Գերմանիա

Գերմանիան (պաշտոնապես՝ Գերմանիայի Դաշնային Հանրապետություն) պետություն է Արեւմտյան Եվրոպայում։ Հյուսիսում սահմանակցում է Դանիային, արեւելքում՝ Չեխիային եւ Լեհաստանին, հարավում՝ Ավստրիային եւ Շվեյցարիային, հարավում՝ Ֆրանսիային, իսկ Լյուքսեմբուրգին, Բելգիային եւ Նիդերլանդներին՝ արեւմուտքում։ Մայրաքաղաքն է Բեռլինը։

ԳԴՀ-ն բաժանված է 16 վարչատարածքային միավորների՝ երկրամասերի, եւ ընդգրկում է շուրջ 357 386 քկմ տարածք։ Ունենալով շուրջ 83 միլիոն բնակչություն՝ համարվում է ՌԴ-ից հետո Եվրոպայի խոշորագույն պետությունը, ինչպես նաեւ ԵՄ ամենախիտ բնակեցված պետությունը։ Ամենաբնակեցված, արդյունաբերական խոշոր երկրամասը Ռուրն է, որի գլխավոր քաղաքներն են Դորտմունդն ու Էսսենը։ Գերմանիայի մյուս նշանավոր քաղաքներն են Մայնի Ֆրանկֆուրտը, Համբուրգը, Մյունխենը, Քյոլնը, Շտուտգարտը, Դյուսելդորֆը, Լայպցիգը, Դրեզդենը, Բրեմենը, Հաննովերը, Գելզենկիրխենը եւ Նյուրնբերգը։

Մերօրյա Գերմանիան դաշնային խորհրդարանական հանրապետություն (բունդեսհանրապետություն) է, որը կառավարվում է վարչապետի՝ կանցլերի կողմից։ Այժմ կանցլերն է Անգելա Մերկելը։

ԳԴՀ-ն 1957-ից ի վեր հանդիսանում է Եվրոպական տնտեսական համագործակցության, իսկ 1993-ից՝ Եվրոպական միության համահիմնադիր անդամ, 1999-ից՝ Շենգենյան գոտի։ Անդամակցում է նաեւ ՄԱԿ-ին, Հյուսիսատլանտյան դաշինքին (ՆԱՏՕ), «Մեծ յոթնյակին», Տնտեսական համագործակցության եւ զարգացման կազմակերպությանը եւ այլն։

Մերկելը չի բացառում Նավալնիի դեպքի անդրադարձը «Հյուսիսային հոսք-2»-ի ճակատագրի վրա |azatutyun.am|

azatutyun.am: Գերմանիայի կանցլեր Անգելա Մերկելը չի բացառում, որ ռուսաստանցի ընդդիմադիր առաջնորդ Ալեքսեյ Նավալնիի ենթադրյալ թունավորումն անդրադառնա Ռուսաստանից Գերմանիա ձգվող «Հյուսիսային հոսք-2» գազատարի ճակատագրի վրա: Այս մասին հայտարարել է Գերմանիայի կառավարության պաշտոնական ներկայացուցիչ Շտեֆֆան Զեյբերտը: Գերմանացի պաշտոնյայի խոսքով` առայժմ վաղ է խոսել Նավալնիի գործով պայմանավորված ռուս-գերմանական հարաբերությունների հնարավոր հետևանքների մասին, Բեռլինում դեռևս սպասում են ընդդիմադիր գործչի հետ տեղի ունեցածի կապակցությամբ Մոսկվայի պատասխանին: Անցած շաբաթ կանցլեր Մերկելը հայտարարել է, որ Բեռլինը անհերքելի ապացույցներ ունի, որոնց համաձայն` Նավալնին թունավորվել է «Նովիչոկ» դասին պատկանող քիմիական նյութով»։ Գերմանիայի առաջնորդը Մոսկվային կոչ է արել հետաքննել տեղի ունեցածը: Ռուսաստանի իշխանությունները, սակայն, շարունակաբար պնդում են, թե ընդդիմադիր գործչի թունավորման հստակ ապացույցներ չկան, և նույնիսկ եթե Նավալնիին թունավորել են, ապա Ռուսաստանը դրան որևէ առնչություն չունի։ «Հյուսիսային հոսք-2» գազատարը Ռուսաստանն ու Գերմանիան իրար պետք է կապի Բալթիկ ծովով, ներկայում շինարարությունը դադարեցված է ամերիկյան պատժամիջոցների պատճառով, սակայն Մոսկվան և Բեռլինը պարբերաբար հայտարարում են այդ նախագծի իրականացումը ավարտին հասցնելու վճռականության մասին։ Անցած օրերին մի շարք գերմանացի քաղաքական և հանրային գործիչներ իշխանություններին հորդորել են հրաժարվել այդ նախագծից, եթե ռուսաստանյան իրավապահները չհետաքննեն Նավալնիի թունավորումը:

