Երևանի քաղաքապետարան

Երևանի քաղաքապետարանը համայնքային ծառայություններ իրականացնող պետական մարմին, որի նպատակն ու խնդիրն ավագանու և քաղաքապետի լիազորությունների լիարժեք և արդյունավետ իրականացման, ինչպես նաև քաղաքացիական իրավահարաբերություններին ավագանու և քաղաքապետի մասնակցության ապահովումն է։ Երևանի քաղաքապետը և ավագանին քաղաքապետարանի միջոցով համակարգում Երևանի ենթակայության հիմնարկների, առևտրային և ոչ առևտրային կազմակերպությունների գործունեությունը, կազմակերպում հանրապետական գործադիր մարմինների և դրանց՝ Երևանի տարածքային ծառայությունների հետ հարաբերությունները։

Քաղաքապետարանը ստեղծվում, վերակազմակերպվում և նրա գործունեությունը դադարեցվում է ավագանու որոշմամբ։ 

Այս օրերին 10 վարչական շրջանների 20 բազմաբնակարաններում վերելակները փոխարինվում են. Հ. Կարապետյան

Այս օրերին 10 վարչական շրջանների 20 բազմաբնակարաններում վերելակները փոխարինվում են. Հ. Կարապետյան

Արդեն գործնականում սկսել է երեւանյան վերելակների փոխարինման գործընթացը: Այս օրերին տասը վարչական շրջանների 20 բազմաբնակարաններում վերելակները փոխարինվում են: Այս մասին ֆեյսբուքի իր էջում գրել է Երեւանի քաղաքապետարանի մամուլի քարտուղար Հակոբ Կարապետյանը՝ շարունակելով. «Վերելակների տեխնիկական բնութագրերում ընդգծված է դրանց ներառականության սկզբունքը. վերելակները կահավորված են տեսողության խնդիրներով մարդկանց հարմար ընթեռնելի սեղմակներով, ձայնային ազդանշանային համակարգով, իսկ սեղմակների վահանակները տեղադրված են համապատասխան բարձրության վրա, որպեսզի սայլակով մարդիկ կարողանան օգտվել դրանցից: Երեւանի վերելակների 70 տոկոսը 40 տարեկան եւ ավելի հին է: Փոխարինման ենթակա շուրջ 3500 վերելակ կա: Ներկայումս քաղաքապետարանը փորձնական ծրագիր է իրականացնում: Հիմնական ֆոնդը փոխարինվելու է փոխառու միջոցներով»:
04:56 - 25 նոյեմբերի, 2019
Երևանի ավագանու՝ 2020-ի բյուջեի նախագիծը վերջին 5 տարիների կտրվածքով նախատեսում է ամենամեծ պակասուրդը՝ 9 մլրդ դրամ. Դավիթ Խաժակյան

Երևանի ավագանու՝ 2020-ի բյուջեի նախագիծը վերջին 5 տարիների կտրվածքով նախատեսում է ամենամեծ պակասուրդը՝ 9 մլրդ դրամ. Դավիթ Խաժակյան

Երևանի ավագանու «Լույս» խմբակցության ղեկավար Դավիթ Խաժակյանն իր ֆեյսբուքյան էջում գրառում է կատարել, որտեղ, մասնավորապես, նշում է, որ Երևանի քաղաքապետարանի նախագծած՝ 2020 թվականի բյուջեն հետադիմական և անարդյունավետ է: Գրառումն ամբողջությամբ ներկայացնում ենք ստորև. «Որպեսզի պատկերացնեք, թե ինչքան հետադիմական և անարդյունավետ բյուջե է նախագծել Երևանի քաղաքապետարանը 2020 թվականի համար ներկայացնում եմ երկու թիվ․ 1․ Ներկայացված նախագիծը վերջին 5 տարիների կտրվածքով նախատեսում է ամենամեծ դեֆիցիտը (պակասուրդը), որը կազմել է շուրջ 9 միլիարդ դրամ։ Թե հատկապես ինչու է սա վատ առաջիկայում մանրամասն կներկայացնեմ։ 2․ Աշխատավարձային ֆոնդը աննախադեպ ուռճացվել է՝ հասնելով սեփական եկամուտների շուրջ 40%-ին։ Սա նշանակում է, որ մենք մոտեցել ենք այն ցուցանիշին, երբ հավաքագրված գումարի գրեթե կեսը ծախսվում է ադմինիստրացիայի ծախսերի վրա, իսկ մյուս կեսը քաղաքի խնդիրների։ 40%-ը անընդունելի մեծ ցուցանիշ է։ Մնացածը հաջորդիվ»։  
06:48 - 16 նոյեմբերի, 2019
Երևանի 2020թ. բյուջեի ու զարգացման ծրագրի նախագծերը դրված են հանրային քննարկման

