Երևանի քաղաքապետարան

Երևանի քաղաքապետարանը համայնքային ծառայություններ իրականացնող պետական մարմին, որի նպատակն ու խնդիրն ավագանու և քաղաքապետի լիազորությունների լիարժեք և արդյունավետ իրականացման, ինչպես նաև քաղաքացիական իրավահարաբերություններին ավագանու և քաղաքապետի մասնակցության ապահովումն է։ Երևանի քաղաքապետը և ավագանին քաղաքապետարանի միջոցով համակարգում Երևանի ենթակայության հիմնարկների, առևտրային և ոչ առևտրային կազմակերպությունների գործունեությունը, կազմակերպում հանրապետական գործադիր մարմինների և դրանց՝ Երևանի տարածքային ծառայությունների հետ հարաբերությունները։

Քաղաքապետարանը ստեղծվում, վերակազմակերպվում և նրա գործունեությունը դադարեցվում է ավագանու որոշմամբ։

Երևանում փոխարինվել է 500 վերելակ․ կոճակների վրա բրայլյան գրեր կան տեսողության խնդիրներ ունեցող անձանց համար

Ավարտվել է 2020 թվականի վերելակների փոխարինման ծրագիրը։ Այս մասին տեղեկացրել է Երեւանի քաղաքապետ Հայկ Մարությանը։ Փոխարինվել է 500 վերելակ։ Քաղաքապետը տեղեկացնում է, որ ԱԻՆ փորձաքննություններից հետո բոլոր 500 վերելակները փաստացի հանձնված են շահագործման։ Հայկ Մարությանը որոշ մանրամասներ է ներկայացրել վերելակների հնարավորությունների հետ կապված։ Նա նշում է, որ վերելակի դռների բացվածքը 70-80 սմ է, ինչը թուլ է տալիս հաշմանդամություն ունեցող անձանց մուտք գործել վերելակ։ Կոճակների վրա բրայլյան գրեր կան տեսողության խնդիրներ ունեցող անձանց համար, ինչպես նաեւ գոյություն ունի ձայնային ազդանշան։ Ներսում կա հայերեն ուղեցույց։ Նաեւ Մարությանը նշում է, որ վերելակներն ունեն անվտանգության նորագույն համակարգ

23:03 - 12 փետրվարի, 2021

Առաջիկա օրերին Ծարավ Աղբյուրից կսկսի նոր ավտոբուսներով նոր երթուղի գործել |armenpress.am|

armenpress.am: Երևանի Ավան վարչական շրջանի Ծարավ Աղբյուր փողոցից փետրվարի 15-ից կսկսի նոր ավտոբուսներով նոր երթուղի գործել: Այս մասին ավագանու արտահերթ նիստի ժամանակ ասաց Երևանի քաղաքապետ Հայկ Մարությանը՝ պատասխանելով «Բարգավաճ Հայաստան» խմբակցության ավագանու անդամ Լյուդմիլա Սարգսյանի՝ քաղաքում առաջիկայում ներդրվող նոր երթուղիների վերաբերյալ հարցին: «Ցանկանում եմ ուրախությամբ տեղեկացել, որ փետրվարի 15-ից կսկսի նոր երթուղի գործել Ծարավ Աղբյուրից և այնտեղի բնակիչներն այսուհետև աշխատանքի կարող են գալ ոչ թե տաքսիներով, այլև մեր հարմարավետ, նոր ավտոբուսներով: Այդ ավտոբուսները Ծարավ Աղյուրից գնալու են մինչև ՋԷԿ»,- նշեց Մարությանը:

13:39 - 12 փետրվարի, 2021

Հայկ Մարությանը հայտնեց 8.5-մետրանոց 161 ավտոբուսների գնման մասի |1lurer.am|

1lurer.am: Երևանի ավագանու 6-րդ նստաշրջանի արտահերթ նիստի աշխատանքներին մասնակցել է ավագանու 35 անդամ, օրակարգում ընդգրկված է երեք հարց: Այս մասին հայտնեց Երևանի քաղաքապետ Հայկ Մարությանը: Քաղաքապետի տեղակալ Սերգեյ Ներսեսյանի խոսքով՝ ավագանու 2020 թ. դեկտեմբերի 23-ի 310-Ն որոշման մեջ փոփոխություններ կատարելու մասին Երևանի ավագանու որոշման նախագծով նախատեսվում է Երևան քաղաքի 2021 թ. բյուջեում իրականացնել որոշ փոփոխություններ: «Մենք նախատեսել ենք փոփոխությունները, բաշխումը կատարել հետևյալ խմբավորմամբ՝ 15 մլրդ 693 միլիոն 410 հազար դրամ բաշխումը հետևյալ սկզբունքով՝ ավտոբուսների ձեռքբերումների մասով նախատեսել ենք՝ 8 միլիարդից 4 միլիարդն ունեինք, 3 մլրդ 200 մլն ավելացնել, բացի դրանից՝ ավտոբուսների ձեռքբերման մասով նախատեսվում է ավելացնել 6 մլրդ 421 միլիոն դրամ: Վերելակների ձեռքբերման մասով պարտավորությունների մարումը 2021 թ. մեկնարկած վերելակների ծրագիրն ավարտին հասցնելու նպատակով՝ 2 մլրդ 155 միլիոն: Կնքված պայմանագրեր 100 ավտոբուսի մասով՝ 1 միլիարդ 350 միլիոն, նախատեսված պարտքի պայմանագրերի անցում-մարում՝ 125 միլիոն, ավտոբուսների մաքսազերծում, որը նախատեսվում է կատարել 1 միլիարդ, շինարարական բնույթի ծրագրերի համար նախատեսվում է 450 մլն դրամ, «Ակտիվ քաղաքացի» հարթակի մասով նախատեսվում է 107 միլիոն դրամ»,- տեղեկացրեց Ներսեսյանը: Հայկ Մարությանը տեղեկացրեց, որ անգլիական ընկերությունը նոր ավտոբուսային ցանց է նախագծել մեզ համար: Նախատեսված է, որ պետք է լինի մոտ 850 ավտոբուս, որից 450-ը լինելու է 7,5-8,5-մետրանոց, մնացածը՝ 12- և 18-մետրանոց ավտոբուսներ: «Այս պահին մենք հաստատում ենք 161 հատ 8,5-մետրանոց ավտոբուսների գնումը: Սա երկար և շատ դժվար աշխատանք է պահանջել, նաև գիտեք՝ առկա պայմաններում հանրապետության շատ գործարարներ և արտադրողներ վախենում են ներդրումներ անել, այսինքն՝ պայմանագրեր կնքել, բայց մենք վստահեցրել ենք, որ մենք մեր պարտականությունները վստահ կկատարենք, և իրենք էլ իրենց կողմից կկատարեն մատակակարումը: Ծրագիրը պետք է շարունակական լինի: Մենք ուզում ենք առաջին քայլով ձերբազատվել այդ միկրոավտոբուսներից»,- հայտնեց Մարությանը՝ տեղեկացնելով, որ 7,5-8,5-մետրանոց ավտոբուսները 90-95 տոկոս դեպքերում արտադրվում են Չինաստանում: «Մեզ համար կարևորը ոչ թե այն երկիրն է, որն արտադրում է, այլ կարևորը՝ ինչ պարամետրեր ենք մենք դրել, իսկ մենք դրել ենք այդ դասի մեջ ամենաորակյալ պարամետրերը, որը պահանջվում է Երևան քաղաքին: Ուզում եմ հպարտությամբ ասել՝ բավական շատ լավ գին ենք ստացել այս որակի ավտոբուսների համար, և եթե գործարքը կայանա, և ամեն ինչ լավ լինի, ու մատակարարումը լինի, կհամարեմ սա լավագույն ձեռքբերումը Երևանի համար»,- ասաց Երևանի քաղաքապետը:

13:15 - 12 փետրվարի, 2021

Շինարարությունը չպետք է անհարմարություն պատճառի Երևանի բնակիչներին. քաղաքապետ

Կորոնավիրուսային հիվանդությամբ պայմանավորված սահմանափակումների մասամբ վերացումից հետո քաղաքապետարանի հերթական աշխատանքային խորհրդակցությանը կրկին մասնակցել են գործընկեր կառույցների ներկայացուցիչները: Խոսելով օրակարգում ընդգրկված աշխատանքների ու ընթացիկ խնդիրների մասին՝ քաղաքապետ Հայկ Մարությանը մի շարք դիտարկումներ է ներկայացրել տարբեր ոլորտների վերաբերյալ: Հաշվի առնելով արդեն իսկ նկատվող շինարարական աշխատանքների ակտիվությունը՝ քաղաքապետը Ճանապարհային ոստիկանության ուշադրությունն է հրավիրել շինհրապարակներից կեղտոտ անվադողերով դուրս եկող բեռնատարների, ինչպես նաև բաց թափքով շինանյութ տեղափոխող մեքենաների խնդրին: «Շինարարությունը տնտեսության շարժիչ ուժն է, և քաղաքային իշխանությունն իր հերթին է խթանում ոլորտի զարգացումը: Սակայն ծավալուն շինարարությունը չպետք է անհարմարություն պատճառի քաղաքի բնակիչներին»,- ընդգծել է քաղաքապետը: Անդրադառնալով տրանսպորտային բարեփոխումների ընթացքին՝ քաղաքապետ Մարությանն առանձնակի կարևորել է նաև հասարակական տրանսպորտի կանգառներում այլ տրանսպորտային միջոցների կայանումն արգելելու խնդիրը: Ձեռք բերված 100 ավտոբուսների առաջին խմբաքանակը հետզհետե համալրում է քաղաքային երթուղիները: Ի դեպ, համայնքի միջոցներով 161 հատ 8,5 մետրանոց ավտոբուսների ձեռքբերման մրցույթը ևս դրական ընթացք ունի։ Հաղթող կազմակերպության հետ պայմանագիրը նախատեսվում է կնքել առաջիկայում, որից հետո վեց ամսվա ընթացքում ավտոբուսները կմատակարարվեն։ Քաղաքապետը «Վեոլիա ջուր», «Հայաստանի էլեկտրական ցանցեր» և «Գազպրոմ Արմենիա» ընկերություններին հորդորել է վթարավերականգնողական աշխատանքների ժամանակ տարածքներում տեղադրել անհրաժեշտ նշաններ, ինչպես նաև վթարը վերացնելուց հետո հսկողություն իրականացնել տարածքի բարեկարգման որակի ապահովման նկատմամբ: Քաղաքապետին զեկուցվել է, որ 2020թ. ծրագրով նախատեսված շուրջ 500 նոր վերելակների տեղադրումն ավարտված է. դրանք հանձնվել են շահագործման: Շրջիկ առևտրի կետերն արդեն այս տարվանից գործում են միայն քաղաքապետարանի թույլտվությամբ: Պահանջը սահմանված է օրենքով, իսկ շրջիկ առևտրի համար հատուկ վայրերն ու չափորոշիչները՝ ավագանու որոշմամբ: Զեկուցվել է, որ քաղաքապետարանն արդեն իսկ տնտեսվարողներից գործունեություն ծավալելու դիմումներ է ստանում: Սահմանված պահանջներին համապատասխանող հայտերն ստանում են թույլտվություն:

14:52 - 10 փետրվարի, 2021

Մինչև տարեվերջ բոլոր միկրոավտոբուսները շահագործումից դուրս կգան. Մարության |1lurer.am|

1lurer.am: Մոտ 250 միկրոավտոբուս, որոնց շահագործման ժամկետը 15 տարուց ավելի է, առաջիկա 3-6 ամսում դուրս են գալու երթուղուց, իսկ մինչև տարեվերջ շահագործումից դուրս են գալու բոլոր միկրոավտոբուսները: Այդ մասին ավագանու նիստում հայտարարեց Երևանի քաղաքապետ Հայկ Մարությանը՝ հիշեցնելով, որ Կառավարությունը որոշում է կայացրել այլևս չերկարաձգել դրանց շահագործման ժամկետը: Քաղաքապետը նշեց, որ միկրոավտոբուսները փոխարինվելու են կոմպակտ դասի նոր ավտոբուսներով: Նա հայտնեց, որ կայացել է 100 այդպիսի միկրոավտոբուսի համար մրցույթը, մատակարարումն այս պահին տեղի է ունենում, կավարտվի մինչև մարտի վերջ: Մարությանն ասաց, որ ընթացքի մեջ է 8.5 մետրանոց 161 ավտոբուսների ձեռքբերման մրցույթը, մոտ օրերին կհայտարարվի 8.5 մետրանոց ևս 135 ավտոբուսի մրցույթ: Առաջիկայում, ըստ քաղաքապետի, հայտարարվելու է նաև 12 մետրանոց 100 ավտոբուսի մրցույթը:

20:58 - 09 փետրվարի, 2021

Վարձույթով տրվող ու վաճառվող մեքենաների համար Երեւանի քաղաքապետարանը կայանման հատուկ տեղեր կառաջարկի |armtimes.com|

armtimes.com: Երեւանի քաղաքապետարանը մեքենաների կայանման հատուկ տեղեր կառաջարկի ավտոմեքենաների վարձույթով ու վաճառքով զբաղվող տնտեսվարողներին։ Այս մասին Երեւանի ավագանու այսօրվա նիստում հայտարարեց քաղաքապետարանի տրանսպորտի վարչության պետ Էդգար Գալստյանը՝ պատասխանելով հարցը բարձրաձայնած ավագանու անդամին։ Մայրաքաղաքի տարբեր հատվածներում կայանված մեքենաների խնդրին անդրադարձավ ավագանու «Իմ քայլը» խմբակցության անդամ Արթուր Իսպիրյանը, նշելով, որ Երեւանում բազմաթիվ են փողոցները, որտեղ կայանված են «վարձույթով է տրվում», կա՛մ «վաճառվում է» գրություններով մեքենաները։ Գալստյանը հայտնեց, որ այդ հարցը բազմիցս քննարկվել է, եւ կանոնակարգումը հիմնականում ենթադրում է օրենսդրական փոփոխություններ։ Նա նաեւ հավելեց, որ օրենսդրական փաթեթեն արդեն ամբողջությամբ պատրաստ է ու ուղարկվել է Ազգային ժողով։ Գալստյանը հայտնեց, որ այդ հարցը բազմիցս քննարկվել է, եւ կանոնակարգումը հիմնականում ենթադրում է օրենսդրական փոփոխություններ։ Նա նաեւ հավելեց, որ օրենսդրական փաթեթեն արդեն ամբողջությամբ պատրաստ է ու ուղարկվել է Ազգային ժողով։

17:51 - 09 փետրվարի, 2021

Երևանի ավագանին որոշում է կայացրել միավորել նույն գործառույթ իրականացնող երկու բաժինները |armenpress.am|

armenpress.am: Երևանի քաղաքապետարանում ստեղծվել է քաղաքաշինության, հողօգտագործման և կոմունալ տնտեսության կառավարման բաժին: Նման նախագիծ ընդունվեց Երևան քաղաքի ավագանու 6-րդ նստաշրջանի 1-ին նիստում: Կենտրոն վարչական շրջանի ղեկավար Ավետ Պողոսյանը ներկայացրեց մի նախագիծ, որով առաջարկվում է աշխատակազմի նույն գործառույթ իրականացնող երկու բաժինների միավորել և դրա արդյունքում ավելի արդյունավետ աշխատող մեկ բաժին ստեղծել: Նախագծով առաջարկվել էր վերակազմակերպել աշխատակազմի «Կոմունալ տնտեսության և բազմաբնակարան շենքերի կառավարման մարմինների հետ աշխատանքների կազմակերպման» և «Քաղաքաշինության և հողօգտագործման» բաժինները և ստեղծել մեկ նոր բաժին՝ «Քաղաքաշինության, հողօգտագործման և կոմունալ տնտեսության կառավարման» անվանումով: Ուսումնասիրությունները և վերլուծությունները կատարելիս հաշվի են առնվել քաղաքաշինության և կոմունալ տնտեսության ոլորտների փոխկապակցվածությունը և այդ բնագավառներում «Երևան քաղաքում տեղական ինքնակառավարման մասին» օրենքի 94-րդ հոդվածում Երևանի վարչական շրջանների ղեկավարներին վերապահված լիազորությունների համատեղված լինելը, ինչպես նաև տնտեսական բաղադրիչը՝ համաձայն որի աշխատավարձի ֆոնդի տարեկան տնտեսումը կազմելու է 5 միլիոն 904 հազար ՀՀ դրամ:

16:25 - 09 փետրվարի, 2021

Բլեյանի դպրոցի եւ N 93 մանկապարտեզի միջեւ ցանկապատ կլինի․ Մարությանը հաստատեց |armtimes.com|

14:30 - 09 փետրվարի, 2021

Մանկապարտեզների ընդունելության և վերընդունելության համար սահմանվել են առաջնահերթության խմբեր