16:09 - 07 սեպտեմբերի, 2020

Գերմանիայի արտգործնախարարը հայտարարել է Նավալնիի հարցով Ռուսաստանի գլխավոր դատախազության հարցման համաձայնեցման մասին |tert.am|

tert.am: Գերմանիայի Դաշնային Հանրապետության արտգործնախարար Հայկո Մաասը տեղեկացրել է, որ իր գլխավորած գերատեսչությունը համաձայնեցրել է ռուս ընդդիմադիր գործիչ Ալեքսեյ Նավալնիի գործով իրավական օգնության մասին Ռուսաստանի ուղարկած հարցումը: Այս մասին տեղեկացնում է «ՌԻԱ Նովոստի» գործակալությունը:«Դա նշանակում է, որ տեղեկատվությունը, որը խնդրում են տրամադրել, մեր կողմից կարող է տրամադրվել: Բայց դա (բազմաստիճան) ընթացակարգ է, որովհետև անընդհատ նոր տվյալներ են գալիս, Նավալնիին շարունակում են բուժել, ստուգվում է, թե որքան թույն է մնացել նրա օրգանիզմում»,-բացատրել է Գերմանիայի արտգործնախարարը:Նախարարը հստակեցրել է, որ իրավաբանական օգնության հարցումը քննարկվում է տարբեր գերատեսչությունների կողմից, այդ թվում `որոշումը պետք է համաձայնեցվի նմուշները հետազոտած Charite կլինիկայի բժիշկների հետ:«Հետազոտության արդյունքներում մենք խոսում ենք անձնական տվյալների մասին, թույլտվություն (փոխանցման համար) պետք է տա այն անձը, ում դրանք պատկանում են», - հավելել է Մաասը:Նախարարը չի հստակեցրել, թե ով է տվյալ դեպքում անձնական տվյալների տերը: Սովորաբար, երբ խոսքը վերաբերում է առողջապահությանը, նկատի է առնվում «անհատականացված տվյալների հատուկ տեսակները»: Դրանք օրենքով պաշտպանված են երրորդ կողմերին փոխանցվելուց, սակայն ոստիկանությունը և դատախազությունը որոշակի դեպքերում կարող են պահանջել այդպիսի տեղեկատվություն:

11:43 - 07 սեպտեմբերի, 2020

Ռուսաստանի գլխավոր մանկաբույժը գերմանացի բժիշկների եզրակացությունները «պրոֆեսիոնալիզմից հեռու» է որակել |azatutyun.am|

azatutyun.am: Ռուսաստանի գլխավոր մանկաբույժ Լեոնիդ Ռոշալը գերմանացի բժիշկներին առաջարկել է համատեղ խումբ ստեղծել Ալեքսեյ Նավալնիի թունավորումը հետաքննելու համար: Նա կասկած է հայտնել Նավալնիի օրգանիզմում թույնի առկայության հետ կապված և հայտարարել, որ գերմանացի բժիշկների եզրակացությունները «հեռու են պրոֆեսիոնալիզմից»: Նավալնիի կինը ՝ Յուլիան դրան ի պատասխան, Instagram-ում գրել է, որ իր ամուսինը Ռուսաստանի բժիշկների և իշխանությունների սեփականությունը չէ, ուստի Ռոշալը չի կարողանա նրա հաշվին ծառայություններ մատուցել Ռուսաստանի իշխանություններին: Իր հերթին Բեռլինը Ռուսաստանից պահանջում է հնարավորինս շուտ բացատրել, թե ինչ է պատահել Նավալնու հետ, հակառակ դեպքում սպառնում է պատժամիջոցներով: Ի պատասխան՝ Ռուսաստանի արտգործնախարարության ներկայացուցիչ Մարիա Զախարովան սլաքները ուղղում է Բեռլին և պատասխանում, որ նրանք չեն համագործակցում և «զսպում են հետաքննության գործընթացը»: Գերմանիայի արտաքին գործերի նախարարությունը չի կասկածում, որ Նավալնին թունավորվել է «Նովիչոկ» խմբին պատկանող նյութով, և հույս ունի, որ Կրեմլի «մշուշոտ հայտարարությունները» չեն ստիպի փոխել դիրքորոշումը «Հյուսիսային հոսք-2» -ի հետ կապված: Այդ ծրագրով ռուսական գազը պետք է Բալթյան ծովով հասնի Գերմանիա, ապա փոխադրվի եվրոպական տարբեր երկրներ։