Երևանի 2020թ. բյուջեի ու զարգացման ծրագրի նախագծերը դրված են հանրային քննարկման

Հանրային քննարկման են ներկայացվել Երևանի զարգացման հնգամյա և 2020թ. ծրագրերի, բյուջեի և տեղական տուրքերի ու վճարների դրույքաչափերի, նաև արտոնությունների մասին ավագանու որոշման նախագծերը: Որոշումը միաձայն ընդունվել է Երևանի քաղաքապետին կից Երևանի քաղաքային համայնքի զարգացման հնգամյա ծրագրի և տարեկան բյուջեի կառավարման խորհրդի անդամների քվեարկությամբ: Հանդիպման ընթացքում նիստը վարող փոխքաղաքապետ Հայկ Սարգսյանը պատասխանել է խորհրդի անդամների հարցերին: Նրանք ներկայացրել են նաև իրենց դիտարկումներն ու հանդես եկել մի շարք առաջարկներով: Ծանոթանալ նախագծերին և դրանց վերաբերյալ իրենց առաջարկներն ու դիտողությունները քաղաքացիները կարող են ներկայացնել մինչև նոյեմբերի 26-ը՝ www.yerevan.am, www.e-draft.am կայքերով կամ ուղարկել նամակ՝ էլեկտրոնային փոստով ([email protected] , [email protected] , [email protected] ), ինչպես նաև գրավոր ներկայացնել քաղաքապետարան: Նոյեմբերի 27-ին՝ ժամը 11.00-ին Երևանի քաղաքապետարանում (Արգիշտիի փողոցի հ. 1 հասցե) տեղի կունենան հանրային բաց լսումներ: Մասնակցելու համար անհրաժեշտ է մինչև 2019թ. նոյեմբերի 25-ը ներառյալ ներկայացնել դիմում:
09:52 - 15 նոյեմբերի, 2019
Արվեստի ու երաժշտական դպրոցների, ինչպես նաեւ մարզադպրոցների աշխատողների աշխատավարձը կբարձրանա. Երեւանի բյուջե-2020

Արվեստի ու երաժշտական դպրոցների, ինչպես նաեւ մարզադպրոցների աշխատողների աշխատավարձը կբարձրանա. Երեւանի բյուջե-2020

Երևանի քաղաքապետի տեղակալներ Հայկ Սարգսյանը, Տիգրան Վիրաբյանն ու Սերգեյ Հարությունյանը մանրամասնում են քաղաքի 2020 թվականի բյուջեի նախագիծն ու ծրագրային հիմնական ուղղությունները: Այդ մասին տեղեկացնում է Երևանի քաղաքապետարանի պաշտոնական կայքէջը: Հաջորդ տարի բյուջեն զգալի աճ է գրանցելու. 2019թ. 83 մլրդ 200 միլիոնի մուտքերի փոխարեն նախատեսված է 107 մլրդ դրամի մուտք: Ընդ որում, նկատելիորեն աճում է քաղաքի սեփական եկամուտների կշիռը: 2020-ի ծախսային մասը կլինի 116 մլրդ դրամ` 2019-ի շուրջ 91 մլրդի փոխարեն:Խոշոր ծրագրերից է կանաչապատման նոր մոդելի ներդրումը: Այդ նպատակին բյուջեից նախատեսվում է հատկացնել 3,6 մլրդ դրամ: Հաջորդ տարի քաղաքապետարանը նախատեսում է ավելացնել միջոցները՝ լուծելու 4-րդ կարգի վթարային մի շարք շենքերի բնակիչների վերաբնակեցման խնդիրը: Բակերի բարեկարգման համար առաջարկվում է բյուջեից հատկացնել 1.5 մլրդ դրամ: 2020 թվականին նախատեսված է բարձրացնել արվեստի ու երաժշտական դպրոցների, նաև մարզադպրոցների աշխատակիցների աշխատավարձը: Միջոցներ են հատկացվելու նաև մանկապարտեզներում ավելի շատ երեխաներ ընդունելու հնարավորություն ստեղծելու համար: Առողջապահության ոլորտում քաղաքապետարանը մի քանի խոշոր ծրագիր ունի: Պոլիկլինիկաները կվերանորոգվեն և կհամալրվեն ուլտրաձայնային, ակնաբուժական հետազոտությունների համար անհրաժշտ սարքավոումներով:Բյուջեի նախագիծը կներկայացվի հանրային քննարկման, իսկ արդեն դեկտեմբերին՝ ավագանու խմբակցությունների քննարկմանը:
04:50 - 12 նոյեմբերի, 2019
Ասֆալտապատման ծավալները  կավելանան. միայն 696 մլն դրամի մայթեր ենք կառուցելու. Երևանի քաղաքապետի տեղակալ Հայկ Սարգսյան |news.am|