Նոր կորոնավիրուսային համավարակի տարածման կանխարգելման նպատակով ՀՀ առողջապահության նախարարության նախատեսած սահմանափակումների համաձայն՝ 2020-2021 ուստարում Երևանի ենթակայության մանկապարտեզներում ընդունելությունը չի կազմակերպվել: Այս մասին տեղեկացնում է Երևանի քաղաքապետարանը: Միաժամանակ սահմանափակված է նաև խմբերում ընդգրկված երեխաների քանակը: Արդյունքում՝ ներկայումս նախադպրոցական կրթությունը ընդհատել է և մանկապարտեզ չի հաճախում շուրջ 3000 երեխա, իսկ հերթագրվածների թիվը գերազանցում է 12000-ը: Խնդրին հնարավոր լուծում տալու նպատակով Երևանի քաղաքապետարանը նախաձեռնել է քննարկումներ պետական լիազոր գերատեսչությունների հետ, որոնց արդյունքում սահմանափակումները որոշակիորեն կմեղմացվեն: ◼️ Երեխաների վերընդունելությունը կկազմակերպվի ըստ ներքոհիշյալի: Նախադպրոցական կրթությունն ընդհատած երեխաներին կվերընդունեն այն հաստատությունները, որոնց խմբասենյակների տարածքը և պայմաններն ունեն հակահամաճարակային անվտանգության կանոնները պահպանելու հնարավորություն: Այս դեպքում առաջնահերթ կընդգրկվի այն երեխան, որի ծնողը՝ • զոհվել է ռազմական գործողությունների ժամանակ, • 1-ին կարգի հաշմանդամ է կամ ունի ծանր հիվանդության եզրակացություն, • ծնողներից մեկը մահացած է: Այնուհետ, ըստ առկա տարիքային խմբերի, առաջնահերթություն կտրվի այն երեխաներին, որոնց երկու ծնողը գրանցված աշխատող են: ◼️ Հերթագրված երեխաների ընդունելություն Այն մանկապարտեզները, որոնք ունեն հակահամաճարակային անվտանգության կանոնները պահպանելու հնարավորություն, կկարողանան կազմակերպել նաև հերթագրված երեխաների ընդունելություն: • Այս դեպքում առաջնահերթություն կտրվի այն երեխաներին, որոնց ծնողը զոհվել է ռազմական գործողությունների ժամանակ: • Արտահերթ ընդունելության իրավունք ունեցող մյուս երեխաները կընդունվեն ըստ հերթագրման օրվա հաջորդականության: Այնուհետ, ըստ առկա տարիքային խմբերի, երեխաների ընդունելությունը կկատարվի հերթագրման հաջորդականությամբ: Հարկ ենք համարում տեղեկացնել նաև, որ 2020 թվականի ծրագրով հիմնանորոգված մանկապարտեզներն առաջիկայում կվերաբացվեն, և մանկապարտեզներում երեխաների ընդգրկվածության պատկերը դրականորեն կփոխվի: Երևանի քաղաքապետարանը շարունակում է մշտական կապ պահպանել լիազոր գերատեսչությունների հետ: Համաճարակային իրավիճակի բարելավմանը զուգընթաց ակնկալվում են սահմանափակումների հետագա մեղմացումներ, որոնց մասին կտեղեկացնենք հանրությանը:

13:35 - 09 փետրվարի, 2021

Երևանի քաղաքապետարանը նախատեսում է հիմնանորոգել 12 մանկապարտեզ, ևս 3-ը կառուցել |armenpress.am|

armenpress.am: Երևան քաղաքի ավագանու 6-րդ նստաշրջանի 1-ին նիստում հաստատվեց Երեւանի քաղաքապետարանի եւ Եվրոպական ներդրումային բանկի միջեւ 2018 թվականի հունիսի 8-ին կնքված «Երեւանի էներգաարդյունավետության» ծրագրի դրամաշնորհային համաձայնագիրը: Նախագծի մեջ նշվում է, որ Երեւանի քաղաքապետարանի եւ Եվրոպական ներդրումային բանկի միջեւ «Երեւանի Էներգաարդյունավետության» ծրագրի շրջանակներում 2017թ. դեկտեմբերի 1-ին կնքվել է fինանսական պայմանագիր։ Նշված ֆինանսական պայմանագիրը հաստատվել է Երեւան քաղաքի ավագանու կողմից 2017թ. դեկտեմբերի 26-ին: «Երեւանի էներգաարդյունավետության» ծրագրի իրականացման անհրաժեշտությունից ելնելով` Երեւանի քաղաքապետարանի եւ Եվրոպական ներդրումային բանկի միջեւ 2018 թվականի հունիսի 8-ին կնքվել է 5 մլն եվրո գումարի դրամաշնորհային համաձայնագիր: Ընդհանուր ծրագրի արժեքը կազմել է 15 միլիոն եվրո: Քաղաքապետի տեղակալ Հրաչյա Սարգսյանը նշեց, որ ծրագրի շրջանակում նախատեսվում է մանկապարտեզների կապիտալ վերանորոգում և սեյսմիկ անվտանգության միջոցառումների իրականացում: Նրա խոսքով` դրամաշնորհ ստանալու համար անհրաժեշտ է Երեւանի ավագանու հավանությունը: «Այս ծրագրով նախատեսված է հիմնանորոգել 12 և կառուցել 3 նոր մանկապարտեզ: 2020-ին 11 մանկապարտեզի կապիտալ վերանորոգում ենք իրականացրել համայնքային միջոցների հաշվին: Դրանցից 9-ը շահագործման է հանձնված, մյուս երկուսը շահագործման կհանձնվեն մոտակա օրերին»,- եզրափակեց Սարգսյանը:

13:00 - 09 փետրվարի, 2021

Երևանի ավագանու նախկին անդամ Գայանե Մելքոմ Մելքոմյանի մանդատը փոխանցվեց Անուշ Քլոյանին |armenpress.am|

armenpress.am: Երևանի ավագանու «Իմ քայլը» դաշինքի ընտրական ցուցակից ընտրված և լիազորությունները վաղաժամկետ դադարեցրած Գայանե Մելքոմ Մելքոմյանի մանդատը տրվել է դաշինքի հերթական թեկնածու Անուշ Քլոյանին: Երևան քաղաքի ավագանու 6-րդ նստաշրջանի 1-ին նիստում այս մասին հայտարարեց Երևանի քաղաքապետ Հայկ Մարությանը: 2020 թվականի դեկտեմբերի 22-ին Գայանե Մելքոմ Մելքոմյանը նշանակվել է Երևանի քաղաքապետի տեղակալ։

12:00 - 09 փետրվարի, 2021

Երևանի քաղաքապետարանի դիմաց մի խումբ ծնողներ պահանջում են վերսկսել մանկապարտեզների ընդունելությունը |armenpress.am|

armenpress.am: Երևանի քաղաքապետարանի շենքի դիմաց մի խումբ ծնողներ փետրվարի 8-ին բողոքի ակցիա են իրականացրել` պահանջելով հստակություն, թե երբ են մանկապարտեզներում վերսկսվելու ընդունելությունները: Բողոքող ծնողներից մեկը նշեց, որ մեկ տարի կարանտինային ռեժիմում սպասելով ծնողները համբերել են, սակայն քաղաքապետարանը հստակ բան չի ասում: Երևանի քաղաքապետի մամուլի քարտուղար Հակոբ Կարապետյանն ասաց, որ քաղաքապետարանը ոչ միայն տեղյակ է այդ խնդրին, այլ նաև քայլեր է ձեռնարկում մանկապարտեզներում հավելյալ տեղեր ավելացնելու հետ կապված: «Անցած տարի համավարակի պատճառով ընդունելություն չի եղել և մինչև օրս ընդունելություն չկա, ինչպես նաև մանկապարտեզներում հաճախելիության սահմանափակում է մտցվել: Երևանի քաղաքապետարանը հետևում է բացառապես Կառավարությունից եկող ցուցումներին»,- ասաց Կարապետյանը: Նրա խոսքով` Երևանի քաղաքապետարանի համապատասխան ստորաբաժանումները և համակարգող փոխքաղաքապետը նախաձեռնել են քննարկումներ համապատասխան գերատեսչությունների հետ՝ այս հարցին լուծում տալու նպատակով, հասկանալով շատ աշխատող ծնողներ երեխաներին թողնելու տեղ և հնարավորություն չունեն:

13:14 - 08 փետրվարի, 2021

Երևանի նոր ավտոբուսներն ընդունելու են միայն 100 դրամանոցներ

Երևանում փետրվարի 5-ին գործարկված թիվ 26 երթուղու և հետագայում շահագործվելիք ավտոբուսներն ընդունելու են միայն 100 դրամանոց մետաղադրամներ։ Ինչպես տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից՝ նշելով, որ Երևանի ձեռք բերած նոր ավտոբուսների առաջին խմբաքանակն սկսել է աշխատանքը: Հաղորդագրության մեջ նշված է. «26 համարի երթուղին, որն Աջափնյակի Լուկաշին թաղամասը քաղաքի կենտրոնով կապում է Նորք Մարաշին, որոշակիորեն կթեթևացնի բնակիչների հոգսը: Երևանի քաղաքապետ Հայկ Մարությանը տեղեկացրել է, որ առաջիկայում երթուղի դուրս կգան մնացած ավտոբուսները, իսկ նոր երթուղիների մասին կտեղեկացնենք լրացուցիչ: Մի քանի նկատառում ուղևորների համար. պետք է վճարել նստելիս։ Մետաղադրամ ընդունող սարքը «վերցնում է» միայն 100 դրամանոցներ։ Եթե չունեք 100 դրամանոց, վարորդն սկզբնական շրջանում կարող է մանրել, բայց խիստ ցանկալի է ունենալ 100-դրամանոցը։ Շուտով կունենանք նաև էլեկտրոնային վճարման համակարգ, ավտոբուսի սրահը տեսահսկվում է՝ ուղևորների և, ընդհանրապես, երթևեկության անվտանգության նկատառումներից ելնելով, վարորդները հատուկ համազգեստով են, հատուկ հրահանգավորված են երթևեկության ընթացքում չծխելու և հեռախոսով չխոսելու պահանջի մասին: «Տրանսպորտի ռեֆորմը բնականոն ընթացքի մեջ է: Միասին բոլոր խնդիրները լուծելու ենք՝ հաջորդաբար», - ասել է Երևանի քաղաքապետը»:

21:50 - 05 փետրվարի, 2021

Երևանում շահագործման է հանձնվել նոր միկրոավտոբուսներից բաղկացած առաջին երթուղին

Երևանում շահագործման է հանձնվել ներկրված նոր միկրոավտոբուսներից բաղկացած առաջին երթուղին։ Այս մասին հայտնում է Աջափնյակ վարչական շրջանի «Ֆեյսբուք»-ի էջը: «Հարգելի՛ աջափնյակցիներ, ուրախ ենք տեղեկացնել, որ այսօր երթուղի են դուրս եկել Երևան ներկրված նոր ավտոբուսները։ Այսուհետ 26 համարի միկրոավտոբուսը կսպասարկի Աջափնյակ վարչական շրջանի Խոպան կոչվող թաղամասից Նորք-Մարաշ վարչական շրջան երթուղին»,- ասված է գրառման մեջ:

18:56 - 05 փետրվարի, 2021

Առցանց դիմումին՝ առցանց պատասխան. Երևանի քաղաքապետարանն իրազեկում է

Որպեսզի հերթում երկար չսպասեք ու խնայեք ժամանակը, Երևանի քաղաքապետարան դիմումներ ուղարկել ու արդեն նաև պատասխաններն ամբողջությամբ ստանալ հնարավոր է առցանց: Դրա համար պետք է մի քանի քայլ կատարել. մուտք գործել yerevan.am կայք, անցնել «Մեկ պատուհան» կամ «Էլեկտրոնային ծառայություններ» բաժինները, ընտրել դիմումի տեսակը, ներբեռնել ձևը, անհրաժեշտ փաստաթղթերի ցանկն ու ուղարկել նամակը:«Այսուհետ քաղաքացիներն իրենց էլեկտրոնային նամակների վերաբերյալ կստանան երեք ծանուցում, առաջինը` դիմումը ներկայացնելու պահին, երկրորդը՝ վարույթ ընդունելու վերաբերյալ և երրորդը՝ դիմումի ավարտի մասին: Մինչ այդ նաև դիմումի ավարտի մասին կստանան sms հաղորդագրություն»,- նշում է «Երևան քաղաքի կառավարման տեխնոլոգիաների կենտրոն» ՓԲԸ տնօրեն Սարգիս Մանուկյանը: «Քաղաքապետարանը խրախուսում է, որ բնակչությունը դիմի էլեկտրոնային եղանակով, և աստիճանաբար այն կավելացնենք»,- ընդգծում է Երևանի քաղաքապետարանի աշխատակազմի քարտուղարի պաշտոնակատար Դավիթ Համբարյանը: Քաղաքացիների համար էլեկտրոնային ծառայությունների ծավալն ավելացնելու և դրանցից օգտվելն առավել հարմարվետ դարձնելուն զուգահեռ՝ քաղաքապետարանը նաև ներքին գրագրությունն ու թղթաբանությունն է նվազեցրել: «Քաղաքապետի կողմից կա մոտեցում՝ ներքին փաստաթղթաշրջանառությունը հնարավորինս թվայնացնելու»,- ասում է Դավիթ Համբարյանը: Եթե 2018 թ. Երևանի քաղաքապետարանն ստացել էր ընդամենը 2600 էլեկտրոնային դիմում, ապա 2019-ին այդ թիվը կազմել է 4100, իսկ 2020-ին արդեն՝ 13600, ինչն ընդհանուր նամակների թվի մոտ 5-6 տոկոսն է: «Աճի տեմպերը վկայում են, որ կա միտում՝ տեղափոխվելու թվային դաշտ, որն ավելի հեշտացնում և արագացնում է պատասխանների տրամադրումը»,- նկատում Դավիթ Համբարյանը: Քաղաքային իշխանությունը մտադիր է հետագայում թվայնացնել բոլոր ծառայությունները: Նպատակը մեծ է, անելիքները՝ շատ: Մինչ այդ այս տարի բնակիչներին հասանելի կդառնա ևս մի քանի նոր ծառայություն: «Այս տարի մենք նախատեսում ենք ամբողջությամբ վերափոխել www.yerevan.am կայքը՝ թե՛ դիզայնի, թե՛ ներքին աշխատանքի առումով: Բացի այդ, կհայտնվեն բազմաթիվ էլեկտրոնային ծառայություններ, որոնց համար նախկինում քաղաքացիները ստիպված էին դիմել վարչական շրջանների աշխատակազմեր կամ քաղաքապետարանի «Մեկ պատուհան» գրասենյակներ, ինչպես, օրինակ, ալկոհոլի կամ հանրային սննդի լիցենզիայի համար»,- ասում է Երևանի քաղաքապետարանի տեղեկատվության և հասարակայնության հետ կապերի վարչության պետ Հովսեփ Կուբատյանը: Էլեկտրոնային ծառայությունները թեև 2020-ին առավել արդիական դարձան համավարակով պայմանավորված սահմանափակումներով, բայց շատերը դեռևս նախընտրում են հենց այդ տարբերակը՝ խուսափելով հերթերից ու ժամանակն ավելորդ վատնելուց:

18:15 - 03 փետրվարի, 2021

Նոր ավտոբուսները կշահագործվեն առաջիկա օրերին․ Հակոբ Կարապետյանը՝ հայտարարված ժամկետից ուշացման մասին |armtimes.com|

armtimes.com։ Երեւանում նոր ավտոբուսների շահագործումը հետաձգվել է։ Քաղաքապետի խոսնակ Հակոբ Կարապետյանը վստահեցրեց՝ ուշացումը կտեւի միայն մի քանի օր։ Ավելի վաղ հայտարարվել էր, որ նոր ավտոբուսները երթուղի դուրս կգան այս տարվա հունվարին, ինչը, փաստորեն, տեղի չունեցավ։ Կարապետյանի պարզաբանմամբ՝ ձգձգումը կապված է փաստաթղթավորման գործընթացի հետ, որը տեւեց ավելի երկար, քան նախատեսում էին ի սկզբանե։ Ձեռքբերված նոր ավտոբուսները քաղաքապետարանը պետք է անհատույց օգտագործման հանձնի իր ենթակայությամբ գործող «Երեւան ավտոբուս» ՓԲԸ-ին, որպեսզի վերջինս կարողանա շահագործել այդ մեքենաները։ Խնդիրը, ըստ նրա, կապված է միայն այդ ձեւակերպումները ձգձգվելու հետ։ Ինչ վերաբերում է ավելի վաղ տարածված այն տեղեկություններին, թե ավտոբուսների ձեռքբերման գործընթացում չարաշահումներ են հայտնաբերվել, ու նույնիսկ հնարավոր է՝ քրեական գործ հարուցվի, Հակոբ Կարապետյանը անհեթեթություն որակեց։ «Անհեթեթություն է։ Բամբասանքներ չեմ մեկնաբանում»,- ասաց նա։ Երեւան համայնքի միջոցներով ձեռք բերված կոմպակտ դասի 100 փոքր ավտոբուսներից 30-ը, որոնք արդեն քաղաքում են եւ պետք է շահագործվեին հունվարից, առաջիկա օրերին կշահագործվեն 3 երթուղիներում։ Խոսքը նախկին 26, 99 միկրոավտոբուսային երթուղիների մասին է, իսկ երրորդը կլինի նոր երթուղի։ Հակոբ Կարապետյանը նշեց, որ ավտոբուսները շահագործվելու ժամկետը հետաձգվելուց բացի՝ այլ փոփոխություն նախատեսված չէ։

15:12 - 01 փետրվարի, 2021