ՀԱՊԿ - infocom.am

ՀԱՊԿ

Հավաքական անվտանգության մասին Պայմանագիրը ստորագրվել է 1992թ. մայիսի 15-ին Հայաստանի, Ղազախստանի, Ղրղզստանի, Ռուսաստանի, Տաջիկստանի եւ Ուզբեկստանի ղեկավարների կողմից:

Հավաքական անվտանգության մասին Պայմանագրում առանձնահատուկ կարեւորություն ունի վերջինիս 4-րդ հոդվածը, համաձայն որի «եթե անդամ պետություններից որեւէ մեկը ենթարկվի ագրեսիայի որեւէ պետության կամ պետությունների խմբի կողմից, ապա անդամ պետությունների կողմից դա կհամարվի որպես ագրեսիա սույն Պայմանագրի բոլոր մասնակից պետությունների դեմ:

Մասնակից պետություններից որեւէ մեկի դեմ ագրեսիայի ակտի ի հայտ գալու պարագայում, մնացած մասնակից պետությունները կցուցաբերեն անհրաժեշտ օժանդակություն` ներառյալ ռազմական օգնությունը, նաեւ կցուցաբերեն օժանդակություն իրենց տրամադրության տակ գտնվող միջոցներով` հավաքական պաշտպանության իրավունքի իրագործման կարգին համապատասխան` համաձայն ՄԱԿ-ի կանոնադրության 51-րդ հոդվածի»:

Պայմանագրով նաեւ նախատեսված է խորհրդատվությունների մեխանիզմ` մասնակից պետության կամ մի քանի մասնակից պետությունների անվտանգությունը, տարածքային ամբողջականությունը եւ ինքնիշխանությունը վտանգող սպառնալիքի դեպքում, կամ միջազգային խաղաղությանը եւ անվտանգությանը սպառնալիքի պարագայում:

Տաջիկստանի միջոցով եկող վտանգները սպառնալիք են Ռուսաստանի շահերի համար, իսկ ադրբեջանցիների խորանալը ՀՀ սահմանում չի վնասում ՌԴ-ին․ Բենիամին Պողոսյան

ՀԱՊԿ-ը Հայաստան-Ադրբեջան սահմանին ստեղծված իրավիճակում իր համար անելիք չի տեսնում։ Այս մասին Infocom-ի հետ զրույցում ասաց Քաղաքական գիտության Հայաստանի ասոցիացիայի գործադիր տնօրեն Բենիամին Պողոսյանը՝ անդրադառնալով Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասի հայտարարությանը, ըստ որի Հայաստան-Ադրբեջան սահմանին ստեղծված իրավիճակը «սահմանային միջադեպ» է։ Բենիամին Պողոսյանի խոսքով՝ Զասի ուղերձը հստակ է։ «Վերջին հաշվով, Հայաստանը դիմել էր ՀԱՊԿ-ին՝ խնդրելով խորհրդակցությունների անցկացում՝ հաշվի առնելով, որ ՀԱՊԿ անդամ պետություններից մեկի տարածքային ամբողջականության և անվտանգության համար սպառնալիք կա։Կարելի է ենթադրել, որ Զասը ասաց՝ դուք մեզ դիմել էիք մայիսի 13-ին, մոտ 40 օր, ենթադրաբար, անցկացվել են ինչ-որ խորհրդակցություններ, գուցե նաև ՀԱՊԿ-ի Արտաքին գործերի նախարարների խորհրդաժողովում, որին պարոն Արա Այվազյանն էր մասնակցում։ Հիմա ՀԱՊԿ-ը ասում է, որ այդ խորհրդակցություններից հետո եկել ենք այն եզրահանգման, որ ստեղծված իրավիճակում ՀԱՊԿ-ի ներգրավման համար որևէ հիմք չկա»։ Պողոսյանը հիշեցնում է, որ հիմա ընթանում է