ԿԳՄՍՆ

ՀՀ կրթության, գիտության, մշակույթի եւ սպորտի նախարարությունը գործադիր իշխանության հանրապետական մարմին է, որը մշակում եւ իրականացնում է կրթության, գիտության, մշակույթի եւ սպորտի բնագավառներում ՀՀ կառավարության քաղաքականությունը:

Նախարարն է Վահրամ Դումանյանը։

ՀՀ ԿԳՄՍ նախարարությունը նախատեսում է Պետական կամերային երաժշտական թատրոնը միավորել Պարոնյանի թատրոնին |armenpress.am|

armenpress.am: ՀՀ կրթության, գիտության, մշակույթի և սպորտի նախարարությունը մշակում է նախագիծ, ըստ որի նախատեսվում է Պետական կամերային երաժշտական թատրոնը միավորել Հ. Պարոնյանի անվան երաժշտական կոմեդիայի պետական թատրոնին: ՀՀ ԿԳՄՍ նախարարի տեղակալ Արա Խզմալյանը վստահեցնում է, որ դա արվում է Պետական կամերային երաժշտական թատրոնի ստեղծագործական կազմի աշխատանքի համար առավել բարենպաստ պայմաններ, միջավայր ստեղծելու և այլ ստեղծագործական կոլեկտիվներին աջակցելու նպատակով: Խզմալյանը հիշեցրեց՝ երբ նոր էր ստանձնել փոխնախարարի պարտականությունները, խոստացել է, որ որևէ հարց գաղտնի չի լուծվելու կամ կարգավորվելու, և որևէ հարց իր սենյակի պատերի ներսում չի որոշվելու, այսինքն՝ մինչև ՀՀ կառավարության այս կամ այն հարցի շուրջ որոշում կայացնելը ոլորտի ներկայացուցիչները տեղեկացված են լինելու այդ մասին: «Հենց այդ սկզբունքով առաջնորդվելով՝ վերջերս նախարարություն հրավիրեցի մասնագետների, երկու թատրոնների տնօրեններին և խնդրեցի՝ նրանք կոլեկտիվներին փոխանցեն՝ կա դիրքորոշում այն մասին, որ Կամերային երաժշտական թատրոնի ստեղծագործական անձնակազմը պետք է միանա Պարոնյանի թատրոնի ստեղծագործական անձնակազմին երկու հիմնական պատճառով: Առաջինը մասնագիտական է: Չունենալով պրոֆեսիոնալ նվագախումբ, երգչախումբ, չեմ խոսում պարային խմբի մասին՝ խոսել երաժշտական թատրոնի մասին առնվազն անլուրջ է, իսկ Պարոնյանի թատրոնն ունի այդ ամենը: Պետական կամերային երաժշտական թատրոնն իր կանոնադրական խնդիրները շատ ավելի լիարժեք կիրականացնի Պարոնյանի թատրոնի բազայի հիման վրա»,-շեշտեց Խզմալյանը: Ըստ փոխնախարարի՝ այդպես իրականում շատ ավելի լավ պայմաններ են ստեղծվում Երաժշտական թատրոնի կոլեկտիվի համար, որովհետև, եթե կան երգող, պարող դերասաններ, Պարոնյանի թատրոնի բեմից սկսած և մնացած ենթակառուցվածքներով ու մասնագիտական ռեսուրսով ավարտված՝ տասնապատիկ ավելի լավ պայմաններում են հայտնվելու: Անդրադառնալով հաջորդ պատճառին՝ Արա Խզմալյանը հիշեցրեց, որ Հայաստանում կան պետական կարգավիճակ ունեցող բազմաթիվ ստեղծագործական խմբեր, որոնք բառացիորեն փողոցում են, դեգերում են մի տեղից մյուսը: «Կարող եք գնալ և տեսնել, թե «Բարեկամություն» Հայաստանի պարարվեստի պետական համույթն ինչ պայմաններում է աշխատում: Փորձերն անցկացնում են Ֆիլհարմոնիկի նկուղներում, կամ Հայաստանի պարի պետական անսամբլը: Այդպես թվարկելով՝ կարող ենք առաջ գնալ և այս ամենի գագաթը Հայաստանի պետական սիմֆոնիկ նվագախմբի բացարձակ փողոցում լինելու հանգամանքն է: Ամեն օր ես զբաղվում եմ Սիմֆոնիկ նվագախմբի փորձերի խնդիրը կարգավորելով. խնդրում եմ Ֆիլհարմոնիկ նվագախմբին, օպերային թատրոնին, կոնսերվատորիային, որ այսօր մեր ամենաստեղծարար, ակտիվ գործող, պետական կարգավիճակ ունեցող Սիմֆոնիկ նվագախումբը կարողանա իր փորձերի շարունակականությունն ապահովել: Գիտեք, թե ինչ տնտեսական վիճակ է. պետությունն առաջիկա տարիներին չի ունենալու այնքան ռեսուրս, որ կարողանա նոր համերգասրահ կառուցել և հոգալ Սիմֆոնիկ նվագախմբի խնդիրը, լուծել պարային համույթների հարցը և այլն: Թաթուլ Ալթունյանի անվան Հայաստանի երգի-պարի պետական վաստակավոր անսամբլը ևս իր տարածքը չունի ու վարձակալում է: Մենք պետք է գնանք եղած ռեսուրսների օպտիմալ և ամենաարդյունավետ օգտագործման ճանապարհով»,-ընդգծեց նա: Խզմալյանը ոչ մի ողբերգություն չի տեսնում, երբ մի ստեղծագործական կազմը միանում է մեկ այլ ստեղծագործական կազմի: «21-րդ դարում խոսել այն մասին, որ թատրոնը մեր տունն է, տաճար է, սրբավայր է և այլն, ծիծաղելի է: Սրանք անախրոնիկ դատողություններ են, որովհետև յուրաքանչյուր դերասան պետք է հասկանա, որ ինքը ծառայություններ է մատուցում պետությանը և աշխատավարձ է ստանում դրա համար: Կարծում եմ՝ հին, 19-րդ դարի տերմինաբանությամբ այլևս պետք չէ խոսել թատրոնի մասին: Մենք պետք է կարողանանք տրամաբանված կարգավորել հարցը, որ Սիմֆոնիկ նվագախումբը կարողանա շարունակել իր ամենօրյա փորձերը, տաղանդավոր մարդիկ չմնան դրսում, այսինքն՝ մենք կրճատման ու բյուջեի հարց չենք լուծում, հակառակը՝ ավելի լավ պայմաններ ենք ստեղծում պրոֆեսիոնալ գործունեության համար և գնալու ենք այդ քայլին՝ անկախ այդ խմբերի արձագանքներից ու քմահաճույքից, որովհետև վստահ եմ, որ սա չի վնասում, այլ օգուտ է բերում ստեղծագործական խմբին»,-հավաստիացրեց փոխնախարարը: Շարունակությունը՝ armenpress.am-ում