09:57 - 07 սեպտեմբերի, 2020

Ռուսաստանը պատասխանել է Նավալնիի հետ կապված իրավիճակի վերաբերյալ Գերմանիայի ԱԳՆ-ի հայտարարությանը |pastinfo.am|

pastinfo.am: Ռուսաստանի ԱԳՆ պաշտոնական ներկայացուցիչ Մարիա Զախարովան պատասխանել է իր գերմանացի գործընկեր Հայկո Մաասին՝ Ալեքսեյ Նավալնիի հետ կապված հայտարարությանը։ Նրա խոսքով՝ վստահություն չկա, որ Բեռլինում երկակի խաղ չեն վարում։ Մեկնաբանությունը հրապարակվել է կիրակի՝ սեպտեմբերի 6-ին, Զախարովայի ֆեյսբուքյան էջում։ Նախարարության ներկայացուցիչն ընդգծել է, որ Գերմանիան մինչեւ հիմա չի փոխանցել Ռուսաստանի Գլխավոր դատախազության հարցման պատասխանը, որն ուղարկվել էր դեռեւս օգոստոսի 27-ին: «Որտեղ է այդ «հրատապությունը», որը պնդում եք։ Այն շատ է պակասում հենց գերմանական կողմի մոտ՝ դատելով Բեռլինի Արդարադատության վարչության պրոֆիլային բաժնի հայտարարություններից, որը միայն «ուսումնասիրում է հարցումը, իսկ հավանության մասին որոշումը կընդունվի անհրաժեշտության դեպքում՝ իրավասու դաշնային մարմինների հետ համաձայնեցմամբ»», — գրել է Զախարովան ։ Զախառովան նաեւ չի բացառել, որ Գերմանիան միտումնավոր է արգելակում գործի հետաքննության գործընթացը։

14:45 - 06 սեպտեմբերի, 2020

ՆԱՏՕ-ն հատուկ ժողով է գումարում Նավալնիի թունավորման հարցով |azatutyun.am|

azatutyun.am: ՆԱՏՕ-ի անդամ երկրների պաշտպանության նախարարներն այսօր քննարկելու են Ալեքսեյ Նավալնիի թունավորման հարցը: Ընդդիմադիր գործչին թունավորել են մարտական նշանակության քիմիական նյութով, որի բաղադրիչներից մեկը «Նովիչոկն» է: Նավալնիի առողջական վիճակը կտրուկ վատթարացել է օգոստոսի 20-ին օդանավում, նրան տեղափոխել են Օմսկի հիվանդանոց, որտեղից էլ երկու օր անց հատուկ օդանավով փոխադրել են Բեռլինի «Շարիտե» հիվանդանոց: Գերմանացի մասնագետները հայտնել են, որ Նավալնիի արյան մեջ հայտնաբերել են «Նովիչոկին» նման նյութի հետքեր: Նավալնին գտնվում է արհեստական կոմայի մեջ: Բժիշկները դեռևս խուսափում են ասել, թե ինչ հետևանքներ կարող է ունենալ թունավորումը Նավալնիի առողջության համար: Արևմուտքը Ռուսաստանից պահանջում է անհապաղ անցկացնել հետաքննություն և պարզաբանումներ ներկայացնել ընդդիմադիր գործչին թունավորելու հանգամանքների վերաբերյալ: Մոսկվան հերքում է թունավորման հետ առնչություն ունենալու մեղադրանքը և պնդում է, թե ըստ ռուսաստանցի բժիշկների, Նավալնիի օրգանիզմում քիմիական զենքի տարրեր չեն հայտնաբերվել: Գերմանիան ակնկալում է, որ Եվրոպական միությունը և ՆԱՏՕ-ն համատեղ կարձագանքեն այդ դեպքին, որը կանցլեր Անգելա Մերկելը որակել է որպես «ընդդիմադիր գործչին միտումնավոր սպանելու փորձ»:

15:17 - 04 սեպտեմբերի, 2020

Էրդողանն ու Մերկելը տեսակոնֆերանսի ընթացքում քննարկել են Միջերկրական ծովի արևելքում ստեղծված իրավիճակը |tert.am|

tert.am: Թուրքիայի նախագահ Ռեջեփ Թայիփ Էրդողանը և Գերմանիայի կանցլեր Անգելա Մերկելը տեսակոնֆերանս են անցկացրել, որի ընթացքում քննարկել են տարածաշրջանային հարցերն ու երկկողմ հարաբերությունները, հատուկ ուշադրություն է դարձվել Միջերկրական ծովի արևելքում տեղի ունեցող իրադարձություններին: Այս մասին գրում է «Անադոլու» գործակալությունը: Տեսակոնֆերանսի ընթացքում Թուրքիայի նախագահը հայտարարել է, որ Միջերկրական ծովի արևելքում իրենց գործողությունները «ուղղված են Թուրքիայի և Կիպրոսի թուրքերի իրավունքների պաշտպանությանը, և դրանից շահում են բոլոր առափնյա երկրները, իսկ Հունաստանի և Կիպրոսի հունական վարչակազմի գործողությունները փակուղի են տանում այդ բոլոր ջանքերն ու ավելացնում են լարվածությունը»: Էրդողանը հայտարարել է նաև, որ իրենք ողջունում են Անգելա Մերկելի ջանքերը, որոնք ներդրվել են «Հունաստանի և իր աջակից երկրների քայլերով տարածաշրջանային խաղաղությանը հասցված վնասի պատճառով» ստեղծված խնդրի լուծման համար:

10:38 - 04 սեպտեմբերի, 2020

COVID-19-ի դեպքերի թիվը Եվրոպայում կրկին սկսում է աճել, կրկին սահմաններ են փակվում |azatutyun.am|

azatutyun.am: COVID-19- ով վարակվածների թիվը Եվրոպայում կրկին սկսում է աճել, իսկ սահմանները կրկին փակվում են: Կորոնավիրուսով վարակվածների թիվն աշխարհում անցել է 26 միլիոնից, զոհերի թիվը՝ 863 հազարից, ապաքինվել է մոտ 17,3 միլիոն մարդ: COVID-19-ով վարակվածների թիվը Եվրոպայում կրկին սկսում է աճել, իսկ սահմանները կրկին փակվում են՝ ճիշտ ինչպես այս տարվա մարտին, երբ Եվրամիության երկրները մեկը մյուսի ետևից փակեցին զբոսաշրջիկների մուտքը, այդ թվում՝ նաև ԵՄ երկրներից: Այս անգամ ԵՄ խորհուրդը նախագահող Գերմանիան ցանկանում է խուսափել նույն սցենարի կրկնությունից, պաշտպանել առանց վիզայի Շենգենյան գոտու ամբողջականությունը և կոչ է անում ԵՄ երկրներին չփակել սահմանները: Որոշ երկրներ, այդուհանդերձ, կրկին սկսել են սահմանների փակման գործընթացը: Հունգարիան երեքշաբթի օրվանից արգելել է օտարերկրյա քաղաքացիների մուտքը: Դանիան դեռ ապրիլից է սահմանափակել զբոսաշրջիկների մուտքը: Ֆինլանդիան վերսկսել է երկիր մուտք գործողների նկատմամբ վերահսկողությունը: Այս ցանկում են նաև Իսպանիան և Ֆրանսիան: Շատ երկրներ մտահոգված են Եվրամիության համակարգված մոտեցման բացակայությամբ՝ ԵՄ անդամ յուրաքանչյուր պետություն ինքն է որոշում կայացնում պարտադիր կարանտինի և թեստավորման հետ կապված:

11:13 - 03 սեպտեմբերի, 2020

Գերմանական կառավարությունը պնդում է, որ Նավալնու թունավորումն ապացուցված է |azatutyun.am|

azatutyun.am: Գերմանիայի կառավարության պաշտոնական ներկայացուցիչ Ստեֆան Զեյբերտի պնդմամբ` գերմանացի բժիշկներին հաջողվել է անհերքելի ապացույցներ ձեռք բերել, որոնց համաձայն ռուսաստանցի ընդդիմադիր Ալեքսեյ Նավալնին թունավորվել է։ «Նավալնու արյան լաբորատոր հետազոտություններից պարզ է դարձել, որ նա թունավորվել է «Նովիչոկ» դասին պատկանող քիմիական նյութով», - նշված է գերմանական կառավարության մամուլի քարտուղարի գրավոր հայտարարության մեջ։ «Նովիչոկը» այն նույն նյարդա-պարալիտիկ նյութն է, որով 2018 թվականի գարնանը թունավորվել էին Ռուսաստանի ռազմական հետախուզության նախկին սպա Սերգեյ Սկրիպալը և նրա դուստր Յուլիան։