եռակողմ գործընթաց, որում ներգրավված է նաև ՀԱՊԿ-ի առաջատար պետություն Ռուսաստանը։ «Չմոռանանք, որ մայիսի 12-13-ից մեկ շաբաթ անց համացանցում հրապարակվեց մի քանի կետից բաղկացած փաստաթուղթ, որը ենթադրում էր եռակողմ (Հայաստան-Ռուսաստան-Ադրբեջան) դելիմիտացիոն հանձնաժողովի ստեղծում։ Այն ժամանակ վարչապետի պաշտոնակատարն էլ հայտարարեց, որ «այո՛, սա իրականություն է, և ես պատրաստվում եմ այս փաստաթուղթը ստորագրել»։ Այդ հայտարարությունից անցել է 1 ու կես ամիս։ Մենք չգիտենք՝ ինչ փուլում է գործընթացը, սակայն ինչ-որ ոչ հրապարակային քննարկումներ շարունակվում են։ Կարելի է ենթադրել, որ Ռուսաստանը ինչ-որ չափով ՀԱՊԿ-ի քարտուղարությանը տեղյակ է պահում այս գործընթացներից։ Դա նաև հնարավորություն է տալիս ՀԱՊԿ-ին ասելու, որ կա եռակողմ գործընթաց՝ սահմանային իրավիճակը այս կամ այն կերպ հանգուցալուծելու համար, և այդ եռակողմ գործընթացի մասնակիցներից մեկը ՀԱՊԿ-ի առաջատար պետությունն է։ Ռուսաստանն էլ, թերևս, ՀԱՊԿ-ի ներգրավման կարիք չի տեսնում»։ Պողոսյանի խոսքով՝ ՀԱՊԿ անդամ մյուս պետությունները (Բելառուս, Ղազախստան, Ղրղզստան, Տաջիկստան) շահագրգռված չեն որևէ ներգրավվածություն ունենալ Հայաստան-Ադրբեջան սահմանին ստեղծված իրավիճակում։ «Նրանք կներգրավվեն, եթե որևէ այլընտրանք չունենան։ Ընդ որում՝ դա փոխադարձ է։ Աֆղանստանից ամերիկյան զորքերը դուրս են գալիս։ Սեպտեմբերի 11-ին վերջին զինվորն է դուրս գալու, և հնարավոր է իրավիճակի սրում՝ Աֆղանստան-Տաջիկստան սահմանին։ Բոլորս ենք հասկանում, որ ՀՀ-ն մեծ ցանկություն կամ ընդհանրապես ցանկություն չունի այս գործընթացին ինչ-որ կերպ ներգրավվել։ Եթե այդտեղ իրավիճակի լարում տեղի ունենա, և հարկ լինի ինչ-որ քայլեր անել, այդ թվում՝ ՀՀ զինված ուժերի ներգրավմամբ, պարզ է, որ մենք դա կանենք ծայրահեղ դեպքում, եթե չունենանք այլընտրանք։ Նույնը վերաբերում է Ղազախստանին, Ղրղզստանին, Բելառուսին։ Նրանք որևէ կերպ Հայաստան- Ադրբեջան հարաբերություններում կներգրավեն ՀՀ-ի օգտին միայն այլընտրանք չունենալու դեպքում։ Նրանց կարող է ստիպել Ռուսաստանը, իսկ քանի դեռ ՌԴ-ից չկա բավականաչափ մեծ ճնշում, այս պետությունները ՀԱՊԿ-ի շրջանակներում զրո ցանկություն ունեն որևէ կերպ ներգրավվել Հայաստան-Ադրբեջան հարաբերություններին, առավել ևս՝ Հայաստանի օգտին»։ Ստանիսլավ Զասի հայտարարությունից 2 օր անց ՀՀ Անվտանգության խորհրդի քարտուղար Արմեն Գրիգորյանը հեռախոսազրույց էր ունեցել նրա հետ։ Գրիգորյանն ասել էր, որ ստեղծված իրավիճակը չի կարելի համարել սահմանային միջադեպ և կոչ էր արել ՀԱՊԿ քարտուղարության մակարդակով արվող ձևակերպումներում ցուցաբերել զսպվածություն։ Բենիամին Պողոսյանն կարծում է, որ այս հեռախոսազրույցը ֆորմալ բնույթ ուներ։ «ԱԽ քարտուղարի զանգը կատարվել է, ռուսերեն արտահայտություն կա, «ради галочки»։ Մենք դիմել էինք, ՀԱՊԿ-ը մեզ հրապարակային մերժել է։ Բնականաբար, Հայաստանը չի կարող դա անպատասխան թողնել։ Այդ զանգի բովանդակության մասին էլ մենք գիտենք միայն մամուլի հաղորդագրությունից։ Ոչ ոք այդ զրույցի սղագրությունը չի հրապարակել և երևի չի էլ պատրաստվում հրապարակել։ Հետևաբար, թե ինչ տոնայնությամբ է զրույցը գնացել, ինչ են ասել, դա գիտեն միայն երկու զրուցակիցները։ Հանրության շրջանում կար դժգոհություն, որ, տեսեք՝ «ՀԱՊԿ-ը մեզ հերթական ապտակը հասցրեց», «կամ ՀԱՊԿ-ը հերթական անգամ Հայաստանին ստորացրեց»։ Դա ներկայացվեց այնպես, որ ՀՀ իշխանությունները այնքան են իրենց հեղինակությունը կորցրել, որ նույնիսկ ՀԱՊԿ գլխավոր քարտուղարը իրեն թույլ է տալիս փաստացի արհամարհել Հայաստանին։ Դրան պետք է ինչ-որ կերպ արձագանքել՝ ասելով՝ ոչ, ՀՀ իշխանությունները և ՀՀ-ի հեղինակությունը այդքան չի ընկել, և մենք չենք հանդուրժի, որ մեզ արհամարհեն»,-ասում է նա՝ հավելելով, որ այս հեռախոսազրույցը ավելի շատ ուղղված է եղել ներքին լսարանին։ Անդրադառնալով Հայաստան- Ադրբեջան սահմանին ստեղծված իրավիճակի հանգուցալուծման հնարավոր տարբերակներին՝ Պողոսյանը ասում է, որ, թերևս, կա անուղղակի որոշում, որ Հայաստան- Ադրբեջան սահմանի առնվազն մի մասը պետք է ռուս սահմանապահները վերահսկեն, այնպես, ինչպես նախկինում վերահսկում էին Հայաստան- Թուրքիա և Հայաստան-Իրան սահմանները։ «Հիմա դա կլինի ամբողջ սահմանը՝ Տավուշից մինչև Մեղրի և ամբողջ Նախիջևանի սահմանը՝ Արարատի մարզից մինչև Մեղրի, դժվարանում եմ ասել։ Բայց որոշ հատվածներում՝ գոնե Գեղարքունիքի և Սյունիքի այն հատվածներում, որոնք նախկինում սահմանակցում էին Արցախի Հանրապետությանը, հիմա՝ Ադրբեջանին, տեղակայվելու են ռուսական զորքեր»։ Նրա խոսքով՝ ռուս սահմանապահները ադրբեջանցիներին չեն հարկադրի հետ քաշվել զբաղեցրած դիրքերից։ «Ադրբեջանցիները ասում են՝ ինչպես եք ապացուցելու, որ այդ տարածքները (որտեղ մայիսի 12-ից գտնվում են ադրբեջանցի զինվորները, խմբ․) հայկական են։ Մենք, բնականաբար, հղում ենք անում Խորհրդային Հայաստանի սահմաններին՝ ասելով, որ այդ տարածքները Խորհրդային Հայաստանի կազմում են եղել։ Ադրբեջանցիներն էլ ասում են՝ եթե դուք ընդունում եք Խորհրդային Հայաստանի սահմանները, ապա ետ վերադարձրեք ներկայիս Տիգրանաշենը և Տավուշի մարզի գյուղերը, մենք էլ պատրաստ ենք ձեզ տալ Արծվաշենը, և, ընդհանրապես, մոռացեք Արցախի մասին, որովհետև Լեռնային Ղարաբաղի ինքնավար մարզը Խորհրդային Ադրբեջանի կազմում