09:49 - 09 հուլիսի, 2021

Դիլիջանում տրվել է հանրակրթության պետական չափորոշչի և առարկայական նոր չափորոշիչների փորձարկման վերապատրաստումների մեկնարկը

Տավուշի մարզի Դիլիջան քաղաքում ազդարարվել է հանրակրթության պետական չափորոշչի և առարկայական նոր չափորոշիչների փորձարկման նպատակով վերապատրաստումների մեկնարկը: Այս մասին հայտնեցին ՀՀ ԿԳՄՍ նախարարությունից: Մարզի պետական հանրակրթական դպրոցների տնօրենների և փոխտնօրենների ու գործընկեր կառույցների մասնակցությամբ հրավիրված աշխատաժողովի ժամանակ ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանը հայտարարել է, որ սեպտեմբերի 1-ից Տավուշի մարզի բոլոր պետական հանրակրթական դպրոցների 2-րդ, 5-րդ, 7-րդ և 10-րդ դասարաններում ուսումնական գործընթացը կազմակերպվելու է նոր չափորոշիչներով: Փորձարկումը կիրականացվի բոլոր բաղադրիչներով` գնահատման նոր համակարգից սկսած մինչև նոր բովանդակությամբ ուսումնական նյութեր: Չափորոշիչների փորձարկումից առաջ՝ մինչև ուսումնական տարվա մեկնարկը, Տավուշի մարզի բոլոր դպրոցների տնօրենները, փոխտնօրեններն ու առարկայական ուսուցիչները կվերապատրաստվեն ԵՄ հանուն նորարարության դրամաշնորհային ծրագրի շրջանակում: ԲՏՃՄ առարկայական բնագավառի ուսուցիչների վերապատրաստումները կիրականացնի «ԱՅԲ» հիմնադրամը, հումանիտար-հասարակական բնագավառի ուսուցիչներինը` ԿԶՆԱԿ-ը: Բնագիտամաթեմատիկական և ճարտարագիտության բնագավառի ուսուցիչների վերապատրաստումը մեկնարկել է հուլիսի 7-ից, հումանիտար-հասարակական բնագավառինը կմեկնարկի հուլիսի 23-ից: Փորձարկվող դպրոցներում կբացվեն նոր լաբորատորիաներ Համաժողովի մասնակիցներին ուղղված խոսքում Ժաննա Անդրեասյանը նշել է, որ 2021 թվականի փետրվարին ՀՀ կառավարության որոշմամբ հաստատվել է Հանրակրթության պետական չափորոշիչը, այնուհետև ԿԳՄՍ նախարարի հրամաններով հաստատվել են առարկայական բոլոր չափորոշիչները: Հանրակրթության նոր չափորոշիչն ամբողջությամբ ուժի մեջ կմտնի 2023 թվականի սեպտեմբերից, իսկ մինչ այդ պետք է փորձարկվի այդ նպատակով ընտրված Տավուշի մարզում: «Հաշվի առնելով փորձարկման արդյունքները՝ չափորոշիչների մշակումը կստանա վերջնական տեսք, և կքննարկվի դրանց ամբողջական ներդրումը ՀՀ բոլոր պետական դպրոցներում»,- նշել է փոխնախարարը: Նրա խոսքով` չափորոշչի փորձարկման համար պահանջվում է անհրաժեշտ ենթակառուցվածքների ապահովում: «Բնագիտական առարկաների համար բոլոր դպրոցներում կստեղծվեն լաբորատոր ենթակառուցվածքներ, դպրոցները կստանան համակարգչային սարքավորումներ: Չափորոշչի ներդրումը կիրականացվի լաբորատորիաների ստեղծմանը զուգահեռ, որպեսզի ծրագրային փոփոխություններն արդյունավետ լինեն: Իրականացնելով գործողությունների այս ողջ համախումբը` փորձարկման ընթացքում պետք է հասկանանք, թե նոր չափորոշիչն ինչ խնդիրներ ունի, ինչպիսի լրամշակումներ են անհրաժեշտ: Այս աշխատանքը պահանջում է ջանքերի համատեղում և փոխադարձ վստահություն: Մենք վստահում ենք ուսուցչին ու դպրոցին և ակնկալում ենք, որ այդ վստահությունը փոխադարձ է»,- նշել է Ժաննա Անդրեասյանը` ավելացնելով, որ Տավուշի մարզի դպրոցները լինելու են հանրակրթության բովանդակային բարեփոխման առաջամարտիկը: Նոր չափորոշչի նորությունները ԿԳՄՍ նախարարի տեղակալը հակիրճ ներկայացրել է նաև նոր չափորոշիչներով առաջարկվող փոփոխությունները: Մեծ տեղ է