19:13 - 02 սեպտեմբերի, 2020

Գերմանացիները բողոքում են կորոնավիրուսով պայմանավորված սահմանափակումների դեմ |hetq.am|

hetq.am: Բեռլինում հազարավոր մարդիկ դուրս են եկել հակահամաճարակային սահմանափակումների դեմ ցույցերի։ Այս մասին գրում է «BBC»-ն։ Հնարավոր վտանգներից ելնելով՝ իշխանությունները չէին ցանկանում թույլատրել երթը, քանի որ մասնակիցները կարող են չպահպանել սոցիալական հեռավորությունը, սակայն օգոստոսի 29-ին դատարանը թույլատրել է անցկացնել հավաքն այն պայմանով, որ մասնակիցները պարտադիր կրեն դիմակներ և պահպանեն ֆիզիկական հեռավորություն։ Սկզբում բողոքի ցույցը խաղաղ ընթացք է ունեցել, սակայն վերջում ոստիկանությունը բերման է ենթարկել մի քանի տասնյակ ցուցարարների։ Իրավապահների տվյալներով՝ փողոց է դուրս եկել մոտ 18 000 մարդ, այդ թվում երեխաներ։ Բողոքի ցույցի մասնակիցներից մեկը «Ֆրանս պրես» գործակալության թղթակցին հայտարարել է, որ ինքը դուրս է եկել փողոց պաշտպանելու իր ազատությունը։ Ոստիկանությունը երթի մասնակիցներից պահանջել է պահպանել սոցիալական հեռավորությունը։ Ավելի ուշ, Բեռլինի ոստիկանական վարչությունը «Twitter»-ի իր միկրոբլոգում գրել է, որ ցուցարարները չեն պահպանում անհրաժեշտ կանոնները, ուստի ոստիկանությունը ստիպված կցրի այն։ Ոստիկանությունը նաև հավելել է, որ ցուցարարների մեծ մասն իրենց կոչից հետո խաղաղ հեռացել է, սակայն նրանք, որոնք չեն ենթարկվել ոստիկանության պահանջներին, բերման են ենթարկվել։ Օգոստոսի սկզբից ի վեր սա արդեն երկրորդ փողոցային ակցիան է, որը կազմակերպվել է «Querdenken» շարժման կողմից։ Ակցիային մասնակցել են նաև աջ ծայրահեղական խմբեր։ Ակցիայի ժամանակ ելույթ է ունեցել նաև ԱՄՆ նախկին նախագահ Ջոն Քենեդու եղբոր՝ Ռոբերտ Քենեդու որդին՝ Ռոբերտ Քենեդի կրտսերը, որը պատվաստման հայտնի ընդդիմախոսներից մեկն է։ Ավելի ուշ նրա ելույթը դատապարտել են իր իսկ ընտանիքի անդամները։ Համանման բողոքի ցույցեր են եղել նաև Լոնդոնում և Փարիզում, որոնք, ի տարբերություն Բեռլինի, մարդաշատ չեն եղել։ Մեծ Բրիտանիայի մայրաքաղաքում հարյուրավոր մարդիկ հավաքվել են Տրաֆալգարյան հրապարակում, որպեսզի իրենց դժգոհությունը հայտնեն հակակորոնավիրուսային միջոցառումների դեմ, որոնք ընդունվել են կառավարության կողմից։ Ցուցարարները պարզել են պաստառներ, որոնց վրա գրված է եղել «COVID-ը խաբեություն է» և «Ոչ պարտադիր պատվաստմանը»։ Ինչպես Բեռլինի պարագայում, Տրաֆալգարյան հրապարակում ևս չեն պահպանվել սոցիալական հեռավորության պահանջները։ Փարիզում էլ մոտ 300 մարդ դուրս է եկել փողոց՝ պահանջելու չեղարկել հանրային վայրերում դիմակների պարտադիր կրման պահանջը։ Վերջին մեկ օրվա ընթացքում Ֆրանսիայում հայտնաբերվել է կորոնավիրուսի 5 453 նոր դեպք։ Նախագահ Էմանուել Մակրոնը հայտարարել է, որ եթե այսպես շարունակվի, նա չի բացառում խիստ կարանտինի վերականգնումը։ Շարունակությունը՝ hetq․am-ում։