էր։Եթե մենք դրան համաձայնվում ենք, ստացվում է լրիվ այլ պատմություն։ Եթե ասում ենք՝ ոչ, հիմք չենք ընդունում Խորհրդային Հայաստանի և Խորհրդային Ադրբեջանի քարտեզները, ադրբեջանցիները հարցնում են՝ ինչ հիմքով եք ասում, որ մենք գտնվում ենք ՀՀ տարածքում»։ Անդրադառնալով Սոթք-Խոզնավար հատվածում միջազգային դիտորդների տեղակայման մասին ՀՀ վարչապետի պաշտոնակատար Նիկոլ Փաշինյանի առաջարկին, Պողոսյանը ընդգծում է, որ առաջարկը արվել է մայիսի 27-ին, բայց ԵԱՀԿ Մինսկի խմբի համանախագահ երկներից արձագանք չկա։ «Չկա հստակ հայտարարություն, որ այո՛, մենք պատրաստ ենք ուղարկել մեր դիտորդներին Հայաստան- Ադրբեջան սահմանին։ Չեմ տեսել նաև Ադրբեջանի արձագանքը։ Այլ բան է, որ Հայաստանը իր տարածքում տեղակայում է ռուսական զորքեր, այդտեղ Ադրբեջանը առարկել չի կարող, բայց այլ բան է, եթե մենք ասում ենք, որ պետք է սահմանին տեղակայվեն դիտորդներ։ Այստեղ պետք է նաև Ադրբեջանի համաձայնությունը»։ Սահմանային իրավիճակի որոշակի սրում կա նաև ՀԱՊԿ անդամ մեկ այլ պետությունում՝ Տաջիկստանում։ Պատճառն այն է, որ «Թալիբան» շարժման զինյալների հետ ունեցած մարտերի հետևանքով աֆղան զինծառայողները նահանջել են դեպի Տաջիկստանի հետ սահման և ապաստան խնդրել այդ երկրից։ Այս դեպքում, սակայն, ՀԱՊԿ գլխավոր քարտուղար Ստանիսլավ Զասը հայտարարել էր, որ անհրաժեշտ է աջակցություն տրամադրել՝ Տաջիկստանի հարավային սահմանի անվտանգությունն ապահովելու համար։ Բենիամին Պողոսյանը բացատրում է, թե ՀԱՊԿ-ը ինչու է տարբեր կերպ արձագանքում անդամ-պետությունների սահմանային իրավիճակներին։ «Տաջիկստանի տարածք դեռևս ոչ ոք չի ներխուժել։ Թալիբները Աֆղանստան-Տաջիկստան սահմանին՝ աֆղանական որոշ տարածքների վրա վերահսկողություն են հաստատել, և կա անկայունության վտանգ։ Աֆղանստանից եկող վտանգները կարող են սպառնալիք լինել Ռուսաստանի շահերի համար։ Խոսքը վերաբերում է նաև իսլամական արմատականությանը, թմրանյութերի չվերահսկվող առուվաճառքին, եթե Աֆղանստանից Տաջիկստան որոշակի իսլամական արմատականություն արտահանվի։ Եթե ադրբեջանցիները 4 կիլոմետր խորանում են Սյունիքում, ընդ որում՝ դա անում են առանց որևէ դիմադրության հանդիպելու, ՌԴ-ի կենսական շահերի համար դա ոչինչ չի նշանակում։ Վաղը ադրբեջանցիները կարող են Տավուշի մարզի որևէ գյուղի ուղղությամբ երկու կիլոմետր էլ առաջ գնալ, դա ՌԴ-ի շահերի տեսանկյունից զրո ազդեցություն ունի։ Իսկ Տաջիկստանի միջոցով կամ Տաջիկստանի տարածքով հնարավոր իսլամական արմատականության տեղափոխումը Ռուսաստան կամ Կենտրոնական Ասիայի շրջաններ չէի ասի, որ սպառնալիք է Ռուսաստանի կենսական շահի համար, բայց, ամեն դեպքում, սպառնալիք