություններով Երևան ժամանած մեր հայրենակիցներին կդիմավորենք մեր մայրաքաղաքի սրտում։ Իսկ մինչ այդ մենք Երևանում կիրականացնենք ամենօրյա իրազեկման երթեր։ Առաջին երթը կմեկնարկենք այսօր՝ ժամը 18։30-ին՝ Կոմիտասի պողոտայի Սբ. Խաչ եկեղեցու մոտ»։ Հիշեցնենք, որ անժամկետ գործողությունների մասին է հայտնել նաև ԱԱԾ նախկին տնօրեն Արթուր Վանեցյանը։ Ընդդիմադիրները հայտարարում են, որ նրանց միջև տարաձայնություններ չկան։

09:26 - 25 ապրիլի, 2022

«Տեքստը լրամշակված չէ»․ ընդդիմությունը հետաձգեց հայ-թուրքական կարգավորման հայտարարության քննարկումը |civilnet.am|

civilnet.am: Ազգային ժողովի արտաքին հարաբերությունների մշտական հանձնաժողով՝ ապրիլի 22-ի արտահերթ նիստում որոշվեց հետաձգել «Հայաստան-Թուրքիա հարաբերությունների հայեցակարգային դրույթների մասին» հայտարարության տեքստի քննարկումը՝ երկամսյա ժամկետով։ Ինչպես հայտնեց ընդդիմությունը՝ տեքստը լրամշակված չէ։ Արտաքին հարաբերությունների հանձնաժողովի այսօրվա նիստին ընդդիմադիր պատգամավոր Արծվիկ Մինասյանը նախագծի մասին զեկույցը ներկայացնելու փոխարեն խնդրեց հետաձգել քննարկումը. «Առաջարկում եմ հետաձգել այս հարցը, լրամշակման գործընթացն անելուց հետո մենք կներկայացնենք վերջնական տարբերակը, որն արդեն ճիշտ կլինի հանձնաժողովով քննարկել»,- ասաց Մինասյանը։ Հիշեցնենք, որ ապրիլի 20-ին ՀՀ ԱԺ-ից հայտնել էին, որ հայտարարության նախագծի քննարկումը չեղարկվել է «տեխնիկական խնդիրների պատճառով»։ Այնուհետև հայտարարություն էր տարածել «Հայաստան» խմբակցությունը. «Օրվա քաղաքական իշխանությունը, հերթական անգամ խախտելով Սահմանադությունն ու օրենքները, մինչև ապրիլի 24-ը հրաժարվում է ԱԺ-ում լսումների անցկացման համար տրամադրել ԱԺ դահլիճը և ուղիղ հեռարձակում ապահովել՝ ներկայացնելով անհիմն տեխնիկական պատճառաբանություն»: Առավել մանրամասն՝ civilnet.am-ում:

12:37 - 22 ապրիլի, 2022

Այս վիճակում պետք է իշխանությունը փոխվի. անցել ենք ռուբիկոնը, երբ կկարողանային ինչ-որ բան համոզել իրենց. Ր.Հովհաննիսյան |news.am|

news.am: Ես Ազատության հրապարակից երբեք չեմ հեռացել, այս հրապարակը հայ ժողովրդի պայքարի հանգրվանն է. 34 տարի առաջ հրապարակից մեկնարկել ազգային ազատագրական պայքարը: Այս մասին այսօր՝ ապրիլի 18-ին, Ազատության հրապարակում ասաց «Ժառանգության» առաջնորդ Րաֆֆի հովհաննիսյանը: «Երեկ հետեւել եմ՝ ինչպես գներալը այստեղից իր կոչն արձակել է եւ պարզապես այս առավոտ այստեղ եմ, երեկ գիշերվանից «Ժառանգությունն» այստեղ եղել է: Կարծում եմ՝ հիմա հայրենիքի փրկության հերթական արարն է, եւ մենք ներկա ենք:Մենք անցել ենք հարցազրույցներ մեկնելու փուլը, արդեն ամեն ինչ պարզ է, թե թշնամին ինչ է անում մեր ինքնիշխան տարածքում, Արցախի կեսից ավելին բռնազավթելով, թե մեր գործող իշխանություններն ինչ են անում, ինչ են հայտարարում աշխարհին՝ վերցնելով թշնամի պետությունների քաղաքականությունը, վարքագիծը եւ փորձելով դա ներկայացնել որպես մեր պետական մոտեցումներ: Պարզ է, որ սրան պետք է վերջ տրվի: Սրա համար չէր, որ 34 տարի առաջ այս հրապարակից ժայթքեց հայոց ոգին: Այսօր մեր իսկ իշխանությունը փորձում է կցորդը դառնալ, իրականացնողը դառնալ այդ թշնամական ծրագրի: Ժամանակն է, որ հայ ժողովուրդը դուրս գա ճակատագրապաշտությունից, թմբիրից եւ մենք շարունակենք մեր 34-ամյա պայքարը»,-ասաց նա: Հարցին, թե որն է իրենց պայքարի ուղին, իշխանափոխությո՞ւնը, թե՞ պարտադրելը իշխանություններին, որ զերծ մնա ծայրահեղ քայլերից, Րաֆֆի Հովհաննիսյանը պատասխանեց. «Լավ կլիներ համոզեինք մեր իշխանություններին, որ չգնային ծայրահեղ քայլի, բայց կարծում եմ՝ մենք անցել ենք այդ ռուբիկոնը, որ կարողանայինք համոզել: Այս իշխանությունը ցույց է տվել, որ չունի այդ հատկությունը, որ դիմանա թշնամու ճնշումներին, հետպատերազմյան այդ ուղղահայաց հոխորտանքներին, բռնազավթումներին, որ տեղացել է թշնամական զույգը, եւ նաեւ միգուցե «միջազգային հանրությունը», որին հղում արեց Նիկոլ Փաշինյանը: Նա ի զորու չէ դիմակայել: Մենք չենք կարող համոզել իրեն: Այս իրավիճակում պետք է փոփոխվի իշխանությունը: Եթե այդ իշխանությունը չի գիտակցում, որ Հայաստանի շահից է բխում այդ փոփոխության անհրաժեշտությունը, ուրեմն հայ ժողովուրդը ոչ լավ օրից պետք է հավաքվի, իր մեջ ուժ գտնի հավաքվելու այս եւ բոլոր հրապարակներում եւ այդ փոփոխությունը կատարի»:

13:03 - 18 ապրիլի, 2022

Ընդդիմությունն ունի գործողությունների հստակ ծրագիր. Վարդևանյանը` փողոցային պայքարի մասին |armenpress.am|

armenpress.am: «Հայաստան» խմբակցության պատգամավոր Արամ Վարդևանյանը հայտարարեց, որ ընդդիմությունը փողոցային պայքարի մասով ունի հստակ գործողությունների ծրագիր, որը առաջիկայում կներկայացնեն: «Խնդրում եմ, որպեսզի մեր հայրենակիցները այդ իմաստով փոքր ինչ համբերեն»,- Ազատության հրապարակում լրագրողների հետ զրույցում ասաց Վարդևանյանը: Պատգամավորը կարևորեց ապակենտրոն գործողությունները և ցանցային պայքարը: «Կարծում եմ, որ մեր հայրենակիցների այն խումբը, ովքեր ունեին վերապահումներ, հիասթափված էին, այդ իրավիճակից դուրս են գալու»,- նշեց Վանեցյանը: Պատգամավորն ասաց, որ այս գործողությունները ունեն ժամկետներ, սակայն այլ փակագծեր չբացեց:

12:21 - 18 ապրիլի, 2022

«Գործուն քայլեր են ձեռնարկվում, բոլոր գործիքակազմերն օգտագործվելու են». Գեղամ Մանուկյան |azatutyun.am|