տրվում խմբակներին, մասնավորապես առողջ ապրելակերպի խմբակը պարտադիր կլինի բոլոր դպրոցների համար: «Նախնական զինվորական պատրաստություն» առարկայի ուսուցումը համալրվել է պարտադիր գործնական բաղադրիչով` մարզառազմական ճամբարով, որն ավագ դպրոցի սովորողների համար կլինի պարտադիր: Որպես նոր պարտադիր խմբակ` բոլոր դպրոցներում կգործեն նաև մասնագիտական կողմնորոշման ակումբները: Նոր չափորոշիչներում կարևորվել է նաև համընդհանուր ներառման բաղադրիչը: Մինչև 5-րդ դասարանի երկրորդ կիսամյակը միավորային գնահատում չի լինելու, փոխարենը սովորողների գնահատումը կիրականացվի բնութագրիչներով, որը ենթադրում է գիտելիքի մակարդակի որակական սահմանում: Բացի դրանից` չեղարկվում է անբավարար գնահատականի շեմը: 7-րդ դասարանից սկսած ներդրվում է նախագծային ուսուցումը, որը նոր մոտեցում է և նախկինում չի եղել. դա աշակերտի կողմից հետազոտական աշխատանքի իրականացումն է: Նույն դասարանում «Հասարակագիտություն» առարկան ներառում է ֆինանսական գրագիտության, ձեռներեցության և հակակոռուպցիոն կրթություն: Մեծ շեշտադրում է արված բնագիտական ուղղվածությանը` կարևորելով փորձարարական ուսուցումը. այսինքն` աշակերտները պետք է տեսնեն այդ առարկաների կապն իրենց կյանքի ու շրջակա միջավայրի հետ: Մեծ ուշադրություն է դարձվում «Արվեստ և արհեստ» առարկայական բնագավառին, որը շարունակվում է հանրակրթության բոլոր աստիճաններում: Եթե նախկինում արվեստի ուսուցումը 7-8-րդ դասարաններում ավարտվում էր, ապա նոր չափորոշչով արվեստը մինչև 12-րդ դասարան կլինի կայուն բաղադրիչ: Այդ համատեքստում կուսուցանվի «Արվեստ» ինտեգրված առարկան: Մեծ կարևորություն է տրվում հայագիտական ուղղությանը, որի շրջանակում 5-6-րդ դասարաններում աշակերտներն անցնելու են «Իմ հայրենիք» նոր առարկան, որն այս տարի կփորձարկվի 5-րդ դասարանում: Այս առարկայի առաջնային խնդիրը հայրենաճանաչությունն է, որը սկսվում է սովորողի համայնքի պատմամշակութային ժառանգության ճանաչողությունից և փոխկապակցվում է հայրենագիտական արշավների հետ: Նախկին «Ինֆորմատիկա» առարկայի փոխարեն՝ 2-րդ դասարանից սկսած աշակերտներն անցնելու են «Թվային գրագիտություն և համակարգչային գիտություններ» առարկան: Ավագ դպրոցում կներդրվի «Բնագիտություն» ինտեգրված առարկան` նախատեսված ոչ բնագիտական հոսքերի սովորողների համար: Առնվազն երկու օտար լեզվի ուսուցումը պարտադիր է` համաեվրոպական շրջանակի B2 մակարդակի իմացություն ապահովելու պահանջով: Միաժամանակ խրախուսվում է տարածաշրջանային լեզուների ուսուցումը: Նշենք, որ Դիլիջանում տեղի ունեցած հանդիպման ժամանակ ԿԶՆԱԿ-ի տնօրեն Արտաշես Թորոսյանը և «ԱՅԲ» հիմնադրամի գործադիր տնօրեն Սոնա Կոշեցյանը ներկայացրել են վերապատրաստման աշխատանքների գրաֆիկն ու աշխատանքային ընթացակարգերը: Դպրոցների ներկայացուցիչները բարձրացրել են մի շարք հարցեր` նոր չափորոշչի ներդրման և վերապատրաստման աշխատանքների հետ կապված: Դպրոցներից մեկի տնօրենի՝ արձակուրդի շրջանում վերապատրաստումների կազմակերպման վերաբերյալ հարցին ի պատասխան` ՀՀ ԿԳՄՍՆ հանրակրթության վարչության պետ Արսեն Բաղդասարյանը նշել է, որ հարցը կկարգավորվի ՀՀ աշխատանքային օրենսգրքի շրջանակում: Քննարկմանը հեռավար միացել են նաև Տավուշի մարզի բոլոր դպրոցների փորձարկվող դասարաններում դասավանդող ուսուցիչները:

14:27 - 07 հուլիսի, 2021