ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Պետդումայում կոչ են արել հնարավորինս շուտ Դոնեցկի և Լուգանսկի հանրապետությունները միացնել ՌԴ-ին |tert.am|

tert.am: ՌԴ պետդումայում նախագահ Վլադիմիր Պուտինին կոչ են արել Դոնեցկի ու Լուգանսկի ինքնահռչակ ժողովրդական հանրապետությունները միացնել Ռուսաստանի Դաշնությանը՝ դրանք դարձնելով Ռոստովի մարզի մաս:Ինչպես գրում է Южный Федеральный պարբերականը, համապատասխան նախաձեռնությամբ հանդես է եկել Լիբերալ-դեմոկրատական կուսակցության պատգամավոր, Պետդումայի պաշտպանության հարցերով կոմիտեի ղեկավարի առաջին տեղակալ Ալեքսանդր Շերինը:Ըստ պատգամավորի, Դոնբասի հանրապետությունները միացնելու գործընթացը պետք է սկսվի որքան հնարավոր է շուտ, քանի դեռ Ուկրաինան չի անդամակցում ՆԱՏՕ-ին:Շերինը հիշեցրել է, որ Լուգանսկից և Դոնեցկից մինչև Ռոստով մեքենայով ընդամենը երկու ժամվա ճանապարհ է: Հետևաբար, չափազանց կարևոր է, որ մինչ ՆԱՏՕ-ի զորքերը հայտնվեն Ուկրաինայի տարածքում, ԴԺՀ-ն և ԼԺՀ-լինեն Ռուսաստանի կազմում: Ավելին՝ tert.am-ում

11:21 - 22 դեկտեմբերի, 2020

ԱՄՆ-ում ՌԴ դեսպանը մեկնաբանել է Ռուսաստանի դեմ ամերիկյան նոր պատժամիջոցները |tert.am|

tert.am: Վաշինգտոնն իր հակառուսական տագնապով որոշել է հաշվի չնստել սեփական բիզնեսի շահերի հետ, հայտարարել է ԱՄՆ-ում Ռուսաստանի դեսպան Անատոլի Անտոնովը՝ մեկնաբանելով տասնյակ ռուսական ընկերությունների դեմ նոր պատժամիջոցները: Այս մասին գրում է «ՌԻԱ Նովոստի» գործակալությունը:ԱՄՆ Առևտրի նախարարությունը երկուշաբթի օրը հրապարակել է Ռուսաստանի և Չինաստանի 103 ընկերությունների ցուցակ, որոնք, ըստ Վաշինգտոնի, կապված են զինված ուժերի հետ, ուստի ենթակա կլինեն արտահանման սահմանափակումների: Ցուցակում պաշտոնապես ընդգրկված է Ռուսաստանի 45 ձեռնարկություն:Անտոնովն ապակառուցողական է որակել ԱՄՆ Առևտրի նախարարության որոշումը: Դեսպանի խոսքով, դա խարխլում է ոչ միայն երկրների միջև տնտեսական շարունակական փոխգործակցությունը, այլև արգելափակում է ցանկացած դրական հեռանկար:«Հարկ է նշել, որ Վաշինգտոնում հակառուսական տագնապի պայմաններում նրանք որոշել են հաշվի չնստել իրենց բիզնեսի շահերի հետ: Նրանք զրկվում են շատ հեռանկարային ոլորտներում ռուս գործընկերների հետ բնականոն համագործակցության հնարավորությունից»,-ասել է դեսպանը Վաշինգտոնում ՌԴ դիվանագիտական առաքելության կողմից Facebook- ում հրապարակված հայտարարության մեջ: Ավելին՝ tert.am-ում

10:15 - 22 դեկտեմբերի, 2020

Մինչ օրս շուրջ 43 000 մարդ վերադարձել է Լեռնային Ղարաբաղ. ՌԴ ՊՆ |tert.am|

tert.am: Շուրջ 43 հազար փախստական վերադարձել է Լեռնային Ղարաբաղ, վերջին մեկ օրվա ընթացքում Երևանից ավտոբուսներով Ստեփանակերտ է տեղափոխվել 351 մարդ, հաղորդում է ՌԴ ՊՆ-ն։«Երևանից Ստեփանակերտ է տեղափոխվել 351 մարդ։ Ավտոբուսների երթևեկությունն իրականացվել է ռուսական խաղաղապահ զորախմբի և ռազմական ոստիկանության պարեկների ուղեկցությամբ»,- ասված է հաղորդագրության մեջ:Նշվում է, որ մինչ օրս Լեռնային Ղարաբաղ է վերադարձել շուրջ 43 հազար փախստական։