Ասֆալտապատման ծավալները կավելանան. միայն 696 մլն դրամի մայթեր ենք կառուցելու. Երևանի քաղաքապետի տեղակալ Հայկ Սարգսյան |news.am|

news.am: 2020 թվականի Երեւանի բյուջեն այս տարվա բյուջեի նկատմամբ առանձնակի մեծ աճով է առանձնանում: Այս մասին քաղաքապետարանի ֆեյսբուքյան էջի տեսանյութում նշել է Երեւանի քաղաքապետի տեղակալ Հայկ Սարգսյանը: Նրա խոսքով, 2019-ի 83 մլրդ 200 մլն դրամի մուտքերի փոխարեն 2020-ին պլանավորել են 107 մլրդ դրամի մուտք: «Սեփական եկամուտների կշիռը ընդհանուր համայնքի մուտքերում գնալով աճում է, ինչը բավական մեծ մակրոտնտեսական ցուցանիշ է: Մեր ծախսերը հաջորդ տարի կկազմեն շուրջ 116 մլրդ դրամ, որը 2019-ի համեմատ 25 մլրդ դրամով ավելի է»,-ասել է փոխքաղաքապետը: Անդրադառնալով ծրագրերին, նա ընդգծել է, որ կան մի քանի խոշոր ծրագրեր, որոնցից է կանաչապատման նոր մոդելի ներդրումը, որի ֆինանսավորումը կլինի 3,6 մլրդ դրամ. «Բավական մեծ տարածքների զրոյից ոռոգման ցանցեր կկառուցվեն: Պլանավորում ենք նաեւ մեկնարկել բավական լայնածավալ սոցիալական բնակարանաշինության ծրագիր՝ վթարայինների վերաբնակեցման միջոցով: Բակերի բարեկարգում հոդվածով 1,5 մլրդ դրամ ենք նախատեսել: Ասֆալտապատման ծավալները եւս կավելանան. միայն 696 մլն դրամի մայթեր ենք կառուցելու»,-ասաց նա՝ հավելելով, որ հիմնական ծախսային ուղղություններից է հաշմանդամություն ունեցող անձանց համար քաղաքն ավելի մատչելի դարձնելու ուղղությունը: Փոխքաղաքապետը խոսել է նաեւ մետրոպոլիտենի վերազինման մասին, նշելով, որ 20 տարի անց այն կվերազինվի նոր շարժասանդուղքով, նոր շարժակազմերով եւ վերանորոգված, անվտանգ տեխնիկական միջոցներով:
12:10 - 11 նոյեմբերի, 2019
Երևանի գլխավոր ճարտարապետ Արթուր Մեսչյանը հանդիպել է Ֆուչիկի 1/3 նորակառույց շենքի բնակիչների հետ

Երևանի գլխավոր ճարտարապետ Արթուր Մեսչյանը հանդիպել է Ֆուչիկի 1/3 նորակառույց շենքի բնակիչների հետ