է»։ Նա նաև ընդգծում է, որ պետությունները առաջին հերթին սեփական շահերն են առաջ մղում՝ չնայած այս կամ այն ռազմական դաշինքին անդամակցելու հանգամանքին։ «ՆԱՏՕ-ում 30 անդամ պետություն կա։ Եթե, օրինակ, Բալթյան պետությունների և Ռուսաստանի միջև ինչ-որ խնդիրներ ծագեն` ոչ թե լայնածվալ գործողություններ, այլ, օրինակ, դիվերսիոն գործողություններ, որում Բալթյան պետությունները մեղադրեն Ռուսաստանին, Ռուսաստանն էլ հերքի, այնպես չէ, որ դաշինքի անդամ 30 պետությունները՝ Կանադայից մինչև Պորտուգալիա կամ Իսպանիայից մինչև Սլովենիա բոլորը միանշանակ հայտարարելու են, որ՝ այո՛, մենք զորքեր ենք ուղարկում, Ռուսաստանի հետ խնդիրներ ենք ստեղծում և այլն։ Մենք ՀԱՊԿ-ին քննադատում ենք, բայց ցանկացած դաշինքում, որը մի շարք պետությունների է ներգրավում, յուրաքանչյուր պետություն իր շահերից է ելնում։ Չկան աշխարհում պետություններ, որոնք թեկուզև դաշինքի մեջ են, բայց բոլոր հարցերում ունեն շահերի 100 տոկոսանոց համընկնում»։ Նանե Ավետիսյան

13:40 - 09 հուլիսի, 2021

Դուշանբեում տեղի է ունեցել ՀԱՊԿ Խորհրդարանական վեհաժողովի խորհրդի նիստ. գլխավոր թեման Աֆղանստանում տիրող իրավիճակն էր |armtimes.com|

armtimes.com: Հուլիսի 1-ին Տաջիկստանի Հանրապետության մայրաքաղաք Դուշանբեում տեղի է ունեցել ՀԱՊԿ Խորհրդարանական վեհաժողովի խորհրդի նիստ՝ առկա ձևաչափով: Նիստը նախագահել է ՀԱՊԿ ԽՎ նախագահ, ՌԴ Պետդումայի նախագահ Վյաչեսլավ Վոլոդինը: Խորհրդի նիստին մասնակցել է նաև Հայաստանի խորհրդարանի նախագահ Արարատ Միրզոյանը: ՀԱՊԿ ԽՎ խորհրդի նիստին մասնակցել է ՀԱՊԿ գլխավոր քարտուղար Ստանիսլավ Զասը: Հավաքական անվտանգության պայմանագրի կազմակերպության Հավաքական անվտանգության խորհրդի դեկտեմբերի (2020 թ.) Նստաշրջանի արդյունքների, կազմակերպության պատասխանատվության ոլորտում ստեղծված իրավիճակի և ՀԱՊԿ-ում կնքված միջազգային պայմանագրերի վավերացման մասին իր զեկույցում նա նշել է, որ խորհրդարանական բաղադրիչը Կազմակերպությունների գործունեության ամենակարևոր ոլորտներից մեկն է, և այս աշխատանքի կարևորությունը տարեցտարի ավելանում է՝ հաշվի առնելով ժամանակակից իրողությունները: ՀԱՊԿ գլխավոր քարտուղարը հայտնել է, որ նիստի ընթացքում ընդունվել է հռչակագիր, որում մտահոգություն է հայտնվում աշխարհում անվտանգության մեխանիզմների դեգրադացիայի, լարվածության աճի մասին, այդ թվում ՝ եվրասիական տարածքում: «Ընդգծվեց, որ ՀԱՊԿ-ը կմեծացնի իր մասնակցությունը խաղաղության և անվտանգության ապահովման գլոբալ ջանքերին` հետևողականորեն պաշտպանելով միջազգային և տարածաշրջանային հակամարտությունների կարգավորումը հիմնականում խաղաղ քաղաքական