09:42 - 22 դեկտեմբերի, 2020

Հայտնի են Մոսկվայից և Կալուգայից Երևան ու Գյումրի նախատեսված չարտերային չվերթերը

ՌԴ-ում ՀՀ դեսպանությունը տեղեկատվություն է հրապարակել Մոսկվայից և Կալուգայից Երևան և Գյումրի չարտերային չվերթերի մասին, որը ներկայացնում ենք ստորև.25․12 - Մոսկվա-Երևան, «Դոմոդեդովո», «Nord Star» ընկերություն (ժամը 17։00-ին)27․12 - Մոսկվա-Երևան, «Դոմոդեդովո», «Nord Star» ընկերություն (ժամը 21:30-ին)28․12-Մոսկվա-Երևան, «Դոմոդեդովո», «Red Wings» ընկերություն (ժամը 16:35-ին)28․12 - Կալուգա-Երևան, Կալուգայի միջազգային օդանավակայան, «Aircompany Armenia» ընկերություն (ժամը 11:40-ին)29․12 - Մոսկվա-Գյումրի, «Դոմոդեդովո», «Nord Star» ընկերություն (ժամը 12։30-ին)30․12 - Մոսկվա-Երևան, «Դոմոդեդովո», «Nord Star» ընկերություն (ժամը 17։00-ին)08․01 - Մոսկվա-Երևան, «Դոմոդեդովո», «Nord Star» ընկերություն (ժամը 21:30-ին10․01 - Մոսկվա-Երևան, «Դոմոդեդովո», «Nord Star» ընկերություն (ժամը 21: 30-ին):

21:26 - 21 դեկտեմբերի, 2020

Բելառուսը դարձել է առաջին երկիրը ՌԴ-ից հետո, որը պաշտոնապես գրանցել է «Սպուտնիկ V» պատվաստանյութը |tert.am|

tert.am: ՌԴ Գամալեայի անվան համաճարակաբանության և հետազոտությունների կենտրոնի մշակած «Սպուտնիկ V» պատվաստանյութը կորոնավիրուսի դեմ գրանցվել է նաև Բելառուսում: РБК-ի փոխանցմամբ՝ այս մասին տեղեկացրել է «Ռուսական ուղիղ ներդրումներ» հիմնադրամը, որը ֆինանսավորել է պատվատանյութի ստեղծումը: Պատվաստանյութին գրացման վկայական հատկացնելու մասին հայտնել է նաև Բելառուսի Առողջապահության նախարարությունը: Բելառուսի առողջապահության նախարար Դմիտրի Պինևիչի խոսքով՝ քաղաքացիների պատվաստումը երկրում կմեկնարկի հունվարին:Բելառուսը դարձել է առաջին երկիրը, որը մասնակցել է «Սպուտնիկ V» պատվաստանյութի արտասահմանյան կլինիկական ուսումնասիրություններին, ինչպես նաև առաջին երկիրը ՌԴ-ից հետո, որը պաշտոնապես գրանցել է այն:

19:43 - 21 դեկտեմբերի, 2020

Իրավիճակի սրման բարձր ռիսկեր կան Անդրկովկասում և Մերձավոր Արևելքում. շարունակելու ենք ակտիվորեն ու արդյունավետ զարգացնել զինված ուժերը. Պուտին |tert.am|