Երևանի գլխավոր ճարտարապետ Արթուր Մեսչյանը հանդիպել է Ֆուչիկի 1/3 նորակառույց շենքի բնակիչների հետ, որոնք դժգոհ են հարևանությամբ բազմաֆունկցիոնալ բնակարանային համալիրի կառուցման հեռանկարից: Հանդիպմանը ներկա էին նաև ՀՀ քաղաքաշինության կոմիտեի նախագահ Վահագն Վերմիշյանը, ինչպես նաև կառուցապատող ընկերության ներկայացուցիչներ: 2019թ. մարտ ամսին Երևանի քաղաքապետարանը Ֆուչիկի 1/1 և 1/2 հասցեների համար տրամադրել է նախագծման թույտվություն, որի հիման վրա մշակվել է նախագիծ: Կառույցը գնահատվել է բարձր ռիսկայնության օբյեկտ, հետևաբար սահմանված կարգով այն ենթարկվել է նաև պետական համալիր փորձաքննության: Մինչ այդ կառուցապատողն այս տարվա հոկտեմբերին ստացել է միայն հիմքերի կառուցման շինթույլտվություն: Նոր կառուցվող բազմաբնակարան շենքի հարևանությամբ ապրող բնակիչները նշում են, որ նախագիծը մի շարք խախտումներ ունի՝ կառուցապատման խտության և հարևան շենքի լուսավորության տեսանկյունից։ Նախագիծը ինսոլացիոն՝ արևահարման ռեժիմի հաշվարկման է ենթարկվել կառուցապատողի հարևանությամբ՝ Ֆուչիկի 1/3 նորակառույց շենքում ապրող բնակիչների կողմից: Երկու հաշվարկների արդյունքները տարբերվում են իրարից: Լսելով բնակիչների ու կառուցապատող ընկերության ներկայացուցիչների դիտարկումները՝ Արթուր Մեսչյանն առաջարկեց պատվիրել անկախ փորձաքննություն և իրականացնել նոր ինսոլացիոն ռեժիմի հաշվարկ: «Եթե անկախ մասնագետի կողմից արված ինսոլացիոն հաշվարկով պարզվի, որ իսկապես կա խնդիր, ապա մի քանի հարկ կառուցապատողը պետք է զիջի, և մենք հարկայնությունը կիջեցնենք՝ պահպանելով ճարտարապետական տեսքը: Եթե ինսոլացիոն հաշվարկը և այդ տարածքի ծրագրային շարունակությունը, որը նախատեսված է ողջ թաղամասի զարգացման համար, ինձ համոզի, որ մենք խնդիր չունենք, ես այս նախագծին ընթացք եմ տալու: Բոլորս պետք է խաղանք այնպիսի խաղի կանոններով, որ բոլորը շահեն»,- նշել է Երևանի գլխավոր ճարտարապետը: Երևանի գլխավոր ճարտարապետը կառուցապատողին ներկայացրեց երկու հստակ պահանջ. նախ՝ նոր կառուցվող բազմաբնակարան շենքի հարևանությամբ շուրջ 3000 քմ տարածքի վրա ձևավորվող հանգստի գոտին պարտադիր պետք է հասանելի լինի նաև Ֆուչիկի 1/3 շենքում ապրող բնակիչներին, և երկրորդ՝ կառուցապատողը պարտավորվեց նորակառույց համալիրի տարածքում ստեղծել նաև մանկապարտեզ, ինչը ոչ միայն հարմար կլինի շենքի բնակիչների համար, այլև իր հերթին կթեթևացնի Երևանի մանկապարտեզներում առկա հերթերի խնդիրը:
13:25 - 30 հոկտեմբերի, 2019
Երեւանում մի քանի գետնանցումներ կսկսեն վերանորոգել արդեն հաջորդ տարի. Երևանի փոխքաղաքապետ |news.am|

Երեւանում մի քանի գետնանցումներ կսկսեն վերանորոգել արդեն հաջորդ տարի. Երևանի փոխքաղաքապետ |news.am|