19:24 - 30 օգոստոսի, 2020

Նավալնու թունավորման հետաքննությունը բխում է Ռուսաստանի շահերից․ Մաաս |azatutyun.am|

azatutyun.am: «Ընդդիմադիր գործիչ Ալեքսեյ Նավալնու հետ տեղի ունեցածի հստակեցումը բխում է Ռուսաստանի շահերից»։ Այս մասին այսօր Բեռլինում ԵՄ արտգործնախարարների ոչ պաշտոնական հավաքի մեկնարկին հայտարարել է Գերմանիայի արտաքին քաղաքական գերատեսչության ղեկավար Հեյկո Մաասը։ «Մենք ակնկալում ենք, որ Ռուսաստանը կնպաստի խնդրի հստակեցմանը և հետաքննություն կնախաձեռնի։ Մենք ակնկալում ենք, որ Ռուսաստանն ի վերջո այս հարցով հետաքննություն կնախաձեռնի։ Եթե դա տեղի չունենա, Մոսկվան պարզապես չի կարողանա որևէ կերպ հակադարձել հնչող մեղադրանքներին։ Հակառակ պարագայում ենթադրություններն ու շահարկումները չեն դադարի։ Դա իր հերթին չի նպաստի մի կողմից` Ռուսաստանի, մյուս կողմից` Գերմանիայի և ողջ ԵՄ միջև հարաբերությունների բարելավմանը», - հայտարարում էր Մաասը։

16:21 - 27 օգոստոսի, 2020

Գերմանիան անհանգստացած է Արևելյան Միջերկրականում Թուրքիայի գործողություններից |ermenihaber.am|

ermenihaber.am: Թուրքիան երկարաձգել է «Oruç Reis» անվանումով նավով Արևելյան Միջերկրականի ջրերում սեյսմիկ հետազոտություններ իրականացնելու համար հայտարարած NAVTEX (միջազգային զգուշացում որևէ ջրային տարածքում գործողություններ իրականացնելու մասին) ժամկետները։ Այսպիսով օգոստոսի 23-ին ավարտվելիք գործողությունները կշարունակվեն մինչև օգոստոսի 27-ը։ Անկարայի հայտարարությունից հետո միջերկրական ծովում NAVTEX է հայտարարել նաև Հունաստանը։ Այս առիթով Գերմանիան անհանգստություն է հայտնել Անկարայի գործողությունների կապակցությամբ, որոնք վերջին շրջանում Արևելյան Միջերկրականում հույն-թուրքական լարվածության պատճառ են դառնում։ Գերմանիայի արտգործնախարարության խոսնակ Քրիստոֆեր Բուրգերը տարածած հայտարարության մեջ տեղեկացրել է նաև, որ նախարար Հեյկո Մաասը օգոստոսի 25-ին զրույց է ունենալու Արևելյան Միջերկրական թեմայով։ Գերմանիայի կառավարության խոսնակ Շտեֆան Սեյբերտն էլ հայտարարել է, որ Արևելյան Միջերկրականում կայունության կարիք կա և կարևորել է Հունաստանի ու Թուրքիայի հետ Բեռլինի քննարկումների շարունակականությունը։

10:01 - 25 օգոստոսի, 2020

Մերկելն ու Մաասը կոչ են արել Ռուսաստանին հետաքննել Նավալնիի թունավորման հանգամանքները |tert.am|

tert.am: Գերմանիայի կանցլեր Անգելա Մերկելը և ԱԳ նախարար Հայկո Մաասը հանդես են եկել համատեղ հայտարարությամբ՝ կոչ անելով Ռուսաստանին թափանցիկ և համապարփակ հետաքննություն անցկացնել՝ պարզելու ընդդիմադիր գործիչ Ալեքսեյ Նավալնիի առողջության վատթարացման հանգամանքները: Ինչպես հաղորդում է ТАСС գործակալությունը, համապատասխան փաստաթուղթը երկուշաբթի հրապարակել է Գերմանիայի կառավարության մամլո ծառայությունը: «Charite հիվանդանոցի բժիշկների թիմի հայտարարության համաձայն՝ կլինիկական հետազոտությունների տվյալները ցույց են տալիս, որ Ալեքսեյ Նավալնիին թունավորել են»,- հիշեցրել են կանցլերն ու ԱԳ նախարարը: Մերկելն ու Մաասն ընդգծել են, որ հաշվի առնելով Նավալնիի նշանակալի դերը Ռուսաստանի քաղաքական ընդդիմության շրջանում՝ իշխանություններն այժմ պետք է պարզեն մինչև վերջին հանգամանքը և թափանցիկ կերպով հետաքննեն այդ հանցագործությունը: «Պետք է պարզել և պատժել բոլոր պատասխանատուներին»,- ասվում է հայտարարության մեջ: Հիշեցնենք, որ բեռլինյան հիվանդանոցի մասնագետներն ավելի վաղ հաստատել էին, որ Նավալնին թունավորվել է խոլինէսթերազների արգելակիչների խմբի նյութով:

09:55 - 25 օգոստոսի, 2020

Ուկրաինայի եւ Գերմանիայի ԱԳ նախարարները քննարկել են ընտրությունների անցկացումը Դոնբասում |armenpress.am|

armenpress.am: Գերմանիայի ԱԳ նախարար Հայկո Մաասը հայտարարել Է, որ Ուկրաինայի իր պաշտոնակից Դմիտրի Կուլեբոյի հետ քննարկել Է ընտրությունների անցկացումը Դոնբասում, հարկավոր Է առաջ շարժվել այդ հարցում: «Մեր կոչն Է՝ չթուլացնել ջանքերը եւ զբաղվել Դոնբասի բարդ քաղաքական հարցերով, մասնավորապես, Դոնբասում ընտրությունների անցկացմամբ: Այդ մասին մենք նույնպես խոսել ենք եւ կցանկանայինք առաջ շարժվել այդ հարցում»,-ասել Է Մաասը՝ հանդես գալով օգոստոսի 22-ին Կիեւում անցկացված ճեպազրույցում, որը հեռարձակվել Է Facebook-ում Ուկրաինայի ԱԳ նախարարության Էջում: Նրա խոսքով՝ առկա են տարբեր մոտեցումներ Դոնբասում տեղական ընտրությունների անցկացման հարցում, բայց հարկավոր Է գտնել դրանց անցկացման մեխանիզմը: «Առկա են (Դոնբասում ընտրությունների) տարբեր մոտեցումներ, տարբեր տեսլականներ: Կարծում եմ՝ տարբերությյուններ չկան մոտեցումների հարցում, ընտրությունները պետք Է կայանան, խոսքը դրանց անցկացման ժամկետների մասին Է: Թե ինչ ձեւով այդ ընթացակարգը կկիրառվի, պարզ չԷ… բայց հույս կա, որ մենք դրական լուծում կգտնենք»,-հայտարարել Է Գերմանիայի ԱԳ նախարարը: Ավելի վաղ Ուկրաինայի խորհրդարանը հոկտեմբերի 25-ին նշանակել Էր հերթական տեղական ընտրությունները, ընդ որում՝ դրանք Կիեւի կողմից չվերահսկվող Դոնեցկի եւ Լուգանսկի մարզերի տարածքում չեն կայանալու: Ընդունված որոշման համաձայն, այդ տարածքներում ընտությունները կարող են տեղի ունենալ, մասնավորապես, բոլոր զինված կազմավորումների դուրսբերումից եւ ուկրաինա-ռուսական սահմանների նկատմամբ հսկողությունը հանձնելուց հետո: Հուլիսին Դոնբասի գծով շփման խմբում ՌԴ լիազոր ներկայացուցիչ Բորիս Գրիզլովը հայտարարել Է, որ տեղական ընտրությունների անցկացման վերաբերյալ Գերագույն ռադայի որոշումը հակասում Է Մինսկի համաձայնագրերին: Ուկրաինայի իշխանությունները 2014 թվականի ապրիլին ռազմական գործողություն սկսեցին ինքնահռչակ ԼԺՀ-ի եւ ԴԺՀ-ի դեմ, որոնք անկախության մասին Էին հայտարարել 2014 թվականի փետրվարին Ուկրաինայում իրականացված պետական հեղաշրջումից հետո: ՄԱԿ-ի վերջին տվյալների համաձայն, հակամարտության զոհ Է դարձել շուրջ 13 հազար մարդ, հաղորդել Է ՌԻԱ Նովոստին:

16:22 - 24 օգոստոսի, 2020

Նավալնիին, ամենայն հավանականությամբ, թունավորել են․ Գերմանիայի կառավարություն |shantnews.am|

shantnews.am: Գերմանիայի իշխանությունները ենթադրում են, որ ռուս ընդդիմադիր քաղաքական գործիչ Ալեքսեյ Նավալնիին, ամենայն հավանականությամբ, թունավորել են։ Meduza պարբերականի փոխանցմամբ՝ այս մասին մամուլի ասուլիսի ժամանակ հայտարարել է Գերմանիայի կառավարության պաշտոնական ներկայացուցիչ Շտեֆան Զայբերտը։ Նա հայտնել է, որ Գերմանիայի իշխանությունները պաշտոնական մակարդակով Նավալնիին բուժման հրավեր չեն ուղարկել, սակայն օգնել են նրա տեղափոխման հարցում։ Քաղաքական գործիչը օգոստոսի 20-ից գտնվում է կոմայի մեջ։ Նրա ինքնազգացողությունը վատացել էր Տոմսկից Մոսկվա ուղևորվող ինքնաթիռում, որն արտակարգ վայրէջք էր կատարել Օմսկում։ 2 օր Օմսկի հիվանդանոցում մնալուց հետո Նավալնիին տեղափոխել են Բեռլին։ Նավալնիի աջակիցները համարում են, որ բժիշկները հետաձգում էին հիվանդի տեղափոխումը, որպեսզի թույնը լիովին հասցներ դուրս գալ նրա օրգանիզմից։ Օմսկի մասնագետները հայտարարել են, որ քաղաքական գործչի օրգանիզմում թունավոր նյութի հետքեր չեն հայտնաբերվել։

16:10 - 24 օգոստոսի, 2020

Տասնյակ ձերբակալվածներ Փարիզում՝ ՉԼ եզրափակչին հաջորդած անկարգությունների ընթացքում |azatutyun.am|

azatutyun.am: Փարիզի ոստիկանությունը երկուշաբթի օրը ձերբակալել է 148 անձի, որոնք մասնակցել են ՈՒԵՖԱ-ի Չեմպիոնների լիգայի եզրափակչին հաջորդած անկարգություններին։ Չեմպիոնների լիգայի եզրափակչում, որը տեղի է ունեցել Լիսաբոնում, Մյունխենի «Բավարիա»-ն 1: 0 հաշվով հաղթել է Փարիզի «Սեն-Ժերմեն»-ին՝ վեցերորդ անգամ նվաճելով Չեմպիոնների լիգայի գավաթը: Խաղի արդյունքից դժգոհ հարյուրավոր ֆրանսիացի երկրպագուներ ի նշան բողոքի հավաքվել են Փարիզի «Պարկ դը Պրենս» մարզադաշտի մոտ, որտեղ էլ տեղի են ունեցել բախումներ ոստիկանական ուժերի հետ։ Ի պատասխան՝ ուժայինները կիրառել են արցունքաբեր գազ: Երկրպագուների ևս մեկ խումբ էլ հավաքվել էր Ելիսեյան դաշտերի մոտ, այստեղ, ըստ հաղորդումների հրկիզվել են ավտոմեքենաներ, տեղի են ունեցել հարձակումներ խանութների վրա:

13:46 - 24 օգոստոսի, 2020

Գերմանիայի ոստիկանությունը շուրջօրյա վերահսկողության տակ է առել ԲԿ-ն, որտեղ Նավալնին է բուժվում |azatutyun.am|

azatutyun.am: Գերմանական ոստիկանությունը շուրջօրյա վերահսկողության տակ է առել Բեռլինի «Շարիտե» հիվանդանոցը, որտեղ բուժում է ստանում ռուսաստանցի ընդդիմադիր գործիչ Ալեքսեյ Նավալնին: МБХ медиа-ի (հիմնադրված ռուսաստանցի ընդդիմադիր գործիչ Միխայիլ Խոդորկովսկիի կողմից) տվյալներով` հիվանդանոցի մոտ հերթապահում են ոստիկանական մի քանի ավտոբուսներ, ինչպես նաև ոստիկանական խմբեր կան հիվանդանոցի մերձակայքում: Նավալնին Բեռլին է տեղափոխվել օգոստոսի 22-ի վաղ առավոտյան։ Կրեմլի կոշտ քննադատի առողջական վիճակը կտրուկ վատթարացել էր 3 օր առաջ Տոմսկից Մոսկվա թռչող օդանավում, որի անձնակազմը ստիպված էր եղել արտակարգ վայրէջք կատարել Օմսկում: Այստեղ 44-ամյա Նավալնիին անգիտակից վիճակում տեղափոխել էին հիվանդանոցի վերակենդանացման բաժանմունք:

13:25 - 23 օգոստոսի, 2020