azatutyun.am: «Ընդդիմությունը ձեռքերը ծալած նստած չէ: Պատրաստ եղեք, մեծ գործ ունենք անելու...»,- ֆեյսբուքյան իր էջում երեկ գրել է ԱԺ ընդդիմադիր փոխնախագահ Իշխան Սաղաթելյանը՝ առանց մանրամասնելու, թե կոնկրետ ինչ գործողությունների մասին է խոսքը։ Ընդդիմության քայլերի մասին քննարկումները հատկապես ակտիվացան Արցախի կարգավիճակի նշաձողի վերաբերյալ վարչապետ Փաշինյանի աղմկահարույց հայտարարությունից հետո։ Խորհրդարանական ընդդիմադիր «Հայաստան» խմբակցության պատգամավոր Գեղամ Մանուկյանից այսօր հետաքրքրվեցինք՝ ինչ է նախաձեռնում ընդդիմությունը։ «Գրեթե ամեն ինչ ասված էր․ գործուն քայլեր են ձեռնարկվում, որոնց մասին և արդյունքների, նաև գործողությունների մասին շատ կարճ ժամանակում արդեն հանրությանը կտեղեկացվի: Բոլոր գործիքակազմերն օգտագործվելու են, ինչպես օրինակ` ապրիլի 5-ի հանրահավաքն էր», - պատասխանեց Մանուկյանը: 44-օրյա պատերազմի ավարտի վերաբերյալ հայտարարության ստորագրումից հետո ընդդիմադիրները կրկին փողոց էին դուրս եկել․ տևական ժամանակ փակ պահեցին Բաղրամյան պողոտան, սակայն հետո անցան խորհրդարանական աշխատանքներին։ Արդյո՞ք այս անգամ գործողությունների զինանոցում հանրահավաքից բացի, նաև անհանզանդության ակցիաներ են ներառելու, հետաքրքրվեցինք Մանուկյանից։ «Հայաստանի քաղաքացին իր իրավունքները պաշտպանելու, իր երկրի սուվերենությունը պաշտպանելու իրավունք ունի ցանկացած ձևով», - նշեց նա: «Եթե Նիկոլ Փաշինյանը մոտ ժամանակներում չհրաժարվի իր դիրքորոշումից, իհարկե պետք է հետևեն գործուն քայլեր» Ընդդիմադիր ուժերը նախորդ շաբաթ բոյկոտել էին ԱԺ նիստերն ու կառավարության հետ հարցուպատասխանը և հայտարարել, որ մեկնում են Արցախ։ Ռուս խաղաղապահները, սակայն, պատգամավորներին թույլ չեն տվել մտնել Արցախ։ Տեղի ընդդիմադիր ուժերի հետ նրանց հանդիպումը կայացել է Աղավնոյի անցակետում։ Արցախի խորհրդարանի ընդդիմադիր «Արդարություն» խմբակցության ղեկավար Դավիթ Գալստյանն «Ազատության» հետ զրույցում ասաց՝ Արցախի խորհրդարանն արդեն իր ընդունած հայտարարությամբ պահանջել է Հայաստանի իշխանություններից հրաժարվել «աղետալի դիրքորոշումից», հակառակ դեպքում ինքը չի բացառում գործուն քայլերի գնալը, բայց ոչ առանձին-առանձին քաղաքական ուժերով։ «Քանի որ հայտարարությունն «Արդարություն» կուսակցությունը միայնակ չի արել, «Արդարությունը» միայնակ ոչ մի քայլ չի անելու: Եթե Նիկոլ Փաշինյանը մոտ ժամանակներում չհրաժարվի իր դիրքորոշումից, իհարկե պետք է հետևեն գործուն քայլեր, որովհետև այս հայտարարությունն ամբողջ խորհրդարանը չի հայտարարել հայտարարելու համար, այլ դիրքորոշում է ներկայացրել, կարմիր գծեր է գծել, որից հետո Հայաստանի գործող վարչապետը պարտավոր է կամ երրորդ անձի անունով երբ որ լսեցնում են, թե իբրև թե լավ չեն հասկացել, լավ ասեին, լավ հասկանայինք: Եթե իրենք լավ ասել են, մենք լավ չենք հասկացել, ապա թող պարզաբանում տան, թե ինչ նկատի ունեին, ոչ թե երրորդ-չորրորդ խոսափողներով ինչ-որ փորձեն էլի մեղքը բարդել մեզ վրա, թե իբր թե լավ չենք հասկացել», - շեշտեց Դավիթ Գալստյանը: Արցախի «Արդարություն» կուսակցության ղեկավարին հարցրինք` հայաստանյան ընդդիմության ակնարկած առաջիկա անելիքներին իրենք մասնակցելու են, եթե օրինակ՝ հանրահավաք, անհնազանդության ակցիաներ լինեն։ «Մենք դեռևս ոչ մի նմանատիպ քննարկում չենք ունեցել, բայց համոզված եմ, որ լինելու է», - ասաց նա:

20:40 - 16 ապրիլի, 2022

Ընդդիմադիր պատգամավորը շեշտում է՝ գրագետ քայլերով պետք է ամեն ինչ անեն իշխանափոխության հասնելու համար |armenpress.am|

armenpress.am: Ընդդիմությունը մտադիր է հասնել իշխանափոխության, սակայն դա պետք է անել մաքսիմալ այնպես, որ Հայաստանը և Արցախը չվնասվեն: Այս մասին ասաց ՀՀ ԱԺ «Հայաստան» խմբակցության պատգամավոր Անդրանիկ Թևանյանը խորհրդարանական ճեպազրույցում՝ անդրադառնալով քննադատությանը, թե ընդդիմությունը սիմվոլիկ քայլեր է անում, Արցախի դրոշն է տեղադրում, սակայն գործնական քայլեր չեն արվում: «Այո, մենք ունենք նաև արդյունավետ գործելու խնդիր: Դրոշը տեղադրելն ուներ զուտ խորհրդանշական նշանակություն: Փորձը ցույց տվեց, որ ճիշտ ենք արել, որովհետև դրանով մեսիջն ենք տվել ամբողջ ժողովրդին և ողջ աշխարհին: Ինչ վերաբերվում է քայլերին, մենք պետք է կազմակերպվենք ճիշտ, այնպես անենք, որ արդյունք ունենանք, և զուտ միայն հանրահավաքով չլինի, իհարկե փողոցային պայքարը պետք է ակտիվացվի»,-ասաց Անդրանիկ Թևանյանը: Նրա խոսքով՝ իրենք այնպես են անելու, որ, օղակը կամաց-կամաց սեղմելով, Հայաստանին վնաս չտալով, հասնեն փոփոխությունների: Պատգամավորը մեղադրանքներ հնչեցրեց իշխանությանը: «Պետք է ամեն ինչ անենք, որ իշխանափոխություն լինի՝ հաշվարկներ անելով: Իշխանափոխությունը պետք է անել մաքսիմալ այնպես, որ Հայաստանն ու Արցախը չվնասվեն, ինչը նշանակում է գրագետ քայլեր»,-ասաց պատգամավորը: Թևանյանի խոսքով՝ պատգամավորները և քաղաքական ուժերը, որոնք գլխավորում են ընդդիմադիր պրոցեսը, իրենց մանդատը, կարգավիճակը ոչ թե որպես իրավունք և հնարավորություն են դիտարկում, այլ որպես պատասխանատվություն: «Մենք կարող ենք բոլոր էմոցիաներին տուրք տալ և ասել, որ մեկ օրվա մեջ հնարավոր է ինչ-որ բան անել, բայց մենք պատասխանատու ենք փոփոխության համար»,-նշեց նա:

12:40 - 15 ապրիլի, 2022

Ոչ թե «չգիտես՝ ինչու», այլ խաղաղապահների չթույլատրելու պատճառով․ Տարոն Չախոյանը մանիպուլացնում է

17:46 - 14 ապրիլի, 2022

Սաղաթելյանը հայտնեց, թե Արցախում և ՀՀ սահմանամերձ շրջաններում ընդդիմությունն ինչ է պլանավորում անել |armenpress.am|

armenpress.am: ՀՀ ազգային ժողովի ընդդիմադիր խմբակցությունները Արցախում և Հայաստանում հանդիպելու են ժողովրդի հետ, Արցախում՝ նաև քաղաքական ուժերի, պատասխանատուների հետ: Այս մասին ասաց ԱԺ փոխնախագահ, «Հայաստան» խմբակցության պատգամավոր Իշխան Սաղաթելյանը խորհրդարանում լրագրողների հետ զրույցում՝ անդրադառնալով ընդդիմության կողմից ԱԺ նիստը բոյկոտելուն և Արցախ և ՀՀ սահմանամերձ մարզեր մեկնելուն: «Մենք գտնում ենք, որ Հայաստանի թիվ մեկ օրակարգը Արցախն է և Հայաստանի անվտանգությունը: Եվ այս պահին ԱԺ-ում քննարկել մեր երկրի կենսական շահերի հետ անմիջական առնչություն չունեցող հարցեր, նպատակահարմար չենք գտնում: Այդ պատճառով խորհրդարանական երկու ընդդիմադիր խմբակցությունները որոշել են այս քառօրյային չմասնակցել, և առաջիկա օրերին լինելու ենք Արցախում, Սյունիքում, այնուհետև Տավուշում և Գեղարքունիքում, այսինքն՝ Արցախում և Հայաստանի այն հատվածներում, որտեղ կան անվտանգային հարցեր: Ժողովրդի հետ հանդիպում, աշխատանք, անվտանգային հարցերի բարձրացում, Արցախում նաև, հավանաբար, տեղի կունենան խորհրդարանական լսումներ Արցախի թեմայով, կհանդիպենք Արցախի քաղաքական ուժերի, պատասխանատուների հետ միասին իրավիճակը քննարկելու համար»,-ասաց Սաղաթելյանը: Ըստ նրա՝ իշխանությունը հեռացել է այդ օրակարգից, իսկ իրենք գնում են այդ ճանապարհով: «Պետք է ամբողջ մեր հանրության ուշադրությունը սևեռենք Արցախի հիմնախնդրի վրա, սա Հայաստանի անվտանգությունն է և մեր գլխավոր հարցն այսօր»,-նշեց պատգամավորը: Անդրադառնալով իշխանական պատգամավորների արձագանքին ընդդիմադիրների կողմից խորհրդարանի դահլիճում Արցախի դրոշը դնելու վերաբերյալ՝ Սաղաթելյանն ասաց, որ դա ձևական ակցիա չէ, շատ հստակ քաղաքական և ժողովրդական ուղերձ է և այլ երկրներին, և օրվա իշխանություններին:

12:38 - 12 ապրիլի, 2022

Նվազագույն աշխատավարձը 80 հազար դրամ դարձնելու «Հայաստան» խմբակցության նախագիծը չմտավ նստաշրջանի օրակարգ |news.am|

news.am: Ազգային ժողովն այսօր՝ ապրիլի 12-ին, քվեարկությամբ մերժեց նստաշրջանի օրակարգ մտցնել «Նվազագույն աշխատավարձի մասին» օրենքում փոփոխություններ կատարելու մասին օրենքի նախագիծը, որը նախաձեռնել էր ընդդիմադիր «Հայաստան» խմբակցությունը: Օրինագծի հեղինակ «Հայաստան» խմբակցության պատգամավոր Աղվան Վարդանյանը նախագծով առաջարկում էր նվազագույն աշխատավարձը 68 հազար դամից հասցնել 80 հազար դրամի՝ հաշվի առնելով հանրապետությունում արձանագրված գնաճը: Նա քվեարկությունից առաջ հրաժարվեց ելույթ ունենալ, իսկ ՔՊ խմբակցության ղեկավար Հայկ Կոնջորյանը հայտարարեց, որ իրենք դեմ են քվեարկելու: Հիշեցնենք, որ ԱԺ սոցիալական հարցերի մշտական հանձնաժողովը նախորդ շաբաթ բացասական եզրակացություն էր տվել այս նախագծին:

11:47 - 12 ապրիլի, 2022

30 տարի Արցախի դրոշի ամրությունն ապահովելու փոխարեն զբաղված են եղել թալանով. Վահագն Ալեքսանյանը ԱԺ ամբիոնից հանեց դրոշը

Ազգային ժողովում «Հայաստան» խմբակցության ղեկավար Սեյրան Օհանյանի ելույթից հետո, որը նաև ԱԺ ամբիոնին տեղադրել էր Արցախի Հանրապետության դրոշը, ելույթ ունեցավ ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանը։ Նա, մոտենալով ամբիոնին, հանեց Սեյրան Օհանյանի տեղադրած Արցախի դրոշը՝ նշելով. «Երբ անփառունակությունը դառնում է ճակատագիր, երբ տխմարաբանությունը դառնում է ամենօրյա հանապազօրյա աշխատանք, պաշտպանության նախկին նախարարները ստիպված են լինում Արցախի դրոշով գալ ու այս դրոշը դնել ԱԺ ամբիոնին: Դնել այն ժամանակ, երբ 30 տարի շարունակ այս դրոշը ճիշտ տեղերում դնելու փոխարեն ու այս դրոշի և Հայաստանի դրոշի ամրությունը ապահովելու փոխարեն զբաղված են եղել մի բանով՝ թալանով: Գան էստեղ, պոպուլիստական ելույթներ ունենան, թե իբր իրենք Արցախ պահող են, Հայաստան պահող են ու մտահոգներ են, բայց իրականում 30 տարում այդ նույն բաները գոչելով հարստացրել են սեփական գրպանները ու սեփական ընտանիքների գրպանները: Անել այնպես, որ մի հասարակ մաքսավոր, ով վերջերս անցնում է մի քրեական գործով, ունենա միլիոնավոր դոլարների ունեցվածք, 20 բնակարան Երևանի կենտրոնում, մի քանի մեքենա միլիոն դոլարն անցնող: Ես վստահ եմ, Արթուր Ղազինյանն այստեղից դուրս է եկել, հպարտ կեցվածքով նստել իր 300 հազար դոլարանոց մեքենան ու գնացել է Արցախը փրկելու, պաշտպանելու: Նույնը երևի Սեյրան Օհանյանն ու մնացածը, էլ չեմ խոսում Սերժ Սարգսյանի մասին: Ես վստահ եմ, որ եթե ՀՀԿ-ն այստեղ տեղադրեն, օրինակ, Բադեն-Բադեն քաղաքի խորհրդանիշը իմ կարծիքով, Սերժ Սարգսյանն ավելի հաճույքով կնայեր այս նիստը: Որովհետև Արցախից եկած նախկին պաշտոնյաները ՀՀ-ում զբաղված են պոպուլիզմով: Զբաղված են սին քարոզով, որը ոչինչ չի տալիս: Երբ մարդկանց հարցնում ես՝ ձեր առաջարկը ո՞րն է, ի՞նչ անի իշխանությունը, ինչ անի մեր պետությունը միակ պատասխանը դրան Հանրայինի եթերում Գեղամ մանուկյանի բաժակ ջարդելն էր»,-ասաց Վահագն Ալեքսանյանը: Նա կոչ արեց քաղաքացիներին չտրվել դատարկ պոպուլիզմին, «որով զբաղված է ընդդիմությունը»: Գլխավոր նկարը՝ ԱԺ-ի

11:32 - 12 ապրիլի, 2022

Ալեն Սիմոնյանի համոզմամբ խորհրդարանական ընդդիմությունը «զուգորդված աշխատանք է տանում ադրբեջանական զինված ուժերի հետ» |hetq.am|