news.am։ Երեւանում մի քանի գետնանցումներ կսկսեն կապիտալ վերանորոգել արդեն հաջորդ տարի: Հոկտեմբերի 29-ին ԱԺ մշտական հանձնաժողովների համատեղ նիստում 2020 թվականի պետական բյուջեի նախնական քննարկման ժամանակ այս մասին ասաց Երեւանի փոխքաղաքապետ Հայկ Սարգսյանը՝ պատասխանելով «Բարգավաճ Հայաստան» կուսակցության պատգամավոր Սերգեյ Բագրատյանի հարցին: Քաղաքային իշխանություններին պատգամավորը մեղադրեց, որ Երեւանում որոշ գետնանցումներ անբավարար վիճակում են, իսկ որոշ անցումներում անգամ լուսավորություն չկա: Սրան փոխքաղաքապետը պատասխանեց, որ առանձնապես վատ վիճակում է Մաշտոցի պողոտայի սկզբնամասի գետնանցումը, Գրիգոր Լուսավորիչ եւ Պարոնյան փողոցների խաչմերուկում: «Այստեղ խոնավություն է կուտակվում, այն առաստաղից է կաթում: Ուստի կապիտալ վերանորոգում է անհրաժեշտ: Առանց դրա, ամեն ինչ կրկին կխոնավանա: Այս պատճառով էլ ոչ ոք չի համաձայնվում այստեղ խանութներ բացել»,- պարզաբանեց Սարգսյանը: Նրա խոսքով՝ դրա հետ մեկտեղ, հիմա քաղաքապետարանը անցումներում ժամանակավոր լուսավորություն է անցկացնում, որ այնտեղ գոնե մութ չլինի: Իսկ կապիտալ վերանորոգման համար հաջորդ տարի կապալառուի մրցույթ կանցկացվի, որն էլ կզբաղվի այդ գետնանցումի վերականգնմամբ, նշեց փոխքաղաքապետը:
14:01 - 29 հոկտեմբերի, 2019
Մայրաքաղաքի բակերում խաղահրապարակները պատվում են ռետինե գորգերով

Մայրաքաղաքի բակերում խաղահրապարակները պատվում են ռետինե գորգերով

Անվտանգ խաղահրապարակներ` փոքրիկների համար. Երևանի քաղաքապետարանի ծրագրով քաղաքի բակերում խաղահրապարակները պատվում են ռետինե գորգերով: «2800քմ ծավալ ենք դրել մրցույթի 12 վարչական շրջաններում: Յուրաքանչյուր շրջանում 2-3 բակ է նախատեսած»,- նշում է Երևանի քաղաքապետարանի շինարարության և բարեկարգման վարչության պետ Գրիգոր Հարությունյանը: Աշխարհում ընդունված այս մոտեցումը, առայժմ փորձնական ծրագրով կիրառվում է նաև Երևանում: Ավազի կամ ասֆալտի փոխարեն երևանյան խաղահրապարակներում արդեն տեղադրվել են ռետինե փափուկ հատակներ: «Անվտանգ, կայուն նյութ է, փափուկ և երեխաների համար բնապահպանապես մաքուր»,- ասում է Գրիգոր Հարությունյանը: Երևանի քաղաքապետարանի շինարարության և բարեկարգման վարչության պետի խոսքով՝ 2020թ. ծրագրի ծավալը կմեծանա. «Հաջորդ տարվա համար արդեն բյուջեն նախատեսել ենք կրկնակի՝ 100 մլն դրամի չափով ենք իրականացնելու: Հավաստագրում գրված է, որ այս հատակների երաշխիքը 7-10 տարի է»: Փորձնական ծրագրում այս տարի ընդհանուր առմամբ ներառված է 23 բակային տարածք: Բարեկարգման ծրագրերին զուգահեռ՝ երևանյան բակերը նաև ամենօրյա խնամքի կարիք ունեն: Յուրաքանչյուր տարի համայնքային բյուջեն այդ նպատակով միջոցներ է հատկացնում վարչական շրջաններին:
13:51 - 28 հոկտեմբերի, 2019
Ապամոնտաժվել են կենտրոնի մի շարք ապօրինի կրպակներ ու տաղավարներ