tert.am: Իրավիճակի սրման մեծ ռիսկեր կարող են առաջանալ Անդրկովկասում, Մերձավոր Արևելքում, Աֆրիկայում և աշխարհի այլ տարածաշրջաններում: Այս մասին հայտարարել է ՌԴ նախագահ Վլադիմիր Պուտինը`դեկտեմբերի 21-ին ելույթ ունենալով Ռուսաստանի ՊՆ կոլեգիայի ընդլայնված կազմով նիստում, գրում է EADaily լրատվականը:«Անդրկովկասում, Մերձավոր Արևելքում, Աֆրիկայում և աշխարհի այլ տարածաշրջաններում իրավիճակի սրման մեծ ռիսկեր կան: ՆԱՏՕ-ի բլոկի ռազմական ակտիվությունը չի դադարում: Ցավոք, զենքի կառավարման համակարգի դեգրադացիան շարունակվում է», -ասել է պետության ղեկավարը:«Հորինված պատրվակներով ԱՄՆ-ն արդեն դուրս է եկել ՀՕՊ, Ռուսաստանի միջազգային գործերով խորհրդի և բաց երկնքի մասին համաձայնագրերից: Հստակություն չկա նաև Ռազմավարական զենքի կրճատման պայմանագրի վերաբերյալ, որի ժամկետը, ինչպես հայտնի է, լրանում է 2021 թվականի փետրվարին: Մենք բազմիցս հայտարարել ենք այս համաձայնագիրը երկարաձգելու պատրաստակամության մասին, պատասխան չկա», -ասել է նա:Ինչպես ընդգծել է ՌԴ ղեկավարը, «ռուսական կողմը մանրամասնորեն վերլուծում է ներկայիս աշխարհառազմավարական և ռազմաքաղաքական իրավիճակը և կանխատեսում դրա զարգացման հնարավոր տարբերակները»: Շարունակությունը՝ tert.am-ում։

17:31 - 21 դեկտեմբերի, 2020

Խաղաղապահների համար Ղարաբաղում կստեղծվի 32 զինվորական ավան |azatutyun.am|

azatutyun.am: Ռուսաստանի պաշտպանության նախարար Սերգեյ Շոյգուն ասել է, որ Լեռնային Ղարաբաղում ռուսաստանցի խաղաղապահների համար մինչև 2021 թվականի ապրիլ կստեղծվի 32 մոդուլային արդիական զինվորական ավան: «Ստեփանակերտում ռուսաստանցի խաղաղապահների համար արդեն կառուցվել է 2 մոդուլային հավաքովի ավան, որտեղ կարող է բնակվել 330 մարդ: Մինչև հաջորդ տարվա ապրիլի 1-ը տեղակայված կլինի 32 նմանատիպ ավան: Ամեն ինչ կարվի խաղաղապահների ծառայության և բնակվելու հարմարության համար», - նշել է Շոյգուն: Ռուսաստանի պաշտպանության նախարարության հաղորդագրության համաձայն, այդ հավաքովի մոդուլային ավաններում կան կացարաններ, շտաբ, մարզասրահ, սպաների տնակ, բաղնիք, բուժկետ, ժամանցի սենյակներ, խոհանոց, զենքի և զինամթերքի, պարենի և այլ անհրաժեշտ իրերի պահեստներ, ինժեներական սարքավորումներ և կենցաղային տեխնիկա:

16:35 - 21 դեկտեմբերի, 2020

Սիրիայում Ռուսաստանի ռազմական ներկայությունը ոչ միայն օգտակար է, այլ անհրաժեշտ. Սիրիայի ԱԳ նախարար |tert.am|

tert.am: Սիրիայի արտգործնախարար Ֆեյսալ Միքդադը խոսել է Սիրիայի Արաբական Հանրապետությունում ռուս զինվորականների ներկայության անհրաժեշտության մասին, հայտնում է «ՌԻԱ Նովոստի» լրատվական գործակալությունը:Արտաքին գործերի նախարարը նշել է, որ Ռուսաստանի Դաշնության հետ ընդհանուր հաղթանակներ են գրանցվել ահաբեկչության դեմ պայքարում:«Դա չի նշանակում, որ ահաբեկչությունն ավարտվել է, քանի որ Միացյալ Նահանգները շարունակում է խրախուսել ահաբեկչական կազմակերպություններին ավելի ակտիվ լինել՝ այս տարածքում ԱՄՆ-ի ներկայությունն արդարացիորեն ապահովելու նպատակով», - ասել է Սիրիայի արտգործնախարարը՝ հավելելով, որ ահաբեկչության դեմ պայքարը շարունակվում է տարբեր ձևերով և միջոցներով:

15:15 - 21 դեկտեմբերի, 2020

Ստեփանակերտում ռուս խաղաղապահների համար տեղադրել են բլոկ-մոդուլային քաղաք |armenpress.am|

armenpress.am: Լեռնային Ղարաբաղում ավարտվել է ռուս խաղաղապահների համար բլոկ-մոդուլային քաղաքի շինարարությունը: Այս մասին հայտնում են ՌԴ Պաշտպանության նախարարությունից: «Լեռնային Ղարաբաղում ավարտվել է բլոկ-մոդուլային քաղաքի շինարարությունը՝ Ստեփանակերտում 250 հոգանոց ռուսական խաղաղապահ զորակազմի զինծառայողների տեղակայման համար։ Այս պահին մենք մոտենում ենք ինժեներական սարքավորումների շահագործման մեկնարկի աշխատանքների ավարտին»,- ասված է հաղորդագրության մեջ: Բլոկ-մոդուլային քաղաքը ներառում է բնակելի մոդուլներ, մարզասրահ, բուժկետ, շոգեբաղնիք, չորանոց, ժամանցի սենյակ, շտաբ և գրասենյակ, մառան, ճաշարան, խոհանոց, սննդի պահեստ, սանիտարական մոդուլներ, զենքի և ինժեներական սարքավորումների պահպանման սենյակ։ Բլոկ-մոդուլային քաղաքն ամբողջությամբ համալրված են կենսապահովման բոլոր անհրաժեշտ ենթակառուցվածքներով և բաղադրիչներով:

14:49 - 21 դեկտեմբերի, 2020

Ղարաբաղում ռուս խաղաղապահ ուժերի կողմից ականազերծվել է 238 հեկտար տարածք․ ՌԴ ՊՆ |armtimes.com|

armtimes.com: Ռուսաստանի պաշտպանության նախարարության Միջազգային հակաականային կենտրոնի մասնագետները շարունակում են Լեռնային Ղարաբաղի տարածքի ականազերծման աշխատանքները: Այս մասին հայտնում է հայտնում է ՌԴ ՊՆ-ն՝ նշելով, որ գործողության ընթացքում Լեռնային Ղարաբաղում ռուս խաղաղապահ ուժերի ինժեներական ստորաբաժանումներն ականազերծել են շուրջ 238 հեկտար տարածք, որը ներառում է 93 կիլոմետր ճանապարհ, 423 բնակելի տուն: Ըստ ՌԴ պաշտպանական գերատեսչության՝ հայտնաբերվել և վնասազերծվել է ավելի քան 8,3 հազար պայթուցիկ նյութ։ ԼՂ-ում պայթունավտանգ առարկաներից տարածքի ականազերծման և մաքրման ընթացքում ռուս խաղաղապահները կիրառում են ժամանակակից ռոբոտատեխնիկական համալիրներ, իսկ հայտնաբերված պայթյունավտանգ առարկաները և չաշխատող զինամթերքը ոչնչացվում են:

13:33 - 21 դեկտեմբերի, 2020

ՌԴ-ից մարդասիրական օգնության ևս 7 բեռնատար է ժամանել Արցախ

Ռուսաստանի ԱԻՆ համահավաք խմբավորման մասնագետները բեռնաթափել են հումանիտար օգնություն տեղափոխած յոթ երկաթուղային վագոն` հայտնում են ԱՀ ԱԻՊԾ-ից: Ավելի ուշ հումանիտար օգնությունը կբաշխվի տարածաշրջանի տարբեր բնակավայրերին։ Սա մարդասիրական օգնության երրորդ խմբաքանակն է, որը տրամադրում է Ռուսաստանի Դաշնությունը: Այս պահին ժամանել է 54 վագոնից 9-ը։ Ավելի վաղ հաղորդվել էր, որ ՌԴ ԱԻՆ-ը 1,2 հազար տոննա մարդասիրական օգնության 54 վագոն կուղարկի Արցախի Հանրապետություն:

10:50 - 21 դեկտեմբերի, 2020

Հարևան երկրներում բորբոքվող հակամարտությունների ռիսկերը պահանջում են ՌԴ-ի սահմանների արդյունավետ պաշտպանություն. Պուտին |tert.am|