hetq.am: Ազգային ժողովի նախագահ Ալեն Սիմոնյանը կոչ է անում ընդդիմությանը վայր դնել մանդատները: Այս մասին ընդդիմության բոյկոտից հետո հայտարարեց Ալեն Սիմոնյանը: «Ուզում եմ մի հարց հղել ընդդիմության ներկայացուցիչներին, այն մարդկանց, ովքեր ձայն են տվել Ռոբերտ Քոչարյանին, Սերժ Սարգսյանին, և գործուղել այս մարդկանց այստեղ, ուզում եմ հասկանալ` լավ, բա էս մարդիկ ե՞րբ են աշխատելու, ե՞րբ են իրենց ստացած աշխատավարձը արդարացնելու: Մատների վրա հաշված օրենսդրական նախաձեռնություններ, որոնք միտված են Ռոբերտ Քոչարյանի դատավարության վրա ազդեցություն ունենալ»,- ասաց նա: Հիշեցնենք, որ ընդդիմությունը տեղադրելով Արցախի Հանրապետության դրոշներն ԱԺ-ում, մեկնել է Արցախ` բոյկոտելով քառօրյայի աշխատանքները: Սիմոնյանի համոզմամբ` խորհրդարանական ընդդիմությունը զուգորդված աշխատանք է տանում ադրբեջանական զինված ուժերի հետ: «Հայտարարություն, սադրանք սահմանին, հայտարարություն, սադրանք սահմանին, հանդիպում բարձր մակարդակով` Փաշինյան-Պուտին, հայտարարություն, միտինգ, ամբողջն իրար հետ զուգորդված: Սրանք զուգադիպություններ չեն, և սրա պատասխանը պետք է տաք, ձեր չաշխատելու, ձեր այստեղ չգալու: Ձեզ թվում է` ինչի էին բոլորն էստեղ հավաքված, որ սեղմվի այն կոճակը, որն ապահովում է աշխատավարձի մուտքերը պատգամավորների հաշիվներին: Խմբակցությունը կարող էր հայտարարություն տարածել ու չգալ, բայց պետք էր գալ, գրանցվել, հետո դիմել աշխատակազմին, ասել` սա քաղաքական ակցիա է, խնդրում եմ մեր բացակաները համարել հարգելի»,- նշեց նա: Սիմոնյանը հարց ուղղեց, թե ինչու ընդդիմությունը վայր չի դնում մանդատները, ապա համոզմունք հայտնեց, որ այդպես էլ չեն դնի: Նա հռետորական հարց էր հնչեցնում, թե ինչու պետք է պետությունը գումար ծախսի վերջիններիս համար, սակայն նրանք այդպես էլ չաշխատեն: «Ինչի է ձեր սպասարկման համար գումար դուրս գրվում, որ ձեր կայքերի համար նյութեր ապահովեք, մեկ է՝ այդ կայքերը ոչ մեկ չի կարդում, ձեր հեռուստաընկերությունները բացի ձեր ընտրողների զանգվածից էլ մարդ չի նայում, գտեք ձեզ»,- եզրափակեց ԱԺ նախագահը:

11:17 - 12 ապրիլի, 2022

Այս քայլով ոչ թե պաշտպանում են Արցախը, այլ սադրում. Կոնջորյանը՝ ընդդիմադիրների մասին |armenpress.am|

armenpress.am: ՀՀ ազգային ժողովի «Քաղաքացիական պայմանագիր» խմբակցության ղեկավար Հայկ Կոնջորյանը ընդդիմադիր խմբակցությունների՝ ԱԺ հերթական նիստը բոյկոտելը և Արցախ մեկնելը համարում է ոչ թե Արցախը պաշտպանող, այլ սադրող քայլ: Կոնջորյանը նման տեսակետ հայտնեց ԱԺ նիստում: Կոնջորյանը հիշեցրեց խորհրդարանական ընտրություններից հետո «Հայաստան» խմբակցության ղեկավար Սեյրան Օհանյանի հայտարարությունն առ այն, որ խորհրդարան անցնելն իրենց համար խրամատ է, որում պետք է պայքարեն: Ըստ Կոնջորյանի՝ ընդդիմությունն ԱԺ-ում փորձում էր ամեն կերպ արժեզրկել խորհրդարանը, պարալիզացնել ԱԺ-ն: «Եվ, գուցե, համարում են, որ իրենց առջև դրված խնդիրը այստեղի խրամատում լուծել են և հիմա մեկնում են Արցախ՝ հավանաբար նորից խրամատավորվելու, ամենայն հավանականությամբ նորից խրամատավորվելու՝ ընդդեմ ՀՀ իշխանությունների, ՀՀ ժողովրդի»,-տեսակետ հայտնեց Կոնջորյանը: Արցախի դրոշը ընդդիմադիր պատգամավորների կողմից խորհրդարանում տեղադրելուն անդրադառնալով՝ նա նշեց, որ չի հասկանում, երբ դրոշը դեմոնստրատիվ տեղադրվում է ՀՀ-ում՝ ընդդեմ որևէ մեկի: «Արցախի դրոշը և Արցախը բոլորիս սրտերում և մտքերում են: Մեր ժողովուրդը հանուն Արցախի զոհել է իր լավագույն զավակներին: Եվ Արցախի դրոշը տեղադրելը, Արցախի շահերը պաշտպանելը ընդդիմությունը լավագույնս պետք է կատարի այնտեղ, որտեղ կարիք կա հանրայնացնելու Արցախի և Արցախի մեր հայրենակիցների իրավունքների և ազատությունների մասին հարցը: Իսկ ի՞նչ է անում այն նույն ընդդիմությունը, բոլոր միջխորհրդարանական հարթակներում, որտեղ իրենք պետք է գան և Արցախի, արցախցու իրավունքներն ու շահերը պաշտպանեն, ասել է թե՝ Արցախի դրոշն այնտեղ վեր հանեն՝ ի ցույց աշխարհի, նրանք չեն գալիս, բոյկոտում են»,-ասաց խմբակցության ղեկավարը: Նա ընդգծեց՝ ընդդիմությունը միջխորհրդարանական հարթակներում չի գնում և ընդդեմ ադրբեջանցիների չի գործում, ժողովրդի տված մանդատը չի իրագործում, բոյկոտում Է: «Այսօրվա խորհրդարանական ընդդիմությունն իր այս քայլով ոչ թե պաշտպանում է Արցախը, այլ սադրում է, ավելի է սրում Արցախի և հայության անվտանգային խնդիրները»,-ասաց Կոնջորյանը: Ըստ պատգամավորի՝ ընդդիմությունը օգտագործում է Արցախի հարցը և անվտանգային խնդիրները Հայաստանում հեղաշրջում իրականացնելու համար: «Նրանք այսօր խրամատավորվում են Արցախի ներքաղաքական կյանքում, նորից հերթական ներքաղաքական, ներհայաստանյան ինտրիգները գեներացնելու համար: Եվ դա մենք մեր ժողովրդի հետ թույլ չենք տալու»,-եզրափակեց Կոնջոյանը: Գլխավոր նկարը՝ ԱԺ-ի Խորհրդարանական ընդդիմությունը ապրիլի 12-ի նիստում հայտարարեց, որ չի մասնակցելու հեթական նիստերին և մեկնելու է Հայաստանի սահմանամերձ մարզեր և Արցախի Հանրապետություն։