Ապամոնտաժվել են կենտրոնի մի շարք ապօրինի կրպակներ ու տաղավարներ

Երևանի կենտրոնում ապամոնտաժվել է 7 ապօրինի կրպակ ու տաղավար: Մայրաքաղաքի ճարտարապետական տեսքը պահպանելու, ընդհանուր օգտագործման տարածքները բարելավելու, ինչպես նաև կենտրոնի մայթերի ծանրաբեռնվածությունը նվազեցնելու ու բացօթյա առևտուրը կանոնակարգելու նպատակով ապամոնտաժվել են մասնավորապես Մանկավարժական համալսարանի և Կոնսերվատորիայի հարևանությամբ, չգործող ու հակասանիտարական վիճակում գտնվող ծաղկի տաղավարները: Բացի դրանից, հետևելով քաղաքապետարանի և Կենտրոն վարչական շրջանի համապատասխան ստորաբաժանումների աշխատակիցների հորդորներին, տնտեսվարողները սեփական ուժերով ապամոնտաժել են Խանջյան փողոցի 13, Խորենացի 26, Մաշտոցի պողոտայի 3 հասցեների դիմաց տեղադրված տաղավարները։ Ապամոնտաժվել են նաև ծառերի վրայով անցկացված էլեկտրական հոսանքալարերը, որոնք ստեղծել էին հրդեհավտանգ իրավիճակ: Տարածքներն ամբողջությամբ մաքրվել են, ըստ անհրաժեշտության նաև կբարեկարգվեն:
16:07 - 23 հոկտեմբերի, 2019
Երևանի գերեզմանատներում հողհատկացումն անվճար է |lragir.am|

Երևանի գերեզմանատներում հողհատկացումն անվճար է |lragir.am|

 lragir.am։ Մայրաքաղաքում 21 գերեզմանատուն կա: Դրանցում տարածքների հատկացման և ոլորտին առնչվող մյուս գործառույթներով զբաղվում է Երևանի քաղաքապետարանի «Բնակչության հատուկ սպասարկում» ՀՈԱԿ-ը: Դաշտը կանոնակարգելու նպատակով համայնքային կառույցը տարեսկզբից մի շարք ծրագրեր է նախաձեռնել: Գերեզմանատների սահմաններից դուրս կատարված հուղարկավորություններ, բանկում գրավադրված տարածք, շեղումներ՝ օրենքով նախատեսված գերեզմանատեղերի սահմանաչափերից: Տարիներ շարունակ քաղաքացիները բախվել են տարբեր խնդիրների: Ոլորտն առանձնահատուկ է և կարգավորման անհրաժեշտություն ունի: «Երևանի քաղաքապետարանի վերահսկողության վարչության հավաքած փաստերի հիման վրա վարչական վարույթներ և գործեր են բացվել, որոնք այժմ ընթացքի մեջ են: Հանգուցալուծումից հետո կարող ենք հստակ պատկեր ունենալ տեղի ունեցածի վերաբերյալ», – նշում է Երևանի քաղաքապետարանի «Բնակչության հատուկ սպասարկում» ՀՈԱԿ-ի տնօրեն Արման Իսկանդարյանը: Երևանում գերեզմանատները զբաղեցնում են շուրջ 540 հա տարածք: Այսօր դրանք տրամադրվում են բացառապես օրենքով սահմանված չափորոշիչներով: «Քաղաքացին գերեզմանատան վարիչի հետ ընտրում է տարածքը, որը տրամադրվում է բացարձակապես անվճար»,- ասում է Արման Իսկանդարյանը: Չնայած նրան, որ 21 գերեզմանատներն ունեն իրենց հստակ սահմանված տարածքները, այսօր էլ կան դեպքեր, երբ քաղաքացիները հուղարկավորություն են կազմակերպում դրանց հարակից հատվածներում, ինչն օրենքով արգելված է: « «Հուղարկավորությունների կազմակերպման և գերեզմանատների ու դիակիզարանների շահագործման մասին» ՀՀ օրենքի համաձայն գերեզմանատները հատուկ պաշտպանվող հուշարձանային տարածքներ են, որոնք ենթակա չեն քանդման: Բայց սեփականաշնորհված տարածքների համար պետությունը պատասխանատվություն չի կրում և մենք չգիտենք կոնկրետ անձն իր հողակտորն ինչպես կարող է տնօրինել: Դավթաշենի գերեզմանատանն, օրինակ, 1 հա ավելի տարածք կա, որը բանկում գրավադրված է, որտեղ, ի դեպ, առկա են գերեզմանատեղեր»,-ընդգծում է Իսկանդարյանը: Տասնամյակների կուտակված խնդիրներին հետզհետե լուծումներ տալու նպատակով ընկերությունն ընդլայնել է նաև վճարովի ծառայությունների ցանկը: Հավաքագրված միջոցները կուղղվեն գերեզմանատների տարածքների բարեկարգմանն ու ցանկապատմանը: «Կատարում ենք բետոնապատման աշխատանքներ, մեքենայի և անձրևանոցների տրամադրում, շուտով կիրականացնենք նաև գերեզմանաշինարարության աշխատանքներ, քարի արտադրություն»,- ասում է Արման Իսկանդարյանը: Քաղաքացիների համար ընկերության աշխատանքն առավել թափանցիկ, գործընթացն էլ առավել հասանելի դարձնելու նպատակով մտադրություն կա սպասարկումն իրականացնել մեկ պատուհանի սկզբունքով: Օրերս Երևանի քաղաքապետ Հայկ Մարությանին ներկայացվեց համայնքային կառույցի տվյալների թվայնացման առաջարկվող տարբերակը: Մասնավոր հատվածի կողմից ներկայացված նախագիծը ենթադրում է առցանց հարթակի և հավելվածի ստեղծում: «Թվային տարբերակի ներդրումից հետո քաղաքացին տնից մուտք անելով կարող է տեսնել, թե որտեղ է առկա ազատ հողատարածք: Յուրաքանչյուր գերեզմանատեղիի վրա կլինի QR կոդ, որով հարազատները, նաև մենք հնարավորություն կունենանք իմանալու, թե կոնկրետ ովքե՞ր են հուղարկավորված և կիմանանք, թե այդ տեղի ստանձնող անձը ով է»,- նշում է Իսկանդարյանը: Աջափնյակ վարչական շրջանում տարածք է հատկացվել համայնքային նոր գերեզմանատան համար: Միասնական մոտեցում ցուցաբերելու նպատակով քաղաքապետարանը նախատեսում է հանդես գալ օրենսդրական փոփոխությունների առաջարկությամբ:
10:45 - 14 հոկտեմբերի, 2019
45 մլն 840 հազ. դրամ՝ տոնական բրենդավորում, 128 մլն 638 հազ. դրամ՝ միջոցառումներ. որքա՞ն գումար է ծախսվել «Էրեբունի-Երևան» տոնակատարության համար |aysor.am|