tert.am: ՌԴ նախագահ Վլադիմիր Պուտինը նշել է Ռուսաստանի պետական սահմանների առավել արդյունավետ պաշտպանության անհրաժեշտությունը ՝ հաշվի առնելով հարևան երկրներում բորբոքվող հակամարտությունների ռիսկերը: Այս մասին գրում է ՏԱՍՍ գործակալությունը: «Մենք պետք է ձգտենք ավելի արդյունավետ պաշտպանել պետական սահմանը, մանավանդ հաշվի առնելով մեր սահմանների մոտ տարածաշրջանային հակամարտությունների բորբոքման ռիսկերը»,- ընդգծել է Ռուսաստանի ղեկավարը կիրակի օրը Արտաքին հետախուզության ծառայության շտաբ-բնակարան կատարած այցի ժամանակ: Պուտինը հանձնարարել է նաև լուրջ ուշադրություն դարձնել տեղեկատվական անվտանգությանը, ծայրահեղականության և կոռուպցիայի դեմ պայքարին և տնտեսական ոլորտի հանցագործություններին: Իր հերթին, Դաշնային անվտանգության ծառայության աշխատակիցները, ըստ նախագահի, պետք է շարունակեն հուսալիորեն ապահովել պետական օբյեկտների և նշանակալի իրադարձությունների անվտանգությունը, իսկ Հատուկ ծրագրերի գլխավոր վարչությունը պետք է «լուծի խնդիրների լայն շրջանակ` բարձրացնելու հիմնական կառավարական մարմինների և կապի համակարգերի աշխատանքի կայունությունը ցանկացած, նույնիսկ առավելագույնս բարդ իրավիճակներում»:

21:14 - 20 դեկտեմբերի, 2020

Արցախ է վերադարձել 42․051 մարդ, ռուս զինվորական բժիշկները 759 բնակչի օգնություն են ցուցաբերել |armenpress.am|

armenpress.am: Ռուսական խաղաղարար ուժերի զորակազմը շարունակվում է Լեռնային Ղարաբաղի տարածքում առաջադրանքների կատարումը։ Ռուս խաղաղապահների կողմից 23 դիտակետերում իրադրության շուրջօրյա մոնիթորինգ եւ հրադադարի ռեժիմի պահպանման վերահսկողություն է իրականացվում: Հրադադարի պահպանման ռեժիմը պահպանվում է շփման գծի ողջ երկայնքով: Ինչպես հաղորդում է ՌԴ պաշտպանության նախարարության կայքը, ռուսական խաղաղապահ զորախումբը ապահովում է քաղաքացիների անվտանգ վերադարձը իրենց մշտական բնակության վայրեր, ցուցաբերվում է մարդասիրական օգնություն, վերականգնվում են քաղաքացիական ենթակառուցվածքների օբյեկտները: Մեկ օրում ռուս խաղաղապահների կողմից ապահովվել է Հայաստանի տարածքից 306 փախստականների անվտանգ վերադարձը Լեռնային Ղարաբաղ։ Ընդամենը նոյեմբերի 14-ից Լեռնային Ղարաբաղում նախկին բնակության վայր է վերադարձել 42 051 մարդ։ Մարդակերտ բնակավայրում ռուս խաղաղապահների աջակցությամբ, վերանորոգման բրիգադի ուժերով վերականգնվել է մեկ բնակելի տուն և 1,6 կմ էլեկտրահաղորդման գիծ: Աշխատանքների սկզբից վերականգնվել է 23 բնակելի տուն և 7,9 կմ էլեկտրահաղորդման գիծ։ Ռուսական խաղաղապահ զորախումբը Կարմիր խաչի միջազգային կոմիտեի և Լեռնային Ղարաբաղի արտակարգ իրավիճակների նախարարության ներկայացուցիչների հետ փոխգործակցությամբ շարունակում է մարտական գործողությունների ընթացքում զոհվածների մարմինների որոնումն ու փոխանցումը: Կազմակերպվել է «թեժ գծի» աշխատանք՝ Լեռնային Ղարաբաղի հակամարտության մասնակիցների, անհայտ կորածների մասին տեղեկություններ հավաքելու ուղղությամբ: Այն իր աշխատանքի սկզբից ընդունել է 521 դիմում, որոնք փոխանցվել են Կողմերի հաշտեցման կենտրոնի որոնողական խմբերին։ Ռուսաստանի արտագնա բժշկական բրիգադը Ճարտար բնակավայրում ամբուլատոր-պոլիկլինիկական օգնություն է ցուցաբերվել 35 տեղացի բնակիչների, այդ թվում՝ մեկ երեխայի։ Ընդամենը ռուս զինվորական բժիշկները Լեռնային Ղարաբաղի 759 բնակիչների բժշկական օգնություն են ցուցաբերել, որոնցից 85-ը երեխաներ են։ Խաղաղապահ ուժերի ռուսական զորակազմի բոլոր գործողությունները կատարվում են կորոնավիրուսային վարակի տարածումը թույլ չտալու միջոցների պահպանմամբ: Ռուս խաղաղապահների անվտանգությունն ապահովելու եւ հնարավոր միջադեպերը կանխելու համար Ադրբեջանի եւ Հայաստանի զինված ուժերի գլխավոր շտաբների հետ շարունակական փոխգործակցություն է պահպանվում:

18:39 - 20 դեկտեմբերի, 2020

Ռուսները և թուրքերը շարունակում են կառուցել կենտրոնը, որտեղից հսկելու են Ղարաբաղում հրադադարի ռեժիմը |azatutyun.am|

azatutyun.am: Ռուսաստանը և Թուրքիան շարունակում են կառուցել մոնիտորինգային միացյալ կենտրոնը, որտեղից երկու երկրների զինվորականները պետք է հսկեն Լեռնային Ղարաբաղում նոյեմբերի 9-ի համաձայնությամբ հայտարարված հրադադարը պահպանումը: Անկարայից ստացված հաղորդագրության համաձայն, այդ մասին այսօր հայտնել է Թուրքիայի պաշտպանության նախարարությունը: «Ռուսաստանի և Թուրքիայի կնքած համաձայնագրով քայլեր են արվում հրադադարի մոնիտորինգի կենտրոնի աշխատանքը հնարավորինս արագ սկսելու համար, այդ գործողությունները համակարգվում են Ռուսաստանի և Ադրբեջանի հետ», - ասվում է հաղորդագրությունում:

17:49 - 20 դեկտեմբերի, 2020

Մարդասիրական օգնության հերթական խմբաքանակն արդեն Արցախում է․ ՌԴ ԱԻՆ |1lurer.am|

1lurer.am: Դեկտեմբերի 19-ին Արցախ է ժամանել հումանիտար օգնությամբ 7 երկաթուղային վագոն։ Այն ներառում է 300 խորանարդ մետր փայտանյութ և բեռնատար ամբարձիչով հարթակ, հաղորդում է ՌԴ արտակարգ իրավիճակների նախարարության մամուլի ծառայությունը։ Օգնությունն արդեն ուղարկվել է Ստեփանակերտ։ Սա մարդասիրական օգնության երկրորդ մասն է։ Այս պահին, ընդհանուր առմամբ, Արցախ է ժամանել է 54 վագոնից 9-ը։

13:02 - 20 դեկտեմբերի, 2020

Ռուստամ Մուրադովը հաստատեց, որ պաշտոնական Բաքուն ընդունում է հայկական կողմից գերեվարված թվով 62 քաղաքացու փաստը․ Նազելի Բաղդասարյան

Պաշտոնական Բաքուն ընդունել է հայկական կողմի 62 քաղաքացու գերեվարման փաստը: Այս մասին «Ֆեյսբուք»-ի իր էջում գրել է ՀՀ ԱԺ Շիրակի մարզը ներկայացնող պատգամավոր Նազելի Բաղդասարյանը։ Նա նշել է. «Քիչ առաջ ավարտվեց իմ և Սոֆյա Հովսեփյանի հանդիպումը Խծաբերդից գերեվարված զինծառայողների ծնողների, ռուս խաղաղապահ զորքերի հրամանատար Ռուստամ Մուրադովի հետ։ Հանդիպման ընթացքում գեներալի կողմից հաստատվեց, որ պաշտոնական Բաքուն ընդունում է հայկական կողմից գերեվարված թվով 62 քաղաքացու փաստը։ Սույն հանգամանքը կարևոր երաշխիք է մեր քաղաքացիների կյանքի և առողջության անվտանգության համար։ Գերեվարվածների անվանական ցուցակը՝ մեր և Արցախի նախագահի կողմից եւս փոխանցվել է խաղաղապահների հրամանատարությանը, ադրբեջանական կողմին տալու համար։ Այսօրվա հանդիպմանը հաստատվեց նաև, որ մեր գերեվարվածները գտնվում են Բաքվում։ Հաջորդ փուլում քննարկվելու են մեր քաղաքացիների անվտանգ վերադարձի ժամկետներն և պայմանները»։

12:30 - 20 դեկտեմբերի, 2020