և դիվանագիտական միջոցներով`միջազգայնորեն ճանաչված բանակցային ձևաչափերի շրջանակներում», - ասել է Ստանիսլավ Զասը: Նա հավելել է, որ ՀԱՊԿ անդամ երկրների ղեկավարները հավանություն են տվել «Արդար և կայուն աշխարհակարգի ձևավորման մասին» հայտարարությանը, որում ն հաստատում են իրենց պատրաստակամությունը համատեղ աշխատելու`կառուցելու ազատ, ժողովրդավարական, ընդհանուր և անբաժանելի եվրատլանտյան և եվրասիական անվտանգություն Վանկուվերից մինչև Վլադիվոստոկ: «Ընդհանուր առմամբ, ՀԱՊԿ Հավաքական անվտանգության խորհրդի դեկտեմբերյան նիստում ընդունված բոլոր որոշումները նոր խթան են հաղորդել կազմակերպության գործունեությանը նրա բոլոր հիմնական ոլորտներում»,-նշել է ՀԱՊԿ գլխավոր քարտուղարը: Միևնույն ժամանակ, Ստանիսլավ Զասը ներկաների ուշադրությունը հրավիրել է այն փաստի վրա, որ ներկայիս միջազգային իրավիճակը լավատեսության հիմքեր չի տալիս համաշխարհային անվտանգության ոլորտում դրական փոփոխություններ կանխատեսելու համար: «Կարծես թե համաճարակը և դրա դեմ պայքարի անհրաժեշտությունը պետք է համախմբեին համաշխարհային հանրությունը և շտկեին առկա հակասությունները: Այնուամենայնիվ, ի՞նչ ենք տեսնում: Ճնշումը մեծանում է այն երկրների վրա, որոնք ձգտում են ինքնուրույն քաղաքականություն վարել: Այդ նպատակով ակտիվորեն օգտագործվում են ռազմական ներկայության կուտակումները և ռազմական գործունեության ցուցադրումը նրանց սահմանների մոտ, լայնորեն օգտագործվում են «հիբրիդային պատերազմների» գործիքներն ու «գունավոր հեղափոխությունների» տեխնոլոգիաները: Արեւմուտքը լայնամասշտաբ «ապատեղեկատվության» արշավ է սկսել ՝ օգտագործելով «կեղծիքներ»: Արդյունքում, իրավիճակը գործնականում ՀԱՊԿ անդամ պետությունների սահմանների ողջ պարագծում շարունակում է լարված մնալ», - նշել է կազմակերպության գլխավոր քարտուղարը: Նրա խոսքով՝ Աֆղանստանում տեղի ունեցող գործընթացները զգալի ազդեցություն ունեն ՀԱՊԿ հավաքական անվտանգության Կենտրոնական Ասիայի տարածաշրջանում տիրող իրավիճակի վրա: Եվ ՀԱՊԿ-ը մեծ ուշադրություն է դարձնում այս խնդրի դիտարկմանը: Դա արվում է Կազմակերպությունում ՀԱՊԿ Նախարարական խորհրդին առընթեր Աֆղանստանի վերաբերյալ աշխատանքային խմբի կողմից: «Մեր գնահատմամբ, Աֆղանստանի տարածքում միջազգային ահաբեկչական և կրոնական-ծայրահեղական կազմակերպությունների ակտիվացման սպառնալիքը չի նվազեցնում ահաբեկչության և թմրանյութերի հանցավոր շրջանառության տարածման հավանականությունը: Այս երկրի տարածքում և, որպես հետեւանք, Աֆղանստանի սահմանային տարածքում իրավիճակի շուտափույթ կարգավորման հավանականությունը մնում է ցածր: Հիմնական հարցերից