45 մլն 840 հազ. դրամ՝ տոնական բրենդավորում, 128 մլն 638 հազ. դրամ՝ միջոցառումներ. որքա՞ն գումար է ծախսվել «Էրեբունի-Երևան» տոնակատարության համար |aysor.am|

aysor.am։ «Երեբունի-Երևան 2801» միջոցառման համար հատկացված 190 միլիոն դրամի բյուջեից 45 միլիոն 840 հազար դրամը տրամադրվել է տոնական բրենդավորմանը (լոգոտիպ, պաստառներ, տեսահոլովակ, ձայնագրություն, վարչական շրջանների համար նախատեսված շապիկներ, գրիչներ և այլն), 128 միլիոն 638 հազար դրամ էլ տրամադրվել է 13 միջոցառումների համար (12 վարչական շրջաններում, և 1 պաշտոնական միջոցառում), այս մասին այսօր հրավիրած ասուլիսի ընթացքում ասաց Երևանի քաղաքապետի տեղակալ Տիգրան Վիրաբյանը: «Նախորդ տարի Հայկ Մարությանի բանակցությունների ու բազմաթիվ քննարկումների արդյունքում ի սկզբանե 1 միլիարդից ավելի նախատեսված գումարից «Էրեբունի-Երևան 2800»-ին հատկացված բյուջեն դարձվեց 813 միլիոն 525 հազար դրամ: Սակայն ծախսվեց 507 միլիոն 602 հազար դրամը: Այս տարի այդ թիվն առավել նվազեցրինք՝ արդյունքում ունենալով միջոցառումներ ոչ թե միայն Փոքր Կենտրոնում, այլև՝ ամբողջ Երևանում», - նշեց նա: Բոլոր վարչական շրջանների համար գրեթե նույն ֆինանսական միջոցներն են տրամադրվել: Մրցույթին մասնակցած, սակայն թղթաբանական ու որակական բացթողումներ արած մի շարք կազմակերպությունների արգելվել է միջոցառումը կազմակերպել, մի քանիսն էլ (այդ թվում՝ ճանաչված կազմակերպություններ) հայտնվել են «սև ցուցակում», որոնք 2 տարի հնարավորություն չեն ունենա մասնակցելու Երևան քաղաքի միջոցառումների համար կազմակերպվող մրցույթներին։
09:59 - 10 հոկտեմբերի, 2019