11:08 - 12 ապրիլի, 2022

Տնտեսվարողները դժգոհում են ծխելը սահմանափակող օրենքից. Բաբկեն Թունյանը ներկայացրեց, թե ինչ տարբերակ է քննարկվում |armenpress.am|

armenpress.am: ՀՀ ազգային ժողովի տնտեսական հարցերի մշտական հանձնաժողովում ընդդիմության նախաձեռնությամբ աշխատանքային քննարկում է կազմակերպել հանրային սննդի օբյեկտներում ծխելու սահմանափակող օրենքի առնչությամբ, տնտեսավարողները, մասնագետները, ըստ էության, դեմ չեն հակածխախոտային քաղաքականությանը, սակայն օրենքում խնդիրներ են տեսնում: Աշխատանքային քննարկմանը «Ռեստորանների ասոցիացիա» ՀԿ նախագահ Աշոտ Բարսեղյանը նշեց, որ 2 տարի սպասել են օրենքի ուժի մեջ մտնելուն: Սակայն օրենքի ուժի մեջ մտնելուց հետո իրենց՝ տնտեսական առումով վատ կանխատեսումներն ի կատար են ածվել: «Օրենքի բոլոր անկատարությունները և թերությունները հիմա մեզ պարզ երևում են: Օրենքը պարունակում է կետեր և դրույթներ, որոնք պարզապես անիրագործելի են: Տնտեսավարողը դրվել է ի սկզբանե մեղավորի դիրքում: Այսինքն՝ օրենքն իրականացնելու ճանապարհին չկա գործիքակազմ, որ տնտեսավարողը կարողանա այդ օրենքը կատարի»,-ասաց նա: «Իրազեկ և պաշտպանված սպառող» ՀԿ նախագահ Բաբկեն Պիպոյանն էլ նկատեց. «Երբ բոլոր դռները փակում ես, մարդիկ ոչ թե մտածում են, թե ինչպես համարվել այդ վիճակին, այլ, թե ինչ անեն օրենքը շրջանցելու ճանապարհներ գտնելու համար»: Պիպոյանի խոսքով՝ այն օբյեկտներում, որտեղ օրենքը խախտվում է, մեծ ակտիվություն կա, իսկ այնտեղ, որտեղ օրենքը պահվում է, պասիվություն կա: «Այո, այն մարդը, որը երեխայի հետ գնացել է սրճարան, ստիպված է կողքի սեղանների մարդկանց խնդրել, որ երեխայի մոտ չծխեն, այսօր կուրախանա, որ կա տեղ, որտեղ չեն ծխում: Եվ ոչ ոք չի ասում, որ մենք որպես պետություն հակածխախոտային օրենսդրության կարիք չունենք. այո, ունենք, և այս կարգավորումներն էլ իրենց շահառուներն ունեն: Խնդիրը նրանում է, որ պետք է կարողանանք այս ամենն անել ավելի մտածված ու ավելի ճիշտ»,-ասաց Պիպոյանը: «Հայաստան» խմբակցության պատգամավոր Արամ Վարդևանյանը հավելեց՝ չի կարծում, թե որևէ մի հասարակություն դեմ կարող է լինել հակածխախոտային քաղաքականությանը, սակայն ուժի մեջ մտած ռեֆորմի մեջ ինքը խնդիրներ է տեսնում: «Նաև միջազգային փորձն է գալիս հուշելու, որ մասնագիտացված ակումբներ բոլոր քաղաքներում էլ կան՝ թե նարգիլեի, թե սիգարի մասով, որը տեղավորվում է հակածխախոտային քաղաքականության տրամաբանության մեջ՝ պասիվ ծխելը բացառելու իմաստով: Բայց մյուս կողմից դա ազատ արտահայտվելու իրավունք է՝ նույնիսկ ինչ-որ իմաստով ի հաշիվ առողջության»,-ասաց Վարդևանյանը: Ըստ պատգամավորի՝ ներկայում, այդ թվում՝ սոցիալ-տնտեսական մարտահրավերների պայմաններում, պետք է մտածել, թե ինչ անել հանրային սննդի օբյեկտների ոլորտն ավելի խթանելու, աջակցելու համար: ՀՀ էկոնոմիկայի փոխնախարար Անի Իսպիրյանը կարևորեց ներդրողների համար կանխատեսելիության ապահովումը: «Քանի որ օրենքն ընդունված է, դրույթները մտել են ուժի մեջ, առնվազն այս փուլում օրենքը պետք է թողնել անփոփոխ: Շատ տնտեսավարողներ արդեն համապատասխանեցրել են իրենց գործունեությունը օրենքի շրջանակներին»,-ասաց նա: Անդրադառնալով բացասական կարծիքներին՝ փոխնախարարն ասաց, որ իրենք էլ ունեն շատ դրական կարծիքներ ռեստորանների, ակումբների հաճախորդների, նաև տնտեսավարողների կողմից: ՔՊ խմբակցության պատգամավոր Բաբկեն Թունյանը նկատեց՝ փակ տարածքներում չծխելու մասով կա կոնսենսուս: «Այսինքն՝ որևէ մեկը չի պնդում, որ փակ տարածքներում մարդիկ սկսեն ծխել»,-ասաց նա՝ հավելելով որ, սակայն, կարելի է քննարկել, թե որը համարել հանրային սննդի օբյեկտ, որը՝ ոչ: Պատգամավորը հայտնեց, որ հիմա քննարկում են լիցենզավորվող գործունեություն սահմանելու տարբերակը, որի առաջարկը եղել է նարգիլե ակումբների ներկայացուցիչների հետ քննարկման արդյունքում: Նա վստահեցրեց, որ այդ մասին քննարկումներ կան: «Կա նաև մեկ այլ բլոկ՝ առողջապահական թևը, որը ավելի կարևոր է: Եվ երբեմն, երբ մենք շատ ենք սկսում միայն տնտեսական հարցերի վրա ուշադրություն դարձնել, ստացվում է, որ առողջապահությունն ենք մոռացել և հակառակը»,-ասաց Թունյանը՝ վստահեցնելով, որ լուծման տարբերակի դեպքում կլսեն տնտեսավարողների կարծիքը:

13:12 - 08 ապրիլի, 2022

Ընդդիմությունն առաջարկում է նվազագույն աշխատավարձը դարձնել 80 հազար. ԱԺ հանձնաժողովը հավանություն չտվեց |armenpress.am|

13:26 - 05 ապրիլի, 2022

Զինված ուժերում բարեփոխումները սկսված են. Պաշտպանության փոխնախարար |armenpress.am|

armenpress.am: ՀՀ պաշտպանության փոխնախարար Արման Սարգսյանը վստահեցնում է, որ Զինված ուժերում բարեփոխումները սկսված են և ընթացքի մեջ են: Սարգսյանն այս մասին ասաց ԱԺ պաշտպանության և անվտանգության հարցերի մշտական հանձնաժողովի նիստում՝ անդրադառնալով «Հայաստան» խմբակցության պատգամավոր Գեղամ Մանուկյանի հարցին: Մանուկյանն ասաց, որ հանձնաժողովում պարբերաբար եղել է խոստում՝ ներկայացնելու ԶՈՒ բարեփոխումների հայեցակարգ: «Մինչև հիմա Պաշտպանության հանձնաժողովի նիստերի ընթացքում չի ներկայացվել որևէ օրենսդրական փաթեթ, որը կլրացներ այդ բարեփոխումների հայեցակարգը»,-ասաց պատգամավորը: Գեղամ Մանուկյանը դժգոհեց՝ Կառավարությունն իր հաշվետվությունում նշել է, որ պատրաստվել է Զինված ուժերի բարեփոխումների փաթեթ, սակայն մինչև հիմա ԱԺ, Պաշտպանության հանձնաժողով չի ներկայացվել այդ բարեփոխումների փաթեթը: Նա հետաքրքրվեց, թե ե՞րբ է ՊՆ-ն պատրաստվում, ի վերջո, առարկայական ներկայացնել այդ փաթեթը: Փոխնախարարն էլ հիշեցրեց, որ ԱԺ-ում ունեցել են օրենքներում կատարվելիք փոփոխությունների վերաբերյալ քննարկում: «Ընդ որում, ՊՆ ներկայացվել են առաջարկներ նաև «Հայաստան» խմբակցության կողմից, ԱԺ մյուս խմբակցությունները նույնպես ներկայացրել են: Բարեփոխումները սկսված են»,-վստահեցրեց Սարգսյանը: Նա նշեց, որ, եթե որոշ քաղաքական ուժերի համար դրանք տեսանելի չեն, ապա դա քաղաքական գնահատականի հարց է: «Բայց այդ բարեփոխումները մեկնարկել են: Թե՛ օրենսդրական, թե՛ այլ առումով դրանք այս պահին գտնվում են ընթացքի մեջ»,-եզրափակեց Սարգսյանը:

13:32 - 04 ապրիլի, 2022