մեկն այն է, թե այնտեղ իրավիճակն ինչ ուղղությամբ կզարգանա այնտեղից ամերիկյան և ՆԱՏՕ-ի ռազմական կոնտինգենտները դուրս բերելուց հետո. արդյո՞ք պաշտոնական Քաբուլը և «Թալիբան»-ը կկարողանան համաձայնություններ ձեռք բերել, որոնք ապահովում են երկրում խաղաղություն և կայունություն»,-ասել է Ստանիսլավ Զասն իր զեկույցում: ՀԱՊԿ գլխավոր քարտուղարը խորհրդարանականներին տեղեկացրել է, որ ակտիվ աշխատանքներ են տարվում «Մարտական եղբայրություն-2021» օպերատիվ-ռազմավարական զորավարժությունների շրջանակներում ՀԱՊԿ անդամ պետությունների համատեղ զորավարժությունների անցկացման նախապատրաստման ուղղությամբ, որոնց մեծ մասը կանցկացվի Տաջիկստանի տարածքում: «ՄԱԿ-ի խաղաղապահ գործողություններում ՀԱՊԿ անդամ երկրների խաղաղապահ զորամիավորումները ներգրավելու մեխանիզմի մշակման գործընթացը շարունակվում է: Հաստատվել է Խաղաղապահ գործունեության վերաբերյալ ՀԱՊԿ հիմնական համաձայնագրում փոփոխություններ կատարելու մասին Արձանագրության նախագիծը», - ասել է Զասը: Դրան զուգահեռ, ըստ զեկույցի, ՀԱՊԿ-ը մշակում է գործունեության նոր ոլորտներ: Մշակվում են ՀԱՊԿ անդամ պետությունների՝ կենսաանվտանգության ոլորտում համագործակցության հարցեր: Ձևավորվում են հանրային դիվանագիտության ոլորտում աշխատանքի ալգորիթմներ: Վերջում Ստանիսլավ Զասը նշել է, որ ՀԱՊԿ քարտուղարության և ՀԱՊԿ խորհրդարանական վեհաժողովի քարտուղարության միջև զարգացել է կառուցողական փոխգործակցություն: Ի դեպ, ուշագրավ է, որ Հավաքական անվտանգության պայմանագրի կազմակերպության Խորհրդարանական վեհաժողովի խորհուրդը ընդունել է հայտարարություն, որում ասվում է, որ կառույցը պատրաստ է օգտագործել պառլամենտական դիվանագիտության մեթոդները՝ Աֆղանստանի Ազգային ժողովին, աֆղանական բոլոր էթնիկ խմբերին և քաղաքական ուժերին, ներառյալ «Թալիբան»-ին աջակցելու գործընթացին աջակցելու համար, որը կտանի ազգային հաշտեցման Աֆղանստանում: «Հավաքական անվտանգության պայմանագրի կազմակերպության խորհրդարանական վեհաժողովի խորհուրդը, կապված ՀԱՊԿ անդամ պետություն Տաջիկստանի Հանրապետության հարավային սահմանների անմիջական հարևանությամբ իրավիճակի վատթարացման հետ, մտահոգություն է հայտնում ռազմական գործունեության բարձր մակարդակի կապակցությամբ Աֆղանստանում, հատկապես նրա հյուսիսային նահանգներում, օտարերկրյա ռազմական ներկայության սահմանափակման ֆոնին և կոչ է անում Աֆղանստանի Իսլամական Հանրապետության իշխանություններին և «Թալիբան» շարժմանը դադարեցնել բռնությունները՝ երկրի առաջխաղացման համար բարենպաստ պայմաններ ապահովելու համար», - ասված է հայտարարության մեջ:

09:24 - 02 հուլիսի, 2021